Cu taquic u bʌj Pablo ʌcʌtan rey Agripa
26
Agripa tun, caj u yaꞌaraj tiꞌ Pablo:
―Wa a cꞌat a taquic a bʌj, arej tenob bajeꞌrer Pablo.
Pablo tuneꞌ, caj u nacsaj u cꞌʌb quir u tꞌʌnic a reyoꞌ. Caj u yʌnx chun u tꞌʌn quir u taquic u bʌj:
2 ―Jach quiꞌ in wor quir in taquic in bʌj bajeꞌrer ʌcʌtan a techoꞌ reyech Agripa. Quiꞌ in wor in taquic in bʌj tu cotor baꞌ a cu taquicob in joꞌreꞌ u winiquirob judío.
3 Quireꞌ a techoꞌ, a neꞌer tu cotor bic tabar u cuxtarob u winiquirob judío bayiriꞌ xan, bic tabar mʌꞌ pꞌeriꞌ yorob ich u yet winiquirob judíojoꞌ. Rajen quin chich cꞌatic tech, caꞌ a quiꞌ uꞌyej a quin wac techoꞌ.
Cu yaꞌaric bic u cuxtar Pablo hasta tu qꞌuinin caj u yacsaj tu yor
4 Mʌꞌ ja wirej, tu cotor in wet winiquirob judío yerob bic in cuxtar tin chichinin. Yerob tu yʌnxchun u beriꞌ tiꞌ yʌnen uch, tin ruꞌum Cilicia, hasta caj in pꞌʌtajeꞌ caj taren ich u cajar Jerusalén.
5 Wa ju cꞌatob a cu taquicob in joꞌr, cꞌuchaꞌan yorob yaꞌaricob jach taj u winiquiren fariseo uch wa ju cꞌat, quireꞌ yerob u winiquiren fariseo uch yaꞌab u yaxqꞌuinin. Mʌꞌ ja wirej, u winiquirob judío a fariseojoꞌ cu jach quiꞌ uꞌyicob tu cotor baꞌ tsꞌibtaꞌb ten in nunquirob uch. U jer ich u winiquirob judío mʌꞌ ju nequiꞌ quibob.
6 Bajeꞌrer, tiꞌ yʌnen ʌcʌtan tech rey Agripa quir u jocꞌar u tajir a cu taquicob in joꞌr ten in wet winiquirob judío. Mʌꞌ ja wirej, cu chen taquicob in joꞌr, quireꞌ caj in wacsaj tin wor u tꞌʌn Cꞌuj tu cu yaꞌaric tiꞌ in nunquirob judío, jeꞌ u ricꞌsaꞌ ten Cꞌuj tu cotor mac tu quimen.
7 Mʌꞌ ja wirej, tu cotor u winiquirob judío, a doce yoꞌnenoꞌ, caj u toc pajajob jeꞌ u riqꞌuir tu cotor mac tu quimen, quireꞌ caj u toc araj Cꞌuj jeꞌ u ricꞌsiqueꞌ rajen u winiquirob judío cu naj cꞌujinticob Cꞌuj. Mʌꞌ ja wirej, Rajraꞌ u naj pajicob u qꞌuinin caꞌ u nupꞌsej u qꞌuinin a baꞌ cu yaꞌaric Cꞌuj uch. Rajen cu taquicob in joꞌr bajeꞌrer, quireꞌ caj in chen quibaj a baꞌ cu yaꞌaric Cꞌuj: “Jeꞌ u riqꞌuir mac tu quimeneꞌ.” Baxuc quin waꞌaric tech in reyech Agripa.
8 Arej baꞌ ca tucriquex u winiquirex judío. Mʌꞌ wa cꞌuchaꞌan yor Cꞌuj caꞌ u ricꞌsej mac tu quimen?
Caj u yaꞌaraj Pablo: Tin chucajoꞌ u pachob a yacsmʌnob tu yorob uch
9 A uchoꞌ, in bʌjiriꞌ caj in tucraj tsoy caꞌ in chuc u pachob tu cotor a yacsmʌnob tu yorob u tꞌʌn Jesús, a cʌjaꞌan ich u cajar Nazaret uch.
10 Baxuc caj in betaj ich u cajar Jerusalén uch. Mʌꞌ ja wirej, u jach tsꞌurirob u sacerdote u winiquirob judío, caj u chucajob juꞌun ten soc cꞌuchaꞌan in woroꞌ in chucob u pachob. Mʌꞌ jaririꞌ, barej caj u cꞌatajob ten: “Tsoy wa ju quinsaꞌ a yacsmʌnob tu yorob?” A tenoꞌ, caj in waꞌaraj: “Tsoy u quinsaꞌ.”
11 Yaꞌab u tenin caj in chuc u pachob ich tu cotor u chan naj tu cu naj cꞌujinticob Cꞌuj u winiquirob judío. Mʌꞌ ja wirej, caj in tsꞌaj u mucꞌyaj, in wirej wa cu pꞌʌticob u yacsicob tu yorob tiꞌ u tꞌʌn Jesús. Quireꞌ jach manan tsꞌiquen, rajen cax u jer ruꞌum jach nach, caj in cʌxtob quir in chuquic u pachob.
Cu wʌcꞌʌs tsicbar Pablo bic caj u yacsaj tu yor u tꞌʌn Jesús
12 Caj u yaꞌaraj Pablo:
―Rajen quin bin ich u cajar Damasco uch quir in chuquic u pachob a mac a yacsmʌnob tu yorob u tꞌʌn Jesús. Mʌꞌ ja wirej, caj u chaꞌj in bin u jach tsꞌurirob u sacerdote u winiquirob judío, robob caj u tsꞌaj ten u mucꞌ, bayiriꞌ xan, yejer u juꞌunin a caj u tsꞌa ten u jach tsꞌurir sacerdote tiꞌ ten quir in bin in chucob.
13 In reyech Agripa, caj binen ich u berir Damasco. A wer baꞌ in ber a tenoꞌ? Caj cꞌuchij cꞌacꞌchunqꞌuin, caj binen caj in wiraj chꞌic yum sasir caꞌanan. A qꞌuinoꞌ, mʌꞌ nejach sasiriꞌ, a ju sasir caꞌananoꞌ jach manan. Caj rʌc bʌcꞌristaꞌben a tenoꞌ yejer in wet binacob.
14 Jeroj tuneꞌ, caj rʌc rubenob ich ruꞌum, caj in wuꞌyaj u tꞌʌn mac caj u yaꞌaraj ten ich u tꞌʌn hebreo. Caj yaꞌaraj ten: “Saulo, Saulo, biquinin ca man a chuc u pach a yacsicob tu yorob in tꞌʌn? Mʌꞌ ja wirej, ca chuquic in pach xan? Mʌꞌ ja wirej, a bʌjiriꞌ ca man a pꞌact a bʌj Saulo. A techoꞌ, irech a wacʌxoꞌ a cu conconcheꞌtic u cheꞌ yejer u niꞌ a quiꞌ yejeꞌ.” Baxuc caj u yaꞌaraj ten.
15 ’A tenoꞌ, caj in waꞌaraj: “Maquechiꞌ Jaj Tsꞌur?” A Jaj Tsꞌuroꞌ, caj u yaꞌaraj ten: “A tenoꞌ Jaj Tsꞌuren, Jesúsen, a mac ca man a chuc u pachoboꞌ, ten ca man a chuc in pach, quij Jesús. in pach.
16 Chen riqꞌuen ta chꞌictar. Taren in wesic in bʌj tech soc a beyaj ten. Caj in toc tetech soc a man a tsecꞌtej in tꞌʌn, bic caj a wirajen bajeꞌrer. Barej caꞌ bin cꞌuchuc tu qꞌuinin, jeꞌ in caꞌ esic in bʌj tech. Bayririꞌ xan, caꞌ a waꞌarej a baꞌ caꞌ bin a wirej biqꞌuinin.
17 A tenoꞌ, quij Jaj Tsꞌur, bin in caꞌ in taquech tu ca bin a tsecꞌt in tꞌʌn, cax ich u winiquirob judío, cax mʌꞌ ich u winiquirob judío. Bajeꞌrer, quin tuchiꞌtiquech ich a mac a mʌꞌ u winiquirob judío.
18 Quin tuchiꞌtiquech ich a mʌꞌ u winiquirob judío soc a camsicob. Caꞌ a camsej caꞌ u pꞌʌtob a baꞌ cꞌasir cu yaꞌaricob. Caꞌ a camsob, soc u jocꞌarob tu yacꞌbirir caꞌ ocacob tu sasirir. Caꞌ a camsob soc u jocꞌarob tu cu tsꞌurinticob a quisinoꞌ, soc caꞌ tacob tu cu tsꞌurinticob a Cꞌujoꞌ, quireꞌ caj u yacsob tu yorob ten, quij Jesús. Soc u jawʌrob u siꞌpir ten Cꞌuj, soc robob cu bin acsaꞌbir ten Cꞌuj tu cuchir an ten bic u winiquirob Cꞌuj.” Baxuc caj u yaꞌaraj Jesús caj u tetaj ten.
Pablo caj u quibaj a baꞌ araꞌb ten Jaj Tsꞌur
19 Rajen in reyech Agripa, caj in quibaj tu cotor a baꞌ caj yaꞌaraj ten Jaj Tsꞌur caj u tꞌʌnen caꞌanan.
20 Chen a tenoꞌ, caj in yʌnxchun in tsecꞌtic u tꞌʌn Cꞌuj tu cajar Damasco, pachir tu cajar Jerusalén jach pachir ich tu cotor tu ruꞌumin Judea. Tiꞌ toy jach pachir caj in tsecꞌtaj tu yʌn a mʌꞌ u winiquirob judío. Mʌꞌ ja wirej, caj in tsecꞌtaj caꞌ u cꞌaxej u yorob, soc u pꞌʌticob u cꞌasirob tu cu manob soc u yocarob tu berir Cꞌuj. Caj in toc araj, caꞌ quiꞌ manacob tu tsoyir soc tu cotor mac cu yiric wa jach taj caꞌ cꞌaxaj yorob, soc u pꞌʌticob u cꞌasirob.
21 Quireꞌ a baywoꞌ, caj in tsecꞌtaj u tꞌʌn Cꞌuj a winiquirob judiójoꞌ, caj u chucajenob tu carem naj tu cu naj cꞌujinticob Cꞌuj u winiquirob judío. Caj u tumtajob or u jach quinsenob, a ray u qꞌuininoꞌ.
22 Quireꞌ caj u yamten Cꞌuj, rajen cuxaꞌanen tac bajeꞌrer. Rajen u beriꞌ bajeꞌrer quin tsecꞌtic u tꞌʌn Cꞌuj, cax a teraꞌ quin chꞌictar quir in tsicbar u tajir tꞌʌn tiꞌ tu cotor mac. Cax a teraꞌ, tu yʌn mac a jach noꞌjoꞌ, cax ich a macꞌ a mʌꞌ jach noꞌjoꞌ. Mʌꞌ baꞌ caj in waꞌaraj, jariꞌ a baꞌ caj u tsꞌibtaj mac a tsꞌaꞌb u tucurob ten Cꞌuj soc u tsꞌibticob a baꞌ u cꞌat Cꞌuj, quet yejer a baꞌ tsꞌibtaꞌb ten Moisés uch. A baꞌ caj u yaꞌarajob bin u caꞌ tar caꞌ bin cꞌuchuc tu qꞌuinin raꞌ caj in tsecꞌtaj.
23 Mʌꞌ ja wirej, robob caj u yaꞌarajob bin u caꞌ tar Mesías ich Cꞌuj caꞌ mucꞌyajnʌc, cu tsꞌocareꞌ, cu quimin soc u taquic tu cotor mac. Aroꞌ tuneꞌ, rajiꞌ u yʌnxchun mac u riꞌquir tu quimirir quir u tsecꞌtic tiꞌob u winiquirob judío, yejer a mʌꞌ u winiquirob judío wa cꞌuchaꞌan yor u tacbir ten Cꞌuj a jeraꞌ sasirir Cꞌuj tiꞌob.
Pablo caj u tumtaj yirej wa Agripa cu yacsic tu yor
24 Quireꞌ cu tsicbʌtic Pablo a jeꞌ tꞌʌnaꞌ, jaj ix tiꞌ wa cu taquic u bʌj tiꞌ Festo. Rajiꞌ Festo cꞌam caj tꞌʌnʌj, caj u yaꞌaraj:
―A techoꞌ Pablo ―quij yaꞌaraj tiꞌ―, mʌꞌ cꞌuchaꞌan a wor a tucric taj, quireꞌ jach manan a xacmʌn juꞌun a techoꞌ ―quij Festo.
25 Barej Pablo caj u yaꞌaraj tiꞌ Festo:
―In gobernadorech, a mac quin sʌjtic, a baꞌ quin waꞌaric tech rajiꞌ taj. Mʌꞌ ja wirej, quin tsicbar an ten bic mac a jach manan taj a baꞌ cu tucricoꞌ.
26 Teꞌ yʌnechaꞌ reyech Agripa, a techoꞌ, a jach er tu cotor baꞌ a caj in waꞌaraj, rajen mʌꞌ u jacꞌʌr in wor in tsicbar ʌcʌtan tech. A tenoꞌ, quin tucric a wer tu cotor a baꞌ quin tsicbar rajiꞌ tꞌʌn jach taj, quireꞌ mʌꞌ mucu araꞌaniꞌ, tu cotor mac yubmʌnob.
27 A techoꞌ in reyech Agripa, a wacsmʌn wa ta wor a baꞌ tsꞌibtaꞌb ten a mac a tsꞌaꞌb u tucurob ten Cꞌuj quir u tsꞌibticob a baꞌ u cꞌat Cꞌuj? A tenoꞌ, in wer ca wacsic ta wor.
28 Caj u nuncaj Agripa tiꞌ Pablo tun, caj yaꞌaraj:
―A techoꞌ, ca tus tucric seb in cꞌaxic in wor soc in wacsic tin wor u tꞌʌn Cristo.
29 Caj u nuncaj Pablo:
―Cax quiꞌ tsꞌabir a wacsic ta wor, cax seb ca wacsic ta wor u tꞌʌn Cristo. Mʌꞌ ja wirej, a tenoꞌ, in tꞌʌnic Cꞌuj soc tech yejer tu cotor mac a tan a wuꞌiquex in tꞌʌn bajeꞌrer caꞌ a wacsaquex ta worex tiꞌ Jesús an ten bic ten caj in wacsaj tin wor ―quij Pablo―. Chen wa tsoy tu tꞌʌn Cꞌuj mʌꞌ in cꞌat in wiric cꞌʌraꞌanechex an ten bic ten bajeꞌrer.
30 Caj tsꞌoc yaꞌaric Pablo a jeraꞌ, caj riqꞌuij a reyoꞌ yejer a Berenice yejer gobernador yejer tu cotor mac tu curaꞌanob.
31 Barej caj jocꞌob mʌꞌ nenachiꞌ, caj u pacran aꞌarajob ich u racꞌob:
―A jeꞌ xibaꞌ, mʌnaꞌ u cꞌasir tiꞌ. Mʌꞌ baꞌwir tiꞌ quir u quimin, mʌꞌ quir in cꞌʌricob tu cu naj maꞌcʌr mac.
32 Caj u yaꞌaraj Agripa tiꞌ Festo:
―A jeꞌ xibaꞌ wa mʌꞌ u cꞌat u bin ich u rey César uch quir u taquic u bʌj, cꞌuchaꞌan ij cor ij chaꞌic u bin Pablo.