Jág₁ Dse₃ quióꞌ₅ Diú₄ a₂ca₂tóꞌ₂ San Marcos ne₄ Si₂
ꞌË́₂ Juan₅₄ jág₁ quióꞌ₅ Diú₄ caun₂ ꞌuë₃ co₂ꞌŋiog₅
1
Le₂la₂ bá₄ ca₂rë₃lióg₃ jág₁ dse₃ quióꞌ₅ Jesucristo, Ja₁ŋiꞌ₅₄ Diú₄. a
San Marcos 1:1-20
2 Juɨ₁liaꞌ₂ lë́₅ tioꞌ₅₄ ne₄ si₂ quióꞌ₅ dsa₂ i₂jme₁ꞌë́₂ jág₁ quián₂ Diú₄ ma₂lɨ́gꞌ₂, ja₁juáꞌ₂ le₂la₂:
Tsɨng₅₄ jan₂ dsa₂ quiáng₃
ne₄ juɨ₅ quiángꞌ₂, jón₃,
a₂dsɨ₃can₅ jág₁ dse₃ jɨn₄ dsa₂ mɨ₂güɨ́g₃,
jaun₂ jmo₃ co₂jŋia₅₄ juɨ₅ quiángꞌ₂.b
3 Jaun₂ néꞌ₂ ꞌë́₂ dsa₂ ꞌéi₂ jág₁ co₂mɨꞌ₅₄
caun₂ ꞌuë₃ quein₂ co₂ꞌŋiog₅, jaun₂ i₂ꞌéi₂ juáꞌ₂:
“Jmo₄ ꞌniaꞌ₂ co₂jŋia₅₄
juɨ₅ quióꞌ₅ Te₁guiꞌ₅₄ i₂jiá₃.
Nia₄ ꞌniaꞌ₂ caun₂ juɨ₅ co₂dsau₅.”c
4 Jaun₂ le₂la₂ ca₂rë₃ti₃ jág₁ në₅: Ca₂guan₃ Juan₅₄ caun₂ ja₁lë́₄ ꞌuë₃ co₂ꞌŋiog₅ ca₂choin₃ jmɨg₂ dsa₂, qui₂ca₂ꞌë́₂ jág₁ a₂tsón₃ dsa₂ jmɨg₂, jë₁ma₂ca₂dsi₃quénꞌ₅ dsɨ́₅ ia₁jaun₂ le₃ꞌén₂ dsáu₁.
5 Jaun₂ ca₂le₃jɨ́n₃ dsa₂ chan₂ juɨg₂ Judea quianꞌ₅₄ dsa₂ i₂chan₂ Jerusalén në́₃, ca₂i₁lein₅₄ ja₁jme₁ꞌen₅₄ Juan₅₄. Qui₂ca₂jmo₃ dsa₂ qui₂ŋí₃ quióꞌ₅ ca₂le₃jë́₃ dsáu₁. Jaun₂ guë́₄ ca₂cho₃ Juan₅₄ jmɨg₂d Cuá₃ Jordán.
6 Nɨ₁tsɨnꞌ₅₄ Juan₅₄ ꞌéi₂ jme₁lë́₄ quianꞌ₅₄ nɨ₁jŋí₁ jáꞌ₂ camello*. A₂jme₁jénꞌ₅ túꞌ₅ guëꞌ₂ në́₃, lo₄ jáꞌ₂. Má₃ a₂jme₁guë́ꞌ₅ guëꞌ₂, jmáꞌ₃ i₁nɨꞌ₂ tia₄ quianꞌ₅₄ jmɨ₁táꞌ₄ cha₂ ja₁nau₂.
7 Caun₂ ca₂ŋɨ₃ bá₄ ꞌë́₂ jág₁ dse₃, juáꞌ₂:
―I₂jiá₃ chi₁coꞌ₅₄ quió₃, i₂ꞌéi₂ bá₄ i₂ꞌuanꞌ₂ i₂tɨn₂ guë́₄ liaꞌ₂ conꞌ₂ guë́₄ jniá₂, ca₂liaꞌ₂ jŋiaꞌ₅₄ lau₂ ton₅ tag₅₄ tsá₃ ca₂tɨ́ng₂ tsɨꞌ₅₄.
