Ca₂jme₃ꞌlión₂ Jesús jan₂ dsa₂ ꞌlianꞌ₂ i₂ron₅ cau₅ Dsiog₅ Betesda
5
Cang₂ jaun₂ ca₂jmo₃ dsa₂ judíos* caun₂ jmɨg₄, jaun₂ ca₂uɨ́g₂ táng₃ Jesús juɨ₅ Jerusalén.
2 Jë₄ juɨg₂ Jerusalén jaun₂, cau₅ ja₁lë́₄ caun₂ o₄ꞌné₄ a₂chei₂ quióꞌ₅ Jáꞌ₂ Chaꞌ₂, niog₅ caun₂ dsiog₅ a₂chei₂ Betesdaa quianꞌ₅₄ jág₁ arameo*, ja₁lë́₄ ꞌŋiá₂ corredor.
Jesús cura en Sábado (Juan 5.1-15)
3 Ja₁jaun₂ jme₁tiánꞌ₄ ꞌuë₃ juɨn₅ dsa₂ i₂qui₂le₁dsoꞌ₅₄, jë́₃ dsa₂ ten₄, dsa₂ guianꞌ₅₄ quianꞌ₅₄ dsa₂ ꞌlianꞌ₂ në́₃, a₂chi₁jŋia₂₃ a₂qui₃jë́ꞌ₂ jmɨg₂.
4 Ia₁ jme₁lɨn₅₄, sión₅ jan₂ ángel quián₅ Te₁guiꞌ₅₄ ja₁niog₅ dsiog₅ jaun₂, jaun₂ jmo₂₃ qui₂jë́ꞌ₂ jmɨg₂. Jaun₂ juɨ₁liaꞌ₂ dsa₂ dsoꞌ₅₄ i₂ꞌí₂ le₂ꞌuɨg₅₄ jmɨg₂ jë₁ma₂i₂bi₅₄, jme₁jŋia₅ quióꞌ₅, chi₂juaꞌ₂ ꞌe₂ dso₄ jme₁lɨ́in₄.b
5 Ja₁jaun₂ jme₁ron₅ jan₂ dsa₂ dsoꞌ₅₄, jme₁ma₂të́₂ guióg₂-guiá₂-jŋiá₂ ŋi₂ roin₂₃ dsoꞌ₅₄.
6 Jme₁ca₂jág₃ Jesús ron₅ dsa₂ dsoꞌ₅₄ ja₁jaun₂, jaun₂ jme₁ca₂rë₃líꞌ₄ ma₂lɨ́gꞌ₂ bá₄ lɨ́in₅ le₂jaun₂, ca₂ŋag₃:
―¿ꞌNiogꞌ₂ ꞌlióngꞌ₂?
7 Jaun₂ ca₂ŋag₃ dsa₂ dsoꞌ₅₄:
―Guiꞌ₅₄, tsá₃ ꞌein₂ chan₂ toꞌ₂ jniá₂ ꞌŋióꞌ₃ dsiog₅ jë₁ma₂të́₂ rë₁qui₃jë́ꞌ₂ jmɨg₂. Liaꞌ₂ co₂ráun₂ ꞌnio₃ ꞌú₄, i₂siánꞌ₂ bá₄ sión₅ le₂ꞌuɨg₅₄.
8 Jaun₂ ca₂juáꞌ₂ Jesús:
―Nau₂, chogꞌ₅₄ tsɨ₁jein₁ quiángꞌ₂, ŋɨ₄ në́₃.
9 Dsɨ₂juɨ₅ le₂jaun₂ bá₄ ca₂jŋia₃ quióꞌ₅ dsa₂ ꞌéi₂. Ca₂chógꞌ₃ tsɨ₁jein₁ quióꞌ₅, jaun₂ ca₂jme₃lióg₃ ca₂ŋɨ₃. A₂jaun₂ ca₂lë₃ caun₂ jmɨg₄ sa₅₄*.
10 Jaun₂ ca₂juáꞌ₂ dsa₂ judíos ca₂tsɨ́ꞌ₃ dsa₂ i₂ca₂ꞌlón₂ ꞌéi₂:
―Jmɨg₄ sa₅₄ bá₄ në₃; tsá₃ ꞌi₄ ꞌéiꞌ₃ caunꞌ₅₄ tsɨ₁jein₁ quiángꞌ₂ jmɨg₄ në₃.
11 Jaun₂ ca₂ŋag₃ dsa₂ ꞌéi₂:
―I₂në₂jme₃ꞌlió₂ jniá₂, në₂juáꞌ₂: “Chogꞌ₅₄ tsɨ₁jein₁ quiángꞌ₂, ŋɨ₄ në́₃.”
12 Jaun₂ në́₃ ca₂ŋag₃ táng₃ dsa₂ ꞌéi₂:
―¿ꞌEin₂ ꞌéi₂ në₂juáꞌ₂ a₂caunꞌ₅₄ tsɨ₁jein₁ quiángꞌ₂, a₂ŋɨ́ꞌ₂ në́₃?
13 La₁ tsá₃ ŋi₅ ꞌein₂ ꞌéi₂ i₂në₂jme₃ꞌlió₂ quióꞌ₅, ia₁ jme₁ma₂i₂cónꞌ₅ Jesús jɨn₄ dsa₂ juɨn₅ i₂jme₁tionꞌ₅₄ ja₁jaun₂.
14 Cang₂ jaun₂ ca₂jenꞌ₂ Jesús ca₂jeinꞌ₂ dsa₂ ꞌéi₂ i₁dsi₅ guáꞌ₅ templo*, jaun₂ ca₂juáꞌ₂:
―Jag₄ deꞌ₂, në₃ liaꞌ₂ ma₂ꞌlóngꞌ₂, tsá₃ ma₃lë₁ꞌnau₂ dso₄, ia₁jaun₂ tsá₃ dsɨ₃ŋɨ́gꞌ₂ caun₂ jmɨ₁uɨg₅ ꞌŋio₅ guë́₄ conꞌ₂ guë́₄ a₂jme₁lɨ́ngꞌ₄ le₂jŋiá₅.
15 Jaun₂ ŋáꞌ₃ bá₄ dsa₂ ꞌéi₂, jaun₂ ca₂i₁chiꞌ₄ dsa₂ judíos, Jesús bá₄ ꞌéi₂ i₂ca₂jme₃ꞌlió₂ quióꞌ₅.
16 ꞌUɨg₅₄ jaun₂ qui₂ca₂co₃ꞌein₃ dsa₂ judíos quióꞌ₅ Jesús,c ia₁ jme₁tɨn₂ Jesús jme₁jmo₂₃ le₂në₅ jmɨg₄ sa₅₄.
Jesús defiende su autoridad (Juan 5.16-47)
17 La₁ ca₂juáꞌ₂ Jesús ca₂tsɨ́ꞌ₃ dsa₂ judíos:
―Liaꞌ₂ jmo₅ jaun₂ Ŋeꞌ₃ ta₁ jŋiaꞌ₅₄ jmɨg₄ në₃; ján₃ bá₄ le₂jaun₂ jmo₅ jniá₂ ta₁.
18 ꞌUɨg₅₄ jaun₂, të₂le₃ i₂juɨꞌ₂ guë́₄ jme₁ꞌnio₃ jŋagꞌ₃ dsa₂ judíos, ia₁ on₃juaꞌ₅₄ jmáꞌ₃ ꞌéiꞌ₃ jmɨg₄ sa₅₄ jmo₂₃ cau₅, ján₃ bá₄ ca₂të₂ jmo₂₃ a₂lɨ́in₅ co₂rɨin₂ quianꞌ₅₄ Diú₄, ia₁ a₂juáꞌ₂ Diú₄ bá₄ lɨ́n₅ Jmei₂.
ꞌÉiꞌ₃ a₂ron₅ quióꞌ₅ Ja₁ŋiꞌ₅₄ Diú₄.
19 Jaun₂ në́₃ ca₂juáꞌ₂ Jesús ca₂tsɨ́ꞌ₃ dsa₂ judíos:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, tsá₃ ꞌe₂ lé₂ le₃jmo₃ Ja₁ŋiꞌ₅₄ ꞌi₁caun₂ ꞌŋiog₅; a₂jaun₂ bá₄ jmo₂₃ juɨ₁liaꞌ₂ a₂jág₅ jmo₅ Jmei₂. Juɨ₁liaꞌ₂ ꞌe₂ ta₁ a₂jmo₅ Jmei₂, a₂jaun₂ bá₄ jmo₅ Ja₁ŋiꞌ₅₄ ján₃.
20 Ia₁ ꞌnio₃ Jmei₂ ꞌnioi₃ Ja₁ŋiꞌ₅₄, jaun₂ ꞌë₂₃ ꞌë́ꞌ₅ Ja₁ŋiꞌ₅₄ ca₂le₃jë́₃ ꞌe₂ a₂jmo₂₃. Të₂le₃ lë́₅ guë́₄ juëꞌ₂ ta₁ qui₃ꞌë₃, conꞌ₂ guë́₄ a₂le₂la₂, ia₁jaun₂ qui₂dsɨ₃góꞌ₃ ꞌauꞌ₂ ꞌniaꞌ₂.
21 Ia₁, juɨ₁liaꞌ₂ jme₂jenꞌ₅₄ Jmei₂ jme₂jeinꞌ₅₄ ꞌlag₄, cuë₂₃ jme₂dsí₂ a₂le₃chain₂, ján₃ bá₄ le₂jaun₂ cuë₅ Ja₁ŋiꞌ₅₄ jme₂dsí₂ cuë́ꞌ₅ juɨ₁liaꞌ₂ i₂ꞌnio₃ cuë́ꞌ₃.
22 Ján₃ guëꞌ₂, tsá₃ con₂ Jmei₂ ꞌí₁ quióꞌ₅ ꞌi₁jan₂; o₄gú₃ Ja₁ŋiꞌ₅₄ bá₄ ma₂dsia₃ ca₂le₃jë́₃ ꞌéiꞌ₃ a₂con₂ ꞌí₁,
23 ia₁jaun₂ jme₃go₃ ca₂le₃jɨ́n₃ dsa₂ jme₃gain₃ Ja₁ŋiꞌ₅₄, juɨ₁liaꞌ₂ jme₂gain₃ Jmei₂. Juɨ₁liaꞌ₂ i₂tsá₃ jme₂gan₃ Ja₁ŋiꞌ₅₄, tsá₃ jme₂gain₃ Jmei₂ i₂ca₂chei₃.
24 ꞌA₂dsɨ₂jóꞌ₃ juɨ́g₂ jniá₂ ꞌniaꞌ₂: juɨ₁liaꞌ₂ i₂nag₅ i₂tónꞌ₂ juɨ₅ jág₁ quió₃, tonꞌ₂ ꞌéin₂ të₂le₃ quióꞌ₅ i₂ca₂chei₃, le₃chain₂ bá₄ co₂tan₅₄. Tsá₃ ꞌí₁ jiógꞌ₂ ja₁coin₂, ia₁ ma₂ca₂ŋɨi₅ ne₄ ꞌmú₃, ma₂ca₂dsióg₃ ja₁le₃chain₂ co₂tan₅₄.
25 A₂dsɨ₂jóꞌ₃ juɨ́g₂ jniá₂ ꞌniaꞌ₂, já₅ jmɨg₄ tonꞌ₂ ma₂të́₂ dsónꞌ₂, jë₁ma₂të́₂ rë₁nag₃ ꞌlag₄ jág₁ quióꞌ₅ Ja₁ŋiꞌ₅₄ Diú₄. Juɨ₁liaꞌ₂ i₂neꞌ₅₄ në́₃, le₃chain₂ bá₄.
26 Ia₁ juɨ₁liaꞌ₂ ꞌio₅ bí₂ Jmei₂ a₂le₃chain₂ ꞌŋiog₅, ján₃ bá₄ le₂në₅ ma₂cuë́ꞌ₃ Ja₁ŋiꞌ₅₄ juɨ₅bí₂ a₂le₃chain₂ ꞌŋiog₅.
27 Ján₃ bá₄ ma₂cuë₃ juɨ₅bí₂ a₂con₂ ꞌí₁ qui₃dsɨ₂₃ ꞌéiꞌ₃, ia₁ lɨ́in₅ Jaun₅* dsa₂ mɨ₂güɨ́g₃.
28 Tsá₃ lë₁juɨ₁dsi₂góꞌ₃ ꞌauꞌ₂ ꞌniaꞌ₂ jág₁ a₂në₂juáꞌ₃ jniá₂ la₂, ia₁ já₅ hora a₂nag₃ ca₂le₃jɨ́n₃ dsa₂ i₂le₁ꞌon₅ tau₂ ꞌŋio₅, jág₁ quióꞌ₅,
29 jaun₂ ꞌuɨ́in₃ ja₁jaun₂. Juɨ₁liaꞌ₂ i₂ca₂jmo₃ a₂dsi₂ten₅₄, jeinꞌ₅₄ a₂dsi₁lein₅ ja₁le₃chain₂ co₂tan₅₄; la₁ia₁ juɨ₁liaꞌ₂ i₂ca₂jmo₃ a₂ꞌlɨgꞌ₅₄, jeinꞌ₅₄ a₂të₃dsɨ₅₄ ꞌéiꞌ₃ ja₁coin₂.
Jauꞌ₂ ꞌí₁ a₂dsónꞌ₂ ꞌio₅ Jesús bí₂
30 ꞌTsá₃ ꞌe₂ lé₂ le₃jmo₅₄ jniá₂ juaꞌ₅₄ a₂jmo₅₄ conꞌ₂ tɨng₂ ꞌŋió₃. Qui₂dsɨ́₂ jniá₂ ꞌéiꞌ₃ liaꞌ₂ conꞌ₂ lë́₅ jág₁ a₂négꞌ₄ ja₁con₂ Ŋeꞌ₃, jaun₂ dsi₂ten₅₄ bá₄ ꞌéiꞌ₃ a₂qui₂dsɨ́₂ jniá₂, ia₁ tsá₃ a₂jaun₂ jmo₅ jniá₂ liaꞌ₂ conꞌ₂ lë́₅ a₂ꞌŋio₂ dsɨ₃ ꞌŋió₃; a₂jaun₂ bá₄ jmo₅ jniá₂ liaꞌ₂ conꞌ₂ lë́₅ a₂ꞌŋio₂ dsɨ́₅ ꞌéi₂ i₂ca₂chei₃ jniá₂.
31 Në₁juaꞌ₂ jángꞌ₅ jniá₂ jág₁ dsau₅ ja₁cong₂ ꞌŋió₃, jág₁ jaun₂ a₂jángꞌ₅, tsá₃ quen₅.
32 La₁ia₁ chan₂ guë́₄ jan₂ i₂siánꞌ₂ i₂jángꞌ₅ jág₁ dsau₅ të₂le₃ quió₃ jniá₂, jaun₂ guion₄ jniá₂ juɨ₁liaꞌ₂ a₂juáꞌ₂ ꞌéi₂ ꞌag₂₃ jniá₂, tí₅ bá₄ jág₁ a₂jángꞌ₅.
33 Ca₂chenꞌ₂ ꞌniaꞌ₂ dsa₂ a₂ca₂i₁ŋag₁₂ ne₄ Juan₅₄, jaun₂ dsónꞌ₂ tí₅ bá₄ jág₁ dsau₅ a₂ca₂jángꞌ₃ ꞌéi₂.
34 La₁ia₁ on₃juaꞌ₅₄ jaun₂ chénꞌ₅ jniá₂ rë₂ ia₁ a₂jángꞌ₅ dsa₂ mɨ₂güɨ́g₃ jág₁ dsau₅ të₂le₃ quió₃ jniá₂; a₂jaun₂ bá₄ juɨ́g₂ jniá₂ ꞌniaꞌ₂ jág₁ la₂ ia₁jaun₂ lé₂ le₃liónꞌ₂ ꞌniaꞌ₂.
35 Jme₁lɨ́n₄ Juan₅₄ në₂jag₄ caun₂ si₂ nɨ₁tsɨ́₅ a₂cau₂ a₂tág₅. Jaun₂ ꞌniaꞌ₂ në́₃, jme₁ma₂ꞌéiꞌ₂ caun₂ ꞌauꞌ₂ a₂jmóꞌ₂ co₂ꞌna₂ ꞌioꞌ₂ ja₁tág₅ si₂ quióꞌ₅.
36 La₁ia₁ jniá₂ në́₃, ꞌŋio₅₄ jan₂ i₂jángꞌ₅ jág₁ dsau₅ i₂juɨnꞌ₂ guë́₄ liaꞌ₂ conꞌ₂ guë́₄ Juan₅₄. Ia₁ juɨ₁liaꞌ₂ léi₄ a₂jmo₅ jniá₂, a₂jaun₂ ca₂cuë₃ Ŋeꞌ₃ a₂jmo₅₄. A₂jaun₂ bá₄ jángꞌ₅ jág₁ dsau₅ a₂dsónꞌ₂ bá₄ ca₂chei₃ Ŋeꞌ₃.
37 Ján₃ bá₄ le₂jaun₂, ꞌŋiog₅ bá₄ Ŋeꞌ₃ jniá₂ i₂ca₂chei₃, jángꞌ₅ ꞌéi₂ jág₁ dsau₅ të₂le₃ quió₃ jniá₂. ꞌNiaꞌ₂ në́₃, liaꞌ₂ ꞌi₁cónꞌ₂ tsá₃ ma₂neiꞌ₂ ꞌniaꞌ₂ jág₁ quióꞌ₅, on₃ guëꞌ₂ ma₂jɨinꞌ₅₄ ꞌniaꞌ₂ ꞌa₂ liaꞌ₂ lɨ́in₅,
38 on₃ guëꞌ₂ ma₂të₁gua₁ jág₁ quióꞌ₅ të₂ꞌauꞌ₂, ia₁ tsá₃ ꞌénꞌ₂ ꞌniaꞌ₂ të₂le₃ quióꞌ₅ ꞌŋiog₅ i₂ca₂chein₃.
39 A₂ꞌɨꞌ₂ ꞌniaꞌ₂ Si₂ quióꞌ₅ Diú₄ ca₂liaꞌ₂ dsen₅₄ ꞌauꞌ₂, ia₁ lɨ́nꞌ₂ ꞌniaꞌ₂ a₂le₃chan₂ ꞌniaꞌ₂ co₂tan₅₄ të₂le₃ quianꞌ₅₄ Si₂ jaun₂. Si₂ jaun₂ bá₄ jángꞌ₅ jág₁ dsau₅ ꞌag₂₃ jniá₂.
40 Jaun₂ ꞌniaꞌ₂ në́₃, tsá₃ ꞌniogꞌ₂ i₁nógꞌ₅ ne₃ jniá₂ ia₁jaun₂ le₃chanꞌ₂ ꞌniaꞌ₂.
41 ꞌTsá₃ gue₅ jniá₂ a₂jme₂juagꞌ₂ dsa₂ mɨ₂güɨ́g₃.
42 La₁ cuɨ́n₅ jniá₂ ꞌniaꞌ₂, jaun₂ guion₄ jniá₂ a₂tsá₃ jaun₂ le₁ꞌi₁ të₂ꞌauꞌ₂ ꞌniaꞌ₂ a₂niog₅ dsɨ́₅ Diú₄ a₂ꞌnioi₃ ꞌniaꞌ₂.
43 O₄quióꞌ₄ Ŋeꞌ₃ bá₄ jniá₂ guio₃, ꞌniaꞌ₂ guëꞌ₂ tsá₃ guéiꞌ₅ jniá₂; la₁ia₁ në₁juaꞌ₂ ca₂já₃ jan₂ o₄quióꞌ₄ ꞌŋiog₅, i₂ꞌéi₂ bá₄ guénꞌ₄ ꞌniaꞌ₂.
44 ¿ꞌA₂ liaꞌ₂ lé₂ le₃ꞌénꞌ₂ ꞌniaꞌ₂, chi₂juaꞌ₂ jaun₂ ꞌnáuꞌ₂ a₂tióngꞌ₂ rë₂ quiangꞌ₅₄ rɨ́ngꞌ₂, tsá₃ guëꞌ₂ ꞌnáuꞌ₂ ꞌniaꞌ₂ a₂qui₁náuꞌ₂ rë₂ quiangꞌ₅₄ Diú₄?
45 Tsá₃ o₁lenꞌ₂ ꞌniaꞌ₂ juaꞌ₅₄ a₂ꞌnág₄ jniá₂ ne₄ Ŋeꞌ₃; chan₂ jan₂ i₂ꞌnag₅: Moisés bá₄ ꞌéi₂. Le₃quióꞌ₅ ꞌéi₂ bá₄ ꞌɨ́n₂ ꞌauꞌ₂ ꞌniaꞌ₂.
46 Ia₁ juaꞌ₅₄ meiꞌ₂ guë́₃ ca₂rë₃ꞌéngꞌ₂ jág₁ quióꞌ₅ Moisés, ján₃ bá₄ le₂jaun₂ jme₁le₃ꞌéngꞌ₂ jág₁ quió₃, ia₁ jniá₂ bá₄ ca₂ꞌag₃ Moisés ne₄ Si₂.
47 La₁ chi₂juaꞌ₂ tsá₃ ꞌénꞌ₂ guëꞌ₂ ꞌniaꞌ₂ jág₁ a₂ca₂tóꞌ₂ ꞌéi₂ ne₄ Si₂, ¿ꞌa₂ guëꞌ₂ liaꞌ₂ lé₂ le₃ꞌénꞌ₂ ꞌniaꞌ₂ jág₁ a₂juáꞌ₅ jniá₂?