Ca₂jme₃ꞌlión₂ Jesús jan₂ dsa₂ ꞌlianꞌ₂
9
Jaun₂ ca₂ꞌí₃ Jesús ꞌŋióꞌ₃ tsɨ₁mu₅, ca₂ŋɨ́i₃ le₃ꞌŋoꞌ₅₄ jmɨ₁ŋíꞌ₄, jaun₂ ca₂dsiáinꞌ₃ juɨg₂ ja₁jme₁guá₄.
2 Jaun₂ ca₂o₃jŋia₃ dsa₂ jan₂ dsa₂ ꞌlianꞌ₂, dsɨ́in₂ ne₄ tsɨ₁jein₁. Jme₁ca₂jág₃ Jesús a₂ꞌén₂ dsa₂ ꞌéi₂ ꞌŋio₅ lɨn₃, ca₂tsɨ́ꞌ₃ dsa₂ dsoꞌ₅₄:
―Jmo₄ líanꞌ₂ ꞌauꞌ₂, jón₃; ma₂rë₂ꞌén₄ bá₄ dsáuꞌ₂.
3 Jaun₂ ca₂i₃jiog₅ dsɨ́₅ i₂lɨn₅₄ të₅juáꞌ₅: “A₂ꞌɨn₅ ꞌlɨgꞌ₅₄ Diú₄ bá₄ i₂në₅ a₂juáꞌ₂ le₂në₅.”
4 La₁ i₂ŋi₅ rë₂ bá₄ Jesús a₂dsɨ₂jiog₅ dsɨ́₅ dsa₂ ꞌéi₂, jaun₂ ca₂juáꞌ₂:
―¿ꞌE₂ lë₃ dsɨ₂jiog₅ ꞌauꞌ₂ ꞌniaꞌ₂ ꞌlɨgꞌ₅₄ le₂në₅?
5 ¿Na₂ a₂ꞌua₁ guë́₄ ta₁ juaꞌ₅₄ a₂jme₁juɨg₅₄ jniá₂ dsa₂ la₂: “Ma₂rë₂ꞌén₄ bá₄ dsáuꞌ₂”, o₃ a₂jme₁juɨg₅₄ ꞌe₂ jniá₂: “Nau₂, ŋɨ₄?”
6 Dse₃ jaun₂. La₂ jmo₅₄ jniá₂ jaun₂ le₃ŋiꞌ₅₄ ꞌniaꞌ₂ a₂ꞌio₅ ꞌéiꞌ₃ Jaun₅* dsa₂ mɨ₂güɨ́g₃ ne₄ guaꞌ₅₄ ꞌuë₃ a₂qui₃ꞌéin₂ dsáu₁ dsa₂.
Jaun₂ guë́₄ ca₂juáꞌ₂ ca₂tsɨ́ꞌ₃ dsa₂ ꞌlianꞌ₂:
―Nau₂, quion₂ tsɨ₁jein₁ quiángꞌ₂, guanꞌ₂ ja₁quiángꞌ₂.
7 Jaun₂ ca₂nau₂ bá₄ dsa₂ ꞌéi₂, ca₂ŋáiꞌ₃ ja₁quióꞌ₄.
8 Jme₁ca₂jág₃ dsa₂ a₂ca₂lë₃ jaun₂, ca₂i₃góꞌ₃ dsɨ́₅, jaun₂ ca₂jme₃juɨinꞌ₂ Diú₄ ne₄ ꞌuɨg₅₄ ia₁ a₂ma₂cuë₃ bí₂ jaun₂ ma₂cuë́ꞌ₃ jan₂ dsa₂ mɨ₂güɨ́g₃.
Ca₂të́ꞌ₃ Jesús Mateo
9 Ca₂o₃ꞌɨ́n₃ bá₄ Jesús ja₁jme₁ꞌein₅₄ jaun₂. Ja₁ŋó₄ jaun₂, ca₂jɨ́in₂ jan₂ dsa₂ i₂chen₂ Mateo, guá₅ caun₂ dsi₂néi₂ cán₂ ꞌliaꞌ₅₄ o₄quióꞌ₄ dsɨ₂tan₅₄. Jaun₂ ca₂juáꞌ₂ Jesús ca₂tsɨ́ꞌ₃ ꞌéi₂:
―ꞌÉin₃ jniá₂.
Jaun₂ ca₂nau₂ bá₄ Të₅₄, ca₂jme₃quiongꞌ₅₄.
10 Ca₂lë₃ jme₁ma₂ꞌen₅₄ Jesús guë́ꞌ₅ dsi₂néi₂ quióꞌ₅ Të₅₄, ca₂dsi₃lén₂ juɨn₅ guë́₄ dsa₂ i₂cán₂ cu₄ rɨinꞌ₅₄, dsa₂ “i₂le₁cánꞌ₄ dso₄” siánꞌ₂ guë́₄ në́₃, ca₂i₃toinꞌ₅₄ i₁guëꞌ₂ quiainꞌ₅₄ Jesús, quiainꞌ₅₄ dsa₂ i₂ma₂quiainꞌ₅₄ në́₃.
11 Dsa₂ fariseos* në́₃, jme₁ca₂jág₃ a₂në₅, jaun₂ ca₂ŋɨ́iꞌ₃ dsa₂ quián₅ Jesús:
―¿ꞌA₂ liaꞌ₂ guë́ꞌ₅ të₅ quiánꞌ₂ ꞌniaꞌ₂ co₂lë₅ quianꞌ₅₄ dsa₂ i₂cán₂ ꞌliaꞌ₅₄ quián₅ dsɨ₂tan₅₄, dsa₂ i₂le₁cánꞌ₄ dso₄ në́₃?
12 Ca₂nág₂ Jesús jág₁ jaun₂, jaun₂ ca₂juáꞌ₂:
―On₃juaꞌ₅₄ dsa₂ i₂qui₂le₁ꞌág₄ dse₃ dsɨ́₅ i₂ꞌnióꞌ₅ të₅mɨ́₅ quióꞌ₅; të₂le₃ ja₁con₂ dsa₂ i₂le₁dsoꞌ₅₄ bá₄ ꞌnióꞌ₅ quióꞌ₅.
13 O₂nóꞌ₅ ꞌniaꞌ₂ o₂jme₁tɨn₅ ꞌe₂ jein₅ jág₁ la₂ tioꞌ₅₄ ne₄ Si₂: “A₂ꞌnio₃ jniá₂ dsiáꞌ₁ ꞌniaꞌ₂ ŋéi₂ ꞌauꞌ₂ dsa₂ mɨ₂güɨ́g₃ rɨ́ngꞌ₂, on₃juaꞌ₅₄ rëꞌ₂ a₂jŋiaꞌ₅₄ qui₁jenꞌ₄ ꞌniaꞌ₂ ꞌe₂ qui₁jenꞌ₄ ne₃.”a Ia₁ tsá₃ ta₁ jaun₂ guio₃ jniá₂ juaꞌ₅₄ a₂të́₄ dsa₂ dsen₃; a₂të́₄ dsa₂ i₂le₁cánꞌ₄ dso₄ bá₄ jniá₂ guio₃.
Ca₂ŋɨ́ꞌ₃ dsa₂ Jesús juɨ₁liaꞌ₂ jág₁ a₂jme₂ꞌɨn₅₄ dsa₂
14 Jaun₂ ca₂dsi₃lén₂ dsa₂ i₂jme₁i₂nio₄ quianꞌ₅₄ Juan₅₄ i₂chon₅ dsa₂ jmɨg₂ ca₂jme₃quiáin₃ ne₄ Jesús, jaun₂ ca₂ŋag₃:
―¿ꞌA₂ liaꞌ₂ jme₂ꞌɨn₅₄ bá₄ dsa₂ fariseos*, le₂jaun₂ guëꞌ₂ jniaꞌ₅₄ në́₃, la₁ dsa₂ i₂quianꞌ₅₄ ꞌne₂ guëꞌ₂ tsá₃ jme₂ꞌɨin₅₄?
