ꞌEin₂ lɨ́n₅ i₂dsen₅₄ guë́₄ ja₁gon₂ Diú₄
18
Ján₃ bá₄ jmɨg₄ jaun₂ táng₃ ca₂jme₃quián₃ chiꞌ₂ dsɨ₂guia₃-tɨ́n₂ con₂ Jesús jaun₂ ca₂ŋag₃:
―¿ꞌEin₂ lɨ́n₅ i₂dsen₅₄ guë́₄ gueiꞌ₅₄ i₂juɨ́g₃ ja₁gon₂ Diú₄?
―A₂dsɨ₂jóꞌ₃ juɨ́g₂ jniá₂ ꞌniaꞌ₂, në₁juaꞌ₂ tsá₃ ca₂jme₁tsɨ́nꞌ₄ ꞌniaꞌ₂ ꞌauꞌ₂, a₂léngꞌ₂ liaꞌ₂ lɨ́n₅ jan₂ i₂bëꞌ₅₄, o₁lɨ́gꞌ₂ jmɨg₄ tsá₃ lé₂ le₃dsi₁noꞌ₃ ꞌniaꞌ₂ gueiꞌ₅₄ i₂juɨ́g₃.
4 Jaun₂ në́₃, i₂ꞌéi₂ bá₄ i₂lén₂ i₂dsen₅₄ guë́₄ gueiꞌ₅₄ i₂juɨ́g₃ juɨ₁liaꞌ₂ i₂jmo₅ meꞌ₂ liaꞌ₂ lɨ́n₅ chiꞌ₂ bëꞌ₅₄ la₂.
5 Conꞌ₂ siáꞌ₂ táng₃, juɨ₁liaꞌ₂ dsa₂ i₂guen₅ jan₂ guein₂ o₄quió₃ jniá₂ juɨ₁liaꞌ₂ i₂la₂, jniá₂ bá₄ guei₂₃.
A₂goꞌ₂ tsɨ₃sénꞌ₂ dsa₂ dso₄
6 ꞌJuɨ₁ꞌein₂ guë́₃ i₂jmo₅ tsɨ₂sénꞌ₂ juɨ₁liaꞌ₂ chiꞌ₂ bëꞌ₅₄ i₂le₂la₂ i₂ꞌén₂ të₂le₃ quió₃ jniá₂, ja₂lɨn₃ guë́₄ co₂ŋeiꞌ₅₄ dse₃ tón₂ dsa₂ ne₄ jmɨ₁ŋíꞌ₄ rë₂quein₅ ca₂mɨ́g₂ nɨ₁to₂ dsɨ₂lag₅₄.
7 ¡ꞌE₂ guë́₄ juɨ́g₂ dsa₂ mɨ₂güɨ́g₃ ia₁ tsá₃ caun₂ a₂ja₂lé₂ ja₁coin₂ a₂jmo₅ a₂tsɨ₂séinꞌ₂! La₁ le₂jaun₂ dsónꞌ₂ dsɨ₃ŋɨ́i₂ bá₄, la₁ ꞌe₂ guë́₄ juɨ́g₂ juɨ₁liaꞌ₂ dsa₂ i₂tonꞌ₂ jág₁ rɨnꞌ₅₄ jaun₂ jénꞌ₃ dsɨ́₅ ꞌéi₂ a₂ꞌno₃ dso₄.
8 ꞌꞌUɨg₅₄ jaun₂, chi₂juaꞌ₂ mɨ₂gogꞌ₂ o₃ mɨ₂tagꞌ₅₄ ꞌe₂, jmo₅ a₂tangꞌ₂ dso₄, co₂dsia₅ dse₃ ꞌnia₄, tiong₂ uɨ́ng₂; ia₁ ja₂lɨn₃ guë́₄ dse₃ a₂dsiángꞌ₄ ja₁le₃changꞌ₂ co₂tan₅₄ a₂rë₂ꞌliángꞌ₃, conꞌ₂ guë́₄ a₂jme₁o₁ꞌúꞌ₃ a₂rë₂ꞌŋia₅ gogꞌ₂-tagꞌ₅₄ dsi₂si₂ ja₁tsá₃ ton₅ jmɨg₄ éi₃.
9 Në₁juaꞌ₂ mɨ₂neꞌ₅₄ jmo₅ a₂tangꞌ₂ dso₄, dsi₄ ján₃, tiong₂ uɨ́ng₂: ia₁ ja₂lɨn₃ guë́₄ dse₃ a₂dsiángꞌ₄ ja₁le₃changꞌ₂ co₂tan₅₄ a₂tengꞌ₅₄ ca₂mɨ́g₂ mɨ₂neꞌ₅₄, liaꞌ₂ conꞌ₂ guë́₄ a₂jme₁gogꞌ₅₄ a₂rë₂ꞌŋia₅ ta₁tɨn₃ mɨ́g₂ mɨ₂neꞌ₅₄ dsi₂si₂ guio₃-juɨ́g₃.
Jág₁ a₂jángꞌ₅ léi₄ juɨ₁liaꞌ₂ jan₂ jáꞌ₂ chaꞌ₂ i₂ca₂i₃cónꞌ₅
10 ꞌTsá₃ jmo₂ ꞌniaꞌ₂ juaꞌ₅₄ a₂tsá₃ jenꞌ₅₄ juɨ₁liaꞌ₂ jan₂ chiꞌ₂ bëꞌ₅₄ le₂la₂. Ia₁ juɨ́g₂ jniá₂ ꞌniaꞌ₂, ia₁ ángeles i₂jmo₅ ꞌí₁ quiáin₅ co₂tan₅₄ bá₄ jɨ́in₂ Ŋeꞌ₃ i₂guá₅ gueiꞌ₅₄ i₂juɨ́g₃.a
12 ꞌ¿ꞌA₂ liaꞌ₂ lɨ́nꞌ₂ ꞌniaꞌ₂? Juaꞌ₅₄ meiꞌ₂ guë́₃ jan₂ dsa₂ ꞌŋio₅ caun₂ ꞌŋiá₂-lón₂ jáꞌ₂ chaꞌ₂, në₁juaꞌ₂ ca₂i₃cónꞌ₅ jan₂, ¿tsa₁ ja₁jaun₂ cheinꞌ₂ ne₄ dsɨ₂conꞌ₂ i₂quéinꞌ₂ co₂ne₂guión₂ rë₂dsɨ́₂ guia₃-né₂ (99) conꞌ₂ i₂te₂ ꞌéi₂, jaun₂ dsó₅ táng₃ dsɨ₂ꞌniaiꞌ₂ i₂tsá₃ chan₂ ꞌéi₂?
13 Jë₁ma₂ca₂dsáuꞌ₂ në́₃, a₂dsɨ₂jóꞌ₃ juáꞌ₅ jniá₂, ꞌŋio₅ lɨn₃ guë́₄ ꞌioꞌ₂ jmo₂₃ o₄quióꞌ₄ i₂jan₂ ꞌéi₂ conꞌ₂ guë́₄ i₂quéinꞌ₂ co₂ne₂guióg₂ rë₂dsɨ́₂ guia₃-né₂ i₂tsá₃ i₂cónꞌ₅.
14 Le₂në₅ bá₄ ján₃, Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃ tsá₃ ꞌnio₃ juaꞌ₅₄ dsɨ₃cónꞌ₅ ca₂liaꞌ₂ ꞌi₁jan₂ i₂lɨ́n₅ guein₂ bëꞌ₅₄ juɨ₁liaꞌ₂ i₂la₂.
ꞌA₂ liaꞌ₂ ꞌnióꞌ₅ ꞌén₂ dsa₂ dsáu₁ rɨinꞌ₅₄
15 ꞌChi₂juaꞌ₂ ꞌe₂ caun₂ a₂ca₂jmógꞌ₂ jan₂ rɨ́ngꞌ₂, dsia₄ deꞌ₂ ꞌniaꞌ₂ jág₁ ja₁conꞌ₂ guiongꞌ₅₄, ja₁jaun₂ jme₁jniagꞌ₂ ne₅₄ ꞌe₂ a₂ca₂jmógꞌ₂. Në₁juaꞌ₂ ca₂tónꞌ₃ juɨ₅ jág₁ quiángꞌ₂, ja₁jaun₂ ca₂dsan₃ bá₄ mɨꞌ₅₄, ca₂lë₃ bá₄ táng₃ rɨ́ngꞌ₂ quiainꞌ₅₄.
16 La₁ në₁juaꞌ₂ tsá₃ ca₂tónꞌ₃ juɨ₅ jág₁ quiángꞌ₂ në́₃, teꞌ₂ on₃-ún₂ dsa₂ siánꞌ₂ ia₁jaun₂ “ca₂le₃jë́₃ ꞌe₂ niog₅ lé₂ jiógꞌ₂ ꞌí₁ quianꞌ₅₄ on₃-ún₂ dsa₂ i₂jángꞌ₃ jág₁ dsau₅, në₁juaꞌ₂ tí₅ jág₁ jaun₂.”b
17 Në₁juaꞌ₂ tsá₃ ca₂tónꞌ₃ juɨ₅ jág₁ quióꞌ₅ dsa₂ ꞌéi₂, cheiꞌ₅₄ guáꞌ₅; në₁juaꞌ₂ tsá₃ ca₂tónꞌ₃ juɨ₅ on₃ guëꞌ₂ jág₁ quióꞌ₅ guáꞌ₅ në́₃, të₂le₃ ja₁ŋó₄ jaun₂, jmo₄ ꞌauꞌ₂ jɨinꞌ₅₄ liaꞌ₂ ja₁jɨngꞌ₄ jan₂ dsɨ₂nau₂, o₃ juɨ₁liaꞌ₂ jan₂ i₂cágꞌ₅ cu₄ a₂ca₂tɨ́n₂ dsɨ₂tan₅₄ ꞌe₂.
18 ꞌA₂dsɨ₂jóꞌ₃ juɨ́g₂ jniá₂ ꞌniaꞌ₂, ca₂le₃jë́₃ ꞌe₂ a₂tsá₃ cuëꞌ₂ ꞌniaꞌ₂ jmɨg₄ ne₄ guaꞌ₅₄ ꞌuë₃ la₂, liaꞌ₂ conꞌ₂ lë́₅ jág₁ quió₃, ján₃ bá₄ tsá₃ lé₂ gueiꞌ₅₄ i₂juɨ́g₃; ján₃ bá₄ le₂jaun₂ juɨ₁liaꞌ₂ a₂cuëꞌ₂ ꞌniaꞌ₂ jmɨg₄ ne₄ guaꞌ₅₄ ꞌuë₃ la₂, liaꞌ₂ conꞌ₂ lë́₅ jág₁ quió₃, a₂jaun₂ bá₄ lé₂ gueiꞌ₅₄ i₂juɨ́g₃.
19 ꞌJán₃ bá₄ juáꞌ₅ jniá₂, në₁juaꞌ₂ onꞌ₃ ꞌniaꞌ₂ jmoꞌ₂ caun₂ jág₁ ne₄ guaꞌ₅₄ ꞌuë₃ la₂, a₂mɨ́ꞌ₁ ꞌniaꞌ₂ ꞌe₂ a₂ꞌniogꞌ₂ mɨ́ꞌ₁, cuë₃ bá₄ Ŋeꞌ₃ jniá₂ i₂guá₅ gueiꞌ₅₄ i₂juɨ́g₃.
