Ca₂jon₃ Juan₅₄ i₂chon₅ dsa₂ jmɨg₂
14
Jmɨg₄ jaun₂ Herodes, i₂jme₁lɨ́n₄ dsi₄máꞌ₂ ꞌuë₃ Galilea, ca₂rë₃ŋi₅ jág₁ a₂ŋɨ₅ Jesús le₂con₂ jaun₂.
2 Jaun₂ dsia₂₃ tsɨ́ꞌ₅ dsa₂ i₂jme₂ti₃ ta₁ ne₅₄:
―Juan₅₄ i₂chon₅ dsa₂ jmɨg₂ bá₄ në₅ ŋɨ₅; ma₂ca₂jeinꞌ₅₄ táng₃. ꞌUɨg₅₄ jaun₂ ꞌio₂₃ juɨ₅bí₂ a₂jmo₂₃ léi₄ juëꞌ₂.
3 Ia₁ le₂jŋiá₅ ma₂ca₂jŋaꞌ₃ dsa₂ Juan₅₄ ꞌéiꞌ₃ quióꞌ₅ Herodes, ca₂ꞌneiꞌ₂, ca₂toꞌ₂ dsa₂ néꞌ₃ ꞌmá₃ në́₃. Ca₂jmo₃ le₂në₅ ꞌuɨg₅₄ quióꞌ₄ ꞌio₅₄ Herodías i₂jme₁lë́₄ dsa₂ mɨ́₂ quián₅ Fe₂li₄ rɨinꞌ₅₄.
4 Ia₁ ꞌlióng₂ ráun₂ ma₂qui₂ma₂juáꞌ₂ Juan₅₄ ma₂qui₂ma₂tsɨ́ꞌ₃ Herodes: “Tsá₃ ꞌi₄ ꞌéiꞌ₃ cángꞌ₄ ꞌio₅₄ në₅.”
5 ꞌUɨg₅₄ jág₁ jaun₂, jme₁ꞌnio₃ Herodes jŋɨiꞌ₃ Juan₅₄, la₁ tsá₃ tiá₂ dsɨ́₅, ia₁ jme₁gain₃ dsa₂; ia₁ ca₂le₃jɨ́n₃ bá₄ dsa₂ jme₁ꞌéin₂ a₂lɨ́n₅ Juan₅₄ jan₂ dsa₂ i₂ꞌë́₂ jág₁ quián₅ Diú₄.
6 La₁ caun₂ jmɨg₄ në́₃, jme₁ca₂dsɨ́ꞌ₃ Herodes ŋi₂, ca₂o₃ꞌɨ́n₃ ja₁mɨ́g₄ ꞌio₅₄ Herodías, ca₂dsáin₂ jɨn₄ dsa₂ i₂té₁ jmɨg₄. A₂në₅ në́₃ ca₂të́₂ dsɨ́₅ ꞌŋio₅ lɨn₃ Herodes,
7 ca₂liaꞌ₂ ca₂cuë₃ jág₁ quióꞌ₅, ca₂le₃jë́₃ ꞌɨin₂₃ Diú₄ a₂cuë₃ ꞌe₂ caun₂ a₂mɨ₃ ꞌio₅₄ bëꞌ₅₄ ꞌéi₂.
8 Jaun₂ në́₃, jme₁ma₂në₂tioꞌ₂ chog₅₄ jág₁, ŋó₃, ca₂juáꞌ₂:
―Cuë₄ mɨ₂dsi₄ Juan₅₄ i₂chon₅ dsa₂ jmɨg₂, të₂në₃, ꞌi₄ ꞌŋióꞌ₃ uɨng₅.a
9 Jaun₂ ca₂táꞌ₂ ꞌliaꞌ₂ dsɨ́₅ rag₅₄ jme₁ca₂nág₂ le₂në₅, la₁ tsá₃ ma₃ꞌe₂ ŋi₅ jmo₃, ia₁ ma₂në₂cuë₃ jág₁ quióꞌ₅ a₂ꞌɨin₂₃ Diú₄, të₃nag₅ dsa₂ i₂tionꞌ₅₄ dsi₂néi₂ ja₁niog₅ jmɨg₄.
10 Jaun₂ lë₃, ca₂jmo₃ ꞌéiꞌ₃ a₂ca₂i₁quiꞌ₂ dsa₂ mɨ₂dsi₄ Juan₅₄ dsi₂néi₂ tsɨ₁ꞌné₅ ꞌmá₃.
11 Dsɨ₂juɨ₅ jaun₂ bá₄ ca₂o₃can₅ dsa₂ mɨ₂dsi₄ Juan₅₄ rë₂ꞌi₄ ꞌŋióꞌ₃ uɨng₅,b jaun₂ ca₂cuë́ꞌ₃ ꞌio₅₄ bëꞌ₅₄ ꞌéi₂, jaun₂ ꞌéi₂ në́₃ ca₂i₁con₂ ne₄ chog₅₄.
12 Jme₁co₂lág₂ jaun₂ në́₃, ca₂o₃lén₂ dsa₂ i₂jme₁quianꞌ₅₄ Juan₅₄, jaun₂ ca₂tág₃ ꞌlag₄ ꞌéi₂ ca₂i₁ꞌó₄. Jaun₂ guë́₄ ca₂i₁lein₅₄ ca₂i₁chiꞌ₄ Jesús.
Ca₂jme₃tan₅₄ Jesús ꞌŋiá₂ mei₅ dsa₂
13 Jme₁ca₂rë₃ŋi₅ Jesús jág₁ në₅, ca₂o₃ꞌɨ́in₃ ja₁jme₁ꞌein₅₄, ca₂ꞌí₃ ꞌŋióꞌ₃ caun₂ tsɨ₁mu₅, a₂jme₁i₂ꞌi₅ caun₂ ja₁co₂ꞌŋiog₅. La₁ juɨn₅ dsa₂ juɨg₂ te₁ꞌi₁ conꞌ₂ ma₂quián₅ jaun₂ ca₂rë₃ŋi₅, jaun₂ ca₂ꞌuɨin₂, ca₂i₁lein₅₄ ca₂i₁ꞌein₂₃ Jesús juɨ₅ tag₅₄.
14 Jme₁ca₂dsióg₃ Jesús le₂ꞌŋoꞌ₅₄ jmɨg₂, ca₂jág₃ juɨn₅ lɨn₃ dsa₂ ma₂tión₂ le₁jŋiog₅. Jaun₂ ca₂dsia₃ ŋéi₂ dsɨ́₅ dsa₂ ꞌéi₂, ca₂jme₃ꞌlióin₂ dsa₂ i₂jme₁qui₂le₁dsoꞌ₅₄ quián₅ dsa₂.
15 Të₂le₃ ca₂ꞌláu₂ jaun₂, ca₂o₃lén₂ chiꞌ₂ dsɨ₂guia₃-tɨ́n₂ ca₂juáꞌ₂ ca₂tsɨ́ꞌ₃ Jesús:
―Ca₂ꞌláu₂ bá₄ la₂, tonꞌ₂ caun₂ ja₁co₂ꞌŋiog₅ bá₄ la₂ ja₁tsá₃ ꞌein₂ tiánꞌ₅. ꞌEiꞌ₂ jág₁ dsa₂ ia₁jaun₂ dsɨ₃léin₂ le₂con₂ juɨg₂ ma₂quián₅ në₅, qui₂dsɨ₃lia₅ ca₂la₂ a₂guë́ꞌ₃.
16 Jaun₂ ca₂ŋag₃ Jesús:
―Tsá₃ tion₅₄; cuëꞌ₅₄ ꞌniaꞌ₂ dsa₂ guiongꞌ₅₄ a₂guë́ꞌ₃.
17 Jaun₂ ca₂ŋag₃ chiꞌ₂ dsɨ₂guia₃-tɨ́n₂:
―Tsá₃ ꞌe₂ a₂siáꞌ₂ cha₂ ja₁lá₃, jŋiaꞌ₅₄ liaꞌ₂ ꞌŋiá₂ i₁ŋíꞌ₄ bá₄, quianꞌ₅₄ on₃ i₁ju₁.
18 Jaun₂ ca₂juáꞌ₂ táng₃ Jesús:
―O₂quian₂ ꞌniaꞌ₂ ja₁lá₃.
19 Jaun₂ në́₃, ca₂tsɨ́ꞌ₃ dsa₂ a₂tiainꞌ₃ ne₄ ꞌuë₃. Jaun₂ ca₂jŋaꞌ₃ ta₁ꞌŋiá₂ i₁ŋíꞌ₄ quianꞌ₅₄ le₃on₃ i₁ju₁, jaun₂ ca₂chógꞌ₃ ne₅₄ gueiꞌ₅₄ i₂juɨ́g₃, ca₂cuë́ꞌ₃ ti₁ꞌmagꞌ₄ Diú₄. Jaun₂ ca₂dsioin₃ le₂caun₂ le₂caun₂ i₁ŋíꞌ₄, ca₂cuë́ꞌ₃ chiꞌ₂ dsɨ₂guia₃-tɨ́n₂. Jaun₂ ꞌéi₂ guë́₄ në́₃ ca₂dsióꞌ₃ jɨn₄ dsa₂.
20 Ca₂le₃jɨ́n₃ bá₄ dsa₂ ca₂guë́ꞌ₃ ca₂liaꞌ₂ ca₂ꞌágꞌ₃ dsɨ́₅. Jme₁ca₂lë₃ guë́ꞌ₅, jaun₂ ca₂cágꞌ₃ bá₄ guë́₄ guia₃-tɨ́n₂ tsɨ₁mɨꞌ₂ ꞌnau₅₄ a₂ca₂chóng₃.
21 Dsa₂ i₂ca₂guë́ꞌ₃ ꞌéi₂ jme₁tén₄ ꞌŋiá₂ mei₅ jmáꞌ₃ liaꞌ₂ dsa₂ ŋeꞌ₂, i₂siánꞌ₂ bá₄ dsa₂ mɨ́₂, chiꞌ₂ në́₃.
Ca₂ŋɨ₃ Jesús ne₄ jmɨ₁ŋíꞌ₄
22 Dsɨ₂juɨ₅ jme₁ca₂lë₃ jaun₂, ca₂jmo₃ Jesús ꞌéiꞌ₃ a₂tónꞌ₃ chiꞌ₂ dsɨ₂guia₃-tɨ́n₂ ꞌŋióꞌ₃ tsɨ₁mu₅, a₂ŋɨ́₃ deꞌ₂ ꞌéi₂ jmɨg₂ le₁jŋiái₄ liaꞌ₂ conꞌ₂ guë́₄ ꞌŋiog₅ a₂dsɨ₃lein₃, të₁liaꞌ₂ ꞌí₂ ꞌŋiog₅ ꞌágꞌ₅ jág₁ dsa₂.
23 Jme₁ca₂lë₃ ꞌágꞌ₅ jág₁ dsa₂, ca₂ŋó₃ juɨ₅ máꞌ₂ i₁chi₂i₁leinꞌ₄ Diú₄. Ca₂tóꞌ₂ nei₂ jme₁ca₂tóꞌ₂, jaun₂ bá₄ ꞌein₅₄ ꞌŋiog₅.
24 Tsɨ₁mu₅ a₂tionꞌ₅₄ chiꞌ₂ dsɨ₂guia₃-tɨ́n₂ në́₃, jme₁ma₂dsiógꞌ₃ dsi₂jo₂ jmɨ₁ŋíꞌ₄. Jmɨg₂ në́₃, qui₂jnáꞌ₅ tiá₂ lɨn₃ dsoꞌ₂ tsɨ₁mu₅, ia₁ ꞌei₅ tiá₂ dsí₂ ꞌliogꞌ₂ le₃caꞌ₃.
25 Le₁né₃ të₂le₃ ca₂jnia₃ jaun₂, ca₂jme₃quián₃ Jesús ja₁ŋáuꞌ₄ tsɨ₁mu₅ tioinꞌ₅₄.
26 Jaun₂ në́₃ jme₁ca₂jág₂ chiꞌ₂ dsɨ₂guia₃-tɨ́n₂ jóinꞌ₅ ŋɨ₂₃ ne₄ jmɨ₁ŋíꞌ₄, ca₂juɨinꞌ₂ ca₂tóinꞌ₂ co₂mɨꞌ₅₄ ca₂guióꞌ₃ ca₂juáꞌ₂:
―¡Jme₂dsí₂ ꞌlɨnꞌ₅₄c bá₄ ó₃!
