Jesús tu tuchiꞌtic caꞌ xicob a setentajoꞌ
10
Caj tsꞌoc u tsicbar tiꞌ a mac a ju cꞌat u tarob tu pach Jesús caj u tetaj u jerob setenta u camsʌwinicob.
Caj u tuchiꞌtaj caꞌ caꞌturob ich tu cotor u chan cajar.
Baxuc ich tu cotor u yajaw cajar xan.
Rajiꞌob cu yʌn binob.
Pachir cu cꞌuchur Jesús.
Lucas 10.1-42
―Tiꞌ yʌn mac pim u cꞌat yubicob u tꞌʌn Cꞌuj chen a cu beyajob,
mʌꞌ nepimiꞌ a cu tsecꞌticob u tꞌʌn Cꞌuj tiꞌob.
Aroꞌ irej wa tiꞌ yʌn jach yaꞌab u trigo quir u wʌtic.
Chen mʌnaꞌ mac quir u wʌtic.
Rajen caꞌ a tꞌʌnex Cꞌuj soc u tuchiꞌtic mac quir u bin u tsicbʌtic u tꞌʌn Cꞌuj soc cꞌuchaꞌan yorob u yubicob u tꞌʌn Cꞌuj.
3 Bajeꞌrer caꞌ xiquechex tu caj in waꞌaraj a binex.
Jeꞌ a wiricobexeꞌ irob barum.
Robob cu bin yiriquechexob irechex tʌmʌn yuc.
An ten bic barum u cꞌat u chiꞌic tʌmʌn yuc.
Baxuc a xiboꞌ u cꞌat quinsiquechexob.
4 Caꞌ bin xiquechex mʌꞌ ja yʌn chꞌiquex a chimex,
u boxer a taqꞌuinex mʌꞌ ca chꞌiquex.
Mʌꞌ ja chꞌiquex a pechꞌ xʌnʌb,
tsꞌot a bin beyajex.
Mʌꞌ ja yʌn wecꞌ tꞌʌniquex mac tu ca binex a tsecꞌtiquex u tꞌʌn Cꞌuj.
5 Caꞌ bin yʌn ocaquex ich yatoch mac,
yʌn arex tiꞌ tu ca tꞌʌnic:
“In cꞌat caꞌ quiꞌac a worex tiꞌ Cꞌuj a mac tiꞌ yʌn ich yatoch teraꞌ.”
6 Wa tiꞌ yʌn mac a tabar u quiꞌ tar yor tiꞌ Cꞌuj,
jeꞌ u bin quiꞌ tar yor tiꞌ Cꞌuj.
An ten bic techex caj a cꞌatajex tiꞌ.
Chen wa tiꞌ yʌn mac mʌꞌ u quiꞌtar yor tiꞌ Cꞌuj.
Aroꞌ mʌꞌ ju bin quiꞌ tar yor tiꞌ Cꞌuj.
A bʌjiriꞌex ca bin a waquex tiꞌ:
“Jeꞌ in wʌcꞌʌs chꞌic a baꞌ caj in waꞌaraj techex u quiꞌir yor Cꞌuj.”
7 Tiriꞌ ca pꞌatʌrex ich yatoch a tu yacsechex mʌꞌ a caꞌ cay binex ich u jer naj.
Janʌnex ucꞌurnenex xan a baꞌ cu tsꞌic techex an biquex a janʌnex ta watochex.
Irechex a mac cu cꞌʌmic u boꞌorir u beyaj quireꞌ raꞌ u boꞌorir tu ca beyajex.
8 Wa ca wocarex ich u chan cajar tu cu yacsiquechex,
toc jantechex baꞌ cu tsꞌictechex.
9 Jawsex u yajir tu ca binex ich u chan cajar.
Yʌn arex tiꞌ:
“Toc tiꞌ yʌnechex bajeꞌraꞌ quireꞌ toc cꞌuchij tu qꞌuinin tu ca bin a reyintiquex Cꞌuj.”
10 Wa ca wocarex ich u chan cajar tu mʌꞌ u yacsiquex,
toc ruqꞌuenex ich tan bej ich u cajar.
Ca waquex tiꞌob:
11 “Cax u ruꞌumin a cajarex a cu nichꞌir tin woc quin toc pusticob tin wocob quireꞌ cꞌas caj a betajex.
