Pablo tuchiꞌtaꞌb tu cajar Roma
27
Barej caj u tucrajob caj binob purbir Pablo ich chem tu ruꞌumin Italia, a tenob in wet binacob, quij Lucas. Caj cꞌubij Pablo caj bin purbir yejer yet cꞌʌraꞌanob winiquirob caj cꞌubij tiꞌ u yʌjtꞌʌnir cien soldados. Julio u cꞌabaꞌ yʌjtꞌʌnir cien soldados. A Juliojoꞌ, cu tsꞌurintaꞌr ten jun muchꞌ soldado pʌchaꞌan u cꞌabaꞌ Augusto, quireꞌ Augusto u rey yʌnin.
2 Tiꞌ yʌn u jer yet binac xan, Aristarco u cꞌabaꞌ. Tar u tar tu ruꞌumin Macedonia, chen u jach cajaroꞌ Tesalónica. Jeroj tuneꞌ, caj oquenob ich u chemir cꞌacꞌnab a cu tar tu cajar Adramitio. Tabar u bin chem, bin u caꞌ ocar tu yaꞌab u jor u chemin ich tu cotor u chiꞌcꞌacꞌnab tu ruꞌumin Asia.
3 Caj sasij caj cꞌuchenob ich u jor u chemin tu cajar Sidón. Julio caj u betaj tsoy tiꞌ Pablo, rajen chaꞌb u bin yirir u yet acsaꞌorirob. Caj acsaꞌb Pablo ten u yet acsaꞌorirob ich yatochob.
4 Jeroj tuneꞌ, caj ruqꞌuenob tu jor chem Sidón. Quireꞌ ich cꞌacꞌnab, caj in nupajob icꞌ, rajen caj in masajob tu noj tu petenin cꞌacꞌnab Chipre, tu mʌꞌ necꞌam yicꞌariꞌ.
5 Jeroj tuneꞌ, caj in pꞌʌtajob u chiꞌ cꞌacꞌnab tu quin manob ich u chemicꞌacꞌnab quir in chꞌʌcticob a cꞌacꞌnaboꞌ. Raꞌ u cꞌacꞌnabir tiꞌ yʌn tu yʌn u ruꞌumin Cilicia yejer u ruꞌumin Panfilia. Jeroj tuneꞌ, caj cꞌuchenob tu cajar Mira, a tiꞌ yʌn tu ruꞌumin Licia.
6 Caj cꞌuchenob ich u chemin cꞌacꞌnab tu cajar Mira a tiꞌ yʌnoꞌ ich u ruꞌumin Licia. Tiriꞌ Julio yʌjtꞌʌnir cien soldados caj u cʌxtaj u jer chem quir in binob. Caj u yiraj u jer chem a tar u tar tu cajar Alejandría. Jeroj tuneꞌ, caj acsaꞌbenob ten Julio quir in binob tu ruꞌumin Italia.
7 Jach yaꞌab u qꞌuinin amaꞌan binenob tu quin binob ich chem. Chan ber caj binenob, quireꞌ cꞌam yicꞌar caj in nupob. Jach yaj caj cꞌuchenob ʌcʌtan tu cajar Gnido, quireꞌ a yicꞌaroꞌ. Caj binenob tu noj u petenin cꞌacꞌnabir Creta, jach baytʌc tu cajar Salmón.
8 U chemin cꞌacꞌnab, caj bin chan ber ich tu cotor u chiꞌcꞌacꞌnab hasta tac cꞌuchenob tu jor chem u cajar Buenos Puertos, jach baytʌc tiꞌ u cajar Lasea.
9 Quireꞌ jach chan ber caj binenob ich u chemin cꞌacꞌnab. Rajen caj u chꞌaj sajquirob u binob ich cꞌacꞌnab, quireꞌ raꞌ u qꞌuinin tan jaꞌ yejer yicꞌar. Mʌꞌ ja wirej, toc manij u qꞌuinin cu waꞌquic u qꞌuiqꞌuer yʌrʌcꞌ soc u rucꞌsic u siꞌpirob. Rajen tsibanʌjij Pablo a baꞌ cu tucriqueꞌ.
10 Caj u yaꞌaraj:
―Uꞌyex baꞌ quin wac techex in wet xibirechex. A tenoꞌ, quin tucric bin u caj tar toꞌonex yaꞌab u yajirir, wa quic binex ich yocꞌor cꞌacꞌnab bajeꞌrer. Jeꞌ ix tiꞌ ic jururex xan yejer tu cotor u baꞌtacob. Bajeꞌrer ix tiꞌ ic binex jaꞌ toꞌonex xan.