8 Jniá₂ në₂tiáng₃ ꞌniaꞌ₂ jmɨg₂; la₁ ꞌéi₂ guëꞌ₂ në́₃ tióg₂ Jme₂dsí₂ Jŋió₅.
Ca₂chon₃ Juan₅₄ jmɨg₂ Jesús
9 Jmɨg₄ jaun₂ o₂ꞌɨ́n₃ Jesús juɨg₂ Nazaret, ja₁tén₄ Galilea. Ŋó₃ ja₁ꞌen₅₄ Juan₅₄. Ja₁jaun₂ ca₂cho₃ Juan₅₄ jmɨg₂ ca₂choin₃ Jesúse Cuá₃ Jordán.
10 Jaun₂ dsɨ₂juɨ₅ jme₁ca₂ꞌŋio₂ Jesús ne₄ jmɨg₂, ca₂jág₃ ca₂niá₃ dsɨ₄ mɨ₂güɨ́g₃. Jaun₂ ca₂sión₃ Jme₂dsí₂ quián₅ Diú₄ i₂lɨ́n₅ liaꞌ₂ lɨ́n₅ jan₂ i₁ju₂, ne₄ quióꞌ₅.
11 Jaun₂ ca₂néꞌ₂ jág₁ a₂já₅ gueiꞌ₅₄ i₂juɨ́g₃ a₂juáꞌ₂:
―ꞌNe₂ bá₄ lɨ́ngꞌ₅ jón₃ quiáng₃, i₂ŋɨ́₄ lë₃ ꞌnióg₃ guë́₄ lɨn₃; ꞌE₂ bá₄ ꞌŋio₂ dsɨ₃ quianꞌ₅₄ ꞌne₂.
Ca₂caun₃ i₂së₃dsen₃ táu₂ quióꞌ₅ Jesús
12 Dsɨ₂juɨ₅ jaun₂ ca₂jiog₃ Jme₂dsí₂ quián₅ Diú₄ caun₂ juɨ₅ ꞌuë₃ co₂ꞌŋiog₅.
13 Jaun₂ ja₁jaun₂ ca₂ꞌí₃ të₂láu₃ jmɨg₄ ia₁jaun₂ cáun₂ táu₂ i₂së₃dsen₃. Ja₁jaun₂ jme₁tionꞌ₅₄ jáꞌ₂ tsau₂ dsɨ́₅. La₁ ca₂o₃lén₂ ángeles* ca₂jme₃ꞌo₅₄.
Ca₂jme₃lióg₃ Jesús jme₂tɨin₂₃ dsa₂ jág₁ dse₃
14 Jme₁ma₂ca₂tonꞌ₂ dsa₂ Juan₅₄ néꞌ₃ ꞌmá₃, Jesús në́₃ ca₂ŋei₅₄ juɨ₅ Galilea i₁ꞌë́₄ jág₁ dse₃ quióꞌ₅ Diú₄,
15 juáꞌ₂ ŋɨ₂₃:
―Ca₂dsɨn₃ jmɨg₄ a₂ja₂quián₃ a₂jme₃gón₃ Diú₄. Jaun₂ lë₃ juɨ₁dsi₂quénꞌ₅ ꞌauꞌ₂, juɨ₁le₂ꞌénꞌ₂ ꞌniaꞌ₂ jág₁ dse₃.
Ca₂të́ꞌ₃ Jesús quén₂ dsa₂ i₂jme₁tionꞌ₅₄ tsánꞌ₂ ju₄
16 Co₂ráun₂ ca₂ŋɨ₅ Jesús cheiꞌ₅₄ jmɨ₁ŋíꞌ₄ Galilea. Ja₁jaun₂ ca₂jɨ́in₂ Si₂mu₅₄ quiainꞌ₅₄ Drë́₄ rɨinꞌ₅₄. Jme₁tioinꞌ₅₄ táun₂ ꞌmá₅ dsi₂jmɨg₂, ia₁ jme₁lɨ́in₄ dsa₂ i₂jmo₅ ta₁ tsánꞌ₂ ju₄.
