Ca₂jme₃ꞌlión₂ Jesús jan₂ dsa₂ i₂rë₂jáꞌ₃ quióꞌ₅
2
Cang₂ jaun₂ ca₂ꞌí₃ táng₃ Jesús jë₄ juɨg₂ Capernaum. Jaun₂ ca₂rë₃ŋi₅ dsa₂ a₂ma₂dsiáinꞌ₃.
San Marcos 2:1-14
2 Jaun₂ dsɨ₂juɨ₅ bá₄ ca₂ŋɨꞌ₂ dsa₂ juɨn₅ lɨn₃, ca₂liaꞌ₂ jŋiaꞌ₅₄ tsá₃ ma₃të₂ ja₁ꞌéinꞌ₄ dsi₂néi₂, le₂tan₅₄ o₄ꞌné₄ në́₃. Jaun₂ ca₂ton₃ jág₁ dse₃ ca₂tsɨ́ꞌ₃ dsa₂.
3 Jaun₂ ca₂dsi₃lén₂ co₂nióꞌ₃; jë₄ jaun₂ i₃lén₂ quén₂ le₁jŋiai₂₃ jan₂ dsa₂ i₂rë₂jáꞌ₃ quióꞌ₅.
4 Ia₁ tsá₃ lé₂ ŋɨ́i₃ të₂ dsi₂néi₂ ja₁ꞌen₅₄ Jesús, ia₁ juɨn₅ dsa₂ tionꞌ₅₄, jaun₂ juɨ₅ coꞌ₅₄ tsɨ₁ꞌné₅ bá₄ ca₂niá₃ caun₂ tau₂ pa₁, co₂dsau₅ ja₁chénꞌ₄ Jesús. Juɨ₅ jaun₂ ca₂sióin₂ dsa₂ ꞌlianꞌ₂ ꞌéi₂, dsɨ́in₂ caun₂ tsɨ₁jein₁.
5 Jme₁ca₂rë₃líꞌ₄ Jesús ꞌa₂ liaꞌ₂ ꞌén₂ dsa₂ ꞌéi₂, jaun₂ ca₂tsɨ́ꞌ₃ dsa₂ ꞌlianꞌ₂:
―Jón₃, ma₂rë₂ꞌén₄ bá₄ dsáuꞌ₂.
6 Jaun₂ i₂lɨn₅₄ të₅juáꞌ₅ i₂jme₁tiánꞌ₄ jë₄ jaun₂, ca₂i₃jiog₅ dsɨ́₅:
7 “¿ꞌE₂ lë₃ juáꞌ₂ i₂në₅ le₂në₅? A₂ꞌɨn₅ ꞌlɨgꞌ₅₄ Diú₄ bá₄ i₂në₅. ꞌI₁jan₂ tsá₃ ꞌein₂ lé₂ le₃ꞌén₂ dsáu₁ dsa₂, jŋiaꞌ₅₄ liaꞌ₂ jan₂ Diú₄ bá₄.”
8 La₁ ma₂ŋi₅ bá₄ Jesús dsɨ₂juɨ₅ a₂dsɨ₂jiog₅ dsɨ́₅ dsa₂ ꞌéi₂ tiáinꞌ₅, jaun₂ ca₂juáꞌ₂:
―¿ꞌE₂ lë₃ dsɨ₂jiog₅ ꞌauꞌ₂ ꞌniaꞌ₂ le₂në₅?
9 ¿ꞌE₂ a₂quian₅ guë́₄ ta₁, a₂juɨg₅₄ jniá₂ dsa₂ ꞌlianꞌ₂ në₅: “Ma₂rë₂ꞌén₄ dsáuꞌ₂”, o₃ a₂juɨg₅₄ ꞌe₂ jniá₂: “Nau₂ guanꞌ₂ ŋɨ₄ quion₂ tsɨ₁jein₁ quiángꞌ₂?”
10 La₁, ia₁jaun₂ le₃ŋiꞌ₅₄ ꞌniaꞌ₂ a₂ꞌio₅ bí₂ ꞌéiꞌ₃ Jaun₅* dsa₂ mɨ₂güɨ́g₃ ne₄ guaꞌ₅₄ ꞌuë₃ a₂lé₂ le₃ꞌéin₂ dsáu₁ dsa₂ ―jaun₂ ca₂tsɨ́ꞌ₃ dsa₂ ꞌlianꞌ₂ ꞌéi₂:
11 ―ꞌNe₂ juɨ́g₂ jniá₂, nau₂ quion₂ tsɨ₁jein₁ quiángꞌ₂, guanꞌ₂.