11 Chen yʌjtꞌʌnir cien soldados caj u chen quibaj a baꞌ araꞌb tiꞌ ten a mac yʌnin chem yejer a mac a cu tsꞌur chem, mʌꞌ ju quibaj a baꞌ araꞌb tiꞌ ten Pablo.
12 U jor u chemin tu yʌnenob mʌꞌ tsoyiꞌ, caꞌ bin cꞌuchuc tu qꞌuinin tan jaꞌ yejer u chꞌic yum yicꞌar, rajen orac tu cotor caj u tucrajob tsoy caj cʌxtajob u jer u jor u chemin tu tsoy u masicob u qꞌuinin tan jaꞌ yejer cꞌam yicꞌar. Rajen caj u tucrajob u binob ich u jor u chemin tu cajar Fenice. A ray u jor u chemin tiꞌ yʌn ich u petenin cꞌacꞌnab Creta. Bayiriꞌ xan, yʌn u wich xʌman caꞌan yejer quir u tar qꞌuin, rajen mʌꞌ cꞌam yicꞌar cu tar tu jor u chemin Fenice.
U chꞌic yum icꞌ ich cꞌacꞌnab
13 Barej caj u yirob cu tar icꞌ ich nojar chan ber yustaꞌr, jeroj caj u tucrajob jach tsoy in binob ich chem, quireꞌ mʌꞌ xʌman caꞌan. Rajen caj u ricꞌsajob u mascab a tiꞌ yʌn ich yitꞌ jaꞌ. A jeꞌ mascabaꞌ, cu suꞌsic chem soc mʌꞌ u pictaꞌr ten icꞌ. Caj jocꞌob caj binob ich u chemin cꞌacꞌnab caj u manob tu chiꞌ u cꞌacnabir u petenin Creta. Jach bʌytʌc u petenin caj binob.
14 Jach tabar caj tar u chꞌic yum icꞌ. Tar u tar u wich ich u ruꞌumin u petenin Creta. Jeroj tuneꞌ in cheminob caj u nupꞌaj yicꞌar. A jeꞌ yicꞌaraꞌ, pʌchaꞌan u cꞌabaꞌ Yicꞌar Xʌman Caꞌan, cꞌʌs quir u tar qꞌuin.
15 Caj cuch u chemin cꞌacꞌnab ten yicꞌar, quireꞌ mʌꞌ cꞌuchaꞌan in worob in binob ich yicꞌar, rajen caj in chaꞌajob u cuchiquenob, quij Lucas.
16 Tu manenob caj in masajob u petenin Clauda. Caj manenob Clauda, mʌꞌ ne cꞌam yicꞌar tarij, quireꞌ bʌraꞌan ten u ruꞌumin, nojar. Jeroj caj in chopʌtajob u chan chemin a cu jitaꞌr ten u chemin cꞌacꞌnab. Jach chich ic beyajob, quij Lucas, hasta caj in wacsajob u chan chem ich u chemin cꞌacꞌnab.
17 Caj tsꞌoc in nacsicob u chan chem ich u chemin cꞌacꞌnab, jeroj caj u cꞌʌxajob u chemin cꞌacꞌnab yejer sum. Mʌꞌ ja wirej, caj u masaj a sumoꞌ yaran chem quir u nup cꞌʌxtic, soc u quiꞌ nupꞌur u chemin tu bʌjaꞌan, quireꞌ jewer u chemin cꞌacꞌnab. Caj u jach chꞌaj sajquirob, quireꞌ tiꞌ yʌn chꞌic yaꞌab saꞌam jach baytʌc tu yʌnob. A raꞌ saꞌamoꞌ, pach u cꞌabaꞌ Sirte. Mʌꞌ ja wirej, cu sʌjtaꞌr wa cu nichꞌir chem ich yocꞌor a saꞌamoꞌ, quireꞌ cꞌʌs yaram cꞌacꞌnab tiꞌ yʌn u saꞌamin. Rajen caj u yensajob u noquirob u chem tu tꞌinaꞌan, soc mʌꞌ u pictaꞌr ten icꞌ soc u bʌjiriꞌ cu tsꞌichꞌintaꞌr u chemin cꞌacꞌnab ten yicꞌar cꞌacꞌnab.
18 Caj sasij mʌꞌ toy chꞌenac u chꞌic yum icꞌ. Mʌꞌ ja wirej, quireꞌ a icꞌoꞌ, caj u yʌnchun u puricob u cuch chem soc cꞌʌs mʌnaꞌ u cuch chem.
19 Caj cꞌuchij mʌnaꞌ u nup u qꞌuinin, tu cotorenob yejer in cꞌʌbob caj in rʌc jarob a ju cuch chem a pꞌat tu japnin chem, caj in rʌc purajob ich cꞌacꞌnab.
20 Quireꞌ mʌꞌ jin wirajob a qꞌuinoꞌ, mʌnaꞌ sab caj manij yaꞌab u qꞌuinin. Mʌꞌ ja wirej, tiꞌ yʌn u chꞌic yum icꞌ yejer jaꞌ ich cꞌacꞌnab, rajen caj in tucrajob bin in caꞌob quimin tu cotorenob.
21 Quireꞌ caj man yaꞌab u qꞌuinin mʌꞌ jin jantajobiꞌ waj, rajen caj bin Pablo u tꞌʌnic a mac a tiꞌ yʌn ich chem:
―Uꞌyex, baꞌ quin wac techex, in wet xibirechex. Wa caj a quibajex in tꞌʌn ucheꞌ tiꞌ toy yʌnoꞌonex ich u petenin Creta. Chen raꞌiriꞌ u qꞌuinin, caj jocoꞌonex yejer chem ich cꞌacꞌnab ij cʌnmʌnex a jeꞌ yajiriraꞌ tu jaqꞌuex ij corex.
22 Chen bajeꞌrer, chichquintex a worex, mʌnaꞌ mac ich a jeꞌ chemaꞌ cu bint jaꞌ. Jariꞌ a chemoꞌ, cu bint yitꞌ cꞌacꞌnab.
23 Joꞌoraj acꞌbir, caj u tuchiꞌtaten Cꞌuj tuririꞌ yʌjmasir u tꞌʌn Cꞌuj tu yʌnen, ―quij Pablo―. Caj u tuchiꞌtaten Cꞌuj, quireꞌ rajiꞌ quin jach tsꞌurintic Cꞌuj xan, bayiriꞌ xan, quin beyaj tiꞌ.
24 Caj u yaꞌaraj ten yʌjmasir u tꞌʌn Cꞌuj: “Mʌꞌ a chꞌic sajquir Pablo. Caꞌ a chꞌicraquech ʌcʌtan ich u rey César. Mʌꞌ jarariꞌ, quireꞌ a techoꞌ, caj a tꞌʌnaj Cꞌuj tiꞌ a mac a tiꞌ yʌn ich chem, a Cꞌujoꞌ, quireꞌ jach manan tsoy jeꞌ u tocar tu cotor mac yejerech.”
25 Rajen, quen, chichquintex a worex in wet xibirechex, mʌꞌ ja wirej, a tenoꞌ quin wacsic tin wor a baꞌ caj u toc araj Cꞌuj, quireꞌ in jach wer a baꞌ cu yaꞌaric Cꞌuj cu chen betic.
26 Jariꞌ bin u caꞌ u puroꞌonex a icꞌoꞌ ich tuririꞌ u petenin ich cꞌacꞌnab.
27 Mʌꞌ ja wirej, quin binob ich u chemin cꞌacꞌnab caꞌtur semana. Jeroj, caj acꞌbirchʌjij a yicꞌaroꞌ caj u purenob ich u cꞌacꞌnabir u cꞌabaꞌ Adria. Caj cꞌuchij chumuc acꞌbir a mac a cu naj beyajob ich chem caj tucrajob tan in natsꞌarob ich ruꞌum.
28 Rajen caj u chꞌaj u pꞌis u yirob mun u tamin yʌn u yitꞌ cꞌacꞌnab. Caj tsꞌoc u puricob u sumin quir yiricob caj u yiraj treinta y seis metros. Sasam caj u caꞌ chꞌu pꞌis caj u yirob veintisiete metros u tamin.
29 Jeroj, caj u chꞌaj sajquirob u cꞌuchurob tu yʌn a tunichoꞌ, rajen caj u jurquintajob u mascabir ich yach chem caꞌ xuruc u bin. Rʌc yʌn u nup u mascabir caj u jurquintajob. Caj tsꞌoc u jurquinticob u mascabir cu jach pachticob u sastarob. Jach yaj yorob cu yubicob u pajicob u sastar.
30 A mac a cu naj beyajob ich chem u cꞌat u putsꞌurob tiꞌ a chemoꞌ, rajen caj u yemsajob ich jaꞌ a chan chemoꞌ, a cꞌʌxaꞌan tu japnin u chemir cꞌacꞌnab, soc u putsꞌurob rajen caj u yaꞌarajob:
―Atenob, bin in caꞌ in purob u jer u mascabir quir u suꞌsic ic chemex a tiꞌ yʌn tu jor chem.
31 Rajen Pablo caj u yaꞌaraj tiꞌ yʌjtꞌʌnir cien soldados:
―Wa robob mʌꞌ u pꞌatʌrob ich chem, jeꞌ a rʌc bint jaꞌex.
