Toc u joꞌr Pablo ten u winiquirob judío ʌctan Félix
24
Caj tsꞌoc u man cinco u qꞌuinin, caj cꞌuchij Ananías u jach tsꞌurir tu cotor sacerdote u winiquirob judío, yet binacob jun yarob u jach tsꞌurirob u winiquirob judío, a nuxiboꞌ, yet binac xan, tuririꞌ xib yʌjtaquir u joꞌr mac, u cꞌabaꞌ Tértulo. Mʌꞌ ja wirej, rʌc cꞌuchob ʌcʌtan u gobernador Félix quir u toꞌcar u joꞌr Pablo.
2 Barej, caj paꞌy Pablo ʌcʌtan gobernador a Tértulo caj u yʌnxchun u taꞌquic u joꞌr Pablo caj u yaꞌaraj:
―Jach quiꞌ in wor tech in gobernadorech. Mʌꞌ ja wirej, mʌnaꞌ mac cu tar u quinsiquenob mʌnaꞌ mac cu chuquiquenob xan. Jach manan u tsoyir bic in cuxtarob tu ruꞌumin Fenicia quireꞌ quin quiꞌ tsꞌurintiquech. A techoꞌ a neꞌer quireꞌ a tsꞌurech tu cotor mac.
3 Quin jach aric tech: “Bayoꞌ, in gobernadorech Félix.” Tu cotor mac a cu jach tsꞌurintiquech cu jach sʌjtic tech quireꞌ rajraꞌ ca betic tsoy tenob.
4 Quireꞌ mʌꞌ in cꞌat in naꞌsic a wor tech, quin chich cꞌatic tech caꞌ a jamach pajen, soc caꞌ a wuꞌyej a baꞌ quin wac tech.
5 Mʌꞌ ja wirej, a jeꞌ xibaꞌ, a ca wiriqueꞌ, a tenob caj in wirajob tan u betic cꞌas tenob, jaꞌ ix tʌcoj jeꞌ u betic cꞌas tiꞌ ic ruꞌumex xan. Rajiꞌ caj u pꞌusaj yor tu cotor u winiquirob judío cax tu cu bin ich yocꞌocab. A jeꞌ xibaꞌ, tan u jach tsꞌurintaꞌr tu cotor mac a cu camsaꞌ a baꞌ cu yac a mac cʌjaꞌan tu cajar Nazaret uch.
6 Biquinin a jeꞌ xibaꞌ ―quij Tértulo―, caj u jach tumtaj u yacsic a mʌꞌ u winiquirob judío ich carem naj tu cu naj cꞌujinticob Cꞌuj u winiquirob judío, aroꞌ jach cꞌas, rajen chuc ten u winiquirob judío. Caj binenob in wirob wa cu jocꞌar u jach tajir an ten bic cu yaꞌaric in nunquirob Moisés uch.
7 Chen tiriꞌ cꞌuchij Lisias u jach tsꞌurir tu cotor u soldados romano, caj cꞌuchij yejer u soldados caj u tacob Pablo tenob yejer u jach chichir u mucꞌ.
8 Yaꞌaraj tenob Lisias: “Caꞌ xiquechex ich gobernador Félix quir a taquiquex u joꞌr Pablo.” Biquinin mʌꞌ a wʌcꞌʌs bʌjiriꞌ cꞌatic tiꞌ Pablo? Jeꞌ a wiriqueꞌ tu cotor a tan in taquicob u joꞌr, jach tu tajeꞌ.
9 U yet tarob Tértulo, u winiquirob judío, a tiꞌ yʌnob ʌcʌtan gobernador, caj u rʌc arajob taj a baꞌ cu yaꞌaric Tértulo.
10 A gobernadoroꞌ, caj u ricꞌsaj u cꞌʌb soc yer Pablo tsoy u tsicbar. Pablo caj u nuncaj, caj u yaꞌaraj:
―Jach quiꞌ in wor in nunquic a baꞌ cu pʌqꞌuicob in pach soc a wuꞌyic. Mʌꞌ ja wirej, in wer yaꞌab yaxqꞌuin ca waꞌaric a baꞌ cu jocꞌar u tajir tiꞌ u cajarob in wet winiquirob judío.
11 Joqꞌuen, cʌxtej a wirej wa jach taj a baꞌ cu yacobeꞌ. Yʌn doce u qꞌuinin caj uren ich u cajar Jerusalén quir in cꞌujintic Cꞌuj.
12 Barej caj u yirenob a tenoboꞌ, mʌꞌ jin cꞌamquintic in tꞌʌn ich carem naj tu cu naj cꞌujinticob Cꞌuj u winiquirob judío mʌꞌ ju yirenob in jocꞌsic yor yaꞌab mac, cax ich carem naj, cax chan naj tu cu naj cꞌujinticob Cꞌuj in wet winiquirob judío baxuc ich u cajar Jerusalén xan.
13 A jeꞌ u winiquirob judíojoꞌ mʌꞌ cꞌuchaꞌan yorob yesicob wa taj a cu taquicob in joꞌr bajeꞌrer, quireꞌ mʌnaꞌ in siꞌpir.
14 Chen yʌn baꞌ jach taj quin wac tech. A Cꞌujoꞌ, a caj u cꞌujintajob in nunquirob Moisés uch, raꞌiriꞌ quin cꞌujinticob xan. Barej robob cu yaꞌaricob u jer bej. Cu yaꞌaricob mʌꞌ taj a baꞌ quin cʌniqueꞌ. Chen a tenoꞌ, quin quibic tu cotor a baꞌ tsꞌibtaꞌb ten in nunquirob, yejer a baꞌ caj u tsꞌibtajob uch tu cotor mac a tsꞌaꞌb u tucurob ten Cꞌuj quir u tsꞌibticob a baꞌ u cꞌat Cꞌuj.
15 Baxuc a baꞌ cu pajicob in wet winiquirob judío, a baywoꞌ a tenoꞌ quin pajic. Chen a tenoꞌ, quin pajic u qꞌuinin caꞌ bin ricꞌsac mac tu quimirir ten Cꞌuj, cax a mac a tsoyoꞌ, jeꞌ u riqꞌuireꞌ, cax a mac a mʌꞌ tsoyoꞌ, jeꞌ u riqꞌuir xaneꞌ.
16 Rajen a ten xanoꞌ, jach manan quin pꞌisic in bʌj soc rajraꞌ jach manan tsoy in tucur ʌcʌtan tiꞌ Cꞌuj, bayiriꞌ xan, ʌcʌtan tiꞌ mac tu cotor.
17 Barej caj tsꞌoc in man yaꞌab yaxqꞌuin ich u jer ruꞌum, caj uren yejer in taqꞌuin soc caꞌ in jʌsej ich jun yarob in wet winiquirob judío a mac jach otsirchʌjij, bayiriꞌ xan, quir in sijic baꞌ tiꞌ Cꞌuj.
18 Quireꞌ tan in betic aroꞌ, robob caj u yirenob ich carem naj a rey u qꞌuininoꞌ, caj tsꞌoc in pꞌoꞌic in bʌj an ten bic cu naj beticob u winiquirob judío ich carem naj tu quin cꞌujinticob Cꞌuj yejer in wet winiquirob judío. Tiriꞌ quin pꞌʌtic in taqꞌuin u tiriꞌ in wet winiquirob judío a mac jach otsichʌjij. Quin tꞌʌnic Cꞌuj, mʌnaꞌ mac tiꞌ yʌn yejeren. Mʌꞌ jin pꞌusaj yorob maquiꞌ. Chen tiꞌ yʌnob u winiquirob judío, a ray u qꞌuinoꞌ u winiquirob judío caj u yirajenob.
