Ca₂chen₃ Jesús chiꞌ₂ dsɨ₂guia₃-tɨ́n₂
9
Ca₂ŋɨ́ꞌ₂ Jesús chiꞌ₂ dsɨ₂guia₃-tɨ́n₂ quiáin₅ ca₂cuë₃ juɨ₅bí₂ a₂ꞌio₃ ꞌéiꞌ₃ ne₄ quióꞌ₅ ca₂le₃jɨ́n₃ jme₂dsí₂ je₂naꞌ₅₄, a₂lé₂ qui₂jme₃ꞌlióin₂ dsa₂ juɨ₁ꞌe₂ guë́₃ dso₄ niog₅ lɨ́in₅.
San Lucas 9:1-27
2 Ca₂chei₃ a₂dsɨ₃ꞌë́₃ jág₁ juɨ₁liaꞌ₂ ja₁gon₂ Diú₄, a₂dsɨ₃jme₁ꞌlioin₅₄ dsa₂ i₂le₁dsoꞌ₅₄.
3 Jaun₂ ca₂juáꞌ₂:
―Tsá₃ ꞌe₂ cánꞌ₁ ꞌniaꞌ₂ ꞌi₁caun₂ le₂ꞌi₄ juɨ₅, on₃ guëꞌ₂ ꞌma₂ꞌɨ₅₄, on₃ guëꞌ₂ tsɨ₁naꞌ₅₄ on₃ guëꞌ₂ i₁ŋíꞌ₄, on₃ guëꞌ₂ cu₄, on₃ guëꞌ₂ tsɨ́nꞌ₂ ꞌniaꞌ₂ siáꞌ₂ cánꞌ₁.
4 Le₂caun₂ dsi₂néi₂ ja₁dsi₁nóꞌ₅ ꞌniaꞌ₂, ja₁jaun₂ janꞌ₄ ꞌniaꞌ₂ ca₂liaꞌ₂ ca₂të́₂ jmɨg₄ a₂o₁nogꞌ₄ táng₃.
5 Le₂caun₂ juɨg₂ ja₁tsá₃ guei₅ dsa₂, co₂dsia₅ ꞌuɨnꞌ₂ ꞌniaꞌ₂ juɨg₂ jaun₂, séiꞌ₃ ꞌniaꞌ₂ ꞌliog₂ tagꞌ₅₄, a₂jmóꞌ₂ léi₄ a₂tsá₃ ma₃ꞌe₂ ꞌuɨnꞌ₄ ꞌniaꞌ₂ quiainꞌ₅₄.
6 Jaun₂ qui₂ca₂ꞌuɨn₂ bá₄ chiꞌ₂ dsɨ₂guia₃-tɨ́n₂, ca₂i₃léin₂ le₂tan₅₄ juɨg₂ i₁ꞌë́₄ jág₁ dse₃, i₁jme₁ꞌlioin₂₃ dsa₂ në́₃.
Ca₂jon₃ Juan₅₄ i₂chon₅ dsa₂ jmɨg₂
7 Jaun₂ ca₂rë₃ŋi₅ Rag₅₄a Herodes ca₂le₃jë́₃ ꞌe₂ niog₅ lë́₂. La₁ tsá₃ caun₂ a₂i₃jiog₅ dsɨ́₅, ia₁ dsia₅ i₂lɨn₅₄, Juan₅₄ bá₄ ꞌéi₂ ŋɨ₅ a₂ma₂ca₂jeinꞌ₅₄ táng₃.
8 I₂lɨn₅₄ guëꞌ₂ dsia₅ a₂ma₂ca₂jme₃jnia₅ Elías; i₂siánꞌ₂ guëꞌ₂ dsia₅ a₂ma₂ca₂jenꞌ₅₄ táng₃ jan₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂.
9 La₁ Rag₅₄ Herodes ꞌŋiog₅ guëꞌ₂ në́₃ juáꞌ₂:
―Juaꞌ₂ jniá₂ ꞌŋió₃ ca₂jmo₃ ꞌéiꞌ₃ a₂ca₂quíꞌ₃ dsa₂ dsɨ₂lag₄ ꞌéi₂. ¿ꞌEin₂ guëꞌ₂ në₅, tsá₃ caun₂ jág₁ guion₁₂ a₂jmo₂₃?
Jaun₂ Herodes në́₃ jme₁ꞌnoꞌ₂ juɨ₅ a₂jme₃jeinꞌ₂.
Ca₂jme₃tan₅₄ Jesús ꞌŋiá₂ mei₅ dsa₂
10 Jme₁ca₂o₃len₃ dsa₂ i₂chen₄ quiáin₅ ꞌéi₂, jaun₂ ca₂dsia₃ ca₂tsɨ́ꞌ₃ Jesús ꞌe₂ niog₅ ca₂jmo₃ ja₁i₁lein₅₄. Jaun₂ ca₂jiog₃ Jesús a₂i₃léin₂ conꞌ₂ guioin₅₄ caun₂ juɨg₂ ja₁chei₂ Betsaida.
11 La₁ tion₅₄ bá₄ ca₂i₃lén₂ dsa₂ siánꞌ₂ jme₁ca₂rë₃ŋi₅; ca₂guei₃ bá₄ guëꞌ₂ Jesús qui₂ca₂jme₃tag₂₃ jág₁ juɨ₁liaꞌ₂ ja₁gon₂ Diú₄ ca₂jme₃ꞌlióin₂ dsa₂ i₂jme₁le₁dsoꞌ₅₄ në́₃.
12 Të₂le₃ ca₂ꞌláu₂ jmɨg₄ jaun₂, ca₂o₃lén₂ chiꞌ₂ dsɨ₂guia₃-tɨ́n₂ ca₂tsɨ́ꞌ₃ Jesús:
―ꞌEiꞌ₂ jág₁ dsa₂, ia₁jaun₂ dsɨ₃lein₅ dsɨ₃ꞌnióg₂ a₂guë́ꞌ₃, juɨ₁dsi₂ꞌnioꞌ₂ ja₁jŋia₃ le₂con₂ juɨg₂ píꞌ₁ ma₂quián₅ në₅, ia₁ tsá₃ ꞌe₂ cha₂ ja₁lá₃.
13 La₁ Jesús guëꞌ₂ në́₃ ca₂juáꞌ₂:
―Cuëꞌ₅₄ ꞌniaꞌ₂ dsa₂ a₂guë́ꞌ₃.
Jaun₂ ca₂ŋag₃ ꞌéi₂ táng₃:
―Tsá₃ ꞌe₂ cha₂ juaꞌ₅₄ a₂le₃cue₅₄ jniaꞌ₅₄ dsa₂, jŋiaꞌ₅₄ liaꞌ₂ ꞌŋiá₂ i₁ŋíꞌ₄ bá₄ ꞌi₄; quianꞌ₅₄ on₃ i₁ju₁, jŋiaꞌ₅₄ liaꞌ₂ në₁juaꞌ₂ dsɨ₁liá₄ má₃ conꞌ₂ tɨ́nꞌ₂ guë́ꞌ₃ ca₂le₃jɨ́n₃.
14 Conꞌ₂ ꞌŋiá₂ mei₅ dsa₂ ꞌéi₂ jme₁lë́₂, jmáꞌ₃ dsa₂ ŋeꞌ₂.
Jaun₂ ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅:
―Cheiꞌ₅₄ ꞌniaꞌ₂ dsa₂ juɨ₁tiainꞌ₄ juɨ₁jmo₁₂ jma₃të₂lón₃-guián₂ liaꞌ₂ co₂nióiꞌ₃.
15 Jaun₂ ca₂jmo₃ bá₄ guëꞌ₂ ꞌéi₂ ꞌéiꞌ₃ a₂tianꞌ₃ dsa₂.
16 Jaun₂ ca₂tɨ́n₂ Jesús ta₁ꞌŋiá₂ i₁ŋíꞌ₄, le₃on₃ i₁ju₁ në́₃. Ca₂chógꞌ₃ ne₅₄ juɨ₅ gueiꞌ₅₄ i₂juɨ́g₃, ca₂jme₃jŋiói₃ a₂jaun₂. Jaun₂ guë́₄ ca₂ꞌniai₃, ca₂cuë́ꞌ₃ chiꞌ₂ dsɨ₂guia₃-tɨ́n₂. ꞌÉi₂ guëꞌ₂ në́₃ ca₂dsióꞌ₃ jɨn₄ dsa₂.
17 Ca₂le₃jɨ́n₃ bá₄ ca₂guë́ꞌ₃ ca₂liaꞌ₂ ca₂ꞌágꞌ₃ dsɨ́₅. Jme₁ca₂lë₃ jaun₂, guia₃-tɨ́n₂ tsɨ₁mɨꞌ₂ tá₁ ca₂cágꞌ₃ dsa₂ jmáꞌ₃ ꞌnau₅₄ a₂ca₂chóng₃.
Ca₂juáꞌ₂ Pe₄ liaꞌ₂ tí₅ jág₁ a₂lɨ́n₅ Jesús I₂rë₂ꞌɨ́n₁* quián₅ Diú₄
18 Co₂ráun₂ ꞌen₅₄ Jesús ꞌŋiog₅ chi₂léinꞌ₂ Diú₄, i₂jme₁quiainꞌ₅₄ bá₄ chiꞌ₂ dsɨ₂guia₃-tɨ́n₂, jaun₂ ca₂ŋag₃ Jesús:
―¿ꞌE₂ ꞌag₅ dsa₂ jniá₂? ¿ꞌEin₂ lɨ́n₅ jniá₂, dsia₅ dsa₂?
19 Jaun₂ ca₂ŋag₃ chiꞌ₂ dsɨ₂guia₃-tɨ́n₂:
―I₂lɨn₅₄ dsa₂ dsia₅ a₂lɨ́ngꞌ₅ Juan₅₄ i₂chon₅ dsa₂ jmɨg₂; i₂lɨn₅₄ guëꞌ₂ dsia₅ a₂lɨ́ngꞌ₅ Elías; i₂lɨn₅₄ guëꞌ₂ dsia₅ táng₃ a₂lɨ́ngꞌ₅ i₂siánꞌ₂ i₂jme₁ꞌë́₂ jág₁ quián₅ Diú₄, a₂ca₂jeinꞌ₅₄ táng₃.
20 Jaun₂ ca₂ŋag₃ Jesús:
―¿ꞌNiaꞌ₂ guëꞌ₂ në́₃? ¿ꞌE₂ guëꞌ₂ juáꞌ₂ ꞌniaꞌ₂ ꞌein₂ lɨ́n₅ jniá₂?
Jaun₂ ca₂ŋag₃ Pe₄:
―ꞌNe₂ lɨ́ngꞌ₅ I₂rë₂ꞌɨ́n₁* quián₅ Diú₄.
ꞌË́₂ Jesús jág₁ a₂jóin₂
―Co₂në₅ ꞌen₅₄ ꞌéiꞌ₃ Jaun₅* dsa₂ mɨ₂güɨ́g₃ a₂dsɨ₃ŋɨ́i₂ uɨg₅ ꞌŋio₅ lɨn₃; jme₃ꞌiog₅₄ dsɨ₂guiꞌ₅₄ canꞌ₅₄, liaꞌ₂ juɨg₅₄ jme₂dsa₂, të₅juáꞌ₅ në́₃. Quɨnꞌ₃ dsa₂ jág₁ a₂jŋagꞌ₃, la₁ jeinꞌ₅₄ bá₄ táng₃ a₂ꞌnɨ₅ jmɨg₄ jaun₂.
23 Jaun₂ ca₂tsɨ́ꞌ₃ ca₂le₃jɨ́n₃:
―Në₁juaꞌ₂ chan₂ i₂ꞌnio₃ jiá₃ chi₁coꞌ₅₄ quió₃, co₂dsia₅ juɨ₁dsi₂ꞌén₂ dsɨ́₅ ꞌŋiog₅, juɨ₁ꞌei₅₄ bá₄ caun₂ dsɨ́₅ ca₂le₃jë́₃ jmɨg₄ o₁jŋiaꞌ₅₄ ca₂join₃,b juɨ₁jia₂ chi₁coꞌ₅₄ quió₃.
24 Ia₁ juɨ₁liaꞌ₂ dsa₂ i₂ꞌnio₃ le₃chan₂ dse₃ mɨ₂güɨ́g₃ la₂, dsɨ₃ꞌén₂ quióꞌ₅; la₁ juɨ₁liaꞌ₂ dsa₂ i₂quíꞌ₃ dsɨ́₅ juɨ₁dsi₂ŋɨ́i₂ ꞌe₂ dsɨ₃ŋɨ́i₂ o₄quió₃ jniá₂, líꞌ₂, tɨ́inꞌ₄ bá₄.
25 Ia₁ ¿ꞌe₂ bá₄ ta₁ jmo₃ a₂líꞌ₄ dsa₂ ca₂le₃jë́₃ a₂cha₂ ne₄ guaꞌ₅₄ ꞌuë₃ la₂, në₁juaꞌ₂ dsɨ₃ꞌéin₂ bá₄ guëꞌ₂?
26 Ia₁ në₁ꞌein₂ guiꞌ₅₄ jénꞌ₅ o₄quió₃ jniá₂ quianꞌ₅₄ o₄quióꞌ₄ jág₁ quió₃, ján₃ bá₄ le₂jaun₂ le₃guiꞌ₅₄ Jaun₅ dsa₂ mɨ₂güɨ́g₃ ꞌag₃ jë₁ma₂të́₂ rë₁jŋióiꞌ₂ ma₂lɨ́in₅ Rag₅₄ jlánꞌ₁ juɨ₁liaꞌ₂ jlánꞌ₁ Jmei₂, quianꞌ₅₄ ángeles jŋió₅ quiáin₅.
27 A₂dsɨ₂jóꞌ₃ juɨ́g₂ jniá₂ ꞌniaꞌ₂, chan₂ bá₄ ꞌniaꞌ₂ i₂lɨn₅₄ i₂tión₂ jë₄ la₂, i₂tsá₃ dsián₃ ca₂liaꞌ₂ ca₂të́₂ ne₅₄ bí₂ ꞌéiꞌ₃ quióꞌ₅ Diú₄.
Ca₂rë₃tsɨ́n₃ Jesús liaꞌ₂ jniái₂
28 Conꞌ₂ jŋia₃ jmɨg₄ cang₂ a₂ca₂juáꞌ₂ Jesús le₂në₅, ca₂ŋó₃ juɨ₅ máꞌ₂ i₁chi₂i₁leinꞌ₄ Diú₄, jme₁quiainꞌ₅₄ Pe₄, Jacobo, Juan₅₄ në́₃.
San Lucas 9:28-62
29 Të₃jë₄ chi₂léinꞌ₂ Diú₄, ca₂rë₃tsɨ́in₃ liaꞌ₂ jniái₂. Tsɨnꞌ₅₄ në́₃ ca₂rë₃tsɨ́n₃ ca₂jnia₃ tiog₂ jau₂, ca₂liaꞌ₂ tág₅ ꞌŋio₅ lɨn₃.
30 Të₃jë₄ jaun₂, ca₂jnia₃ on₃ dsa₂, dsia₂₃ jág₁ quianꞌ₅₄ Jesús. Moisés quianꞌ₅₄ Elías bá₄ ꞌéi₂.
31 Ca₂liaꞌ₂ co₂tág₅ co₂ꞌnéꞌ₅ bá₄ ca₂jniai₃, tióin₂ dsia₂₃ a₂niog₅ lé₂, ꞌmú₃ a₂gue₃ jë₄ juɨg₂ Jerusalén, a₂le₃ti₃ ꞌéiꞌ₃ a₂ꞌein₅₄.
32 Të₃ ma₃i₁güɨ́n₃ ꞌŋio₅ lɨn₃ bá₄ Pe₄ quiainꞌ₅₄ rɨinꞌ₅₄, ca₂jme₃jnio₅₄ ne₅₄ ca₂jɨ́in₂ Jesús jniái₂ co₂tág₅ quianꞌ₅₄ dsa₂ on₃ i₂quiainꞌ₅₄.
33 Jme₁ma₂i₂uɨ́n₃ dsa₂ ꞌéi₂ cau₅ quióꞌ₅, jaun₂ ca₂juáꞌ₂ Pe₄ ca₂tsɨ́ꞌ₃ Jesús:
―Të₅, ¡ꞌe₂ guë́₄ dse₃ liaꞌ₂ tioꞌ₅₄ jniog₄ ja₁lá₃! Në₃ o₁jmó₁ ꞌnɨ₅ tsɨ₁ꞌio₅ láu₃: caun₂ quiángꞌ₂, caun₂ quióꞌ₅ Moisés, caun₂ guëꞌ₂ quióꞌ₅ Elías në₃.
La₁ a₂lë₁ca₂juáꞌ₂ bá₄ Pe₄, on₃juaꞌ₅₄ jaun₂ líꞌ₄ a₂të₂ꞌɨ₂₃ le₂jaun₂.
34 Të₃ dsia₂₃ jág₁ le₂jaun₂, jme₁gua₃ jnei₅ ca₂jlɨin₃, jaun₂ guë́₄ ca₂ja₃góꞌ₃ tioinꞌ₅₄ jme₁ca₂i₃ꞌén₂ ꞌéi₂ jë₄ jnei₅.
35 Jë₄ jnei₅ jaun₂ ca₂néꞌ₂ jág₁, ca₂juáꞌ₂:
―I₂la₂ bá₄ jón₃ I₂rë₂ꞌɨ́n₁ quiáng₃. Nei₂ ꞌniaꞌ₂ jág₁ quióꞌ₅.
36 Jme₁ma₂në₂néi₂ jág₁ jaun₂, juaꞌ₂ ꞌŋiog₅ bá₄ Jesús ma₂chéinꞌ₅ jme₁ca₂jág₃. La₁ jmɨg₄ jaun₂, tei₄ bá₄ ca₂jmo₃ tsá₃ ꞌein₂ ca₂tsɨ́ꞌ₃ ꞌi₁jan₂ a₂ca₂të́₂ ne₅₄ jaun₂.
Ca₂jme₃ꞌlión₂ Jesús jan₂ chiꞌ₂ i₂jme₁ꞌen₅₄ jme₂dsí₂ ꞌlɨnꞌ₅₄
37 Jme₁jnia₃, ca₂sióin₃ táng₃ máꞌ₂ jaun₂, conꞌ₂ guëꞌ₂ juɨn₅ lɨn₃ dsa₂ ca₂jme₃jeinꞌ₂.
38 Të₃ jɨn₄ dsa₂ jaun₂, ca₂juáꞌ₂ tiá₂ jan₂ dsa₂ ca₂tsɨ́ꞌ₃ Jesús:
―Të₅, jmo₄ dse₃ ꞌauꞌ₂, jɨn₄ co₂nio₄ chiꞌ₂ quiáng₃, i₂jan₂ la₂ bá₄ la₂ quiáng₃ chan₂.
39 Jme₂dsí₂ ꞌlɨnꞌ₅₄ bá₄ i₂co₂jmógꞌ₂ guióꞌ₅ co₂tiá₂ jénꞌ₅ dso₄ ꞌei₂, qui₂ꞌuë́ꞌ₅ jan₅ mɨ₂ꞌo₅₄. I₂ꞌlɨnꞌ₅₄ në́₃, jmógꞌ₂, ca₂liaꞌ₂ jaun₂ guë́₄ téi₂ ca₂liaꞌ₂ ma₂jénꞌ₃ uɨg₅ ꞌŋio₅ lɨn₃.
40 Jme₁ma₂në₂juɨ́g₂ chiꞌ₂ dsɨ₂guia₃-tɨ́n₂ quiángꞌ₂ a₂jme₁dsei₂₃, la₁ tsá₃ ca₂tióꞌ₃.
41 Jaun₂ ca₂juáꞌ₂ Jesús:
―¡ꞌEn₁ jmáꞌ₃ ꞌniaꞌ₂ dsa₂ chan₂ jmɨg₄ në₃ tsá₃ ꞌe₂ ꞌéngꞌ₂! ¿Je₂liáꞌ₂ jmɨg₄ jmáꞌ₃ ꞌnióꞌ₅ jmo₅₄ tióꞌ₅ dsɨ₃ jɨnꞌ₄ ꞌniaꞌ₂? Ŋɨ₅₄ chiꞌ₂ quiángꞌ₂ le₃la₂.
42 La₁ jme₁ma₂ŋó₅ chiꞌ₂ le₃ne₄ Jesús, i₃ꞌɨ́in₃ táng₃ ca₂tón₂ jme₂dsí₂ je₂naꞌ₅₄ qui₂ca₂ba₂lágꞌ₂. La₁ dsɨ₂juɨ₅ le₂jaun₂ ca₂jí₂ Jesús ca₂jéin₂ i₂ꞌlɨnꞌ₅₄, ca₂jme₃ꞌlióin₂ chiꞌ₂. Jaun₂ ca₂jángꞌ₂ ne₄ jmei₂.
43 A₂jaun₂ në́₃, ca₂i₃góꞌ₃ dsɨ́₅ ca₂le₃jɨ́n₃ ꞌa₂ liaꞌ₂ juɨnꞌ₂ Diú₄.
Ca₂ꞌë́₂ táng₃ Jesús jág₁ a₂jóin₂
Të₃ tionꞌ₅₄ dsa₂ dsɨ₂góꞌ₃ dsɨ́₅ a₂jmo₅ Jesús, jaun₂ ca₂juáꞌ₂ ca₂tsɨ́ꞌ₃ dsa₂ guia₃-tɨ́n₂ quiáin₅:
44 ―Rë₂ nei₂ ꞌniaꞌ₂ jág₁ quió₃ la₂: ŋiꞌ₅₄ ta₁ ja₁dsau₅₄ në₅, jángꞌ₂ dsa₂ quióꞌ₅ Jaun₅ dsa₂ mɨ₂güɨ́g₃ o₄gú₃ dsa₂.
45 La₁ jág₁ jaun₂ në́₃, tsá₃ ca₂ŋɨ́ꞌ₂ dsɨ́₅ chiꞌ₂ dsɨ₂guia₃-tɨ́n₂, ia₁ tsá₃ jme₁ma₂ꞌi₄ ꞌéiꞌ₃ a₂le₃ŋɨ́iꞌ₂. Jaun₂ tsá₃ ca₂tiá₂ dsɨ́₅ a₂ŋɨ́iꞌ₃ Jesús ꞌe₂ ꞌnio₃ juáꞌ₂ quianꞌ₅₄ jág₁ jaun₂.
¿ꞌEin₂ lɨ́n₅ i₂dsen₅₄ guë́₄?
46 Jaun₂ ca₂tsɨ́n₂ chiꞌ₂ dsɨ₂guia₃-tɨ́n₂ conꞌ₂ guioin₅₄, ne₄ juɨ₁liaꞌ₂ ꞌein₂ i₂lén₂ i₂dsen₅₄ guë́₄ jë₄ quióꞌ₅.
47 La₁ jme₁ca₂rë₃líꞌ₄ Jesús ꞌe₂ a₂dsia₂₃, jaun₂ ca₂cain₃ jan₂ guein₂ ca₂dsiog₃ cau₅ quióꞌ₅.
48 Jaun₂ ca₂juáꞌ₂:
―Juɨ₁liaꞌ₂ dsa₂ i₂guen₅ guein₂ la₂ o₄quió₃ jniá₂, guei₂₃ jniá₂; juɨ₁liaꞌ₂ dsa₂ i₂guei₅ jniá₂, ján₃ guëꞌ₂ guein₂₃ i₂ca₂chei₃. Ia₁ juɨ₁liaꞌ₂ i₂jmo₅ meꞌ₂ guë́₄ jë₄ ca₂le₃jɨ́nꞌ₃ ꞌniaꞌ₂, i₂ꞌéi₂ bá₄ i₂lɨ́n₅ i₂dsen₅₄ guë́₄.
I₂tsá₃ ꞌiog₅₄ jniog₄, i₂quianꞌ₅₄ jniog₄ bá₄ ꞌéi₂
49 Jaun₂ në́₃ ca₂juáꞌ₂ Juan₅₄:
―Të₅, ma₂jɨn₄ jniaꞌ₅₄ jan₂ dsa₂ ꞌuɨ́inꞌ₂ jme₂dsí₂ je₂naꞌ₅₄ quianꞌ₅₄ bí₂ ꞌéiꞌ₃ a₂ꞌóꞌ₅ ꞌne₂. Tsá₃ ma₃ca₂cuë₅₄ jniaꞌ₅₄ jmɨg₄, ia₁ tsá₃ guëꞌ₂ ŋɨ₂₃ quianꞌ₅₄ jniog₄.
50 La₁ Jesús në́₃ ca₂juáꞌ₂:
―Tsá₃ jmóꞌ₂ ꞌniaꞌ₂ le₂jaun₂ a₂jnɨgꞌ₅₄. Ia₁ juɨ₁liaꞌ₂ dsa₂ i₂tsá₃ ꞌiog₅₄, të₂le₃ quián₂ jniog₄ bá₄ tión₂ i₂le₂ꞌéi₂.
I₃jen₅₄ Jacobo quianꞌ₅₄ Juan₅₄ ca₂jí₂ Jesús
51 Jme₁ma₂ja₂quián₃ të₅₄ jmɨg₄ a₂dsánꞌ₃ táng₃ Jesús gueiꞌ₅₄ i₂juɨ́g₃, ca₂ꞌág₂ caun₂ dsɨ́₅ ca₂ꞌí₃ juɨ₅ a₂dsióg₄ Jerusalén.
52 Ca₂chein₃ dsa₂ i₃lén₂ ne₄ juɨ₅ i₃jmó₂ co₂jŋia₅₄ ja₁jŋia₃ caun₂ juɨg₂ píꞌ₁ niog₅ ꞌuë₃ Samaria.
53 La₁ tsá₃ ca₂guen₃ dsa₂ Jesús ja₁jaun₂, ia₁ ca₂rë₃líꞌ₄ a₂ꞌein₅₄ juɨ₅ ŋó₅ juɨ₅ Jerusalén bá₄.
54 Jaun₂ në́₃, jme₁ca₂rë₃ŋi₅ Jacobo quianꞌ₅₄ Juan₅₄ a₂tsá₃ guei₅ dsa₂, jaun₂ ca₂juáꞌ₂:
―Te₁guiꞌ₅₄, ¿tsa₁ dse₃ jmó₁ jniog₄ ꞌéiꞌ₃ a₂sió₃ si₂ gueiꞌ₅₄ i₂juɨ́g₃ ia₁jaun₂ ꞌén₂ juɨg₂ la₂?c
55 Jaun₂ ca₂jénꞌ₃ Jesús ca₂jí₂.d
56 Jaun₂ ca₂i₃léin₂ bá₄ táng₃ juɨg₂ siáꞌ₂.
Dsa₂ i₂jme₁ꞌnio₃ jme₃quianꞌ₅₄ Jesús
57 Ja₁i₃léin₂ jaun₂, ca₂juáꞌ₂ jan₂ dsa₂:
―Te₁guiꞌ₅₄, ꞌnio₃ jniá₂ jme₁quion₁ ꞌne₂ le₂con₂ ja₁gogꞌ₅₄.
58 Jaun₂ ca₂ŋag₃ táng₃ Jesús:
―Juɨ₁liaꞌ₂ i₁güɨ₅, i₂ꞌio₅ to₄ bá₄ ꞌéi₂; ján₃ bá₄ le₂jaun₂ juɨ₁liaꞌ₂ i₁tan₅ i₂i₂nio₄ gueiꞌ₅₄, tioꞌ₅₄ tsag₄ bá₄ ꞌéi₂ ján₃. La₁ Jaun₅ dsa₂ mɨ₂güɨ́g₃ në́₃ tsá₃ ja₁cha₂ quióꞌ₅, juaꞌ₅₄ ja₁lé₂ le₃jŋia₃.
59 Jaun₂ ca₂tsɨ́ꞌ₃ i₂siánꞌ₂:
―Ŋia₅ quianꞌ₅₄ jniá₂.
La₁ ca₂ŋag₃ ꞌéi₂:
―Te₁guiꞌ₅₄,e juɨ₁i₁ꞌóng₃ deꞌ₂ ŋeꞌ₃.
60 Jaun₂ ca₂ŋag₃ táng₃ Jesús:
―Juɨ₁dsi₂ꞌón₃ ꞌlag₄, ꞌlag₄ rɨinꞌ₅₄. La₁ ꞌne₂, juɨ́g₂ jniá₂, gua₂ o₂ꞌë́₃ jág₁ juɨ₁liaꞌ₂ ꞌa₂ liaꞌ₂ lë́₅ ja₁gon₂ Diú₄.
61 Jaun₂ ca₂juáꞌ₂ táng₃ jan₂:
―Te₁guiꞌ₅₄, ꞌnio₃ jniá₂ nei₅₄ quianꞌ₅₄ ꞌne₂, la₁ juɨ₁i₁ꞌéiꞌ₃ deꞌ₂ jág₁ i₂chan₂ quió₃.
62 La₁ Jesús në́₃ ca₂juáꞌ₂:
―Dsa₂ i₂ma₂në₂ꞌéi₂ caun₂ dsɨ́₅ a₂jme₃quiongꞌ₅₄, në₁juaꞌ₂ ca₂ꞌág₂ caun₂-tɨn₃ dsɨ́₅, lɨ́in₅ liaꞌ₂ lɨ́n₅ jan₂ i₂jme₂lióg₃ quiáꞌ₂ ꞌuë₃, jéinꞌ₅ le₃caꞌ₃. Tsá₃ ta₁ tén₄ dsa₂ i₂le₂ꞌéi₂ le₃ja₁gon₂ Diú₄.