17 Jaun₂ ca₂juáꞌ₂ Jesús:
―I₂nóꞌ₅ ꞌniaꞌ₂, jme₁quiongꞌ₅₄ jniá₂, jaun₂ cuë₅₄ ta₁ a₂chi₁liangꞌ₂ dsa₂ mɨ₂güɨ́g₃, juɨ₁liaꞌ₂ chi₂liánꞌ₁ ꞌniaꞌ₂ ju₄.
18 Jaun₂ dsɨ₂juɨ₅ bá₄ i₃léin₂ quiongꞌ₅₄; ja₁jaun₂ ca₂dsia₃ bá₄ tsɨ₁ꞌmá₅ quióꞌ₅.
19 Meꞌ₂ bá₄ ja₁i₃léin₂ guë́₄ jme₁ca₂jɨ́in₂ i₂chen₂ Jacobo quiainꞌ₅₄ Juan₅₄ rɨinꞌ₅₄, ja₁ŋiꞌ₅₄ Zebedeo. Jme₁tioinꞌ₅₄ ꞌŋióꞌ₃ tsɨ₁mu₅ jmógꞌ₅ ꞌmá₅ quióꞌ₅.
20 Dsɨ₂juɨ₅ ca₂të́ꞌ₃ i₂ꞌéi₂ ján₃; ca₂tén₂ bá₄ guëꞌ₂ ꞌéi₂ në́₃ Zebedeo jmei₂ ꞌŋióꞌ₃ tsɨ₁mu₅ quianꞌ₅₄ mozo quiáin₅.
Jan₂ dsa₂ i₂jme₁ꞌen₅₄ jme₂dsí₂ ꞌlɨnꞌ₅₄ të₂dsɨ́₅
21 Jaun₂ dsi₃léin₂ juɨg₂ Capernaum. Caun₂ jmɨg₄ sa₅₄,* ca₂ꞌí₃ Jesús guáꞌ₅ sinagoga*. Jaun₂ ca₂jme₃lióg₃ ca₂jme₃tɨin₂₃ dsa₂ jág₁ dse₃.
San Marcos 1:21-45
22 Ca₂le₃jɨ́n₃ i₂ca₂nág₂ në́₃ ca₂i₃góꞌ₃ dsɨ́₅ jág₁ quióꞌ₅, ia₁ ca₂jme₃tag₂₃ juɨ₁liaꞌ₂ jë₁jme₂tag₅ jan₂ i₂ꞌio₅ ꞌéiꞌ₃, on₃juaꞌ₅₄ rëꞌ₂ juɨ₁liaꞌ₂ jme₂tag₅ të₅juáꞌ₅.
23 Jë₄ jaun₂ ca₂dsióg₃ jan₂ dsa₂ i₂ꞌen₅₄ jme₂dsí₂ ꞌlɨnꞌ₅₄, ca₂juáꞌ₂ guióꞌ₅ tiá₂:
24 ―¿ꞌE₂ lë₃ tiánꞌ₅ ꞌne₂ Jesús Nazarenof jë₄ quián₂ jniaꞌ₅₄? A₂jŋiaꞌ₅₄ ꞌniogꞌ₂ ꞌéngꞌ₄ jniaꞌ₅₄ bá₄ ꞌne₂ ŋeꞌ₃. Guion₄ jniá₂ ꞌein₂ lɨ́ngꞌ₅. ꞌNe₂ lɨ́ngꞌ₅ dsa₂ jŋió₅ quián₅ Diú₄.
25 Jaun₂ ca₂jén₂ Jesús i₂ꞌlɨnꞌ₅₄ i₂ꞌen₅₄ të₂dsɨ́₅ dsa₂ ꞌéi₂, ca₂juáꞌ₂:
―Tei₄ jmo₄. Jú₅ quióꞌ₅ dsa₂ në₅.
