Pedro cu tsicbatic tiꞌ u yet acsaꞌorirob ich u cajar Jerusalén
11
Rajiꞌ caj u yubaj yaꞌaraꞌ tan yacsicob tu yorob a mʌꞌ u winiquirob judío.
A xiboꞌ,
a tetaꞌb ten Jesús uch quir u tsecꞌtaꞌr u tꞌʌn a tiꞌ cʌjaꞌanob ich u cajar Jerusalén,
robob caj u yubob.
A yacsmʌnob tu yorob a tiꞌ cʌjaꞌanob ich u ruꞌumin Judea caj u yubob xan.
2 Barej,
caj urij Pedro ich u cajar Jerusalén.
U winiquirob judío a cu yaꞌariqueꞌ,
caꞌ u tsꞌirej mac a mʌꞌ u winiquirob judío,
yacsmʌnob tu yorob.
Robob caj u sʌjʌtꞌʌnob,
tan yaꞌaricob:
“Mʌꞌ tsoy a baꞌ cu man u betic Pedro,
quij.”
3 A raꞌiriꞌ xibob a cu sʌjʌtꞌʌnob,
caj yaꞌarajob tiꞌ Pedro:
―Biquinin caj binech a wirej mʌꞌ u winiquirob judío?
Biquinin caj janech yejerob a mʌꞌ u winiquirob judío?
4 Rajen Pedro caj u yʌnxchun u nunquic,
caj u toc rʌc araj tiꞌob bic tabar caj bin ich a mʌꞌ u winiquirob judío.
Rajen caj u yaꞌaraj tiꞌob;
5 ―Tiꞌ yʌnen ich u cajar Jope tu quin tꞌʌnic Cꞌuj,
jeroj,
seb caj in wiraj baꞌ irej wa wʌyacꞌ in caꞌ.
Caj in wiraj emen u caꞌ baꞌ irej nocꞌ a jach caremoꞌ.
Toc cꞌaxaꞌan u xax u noqꞌuir.
Yʌn cuatro u xax u noqꞌuir.
Aroꞌ caj emij tu yʌnen a tenoꞌ ―quij―.
Tar u tar ich caꞌanan caj emij toc ʌcʌcbar caj emij.
6 A tenoꞌ,
caj in quiꞌquiꞌ pʌctaj a baꞌ tiꞌ yʌn tu japnin nocꞌ,
bayiriꞌ xan,
caj in cꞌʌꞌotaj a baꞌ tiꞌ yʌn ich u noqꞌuir.
Caj in wiraj u bʌqꞌuir cꞌax.
Caj in wiraj u bʌqꞌir a ʌrʌcꞌaꞌan.
Caj in wiraj can,
caj in wiraj juj yejer u racꞌob bʌcꞌ.
Caj in rʌc iraj chꞌichꞌ xan.
7 A ray a qꞌuininoꞌ caj in wuꞌyaj u tꞌʌn mac caj u yaꞌaraj:
“Riqꞌuen,
Pedro,
quij.
Chuquej a quinsej,
a chꞌiꞌej,
quij yaꞌaric.”
8 Chen a tenoꞌ,
caj in waꞌaraj:
“Mʌꞌ in chiꞌic Jaj Tsꞌurir.
Mʌꞌ in chiꞌmʌniꞌ.
Jaririꞌ quin naj chiꞌic a baꞌ caj u toc araj Moisés uch,
a tsoy in chiꞌicob.
Mʌꞌ tsoy in chꞌiꞌic aroꞌ,
Jaj Tsꞌurir.”
9 Caꞌten caj in wuꞌy u tꞌʌn caꞌanan:
“Tsoy a chiꞌic a baꞌ cu yaꞌaric Cꞌuj,
tsoy u chibir.
Rajen mʌꞌ a yan aric mʌꞌ tsoy in chiꞌic a tenoꞌ.”
10 Caꞌten caj in wuꞌyaj u tꞌʌn caꞌanan:
“Riqꞌuen,
Pedro.
Chuquej a quinsej,
a chiꞌej.
Tsoy a chiꞌic a baꞌ cu yaꞌaric Cꞌuj,
tsoy u chibir.
Rajen mʌꞌ a yʌn aric mʌꞌ tsoy in chiꞌic a tenoꞌ.”
Caj tsꞌoquij caj wʌcꞌʌs binij caꞌanan.
11 A ray u qꞌuininoꞌ,
caj bin caꞌanan a nocꞌoꞌ,
caj cꞌuchob a mʌnaꞌ u nup xibob ich u jor naj tu yʌnen.
Tuchiꞌtaꞌbob caj u pʌyen.
Tar u tarob ich u cajar Cesarea.
Cu cʌxtiquenob.
12 Caj u yaꞌaraj ten u Tajꞌor u Pixam Cꞌuj:
“Caꞌ xiquech Pedro yejerob.
Mʌꞌ a cꞌʌs tucric chichin wa mʌꞌ ja bin yejerob.
Quireꞌ caj in tuchꞌitob caꞌ tacob u pʌyiquechob.”
In wet binacob a jeꞌ seis xib a yacsʌmʌnob tu yorob,
in wet winiquirob judío xan.
Caj cꞌuchenob jeroj caj oquenob ich yatoch Cornelio u winiquir romano,
quireꞌ rajiꞌ caj u pʌyen.
13 A ray xiboꞌ caj u yaꞌaraj caj u yiraj u yʌjmasir u tꞌʌn Cꞌuj ich u yatoch chꞌiquicbar.
Jeroj caj araꞌb ten yʌjmasir u tꞌʌn Cꞌuj:
“Tuchiꞌtej xibob caꞌ xicob pʌybir Simón Pedro a tiꞌ yʌn ich u cajar Jope.
14 Jeꞌ u tsecꞌtic tech yejer tu cotor a bʌjob bic a taquicquex a bʌjex.”
15 Barej caj in yʌnxchun in tsecꞌtic tiꞌob caj tar u Tajꞌor u Pixam Cꞌuj tu muchꞌaꞌanob a mʌꞌ u winiquirob judío.
Caj tar tu yicnʌnob an ten bic toꞌonex caj tar u Tajꞌor u Pixam Cꞌuj tu qꞌuininin Pentecostés.
16 A ray u qꞌuininoꞌ,
cꞌaj ten u tꞌʌn Jaj Tsꞌur barej caj u yaꞌaraj a tenob:
“Jach taj,
quij Jesús.
A Juanoꞌ caj u yacsaj jaꞌ tu joꞌr mac caj cꞌam u tꞌʌn Juan.
A mac a cu cꞌʌmic u tꞌʌn Cꞌuj,
rajiꞌ cu bin tsꞌaꞌbir u Tajꞌor u Pixam Cꞌuj tiꞌ.”
17 Mʌꞌ ja wirej,
Cꞌuj caj u tuchiꞌtaj u Tajꞌor u Pixam Cꞌuj tiꞌ a mʌꞌ u winiquirob judío,
baxuc caj u tuchiꞌtaj toꞌonex quireꞌ tij cacsajex tij corex u tꞌʌn Jaj Tsꞌur Jesucristo.
A tenoꞌ mʌꞌ cꞌuchaꞌan in wor in suꞌsic Cꞌuj.
18 Caj tsꞌoc u yubicob u tꞌʌn Pedro a yacsmʌnob tu yorob tu yʌn Pedro mʌꞌ yʌn tꞌʌnajobiꞌ,
jeroj tuneꞌ caj u jach tꞌʌnajob Cꞌuj,
tan yaꞌaricob:
―Jach caremech Cꞌuj.
Cax mʌꞌ u winiquirob judío tsoy a wiric a techoꞌ Cꞌuj.
Caj a chaꞌ u cꞌaxob u yorob quir u pꞌʌticob u cꞌasirob quir u cuxtarob munt qꞌuin.
A yacsmʌnob tu yorob ich u cajar Antioquía
19 Caj tsꞌoc u quinsaꞌr Esteban,
barej caj u yʌnxchun u chuquicob u pachob a yacsmʌnob tu yorob u tꞌʌn Jesús rajen a yacsmʌnob tu yorob caj u pꞌʌtob tu yʌnob caj binob ich u jer ruꞌum,
baxuc caj u betaj yaꞌab a yacsmʌnob tu yorob uch.
Yʌn jun yarob,
caj binob nach ich u ruꞌumin Fenicia,
u jer jun yarob,
tar binob ich u petenin u cꞌabaꞌ Chipre,
u jer jun yarob caj binob ich u cajar Antioquía.
20 A mac a cu tarob tiꞌ u petenin cꞌacꞌnab Chipre yejer a mac a cu tarob tiꞌ u cajar Cirene,
a yacsmʌnob tu yorob.
Robob caj cꞌuchob uch ich u cajar Antioquía.
Tiꞌ caj u tsicbʌtajob tiꞌ a mʌꞌ u winiquirob judío,
bayiriꞌ xan,
caj u tsecꞌtajob u jach tsoyir u tꞌʌn Jaj Tsꞌur Jesús.
21 Quireꞌ Cꞌuj tsꞌaj u mucꞌob quir u tsecꞌtaꞌrob u tꞌʌn Cꞌuj,
rajen yaꞌab mac caj u yacsajob tu yorob u tꞌʌn Jesús caj u pꞌʌtajob a baꞌ caj u quibajob uch.
22 Barej a mac a yacsmʌnob tu yorob ich u cajar Jerusalén caj u yubajob cu yacsicob tu yorob raꞌ a mʌꞌ u winiquirob judío ich u cajar Antioquía,
jeroj tuneꞌ,
caj tuchiꞌtaꞌb Bernabé ten a yacsmʌnob tu yorob caꞌ xic ich u cajar Antioquía.
23 Barej,
caj cꞌuchij Bernabé ich u cajar Antioquía,
caj u yiraj tan u quiꞌ yamtaꞌrob ten Cꞌuj,
caj quiꞌjij yor Bernabé.
Caj u yiraj aroꞌ,
caj u chichquintaj yorob tu cotor soc mʌꞌ u pꞌʌticob u yacsicob tu yorob u tꞌʌn Jaj Tsꞌur,
soc u rajraꞌ cu quibicob u tꞌʌn Jaj Tsꞌur.
24 Mʌꞌ ja wirej,
jach tsoy yor Bernabé.
Tu jachtsꞌurintaꞌ u Tajꞌor u Pixam Cꞌuj Bernabé,
rajen yaꞌab caj u yacsajob tu yorob tu cajar Antioquía.
25 Caj tsꞌoc aroꞌ,
pachir caj bin Bernabé,
tu jamach pꞌʌtaj u cajar Antioquía quir u bin ich u cajar Tarso.
Bin cʌxtaꞌbir Saulo.
26 Caj u yiraj caj u pʌyaj caꞌ xic yejer ich u cajar Antioquía.
Yet cꞌuchac Saulo yejer Bernabé ich u cajar Antioquía.
Tiꞌ pꞌatob ich u cajar Antioquía tuririꞌ yaxqꞌuin quireꞌ acsaꞌbob ten a yacsmʌnob tu yorob.
Robob caj u camsajob yaꞌab mac.
Raꞌ u yacsmʌnob tu yorob paꞌch ten u racꞌob,
a ju yet cajar:
Rajiꞌ a cu sayʌrob tu pach Cristo,
ꞌrajiꞌ yʌn chꞌic arej cu sayʌrob tu pach Cristo ich u cajar Antioquía.
27 Tiꞌ yʌn Bernabé yejer Saulo ich u cajar Antioquía barej caj tarob ich u cajar Antioquía a mac a tsꞌab u tucur ten Cꞌuj quir u tsicbar a baꞌ u cꞌat Cꞌuj.
Robob rucꞌob ich u cajar Jerusalén caj binob ich u cajar Antioquía.
28 Jeroj,
caj tarob u muchꞌquinticob u bʌj a mac a yacsmʌnob tu yorob quir u yubicob u tꞌʌn Cꞌuj.
A ray u qꞌuininoꞌ,
tuririꞌ a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj,
rajiꞌ u cꞌabaꞌ Agabo.
Rajiꞌ caj riqꞌuir u tsecꞌtic u tꞌʌn Cꞌuj.
U Tajꞌor u Pixam Cꞌuj caj tsꞌaj u tꞌʌnin u tucric Agabo,
a baꞌ cu bin tar biqꞌuin.
Rajiꞌ caj u yaꞌaraj:
―Bin u caj tar u chꞌic yum wiꞌij ich tu cotor u cajarob ich yocꞌocab.
Caꞌ bin cꞌuchuc tu qꞌuinin u reyinticob Claudio ich u cajar Roma jeꞌ u tar wiꞌij.
29 A yacsmʌnob tu yorob a tiꞌ yʌn ich u cajar Antioquía caj u yaꞌarajob:
―Caꞌ ic muchꞌquintex ic taqꞌuinex caꞌ ic purex ich ij quet acsaꞌorirex ich u ruꞌumin Judea.
A mun cꞌuchaꞌan ij corex ic tsꞌiquex tiꞌ,
chuquex tiꞌob.
30 Caj tsꞌoc u muchꞌquinticob u taqꞌuinob caj bin purbirob tiꞌ u yet acsaꞌorirob a mac cʌjaꞌan ich u ruꞌumin Judea.
Bernabé yejer Saulo bin u puric u taqꞌuinob.
Caj cꞌuchob caj u pꞌʌtajob u taqꞌuinob ich u jach tsꞌurirob a yacsmʌnob tu yorob a cu yaꞌaricob a Nuxiboꞌ.