20 Ia₁ jë₁le₁ŋɨꞌ₂ on₃-ún₂ o₄quió₃ jniá₂, jë₄ jaun₂ bá₄ ꞌeng₅₄.
21 Jaun₂ Pe₄ në́₃ ca₂ŋag₃:
―Te₁guiꞌ₅₄, ¿conꞌ₂ je₂liáꞌ₂ ráun₂ ꞌnióꞌ₅ ꞌén₄ jniá₂ dsáu₁ rɨ́ngꞌ₃ në₁juaꞌ₂ ꞌe₂ caun₂ a₂ca₂jmógꞌ₂? ¿ꞌA₂ liaꞌ₂? ¿Guio₃ ráun₂?
22 Jaun₂ ca₂ŋag₃ Jesús:
―Ma₁ tsá₃ juáꞌ₅ jniá₂ jŋiaꞌ₅₄ guio₃ ráun₂. Ta₁ꞌnagꞌ₂ co₂ne₂guióg₂ rë₂dsɨ́₂ guia₃ ráun₂ a₂jma₃guio₃ (70 X 7 = 490)c bá₄ juáꞌ₅ jniá₂.
Jág₁ a₂jángꞌ₅ léi₄ juɨ₁liaꞌ₂ jan₂ dsa₂ i₂tsá₃ ca₂ꞌén₂ dsáu₁ rɨnꞌ₅₄
23 ꞌUɨg₅₄ jaun₂, lë́₅ gueiꞌ₅₄ i₂juɨ́g₃ juɨ₁liaꞌ₂ lɨ́n₅ jan₂ rag₅₄ i₂ca₂mág₃ cuentas quióꞌ₅ ca₂le₃jɨ́n₃ dsa₂ i₂jme₂ti₃ ta₁ ne₅₄.
24 Jaun₂ jme₁ma₂jme₂lióg₃ cheinꞌ₂ cuentas, jme₁ca₂dsi₃lén₂ dsa₂ le₁jŋiai₂₃ jan₂ dsa₂ i₂rɨn₅ guia₃ mei₅ talentos*.
25 La₁, ia₁ tsá₃ ꞌe₂ cha₂ quianꞌ₅₄ a₂quí₃, jaun₂ ca₂jmo₃ rag₅₄ ꞌéiꞌ₃ a₂dsɨ₃ꞌnɨ₄ dsa₂ ꞌéi₂ liaꞌ₂ jma₃quianꞌ₅₄ ꞌio₅₄ quiáin₅, chiꞌ₂ quiáin₅ në́₃, ca₂le₃jë́₃ ꞌe₂ a₂jme₁cha₂ quióꞌ₅ në́₃, ia₁jaun₂ le₂jaun₂ jme₁dsian₅ a₂rɨin₂.
26 La₁ dsa₂ ꞌéi₂ në́₃, ca₂já₃ ca₂chi₃jné₃ ne₄ rag₅₄ juɨg₅₄, jaun₂ ca₂mɨ₃ tion₅₄ ca₂juáꞌ₂: “Guiꞌ₅₄ quiáng₃, jmo₄ juɨnꞌ₂ ꞌauꞌ₂ quianꞌ₅₄ jniá₂, a₂quɨ́₄ bá₄ jniá₂ quiángꞌ₂, ca₂le₃jë́₃.”
27 Jaun₂ juɨg₅₄ në́₃ ca₂dsia₃ bá₄ ŋéi₂ dsɨ́₅ ja₁coin₂, jaun₂ ca₂ꞌéin₂ bá₄ ca₂le₃jë́₃ a₂jme₁rɨin₂, jaun₂ ca₂lió₂ bá₄.
28 ꞌLa₁ dsɨ₂juɨ₅ jme₁o₂ꞌɨ́in₃ jaun₂ në́₃, ca₂jeinꞌ₂ jan₂ dsa₂ i₂jme₂ti₃ rɨinꞌ₅₄ i₂rɨn₂ caun₂ ꞌŋiá₂-láu₂ cu₄ denarios* quióꞌ₅. Jaun₂ ca₂tɨ́in₂ dsɨ₂lag₄ rɨinꞌ₅₄, ca₂güɨꞌ₃ tiá₂, ca₂juáꞌ₂: “¡Qui₄ a₂rɨngꞌ₂ quió₃!”
29 Jaun₂ rɨinꞌ₅₄ ꞌéi₂ në́₃ ca₂chi₃jné₃ ne₅₄, jaun₂ ca₂mɨ₃ tion₅₄ ca₂juáꞌ₂: “Jmo₄ juɨnꞌ₂ ꞌauꞌ₂ quianꞌ₅₄ jniá₂, a₂quɨ́₄ bá₄ jniá₂ quiángꞌ₂, ca₂le₃jë́₃.”
30 La₁ i₂jan₂ në́₃ tsá₃ ca₂gue₃, jaun₂ juɨ₅ ꞌné₅ ꞌmá₃ bá₄ ca₂i₁tioꞌ₂. Ca₂liaꞌ₂ jaun₂ ca₂ꞌmagꞌ₂ dsɨ́₅ ca₂liaꞌ₂ ca₂quí₃ rɨinꞌ₅₄ ca₂le₃jë́₃.
31 Jaun₂ jme₁ca₂jág₃ rɨinꞌ₅₄ i₂jme₂ti₃ ta₁ siánꞌ₂, ca₂táꞌ₂ ꞌliaꞌ₂ dsɨ́₅, jaun₂ ca₂i₁con₂ jág₁ ne₄ juɨg₅₄ ca₂i₁juaꞌ₄ ca₂le₃jë́₃ a₂ca₂lë₃ jaun₂.
32 Jaun₂ ca₂jmo₃ juɨg₅₄ ꞌéiꞌ₃ ca₂i₁quiong₅₄ táng₃ dsa₂, jaun₂ ca₂të₃ juɨg₅₄ dsi₂néi₂ quióꞌ₅, jaun₂ ca₂juáꞌ₂: “ꞌNe₂ i₂jme₂ti₃ ta₁ ne₃, ¡ꞌe₂ guë́₄ ꞌŋio₅ ꞌlɨnꞌ₅₄ ꞌne₂ ca₂ꞌuɨ́ngꞌ₂! Juaꞌ₂ në₂ꞌén₃ bá₄ jniá₂ ca₂le₃jë́₃ a₂jme₁rɨngꞌ₂ quió₃, ia₁ në₂mɨꞌ₅₄ tion₅₄-jan₃.
33 ¿Tsa₁ dse₃ juaꞌ₅₄ le₂jaun₂ bá₄ në₂dsiaꞌ₅₄ ŋéi₂ ꞌauꞌ₂ rɨ́ngꞌ₂, juɨ₁liaꞌ₂ në₂dsia₃ jniá₂ ŋéi₂ dsɨ₃ ꞌŋiagꞌ₂?”
34 Të₃ ma₂ꞌne₂ jaun₂ juɨg₅₄, ca₂jɨ́inꞌ₂ dsa₂ ꞌéi₂ o₄gú₃ dsa₂ i₂niog₅ ne₄ ꞌné₅ ꞌmá₃, ca₂jmo₃ ca₂liaꞌ₂ ca₂quí₃ jë₂ a₂jme₁rɨin₂.
35 Jaun₂ ca₂juáꞌ₂ Jesús guë́₄ në́₃:
―Ján₃ bá₄ le₂në₅ jmo₃ Ŋeꞌ₃ jniá₂ i₂guá₅ gueiꞌ₅₄ i₂juɨ́g₃ quianꞌ₅₄ ꞌniaꞌ₂ le₂jangꞌ₂ le₂jangꞌ₂ në₁juaꞌ₂ tsá₃ ca₂ꞌénꞌ₃ ꞌniaꞌ₂ ca₂le₃jë́₃ ꞌauꞌ₂ dsáu₁ rɨ́ngꞌ₂.