Dsa₂ mɨ́₂ i₂jme₁i₂nio₄ jme₂ꞌon₅₄ Jesús
8
Cang₂ jaun₂, ca₂i₁ŋɨ₂ Jesús le₂tan₅₄ juɨg₂ caꞌ₅₄, le₂tan₅₄ juɨg₂ píꞌ₁ në́₃, qui₂i₁jme₁tɨin₂₃ dsa₂ jág₁ dse₃ juɨ₁liaꞌ₂ ja₁gon₂ Diú₄. Jme₁quiainꞌ₅₄ bá₄ chiꞌ₂ dsɨ₂guia₃-tɨ́n₂.
San Lucas 8:1-21
2 Ján₃ guëꞌ₂ jme₁quiainꞌ₅₄ dsa₂ mɨ́₂ i₂ma₂ca₂ꞌuɨ́inꞌ₂ jme₂dsí₂ ꞌlɨnꞌ₅₄ quióꞌ₅, i₂ma₂ca₂jme₃ꞌlióin₂ dso₄ a₂jme₁lɨ́in₄ në́₃. Jɨn₄ ꞌéi₂ jme₁ŋɨ₅ jan₂ i₂chen₂ María i₂të́ꞌ₂ Magdalena,a i₂ma₂ꞌuɨ́nꞌ₂ Jesús guion₃ je₂naꞌ₅₄ të₂dsɨ́₅;
3 ján₃ bá₄ jme₁ŋɨ₅ i₂chen₂ Juana i₂lɨ́n₅ dsa₂ mɨ́₂ quián₅ Cuza, dsa₂ i₂niog₅ ne₄ ꞌe₂ a₂cha₂ quióꞌ₅ Herodes; ján₃ bá₄ jme₁ŋɨ₅ i₂chen₂ Susana; i₂juɨn₅ bá₄ i₂siánꞌ₂ guë́₄ i₂jme₁i₂nio₄ quiongꞌ₅₄, jme₁jme₂ꞌo₅₄ quianꞌ₅₄ ꞌe₂ a₂cha₂ quióꞌ₅.
Jág₁ jángꞌ₅ léi₄ juɨ₁liaꞌ₂ dsa₂ i₂séi₂ mɨ́g₂ jon₂
4 ꞌLióng₂ juɨg₂ ja₁jme₁tónꞌ₅ dsa₂ juɨ₅ dsɨ₂léin₂ dsɨ₂jɨin₅₄ Jesús. Jë₁ma₂le₁ŋɨꞌ₂ dsa₂ juɨin₅ në́₃, jaun₂ ca₂dsia₃ jág₁ jángꞌ₅ léi₄ la₂, ca₂juáꞌ₂:
5 ―Jan₂ dsa₂ ca₂ŋe₄ ja₁nau₂ ca₂i₁séi₄ mɨ́g₂ jon₂. Jme₁ma₂ꞌein₅₄ séi₂ në́₃, a₂lɨn₅₄ mɨ́g₂ i₂gaꞌ₅₄ le₂ꞌi₄ juɨ₅ qui₂ca₂tsóꞌ₃ dsa₂; i₁tan₅ guëꞌ₂ në́₃ ca₂guë́ꞌ₃ ca₂dsio₄.
6 Ca₂dsio₄ guëꞌ₂ në́₃ ca₂i₃toꞌ₅₄ jë₄ nɨ₁cang₁; jme₁ca₂ꞌia₂, ca₂rë₃quéin₃ bá₄ ia₁ tsá₃ guaꞌ₅₄ cha₂ juaꞌ₅₄ a₂güɨ́gꞌ₂.
7 Ca₂dsio₄ guëꞌ₂ ca₂séiꞌ₂ jë₄ nɨ₁taun₅. La₁ nɨ₁taun₅ bá₄ tiá₂ ca₂jo₃ jme₁ca₂ꞌia₂.
8 La₁ ca₂dsio₄ guëꞌ₂ në́₃ ca₂tɨ́n₂ ja₁dse₃ guaꞌ₅₄; a₂jaun₂ ca₂i₃cón₃, ca₂rau₂ dse₃ lɨn₃, caun₂ ꞌŋiá₂-láu₂ mɨ́g₂ liaꞌ₂ ca₂mɨ́g₂ jon₂ a₂ca₂séi₂.
Jme₁ma₂lë₅ jme₂tag₂₃ le₂në₅, ca₂juáꞌ₂ tiá₂:
―Chi₂juaꞌ₂ ꞌein₂ ꞌniaꞌ₂ dsi₅₄ rë₂gua₄, nei₂ ꞌniaꞌ₂ rë₂.
Ta₁ quíꞌ₅ jág₁ a₂jángꞌ₅ léi₄
9 Jaun₂ ca₂ŋag₃ chiꞌ₂ dsɨ₂guia₃-tɨ́n₂ ꞌe₂ bá₄ jein₅ jág₁ a₂cuë₂₃ jaun₂. Jaun₂ ca₂juáꞌ₂ Jesús:
10 ―Diú₄ bá₄ jmo₅ a₂rë₂ŋɨ́ꞌ₂ ꞌauꞌ₂ ꞌniaꞌ₂ jág₁ a₂rë₂ꞌma₄ quióꞌ₅, ꞌa₂ liaꞌ₂ lë́₅ ja₁goin₂. La₁ dsa₂ siánꞌ₂ në́₃, juɨ́g₂ jniá₂ të₂le₃ quianꞌ₅₄ jág₁ jángꞌ₅ léi₄, ia₁jaun₂:
I₂në₂jág₃, la₁ tsá₃ le₃líꞌ₄ ꞌe₂ në₂jág₃;
i₂në₂néi₂ në́₃, la₁ tsá₃ le₃líꞌ₄ ꞌe₂ në₂néi₂,
on₃ guëꞌ₂ le₃ŋɨ́iꞌ₂.b
Juáꞌ₂ Jesús ꞌe₂ jág₁ dsau₅ jein₅ jág₁ juɨ₁liaꞌ₂ dsa₂ i₂séi₂ mɨ́g₂ jon₂
11 ꞌA₂la₂ bá₄ jein₅ jág₁ a₂jángꞌ₅ léi₄: A₂lë́₅ co₂ꞌnióꞌ₄ mɨ́g₂ jon₂, jág₁ dse₃ quióꞌ₅ bá₄ Diú₄ jaun₂.
12 Juɨ₁liaꞌ₂ ca₂dsio₄ mɨ́g₂ jon₂ a₂i₃gaꞌ₅₄ le₂ꞌi₄ juɨ₅ guëꞌ₂ në́₃, le₂jaun₂ lɨ́n₅ juɨ₁liaꞌ₂ ca₂dsion₄ dsa₂ i₂nag₅ jág₁ dse₃; la₁ i₂së₃dsen₃ guëꞌ₂ në́₃, ja₂jŋiáꞌ₃ jág₁ dse₃ jme₁ma₂ꞌi₄ dsɨ́₅, ia₁jaun₂ tsá₃ ma₃le₃ꞌéin₂ juaꞌ₅₄ a₂lióin₂.
13 Co₂ꞌnióꞌ₄ mɨ́g₂ jon₂ a₂i₃toꞌ₅₄ jë₄ nɨ₁cang₁ guëꞌ₂ në́₃, co₂ꞌnióꞌ₄ lɨ́n₅ juɨ₁liaꞌ₂ dsa₂ i₂guen₅ ꞌŋio₂ dsɨ́₅ jág₁ dse₃ jë₁ma₂ca₂nág₂. La₁ cang₂ jaun₂ tsá₃ tiá₂ tióin₂; lɨ́in₅ në₂jag₄ bá₄ a₂tsá₃ jmú₄ cha₂ juɨ₅ jme₂dsí₂ quióꞌ₅. Co₂ꞌna₂ bá₄ rë₂ꞌéin₂, ia₁ jë₁ma₂ca₂i₃ŋɨ́i₂ ꞌe₂ caun₂ juɨ₅bí₂ a₂cáun₂ táu₂, dsɨ₂lein₅ táng₃ le₃caꞌ₃, tí₂ jág₁.
14 Co₂ꞌnióꞌ₄ jon₂ a₂ca₂séiꞌ₂ jë₄ nɨ₁taun₅ guëꞌ₂ në́₃, co₂ꞌnióꞌ₄ lɨ́n₅ juɨ₁liaꞌ₂ dsa₂ i₂nag₅ jág₁, la₁ të₂le₃ ne₄ juɨ₅ ja₁i₂léin₂ jaun₂, të₂ ca₂juɨg₄ bá₄ jme₂gain₂₃ dsɨ́₅ a₂jo₅ bí₂ a₂quian₅ o₂meꞌ₅₄ dsɨ₅, a₂ja₂ dsɨ́₅ le₃cha₂ cu₄ ꞌlióng₂, a₂ꞌnio₃ cuë́ꞌ₅ o₂ꞌŋió₃ o₂jŋia₃ dsɨ₅; i₂në₅ në́₃ lɨ́in₅ co₂ꞌnióꞌ₄ mɨ́g₂ a₂tsá₃ ma₃lé₂ rón₃.
15 La₁ ca₂dsio₄ mɨ́g₂ jon₂ a₂ca₂séi₂ ja₁dse₃ guaꞌ₅₄, co₂ꞌnióꞌ₄ lɨ́n₅ juɨ₁liaꞌ₂ dsa₂ i₂dse₃ dsɨ́₅ i₂caun₂ neꞌ₅₄, tsánꞌ₂ tiá₂ jág₁ a₂nag₂₃, caun₂ juɨnꞌ₂ bá₄ dsɨ́₅, ꞌlióng₂ a₂dse₃ rë₂jniá₂ a₂jmo₂₃ chain₂.
Jág₁ jángꞌ₅ léi₄ juɨ₁liaꞌ₂ nɨ₁tsɨ́₅ chi₁guíꞌ₂ si₂
16 ꞌꞌI₁jan₂ dsa₂ tsá₃ guíꞌ₅ si₂ caun₂ nɨ₁tsɨ́₅, juaꞌ₅₄ a₂jlë́₂ o₃ a₂chiꞌ₂ néꞌ₃ tsɨ₁cama ꞌe₂. A₂ꞌag₅ gueiꞌ₅₄ bá₄ dsa₂ si₂, ia₁jaun₂ jniá₂ quióꞌ₅ i₂dsɨ₂tonꞌ₅₄.
17 Ján₃ bá₄ le₂jaun₂, ꞌi₁caun₂ a₂rë₂ꞌma₄ jlë₅ cha₂ juaꞌ₅₄ a₂lɨ́n₂ dsa₂ a₂tsá₃ le₃jniá₂; tion₅₄ bá₄ rë₂jniá₂. Ján₃ guëꞌ₂ le₂jaun₂ ꞌi₁caun₂ jág₁ tsá₃ cha₂ juaꞌ₅₄ lɨ́n₂ dsa₂ a₂tsá₃ ꞌein₂ le₃ŋi₅: tion₅₄ bá₄ rë₂ŋi₅ dsa₂.
18 ꞌQuion₂ deꞌ₂ ꞌniaꞌ₂ ꞌí₁ rë₂ jaun₂, ꞌa₂ liaꞌ₂ lë́₅ nagꞌ₂, ia₁ juɨ₁liaꞌ₂ i₂ma₂ŋɨ́ꞌ₂, Diú₄ bá₄ jmo₃ a₂le₃ŋɨ́iꞌ₂ guë́₄. La₁ juɨ₁liaꞌ₂ i₂tsá₃ ꞌnio₃ le₃ŋɨ́ꞌ₂ guëꞌ₂ në́₃, ca₂të₂ a₂jme₁ma₂ŋɨ́iꞌ₂, lɨ́in₂, jŋiaꞌ₃.
Chiꞌ₂ rɨnꞌ₅₄ Jesús, quianꞌ₅₄ chog₅₄
19 Jaun₂ ca₂dsi₃lén₂ chiꞌ₂ rɨnꞌ₅₄ Jesús quianꞌ₅₄ chog₅₄, jme₁ꞌnio₃ jme₁ŋɨ́i₃ ca₂të₂ ja₁ꞌen₅₄ ꞌéi₂, la₁ tsá₃ lé₂, ia₁ juɨn₅ lɨn₃ dsa₂ tionꞌ₅₄.
20 Jaun₂ jan₂ dsa₂ siánꞌ₂ bá₄ ca₂ŋag₃ jág₁ ca₂juáꞌ₂:
―Chogꞌ₂ quianꞌ₅₄ chiꞌ₂ rɨ́ngꞌ₂ në₅ tióin₂ ca₁ꞌné₄, ꞌnio₃ jɨ́in₂ ꞌne₂.
21 Jaun₂ ca₂ŋag₃:
―Dsa₂ i₂nag₅ jág₁ quióꞌ₅ Diú₄, tonꞌ₂ jme₂ti₃, ꞌéi₂ bá₄ lɨ́n₅ cha₃, rɨ́ngꞌ₃ në́₃.
Ca₂jmo₃ Jesús ca₂ꞌág₂ tei₄ jmɨ₁ŋíꞌ₄, ca₂jŋiaꞌ₃ dsí₂ në́₃
22 Co₂ráun₂ ca₂ꞌí₃ Jesús caun₂ tsɨ₁mu₅, jaun₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅:
―Ma₃dsau₅₄ quióng₄ le₃ca₂taun₂.
Jaun₂ ca₂i₃léin₂ bá₄.
San Lucas 8:22-39
23 Të₁liaꞌ₂ tioinꞌ₅₄ ꞌain₂₃ jmɨ₁ŋíꞌ₄, la₁ ꞌéi₂ në́₃ ca₂güɨin₂ bá₄. Të₃jë₄ jaun₂ ca₂ꞌág₂ dsí₂ tiá₂ lɨn₃ ne₄ jmɨg₂. Ca₂rë₃lióg₃ i₃ꞌa₄ jmɨg₂ ꞌŋióꞌ₃ tsɨ₁mu₅, ca₂liaꞌ₂ ma₂lé₂ dsɨ₃gueinꞌ₅₄ bá₄, goꞌ₂ lɨn₃ tioinꞌ₅₄.
24 Jaun₂ ca₂i₁ŋei₂₃ Jesús, ca₂juáꞌ₂:
―¡Të₅! ¡Të₅! ¡Dsɨ₃ꞌéin₂ jniog₄!
Jaun₂ ca₂nau₂ bá₄ guëꞌ₂ Jesús ca₂të₂ ca₂jéin₂ dsí₂, a₂jnáꞌ₅ jmɨg₂ në́₃. Dsɨ₂juɨ₅ le₂jaun₂ bá₄ ca₂të₁tsɨꞌ₅₄ táng₃ tei₄.
25 Jaun₂ tsɨ́ꞌ₅ chiꞌ₂ dsɨ₂guia₃-tɨ́n₂:
―¿ꞌA₂ ŋó₅ a₂ꞌénꞌ₂ ꞌniaꞌ₂?
Ca₂liaꞌ₂ lë₁quian₅ juë́ꞌ₅ lɨn₃ bá₄ tioinꞌ₅₄ dsɨ₂góꞌ₃ dsɨ́₅, dsia₂₃ tsɨ́ꞌ₅ rɨinꞌ₅₄:
―¿ꞌEin₂ bá₄ lɨ́n₅ dsa₂ në₅, tɨin₂ jmo₃ ꞌéiꞌ₃ tsɨ́ꞌ₅ të₂ dsí₂, jmɨg₂ në́₃, neꞌ₅₄ a₂juáꞌ₂?
Dsa₂ chan₂ Gerasa i₂tionꞌ₅₄ jme₂dsí₂ ꞌlɨnꞌ₅₄
26 Jaun₂ guë́₄ ca₂dsi₃léin₂ ꞌuë₃ Gerasac a₂ron₅ le₃ꞌŋoꞌ₅₄ jmɨg₂ ja₁ron₅ ꞌuë₃ Galilea.
27 Jme₁ca₂o₂ꞌɨ́n₃ Jesús a₂të₁tsɨinꞌ₅₄ ꞌuë₃, jaun₂ ca₂jme₃quián₃ jan₂ dsa₂ juɨg₂ jaun₂ cau₅ quióꞌ₅. Dsa₂ ꞌéi₂ në́₃, lɨ́gꞌ₂ bá₄ qui₂ca₂jo₃ jme₂dsí₂ je₂naꞌ₅₄. Lɨ́gꞌ₂ bá₄ ŋɨ₂₃ tsá₃ ma₃tsɨnꞌ₅₄ quɨ́ꞌ₅, on₃ guëꞌ₂ ma₃juaꞌ₅₄ a₂guá₅ dsi₂néi₂; tau₂ ꞌŋio₅ quióꞌ₅ ꞌlag₄ bá₄ jme₁ma₂guá₅.
28 Jme₁ca₂jɨ́in₂ Jesús, jaun₂ ca₂guióꞌ₃ co₂mɨꞌ₅₄, ca₂chi₃jné₃ ne₄ ꞌéi₂, ca₂juáꞌ₂ tiá₂ lɨn₃:
―¿ꞌE₂ bá₄ lë₃ ŋeꞌ₃ i₃tiángꞌ₃ jë₄ quiánꞌ₂ jniá₂, ꞌne₂ Jesús Ja₁ŋiꞌ₅₄ Diú₄ i₂guá₅ gueiꞌ₅₄ lɨn₃? Mɨ₂₃ jniá₂ neꞌ₅₄, tsá₃ cuë₂ uɨg₅.
29 Ca₂juáꞌ₂ le₂në₅ ia₁ jme₁ma₂në₂jmo₃ Jesús ꞌéiꞌ₃ a₂o₃ꞌɨn₅ jme₂dsí₂ ꞌlɨnꞌ₅₄ quióꞌ₅. ꞌLióng₂ ráun₂ bá₄ le₂jŋiá₅ jme₁ma₂ca₂jŋauꞌ₃ i₂ꞌlɨnꞌ₅₄. Jaun₂ o₁jŋiaꞌ₅₄ ma₂qui₂ma₂ꞌnéi₂ dsa₂ mɨ₂gu₂ mɨ₂tag₅₄ quianꞌ₅₄ ŋí₁ cadenas ia₁jaun₂ lé₂ ꞌí₁, la₁ ca₂le₃jë́₃ bá₄ jme₁gág₅. Jme₁ꞌliogꞌ₂ je₂naꞌ₅₄ a₂jme₁dsɨ₂ŋɨ́₃ uɨ́ng₂ guaꞌ₅₄ quein₂ ja₁co₂ꞌŋiog₅.
30 Jaun₂ ca₂ŋag₃ Jesús:
―¿ꞌA₂ bá₄ liaꞌ₂ chengꞌ₂?
Jaun₂ ca₂ŋag₃:
―Juɨn₅d bá₄ cheng₂.
Le₂në₅ ca₂juáꞌ₂ chein₂ ia₁ a₂juɨn₅ je₂naꞌ₅₄ i₂jme₁tionꞌ₅₄ quióꞌ₅.
31 Jaun₂ jme₂dsí₂ ꞌéi₂ në́₃ qui₂ca₂mɨ₃ tion₅₄ ne₄ Jesús ia₁jaun₂ tsá₃ guiogꞌ₃ ꞌéi₂ ca₂të₂ ja₁ca₂jein₃ chi₁dsio₅₄.
32 Jaun₂ jme₁tionꞌ₅₄ juɨn₅ i₁ŋí₅ caun₂ dsɨ₂conꞌ₂. Jaun₂ ca₂mɨ₃ jme₂dsí₂ a₂cuë₃ Jesús jmɨg₄ a₂dsɨ₃toinꞌ₅₄ quióꞌ₅ i₁ŋí₅. Jaun₂ ca₂cuë₃ bá₄ guëꞌ₂ Jesús jmɨg₄.
33 Jaun₂ qui₂ca₂ꞌuɨn₂ bá₄ je₂naꞌ₅₄ quióꞌ₅ dsa₂ ꞌéi₂; ca₂i₃léin₂ i₃toinꞌ₅₄ quióꞌ₅ i₁ŋí₅. Ca₂le₃jɨ́n₃ i₁ŋí₅ ꞌéi₂ në́₃ ca₂i₁nioi₁₂ co₂ꞌei₅ ꞌlɨgꞌ₅₄, qui₂ca₂seinꞌ₃ tsag₂ siá₅ ca₂séinꞌ₂ të₂ dsi₂jmɨg₂. Ja₁jaun₂ ca₂dsain₃ ca₂ꞌɨnꞌ₃ jmɨg₂.
34 Jme₁ca₂të́₂ ne₄ dsa₂ i₂jme₁jmo₅ ꞌí₁ i₁ŋí₅ ꞌe₂ ca₂lë₃, ca₂i₃lein₃ ca₂cuɨng₃ ca₂i₁dsia₂ jë₄ juɨg₂, ja₁nau₂ në́₃.
35 Jaun₂ ca₂i₁len₅₄ dsa₂ juɨg₂ i₁jag₅₄ a₂ca₂lë₃ ja₁jaun₂. Jme₁ca₂dsi₃léin₂ ja₁ꞌen₅₄ Jesús, ca₂jɨ́in₂ dsa₂ i₂ma₂ꞌuɨn₂ je₂naꞌ₅₄ të₂dsɨ́₅. Jaun₂ ma₂guá₅ con₂ Jesús ma₂quiꞌ₂ tsɨnꞌ₅₄, ma₂ꞌen₅₄ bá₄ dsɨ́₅. Jaun₂ ca₂i₃góꞌ₃ dsɨ́₅ dsa₂ jme₁ca₂jág₂.
36 Dsa₂ i₂ca₂të́₂ ne₄ a₂ca₂lë₃ jaun₂, ca₂dsia₃ ca₂tsɨ́ꞌ₃ táng₃ i₂ca₂dsi₃lén₂ ꞌéi₂ ꞌa₂ liaꞌ₂ ca₂ꞌlón₂ dsa₂ i₂jme₁tionꞌ₅₄ je₂naꞌ₅₄ të₂dsɨ́₅.
37 Jaun₂ në́₃, ca₂le₃jɨ́n₃ bá₄ dsa₂ chan₂ le₃lágꞌ₃ juɨg₂ ꞌuë₃ Gerasa ca₂tsɨ́ꞌ₃ Jesús a₂o₃ꞌɨin₅ ja₁jaun₂, ia₁ ꞌŋio₅ lɨn₃ të₂tsɨꞌ₅₄ go₂ꞌi₃ tionꞌ₅₄ dsa₂. Jaun₂ ca₂ŋáꞌ₃ bá₄ ꞌéi₂ ca₂ꞌí₃ táng₃ tsɨ₁mu₅.
38 Dsa₂ i₂ca₂ꞌuɨn₂ jme₂dsí₂ je₂naꞌ₅₄ quióꞌ₅ në́₃, jme₁mɨ₂₃ ne₄ Jesús a₂jme₁dsó₃ quiongꞌ₅₄. La₁ ꞌéi₂ në́₃ ca₂jmo₃ ꞌéiꞌ₃ a₂jŋia₃ bá₄, ca₂juáꞌ₂:
39 ―Guanꞌ₂ bá₄ quiángꞌ₂, o₂dsia₄ ca₂le₃jë́₃ ꞌe₂ në₂jmo₃ Diú₄ ja₁congꞌ₂.
Ca₂ŋáꞌ₃ bá₄ guëꞌ₂ dsa₂ ꞌéi₂ quióꞌ₅, ca₂i₁dsia₂ le₂tan₅₄ jë₄ juɨg₂ ꞌe₂ ca₂jmo₃ Jesús quiongꞌ₅₄.
Ja₁mɨ́g₄ Jairo, quianꞌ₅₄ ꞌio₅₄ i₂ca₂nɨ́ꞌ₃ tsɨnꞌ₅₄ Jesús
40 Jme₁ca₂dsiánꞌ₃ táng₃ Jesús le₃ꞌŋoꞌ₅₄ jmɨg₂, qui₂ca₂guei₃ dsa₂ a₂ꞌŋio₂ dsɨ́₅, ia₁ ca₂le₃jɨ́in₃ bá₄ jme₁ma₂le₁jŋiog₂₃ tioinꞌ₅₄.
San Lucas 8:40-56
41 Të₃jë₄ jaun₂, ca₂dsióg₃ jan₂ dsa₂ i₂chen₂ Jairo, i₂niog₅ gu₂ guáꞌ₅ sinagoga*. Dsa₂ ꞌéi₂ në́₃ ca₂chi₃jné₃ ne₄ Jesús jme₁dsióg₃, ca₂mɨ₃ tion₅₄-jan₃ ia₁jaun₂ dsó₃ ja₁quióꞌ₄.
42 Ia₁ jme₁chan₂ jan₂ tan₅₄ ja₁mɨ́g₄, i₂jme₁ma₂ꞌen₅₄ conꞌ₂ guia₃-tɨ́n₂ ŋi₂, i₂jme₁ma₂i₁jón₂. Jme₁ma₂ꞌen₅₄ Jesús juɨ₅ ŋó₃ ja₁quióꞌ₄ ꞌéi₂, juɨn₅ lɨn₃ dsa₂ i₂i₃lén₂ quiongꞌ₅₄, liaꞌ₂ qui₂rë₂quɨ́nꞌ₅ bá₄ Jesús ŋó₃.
43 Jë₄ jaun₂, ŋó₃ jan₂ dsa₂ mɨ́₂ i₂dsoꞌ₅₄ ma₂guia₃-tɨ́n₂ ŋi₂ a₂tɨin₂,e la₁ ca₂liaꞌ₂ ꞌi₁jan₂ tsá₃ ꞌein₂ ma₂ca₂tióꞌ₃ jme₃ꞌlió₂.
44 ꞌIo₅₄ ꞌéi₂ në́₃ ca₂jme₃quiáin₃ të₂le₃ chi₁coꞌ₅₄ quióꞌ₅ Jesús. Jaun₂ ca₂nɨ́iꞌ₃ cheiꞌ₅₄ tsɨnꞌ₅₄ ꞌéi₂. Co₂tan₅₄ dsɨ₂juɨ₅ le₂jaun₂ bá₄ ca₂quion₂ jmɨ₂ ꞌain₅₄.
45 Jaun₂ ca₂juáꞌ₂ Jesús:
―¿ꞌEin₂ në₂nɨ́ꞌ₃ quió₃?
Ca₂le₃jɨ́n₃ bá₄ dsa₂ ŋag₂₃ juáꞌ₂ tsá₃ ŋi₅.
Jaun₂ ca₂juáꞌ₂ Pe₄:f
―Të₅, jágꞌ₂ bá₄ ꞌne₂ chi₁quɨ́ꞌ₅ co₂ꞌliogꞌ₂ dsa₂ ca₂taun₂ ca₂taun₂ ja₂náu₅.
46 La₁ caun₂ ca₂juáꞌ₂ bá₄ Jesús:
―Chan₂ i₂në₂nɨ́ꞌ₃ quió₃, ia₁ ca₂rë₃léi₄ jniá₂ o₂ꞌág₃ bí₂ quió₃.
47 ꞌIo₅₄ në́₃, jme₁ca₂rë₃líꞌ₄ a₂tsá₃ ma₃lé₂ juaꞌ₅₄ a₂ꞌmai₃, já₃ jlein₂₃, ca₂chi₃jné₃ ne₄ ꞌéi₂. Të₃ jág₅ ca₂le₃jɨ́n₃ dsa₂ ca₂juáꞌ₂ liaꞌ₂ tí₅ jág₁ ꞌe₂ ꞌuɨg₅₄ ca₂nɨ́iꞌ₃ quióꞌ₅ ꞌéi₂, tonꞌ₂ ca₂jángꞌ₃ jág₁ dsau₅ a₂ca₂ꞌlóin₂ dsɨ₂juɨ₅ le₂jaun₂.
48 Jaun₂ ca₂juáꞌ₂ Jesús:
―Jón₃, ne₄ ia₁ a₂ꞌéngꞌ₂, ca₂ꞌlóngꞌ₂ bá₄. Guanꞌ₂ tei₄ quiángꞌ₂.
49 Të₃jë₄ juáꞌ₂ jág₁ jaun₂ jme₁ca₂dsióg₃ jan₂ dsa₂ i₂chen₄ dsi₂néi₂ quióꞌ₅ i₂niog₅ gu₂ guáꞌ₅, ca₂juáꞌ₂:
―Ma₂jon₅ bá₄ chiꞌ₂ quiángꞌ₂. ꞌA₃ ma₃cuëꞌ₂ ta₁ Të₅.
50 La₁ ca₂nág₂ bá₄ Jesús, jaun₂ ca₂juáꞌ₂:
―Tsá₃ lë₁jmo₂ ꞌliaꞌ₂ ꞌauꞌ₂. Jŋiaꞌ₅₄ conꞌ₂ ꞌén₃ bá₄, jaun₂ në₃ jagꞌ₅₄ i₂ꞌlión₂ bá₄ chiꞌ₂ quiángꞌ₂.
51 Jme₁ca₂dsióg₃ dsi₂néi₂, tsá₃ ca₂cuë₃ jmɨg₄ juaꞌ₅₄ dsɨ₃tonꞌ₅₄ ꞌi₁jan₂ i₂siánꞌ₂, jŋiaꞌ₅₄ liaꞌ₂ Pe₄, Juan₅₄, Jacobog në́₃, quianꞌ₅₄ jmáꞌ₃ chog₅₄-jmei₂ chiꞌ₂ ꞌéi₂ bá₄ i₃tonꞌ₅₄.
52 Jaun₂ quɨꞌ₂-ꞌo₅ bá₄ dsa₂ quɨꞌ₂ dsɨ́₅ lɨn₃ tioinꞌ₅₄, o₄quióꞌ₄ chiꞌ₂. Jaun₂ ca₂juáꞌ₂ Jesús:
―Tsá₃ ꞌau₂ ꞌniaꞌ₂; on₃juaꞌ₅₄ i₂rë₂jon₅₄ në₅. Jŋiaꞌ₅₄ liaꞌ₂ a₂rë₂güɨ́in₃ bá₄.
53 La₁ jŋiaꞌ₅₄ ca₂ŋɨ́i₂ bá₄ ꞌéi₂ tioinꞌ₅₄, ia₁ ŋi₅ rë₂ bá₄ a₂jme₁ma₂rë₂jon₅₄ dsónꞌ₂ bá₄ chiꞌ₂.
54 Jaun₂ ca₂tɨ́in₂ gu₂ chiꞌ₂ ꞌéi₂, ca₂juáꞌ₂ tiá₂:
―¡Jón₃, nau₂!