Jág₁ a₂jángꞌ₅ léi₄ juɨ₁liaꞌ₂ dsa₂ i₂séi₂ mɨ́g₂ jon₂
13
Jmɨg₄ jaun₂ ca₂o₃ꞌɨ́n₃ Jesús dsi₂néi₂ ja₁jme₁ꞌein₅₄, ca₂ŋó₃ ca₂i₁gua₂ cheiꞌ₅₄ jmɨ₁ꞌŋíꞌ₄.
2 Ia₁ ca₂ŋɨꞌ₂ táng₃ juɨn₅ lɨn₃ dsa₂ le₃lágꞌ₃ quióꞌ₅ ja₁guá₄, jaun₂ ca₂ꞌí₃ ꞌŋióꞌ₃ tsɨ₁mu₅, jaun₂ ca₂guá₂. Jaun₂ dsa₂ guëꞌ₂ në́₃ ca₂tóinꞌ₂ ca₂le₃jɨ́in₃ cheiꞌ₅₄ jmɨg₂.
3 Jaun₂ në́₃ ca₂jme₃tɨin₂₃ dsa₂ ꞌlióng₂ lɨn₃ jág₁ të₂le₃ quianꞌ₅₄ jág₁ a₂jángꞌ₅ léi₄.
Ca₂juáꞌ₂:
―Jan₂ dsa₂ ca₂ŋe₄ ja₁nau₂ ca₂i₁séi₄ mɨ́g₂ jon₂;
4 jme₁ma₂ꞌein₅₄ séi₂ në́₃, a₂lɨn₅₄ mɨ́g₂ jon₂ ca₂i₃gaꞌ₅₄ le₂ꞌi₄ juɨ₅, jaun₂ në́₃ i₁tan₅ bá₄ ca₂o₃lén₂ ca₂cágꞌ₃.
5 A₂lɨn₅₄ guëꞌ₂ mɨ́g₂ jon₂ ca₂i₃toꞌ₅₄ jë₄ nɨ₁cang₁, ja₁tsá₃ lɨn₄ guaꞌ₅₄ lë́₅. A₂jaun₂ në́₃ tsá₃ uë́₂ ca₂rë₃ꞌag₄ ca₂ꞌia₂, ia₁ tsá₃ jɨꞌ₂ guaꞌ₅₄ ja₁i₃toꞌ₅₄.
6 La₁ jme₁ca₂të́₂ ꞌiog₂, ca₂rë₃juɨng₅, ca₂cáu₂ bá₄ a₂jaun₂, ia₁ tsá₃ jmú₄ ꞌlióng₂ jme₁ma₂cha₂.
7 A₂lɨn₅₄ guëꞌ₂ i₃gaꞌ₅₄ ja₁lë́₄ nɨ₁taun₅. Jme₁ca₂i₃cón₃ nɨ₁taun₅ në́₃, ca₂jlë₃ bá₄ jon₂ jaun₂ táng₃.
8 La₁ a₂lɨn₅₄ guëꞌ₂ në́₃ ca₂tɨ́n₂ ja₁ꞌoꞌ₅₄ ꞌuë₃; a₂jaun₂ ca₂rau₂ dse₃; a₂lɨn₅₄ mɨ́g₂ jon₂ ca₂ꞌág₂ jma₃cáun₃ ꞌŋiá₂-láu₂ mɨ́g₂ liaꞌ₂ ca₂mɨ́g₂ jon₂ a₂i₃jnia₄; a₂lɨn₅₄ guëꞌ₂ jma₃ꞌnagꞌ₂ ne₂guióg₂ mɨ́g₂, a₂lɨn₅₄ guëꞌ₂ jma₃guióg₂-guiá₂ mɨ́g₂.
9 Chi₂juaꞌ₂ ꞌein₂ ꞌniaꞌ₂ i₂dsi₅₄ rë₂gua₄, nei₂ ꞌniaꞌ₂.
Ta₁ quíꞌ₅ jág₁ a₂jángꞌ₅ léi₄
10 Jaun₂ ca₂jme₃quián₃ chiꞌ₂ dsɨ₂guia₃-tɨ́n₂ con₂ Jesús, jaun₂ ca₂ŋag₃:
―¿ꞌE₂ lë₃ jme₂tɨ́ngꞌ₁ dsa₂ jmáꞌ₃ liaꞌ₂ quianꞌ₅₄ jág₁ a₂jángꞌ₅ léi₄?
11 Jaun₂ në́₃ ca₂ŋag₃ Jesús:
―Diú₄ bá₄ jmo₅ a₂rë₃ŋɨ́ꞌ₂ ꞌauꞌ₂ ꞌniaꞌ₂ jág₁ rë₂ꞌma₄ juɨ₁liaꞌ₂ ꞌa₂ liaꞌ₂ lë́₅ ja₁goin₂ gueiꞌ₅₄ i₂juɨ́g₃. La₁ ja₁con₂ dsa₂ në₅ në́₃, tsá₃ le₂jaun₂.
12 Ia₁ juɨ₁liaꞌ₂ dsa₂ i₂ŋɨ́ꞌ₂ dse₃, Diú₄ bá₄ jmo₃ le₃ŋɨ́iꞌ₂ guë́₄ ꞌlióng₂, jaun₂ dsi₁léin₂ léin₂ dsa₂ i₂niog₅ dsi₄. La₁ juɨ₁liaꞌ₂ i₂tsá₃ ꞌnio₃ le₃ŋɨ́ꞌ₂ në́₃, Diú₄ bá₄ jmo₃ co₂dsia₅ tsá₃ le₃ŋɨ́iꞌ₂ co₂ŋeiꞌ₅₄.
13 ꞌUɨg₅₄ jaun₂ bá₄ a₂jme₂tɨ́n₂ jniá₂ dsa₂ të₂le₃ quianꞌ₅₄ jág₁ a₂jángꞌ₅ léi₄:
Ia₁jaun₂ i₂jág₃,
la₁ tsá₃ le₃líꞌ₄ ꞌe₂ a₂në₂jág₃;
i₂në₂néi₂ guëꞌ₂ në́₃,
la₁ tsá₃ ca₂rë₃líꞌ₄ ꞌe₂ a₂në₂néi₂,
on₃ guë́₄ ca₂ŋɨ́iꞌ₂.
14 Jaun₂ le₂në₅ rë₂ti₃ të₂le₃ quióꞌ₅ dsa₂ në₅ juɨ₁liaꞌ₂ ca₂juáꞌ₂ Isaías i₂ca₂ꞌë́₂ jág₁ quián₅ Diú₄:
Dsónꞌ₂ bá₄ nágꞌ₁ ꞌniaꞌ₂,
la₁ tsá₃ le₃ŋɨ́gꞌ₂ ꞌe₂ a₂nágꞌ₁;
Caun₂ qui₁jagꞌ₅₄ ꞌniaꞌ₂ në́₃,
la₁ tsá₃ le₃lenꞌ₅₄ ꞌniaꞌ₂.
15 Ia₁ a₂ma₂ꞌuaꞌ₂ dsi₄ bá₄ dsa₂ la₂,
ja₂lag₃ bá₄ nag₂₃,
në₂jag₄ bá₄ i₂ma₂rë₂jnɨ₅ rë₂gua₄;
ján₃ bá₄ le₂në₅, në₂jag₄ bá₄ a₂tsá₃ jniá₂ mɨ₂ne₅₄,
ia₁jaun₂ tsá₃ jág₃ quianꞌ₅₄ mɨ₂ne₅₄,
on₃ guëꞌ₂ nag₃ quianꞌ₅₄ rë₂gua₅₄,
on₃ guë́₄ le₃ŋɨ́ꞌ₂ dsɨ́₅,
ia₁jaun₂ tsá₃ jéinꞌ₃ dsɨ́₅ ja₁con₂ jniá₂
ia₁jaun₂ jme₁ꞌlioin₁₂ jniá₂.a
16 ꞌLa₁ ꞌe₂ guë́₄ dsenꞌ₃ ꞌniaꞌ₂ ia₁ jniá₂ mɨ₂neꞌ₅₄, nagꞌ₂ bá₄ ꞌniaꞌ₂ në́₃ quianꞌ₅₄ rë₂guáꞌ₂.
17 A₂dsɨ₂jóꞌ₃ juɨ́g₂ jniá₂ ꞌniaꞌ₂, juɨn₅ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂, juɨn₅ dsa₂ dsen₃, jme₁ꞌnio₃ të₃ ne₅₄ a₂jágꞌ₂ ꞌniaꞌ₂ rë₂në́₃, la₁ tsá₃ ca₂jág₃; jme₁ꞌnio₃ nag₃ në́₃ juɨ₁liaꞌ₂ a₂nagꞌ₂ ꞌniaꞌ₂ rë₂në́₃, la₁ tsá₃ ca₂nág₂.
Juáꞌ₂ Jesús tsɨ́ꞌ₅ dsa₂ liaꞌ₂ tí₅ jág₁ ꞌe₂ jág₁ dsau₅ jángꞌ₅ juɨ₁liaꞌ₂ jág₁ quióꞌ₅ dsa₂ i₂séi₂ mɨ₂jon₂
18 ꞌNei₂ ꞌniaꞌ₂ jaun₂, ꞌe₂ jág₁ dsau₅ jángꞌ₅ juɨ₁liaꞌ₂ jág₁ quióꞌ₅ dsa₂ i₂séi₂ mɨ́g₂ jon₂.
19 Juɨ₁liaꞌ₂ dsa₂ i₂nag₅ jág₁ dse₃ a₂já₅ gueiꞌ₅₄ i₂juɨ́g₃ ja₁gon₂ Diú₄, në₁juaꞌ₂ tsá₃ ŋɨ́iꞌ₂, lɨ́in₅ juɨ₁liaꞌ₂ mɨ́g₂ jon₂ a₂ca₂séiꞌ₂ dsi₂juɨ₅. I₂së₃dsen₃ bá₄ ja₂ ja₁coin₂, jaun₂ jŋiáꞌ₂ táng₃ jág₁ dse₃ a₂jme₁ma₂jnia₄ të₂dsɨ́₅.
20 Mɨ́g₂ jon₂ a₂ca₂séiꞌ₂ guëꞌ₂ jë₄ nɨ₁cang₁, lë́₅ juɨ₁liaꞌ₂ lɨ́n₅ dsa₂ i₂gue₅ ꞌŋio₂ dsɨ́₅ jág₁ dse₃ a₂nag₂₃,
21 la₁ia₁ tsá₃ cha₂ guëꞌ₂ jë₁dsɨ₃ꞌmá₂ jmú₄ néꞌ₃ ꞌuë₃, tsá₃ uë́₂ tióꞌ₅; jaun₂ jë₁ma₂já₅ o₂i₁ dsɨ₅ a₂dsɨ₂ŋɨ́i₂ ꞌe₂ dsɨ₂ŋɨ́i₂, o₃ qui₂co₂ꞌein₅ dsa₂ o₄quióꞌ₄ jág₁ quióꞌ₅ Diú₄, guein₂₃ tí₂ bá₄ táng₃ jág₁.
22 Juɨ₁liaꞌ₂ mɨ́g₂ jon₂ a₂i₃gaꞌ₅₄ jë₄ nɨ₁taun₅ guëꞌ₂ táng₃, jángꞌ₅ jág₁ dsau₅ juɨ₁liaꞌ₂ dsa₂ i₂nag₅ jág₁ dse₃, la₁ia₁ ꞌŋio₅ lɨn₃ guë́₄ ꞌɨ₅ dsɨ́₅ o₂meꞌ₅₄ dsɨ₅ a₂cha₂ mɨ₂güɨ́g₃ la₂, a₂ꞌɨ́n₅ dsɨ́₅ a₂le₃cha₂ cu₄ a₂le₃chain₂ dse₃ në́₃, a₂në₅ bá₄ a₂jme₂gau₅ táng₃ quióꞌ₅. Ca₂le₃jë́₃ a₂në₅ jlë́₂ bá₄ táng₃ jág₁ dse₃ a₂jme₁ma₂nág₂, jaun₂ tsá₃ ma₂ꞌe₂ a₂dse₃ ráu₃ ja₁con₂ dsa₂ ꞌéi₂.
23 La₁ juɨ₁liaꞌ₂ mɨ́g₂ jon₂ a₂ca₂séiꞌ₂ ja₁dse₃ guaꞌ₅₄, jángꞌ₅ táng₃ jág₁ dsau₅ të₂le₃ ja₁con₂ dsa₂ i₂nag₅ jág₁, tonꞌ₂ ŋɨ́iꞌ₂ në́₃; jaun₂ jmáꞌ₃ liaꞌ₂ ca₂ne₅₄ a₂dse₃ bá₄ rau₂ ja₁coin₂. I₂lɨn₅₄ guëꞌ₂ dsa₂ ꞌéi₂ të₂le₃ quianꞌ₅₄ a₂dse₃ rë₂jniá₂ a₂jmo₂₃, lɨ́in₅ juɨ₁liaꞌ₂ lë́₅ liaꞌ₂ ca₂choꞌ₅₄ mɨ́g₂ a₂ca₂i₃jnia₄, rau₂ caun₂ ꞌŋiá₂-láu₂ mɨ́g₂ liaꞌ₂ ca₂mɨ́g₂; i₂lɨn₅₄ guëꞌ₂ jma₃ꞌnagꞌ₂ co₂ne₂guióg₂; i₂lɨn₅₄ guëꞌ₂ jma₃guióg₂-guiá₂ mɨ́g₂.
Jág₁ a₂jángꞌ₅ léi₄ juɨ₁liaꞌ₂ nɨ₁nau₂ ꞌlɨgꞌ₅₄ a₂ca₂ꞌia₂ jë₄ trigo
24 Ca₂juáꞌ₂ Jesús táng₃ ca₂tsɨ́ꞌ₃ dsa₂ caun₂ jág₁ a₂jángꞌ₅ léi₄ siáꞌ₂:
―A₂lë́₅ gueiꞌ₅₄ i₂juɨ́g₃ ja₁gon₂ Diú₄ liaꞌ₂ lɨ́n₅ jan₂ dsa₂ i₂ca₂séi₂ ca₂ne₅₄ mɨ́g₂ jon₂ dse₃ ꞌuë₃ quióꞌ₅;
25 la₁ caun₂ ꞌuë₂ jme₁ma₂le₁güɨ́n₃ dsa₂ le₃jɨ́in₃, ca₂guan₃ jan₂ dsa₂ ꞌlɨnꞌ₅₄ i₂ꞌiog₅₄ ca₂jmo₃ uɨg₅ dsɨ́₅ ca₂guiaꞌ₃ jon₂ nɨ₁nau₂ ꞌlɨgꞌ₅₄ jë₄ trigo, jaun₂ ca₂ŋáiꞌ₃ táng₃.
26 Jme₁ca₂i₃cón₃ trigo, jme₁ma₂tioꞌ₅₄ mɨ́ꞌ₂ në́₃, jë₄ jaun₂ ca₂ꞌia₂ nɨ₁nau₂ ꞌlɨgꞌ₅₄ ján₃.
27 Jaun₂ në́₃, dsa₂ i₂jme₂ti₃ ta₁ ne₄ juɨg₅₄ ja₁nau₂, ca₂i₁con₂ jág₁ ne₄ juɨg₅₄, ca₂juáꞌ₂: “Guiꞌ₅₄, ¿on₁juaꞌ₅₄ jmáꞌ₃ ca₂ne₅₄ mɨ́g₂ jon₃ dse₃ ca₂jŋíꞌ₂ ja₁nau₂ quiángꞌ₂ jme₁ca₂jŋíꞌ₂? ¿ꞌA₂ guëꞌ₂ liaꞌ₂ ca₂lë₃ a₂ca₂ꞌia₂ nɨ₁nau₂ ꞌlɨgꞌ₅₄ jaun₂ në́₃?”
28 Jaun₂ ca₂ŋag₃ dsa₂ juɨg₅₄: “ꞌAn₁ jan₂ dsa₂ ꞌlɨnꞌ₅₄ i₂ꞌiog₅₄ bá₄ ca₂jmo₃ a₂në₅.” Jaun₂ ca₂ŋag₃ dsa₂ i₂jme₂ti₃ ta₁ ne₅₄: “¿Tsa₁ ꞌniogꞌ₂ juaꞌ₅₄ co₂dsia₅ dsɨ₁guéi₁ jniaꞌ₅₄ nɨ₁nau₂ ꞌlɨgꞌ₅₄ jaun₂?”
29 Jaun₂ ca₂ŋag₃ táng₃ ꞌéi₂, ca₂juáꞌ₂: “Jan₂ꞌón₄. Tióꞌ₅ bá₄. Ia₁ conꞌ₂ tsá₃ ŋó₅ në₁juaꞌ₂ le₂jiog₅ tag₄ trigo dse₃ bá₄ ca₂cang₅.
30 Ja₂lɨn₃ guë́₄ dse₃ juɨ₁le₁dsi₅₄ meꞌ₂ jaun₂, juɨ₁dsi₂cón₃ bá₄ co₂lë₅, ca₂liaꞌ₂ ca₂të́₂ jmɨg₄ i₁ráu₃; jaun₂ guë́₄ tsɨng₅₄ dsa₂ a₂dsɨ₃cang₅₄ deꞌ₂ le₂ꞌuɨg₅₄ nɨ₁nau₂ ꞌlɨgꞌ₅₄, jaun₂ cágꞌ₃ jmáꞌ₃ co₂dsongꞌ₅₄ ia₁jaun₂ ꞌnei₃, dsɨꞌ₂, jaun₂ guë́₄ cágꞌ₃ trigo tóꞌ₃ caun₂ ja₁tóꞌ₃ dsi₂néi₂ quió₃.”
Jág₁ a₂jángꞌ₅ léi₄ juɨ₁liaꞌ₂ mɨ́g₂ jon₂ quióꞌ₅ nɨ₁ꞌma₂ mostaza
31 Ca₂dsia₃ Jesús ján₃ caun₂ jág₁ a₂jángꞌ₅ léi₄ le₂la₂:
―Ja₁gon₂ Diú₄ gueiꞌ₅₄ i₂juɨ́g₃, lë́₅ juɨ₁liaꞌ₂ lë́₅ mɨ́g₂ jon₂ quióꞌ₅ nɨ₁ꞌma₂ mostazab a₂ca₂jné₂ jan₂ dsa₂ ja₁nau₂ quióꞌ₅.
32 Dsónꞌ₂ mɨ́g₂ jon₂ jaun₂ lë́₅ mɨ́g₂ a₂píꞌ₁ tei₄ guë́₄ ꞌŋio₅ lɨn₃ liaꞌ₂ conꞌ₂ guë́₄ mɨ́g₂ jon₂ siáꞌ₂; la₁ia₁ jë₁ma₂ca₂i₃cón₃ në́₃, lë́₂ caun₂ nɨ₁ꞌma₂ pa₁ guë́₄ liaꞌ₂ conꞌ₂ guë́₄ rɨnꞌ₅₄ a₂cha₂ ja₁nau₂ quióꞌ₅, ca₂të₂ i₁tan₅ lé₂ le₃tiainꞌ₃ guꞌ₂ neiꞌ₅₄.
Jág₁ jángꞌ₅ léi₄ juɨ₁liaꞌ₂ ꞌa₂ liaꞌ₂ rónꞌ₂ i₁ŋíꞌ₄
33 Ca₂dsia₃ Jesús jág₁ a₂jángꞌ₅ léi₄ le₂la₂ táng₃:
―Lë́₅ gueiꞌ₅₄ i₂juɨ́g₃ ja₁gon₂ Diú₄, juɨ₁liaꞌ₂ lë́₅ levadura* a₂co₂güɨ́nꞌ₂ jan₂ ꞌio₅₄ quianꞌ₅₄ ꞌnɨ₅ tioꞌ₅₄ ŋí₁ caꞌ₅₄c ti₁juɨ₁ harina, ia₁jaun₂ ronꞌ₂ dse₃ ca₂le₃jë́₃ ti₁can₁.
Ta₁ a₂quíꞌ₅ jág₁ a₂jángꞌ₅ léi₄ a₂ca₂jme₃tag₅ Jesús
34 Ca₂le₃jë́₃ jág₁ la₂ ca₂juáꞌ₂ Jesús ca₂tsɨ́ꞌ₃ dsa₂ të₂le₃ quianꞌ₅₄ jág₁ a₂jángꞌ₅ léi₄; ꞌi₁co₂ráun₂ tsá₃ jme₁jme₂tag₂₃ juaꞌ₅₄ tsá₃ të₂le₃ quianꞌ₅₄ jág₁ a₂jángꞌ₅ léi₄.
35 Le₂në₅ ca₂jmo₃ ia₁jaun₂ le₃ti₃ jág₁ a₂jme₁ma₂rë₂ꞌë́₂ quióꞌ₅ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂ jme₁ca₂juáꞌ₂:
ꞌUëꞌ₅₄ jniá₂ jág₁ ꞌo₃
të₂le₃ quianꞌ₅₄ jág₁ a₂jángꞌ₅ léi₄;
dsia₅₄ jniá₂ jág₁ a₂tsá₃ ma₂ca₂rë₃jniá₂
ca₂le₃ ca₂jmo₃ Diú₄ mɨ₂güɨ́g₃.d
Dsia₅ Jesús liaꞌ₂ tí₅ jág₁ ꞌe₂ jág₁ dsau₅ jángꞌ₅ juɨ₁liaꞌ₂ nɨ₁nau₂ ꞌlɨgꞌ₅₄ a₂ca₂ꞌia₂ jë₄ trigo
36 Jaun₂ në́₃, ca₂o₃ꞌɨ́n₃ Jesús jɨn₄ dsa₂ juɨn₅ ja₁jme₁ꞌein₅₄ jaun₂ ca₂ꞌí₃ táng₃ caun₂ dsi₂néi₂. Jaun₂ ca₂o₃lén₂ táng₃ chiꞌ₂ dsɨ₂guia₃-tɨ́n₂ ja₁coin₂, ca₂juáꞌ₂:
―Dsia₄ liaꞌ₂ tí₅ jág₁ ꞌe₂ jág₁ dsau₅ jángꞌ₅ juɨ₁liaꞌ₂ jág₁ quióꞌ₅ nɨ₁nau₂ ꞌlɨgꞌ₅₄ a₂ca₂ꞌia₂ jë₄ trigo.
37 Jaun₂ ca₂ŋag₃ Jesús:
―Dsa₂ i₂ŋɨ₅ séi₂ mɨ́g₂ jon₂ dse₃, Jaun₅* dsa₂ mɨ₂güɨ́g₃ bá₄ ꞌéi₂;
38 ja₁nau₂ guëꞌ₂ lë́₅ co₂ꞌnióꞌ₄ mɨ₂güɨ́g₃ la₂. Jon₂ dse₃ guëꞌ₂ në́₃, co₂ꞌnióꞌ₄ lɨ́n₅ chiꞌ₂-guein₂ i₂tionꞌ₅₄ ꞌéiꞌ₃ quióꞌ₅ Diú₄. Nɨ₁nau₂ ꞌlɨgꞌ₅₄ guëꞌ₂ në́₃, co₂ꞌnióꞌ₄ dsa₂ i₂tionꞌ₅₄ juɨ₅ ꞌéiꞌ₃ quióꞌ₅ i₂së₃dsen₃.
39 Dsa₂ ꞌlɨnꞌ₅₄ i₂ꞌiog₅₄ i₂ca₂jné₂ jon₂ nɨ₁nau₂ ꞌlɨgꞌ₅₄, i₂së₃dsen₃ bá₄ ꞌéi₂. I₁ráu₃ guëꞌ₂ në́₃, lë́₅ jmɨg₄ jë₁ca₂tóꞌ₂; i₂ja₃lén₂ ja₃cagꞌ₅₄ guë́₄ në́₃, ángeles quián₅ bá₄ Diú₄.
40 Jaun₂, juɨ₁liaꞌ₂ cágꞌ₅ dsa₂ nɨ₁nau₂ ꞌlɨgꞌ₅₄, a₂tóꞌ₅ dsi₂si₂, le₂në₅ bá₄ lé₂ ján₃ jmɨg₄ jë₁ca₂tóꞌ₂ mɨ₂güɨ́g₃ la₂.
41 Chen₃ Jaun₅* dsa₂ mɨ₂güɨ́g₃ ángeles quiáin₅ ia₁jaun₂ ꞌuɨ́inꞌ₂ jë₄ quióꞌ₅ dsa₂ quiáin₅ ca₂le₃jɨ́n₃ i₂jmo₅ qui₂sénꞌ₂ rɨnꞌ₅₄ a₂ꞌno₂₃ dso₄, ca₂le₃jɨ́n₃ guë́₄ i₂ca₂rë₃chán₃ i₂tsá₃ ca₂tí₂ juɨ₅ ꞌlɨgꞌ₅₄.
42 Jaun₂ toꞌ₂ ja₁néiꞌ₅ tsɨꞌ₄ si₂, ja₁tóinꞌ₃ quɨꞌ₂-ꞌo₂₃, qui₃quɨ́gꞌ₃ jan₅₄ në́₃.
43 Jaun₂, dsa₂ dsen₃ quián₅ Diú₄ guëꞌ₂ dsɨ₃lein₅ dsɨ₃tiainꞌ₂ ja₁jniai₅₄ tág₅ juɨ₁liaꞌ₂ jniá₂ ꞌiog₂ ja₁jmo₅ Diú₄ Jmei₂ ꞌéiꞌ₃. Chi₂juaꞌ₂ ꞌein₂ ꞌniaꞌ₂ i₂dsi₅₄ rë₂gua₄, rë₂ nei₂ ꞌniaꞌ₂.