26 Jaun₂ ca₂jmo₃ i₂ꞌlɨnꞌ₅₄ ca₂ba₂ca₂lɨ́nꞌ₂ dsa₂ ꞌéi₂ ꞌuë₃, ca₂guióꞌ₃ tiá₂. Jaun₂ guë́₄ o₂ꞌɨ́in₃ jaun₂ në́₃.
27 Jaun₂ ca₂le₃jɨ́n₃ dsa₂ i₂ca₂të́₂ ne₄ ca₂i₃góꞌ₃ dsɨ́₅, qui₂ca₂ŋɨ́iꞌ₃ rɨinꞌ₅₄, ca₂juáꞌ₂:
―¿ꞌE₂ bá₄ në₅? ¿ꞌAn₁ a₂në₅ bá₄ juáꞌ₅ ꞌmɨ́₂? ¡ꞌIo₅ ꞌéiꞌ₃ i₂në₅ ca₂të₂ ne₄ quióꞌ₅ i₂ꞌlɨnꞌ₅₄, jaun₂ ꞌéi₂ në́₃ nag₂₃ gau₂ jág₁ quióꞌ₅!
28 Jaun₂ dsɨ₂juɨ₅ bá₄ ca₂i₃ꞌág₃ jág₁ quióꞌ₅ ca₂le₂con₂ ja₁tén₄ Galilea.
Ca₂jme₃ꞌlión₂ Jesús ma₂chog₅₄ Si₂mu₅₄
29 Jaun₂ dsɨ₂juɨ₅ jme₁ca₂ꞌuɨin₂ guáꞌ₅, ca₂ŋó₃ quiainꞌ₅₄ Jacobo, Juan₅₄ në́₃, ja₁quióꞌ₄ Si₂mu₅₄ quianꞌ₅₄ Drë́₄.
30 Ma₂chog₅₄ Si₂mu₅₄ në́₃ jme₁roin₂₃ dsoꞌ₅₄, ꞌi₄ dséi₂. Jaun₂ dsɨ₂juɨ₅ ca₂ꞌɨn₃ dsa₂ dsa₂ dsoꞌ₅₄ ꞌéi₂ ca₂tsɨ́ꞌ₃ Jesús.
31 Jaun₂ në́₃ ca₂jme₃quiáin₃ con₂ dsa₂ dsoꞌ₅₄, ca₂jŋaꞌ₃ gu₂, ca₂chóꞌ₂ jaun₂ në́₃. Jaun₂ dsɨ₂juɨ₅ bá₄ ca₂o₃ꞌág₃ dséi₂ dsa₂. Jaun₂ ꞌio₅₄ ꞌéi₂ në₃ ca₂jme₃lióg₃ ca₂jme₃ti₃ ta₁ ne₄ ꞌéi₂ tioinꞌ₅₄.
Ca₂jme₃ꞌlión₂ Jesús juɨn₅ dsa₂ dsoꞌ₅₄
32 Jme₁ma₂rɨn₂ ꞌiog₂ jmɨg₄ jaun₂, ca₂o₃jŋia₃ dsa₂ ne₅₄ ca₂le₃jɨ́n₃ dsa₂ dsoꞌ₅₄, dsa₂ i₂tionꞌ₅₄ jme₂dsí₂ je₂naꞌ₅₄ në́₃.
33 Ca₂le₃jɨ́n₃ dsa₂ juɨg₂ bá₄ ca₂ŋɨꞌ₂ o₄ꞌné₄.
34 Jaun₂ Jesús në́₃ ca₂jme₃ꞌlióin₂ dsa₂ ca₂le₃jë́₃ ne₅₄ dso₄ a₂jme₁lɨ́in₄. Qui₂ca₂ꞌuɨ́inꞌ₂ rëꞌ₂ juɨn₅ je₂naꞌ₅₄ në́₃. La₁ tsá₃ ma₃ca₂cuë₃ Jesús jmɨg₄ juaꞌ₅₄ a₂juáꞌ₂ guë́₄ je₂naꞌ₅₄ jág₁, ia₁ ŋi₅ bá₄ je₂naꞌ₅₄ ꞌein₂ ꞌéi₂.