19 A ray u winiquirob judío, a cu tarob tu ruꞌumin Asia, ar u tarob u tac in joꞌr, wa mʌꞌ tsoy caj in betaj.
20 Cax a jeꞌ xibaꞌ, a tiꞌ chꞌicaꞌanob tu yʌnoꞌonex bajeꞌrer, arej tiꞌob caꞌ yaꞌarob tech baꞌ in siꞌpir caj u yirob, barej u qꞌuinin caj binen ʌcʌtan tu cotor u tsꞌurirob tu cotor u winiquirob judío ich u cajar Jerusalén uch.
21 Jariꞌ cu chen aricob cꞌas caj in waꞌaraj u qꞌuinin tiꞌ yʌnen tu muchꞌaꞌanob tu cotor u jach tsꞌurirob u winiquirob judío. Mʌꞌ ja wirej, cꞌam caj in waꞌaraj: “Jariꞌ quin pajic wa bin u caꞌ riqꞌuir tu cotor mac tu quimirir. Jeꞌ u rʌc cuxtar tu caꞌten, rajen caj u tacob in joꞌr.” Baxuc caj in waꞌaraj tiꞌob.
22 Félix tuneꞌ, caj tsꞌoc yubic a baꞌ araꞌb tiꞌeꞌ. U toc er a baꞌ camsaꞌb ten a mac a cu sayʌrob tu pach Jesús.
Caj u yaꞌaraj:
―Jot ―quij―, tsꞌoquij bajeꞌrer.
Caj u pꞌisaj u jer u qꞌuinin quir u caꞌ uꞌwic, rajen caj u yaꞌaraj:
―Barej, caꞌ bin cꞌuchuc Lisias u jach tsꞌurir tu cotor u soldados, jeꞌ in wac techex soc u jocꞌar u jach tajir.
23 Jeroj, caj u tuchiꞌtaj u yʌjtꞌʌnir cien soldados caꞌ cʌnantaꞌc Pablo tu cu naj cʌnantic mac. Caj u yaꞌaraj caꞌ jamach chaꞌ u man. Cax tsoy u tarob a mac tsoy yiric Pablo quir u chꞌenapticob, cax tacob purbir baꞌ tiꞌ Pablo, a baꞌ u cꞌat.
24 Mʌꞌ manʌc yaꞌab u qꞌuinin caj caꞌ tꞌan Pablo ten Félix. Caj u pʌyaj u racꞌ Félix caꞌ tsicbanʌc Drusila yejer Pablo. U racꞌ Félix u winiquir judío. Caj u pʌyaj Félix soc yubaꞌ u tsicbar bic tabar cu yacsic tu yor u tꞌʌn Jesucristo.
25 Chen barej, caj pacran tsicbanʌjob tiꞌ, a baꞌ u cꞌat yaꞌaric caꞌ u betej a tsoyoꞌ, bayiriꞌ xan, caꞌ u maꞌquintej u betej a cꞌasoꞌ a cu pachtic mac tu yor. Caj pacraj tsicbanʌjob tiꞌ u qꞌuinin wa ber Cꞌuj cu yocar juez soc yiric tu cotor tsoy u beyaj mac, wa cꞌas u beyaj mac.
Rajen caj u chꞌaj chꞌic yum sajaquir Félix, quireꞌ yʌn u siꞌpir, caj u yaꞌaraj:
―Joqꞌuen, xen caꞌ bin tac u qꞌuinin jeꞌ in caꞌ pʌyiquech soc in wuꞌyic baꞌ ca wac ―quij.
26 Bayiriꞌ xan, Félix cu pajic caꞌ tsꞌabac u taqꞌuin tiꞌ ten Pablo soc u chaꞌbar. Rajen yaꞌab u tenin caj u tꞌʌnaj caꞌ tac yicnʌn quir u tsicbar.
27 Baxuc caj manij caꞌtur u yaxqꞌuinin caj oquij u jer quir u tsꞌurintic u ruꞌumin Fenicia. A mac oquij u cꞌabaꞌ Porcio Festo u tsꞌurir. Joqꞌuij Félix. A Festojoꞌ, mʌꞌ u chaꞌbʌr Pablo soc u quiꞌquintaꞌr yor u winiquirob judío. Pꞌat tu cu maꞌcʌr mac.