27 La₁ dsɨ₂juɨ₅ bá₄ ca₂juáꞌ₂ Jesús në́₃:
―¡Dsia₄ ꞌniaꞌ₂ tiá₂ ꞌauꞌ₂! ¡Jniá₂ bá₄ la₂; tsá₃ lë₁juɨ́nꞌ₂ ꞌniaꞌ₂!
28 Jaun₂ Pe₄ në́₃ ca₂ŋag₃:
―Te₁guiꞌ₅₄, chi₂juaꞌ₂ ꞌne₂ në₅, jmo₄ ꞌéiꞌ₃ a₂nei₅₄ ŋɨ₅₄ ne₄ jmɨg₂ a₂dsióg₄ të₂ ja₁chéngꞌ₄ në₅.
29 ―Ŋia₅ jaun₂ ―ca₂juáꞌ₂.
Jaun₂ ca₂sión₃ Pe₄ ꞌŋióꞌ₃ tsɨ₁mu₅, ca₂ŋɨ₃ ne₄ jmɨg₂ jme₁ŋó₄ ja₁chénꞌ₄ Jesús.
30 La₁ jme₁ca₂tónꞌ₃ juɨ₅ ca₂jág₃ ꞌa₂ liaꞌ₂ ꞌei₅ tiá₂ dsí₂, ca₂ja₃góꞌ₃ dsɨ́₅, jaun₂ guë́₄ ca₂rë₃lióg₃ ca₂i₃ꞌóinꞌ₅ jmɨg₂. Ca₂guióꞌ₃ tiá₂, ca₂juáꞌ₂:
―¡Lio₄ jniá₂, Te₁guiꞌ₅₄!
31 Dsɨ₂juɨ₅ jaun₂ ca₂néiꞌ₃ Jesús gu₂, ca₂tɨ́in₂ quióꞌ₅ Pe₄, jaun₂ juáꞌ₂:
―¡ꞌE₂ guë́₄ ca₂juɨg₄ ꞌénꞌ₂ ꞌne₂! ¿ꞌE₂ lë₃ në₂ꞌéiꞌ₂ caun₂-tɨn₃ ꞌauꞌ₂?
32 Jme₁ca₂i₃toinꞌ₅₄ ꞌŋióꞌ₃ tsɨ₁mu₅, ca₂ꞌág₂ táng₃ tei₄ dsí₂.
33 Jaun₂ i₂jme₁tionꞌ₅₄ ꞌŋióꞌ₃ tsɨ₁mu₅ ca₂jmo₃ i₁ꞌáin₃ ne₄ Jesús, ca₂jme₃juagꞌ₂. Jaun₂ ca₂juáꞌ₂:
―Dsónꞌ₂ bá₄ lɨ́ngꞌ₅ Ja₁ŋiꞌ₅₄ Diú₄.
Ca₂jme₃ꞌlión₂ Jesús dsa₂ dsoꞌ₅₄ ꞌuë₃ Genesaret
34 A₂ca₂ꞌain₂ jmɨg₂ jaun₂, ca₂dsi₃lein₃ ꞌuë₃ Genesaret.
35 Dsa₂ chan₂ ja₁jaun₂ në́₃, jme₁ca₂rë₃cuɨin₂₃ Jesús, jaun₂ ca₂i₁nioi₁₂ ca₂i₁can₅ jág₁ ca₂le₃jë́₃ juɨg₂ te₁ꞌi₁ le₃lágꞌ₃ jaun₂, jaun₂ ca₂o₃jŋia₃ dsa₂ ca₂le₃jɨ́n₃ dsa₂ i₂jme₁le₁dsoꞌ₅₄ ja₁ꞌen₅₄ Jesús.
36 Jaun₂ ca₂mɨ₃ tsá₃ a₂nag₅₄ o₁jŋiaꞌ₅₄ ꞌág₃ tag₄ tsɨnꞌ₅₄ bá₄ cuë₃ jmɨg₄ nɨ́ꞌ₃ dsa₂ i₂le₁dsoꞌ₅₄; jaun₂ në́₃, ca₂le₃jɨ́n₃ dsa₂ dsoꞌ₅₄ i₂qui₂ca₂nɨ́ꞌ₃ tsɨnꞌ₅₄ Jesús, ca₂ꞌlóin₂ co₂ŋeiꞌ₅₄ dso₄ a₂jme₁lɨ́in₄.