Ca₂ꞌë́₂ Jesús jág₁ dse₃ dsi₂néi₂ guáꞌ₅ sinagogas le₂tan₅₄ juɨg₂ ja₁tén₄ Galilea
35 Le₁né₃ guë́₄ jme₁jnia₃ jaun₂, ca₂nau₂ Jesús o₂ꞌɨ́in₃ ꞌnɨꞌ₂ juɨg₂, caun₂ ja₁lë́₄ co₂ꞌŋiog₅, i₁chiꞌ₄ Diú₄.
36 Jaun₂ ŋó₃ Si₂mu₅₄ quiainꞌ₅₄ rɨinꞌ₅₄ i₁ꞌniongꞌ₂.
37 Jme₁ca₂dsáuꞌ₂ në́₃, ca₂juáꞌ₂:
―Ca₂le₃jɨ́n₃ dsa₂ i₂nioi₅₄ ꞌnaiꞌ₂ ꞌne₂.
38 La₁ Jesús në́₃ ca₂ŋag₃:
―Ma₃dsau₅₄ dsɨ₂i₁nio₁ le₂tan₅₄ juɨg₂ ma₂quián₅ në₅, dsɨ₁ꞌë́₄ jág₁ dse₃, ia₁ ta₁ jaun₂ bá₄ guio₃ jniá₂.
39 Jaun₂ le₂në₅ ca₂i₁ŋɨ₂ Jesús le₂tan₅₄ juɨg₂ tioꞌ₅₄ ja₁tén₄ ꞌuë₃ Galilea, qui₂i₁ꞌë́₄ jág₁ dse₃ dsi₂néi₂ guáꞌ₅ sinagogas* le₂caun₂ juɨg₂. Qui₂ca₂ꞌuɨ́inꞌ₂ je₂naꞌ₅₄ të₂dsɨ́₅ dsa₂ në́₃.
Ca₂jme₃ꞌlión₂ Jesús dsa₂ i₂lɨ́n₅ ꞌméꞌ₅ ꞌiog₅
40 Ca₂guan₃ jan₂ dsa₂ dsoꞌ₅₄ i₂lɨ́n₅ ꞌméꞌ₅ ꞌiog₅ coin₂. Jaun₂ ca₂chi₃jné₃ ne₅₄, ca₂juáꞌ₂:
―Chi₂juaꞌ₂ ꞌŋio₂ ꞌauꞌ₂, jŋiaꞌ₅₄ liaꞌ₂ ꞌne₂ bá₄ quɨꞌ₅₄ jmɨg₄ jmóꞌ₂ le₁jë́₃ quió₃.
41 Jaun₂ ca₂dsia₃ Jesús ŋéi₂ dsɨ́₅ dsa₂ ꞌéi₂, ca₂néiꞌ₃ gu₂ ca₂nɨ́iꞌ₂ quióꞌ₅, jaun₂ ca₂juáꞌ₂:
―ꞌŊio₂ bá₄ dsɨ₃. Juɨ₁le₅₄ le₁jë́₃ quiángꞌ₂.
44 ―La₁ të₃ŋiꞌ₅₄ tsá₃ ꞌein₂ i₂juɨgꞌ₂ ꞌi₁jan₂. Jŋiaꞌ₅₄ gua₂ o₂jme₁jnia₅ ne₄ jme₂dsa₂, o₂jenꞌ₅₄ ne₄ Diú₄ o₂jmo₄ conꞌ₂ lë́₅ ꞌÉiꞌ₃ quióꞌ₅ Moisés,g o₂jangꞌ₅₄ jág₁ dsau₅ jɨn₄ dsa₂ juɨg₂ a₂ma₂ꞌlóngꞌ₂.
45 La₁ dsa₂ ꞌéi₂ në́₃ të₂le₃ i₂juɨꞌ₂ guë́₄ ca₂dsia₃ bá₄ jme₁o₂ꞌɨ́in₃, qui₂ca₂ꞌë́₂ jág₁ ca₂le₂con₂. ꞌUɨg₅₄ jaun₂ tsá₃ ma₃lé₂ ꞌí₂ Jesús jë₄ juɨg₂ të₃ jág₅ dsa₂; jmáꞌ₃ liaꞌ₂ ja₁co₂ꞌŋiog₅ bá₄ jme₁jŋia₂₃. La₁ tion₅₄ bá₄ jme₁dsɨ₂lén₂ dsa₂ coin₂ i₂ja₂lén₂ ca₂le₂con₂ jaun₂.