32 Rajen u soldados caj u xonchꞌʌctajob u sumin chan chem, caj u chaj u bʌjiriꞌ cu bin chan chem ich cꞌacꞌnab.
33 Acꞌab caj sasij caj araꞌb tiꞌob ten Pablo cu chich aric tiꞌob:
―Joqꞌuenex ta janʌnex quireꞌ yʌn caꞌtur semana mʌꞌ janʌnechex mʌꞌ ja wenenex quireꞌ ca pajiquex caꞌ manac jaꞌ.
34 Rajen janʌnex caꞌ tac a muqꞌuex quin chich aric techex quireꞌ mʌnaꞌ mac cu bint jaꞌ. Mʌꞌ ja bin yajtarex xan.
35 Caj tsꞌoc u yaꞌaric aroꞌ, Pablo caj u chucaj u yoꞌoch waj caj u yaꞌaraj: “Bayoꞌ Cꞌuj”, quireꞌ yoꞌoch. Baxuc caj u betaj ʌcʌtan tu cotor mac ich chem, caj u yʌnxchun u janʌn.
36 Tu cotor mac caj u chꞌaj u yorob caj u jantajob yoꞌoch xan.
37 Tu cotor mac a tiꞌ yʌnob yejerenob, quij Lucas, yʌn doscientos setenta.
38 Caj tsꞌoc u nachʌjʌrenob caj u purajob a yoꞌoch trigojoꞌ ich cꞌacꞌnab soc satar u chemin.
Cu jurur u chemin cꞌacꞌnab
39 Barej caj tsꞌoc u sastareꞌ, a mac a cu naj beyajob ich chem, mʌꞌ ju cꞌʌꞌotajob u ruꞌumin tu cꞌuchenob. Chen caj u yirob u cꞌʌbir cꞌacꞌnab. Caj u yirob yʌn saꞌam. Caj u tucrajob wa cꞌuchaꞌan yorob tiꞌ caꞌ u nacsejob u chemin cꞌacꞌnab ich yocꞌor a saꞌamoꞌ.
40 Jeroj tuneꞌ, caj u rʌc xatꞌajob u sumin, a tiꞌ cꞌʌxaꞌan tiꞌ u mascabir soc u xur chem. Caj rub u mascabir chem ich cꞌacꞌnab. Bayiriꞌ xan, caj u cꞌʌs siptajob u sumin, a tiꞌ cꞌʌxaꞌan tu cu bab, aroꞌ soc u tajquinticob u ber tu cu bin ich cꞌacꞌnab. Jeroj tuneꞌ, caj u tꞌinajob u noquir chem quir u bin, aroꞌ tiꞌ yʌn tu jor chem. Caj tsꞌoc u tꞌinicob u noqꞌuir chem quir u cuchur ten icꞌ, caj bin u chemin tu yʌn u chiꞌ cꞌacꞌnab.
41 Chen caj cuchob ten icꞌ tu yʌn caꞌtur u yoc cꞌacꞌnab, tiriꞌ pacꞌ a chemoꞌ ich saꞌam. U jor chem chich caj pacꞌ ich saꞌam. Rajen, mʌꞌ cꞌuchaꞌan yorob u natsꞌar ich chiꞌ cꞌacꞌnab a chemoꞌ. U yamin cꞌacꞌnab, caj u yʌnxchun u rʌc xetꞌar u yach a chemoꞌ, quireꞌ jach chich u yamin.
42 U soldado, caj u tucrajob u rʌc quinsicob u cꞌʌr winiquirob uch. Mʌꞌ ja wirej, sajʌcob u putsꞌurob wa cu puricob u bʌj ich cꞌacꞌnab.
43 Chen a yʌjtꞌʌnir cien soldados u cꞌat u taquic Pablo, rajen mʌꞌ ju chaꞌj u quinsicob a ju cꞌʌr winicobeꞌ. Rajiꞌ caj u yaꞌaraj:
―A mac a yer ʌrʌcꞌ jaꞌ, caꞌ u purob u bʌj soc u cꞌuchur ich u chiꞌ cꞌacꞌnab.
44 A mac a mʌꞌ yer ʌrʌcꞌ jaꞌoꞌ, caꞌ u cʌxtej cheꞌ soc u cꞌuchob ich u chiꞌ cꞌacꞌnab.
Mʌꞌ ja wirej, soc u bosarob yejer cheꞌ. Tu pajar cheꞌ, caj u cʌxtajob quir u puricob u bʌj ich cꞌacꞌnab. A baywoꞌ, caj rʌc cꞌuchob ich chiꞌ cꞌacꞌnab, mʌnaꞌ mac bint jaꞌ rʌc jocꞌob.