Ca₂ŋɨꞌ₃ Jesús ꞌŋiá₂ mei₅ dsa₂
6
Cang₂ jaun₂ ca₂ŋó₃ Jesús të₂le₃ quióng₄ ca₂taun₂ jmɨ₁ŋíꞌ₄ Galilea, (a₂chei₂ jmɨ₁ŋíꞌ₄ Tiberias).
2 Jaun₂ ca₂i₃lén₂ juɨn₅ lɨn₃ dsa₂ chi₁coꞌ₅₄ quióꞌ₅, ia₁ ma₂jág₃ léi₄ juëꞌ₂ a₂ma₂jmo₃, a₂qui₂ma₂ca₂jme₂ꞌlióin₂ dsa₂ i₂jme₁le₁dsoꞌ₅₄.
Jesús alimenta una multitud (Juan 6.1-15)
3 Jaun₂ në́₃ ca₂uɨ́g₂ Jesús caun₂ máꞌ₂, jaun₂ ca₂guá₂ ja₁jaun₂ quiainꞌ₅₄ chiꞌ₂ dsɨ₂guia₃-tɨ́n₂ quiáin₅.
4 Jmɨg₄ jaun₂, jme₁ma₂ja₂quián₃ Jmɨg₄ Të₂ꞌɨn₅₄*, co₂ꞌnióꞌ₄ jmɨg₄ quióꞌ₅ dsa₂ judíos*.
5 Jme₁ca₂jág₃ Jesús ca₂jɨ́in₂ juɨn₅ lɨn₃ dsa₂ i₂ja₂lén₂, jaun₂ ca₂juáꞌ₂ ca₂tsɨ́ꞌ₃ Felipe:
―¿A₂jáꞌ₄ dsɨ₁liá₄ má₃ a₂guë́ꞌ₃ ca₂le₃jɨ́n₃ dsa₂ në₅?
6 A₂jaun₂ bá₄ ca₂juáꞌ₂ Jesús le₂në₅ o₁ne₄ ꞌe₂ jme₁ŋag₃ Fe₂li₄, ia₁ jme₁ma₂ŋi₅ rë₂ bá₄ Jesús ꞌŋiog₅ ꞌe₂ a₂jmo₃.
7 Jaun₂ në́₃ ca₂ŋag₃ Fe₂li₄:
―Tɨn₃ ꞌŋiá₂-láu₂ denario* i₁ŋíꞌ₄ tsá₃ len₅ bá₄ guë́₄ a₂ŋe₂ jma₃ca₂juɨg₄ le₂jan₂ le₂jan₂ dsa₂.
8 Jaun₂ në́₃ ca₂ŋag₃ guë́₄ jan₂ chiꞌ₂ dsɨ₂guia₃-tɨ́n₂ quián₅ Jesús, i₂jme₁chen₂ Drë́₄ rɨnꞌ₅₄ Si₂mu₅₄ Pe₄:
9 ―Jë₄ la₂ ꞌen₅₄ jan₂ i₂bëꞌ₅₄ i₂quian₅ ꞌŋiá₂ i₁ŋíꞌ₄ cebada*, quianꞌ₅₄ guëꞌ₂ on₃ ju₄; la₁ia₁, ¿ꞌe₂ bá₄ cha₂ ꞌe₂ jaun₂, ja₁con₂ dsa₂ juɨn₅ le₂në₅?
10 Jaun₂ në́₃ ca₂juáꞌ₂ Jesús:
―Cheiꞌ₅₄ dsa₂ ca₂le₃jɨ́in₃ juɨ₁tiainꞌ₂₃.
ꞌLióng₂ ŋi₂maꞌ₂ jme₁cha₂ ja₁jaun₂, jaun₂ ca₂tiánꞌ₂ dsa₂ ŋeꞌ₂, i₂jme₁lë́₂ conꞌ₂ ꞌŋiá₂ mei₅ dsa₂.