A baywoꞌ quin toc aric techex cꞌuchij tu qꞌuinin Cꞌuj caꞌ bin a reyintiquex,
chen mʌꞌ a cꞌat a reyintiquex Cꞌuj.”
Baxuc yʌn a waquex tiꞌ mac a mʌꞌ u yacsiquex.
12 Jesús caj yaꞌaraj tiꞌ u camsʌwinicob a setentajoꞌ:
―Chen a tenoꞌ quin wac techex caꞌ bin xuruc tꞌʌn a ra cajaroꞌ a mʌꞌ tu yacsajechex,
jach manan cu bin tsꞌabʌr u mucꞌyajob ten Cꞌuj.
Chen u cajar Sodoma,
mʌꞌ u nebin mucꞌyajob a chꞌesaꞌb ten Cꞌuj yejer cꞌacꞌ uch.
U cajarob a mʌꞌ tu cꞌʌmajob u tꞌʌn Cꞌuj
13 Tiꞌ toy cu tsicbar Jesús tiꞌ a setentajoꞌ caj yaꞌaraj:
―Jach otsir techex ich u cajar Corazín.
Baxuc otsirechex ich u cajar Betsaida.
Jaj ixtʌcoꞌ wa tiꞌ yʌn mac uch ich u cajar Tiro yejer u cajar Sidón caj u yesej u carem beyajob.
An ten bic caj in wesaj techex carem beyajob.
Robob a tiꞌ yʌnob uch ich u cajar Tiro yejer Sidón.
Tabar ix tiꞌ uchoꞌ caꞌ bin u cꞌaxicob yorob tan a pꞌʌticob u manob tu cꞌasir.
Jaj ix tiꞌ caj u buquintajob u rabir u nocꞌ.
Baxuc caj u postaꞌantajob u joꞌrob yejer cꞌutaꞌan soc yer mac tucur u caꞌob.
An ten bic mac nanij cu beticob uch.
14 Caꞌ bin xuruc tꞌʌn a techex a cʌjaꞌanechex ich u cajar Corazín yejer Betsaida.
Jach manan ca bin mucꞌyajex chen a mac a cʌjaꞌanob uch ich u cajar Tiro yejer Sidón,
mʌꞌ ju bin nemucꞌyajob.
15 A techex ca tucriquex ich a cajar Capernaum jach noꞌjechex yiriquechex Cꞌuj.
Chen Cꞌuj mʌꞌ ju yiriquechex wa jach noꞌjechex cu bin u puriquechex ich cꞌacꞌ munt qꞌuin quireꞌ mʌꞌ ta wacsajex ta wor tiꞌ ten.
16 ’A mac a cu quibiquex a tꞌʌnex baxuc ten cu quibob in tꞌʌn xan.
A maqueꞌ mʌꞌ ju cꞌʌmic a baꞌ ca waquex tiꞌob.
Baxuc ten mʌꞌ u cꞌʌmicob a baꞌ quin wac tiꞌob.
Baxuc a mac mʌꞌ ju cꞌʌmicob a baꞌ quin waꞌaric tiꞌ.
Mʌꞌ tan u cꞌʌmic a baꞌ cu yaꞌaric Cꞌuj quireꞌ rajiꞌ caj u tuchiꞌtajen.
Caj urob a setenta tuchiꞌtaꞌb ten Jesús
17 Caj urob a setentajoꞌ tub binob u tsecꞌticob u tꞌʌn Cꞌuj.
Jach quiꞌ yorob caj urob ich Jesús,
caj yaꞌarajob:
―Jaj Tsꞌurir,
cax cꞌacꞌas quisinob caj u yubob ic tꞌʌnob caj ij caraj tiꞌob:
“Quisin,
ich u cꞌabaꞌ Jesús,
caꞌ xiquex”,
jeroj joqꞌui.
18 Jesús caj yaꞌaraj tiꞌob:
―A tenoꞌ caj in wiraj a rubsiquex u mucꞌ a quisinoꞌ.
Seb caj in wiraj a rubsiquex u mucꞌ a quisinoꞌ.
19 Mʌꞌ ja wirej,
an ten bic cꞌuchaꞌan a worex tiꞌ a jocꞌsiquex quisin quireꞌ a tenoꞌ caj in jʌsatechex in mucꞌ.
