―Caꞌ ic chuquex a mac a yacsmʌnob tu yorob.

Jeroj tuneꞌ,

caj u yʌnxchun u chuquicob a yacsmʌnob tu yorob.

Jun yarob caj u chucajob.

2 Rajen caj u quinsaj Jacobo u sucuꞌun Juan.

Quinsaꞌb Jacobo yejer mascab.

3 Caj quiꞌjij yorob u winiquirob judío,

caj irir u quinsaꞌ Jacobo.

Rajen Herodes caj u yiraj caj u quiꞌquintaj u yorob u winiquirob judío.

Caj u yaꞌaraj u chucur Pedro,

xan.

Caj u yaꞌaraj u chucur Pedro raꞌ u qꞌuinin u quiꞌquiꞌ janʌnob u winiquirob judío.

Raꞌ cu janticob a mʌꞌ u sip u yoch paneꞌ.

4 Caj tsꞌoc u chucur u mʌcbir Pedro.

Caj araꞌb u cʌnantaꞌr Pedro ten soldado.

Caj u yaꞌaraj u rey Herodes:

―Caꞌ a quiꞌ cʌnantex tu mʌcaꞌan Pedro.

Rajen tsꞌaꞌb cʌnabir Pedro ten diez y seis soldado tu cu naj mʌquic mac.

Caꞌ bin tsꞌocac u qꞌuinin u quiꞌquiꞌ janʌnob u winiquirob judío a cu yaꞌaricob Pascua,

cu tucric Herodes caꞌ jocꞌsej u quinsej Pedro ʌcʌtan tu cotor u winiquirob judío.

5 Rajen tiꞌ mʌcaꞌanoꞌ Pedro.

Jach quiꞌ cʌnantaꞌb Pedro.

A tu muchꞌaꞌanob a yacsmʌnob tu yorob tu tꞌʌnicob Cꞌuj tiꞌ Pedro.

Rajraꞌ cu tꞌʌnicob Cꞌuj tiꞌ Pedro.

6 Raꞌ u qꞌuinin acꞌbir tu mʌcaꞌan Pedro.

Raꞌ u qꞌuinin xan,

caꞌ bin sasac a rey Herodesoꞌ u cꞌat u jocꞌsej u quinsej Pedro ich ʌcʌtan u winiquirob judío.

Cꞌʌraꞌan Pedro.

Cꞌʌraꞌan u cꞌʌb yejer caꞌtur u mascabir,

chen wenʌn u caꞌ Pedro.

Chumuc yʌn Pedro ich caꞌtur soldado a cu cʌnantaꞌrob Pedro.

Bayiriꞌ xan tiꞌ yʌn u jer jun yarob ich tancab u jor naj u cuchir tu mʌcaꞌan Pedro tan u cʌnanticob.

7 Seb caj tar yʌjmasir u tꞌʌn Jaj Tsꞌur tu mʌcaꞌan Pedro.

Jach pot sasij tu mʌcaꞌan Pedro.

Caj pecsaꞌb Pedro ten yʌjmasir u tꞌʌn Jaj Tsꞌur quir yasʌr Pedro.

Caj tꞌʌnij Pedro:

―Seb a riqꞌuir,

Pedro ―quij.

U bʌjiriꞌ tiquin pit u mascabir u cꞌʌb Pedro.

8 Caj araꞌb tiꞌ Pedro ten u yʌjmasir u tꞌʌn Jaj Tsꞌur:

―Cꞌʌxej a nocꞌ,

Pedro.

Jupej a pech xʌnʌb,

Pedro.

Barej,

caj tsꞌoc u cꞌʌxic u nocꞌ caj u jupaj u pech xʌnʌb.

Jeroj tuneꞌ,

araꞌb tiꞌ ten u yʌjmasir u tꞌʌn Jaj Tsꞌur:

―Quiꞌ buquintej u caꞌ yarir a nocꞌ,

Pedro,

caꞌ taquech.

9 Caj yʌn joqꞌuij yʌjmasir u tꞌʌn Jaj Tsꞌur,

caj say Pedro tu pach yʌjmasir u tꞌʌn Jaj Tsꞌur.

Cu tucric Pedro wʌyacꞌ u caꞌ.

Mʌꞌ yer Pedro baꞌ cu betaꞌr ten Cꞌuj,

cax jach rajiꞌ u yʌjmasir u tꞌʌn Cꞌuj,

rajen cu tucric Pedro wʌyacꞌ.

10 Caj u caꞌ u yʌn batꞌan masajob ʌcʌtan u soldado a tu yʌn irajob a cu cʌnantaꞌrob Pedro tu cu macʌrob Pedro.

Jeroj caj u masajob u jer soldado a tiꞌ yʌnob quir u cʌnanticob Pedro,

jeroj caj cꞌuchob tu carem u joꞌr quir u jocꞌar mac quir u bin ich u cajar Jerusalén.

Mascab u jor naj.

U bʌjiriꞌ tiquin qꞌuepʌjij u mac u jor naj tu cu macar mac.

Caj jocꞌob Pedro yejer u yʌjmasir u tꞌʌn Jaj Tsꞌur.

Cꞌʌs nanach tu binob ich bej jeroj seb pꞌat Pedro tu junan.

11 Cꞌaj tiꞌ Pedro tu yor tu jach iraj u yʌjmasir u tꞌʌn Jaj Tsꞌur.

Caj u yaꞌaraj:

―Bajeꞌrer,

in wer in Jaj Tsꞌurir caj u tuchiꞌtaj u yʌjmasir u tꞌʌn quir u taquiquen tiꞌ u mucꞌ a rey Herodesoꞌ soc mʌꞌ in quinsaꞌ.

Bayiriꞌ xan,

caj u tacajen tiꞌ tu cotor a baꞌ u cꞌatob u beticob tenob u winiquirob judío.

12 Caj tsꞌoc u tucric a jeraꞌ caj bin ich yatoch u nʌꞌ Juan,

u cꞌabaꞌ María.

Pach u jer u cꞌabaꞌ Juan xan,

Marcos a caꞌtur u cꞌabaꞌ.

Tiriꞌ caj u muchꞌquintajob u bʌj a yacsmʌnob tu yorob quir u tꞌʌnicob Cꞌuj tiꞌ Pedro.

Yaꞌab tiꞌ yʌnob.

13 Caj cꞌuchij Pedro ich yatoch u nʌꞌ Juan caj pꞌiristaꞌb u mac u jor u paꞌteꞌ ich tancab.

Caj u tꞌʌnaj yubej cꞌurew xquic.

Caj u yubaj tan u pꞌiristaꞌr ten Pedro,

caj joqꞌuij yirej maquiꞌ.

Rode u cꞌabaꞌ cꞌurew xquic.

14 Caj u tꞌʌnaj cꞌurew xquic,

Pedro,

jeroj cꞌʌꞌotaꞌb u tꞌʌn Pedro ten Rode,

caj u cꞌʌnaj yacab yaꞌarej tiꞌ u racꞌob tiꞌ yʌn Pedro.

Jach quiꞌ yor,

rajen tubij tiꞌ u qꞌuebar u jor Pedro.

15 Robob a tu yubajob u tꞌʌn Rode caj u yaꞌarajob tiꞌ:

―Mʌꞌ taj ca waꞌaric.

Chen Rode caj u chich araj tiꞌob:

―Jach taj ―quij―,

tiꞌ yʌn Pedro.

Robob caj u yaꞌarajob tiꞌ:

―Tin tꞌʌnob u yʌjmasir u tꞌʌn Pedro a ta wuꞌyaj a cu cʌnantaꞌr Pedro.

16 A Pedrojoꞌ tiꞌ toy cu pꞌiristic u jor naj ich u paꞌteꞌ.

Rʌc bin yiricob caj qꞌueb u jor naj quir u yocar Pedro.

Caj irir ten u yet acsaꞌorirob,

caj jaqꞌuij yorob.

17 Pedro caj u yesaj u cꞌʌb soc caꞌ tsꞌocac u tꞌʌnob u racꞌob.

Jeroj tuneꞌ,

caj u toc araj tiꞌob bic a Jaj Tsꞌuroꞌ,

caj u jocꞌsaj tu mʌcaꞌan uch.

Caj u yaꞌaraj Pedro:

―Joqꞌuen,

arex tiꞌ Jacobo yejer ij quet acsaꞌorirex bic caj joqꞌuen a tenoꞌ ―quij Pedro.

Jeroj tuneꞌ,

caj joqꞌuij ich yatoch u nʌꞌ Juan,

caj bin ich u jer naj.

18 Caj sasij caj jaqꞌuij u yorob u soldado a caj u cʌnantob Pedro ucheꞌ,

quireꞌ mʌꞌ yerob tu bin Pedro.

19 A rey Herodes tuchiꞌtaꞌb cʌxtaꞌbirob Pedro quireꞌ mʌnaꞌ Pedro.

Caj quiꞌquiꞌ cʌxtaꞌbob,

chen mʌꞌ irir Pedro.

Caj cꞌataꞌb tiꞌ a soldadojoꞌ a caj u cʌnantob Pedro ucheꞌ tu bin Pedro,

bayiriꞌ xan,

bic caj joqꞌuij Pedro.

Caj tsꞌoc u cꞌataꞌ tiꞌob,

a soldado a caj u cʌnantob Pedro ucheꞌ caj tuchiꞌtaꞌbob rʌc chꞌʌcbir u car u soldado a caj u cʌnantob Pedro ucheꞌ.

Caj tsꞌoc u tuchiꞌticob caj rucꞌ a rey Herodes ich u ruꞌumin Judea,

caj bin cʌjtar ich u cajar Cesarea.

Tiriꞌ pꞌat ti taroꞌ.

20 A mac a tiꞌ cʌjaꞌanob ich u cajar Tiro,

quet yejer a mac a cʌjaꞌanob ich u cajar Sidón tu chen tsꞌiquintaꞌr Herodes.

A uchoꞌ,

cu bin purbir yoꞌoch ich u cajarob Tiro yejer Sidón.

Caj tsꞌiquij a rey Herodesoꞌ,

rajen mʌꞌ ju yaꞌaraꞌ u bin purbirob yoꞌochoꞌ.

Rajen caj u muchꞌquintajob u bʌj a mac a tiꞌ cʌjaꞌanob ich u cajar Tiro yejer a mac a tiꞌ cʌjaꞌanob ich u cajar Sidón.

Robob caj u yaꞌarajob:

―Caꞌ tsicbanʌcoꞌonex yejer u jach tsꞌurir a rey Herodes a cu beyaj tiꞌ Herodes,

u cꞌabaꞌ Blasto.

Caꞌ ic boꞌotex yejer taqꞌuin Blasto soc rajiꞌ cu bin sisquinbir yor a rey Herodesoꞌ.

A baywoꞌ,

caj sisij yor Herodes.

21 Caj rʌc binob ich u rey Herodes,

a mac cʌjaꞌanob ich u cajar Tiro,

yejer a mac a cʌjaꞌanob ich u cajar Sidón.

Robob,

caj rʌc binob ich u rey Herodes,

quireꞌ pay ten Herodes.

A ray u qꞌuininoꞌ,

caj u buquintaj u nocꞌ rey,

jach tsoy u nocꞌ a rey Herodesoꞌ.

Caj curʌj tu carem u cutan tu cu naj reyinticob,

caj u yʌnxchun u tꞌʌnic a pimoꞌ.

22 A pimoꞌ,

caj yubajob u tꞌʌn Herodes.

Caj cꞌam tꞌʌnajob a pimoꞌ,

tan yaꞌaricob:

―A raꞌ cu tꞌʌn toꞌonexoꞌ,

cꞌuj.

Rajiꞌ cꞌuj cu tꞌʌnicoꞌonex,

mʌꞌ xib cu tꞌʌniꞌ.

23 Raꞌiriꞌ u qꞌuinin caj tuchiꞌtaꞌb tuririꞌ u yʌjmasir u tꞌʌn Jaj Tsꞌur ich a rey Herodesoꞌ quir u yajtar Herodes.

Caj jach yajij,

caj oc nocꞌ tiꞌ,

caj quimij Herodes.

Mʌꞌ ja wirej,

a Herodesoꞌ,

caj u chaꞌj u cꞌujintaꞌr ten a pimoꞌ,

quireꞌ mʌꞌ ju yaꞌaraj:

―Jach carem Cꞌujiꞌ.

24 Chen tantanxer,

caj bin u rʌc tsecꞌt u tꞌʌn Jaj Tsꞌur.

Bayiriꞌ xan,

cu jach pimtar a yacsmʌnob tu yorob tiꞌ Jaj Tsꞌur.

25 Caj tsꞌoc u pꞌʌticob u taqꞌuinob Bernabé yejer Saulo,

caj rucꞌob ich u cajar Jerusalén.

Yet binacob Juan Marcos.