15 Jaun₂ ca₂ŋag₃ Jesús:
―¿Lé₂ le₃tónꞌ₃ ꞌliaꞌ₂ dsɨ́₅ juɨ₁liaꞌ₂ dsa₂ i₂té₁ ja₁niog₅ jmɨg₄ ja₁jenꞌ₂ gu₂ dsa₂, chi₂juaꞌ₂ jaun₂ bá₄ guá₅ guëꞌ₂ dsa₂ ŋeꞌ₂ i₂jenꞌ₂ gu₂? Já₅ jmɨg₄ jë₁tsá₃ ma₃dsa₂ i₂jenꞌ₂ gu₂ ꞌéi₂ chan₂ lé₂; jaun₂ guë́₄ tóinꞌ₃ jme₃ꞌɨin₅₄.
16 ꞌMa₁ tsá₃ ꞌein₂ tɨn₂ tióng₅ tsɨ₁ꞌmɨꞌ₂ guiꞌ₅₄ quianꞌ₅₄ ꞌnau₅₄ tsɨ₁ꞌmɨꞌ₂ ꞌmɨ́₂. Ia₁ dsánꞌ₅ tsɨ₁ꞌmɨꞌ₂ ꞌmɨ́₂, jaun₂ juëꞌ₂ guë́₄ ja₁gag₂ lë́₂.
17 Ján₃ bá₄ le₂jaun₂ tsá₃ tiaꞌ₂ dsa₂ vino ꞌmɨ́₂ ꞌŋióꞌ₃ nɨ₁lau₂* guiꞌ₅₄, ia₁ neꞌ₂. Në₅ bá₄ téin₃ vino, tonꞌ₂ dsɨ₃ꞌén₂ nɨ₁lau₂ në́₃ në₁juaꞌ₂ ca₂jmo₃ dsa₂ le₂jaun₂. Jaun₂ lë₃, ꞌŋióꞌ₃ lau₂ ꞌmɨ́₂ bá₄ ꞌnióꞌ₅ tiaꞌ₃ dsa₂ vino ꞌmɨ́₂, ia₁jaun₂ le₃tɨn₃ bá₄ lé₂ ꞌí₁.
Ja₁mɨ́g₄ Jairo, quianꞌ₅₄ ꞌio₅₄ i₂ca₂nɨ́ꞌ₃ tsɨnꞌ₅₄ Jesús
18 Të₃ ꞌen₅₄ Jesús dsia₂₃ jág₁, jme₁ca₂dsióg₃ jan₂ i₂niog₅ gu₂ guáꞌ₅ sinagoga*. Ca₂chi₃jné₃ ne₄ Jesús, jaun₂ ca₂juáꞌ₂:
―Liaꞌ₂ ca₂jon₃b jan₂ chiꞌ₂ dsa₂ mɨ́₂ quiáng₃. La₁ në₁juaꞌ₂ gogꞌ₅₄ ꞌne₂ quianꞌ₅₄ jniá₂ o₁quiogꞌ₂ gogꞌ₂ ne₄ quióꞌ₅, le₃chain₂ bá₄ táng₃.
19 Jaun₂ ca₂nau₂ Jesús, jaun₂ ca₂ŋó₃ quiainꞌ₅₄ dsa₂ ꞌéi₂, liaꞌ₂ jma₃quiainꞌ₅₄ dsa₂ i₂ma₂ja₂lén₂ quiongꞌ₅₄.
20 Të₃jë₄ jaun₂, ŋó₃ jan₂ dsa₂ mɨ́₂ i₂dsoꞌ₅₄ ma₂guia₃-tɨ́n₂ ŋi₂ a₂tɨin₂. Ca₂jme₃quiáin₃ të₂le₃ chi₁coꞌ₅₄ quióꞌ₅ Jesús, jaun₂ ca₂nɨ́iꞌ₂ cheiꞌ₅₄ tsɨnꞌ₅₄ ꞌéi₂.
21 Ia₁ lɨ́in₂: “Tsá₃ nag₅₄ në₁juaꞌ₂ jŋiaꞌ₅₄ nɨ́gꞌ₄ ca₂juɨg₄ tsɨnꞌ₅₄, jŋia₃ quió₃.”
22 Jaun₂ ca₂jénꞌ₃ Jesús, ca₂jɨ́in₂ ꞌio₅₄, jaun₂ ca₂juáꞌ₂:
―Jmo₄ liánꞌ₂ ꞌauꞌ₂, jón₃. Ma₂ꞌlóngꞌ₂ bá₄, ia₁ ꞌéngꞌ₂.
Dsɨ₂juɨ₅ le₂jaun₂ bá₄ ca₂jŋia₃ co₂ŋeiꞌ₅₄ quióꞌ₅.
23 Jme₁ca₂dsióg₃ Jesús ja₁quióꞌ₄ dsa₂ juɨg₅₄ sinagoga ꞌéi₂, jaun₂ ca₂jág₃ ma₂tionꞌ₅₄ dsa₂ i₂jmo₅ son₅₄, ma₂tionꞌ₅₄ dsa₂ juɨn₅ go₂ꞌi₃ në́₃, quɨꞌ₂-ꞌo₂₃.
24 Jaun₂ ca₂juáꞌ₂:
―ꞌUɨ́nꞌ₂ ꞌniaꞌ₂ ja₁lá₃; tsá₃ rë₂jon₅₄ i₂bëꞌ₅₄ në₅. Jŋiaꞌ₅₄ liaꞌ₂ a₂rë₂güɨ́in₃ bá₄.
La₁ jŋiaꞌ₅₄ ca₂ŋág₂ bá₄ dsa₂.
25 Jme₁ma₂ꞌuɨnꞌ₂ dsa₂, jaun₂ ca₂ꞌí₃ Jesús dsi₂néi₂, ca₂jŋaꞌ₃ mɨ₂gu₂ i₂bëꞌ₅₄, jaun₂ ca₂nau₂ bá₄ ꞌéi₂.
26 Ca₂le₂con₂ juɨg₂ tioꞌ₅₄ ꞌuë₃ jaun₂, ca₂i₃ꞌág₃ jág₁ a₂ca₂lë₃ jaun₂.
Ca₂jme₃ꞌlión₂ Jesús on₃ dsa₂ ten₄
27 Jme₁o₂ꞌɨ́n₃ Jesús ja₁jaun₂, ca₂ꞌein₃ on₃ dsa₂ ten₄, ja₂léin₂ të́₂ tiá₂:
―¡Dsia₄ ŋéi₂ ꞌauꞌ₂ jniaꞌ₅₄, ꞌne₂ tsɨ₁jon₂ David!
28 Jme₁ca₂ꞌí₃ Jesús dsi₂néi₂, ca₂jme₃quián₃ dsa₂ ten₄ ꞌéi₂ cau₅ quióꞌ₅. Jaun₂ ca₂ŋag₃ Jesús:
―¿ꞌÉnꞌ₂ ꞌniaꞌ₂ a₂lé₂ le₃jme₁ꞌlio₅₄ jniá₂?
Jaun₂ ca₂ŋag₃:
―ꞌÉin₂ bá₄ jniaꞌ₅₄, Te₁guiꞌ₅₄.