Baxuc xan ca pechꞌʌctiquex can a yʌc u cojoꞌ,
cax roroch mʌꞌ ja bin a wuꞌiquex yajir.
Baxuc caj in jʌsatechex in mucꞌ soc mʌꞌ a sʌjtiquex a quisin quireꞌ cꞌuchaꞌan a worex tiꞌ.
20 Mʌꞌ a chen quiꞌquintex a worex quireꞌ a cꞌacꞌas quisinoꞌ caj u yubajob a tꞌʌnex,
barej jach quiꞌquintex a worex quireꞌ tiꞌ tsꞌibaꞌan ich u juꞌunin Cꞌuj a cꞌabaꞌ techex.
Quireꞌ tiꞌ tsꞌibaꞌan a mac a caj u yacsajob tu yorob.
Caj quiꞌjij yor Jesús
21 Raꞌiriꞌ u qꞌuinin caj quiꞌquintaꞌb yor Jesús ten u Tajꞌor u Pixam Cꞌuj,
Jesús caj yaꞌaraj tiꞌ Cꞌuj:
―Jach caremech Cꞌuj,
in tetech,
cax caꞌananoꞌ cax yocꞌocaboꞌ.
U jach tsꞌurirech quireꞌ tech ta rʌc betaj tu cotor baꞌ.
Jach caremech Cꞌuj ―quij―.
Mʌꞌ ja wirej,
caj a jʌsa a mucꞌ tiꞌ a mac a mʌꞌ yerob juꞌun soc u jocꞌsicob cꞌacꞌas quisinob soc cꞌuchaꞌan yorob tiꞌ a jach quisinoꞌ.
Mʌꞌ ta tsꞌaja u najtejob a baꞌ a cꞌat tiꞌ a mac u neꞌerob baꞌ quireꞌ baxuc a cꞌat tech.
22 ’Jesús caj yaꞌaraj tiꞌ a mac tiꞌ yʌnob yejerob setenta.
Tu cotor mac a tenoꞌ cu bin u tsꞌurintiquen quireꞌ baxuc u cꞌat Cꞌuj.
Mʌnaꞌ mac yer u parareniꞌ ―quij Jesús―,
chen in Tet yer maqueniꞌ.
Mʌnaꞌ mac yer mac in Tet chen ten quireꞌ u pararen.
Rajen u jer mac cꞌuchaꞌan yor yer Cꞌuj wa quin chaꞌic u najtic.
23 Caj binob tu junan Jesús yejer u camsʌwinicob.
Caj u pʌctaj caj yaꞌaraj tiꞌob:
―Quiꞌquintej a worex quireꞌ a baꞌ ca wiriquex in camsic baxuc quireꞌ ca wiriquenex.
24 Quireꞌ yʌn yaꞌab yʌjtseqꞌuirob u tꞌʌn Cꞌuj uch.
Baxuc reyob xan,
quireꞌ u cꞌat yiriquenob uch,
chen mʌꞌ yirenob uch cax u cꞌatob yubicob a baꞌ quin camsic an bic techex ca wiriquenex in camsicob,
chen mʌꞌ tu yubob.
Jesús cu camsic a mac u jach tsoy yiric u racꞌob
25 Cꞌuchij tuririꞌ mac ich Jesús.
A cu camsic u tꞌʌn Moisés.
Tar u tumtic yor Jesús tu cu camsic mac.
Caj u cꞌata tiꞌ:
―In wʌjcamsʌyʌjirech ―quij―,
baꞌ quin bin in betej quir in cuxtar munt qꞌuin?
26 Caj nuncaꞌ ten Jesús:
―Baꞌ tsꞌibaꞌan ich u tꞌʌn Cꞌuj tu ca xaquic?
27 Yʌjcamsʌyʌjir u tꞌʌn Moisés caj u nunca:
―U tꞌʌn Cꞌuj cu yaꞌaric:
“Quet caꞌ ic yajquintej ic Jaj Tsꞌurir yejer tu cotor ic pixam yejer tu cotor ic mucꞌ yejer tu cotor ic tucur ich ic joꞌr.”
Baxuc caꞌ ic yajquintej ij quet cajar.
An ten bic ic yajquintic ic wʌcꞌʌs bʌjiriꞌ.
28 Caj araꞌb ten Jesús:
―Taj a baꞌ caj a nuncaj.
