Pablo ich u petenin cꞌacꞌnab u cꞌabaꞌ Malta
28
Barej caj cꞌuchenob, quij Lucas, ich ruꞌum, a mac tiꞌ cʌjaꞌanob ich ruꞌum caj u yaꞌarob tenob u cꞌabaꞌ u peten. Malta u cꞌabaꞌ, quij.
2 A mac cʌjaꞌan ich u petenin Malta caj u yacsajenob. Caj u tꞌʌbajob cꞌacꞌ quir in qꞌuichob. Mʌꞌ ja wirej, u yʌnx chun u tar yaꞌarir, rajen jach queꞌer.
3 Pablo tuneꞌ, caj tsꞌoc u cuchic siꞌ, caj u nutsꞌob qꞌuich. Caj putsꞌij can tiꞌ cꞌacꞌ, a tiꞌ yʌn ich siꞌ caꞌ bʌcꞌʌcꞌʌxtaꞌb u cꞌʌb Pablo, tiꞌ chiꞌbir.
4 Caj ir ten a mac a cʌjaꞌan ich u petenin Malta baꞌ u ber tiꞌ Pablo. Robob caj u pacran aꞌarajob ich u racꞌob:
―A jeꞌ xibaꞌ, jach taj caj u quinsaj mac, cax mʌꞌ bint jaꞌ chen in cꞌujob u cꞌujir quin waꞌaricob, Justicia, bin u caꞌ u quinsic.
5 Barej, caj u titaj u cꞌʌb soc u rubur ich cꞌacꞌ. Tiꞌ erij ich cꞌacꞌ. Mʌnaꞌ baꞌ u ber Pablo.
6 Robob a tiꞌ cʌjaꞌan ich u petenin Malta, caj u pajajob yirej wa jeꞌ u quimin. Caj u pajajob yirej wa jeꞌ u chupur tu chiꞌbir ten can. Sasam caj u yirajob mʌnaꞌ baꞌ u ber, caj u rʌc cꞌaxajob u tucur, caj u yaꞌarajob:
―Jaj ix tʌcoj, rajiꞌ tsoy yirir ten cꞌuj.
7 Tiꞌ a ray u cuchir qꞌuichoꞌ tu yʌnenob uch tiꞌ yʌn mac u jach tsꞌurir u petenin Malta. Publio u cꞌabaꞌ. Rajiꞌ mʌꞌ nenach tu quin qꞌuichob, quij Lucas, yʌn u cor. Caj u pʌyenob tu yatoch caj u quiꞌ acsajenob mʌnaꞌ u nup u qꞌuinin.
8 A werex baꞌ u ber? Caj u cʌnaj u yajir u tet Publio. Rajiꞌ characbar, quireꞌ yʌn chʌcwirir yejer qꞌuicꞌ u taꞌ. Pablo caj bin yirej, caj tsꞌoc u tꞌʌnic Cꞌuj caj u tsꞌancꞌʌbtaj tu joꞌr, jeroj caj jawij.
9 Rajen rʌc tarob a mac yajoꞌ tu petenin Malta, tarob ich Pablo. Rʌc tarob, quireꞌ yubob yaꞌaraꞌ jawsaꞌb u tet Publio ten Pablo. Caj rʌc jawsaꞌb a mac yaj ten Pablo.
10 Robob caj u sijaj tenob yaꞌab u baꞌtac. Wa ber caj wʌcꞌʌs oquenob ich u jer u chemin cꞌacꞌnab quir in binob, a mac a cʌjaꞌan ich u petenin Malta, caj u chucaj tenob a mun yoꞌoch in cꞌatob caj binenob ich chem.
Pablo cu cꞌuchur tu cajar Roma
11 A jeꞌ chemaꞌ, caj u masaj u qꞌuinin tan jaꞌ yejer icꞌ ich u petenin Malta. Tar u tar tu cajar Alejandría. Ich u jor u chemin, tiꞌ betaꞌan ten mac caꞌtur yochir winic. Tuririꞌ u cꞌabaꞌ Cástor, u jer tuririꞌ u cꞌabaꞌ Pólux. Mʌꞌ ja wirej, caj in masajob mʌnaꞌ u nup ic nʌꞌ ich u petenin Malta, rajen caj oquenob ich chem quir in binob.