Jág₁ a₂jángꞌ₅ léi₄ juɨ₁liaꞌ₂ caun₂ a₂quen₅ guë́₄ ꞌŋio₅ lɨn₃ a₂rë₂ꞌma₄
44 ꞌGueiꞌ₅₄ i₂juɨ́g₃ ja₁gon₂ Diú₄ ján₃ bá₄ lë́₅ juɨ₁liaꞌ₂ caun₂ a₂quen₅ ꞌŋio₅ lɨn₃ a₂rë₂ꞌma₄ rë₂ꞌo₅ néꞌ₃ ꞌuë₃. La₁ juɨ₁liaꞌ₂ jan₂ dsa₂ i₂dsoꞌ₂ në́₃, ja₁jaun₂ bá₄ ꞌma₂₃ táng₃; ia₁ a₂ŋɨ́₄ lë₃ ꞌioꞌ₂ jénꞌ₅, jaun₂ dsáinꞌ₅ dsɨ₂ꞌnág₂ ca₂le₃jë́₃ ꞌe₂ a₂cha₂ quióꞌ₅, jaun₂ lá₅ ꞌuë₃ jaun₂.
Jág₁ a₂jángꞌ₅ léi₄ juɨ₁liaꞌ₂ mɨ́g₂ perla a₂quen₅ lɨn₃
45 ꞌJán₃ bá₄ lë́₅ gueiꞌ₅₄ i₂juɨ́g₃ ja₁gon₂ Diú₄ juɨ₁liaꞌ₂ lɨ́n₅ jan₂ dsa₂ i₂ŋɨ₅ ꞌnoꞌ₂ perlas jláꞌ₁ ia₁jaun₂ jmo₃ ꞌmaꞌ₅₄.
46 Jë₁ma₂ca₂dsóꞌ₂ ca₂mɨ́g₂ a₂quen₅ lɨn₃, dsáinꞌ₅ dsɨ₂ꞌnág₂ ca₂le₃jë́₃ ꞌe₂ a₂cha₂ quióꞌ₅, jaun₂ lá₅ mɨ́g₂ jláꞌ₁ jaun₂.
Jág₁ a₂jángꞌ₅ léi₄ juɨ₁liaꞌ₂ tsɨ₁ꞌmá₅
47 ꞌJán₃ bá₄ le₂jaun₂ lë́₅ gueiꞌ₅₄ i₂juɨ́g₃ ja₁gon₂ Diú₄ juɨ₁liaꞌ₂ lë́₅ caun₂ tsɨ₁ꞌmá₅ a₂táun₂ dsa₂ ne₄ jmɨ₁ŋíꞌ₄ jaun₂ ꞌuɨ́inꞌ₂ ca₂le₃jɨ́n₃ ne₅₄ jáꞌ₂.
48 Jë₁ma₂ca₂rɨn₅ tsɨ₁ꞌmá₅, dsa₂ në́₃ ꞌɨ́in₅ të₂le₃ cheiꞌ₅₄ jmɨ₁ŋíꞌ₄; jaun₂ quióinꞌ₂ jmáꞌ₃ liaꞌ₂ ju₄ dsen₃ caun₂ ja₁toꞌ₂, jaun₂ guiainꞌ₂ bá₄ juɨ₁liaꞌ₂ jáꞌ₂ i₂tsá₃ dsen₃.
49 Ján₃ bá₄ le₂jaun₂ lé₂ jmɨg₄ jë₁ca₂tóꞌ₂ mɨ₂güɨ́g₃ la₂: ꞌuɨ́n₃ ángeles ja₃jmó₂ jma₃quén₅ dsa₂ ꞌlɨnꞌ₅₄ jë₄ quióꞌ₅ dsa₂ dsen₃
50 jaun₂ toinꞌ₂ i₂ꞌlɨnꞌ₅₄ ja₁néiꞌ₅ tsɨꞌ₄ si₂ ja₁dsɨ₃toinꞌ₅₄ quɨꞌ₂-ꞌo₂₃ qui₃quɨ́gꞌ₃ jan₅₄ në́₃.”
Juɨ₁liaꞌ₂ cu₄nióg₄ ꞌmɨ́₂ quianꞌ₅₄ cu₄nióg₄ guiꞌ₅₄
51 Jaun₂ ca₂ŋɨ́ꞌ₃ Jesús chiꞌ₂ dsɨ₂guia₃-tɨ́n₂ quiáin₅:
―¿Ŋɨ́gꞌ₂ ꞌniaꞌ₂ ca₂le₃jë́₃ jág₁ a₂juáꞌ₅ jniá₂ në₅?
Jaun₂ ca₂ŋag₃:
―Ŋágꞌ₂ bá₄ jniaꞌ₅₄.
52 Jaun₂ ca₂juáꞌ₂ Jesús në́₃:
―Juɨ₁liaꞌ₂ jan₂ të₅juáꞌ₅ i₂ma₂ca₂jme₃tɨn₅ ꞌa₂ liaꞌ₂ lë́₅ gueiꞌ₅₄ i₂juɨ́g₃ ja₁gon₂ Diú₄, lɨ́in₅ juɨ₁liaꞌ₂ lɨ́n₅ jan₂ juɨg₅₄ tsɨ₁ꞌné₅ i₂ꞌuë́ꞌ₅ a₂quen₅ a₂te₁ꞌi₁ le₁ꞌma₁ dsi₂néi₂ quióꞌ₅, liaꞌ₂ cosas ꞌmɨ́₂ liaꞌ₂ cosas guiꞌ₅₄ në́₃.
ꞌEn₅₄ Jesús jë₄ juɨg₂ Nazaret
53 Jme₁ca₂dsan₃ jme₂tɨn₅ Jesús dsa₂ jág₁ a₂jángꞌ₅ léi₄ në₅, ca₂o₃ꞌɨ́in₃ bá₄ ja₁jaun₂, ŋáiꞌ₃ juɨg₂ go₅₄.
54 Jme₁ca₂dsiáinꞌ₃ jaun₂ në́₃, ca₂jme₃lióg₃ ca₂jme₃tɨin₂₃ dsa₂ jág₁ dse₃ quióꞌ₅ Diú₄ dsi₂néi₂ guáꞌ₅ sinagoga* quióꞌ₅ dsa₂ ja₁jaun₂, jaun₂ dsa₂ në́₃, ca₂i₃góꞌ₃ dsɨ́₅ jág₁ a₂ca₂nág₂, jaun₂ ca₂dsia₃:
―¿A₂jáꞌ₄ ca₂i₁jme₁tɨn₅ i₂në₅ jág₁ a₂ŋɨ́₄ lë₃ tɨin₂₃ në₅? ¿ꞌA₂ bá₄ liaꞌ₂ ꞌio₂₃ bí₂ a₂tɨin₂ jmo₃ o₂dsain₂ në́₃?
55 ¿On₁juaꞌ₅₄ i₂në₅ ja₁ŋiꞌ₅₄ të₅ꞌmá₃? ¿On₁juaꞌ₅₄ chog₅₄ i₂chen₂ María? ¿On₁juaꞌ₅₄ i₂në₅ i₂lɨ́n₅ rɨnꞌ₅₄ Santiagoe quianꞌ₅₄ Së́₄, Si₂mu₅₄, Judas në́₃?
56 ¿On₁juaꞌ₅₄ jë₄ quián₂ jniog₄ la₂ tiánꞌ₅ ꞌio₅₄ rɨinꞌ₅₄ në́₃? ¿ꞌA₂ bá₄ jáꞌ₄ já₅ a₂ŋɨ́₄ lë₃ cuɨ́ꞌ₅ i₂në₅ ca₂le₃jë́₃ jág₁ a₂tɨin₂ në₅?
57 Jaun₂ tsá₃ dse₃ ca₂tɨ́n₂ dsa₂ jág₁ jaun₂ quióꞌ₅, tsá₃ juɨ₅ ca₂tónꞌ₃ dsa₂. La₁ ca₂juáꞌ₂ Jesús:
―Ca₂le₂con₂ bá₄ juɨg₂ siáꞌ₂ jme₂gan₃ dsa₂ juɨ₁liaꞌ₂ jan₂ dsa₂ i₂ꞌë́₂ jág₁ quián₅ Diú₄; jŋiaꞌ₅₄ liaꞌ₂ dsa₂ go₅₄ bá₄, tsá₃ jei₅₄, quianꞌ₅₄ dsa₂ dsi₂néi₂ quióꞌ₅ ꞌŋiog₅ në́₃.
58 Jaun₂ tsá₃ ma₃léi₄ juëꞌ₂ lɨn₅₄ ca₂jmo₃ ja₁jaun₂, ia₁ tsá₃ guëꞌ₂ ꞌén₂ dsa₂.