Wa ca betic baxuc aroꞌ,
yʌn a cuxtar munt qꞌuin.
29 Quireꞌ cu tucric mʌꞌ quiꞌ nuncꞌab ten Jesús.
Rajen caꞌ u cꞌataj tiꞌ Jesús:
―Mac in wet cajariꞌ quir in yajquintic?
30 A baywoꞌ caj u nuncaj Jesús soc u camsic:
―Caj binij turiꞌ winic ich u cajar Jericó.
Tiꞌ ruqꞌuij ich u cajar Jerusalén.
Caj u nupꞌaj mac a cu yacꞌrʌꞌ baꞌ.
Caj chuc ten yʌjacꞌrʌꞌ yʌjirob baꞌ rʌc acꞌraꞌb u baꞌtac cax u buquimʌn u nocꞌ rʌc chꞌaꞌb tiꞌ,
caj tsꞌoc u rʌj jʌtsꞌic,
irej wa quimen caj u pꞌʌtajob.
31 Raꞌiriꞌ u qꞌuinin caj manij sacerdote ich bej tu charaꞌan a mac jatsꞌ irej quimen.
Caj yiraj chariqueꞌ nach caj man.
32 Baxuc caj tar u winiquir judío u yoꞌnen Leví,
raꞌ cu beyaj ich carem naj.
Caj yira charic a mac jatsꞌ caj u pot mastaj.
33 Caj tar u winiquir u cajar Samaria nach u tar caj tarij tan u natsꞌʌr tu charaꞌan a mac jʌtsꞌaꞌan.
Caj u yiraj charic caj u yajquintaj.
34 U winiquir samaria caj cꞌuchij tu charaꞌan a xiboꞌ a jʌtsꞌaꞌanoꞌ caj u tsꞌʌcaj tu cꞌorij tut jatsꞌ caj u jicꞌtaj tsats yejer u cꞌab u wich uva quir u jawʌr.
Caj u nacsaj tu pach u tsimin quireꞌ raꞌ u tsimin caj bin u puric quir u cʌnantaꞌ tiꞌ tu tu mʌjantaj yatoch.
35 Caj sasij quireꞌ bin u caꞌ u winiquir samaria.
Caj u chʌc jaraj u taqꞌuin caꞌ turur u sʌc taqꞌuin caj u tsꞌaja tiꞌ a mac yʌnin yatoch.
Caj yaꞌaraj tiꞌ:
“Cʌnantej a jeꞌ xibaꞌ wa ca rʌc xupic a taqꞌuin tiꞌ a mac caꞌ bin uquen jeꞌ in boꞌotiquech.”
Baxuc caj yaꞌaraj Jesús tiꞌ.
36 Caj tsꞌoc u tsicbar Jesús tiꞌ a jʌtsꞌaꞌan caj u cꞌataj tiꞌ yʌjcamsʌyʌjir u tꞌʌn Moisés:
―Arej ten ich a mʌnaꞌ u nup xiboꞌ a mac caj u yajquintaj?
37 Caj yaꞌaraj yʌjcamsʌyʌjir u tꞌʌn Moisés.
A mac a tu yiraj otsir a jʌtsꞌaꞌanoꞌ,
rajiꞌ tu yajquintaj.
Jesús caj u nuncaj tiꞌ:
―Baxuc tech rajraꞌ caꞌ a yajquintej mac.
Cꞌuchij Jesús ich yatochob Marta yejer María
38 Tiꞌ toy cu bin Jesús yejer u camsʌwinicob ich u berir Jerusalén caj cꞌuchij tu cajar.
Tiꞌ yʌn xquic u cꞌabaꞌ Marta.
Rajiꞌ caj u yacsaj ich yatoch.
39 A Martajoꞌ yʌn u yitsꞌin María u cꞌabaꞌ.
Caj curʌj María ich yoc Jesús quireꞌ u cꞌat yubic a baꞌ cu camsaꞌ.
40 Chen Marta cu tucric jach yaꞌab u beyaj rajen tarij ich Jesús caj yaꞌaraj tiꞌ:
―Jaj Tsꞌurir ―quen―,
wa ca jach tucriquen ca wac tiꞌ in witsꞌin caꞌ tac u yamten.
41 Chen Jesús caj u nuncaj tiꞌ: