Le₂la₂ ca₂jmo₃ dsa₂ i₂chen₄ quián₅ Jesús
Jág₁ a₂cuë́₄ a₂chen₃ Diú₄ Jme₂dsí₂ Jŋió₅
1
Ne₄ si₂ a₂ca₂jmo₃ jniá₂ le₂ꞌuɨg₅₄, guiꞌ₅₄ Teófilo,a ca₂juáꞌ₃ jniá₂ ca₂le₃jë́₃ a₂ca₂jmo₃ Jesús ca₂le₃ ca₂jme₃lióg₃ ca₂jme₃tag₂₃,
2 ca₂liaꞌ₂ ca₂të́₂ jmɨg₄ a₂ca₂ŋáiꞌ₃ gueiꞌ₅₄ i₂juɨ́g₃. Néꞌ₃ a₂dsáinꞌ₃ gueiꞌ₅₄ i₂juɨ́g₃, ca₂quióinꞌ₂ dsɨ₂guia₃-tɨ́n₂ i₂chen₄*b quiáin₅, ca₂chei₃ dsɨ₂ꞌë́₂ jág₁. Jaun₂ ca₂cuë₃ jág₁ të₂le₃ quianꞌ₅₄ Jme₂dsí₂ Jŋió₅, ca₂le₃jë́₃ ꞌe₂ ꞌnióꞌ₅ jmo₃ chiꞌ₂ dsɨ₂guia₃-tɨ́n₂ ꞌéi₂.
3 Cang₂ jme₁ca₂join₃, jme₁ma₂jeinꞌ₅₄ táng₃, ca₂ŋɨ₃ të₂láu₃ jmɨg₄ qui₂jme₂jniai₂₃ qui₂cuë́ꞌ₅ jág₁ dsau₅ chiꞌ₂ dsɨ₂guia₃-tɨ́n₂ a₂të₃dsónꞌ₂ bá₄ chain₂ ma₂jeinꞌ₅₄ táng₃; jaun₂ qui₂ca₂dsia₃ jág₁ quiainꞌ₅₄ ꞌéi₂ juɨ₁liaꞌ₂ ꞌa₂ liaꞌ₂ lë́₅ ja₁gon₂ Diú₄.
4 Jme₁ꞌen₅₄ guë́₄ Jesús quiainꞌ₅₄ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂ ca₂tsɨ́ꞌ₃ ꞌéi₂ a₂tsá₃ dsɨ₃lein₃ dsɨ₂juɨ₅ juɨg₂ Jerusalén. Jaun₂ ca₂juáꞌ₂:
―Jŋia₄ ꞌniaꞌ₂, juɨ₁le₂ti₃ deꞌ₂ jág₁ quióꞌ₅ Ŋeꞌ₃ a₂ma₂juɨ́g₂ ꞌniaꞌ₂.
5 Dsau₅ bá₄ ca₂tióg₃ Juan₅₄ ca₂tiáin₂ jmɨg₂ dsa₂, la₁ ꞌniaꞌ₂ guëꞌ₂ në́₃ tióg₂ Diú₄ Jme₂dsí₂ Jŋió₅, të₃jë₄ la₂.
Ca₂ŋáꞌ₃ Jesús gueiꞌ₅₄ i₂juɨ́g₃
6 Co₂ráun₂ tionꞌ₅₄ chiꞌ₂ dsɨ₂guia₃-tɨ́n₂ le₁ŋɨiꞌ₂ ja₁ꞌen₅₄ Jesús, jaun₂ ca₂ŋɨ́iꞌ₃ Jesús:
―Te₁guiꞌ₅₄, ¿ma₂të́₂ ja₁jmóꞌ₂ ꞌne₂ a₂lión₂ dsa₂ juɨg₂ Israel?
7 Jaun₂ ca₂ŋag₃ Jesús:
―Tsá₃ ca₂tɨ́nꞌ₂ ꞌniaꞌ₂ le₃ŋiꞌ₅₄ ꞌa₂ liaꞌ₂ jmo₃ Diú₄ Jmei₂ ꞌéiꞌ₃ ca₂le₃jë́₃ ꞌe₂ ꞌióꞌ₄, ꞌe₂ jmɨg₄ në́₃. ꞌŊiog₅ bá₄ Diú₄ Jmei₂ ŋi₅ a₂jaun₂.
8 Jë₁ma₂ca₂guenꞌ₅₄ ꞌniaꞌ₂ Jme₂dsí₂ quián₅ Diú₄, guéiꞌ₁ ꞌniaꞌ₂ juɨ₅bí₂, jaun₂ qui₂o₁nógꞌ₅ qui₂o₁ꞌë́ꞌ₃ jág₁ dsau₅ quió₃ juɨg₂ Jerusalén, le₂tan₅₄ juɨg₂ ꞌuë₃ Judea, ꞌuë₃ Samaria, ca₂le₃jë́₃ juɨg₂ ta₁caun₂ mɨ₂güɨ́g₃ në́₃.
9 Jme₁ma₂dsan₃ juáꞌ₂ Jesús le₂në₅, ca₂uɨ́g₂ juɨ₅ gueiꞌ₅₄ i₂juɨ́g₃, ca₂ŋáiꞌ₃ ca₂lioin₂ jnei₅.
10 Të₃tión₂ jaun₂ chiꞌ₂ dsɨ₂guia₃-tɨ́n₂ jág₅ gueiꞌ₅₄ jme₁ŋáꞌ₃ Jesús, conꞌ₂ tsá₃ jáin₅ jme₁ca₂jɨ́in₂ on₃ dsa₂ le₁quiꞌ₂ ꞌmɨꞌ₂ tiog₂ jau₂, tión₂ cau₅ quióꞌ₅.
11 Jaun₂ ca₂juáꞌ₂ dsa₂ on₃ ꞌéi₂:
―ꞌNiaꞌ₂ dsa₂ chan₂ Galilea, tsá₃ ma₃ta₁ jmo₃ tiónꞌ₂ guë́₄ ꞌniaꞌ₂ uë́₂ jágꞌ₂ gueiꞌ₅₄. ꞌŊiog₅ Jesús në₅ i₂ŋáꞌ₅ gueiꞌ₅₄ i₂juɨ́g₃ të₃jɨnꞌ₄ ꞌniaꞌ₂, le₂në₅ bá₄ jiá₃ táng₃ jë₁ma₂të́₂ rë₁jiá₃, juɨ₁liaꞌ₂ në₂jɨinꞌ₅₄ ꞌniaꞌ₂ ŋáiꞌ₅ në₅.
Ca₂quiónꞌ₂ dsa₂ Matías a₂jmo₃ ta₁ a₂jme₁lɨ́n₄ Judas
12 Jaun₂ në́₃ ca₂ꞌuɨin₂ máꞌ₂ ja₁chei₂ Olivos, ca₂o₃lein₃ táng₃ juɨg₂ Jerusalén, a₂niog₅ uɨ́ng₂ conꞌ₂ ja₁ꞌi₄ ꞌéiꞌ₃ i₃nio₄ dsa₂ jme₁jmɨg₄ sa₅₄.c
13 Jme₁ca₂o₃lein₃ Jerusalén jaun₂, ca₂uɨ́g₂ cuarto gueiꞌ₅₄ ja₁ca₂jŋia₃. Dsa₂ ꞌéi₂ jme₁chein₂ Pe₄, Jacobo, Juan₅₄, Drë́₄, Fe₂li₄, To₁má₄, Bartolomé, Të₅₄, Jacobo ja₁ŋiꞌ₅₄ Alfeo, Si₂mu₅₄ i₂lɨ́n₅ cananista,d quianꞌ₅₄ Judas rɨnꞌ₅₄ Jacobo.
14 Ca₂le₃jɨ́in₃ le₂jaun₂ jme₁ŋɨiꞌ₂ i₂gúꞌ₃ co₂lë₅ quiainꞌ₅₄ o₁rɨnꞌ₅₄ Jesús, María chog₅₄ Jesús, ca₂le₃jɨ́n₃ guë́₄ ꞌio₅₄ siánꞌ₂ në́₃, a₂jme₁tsɨ́ꞌ₅ Diú₄.
15 Co₂ráun₂ jme₁lë́₂ conꞌ₂ caun₂ ꞌŋiá₂-lón₂ rë₂dsɨ́₂ guión₂ (120) dsa₂ ꞌén₂ i₂jme₁le₁ŋɨꞌ₂. Jaun₂ ca₂nau₂ Pe₄ të₃jë₄ jaun₂, jaun₂ ca₂juáꞌ₂ ca₂tsɨ́ꞌ₃ dsa₂:
16 ―Rɨnꞌ₅₄ jniog₄, co₂në₅ lë́₅ Si₂, tion₅₄ ca₂rë₃ti₃ jág₁ a₂ma₂ꞌë́₂ Jme₂dsí₂ quián₅ Diú₄ të₂le₃ quianꞌ₅₄ ꞌlag₄ David, a₂ca₂ꞌɨin₃ Judas i₂ca₂jŋia₃ dsa₂ i₂ca₂i₁te₂ Jesús chi₁ꞌŋeiꞌ₂.
17 I₂jme₁quianꞌ₅₄ bá₄ jniog₄ ꞌéi₂, jme₁lë́₄ rɨnꞌ₅₄ jniog₄, i₂jme₁jmo₅ ta₁ le₂la₂ bá₄ ꞌéi₂ ján₃.
18 La₁ quianꞌ₅₄ cu₄ ꞌlɨgꞌ₅₄ a₂ca₂lɨ́ꞌ₃ Judas a₂ca₂ꞌnɨi₃ Jesús, ca₂lá₃ ꞌuë₃. ꞌUë₃ jaun₂ ca₂jmo₃ ca₂táinꞌ₂ të₃ chi₁jɨ́in₂, qui₂ca₂ꞌuë₂ ca₂le₃jë́₃ a₂jme₁tioꞌ₅₄ túꞌ₅.
19 Jme₁ca₂rë₃ŋi₅ dsa₂ juɨg₂ Jerusalén, ca₂të́ꞌ₃ ꞌuë₃ jaun₂ Acéldama, co₂ꞌnióꞌ₄ a₂juáꞌ₂: ꞌUë₃ Jmɨ₂, quianꞌ₅₄ jág₁ jmei₅ quióꞌ₅.
20 Ia₁ le₂la₂ juáꞌ₂ ne₄ Si₂ Salmos:
Juɨ₁të₂tsɨꞌ₅₄ ꞌŋiog₅ ꞌné₅ quióꞌ₅,
ia₁ ꞌi₁jan₂ tsá₃ ꞌein₂ le₃tianꞌ₃.e
Ján₃ guëꞌ₂ juáꞌ₂ táng₃:
Dsa₂ siánꞌ₂ juɨ₁jmo₅₄ ta₁ a₂jme₁lɨ́in₄.f
21 ꞌChan₂ bá₄ dsa₂ jë₄ la₂ quián₂ jniog₄ dsa₂ i₂ma₂ca₂jme₃quiongꞌ₅₄ ca₂le₃jë́₃ jmɨg₄ liaꞌ₂ conꞌ₂ jme₁quianꞌ₅₄ jniog₄ Te₁guiꞌ₅₄ Jesús,
22 ca₂le₃ ca₂jŋó₂ Jesús jmɨg₂ a₂ca₂cho₃ Juan₅₄, ca₂liaꞌ₂ jme₁ca₂uɨ́g₂ Jesús gueiꞌ₅₄ i₂juɨ́g₃. Jaun₂ tion₅₄ ꞌnióꞌ₅ dsa₂ ꞌéi₂, jme₃quiongꞌ₅₄ jniog₄, jaun₂ jángꞌ₃ jág₁ dsau₅ a₂ca₂jenꞌ₅₄ táng₃ Jesús.
23 Jaun₂ ca₂jmo₃ jág₁ ca₂ꞌɨin₃ jan₂ i₂chen₂ José i₂të́ꞌ₂ Barsabás i₂të́ꞌ₂ Justo në́₃, quianꞌ₅₄ jan₂ i₂chen₂ Matías.
24 Jaun₂ ca₂tsɨ́ꞌ₃ Diú₄ ca₂le₃jɨ́in₃, ca₂juáꞌ₂ le₂la₂:
―Te₁guiꞌ₅₄, ꞌne₂ bá₄ i₂cuɨngꞌ₂ të₂dsɨ́₅ ca₂le₃jɨ́n₃ dsa₂, ꞌɨn₅₄ jniaꞌ₅₄ ꞌein₂ dsa₂ on₃ la₂ i₂ma₂quionꞌ₅₄ ꞌne₂,
25 ia₁jaun₂ jmo₃ ta₁ léin₂ chiꞌ₂ dsɨ₂guia₃-tɨ́n₂ quiángꞌ₂ a₂jme₁lɨ́n₄ Judas, ꞌuɨg₅₄ dsáu₁ ca₂i₃ꞌéin₂, ca₂ŋáiꞌ₃ ja₁ca₂tɨ́in₂.
26 Jaun₂ ca₂tóinꞌ₂ ca₂co₃, ca₂dsi₂ jág₁. Jaun₂ i₂chen₂ Matías bá₄ ca₂tɨ́n₂ ta₁ jaun₂. Dsɨ₂juɨ₅ le₂jaun₂ bá₄ ca₂jme₃quiainꞌ₅₄ dsa₂ guia₃-ján₃ i₂jme₁lë́₂ guë́₄ dsɨ₂guia₃-tɨ́n₂ i₂chen₄ quián₅ Jesús.