11 Jaun₂ në́₃ ca₂can₃ Jesús i₁ŋíꞌ₄, jaun₂ jme₁ma₂në₂cuë́ꞌ₃ ti₁ꞌmagꞌ₄ Diú₄, qui₂ca₂dsióꞌ₃ ca₂cuë́ꞌ₃ ca₂le₃jɨ́n₃ dsa₂ i₂jme₁tiánꞌ₄ ja₁jaun₂.a Ján₃ bá₄ le₂jaun₂ ca₂jmo₃ quianꞌ₅₄ dsɨ₂ju₄ ꞌéi₂, ca₂cuë́ꞌ₃ ca₂le₃jɨ́n₃ dsa₂ ꞌa₂ conꞌ₂ jŋiaꞌ₅₄ ꞌnio₃.
12 Jaun₂ jme₁ma₂lɨ́ꞌ₃ dsa₂ guë́ꞌ₅, ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―Cagꞌ₅₄ ꞌniaꞌ₂ nɨ₁jne₁ i₁ŋíꞌ₄ a₂ca₂chóng₃, ia₁jaun₂ tsá₃ ꞌe₂ dsɨ₃ꞌén₂.
13 Jaun₂ ca₂cágꞌ₃, jaun₂ ca₂jme₃cainꞌ₂ guia₃-tɨ́n₂ tsɨ₁mɨꞌ₂ tá₂, quianꞌ₅₄ nɨ₁jne₁ a₂ca₂chóng₃ a₂ꞌŋiá₂ i₁ŋíꞌ₄ cebada jaun₂.
14 Jaun₂ në́₃, jme₁ca₂jág₃ dsa₂ léi₄ a₂ca₂jmo₃ Jesús, ca₂juáꞌ₂:
―Dsónꞌ₂ bá₄ lɨ́n₅ dsa₂ në₅ dsa₂ i₂ꞌë́₂ jág₁ quián₅ Diú₄, i₂lë́₅ jág₁ jiá₃ mɨ₂güɨ́g₃.
15 La₁ ca₂rë₃líꞌ₄ bá₄ Jesús a₂ꞌnio₃ dsa₂ jme₁të₂ tion₅₄, a₂jme₁jmóiꞌ₂ ꞌéi₂ rag₅₄, jaun₂ ca₂ŋáiꞌ₃ bá₄ táng₃ ca₂ꞌí₃ máꞌ₂ conꞌ₂ ꞌŋiog₅.
Ca₂ŋɨ₃ Jesús ne₄ jmɨg₂ jmɨ₁ŋíꞌ₄
16 Jme₁ca₂nei₂ jaun₂, ca₂sión₃ chiꞌ₂ dsɨ₂guia₃-tɨ́n₂ quiáin₅ ca₂të₂ jmɨ₁ŋíꞌ₄.
Jesús camina sobre el agua (Juan 6.16-22)
17 Jaun₂ ca₂tóinꞌ₂ ꞌŋióꞌ₃ caun₂ tsɨ₁mu₅, jaun₂ ca₂jme₃lióg₃ ca₂ꞌain₃ jmɨ₁ŋíꞌ₄ a₂dsɨ₃léin₂ Capernaum. Jme₁ma₂tóꞌ₂ nei₂ bá₄ jaun₂, tsá₃ jme₁ma₂quiongꞌ₅₄ bá₄ guë́₄ Jesús.
18 Jaun₂ ca₂rë₃lióg₃ ca₂ꞌág₂ dsí₂ tiá₂ lɨn₃, jaun₂ qui₂ca₂ronꞌ₂ jmɨ₁ŋíꞌ₄.
19 Jme₁ma₂ꞌain₂ conꞌ₂ ꞌŋiá₂-jŋéi₂ kilómetros, jaun₂ ca₂jág₃ a₂ja₂quián₃ Jesús cau₅ tsɨ₁mu₅, a₂ŋɨ₂₃ ne₄ jmɨg₂; jaun₂ ca₂rë₃góꞌ₅ ꞌŋio₅ lɨn₃.
20 La₁ia₁ ca₂juáꞌ₂ Jesús:
―¡Jniá₂ bá₄ la₂; tsá₃ lë₁jmo₂ ꞌniaꞌ₂ gangꞌ₃!
21 Jaun₂ në́₃ ca₂liaꞌ₂ ꞌioꞌ₂ jénꞌ₅ bá₄ ca₂guein₃b Jesús ꞌŋióꞌ₃ tsɨ₁mu₅, jaun₂ quianꞌ₅₄ ca₂tiá₂ co₂lág₂ bá₄ ca₂dsi₃léin₂ cheiꞌ₅₄ ꞌuë₃ ja₁jme₁tioinꞌ₅₄ juɨ₅ i₃léin₂.
ꞌNauꞌ₂ dsa₂ ꞌnaiꞌ₂ Jesús
22 Jme₁ca₂jnia₃ jaun₂, ca₂rë₃líꞌ₄ dsa₂ i₂të₁ꞌŋiá₄ të₂le₃ quióng₄ ca₂taun₂ jmɨ₁ŋíꞌ₄, a₂jme₁chíꞌ₄ caun₂ tan₅₄ tsɨ₁mu₅ ja₁jaun₂, tonꞌ₂ tsá₃ ca₂ꞌí₃ Jesús ꞌŋióꞌ₃ jaun₂ quiainꞌ₅₄ chiꞌ₂ dsɨ₂guia₃-tɨ́n₂; guion₅₄ bá₄ chiꞌ₂ dsɨ₂guia₃-tɨ́n₂ i₃léin₂.
El pan de vida (Juan 6.22-71)
23 La₁ të₁liaꞌ₂ jaun₂, o₃lé₂ tsɨ₁mu₅ siáꞌ₂ a₂ja₂lei₃ juɨg₂ Tiberias*, ca₂o₃lé₂ quián₅ ja₁ca₂guë́ꞌ₃ i₁ŋíꞌ₄ le₂jŋiá₅ jme₁ca₂lë₃ cuë́ꞌ₅ Te₁guiꞌ₅₄ ti₁ꞌmagꞌ₄ Diú₄.c
24 Jaun₂ në́₃, jme₁ca₂rë₃líꞌ₄ dsa₂ a₂tsá₃ Jesús chan₂ ja₁jaun₂, on₃ guëꞌ₂ chiꞌ₂ dsɨ₂guia₃-tɨ́n₂ quiáin₅, ca₂i₃toinꞌ₅₄ ꞌŋióꞌ₃ tsɨ₁mu₅, ca₂i₃léin₂ juɨ₅ Capernaum ca₂i₁ꞌniogꞌ₂.
Jesús bá₄ lɨ́n₅ i₁ŋíꞌ₄ a₂le₃chan₂ dsa₂ co₂tan₅₄
25 Jme₁ca₂dsi₃lén₂ dsa₂ të₂le₃ quióng₄ ca₂taun₂ jmɨ₁ŋíꞌ₄, ca₂dsáinꞌ₂ Jesús, jaun₂ ca₂ŋag₃:
―Të₅, ¿lɨ́gꞌ₂ guangꞌ₃ ja₁lá₃?
26 La₁ia₁ ca₂ŋag₃ Jesús ca₂tsɨ́ꞌ₃ dsa₂ ꞌéi₂:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, a₂ꞌnauꞌ₂ jniá₂ i₂niogꞌ₅₄, ia₁ ca₂quéꞌ₂ ꞌniaꞌ₂ liaꞌ₂ ꞌágꞌ₃ ꞌauꞌ₂ i₁ŋíꞌ₄, on₃juaꞌ₅₄ rëꞌ₂ ia₁ a₂ca₂rë₃ŋɨ́ꞌ₂ ꞌniaꞌ₂ léi₄ jaun₂.
27 Tsá₃ lë₁jmo₂ ꞌniaꞌ₂ ta₁ o₄quióꞌ₄ má₃ a₂jŋiaꞌ₅₄ conꞌ₂ dsɨ₃ꞌén₂, të₂le₃ o₄quióꞌ₄ má₃ a₂jiog₅ co₂tan₅₄ bá₄ jmo₄ ꞌniaꞌ₂ ta₁, a₂cuë₅ Jaun₅* dsa₂ mɨ₂güɨ́g₃. Ia₁ ne₄ ꞌéi₂ ma₂tióng₃ ꞌŋiog₅ bá₄ Diú₄ Jmei₂ léi₄ quióꞌ₅.
28 Jaun₂ në́₃ ca₂ŋag₃ dsa₂:
―¿ꞌE₂ ꞌnióꞌ₅ jmó₁ jniaꞌ₅₄ ia₁jaun₂ lé₂ le₃jmó₁ jniaꞌ₅₄ ta₁ a₂ꞌnio₃ Diú₄ jmó₁?
29 Jaun₂ ca₂ŋag₃ Jesús:
―A₂la₂ bá₄ ta₁ quióꞌ₅ Diú₄: a₂le₃ꞌénꞌ₂ ꞌniaꞌ₂ të₂le₃ quióꞌ₅ i₂chen₄ quiáin₅.
30 Jaun₂ në́₃ ca₂ŋag₃ dsa₂:
―¿ꞌE₂ léi₄ lé₂ le₃ꞌë́ꞌ₂ jniaꞌ₅₄, ia₁jaun₂ jag₅₄ jniaꞌ₅₄ jaun₂ le₃ꞌéin₂ jniaꞌ₅₄ quiángꞌ₂? ¿ꞌE₂ léi₄ jmóꞌ₂?
31 Dsa₂ canꞌ₅₄ quián₂ jniaꞌ₅₄ ma₂lɨ́gꞌ₂, ca₂guë́ꞌ₃ i₁ŋíꞌ₄ maná*, liaꞌ₂ conꞌ₂ jme₁tioinꞌ₅₄ ꞌuë₃ quein₂ co₂ꞌŋiog₅ jaun₂, juɨ₁liaꞌ₂ juáꞌ₂ ne₄ Si₂ quióꞌ₅ Diú₄: “Ca₂cuë₃ Moisés ca₂guë́ꞌ₃ ꞌéi₂ i₁ŋíꞌ₄ a₂ca₂já₃ gueiꞌ₅₄ i₂juɨ́g₃.”d
32 Jaun₂ ca₂ŋag₃ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂: on₃juaꞌ₅₄ Moisés i₂ca₂cuë₃ i₁ŋíꞌ₄ a₂já₅ gueiꞌ₅₄ i₂juɨ́g₃; Ŋeꞌ₃ bá₄ jniá₂ i₂cuë́ꞌ₅ ꞌniaꞌ₂ i₁ŋíꞌ₄ të₃dsónꞌ₂ a₂já₅ gueiꞌ₅₄ i₂juɨ́g₃.
33 Ia₁ juɨ₁liaꞌ₂ i₁ŋíꞌ₄ a₂já₅ ja₁con₂ Diú₄, i₂ꞌéi₂ bá₄ lɨ́n₅, i₂ca₂sión₃ gueiꞌ₅₄ i₂juɨ́g₃, i₂jmo₅ a₂le₃chan₂ dsa₂ co₂tan₅₄.
34 Jaun₂ në́₃ ca₂juáꞌ₂ dsa₂ ca₂tsɨ́ꞌ₃ Jesús:
―Te₁guiꞌ₅₄, cuë₄ liaꞌ₂ o₂jmɨg₄ i₁ŋíꞌ₄ a₂ꞌëꞌ₂ ꞌne₂ në₅.
35 Jaun₂ ca₂juáꞌ₂ Jesús:
―Jniá₂ bá₄ lɨ́ng₅ i₁ŋíꞌ₄ a₂jmo₅ a₂le₃chan₂ dsa₂. Juɨ₁liaꞌ₂ i₂ja₂ ja₁con₂ jniá₂, liaꞌ₂ o₁lɨ́gꞌ₂ jmɨg₄ tsá₃ ma₃lé₂ i₁cónꞌ₅; ján₃ bá₄ le₂jaun₂ juɨ₁liaꞌ₂ i₂ꞌén₂ të₂le₃ quió₃ jniá₂, liaꞌ₂ o₁lɨ́gꞌ₂ jmɨg₄ tsá₃ ma₃le₃quein₂ dsɨ́₅.
36 La₁ juɨ₁liaꞌ₂ ma₂në₂juɨ́g₂ jniá₂ ꞌniaꞌ₂, tsá₃ ꞌénꞌ₂ ꞌniaꞌ₂ o₁jŋiaꞌ₅₄ ma₂në₂jagꞌ₅₄ ꞌniaꞌ₂ jniá₂.
37 Ca₂le₃jɨ́n₃ juɨ₁liaꞌ₂ dsa₂ i₂cuɨn₅ Ŋeꞌ₃ cuɨg₂₃ jniá₂, ja₃léin₂ ja₁con₂ jniá₂; jaun₂ juɨ₁liaꞌ₂ i₂ja₂ ja₁con₂ jniá₂, liaꞌ₂ o₁ꞌe₂ guë́₃ tsá₃ dséin₄ jniá₂.
38 Ia₁ on₃juaꞌ₅₄ jaun₂ guio₃ jniá₂ ca₂sióng₃ gueiꞌ₅₄ i₂juɨ́g₃ juaꞌ₅₄ a₂jmo₅₄ a₂ꞌŋio₂ dsɨ₃ ꞌŋió₃; a₂jaun₂ bá₄ guio₃ a₂jmo₅₄ a₂ꞌŋio₂ dsɨ́₅ i₂ca₂chei₃.
39 A₂la₂ bá₄ a₂ꞌŋio₂ dsɨ́₅ i₂ca₂chei₃: a₂tsá₃ qui₂dsɨ₃cónꞌ₅ ꞌi₁jan₂ i₂ma₂cuɨn₃ ꞌéi₂ jniá₂, të₂le₃ a₂jme₁jeinꞌ₅₄ bá₄ jniá₂ jmɨg₄ jë₁ca₂tóꞌ₂.
40 A₂la₂ bá₄ a₂ꞌŋio₂ dsɨ́₅ Ŋeꞌ₃: juɨ₁liaꞌ₂ ca₂le₃jɨ́n₃ i₂jɨ́n₂ Ja₁ŋiꞌ₅₄ tonꞌ₂ ꞌéin₂ të₂le₃ quióꞌ₅, juɨ₁le₂chain₂ co₂tan₅₄, jaun₂ jniá₂ në́₃ jme₁jeinꞌ₅₄ jmɨg₄ jë₁ca₂tóꞌ₂.
41 Quianꞌ₅₄ jág₁ në₅ ca₂jme₃lióg₃ dsa₂ judíos qui₂ca₂dsia₃ guioin₅₄, ca₂chi₃ꞌɨin₃ Jesús ia₁ jme₁ma₂në₂juáꞌ₂: “Jniá₂ bá₄ lɨ́ng₅ i₁ŋíꞌ₄ i₂ca₂sión₃ gueiꞌ₅₄ i₂juɨ́g₃.”
42 Jaun₂ ca₂juáꞌ₂:
―¿On₃juaꞌ₅₄ i₂në₅ Jesús ja₁ŋiꞌ₅₄ Së́₄? I₂cuɨn₅ bá₄ jniog₄ chog₅₄-jmei₂ i₂në₅. ¿ꞌA₂ guëꞌ₂ liaꞌ₂ juáꞌ₂ a₂ca₂sióin₃ gueiꞌ₅₄ i₂juɨ́g₃?
43 Jaun₂ në́₃ ca₂juáꞌ₂ Jesús:
―Tsá₃ lë₁ma₃chi₂ꞌág₅ ꞌniaꞌ₂.
44 Liaꞌ₂ ꞌi₁jan₂ tsá₃ lé₂ jiá₃ ja₁con₂ jniá₂, juaꞌ₅₄ tsá₃ o₂jiog₃ Ŋeꞌ₃ i₂ca₂chei₃; jaun₂ jniá₂ jme₁jeinꞌ₅₄ jmɨg₄ jë₁ca₂tóꞌ₂.
45 Le₂la₂ ca₂tóꞌ₂ ne₄ Si₂ dsa₂ i₂jme₁ꞌë́₂ jág₁ o₄quióꞌ₄ Diú₄: “Diú₄ bá₄ jme₃tag₅ jme₃tɨin₂₃ ca₂le₃jɨ́n₃ dsa₂.”e Jaun₂ ca₂le₃jɨ́n₃ juɨ₁liaꞌ₂ i₂nag₅ jág₁ quióꞌ₅ Ŋeꞌ₃, tonꞌ₂ qui₂rë₂tɨin₂ ꞌe₂ a₂jmo₅ ꞌéi₂, ja₃léin₂ bá₄ ja₁con₂ jniá₂.
46 On₃juaꞌ₅₄ rëꞌ₂ ia₁ ꞌein₂ ma₂jɨ́n₂ Jmei₂. Jŋiaꞌ₅₄ liaꞌ₂ i₂ca₂já₃ ja₁con₂ Diú₄; i₂ꞌéi₂ bá₄ ma₂jɨ́n₂ Jmei₂.
47 A₂dsónꞌ₂ juɨ́g₂ jniá₂ ꞌniaꞌ₂, juɨ₁liaꞌ₂ i₂ꞌén₂,f le₃chain₂ co₂tan₅₄.
48 Jniá₂ bá₄ lɨ́ng₅ i₁ŋíꞌ₄ a₂jmo₅ a₂le₃chan₂ dsa₂.
49 Qui₂ca₂guë́ꞌ₃ dsa₂ canꞌ₅₄ quiánꞌ₂ ꞌniaꞌ₂ i₁ŋíꞌ₄ maná, liaꞌ₂ conꞌ₂ jme₁tioinꞌ₅₄ ꞌuë₃ quein₂ co₂ꞌŋiog₅ jaun₂, la₁ ca₂dsain₃ bá₄.
50 A₂la₂ bá₄ lë́₅ i₁ŋíꞌ₄ a₂ca₂sió₃ gueiꞌ₅₄ i₂juɨ́g₃ ia₁jaun₂ në₁juaꞌ₂ ꞌein₂ ca₂guë́ꞌ₃, tsá₃ dsiáin₃.
51 Jniá₂ bá₄ lɨ́ng₅ i₁ŋíꞌ₄ jénꞌ₃ i₂ca₂sión₃ gueiꞌ₅₄ i₂juɨ́g₃ jaun₂; juɨ₁liaꞌ₂ i₂guë́ꞌ₅ i₁ŋíꞌ₄ la₂, le₃chain₂ co₂tan₅₄. I₁ŋíꞌ₄ juɨ₁liaꞌ₂ a₂juáꞌ₅ jniá₂ cuë₅₄, nɨ₁ŋɨ₃ ꞌŋió₃ bá₄ jniá₂ ꞌë₂₃, a₂jángꞌ₄ jniá₂ ia₁jaun₂ le₃chan₂ dsa₂ mɨ₂güɨ́g₃.
52 Jaun₂ në́₃ qui₂ca₂chen₃ dsa₂ judíos guioin₅₄, a₂juáꞌ₂:
―¿ꞌA₂ liaꞌ₂ lé₂ le₃cuë₃ i₂në₅ ŋɨ₅₄ ꞌŋiog₅ a₂que₅₄ jniog₄?
53 Jaun₂ ca₂juáꞌ₂ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, në₁juaꞌ₂ tsá₃ ca₂quéꞌ₂ ꞌniaꞌ₂ ŋɨ₄ Jaun₅* dsa₂ mɨ₂güɨ́g₃, në₁juaꞌ₂ tsá₃ ca₂ꞌénꞌ₂ ꞌniaꞌ₂ jmɨ₂ ꞌain₅₄ në́₃, tsá₃ jénꞌ₃ ꞌniaꞌ₂ të₁liaꞌ₂ changꞌ₂.
54 Juɨ₁liaꞌ₂ i₂guë́ꞌ₅ ŋɨ₃ jniá₂, tonꞌ₂ ꞌɨ́nꞌ₂ jmɨ₃ jniá₂ në́₃, le₃chain₂ bá₄ co₂tan₅₄; jaun₂ jniá₂ jme₁jeinꞌ₅₄ jmɨg₄ jë₁ca₂tóꞌ₂.
55 Ia₁ nɨ₁ŋɨ₃ jniá₂ bá₄ lë́₅ má₃ a₂tí₅ dsónꞌ₂; ján₃ bá₄ le₂jaun₂ jmɨ₃ jniá₂ lë́₅ jmɨg₂ a₂ꞌágꞌ₃ dsɨ́₅ të₃dsónꞌ₂.
56 Juɨ₁liaꞌ₂ i₂guë́ꞌ₅ ŋɨ₃ jniá₂, tonꞌ₂ ꞌɨ́nꞌ₂ jmɨ₃ jniá₂ në́₃, të₂ꞌŋiai₅₄ le₃quió₃ jniá₂; jniá₂ guëꞌ₂ le₃quióꞌ₅ ꞌéi₂.
57 Juɨ₁liaꞌ₂ ca₂chei₃ Ŋeꞌ₃ jénꞌ₃ ca₂chei₃ jniá₂, jaun₂ chan₂ jniá₂ ꞌuɨg₅₄ quióꞌ₅ ꞌéi₂, ján₃ bá₄ le₂jaun₂, juɨ₁liaꞌ₂ i₂guë́ꞌ₅ quió₃ jniá₂, le₃chain₂ ꞌuɨg₅₄ quió₃ jniá₂.
58 A₂la₂ bá₄ ꞌë₂₃ i₁ŋíꞌ₄ i₂ca₂sión₃ gueiꞌ₅₄ i₂juɨ́g₃. Qui₂ca₂guë́ꞌ₃ dsa₂ canꞌ₅₄ quiánꞌ₂ ꞌniaꞌ₂ i₁ŋíꞌ₄ maná, la₁ ca₂dsain₃; la₁ juɨ₁liaꞌ₂ i₂guë́ꞌ₅ i₁ŋíꞌ₄ la₂, le₃chain₂ bá₄ co₂tan₅₄.
59 Jág₁ në₅ ca₂juáꞌ₂ Jesús të₁liaꞌ₂ ca₂jme₃tag₂₃ dsi₂néi₂ guáꞌ₅ sinagoga* jë₄ juɨg₂ Capernaum.
Jág₁ a₂le₃chan₂ dsa₂ co₂tan₅₄
60 Jme₁ca₂nág₂ dsa₂ jág₁ jaun₂ a₂jme₂tag₅ Jesús, juɨn₅ dsa₂ i₂quianꞌ₅₄ Jesús ca₂juáꞌ₂:
―Jág₁ a₂juáꞌ₂ në₅ ꞌŋio₅ lɨn₃ juɨ́ꞌ₅, quian₅ ta₁ guéi₁. ¿ꞌEin₂ bá₄ lé₂ le₃tónꞌ₂ juɨ₅ quióꞌ₅?
61 Jaun₂ në́₃ ca₂rë₃líꞌ₄ Jesús ꞌe₂ jág₁ chen₅ dsa₂ tioinꞌ₅₄, o₄quióꞌ₄ jág₁ jaun₂, jaun₂ ca₂juáꞌ₂:
―¿O₃ bá₄ tsá₃ dse₃ ca₂tɨ́nꞌ₂ ꞌniaꞌ₂ jág₁ në₅?
62 ¿ꞌE₂ bá₄ lé₂ jaun₂ në₁juaꞌ₂ ca₂jɨngꞌ₅₄ ꞌniaꞌ₂ Jaun₅ dsa₂ mɨ₂güɨ́g₃ a₂uɨ́g₂ táng₃ ja₁jme₁ꞌein₅₄ le₂jŋiá₅?
63 Jme₂dsí₂ bá₄ i₂jmo₅ a₂chan₂ dsa₂; juɨ₁liaꞌ₂ nɨ₁ŋɨ₁ dsa₂ në́₃, tsá₃ ta₁ tí₄. La₁ jág₁ a₂ma₂në₂juɨ́g₂ jniá₂ ꞌniaꞌ₂, a₂gu₂dsí₂ bá₄ jaun₂, tonꞌ₂ jmo₅ a₂chan₂ dsa₂.
64 La₁ tionꞌ₅₄ bá₄ guë́₄ i₂lɨn₅₄ ꞌniaꞌ₂ i₂tsá₃ ꞌén₂.
Ia₁ jme₁ma₂ŋi₅ bá₄ Jesús liaꞌ₂ conꞌ₂ le₂ꞌuɨg₅₄ i₂ꞌein₂ ꞌéi₂ tsá₃ ꞌén₂, i₂ꞌein₂ guëꞌ₂ i₂jángꞌ₂ cang₂.
65 Jaun₂ ca₂juáꞌ₂:
―ꞌUɨg₅₄ jaun₂ ma₂në₂juɨ́g₂ jniá₂ ꞌniaꞌ₂, liaꞌ₂ ꞌi₁jan₂ tsá₃ lé₂ jiá₃ ja₁con₂ jniá₂ juaꞌ₅₄ tsá₃ o₂jiog₃ Ŋeꞌ₃.
66 Ca₂le₃jaun₂, juɨn₅ dsa₂ i₂jme₁i₂nio₄ quiainꞌ₅₄ Jesús ca₂i₃uɨ́in₂ cau₅, tsá₃ ma₃jme₁i₂nioi₅₄ quiainꞌ₅₄ ꞌéi₂.
67 Jaun₂ në́₃ ca₂ŋag₃ Jesús ca₂ŋɨ́iꞌ₃ chiꞌ₂ dsɨ₂guia₃-tɨ́n₂:
―¿O₃ bá₄ ꞌniogꞌ₂ ꞌniaꞌ₂ o₁nogꞌ₁ ján₃?
68 La₁ ca₂ŋag₃ Si₂mu₅₄ Pe₄:
―Te₁guiꞌ₅₄, ¿ne₄ ꞌein₂ lé₂ dsɨ₁náu₄ jniaꞌ₅₄? Ia₁ ꞌne₂ bá₄ ꞌauꞌ₂ jág₁ a₂le₃chong₂ jniaꞌ₅₄ co₂tan₅₄.
69 Ma₂ca₂rë₃ꞌéin₂ bá₄ jniaꞌ₅₄, jaun₂ ne₄ jniaꞌ₅₄, ꞌne₂ bá₄ lɨ́ngꞌ₅ I₂jŋió₅ quián₅ Diú₄.g
70 Jaun₂ ca₂ŋag₃ Jesús:
―¿On₁juaꞌ₅₄ jniá₂ ca₂quiongꞌ₅₄ ꞌniaꞌ₂ ta₁guia₃-tɨ́nꞌ₂? La₁ia₁, jan₂ i₂ꞌen₅₄ jë₄ quiánꞌ₂ ꞌniaꞌ₂ lɨ́n₅ i₂ꞌlɨnꞌ₅₄.
71 (A₂ca₂juáꞌ₂ Jesús le₂në₅ a₂ꞌɨin₂₃ Judas bá₄, ja₁ŋiꞌ₅₄ Si₂mu₅₄ Iscariote,h ia₁ Judas bá₄ i₂jángꞌ₂ quióꞌ₅, o₁jŋiaꞌ₅₄ lɨ́in₅ jan₂ dsa₂ guia₃-tɨ́n₂.)