29 Jaun₂ ca₂nɨ́ꞌ₃ Jesús gu₂ jme₁ne₁₂ jaun₂ ca₂juáꞌ₂:
―Juɨ₁le₅₄ bá₄ conꞌ₂ lë́₅ ꞌénꞌ₂ ꞌniaꞌ₂.
30 Jaun₂ ca₂lág₃ bá₄ mɨ₂ne₄ dsa₂ ꞌéi₂. Jaun₂ ca₂jmo₃ Jesús ꞌéiꞌ₃ ca₂juáꞌ₂:
―Të₃ŋiꞌ₅₄ ꞌniaꞌ₂ jnag₅₄ tsá₃ ꞌein₂ juɨ₁le₂ŋi₅ a₂në₅.
31 La₁ ꞌéi₂ në́₃, jme₁ca₂ꞌuɨin₂ jaun₂, ca₂dsia₃ ca₂le₂con₂ ja₁tén₄ ꞌuë₃ jaun₂ ꞌe₂ a₂ca₂jmo₃ Jesús.
Ca₂jme₃ꞌlión₂ Jesús jan₂ dsa₂ con₄
32 Jme₁ma₂ꞌuɨn₂ dsa₂ i₂jme₁ten₄ ꞌéi₂, ca₂o₃lén₂ i₂siánꞌ₂ táng₃ jŋiai₂₃ jan₂ dsa₂ con₄ i₂ꞌen₅₄ jme₂dsí₂ je₂naꞌ₅₄.
33 Dsɨ₂juɨ₅ jme₁ca₂dsen₅ Jesús je₂naꞌ₅₄, jaun₂ ca₂jme₃lióg₃ dsa₂ con₄ ꞌéi₂ ca₂dsia₃ jág₁. Dsa₂ juɨn₅ i₂jme₁tionꞌ₅₄ ca₂të́₂ ne₅₄, ca₂i₃góꞌ₃ dsɨ́₅, jaun₂ ca₂dsia₃:
―Ca₂le₂con₂ ꞌuë₃ Israel la₂, tsá₃ ꞌein₂ ma₂ca₂jág₃ a₂le₂në₅.
34 La₁ dsa₂ fariseos* guëꞌ₂ në́₃, ca₂juáꞌ₂:
―Të₂le₃ quianꞌ₅₄ juɨ₅bí₂ quióꞌ₅ ꞌŋiog₅ juɨg₅₄ je₂naꞌ₅₄ bá₄, jmo₅ i₂në₅ ꞌuɨ́inꞌ₂ je₂naꞌ₅₄.
Dsia₅ Jesús ŋéi₂ dsɨ́₅ dsa₂
35 Ca₂ŋɨ₃ Jesús ca₂le₂con₂ juɨg₂ caꞌ₅₄, ca₂le₂con₂ juɨg₂ píꞌ₁ në́₃, jme₂tɨin₂₃ dsa₂ dsi₂néi₂ guáꞌ₅ sinagogas*. Jme₁ꞌë́₂ jág₁ dse₃ juɨ₁liaꞌ₂ ja₁gon₂ Diú₄. Jme₁jme₂ꞌlióin₂ dsa₂ ca₂le₃jë́₃ ne₅₄ dso₄, quianꞌ₅₄ ca₂le₃jë́₃ jmɨ₁uɨg₅ a₂jme₁le₁quian₅ dsa₂.
36 Jme₁ca₂jɨ́in₂ dsa₂, ca₂táꞌ₂ ŋéi₂ dsɨ́₅, ia₁ jme₁chain₂ o₂i₁ dsɨ₅ ca₂liaꞌ₂ ma₂ja₂ꞌúꞌ₃ dsɨ́₅ chain₂, në₂jag₄ bá₄ jáꞌ₂ chaꞌ₂ i₂tsá₃ chan₂ jmo₃ ꞌí₁.
37 Jaun₂ në́₃ ca₂tsɨ́ꞌ₃ dsa₂ i₂jme₁quiainꞌ₅₄: