Pedro yejer Cornelio
10
Tiꞌ yʌn tuririꞌ xib uch ich u cajar Cesarea,
Cornelio u cꞌabaꞌ.
A jeꞌ xibaꞌ u jach tsꞌurir quinientos soldados.
Aroꞌ pʌchaꞌan ich u tꞌʌn a mac u tꞌʌn Italiano u cꞌat yaꞌaric:
Jun muchꞌ quinientos soldados.
2 A Corneliojoꞌ,
yejer tu cotor mac a tiꞌ yʌn ich yatochoꞌ,
cu naj cꞌujinticob Cꞌuj,
bayiriꞌ xan,
cu rʌc sʌjticob Cꞌuj.
A Corneliojoꞌ,
cu naj jʌsic u taqꞌuin quir u yamtic u winiquirob judío.
Rajiꞌ xan,
suꞌsuꞌ cu tꞌʌnic Cꞌuj.
3 Tuririꞌ u qꞌuinin caj cꞌuchij tu qꞌuinin las mʌnaꞌ u nup caj u yiraj irej wa wʌyacꞌ u caꞌ tuririꞌ yʌjmasir u tꞌʌn Cꞌuj.
Jach chʌcaꞌan caj u yiraj.
Yʌjmasir u tꞌʌn Cꞌuj caj oquij tu yʌn Cornelio.
Caj tꞌʌnij ten yʌjmasir u tꞌʌn Cꞌuj Cornelio.
Tan yaꞌaraꞌ tiꞌ:
―Cornelio ―quij.
4 Caj u quiꞌ pʌctaj yʌjmasir u tꞌʌn Cꞌuj,
Cornelio.
Jeroj tuneꞌ,
jach jacꞌaꞌan yor,
rajiꞌ caj u yaꞌaraj tiꞌ:
―Baꞌ quiriꞌ,
Jaj Tsꞌurir?
―quij.
Caj nuncaꞌb u tꞌʌn Cornelio ten yʌjmasir u tꞌʌn Cꞌuj.
Tan yaꞌaraꞌ tiꞌ:
―Cu yubic a tꞌʌnic,
a Cꞌujoꞌ,
bayiriꞌ xan,
Cꞌuj yer ca jʌsic a taqꞌuin quir a yamtic u winiquirob judío.
Rajen u cꞌʌꞌotech Cꞌuj.
5 Bajeꞌrer,
tuchiꞌtej xib ich u cajar Jope quir u bin pʌybir Simón Pedro teraꞌ tu yʌnech.
6 A Simón Pedrojoꞌ,
jamach acsaꞌb ten Simón a cu banic u yotꞌer wacʌxoꞌ.
A yatoch Simónoꞌ,
tiꞌ yʌn ich chiꞌ cꞌacꞌnab jeꞌ u yaꞌaric tech baꞌ ca bin a betej ―baxuc araꞌb tiꞌ Cornelio ten u yʌjmasir u tꞌʌn Cꞌuj.
7 Barej caj binij yʌjmasir u tꞌʌn Cꞌuj,
a mac a tu tꞌʌnaj Cornelio caꞌcheꞌ.
Cornelio caj u pʌyaj caꞌtur u cꞌurew a tiꞌ yʌnob ich yatoch.
Bayiriꞌ xan,
caj u pʌyaj tuririꞌ u winiquirob soldado,
a cu sʌjtic Cꞌuj xan.
Raꞌ cu naj beyaj ich Cornelio.
8 Cornelio caj u toc araj tiꞌob a caj u yubaj yaꞌaraꞌ ten yʌjmasir u tꞌʌn Cꞌuj,
Cornelio.
Caj tsꞌoc u toc aric tiꞌob a baꞌ u ber,
caj u tuchiꞌtaj a mʌnaꞌ u nup a xiboꞌ caꞌ xicob pʌbir Pedro ich u cajar Jope.
9 Caj sasij a mʌnaꞌ u nup xiboꞌ,
caj binob ich u berir Jope.
Caj cꞌuchij cꞌacꞌchunqꞌuin jach bʌytʌc u cꞌuchurob a mac a tuchiꞌtaꞌb ten Cornelio ich u cajar Jope.