12 Jaun₂ ca₂nau₂ ꞌéi₂, ca₂cáun₃ tsɨ₁jein₁ quióꞌ₅, të₃ jág₅ dsa₂. Jaun₂ ca₂i₃góꞌ₃ dsɨ́₅ ca₂le₃jɨ́in₃, qui₂jme₂juɨinꞌ₂ Diú₄, tsɨ́ꞌ₅ rɨinꞌ₅₄:
―ꞌI₁co₂ráun₂ tsá₃ ꞌein₂ ma₂jág₃ jniog₄ le₂në₅.
Ca₂të́ꞌ₃ Jesús Leví
13 Conꞌ₂ siáꞌ₂ táng₃ ca₂ŋó₃ Jesús cheiꞌ₅₄ jmɨ₁ŋíꞌ₄. Jaun₂ dsi₃lén₂ dsa₂ juɨn₅ ca₂ŋɨiꞌ₂. Jaun₂ qui₂ca₂jme₃tag₅ Jesús jág₁ dse₃.
14 Jme₁ca₂ŋɨi₅ ja₁jaun₂, ca₂jɨ́in₂ Levía ja₁ŋiꞌ₅₄ Alfeo, guá₅ ꞌéi₂ gue₂₃ ꞌliaꞌ₅₄ a₂ca₂tɨ́n₂ dsɨ₂tan₅₄ romano. Jaun₂ ca₂juáꞌ₂ Jesús:
―Jme₁quiongꞌ₅₄ jniá₂.
Jaun₂ ca₂nau₂ ꞌéi₂, ca₂ŋó₃ quiongꞌ₅₄.
15 Jme₁ma₂ꞌen₅₄ Jesús guë́ꞌ₅ ja₁quióꞌ₄ Leví; ja₁jaun₂ jme₁le₁ŋɨꞌ₂ juɨn₅ dsa₂ i₂cán₂ ꞌliaꞌ₅₄ quián₅ dsɨ₂tan₅₄ ján₃, quianꞌ₅₄ dsa₂ siánꞌ₂ “i₂le₁cánꞌ₄ dso₄” në́₃, tiáinꞌ₅ co₂lë₅ guë́ꞌ₅ quianꞌ₅₄ Jesús quianꞌ₅₄ dsa₂ quiáin₅, ia₁ i₂juɨn₅ lɨn₃ i₂le₂ꞌéi₂ ma₂quiainꞌ₅₄ ŋɨ₂₃.
San Marcos 2:15-28
16 Jaun₂ jme₁ca₂jág₃ të₅juáꞌ₅ quián₅ dsa₂ fariseos* a₂guë́ꞌ₅ Jesús co₂lë₅ quianꞌ₅₄ dsa₂ le₂ꞌéi₂, jaun₂ ca₂tsɨ́ꞌ₃ dsa₂ quián₅ Jesús:
―¿ꞌA₂ bá₄ liaꞌ₂ guë́ꞌ₅ të₅ quiánꞌ₂ ꞌniaꞌ₂ quianꞌ₅₄ dsa₂ ꞌlɨnꞌ₅₄ i₂le₁cánꞌ₄ dso₄, quianꞌ₅₄ i₂cán₂ ꞌliaꞌ₅₄ quián₅ dsɨ₂tan₅₄ në́₃?
17 Jaun₂ jme₁ca₂nág₂ Jesús jág₁ në₅, jaun₂ ca₂ŋag₃:
―Tsá₃ të₅mɨ́₅ ꞌnióꞌ₅ quióꞌ₅ dsa₂ dsen₃ i₂tsá₃ le₁dsoꞌ₅₄, jŋiaꞌ₅₄ liaꞌ₂ dsa₂ i₂le₁dsoꞌ₅₄ bá₄ ꞌnióꞌ₅ të₅mɨ́₅ quióꞌ₅. Ia₁ tsá₃ ta₁ jaun₂ guio₃ jniá₂ a₂të́₄ dsa₂ dsen₃, a₂të́₄ dsa₂ i₂qui₂le₁cánꞌ₄ dso₄ bá₄ jniá₂ guio₃.
Ca₂ŋɨ́ꞌ₃ dsa₂ Jesús juɨ₁liaꞌ₂ jág₁ a₂jme₂ꞌɨn₅₄ dsa₂
18 Co₂ráun₂ dsa₂ i₂jme₁i₂nio₄ quianꞌ₅₄ Juan₅₄, quianꞌ₅₄ dsa₂ i₂tén₅ le₃quióꞌ₅ dsa₂ fariseos* në́₃, jme₁jme₂ꞌɨin₅₄. Jaun₂ dsi₃lén₂ i₂lɨn₅₄ ca₂ŋɨ́iꞌ₃ Jesús:
―¿ꞌE₂ ꞌuɨg₅₄ jme₂ꞌɨn₅₄ dsa₂ i₂i₂nio₄ quianꞌ₅₄ Juan₅₄, dsa₂ quián₅ fariseos në́₃, tonꞌ₂ tsá₃ jme₂ꞌɨn₅₄ guëꞌ₂ dsa₂ quiánꞌ₂ ꞌne₂?
