Pablo caj u tsicbʌtaj ʌcʌtan gobernador Festo
25
Jeroj, caj cꞌuchij Festo quir u yocar beyaj bic gobernador. Barej caj tsꞌoc u man mʌnaꞌ u nup u qꞌuinin, seb Festo caj u pꞌʌtaj u cajar Cesarea caj binij ich u cajar Jerusalén.
2 Barej caj cꞌuchij Festo tu cajar Jerusalén caj tarob tu yicnʌn u jach tsꞌurirob u sacerdote u winiquirob judío, quet tarob u jach tsꞌurirob u winiquirob judío, a mac a jach nojoꞌ. Rʌc tarob quir u tocarob u joꞌr Pablo. Robob caj u yaꞌarajob tiꞌ Festo:
―A jeꞌ xibaꞌ Pablo, caj u yacsaj yaꞌab u cꞌasir ―quij.
3 Rajen caj u yaꞌarajob:
―Tsoy caꞌ a betej a tenoboꞌ, wa jeꞌ a pʌyic Pablo ich u cajar Jerusalén.
Mʌꞌ ja wirej, caj u tucrob wa ju mucu chꞌucticob u mucu quinsob Pablo ich bej.
4 Barej Festo, caj u nuncaj:
―Tiꞌ toy yʌn Pablo ich u cajar Cesarea tu mʌcaꞌan, cu cʌnantaꞌr ten soldados. Tabar in bin a tenoꞌ ―quij―.
5 Barej, arex u bin a jach tsꞌurirex caꞌ xiquenob yejer a jach tsꞌurirex caꞌ ij quirex wa baꞌ cꞌas caj u betaj. Arej caꞌ tacob u tacob u joꞌr Pablo ʌcʌtan ten ich u cajar Cesarea.
6 A Festojoꞌ, caj pꞌat ich u cajar Jerusalén ocho wa diez u qꞌuinin, jeroj, caj joqꞌuij quir u bin tu cajar Cesarea. Caj sasij caj curaj tu cꞌancheꞌir tu cu naj cutar a gobernadoroꞌ, tu cu jocꞌar u tajir baꞌ, jeroj, caj u tuchiꞌtaj pʌybir Pablo soc u tar yicnʌn.
7 Barej caj cꞌuchij Pablo ich Festo, u winiquirob judío a tarob tu cajar Jerusalén, caj u bʌcꞌristajob Pablo. Jeroj, caj u yʌnxchun u taquicob u joꞌr Pablo. Robob caj u yaꞌarajob:
―A jeꞌ xibaꞌ, caj u betaj jach yaꞌab cꞌas. Cax yaꞌab caj u tacob u joꞌr, chen mʌꞌ cꞌuchaꞌan yorob u yesicob wa tajiꞌ.
8 Caj yaꞌaraj Pablo quir u taquic u bʌj:
―A tenoꞌ, ―quij―, mʌnaꞌ in siꞌpir. A tenoꞌ mʌꞌ jin betaj cꞌas, a baꞌ cu cꞌasquintic u tꞌʌn a cu naj cʌnanticob u winiquirob judío. Mʌꞌ jin betaj a baꞌ cu cꞌasquintic a carem naj tu cu naj cꞌujinticob Cꞌuj u winiquirob judío. Mʌꞌ jin waꞌara baꞌquiriꞌ cꞌas tiꞌ u rey César a cʌjaꞌan tu cajar Roma.
9 Barej Festo, mʌꞌ u cꞌat u tsꞌiquintic u winiquirob judío, caj u yaꞌaraj tiꞌ Pablo:
―Tsoy wa ta tꞌʌn tech caꞌ xiquech tu cajar Jerusalén? Tar yʌnoꞌ cꞌuchaꞌan a wor a taquic a bʌj ten a baꞌ cu taquicob a joꞌr.
A baywoꞌ, u cꞌat u quiꞌquintic u yorob u winiquirob judío.
10 Pablo tuneꞌ, caj u yaꞌaraj:
―Bajeꞌrer tiꞌ yʌnen ich ʌcʌtan u jach tsꞌurir u cajar, a caj u chaꞌj u tsꞌurintaꞌ ten u rey César. A teraꞌ tech caꞌ a waꞌarej wa cꞌas caj in betaj wa mʌnaꞌ cꞌas caj in betaj. Mʌnaꞌ cꞌas caj in betaj tiꞌ an ten bic a jach er.
11 Wa yʌn in siꞌpir quir in quinsaꞌ. A tenoꞌ, mʌꞌ in warej wa mʌꞌ in quimin. Chen mʌꞌ taj caj u yaꞌarob a cu taquicob in joꞌr, rajen mʌꞌ cꞌuchaꞌan a wor a cꞌubiquenob tiꞌ u winiquirob judío. Rajen a tenoꞌ, in cꞌat caꞌ a tuchiꞌten ich rey César tu cajar Roma. In cꞌat caꞌ yubej u tocarob in joꞌr ʌcʌtan a tiꞌoꞌ.
12 Festo tuneꞌ, caj tsꞌoc u tsicbar yejer u yet tsꞌurirob u cajarob, caj u yaꞌaraj tiꞌ Pablo:
―A cꞌat a taquic a bʌj tiꞌ u rey César, jeꞌ in tuchiꞌtiquech ich u rey César.
Pablo ʌcʌtan ich rey Agripa
13 Caj tsꞌoc u man mʌꞌ yaꞌab u qꞌuinin, caj tar u jer rey ich u cajar Cesarea quir u chꞌenaptaꞌr Festo quir yaꞌaric tiꞌ:
―A tenob, quiꞌ in worob in wiricob a tar. Agripa u cꞌabaꞌ a reyoꞌ.
Yet tarac u racꞌ Berenice.
14 Caj tsꞌoc u pꞌatʌrob yaꞌab u qꞌuinin, Festo caj tsicbanʌjij yejer a rey Agripa tiꞌ Pablo. Jeroj, caj u yaꞌaraj:
―Caj joqꞌuij Félix, caj u pꞌʌtaj mʌcaꞌan tu cu naj maꞌcʌr mac tuririꞌ xib. Pablo u cꞌabaꞌ.
15 Barej caj binen tu cajar Jerusalén uch, caj rʌc tarob u jach tsꞌurirob u sacerdote u winiquirob judío yejer u jach tsꞌurirob u winiquirob judío, a jach manan noꞌjoꞌ. Caj rʌc tarob ʌcʌtan ten quir u tocor u joꞌr Pablo. Caj u cꞌatajob caꞌ in cꞌubej caꞌ quinsac.
16 Caj in nuncaj tiꞌob, u winiquirob romano mʌꞌ u naj cꞌubic caꞌ quinsac mac wa mʌꞌ tu nuncaj a cu tocor u joꞌr. Caꞌ u nuncob ʌcʌtan tin wich a cu tocarob u joꞌr.
17 Rajen caj rʌc tarob u winiquirob judío, tin wicnʌn teraꞌ. Barej caj rʌc tarob, teraꞌ tuneꞌ, caj sasij, seb caj curʌjen tu cꞌancheꞌir gobernador. Caj rʌc tarob u muchꞌquinticob u bʌj tu quin wiric wa yʌn u siꞌpir mac wa mʌnaꞌ u siꞌpir. Caj in tuchiꞌtaj tꞌʌnbir Pablo xan.
18 In wer ―quij Festo―, a Pablojoꞌ, neyʌn u siꞌpir caj in tus tucrej, neyʌn u siꞌpir. Barej a mac a cu taquicob u joꞌr, mʌꞌ ju yaꞌaraj baꞌ cꞌasir caj u betaj.
19 Robob caj tsicbanʌjob bic tabar robob cu cꞌujinticob Cꞌuj. Caj u tsicbʌtajob Jesús a mac quimij bajeꞌrer. Chen a Pablojoꞌ, cu chen aric cuxaꞌan bin Jesús.
20 A tenoꞌ, quireꞌ xacaꞌan in tucur, quireꞌ a baꞌ u rʌc xactob u bʌj a baꞌ caj in wuꞌyaj. Rajen caj in cꞌataj tiꞌ Pablo wa tsoy tu tꞌʌn Pablo, caꞌ xic tu cajar Jerusalén, wa tsoy tu tꞌʌn Pablo, tiꞌ quin bin in wuꞌy u tocor u joꞌr ―quij Festo―.
21 Barej Pablo, caj u cꞌataj ten ―quij Festo―, caꞌ xic ich u rey César ich u cajar Roma. Mʌꞌ ja wirej, a rey Césaroꞌ, jeꞌ u yubiqueꞌ a cu tocarob u joꞌr Pablo. Rajen caj in waꞌaraj, caꞌ u cꞌʌrej yoc Pablo tu cu naj maꞌcʌr mac hasta cꞌuchaꞌan in wor in tuchiꞌtic tu cajar Roma tu yʌn u rey César ―baxuc caj u yaꞌaraj Festo.
22 Caj araꞌb ten Agripa tiꞌ Festo:
―Baxuc xan, a tenoꞌ, in cꞌat in wuꞌyej Pablo.
Festo caj yaꞌaraj tiꞌ rey Agripa:
―Jach tsoy, saman jeꞌ a wuꞌyiqueꞌ.
23 Caj sasij, caj tarij rey Agripa yejer u racꞌ Berenice. Robob u buquinmʌnob u jach tsoyir u nocꞌ, u nocꞌ rey, quir u sʌjtaꞌ ten tu cotor mac jach manan, quireꞌ a baꞌ robob caj u betajob. Yet taracob a mac a cu yamtic a reyoꞌ tu cu reyinticob. Tiꞌ yʌnob u jach tsꞌurirob mil u soldados. Tiꞌ yʌn xan u jach tsꞌurirob u cajar Cesarea. Ca rʌc ocob ich junxotꞌ naj tu cu naj muchꞌquinticob u bʌj soc yubic baꞌ quiriꞌ yaꞌaraꞌ. Jeroj tuneꞌ, Festo caj u tuchiꞌtaj tꞌʌnbir Pablo. Caj cꞌuchij tun.
24 Festo tun, caj u yaꞌaraj:
―Uꞌyex baꞌ quin wac reyech Agripa, yejer tu cotor mac a muchꞌaꞌanob teraꞌ bajeꞌrer. A jeꞌ xibaꞌ, ca wiriquex ta wichex, tu cotor u winiquirob judío, bayiriꞌ xan u winiquirob judío tu cajar Cesarea, cax tu cajar Jerusalén u tacmʌnob u joꞌr Pablo ten. Cu naj aricob ten caꞌ quimic Pablo.
25 Barej a tenoꞌ, mʌnaꞌ baꞌ caj in wiraj u betmʌn soc u quinsaꞌ, chen u bʌjiriꞌ Pablo caj yaꞌaraj ten, caꞌ in tuchiꞌtej soc yubic u rey César. Tiꞌ cu bin soc yubic u rey César a cu tocarob u joꞌr, rajen caj in tucuraj caj in tuchiꞌtaj Pablo.
26 Mʌꞌ ja wirej, mʌꞌ in wer baꞌ siꞌpir yʌn tiꞌ, rajen a baꞌ quin bin in tsꞌibtic tiꞌ u rey César? Rajen, caj in jocꞌsaj ʌcʌtan techex. Jach quiꞌ in wor in jocꞌsic ʌcʌtan tech reyech Agripa soc caꞌ bin tsꞌocac a wuꞌyic jeꞌ a yamtiquen in tsꞌibtej a Pablo baꞌ yʌn u siꞌpir ―quij―.
27 Quireꞌ quin wiric mʌꞌ baꞌwir cu tuchiꞌtaꞌr mac a cꞌʌraꞌanoꞌ wa mʌꞌ ju yaꞌaraꞌr u siꞌpir.