Raꞌiriꞌ u qꞌuinin xan,
Pedro naquij caꞌanan tu caꞌtsꞌab u joꞌr yatoch a pacꞌaꞌan najoꞌ.
Tiꞌ naquij quir u tꞌʌnic Cꞌuj.
10 Caj yubaj wiꞌij Pedro u cꞌat u janʌn Pedro uch.
Mʌꞌ tsꞌocac u betaꞌr yoꞌoch,
caj u yiraj irej wʌyacꞌ u caꞌ.
11 A ray u qꞌuininoꞌ caj wʌyacꞌnʌjij Pedro,
caj u yiraj ich caꞌanan.
Jeroj caj u yiraj yeman baꞌ irej nocꞌ.
Jach coch u noqꞌuir caj u yiraj Pedro.
Caj u yiraj cꞌaxaꞌan u xax u noqꞌuir.
Caj u yiraj u yemen ich yicnʌn Pedro ich ruꞌum.
12 Pedro caj u yiraj bʌcꞌ ich u noqꞌuir.
Tiꞌ yʌn tu cotor baꞌ bʌqꞌuir.
Caj u yiraj u bʌqꞌuir cꞌax,
caj u yiraj u bʌqꞌuir a ʌrʌcꞌaꞌanoꞌ.
Caj u yiraj can,
caj u yiraj juj yejer tu cotor u racꞌob bʌcꞌ,
caj u rʌc iraj tu cotor chꞌichꞌ xan.
13 Jeroj,
caj araꞌb tiꞌ Pedro,
caj u yubaj u tꞌʌn mac tan yaꞌaraꞌ tiꞌ:
―Riqꞌuen,
chuquej a quinsej a chiꞌej a woꞌoch bʌcꞌ,
Pedro.
14 Pedro caj u nuncaj tiꞌ,
caj u yaꞌaraj tiꞌ:
―Mʌꞌ jin chiꞌej Jaj Tsꞌurir ―quij―.
Mʌꞌ in chiꞌmʌniꞌ ―quij Pedro―.
Jarariꞌ quin chiꞌic a baꞌ u toc armʌn Moisés uch,
a tsoy in chiꞌicoboꞌ.
Mʌꞌ tsoy in chiꞌic aroꞌ,
Jaj Tsꞌurir ―quij.
15 Caꞌten caj u yubaj u tꞌʌnʌn Pedro,
caj araꞌb tiꞌ:
―Tsoy a chiꞌic a baꞌ cu yaꞌaric Cꞌuj,
tsoy u chibir.
Rajen mʌꞌ a yʌn aric,
mʌꞌ tsoy in chiꞌic a tenoꞌ.
16 Mʌnaꞌ u nup,
u tenin u caꞌ iric Pedro aroꞌ,
caj u wʌcꞌʌs ir u bin ich caꞌanan,
a irej noqꞌueꞌ.
17 A baꞌ caj u yiraj sam Pedro mʌꞌ yer baꞌ u cꞌat yaꞌaric,
rajen xacꞌaꞌan u tucur Pedro,
jeroj tuneꞌ,
caj cꞌuchob a mʌnaꞌ u nup xiboꞌ,
a tuchiꞌtaꞌb ten Cornelio.
Cu manob cʌxtaꞌbir yatoch Simón,
a cu banic yotꞌer wacʌx.
18 Jeroj caj cꞌuchob tu jor naj,
caj u purajob u tꞌʌn tiꞌ,
caj yaꞌarob:
―Teꞌ wa jamach cʌjaꞌan Simón Pedro?
―quij.
19 Tiꞌ toy yʌn Pedro ich jun cꞌas naj ich u jor naj caꞌanan cu tucric a baꞌ caj u wʌyacꞌtaj sam,
jeroj caj tꞌʌnbij ten u Tajꞌor u Pixam Cꞌuj Pedro:
―Cꞌuchob mʌnaꞌ u nup xib teraꞌ.
Cu cʌxtiquechob,
Pedro.
20 Joqꞌuen emen irej a ray xiboꞌ.
Caꞌ xiquech yejerob.
Mʌꞌ a cꞌʌs tucric chichin wa mʌꞌ ja bin yejerob.
Quireꞌ ten tuchiꞌtob caꞌ tacob u pʌyechex ―baxuc caj u yaꞌaraj u Tajꞌor u Pixam Cꞌuj tiꞌ Pedro.
21 Caj emij Pedro ich jor naj caꞌanan,
caj oquij tu yʌnob a mac a tuchiꞌtaꞌb ten Cornelio.
Caj u tꞌʌnob Pedro,
caj u yaꞌaraj tiꞌob xan:
―Jeꞌrenaꞌ,
tan wa ja cʌxtiquenex,
baꞌ tar a wirex?
22 A mac a tuchiꞌtaꞌb ten Cornelio caj u yaꞌarajob tiꞌ Pedro:
―Caj u tuchiꞌtajenob tu yʌnech,
in Jach Tsꞌurirob,
u cꞌabaꞌ Cornelio.
Rajiꞌ u jach tsꞌurir xan,
quinientos soldado.
Rajiꞌ jach sʌjtaꞌb ten tu cotor mac.
Rajiꞌ cu jach sʌjtic Cꞌuj xan.
Rajiꞌ jach tsoy tu tꞌʌn tu cotor u winiquirob judío quireꞌ a baꞌ cu betic.
Yʌjmasir u tꞌʌn Cꞌuj arej tiꞌ Cornelio:
“Arej u bin pʌybir Pedro quij yʌjmasir u tꞌʌn Cꞌuj,
soc a wuꞌyic baꞌ cu bin yaꞌaric tech Pedro.”
23 Pedro caj u yacsaj a xiboꞌ quir u wenʌnob acꞌbir.
Jeroj caj sasij caj bin yejerob Pedro.
A mac a yacsmʌnob tu yorob a tiꞌ cʌjaꞌanob ich u cajar Jope yet binacob Pedro.
Chen jun yar a yacsmʌnob tu yorob caj binob yejer Pedro.
24 U jer u qꞌuinin caj cꞌuchob ich u cajar Cesarea tiꞌ cu pajarob u cꞌuchurob Pedro ten Cornelio.
Rajen caj u rʌc pay u bʌjob ich yatoch.
Baxuc u yajob u bʌj caj u rʌc pʌyaj tu yatoch Cornelio.
25 Caj cꞌuchij Pedro ich Cornelio,
tabar u yocar Pedro ich yatoch Cornelio joqꞌuij Cornelio ich yicnʌn Pedro.
Caj u tꞌʌnaj Pedro caj xonraj Cornelio ich Pedro quir u cꞌujintic.
26 Chen Pedro caj u ricꞌsaj Cornelio,
caj araꞌb ten Pedro:
―Mʌꞌ cꞌujeniꞌ caꞌ a cꞌujinteniꞌ,
quireꞌ baxuc xibech,
baxuc ten xan.
Rajen chan riqꞌuen,
Cornelio ―quij.
27 Cu tsicbar Pedro yejer Cornelio caj ocob ich yatoch Cornelio.
Tiriꞌ caj u yiraj Pedro jach pim muchꞌaꞌan.
28 Jeroj,
Pedro caj u yaꞌaraj tiꞌob.
Tan u tsicbar tiꞌ a mac muchꞌaꞌanob:
―A techexoꞌ,
a werex u nunquirob u winiquirob judío uch,
caj u toc arajob mʌꞌ tsoy in wocarob a tenob tu yʌn a mʌꞌ u winiquirob judío.
Mʌꞌ tsoy xan in pʌcteꞌquinticob in bʌj yejer a mʌꞌ u winiquirob judío.
Chen Cꞌuj caj u camsajen mʌꞌ jin waꞌaric tiꞌ mac mʌꞌ jin cꞌʌmej ―quij.
29 Rajen caj in wuꞌyaj a pʌyiquenex caj taren.
Mʌꞌ jin waꞌaraj mʌꞌ jin tariꞌ.
Seb caj taren.
Bajeꞌrer,
quin cꞌatic techex baꞌwir caj a pʌyajenex?
30 Caj u nuncaj Cornelio,
caj u yaꞌara tiꞌ Pedro:
―Bajeꞌrer,
tsꞌoc u man caꞌtur u qꞌuinin caj in tꞌʌnaj Cꞌuj.
Caj in jamach pꞌʌt tin janʌn quir in tꞌʌnic Cꞌuj.
Jeroj,
cꞌuchij tu qꞌuinin a mʌnaꞌ u nup tu quin tꞌʌnic Cꞌuj.
Seb caj tarij u yʌjmasir u tꞌʌn Cꞌuj tu yʌnen tin watoch.
Jach sasir u nocꞌ u buquimʌn.
31 Rajiꞌ caj u yaꞌaraj ten:
“Cornelio,
Cꞌuj tu yubaj a tꞌʌnic,
quij yaꞌaric tiꞌ.
A Cꞌujoꞌ,
tu cꞌʌꞌotaj tech ca jʌsic a taqꞌuin quir a yamtic u winiquirob judío.
32 Tuchiꞌtej bajeꞌrer caꞌ xic u pʌyej Simón Pedro ich u cajar Jope.
Rajiꞌ tiꞌ yʌn ich yatoch u jer Simón a cu banic u yotꞌer wacʌx.
Raꞌ tiꞌ yʌn yatoch ich u chiꞌcꞌacꞌnab.
Tiꞌ a bin a cꞌatej Simón Pedro.
Caꞌ bin cꞌuchuc Pedro ich a watoch jeꞌ u yaꞌaric tech a baꞌ ca bin a betej.”
33 Rajen,
seb caj in tuchiꞌtaj pʌybirech,
wa tsoy ta tꞌʌn caꞌ taquech.
Jach tsoy in wiric caj tarech.
Bajeꞌrer,
Cꞌuj cu yiric tiꞌ rʌc muchꞌaꞌanenob teraꞌ quir in wuꞌyicob a baꞌ tu cotor a caj u yaꞌaraj tech Jaj Tsꞌur ―baxuc tu yaꞌaraj Cornelio.
Caj u tsecꞌtaj tiꞌob Pedro a mac a tiꞌ muchꞌaꞌan ich yatoch Cornelio
34 Jeroj,
caj u yʌnxchun u tsecꞌtic tiꞌob.
Tan yaꞌaraꞌ tiꞌ ten Pedro:
―Jach taj,
quin wiric mʌꞌ chen u winiquirob judío tsoy yiric Cꞌuj,
tu cotor tsoy yiric Cꞌuj.
35 A mac a cu sʌjticob Cꞌuj raꞌ cu quiꞌquintic yor Cꞌuj,
bayiriꞌ xan,
a mac a cu quibicob a baꞌ cu yaꞌaric Cꞌuj raꞌ cu quiꞌquintic yor Cꞌuj,
cax a tu cʌjaꞌanob a mʌꞌ u winiquirob judío.
36 Mʌꞌ ja wirej,
a Cꞌujoꞌ caj u tuchiꞌtaj Jesucristo,
raꞌ cu jach tsꞌurinticob tu cotor a tiꞌ yʌn ich yocꞌocab.
Tuchiꞌtaꞌb ten Cꞌuj caꞌ u tsecꞌtej a jeꞌ tꞌʌnaꞌ ich u yet winiquirob judío quir u tar yorob quireꞌ Jesucristo soc mʌnaꞌ baꞌ cu tucricob.
37 A techexoꞌ,
a werex a baꞌ u ber ich tu cotor u ruꞌumin Judea uch caj tsꞌoc yacsaꞌ jaꞌ tu joꞌr Jesús ten Juan a cu tsecꞌtic a Juanoꞌ.
A Jesúsoꞌ,
caj u yʌnxchun u tsecꞌtic u tꞌʌn Cꞌuj ich u ruꞌumin Galilea.
38 A techexoꞌ,
a werex a Jesúsoꞌ,
chen winiquir nazaret,
rajiꞌ tuchiꞌtaꞌb ten Cꞌuj.
Rajiꞌ jach manan u mucꞌ u Tajꞌor u Pixam Cꞌuj caj tsꞌaꞌb ten Cꞌuj.
A werex xan,
caj man u betej tsoy Jesús tu cotor mac,
bayiriꞌ xan,
caj man u tacaj tu cotor mac Jesús tu cu mucꞌyaj tiꞌ quisin.
Rajen tu betaj,
quireꞌ tiꞌ yʌn yejer Cꞌuj.
39 A tenob ―quij Pedro―,
tetaꞌb ten Jesús quir in tsecꞌticob u tꞌʌn tu tajir caj in wirob a baꞌ caj u betaj Jesús ich u ruꞌumin Judea tu cʌjaꞌanob u winiquirob judío.
Bayiriꞌ xan,
caj in wirob a baꞌ caj u betaj Jesús ich u cajar Jerusalén.
Tiriꞌ caj u quinsajob Jesús caj u sinob ich cruz quir u quinsaꞌ.
40 Chen caj manij tres u qꞌuinin caj ricꞌsaꞌb ich u quimirir ten Cꞌuj.
Caj tsꞌoc u riqꞌuir ich u quimirir caj u chaꞌj in wiricob Jesús caj riqꞌuir.
41 Jesús mʌꞌ ju yesaj u bʌj tiꞌ tu cotor mac chen tenob caj in wirob.
Tu yes u bʌj tenob quireꞌ caj u toc tetenob Cꞌuj soc taj quin tsecꞌticob u tꞌʌn.
Mʌꞌ ja wirej,
caj cuxrʌj Jesús caj janʌnenob yejer caj ucꞌurnʌjenob yejer xan.
42 Jesús tuchiꞌtenob caꞌ in tsecꞌtejob u tꞌʌn ich tu cotor mac.
Rajiꞌ u cꞌat taj caꞌ in tsecꞌtejob u tꞌʌn soc yerob tuchiꞌtaꞌb Jesús ten Cꞌuj quir u yocar Juez a Jesúsoꞌ.
Jeꞌ u tocar u joꞌr a mac a cuxaꞌanoꞌ caꞌ bin uruc,
bayiriꞌ xan jeꞌ u tocar u joꞌr a mac a quimenoꞌ caꞌ bin uruc xan.
43 Mʌꞌ ja wirej,
tiꞌ tsꞌibaꞌan ich tu cotor u juꞌunin Cꞌuj ten a mac a tsꞌab u tucur ten Cꞌuj quir u tsecꞌticob a baꞌ u cꞌat Cꞌuj.
Caj u yaꞌarajob toꞌonex bic tabar ic jawsiquex ic siꞌpirex wa quic chen acsiquex tij corex u tꞌʌn Jesús ―baxuc caj u yaꞌaraj Pedro tiꞌ a mac a tiꞌ muchꞌaꞌanob ich yatoch Cornelio.
A mac mʌꞌ u winiquirob judío caj u cꞌʌmajob u Tajꞌor u Pixam Cꞌuj
44 Tiꞌ toy cu tsicbar Pedro ich yatoch Cornelio,
caj tar u Tajꞌor u Pixam Cꞌuj tiꞌ a mac a caj u yubob u tꞌʌn Pedro.
45 A yacsmʌnob tu yorob a yet taracob Pedro u winiquirob judío caj jaqꞌuij yorob quireꞌ caj u yirob tar xan u Tajꞌor u Pixam Cꞌuj tiꞌ a mac a mʌꞌ u winiquirob judío.
46 Yerob jach tar u Tajꞌor u Pixam Cꞌuj tiꞌ a mʌꞌ u winiquirob judío,
quireꞌ cu tꞌʌnob yejer u jer tꞌʌn a mac a mʌꞌ ju najtobiꞌ,
bayiriꞌ xan,
cu quiꞌ tꞌʌnicob Cꞌuj tan u yaꞌaricob:
―Jach caremech Cꞌuj.
Rajen Pedro caj u yaꞌaraj tiꞌ u yet winiquirob judío a mac a yet taracob ucheꞌ:
47 ―Tiꞌ wa yʌn mac a teraꞌ a cu yaꞌaric,
mʌꞌ a yʌn acsic jaꞌ tu joꞌrob?
Mʌꞌ wa caj u cꞌʌmob u Tajꞌor u Pixam Cꞌuj an ten bic a tenoboꞌ?
48 Jeroj,
Pedro caj u tuchiꞌtajob caꞌ acsac jaꞌ tu joꞌrob.
Caj tsꞌoc u yacsic jaꞌ tu joꞌrob robob a tiꞌ yʌn ich yatoch Cornelio caj u chich cꞌatajob tiꞌ Pedro caꞌ pꞌatʌc yejerob.
U cꞌat u pꞌatʌr yaꞌab u qꞌuinin yejerob.