12 Caj in pꞌʌtajob u petenin Malta, caj binenob ich chem. Caj cꞌuchenob tu jor chem tu cajar Siracusa. Jach omaꞌan caj ruqꞌuenob, mʌnaꞌ u nup u qꞌuinin caj ruqꞌuenob.
13 Caj ruqꞌuenob ich u jor chem Siracusa. Tu chiꞌ cꞌacꞌnab caj binenob ich chem tac tu jor chem u cajar Regio. Caj sasij nojar u wich icꞌ caj joqꞌuenob quir in binob ich chem. Caj in masajob caꞌtur u qꞌuinin quir in cꞌuchurob tu jor chem tu cajar Puteoli.
14 Caj cꞌuchoꞌonex tu cajar tu jor chem Puteoli, caj in wirajob ij quet acsaꞌorirex. Tu cꞌaten, caj pꞌatenob turiri semana. Caj tsꞌoc u man tuririꞌ semana, caj binenob caj oquenob tu cajar Roma.
15 A mac a yacsmʌnob tu yorob tu cajar Roma, yubmʌnob tabar in cꞌuchurob tu cajar Roma, caj jocꞌob quir u nupꞌiquenob ich bej. Caj u nupꞌajenob tu cajar Foro de Apio. U jerob, caj in nupꞌajob caj cꞌuchenob tu cajar Tres Tabernas. Caj irir a yacsmʌnob tu yorob ten Pablo, caj u chichquintajob yor Pablo caj u yaꞌaraj: “Bayoꞌ Cꞌuj”, quij Pablo.
16 Caj cꞌuchenob tu cajar Roma u yʌjtꞌʌnir cien soldados caj u cꞌubaj Pablo yejer tu cotor a mac cꞌʌraꞌanob tiꞌ u jach tsꞌurir, a mac a cu cʌnantic tu cotor u cꞌʌr winiquirob. Barej chaꞌb Pablo u cʌjtar tu junan. Jariꞌ cʌnantaꞌb ten tuririꞌ soldado soc mʌꞌ u putsꞌur.
Pablo cu tsecꞌtic u tꞌʌn Cꞌuj tu cajar Roma
17 Pachir caj manij mʌnaꞌ u nup u qꞌuinin Pablo, caj u tuchiꞌtaj tꞌʌnbir u jach tsꞌurirob u winiquirob judío. Barej, caj u rʌc muchꞌquintajob u bʌj ich Pablo, rajiꞌ caj u yaꞌaraj tiꞌob:
―Uꞌyex baꞌ quin wac techex in wet winiquirechex judío. A tenoꞌ, caj u cꞌuben in wet winiquirob judío tu cajar Jerusalén tiꞌ u winiquirob romano, cax mʌnaꞌ in siꞌpir. Mʌꞌ jin pꞌastaj a baꞌ araꞌb toꞌonex ten ic nunquirex, mʌnaꞌ baꞌ caj in betaj tiꞌ in wet winiquirob judío tu cajar Jerusalén xan.
18 U winiquirob romano, caj tsꞌoc u cʌxticob yirej wa yʌn in siꞌpir, u cꞌat u chaꞌiquen. Mʌꞌ ja wirej, mʌꞌ ju yiraj wa yʌn in siꞌpir quir in quinsaꞌ.
19 In wet winiquirob judío, mʌꞌ u cꞌat u chaꞌiquenob. Rajen caj in cꞌataj, caꞌ u tuchiꞌtenob ich u rey César soc in tsicbʌtic tiꞌ soc in taquic in bʌj. A tenoꞌ, mʌꞌ baꞌwir quin pʌqꞌuic u pachob in wet winiquirob judío.
20 Rajen caj in tꞌʌnajechex soc a tarex caꞌ tsicbanʌcoꞌonex. Mʌꞌ ja wirej, a tenoꞌ, quin wacsic tin wor u tꞌʌn tiꞌ a mac a cu pajicob u tarej u winiquirob judío, rajen caj u chuquenob quir u mʌquiquenob.
21 Robob tuneꞌ, caj u yaꞌarajob:
―A tenob, mʌꞌ jin wirob u juꞌunirob tu tuchiꞌtaꞌb ten in wet winiquirob judío tu ruꞌumin Judea. Mʌꞌ cꞌuchij tuririꞌ mac quir u taꞌquic a joꞌr.
22 Chen cu jumintaꞌr ten tu cotor mac ich yocꞌocab, jach cꞌas a mac a tu yacsob tu yorobeꞌ. Rajen arej tenob baꞌ ca tucric quireꞌ in cꞌat in najticob.
23 Robob caj u pꞌisajob u qꞌuinin soc u tarob u muchꞌquintob u bʌj ich Pablo. Caj cꞌuchij tu qꞌuinin caj rʌc tarob tu cʌjaꞌan Pablo. U burur qꞌuin, tac u bin u qꞌuinin, Pablo caj tsicbanʌjij u tꞌʌn Cꞌuj tiꞌob soc u yacsicob tu yorob u tꞌʌn Jesús, caj u yesaj tiꞌob ich u tꞌʌn Moisés, bayiriꞌ xan, ich u tꞌʌnob, a tsꞌibtaꞌb ten a mac tsꞌaꞌb u tucurob ten Cꞌuj, quir u tsꞌibticob a baꞌ u cꞌat Cꞌuj uch.
24 Yʌn jun yarob u winiquirob judío, tsoy yubicob a baꞌ araꞌb tiꞌob ten Pablo rajen caj u yacsajob tu yorob u tꞌʌn Jesús, chen tiꞌ yʌn u jerob, mʌꞌ tsoy caj yubajob, rajen mʌꞌ ju yacsajob tu yorob.
25 A mun mʌꞌ ju yacsajob tu yorob u tꞌʌn Jesús, mʌꞌ quet yorob ich u yet winiquirob judío, mʌꞌ ja wirej, u cꞌat u binob ich yatochob, quireꞌ yubob yaꞌaraꞌ ten Pablo:
―Mʌꞌ wa jach taj u tꞌʌnob a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj? Rajiꞌ Isaías, a mac tsꞌaꞌb u tꞌʌnin ten u Tajꞌor u Pixam Cꞌuj, rajen caj u yaꞌaraj:
26 Joqꞌuen arej tiꞌ a jeꞌ u winiquirob judíojoꞌ, cax tu yʌnob. Caꞌ a waꞌarej tiꞌob: Cax u burur qꞌuin ca wuꞌyiquex in tꞌʌn mʌꞌ a yʌnyʌn najtiquexiꞌ. Cax u burur qꞌuin ca wiriquex ta wichex mʌꞌ a yʌnyʌn najtechex a baꞌ ca wiriquex ta wichex.
27 Chich a joꞌrex, rajen mʌꞌ a quibiquexiꞌ, mʌꞌ ja najtiquexiꞌ. Mʌꞌ a cʌxtex a wirex soc a cꞌaxiquex ta worex caꞌ a pꞌʌtex u cꞌasir tu ca manex. Rajen Cꞌuj, mʌꞌ u rucꞌs a siꞌpirex. Baxuc caj u yaꞌaraj Isaías uch.
28 Rajen uꞌyex baꞌ quin wac techex. Naj techex a jeraꞌ, bajeꞌrer, u tꞌʌn Cꞌuj bin u caꞌ u tsecꞌtej ich a mʌꞌ u winiquirob judío. Bin u caꞌ u yubob bic Cꞌuj caj u jawsaj u siꞌpirob. Jach taj, a mʌꞌ u winiquirob judíojoꞌ bin u caꞌ u cꞌʌmicob u tꞌʌn Cꞌuj. Baxuc caj u yaꞌaraj Pablo tiꞌ u winiquirob judío a tarob tu yatoch.
29 Caj tsꞌoc yaꞌaric Pablo aroꞌ. Cꞌam caj pacran tꞌʌnajob u winiquirob judío, cꞌam caj u nunquob u tꞌʌn ich u yet winiquirob judío, barej caj rʌc jocꞌob.
30 Tiriꞌ pꞌatij Pablo ich u cajar Roma, toc nupaꞌan caꞌtur yaxqꞌuin. Caj u mʌjantaj yatoch quir u cʌjtar, u bʌjiriꞌ caj u boꞌotaj yejer u taqꞌuin a caj u jaraj tu cu beyaj. A mun caj u cꞌuchur tu yatoch cu rʌc acsaj tu yatoch.
31 Mʌnaꞌ mac caj u maꞌquintaj Pablo, rajen Pablo caj u tsicbʌtaj bic Cꞌuj cu bin u reyinticob. Chich yor Pablo caj u camsaj u tꞌʌn u Jaj Tsꞌur Jesucristo.