19 Jaun₂ ca₂ŋag₃ Jesús:
―¿Lé₂ le₃jme₃ꞌɨn₅₄ juɨ₁liaꞌ₂ dsa₂ i₂té₄ ja₁niog₅ jmɨg₄ ja₁jenꞌ₂ gu₂ dsa₂, të₁liaꞌ₂ quiongꞌ₅₄ dsa₂ ŋeꞌ₂ i₂jénꞌ₂ gu₂? Ma₁ tsá₃ le₂jaun₂ jmo₅ dsa₂, të₁liaꞌ₂ quiongꞌ₅₄ ꞌéi₂.
20 La₁ jiá₃ caun₂ jmɨg₄ a₂jŋiaꞌ₃ dsa₂ i₂jénꞌ₂ gu₂ ꞌéi₂. Jaun₂ guë́₄ lé₂ le₃jme₃ꞌɨin₅₄.
21 ꞌMa₁ tsá₃ jmo₅ dsa₂ juaꞌ₅₄ a₂tióng₅ quianꞌ₅₄ ꞌnau₅₄ ꞌmɨꞌ₂ ꞌmɨ́₂ tsɨ₁ꞌmɨꞌ₂ guiꞌ₅₄, ia₁ dsáuꞌ₅ tsɨ₁ꞌmɨꞌ₂ ꞌmɨ́₂ jë₁ma₂jŋɨ₂. Jaun₂ juëꞌ₂ guë́₄ jë₁gag₂ lë́₂ tsɨ₁ꞌmɨꞌ₂ guiꞌ₅₄.
22 On₃ guë́₄ jmo₅ dsa₂ juaꞌ₅₄ a₂tiaꞌ₂ vino ꞌmɨ́₂ ꞌŋióꞌ₃ nɨ₁lau₂* guiꞌ₅₄. Ia₁ guéi₃ nɨ₁lau₂ guiꞌ₅₄ quianꞌ₅₄ dsióꞌ₁ vino ꞌmɨ́₂. Dsɨ₂ꞌén₂ bá₄ vino, liaꞌ₂ nɨ₁lau₂ në́₃. Jaun₂ ꞌŋióꞌ₃ nɨ₁lau₂ ꞌmɨ́₂ bá₄ ꞌnióꞌ₅ tiaꞌ₃ dsa₂ vino ꞌmɨ́₂ ia₁jaun₂ tsá₃ dsɨ₃ꞌén₂.
Ca₂gág₃ dsa₂ quián₅ Jesús mɨ́ꞌ₂ trigo jmɨg₄ sa₅₄
23 Caun₂ jmɨg₄ sa₅₄* ca₂ŋɨ₅ Jesús quiainꞌ₅₄ dsa₂ quiáin₅ caun₂ ja₁nau₂ ja₁jnia₄ trigo. Dsa₂ i₂jme₁quiainꞌ₅₄ në́₃ ca₂jme₃lióg₃ qui₂ca₂gág₃ mɨ́ꞌ₂ trigo jme₁ca₂ŋɨi₅ ja₁jaun₂.
24 Jaun₂ në́₃, ca₂juáꞌ₂ dsa₂ fariseos*:
―¿ꞌE₂ lë₃ jmo₅ dsa₂ i₂quiangꞌ₅₄ ta₁ a₂tsá₃ ꞌi₄ ꞌéiꞌ₃ jmo₃ jmɨg₄ sa₅₄?
25 Jaun₂ ca₂ŋag₃ Jesús:
―¿Tsa₁ ma₂ꞌíꞌ₂ ꞌniaꞌ₂ ꞌi₁cónꞌ₂ a₂ca₂jmo₃ David ma₂lɨ́gꞌ₂ quianꞌ₅₄ rɨinꞌ₅₄ liaꞌ₂ conꞌ₂ jme₁ca₂rë₃ꞌɨ́n₂ quióꞌ₅, a₂ca₂lë₃ i₁cónꞌ₅?b
26 Ca₂ꞌí₃ David dsi₂néi₂ quióꞌ₅ Diú₄, liaꞌ₂ conꞌ₂ jme₁lɨ́n₄ Abiatar juɨg₅₄ jme₂dsa₂. Ca₂guë́ꞌ₃ i₁ŋíꞌ₄ jŋió₅* a₂ꞌi₄ ꞌéiꞌ₃ a₂guë́ꞌ₅ jmáꞌ₃ jme₂dsa₂. Jaun₂ ca₂cuë́ꞌ₃ dsa₂ i₂jme₁quiainꞌ₅₄ në́₃.
27 Ján₃ bá₄ ca₂juáꞌ₂ Jesús ca₂tsɨ́ꞌ₃ dsa₂: