Ca₂jenꞌ₅₄ táng₃ Jesús
24
Jë₁le₂ꞌuɨg₅₄ jmɨg₄ semana, ca₂i₃lén₂ táng₃ dsa₂ mɨ́₂ të₂ o₃ꞌiog₂ lɨn₃, i₁jag₅₄ tau₂ ꞌŋio₅ le₁quian₅ noꞌ₅₄ mɨ₂juɨg₂ a₂jme₁ma₂lë́₅ co₂jŋia₅₄ quióꞌ₅; [lë́₂ bá₄ guë́₄ dsa₂ mɨ́₂ siánꞌ₂ i₂ca₂jme₃quiongꞌ₅₄].a
San Lucas 24:1-35
2 Jme₁ca₂dsi₃léin₂ ja₁jaun₂, juaꞌ₂ cau₅ bá₄ ma₂i₂mu₃ nɨ₁cang₁ a₂jme₁rë₂jnɨ₅ tau₂ ꞌŋio₅.
3 Jaun₂ ca₂i₃toinꞌ₅₄, la₁ tsá₃ ma₃nɨ₁ŋɨ₁ ꞌlag₄ [Te₁guiꞌ₅₄ Jesús]a ca₂dsóꞌ₂ ja₁jaun₂.
4 [Jaun₂ ca₂lë₃],a të₃ tióin₂ dsɨ₂góꞌ₃ dsɨ́₅ jaun₂, tsá₃ a₂ŋi₅ jmo₃, jme₁ca₂jɨ́in₂ on₃ dsa₂ i₂quiꞌ₂ tsɨnꞌ₅₄ tág₅, tión₂ cau₅ quióꞌ₅.
5 Të₃ ma₂góꞌ₅ jaun₂, ca₂ꞌɨin₃ ne₅₄ të₂ ꞌuë₃. Jaun₂ ca₂juáꞌ₂ dsa₂ ꞌéi₂:
―¿ꞌE₂ lë₃ ꞌnaꞌ₂ ꞌniaꞌ₂ jan₂ i₂jénꞌ₃ jɨn₄ ꞌlag₄?
6 Tsá₃ ꞌéi₂ chan₂ ja₁lá₃. Ma₂ca₂jeinꞌ₅₄ bá₄. Juɨ₁dsiogꞌ₂ ꞌauꞌ₂ ꞌniaꞌ₂ a₂ca₂juáꞌ₂ liaꞌ₂ conꞌ₂ jme₁ŋɨ₂₃ Galilea,
7 jme₁ca₂juáꞌ₂ a₂ca₂tɨ́n₂ Jaun₅* dsa₂ mɨ₂güɨ́g₃ jángꞌ₂ dsa₂ o₄gú₃ dsa₂ ꞌlɨnꞌ₅₄, a₂tion₃ dsa₂ cróg₄, la₁ a₂ꞌnɨ₅ jmɨg₄ jaun₂ jeinꞌ₅₄ táng₃.
8 Jaun₂ guë́₄ ca₂dsáuꞌ₃ dsɨ́₅ ꞌio₅₄ jág₁ jaun₂ quióꞌ₅ Jesús.
9 Jme₁dsi₃lein₃ jaun₂, ca₂dsia₃ ca₂tsɨ́ꞌ₃ ta₁guia₃-ján₃ chiꞌ₂ dsɨ₂guia₃-tɨ́n₂ i₂jme₁lë́₂ guë́₄, ca₂tsɨ́ꞌ₃ ca₂le₃jɨ́n₃ guë́₄ dsa₂ siánꞌ₂ në́₃.
10 Dsa₂ mɨ́₂ i₂jme₁quion₂ jág₁ në₅ ne₄ chiꞌ₂ dsɨ₂guia₃-tɨ́n₂: María i₂chan₂ Magdala, Juana, María chog₅₄ Jacobo, quiainꞌ₅₄ guë́₄ dsa₂ mɨ́₂ siánꞌ₂.
11 La₁ jme₁ca₂nág₂ chiꞌ₂ dsɨ₂guia₃-tɨ́n₂ jág₁ në₅, a₂lë₁të₂ꞌɨ₅ bá₄ ꞌio₅₄ ꞌéi₂, lɨ́in₂, jaun₂ tsá₃ ca₂rë₃ꞌéin₂.
12 La₁ Pe₄ në́₃, ca₂o₃ꞌɨ́in₃ ŋó₃ co₂chiꞌ₅₄ ca₂i₁jag₅₄ dsi₂néi₂ tau₂ ꞌŋio₅. Jaun₂ jmáꞌ₃ tsɨ₁ꞌmɨꞌ₂ tióg₃ bá₄ ca₂jág₃ niog₅. Ca₂ŋáiꞌ₃ bá₄ táng₃ jaun₂ në́₃, dsɨ₂góꞌ₃ dsɨ́₅ ꞌe₂ ca₂lë₃.
A₂ca₂lë₃ dsi₂juɨ₅ ja₁ŋó₄ juɨg₂ Emaús
13 Jmɨg₄ jaun₂ dé₄, on₃ dsa₂ ꞌéi₂ tioinꞌ₅₄ juɨ₅ i₃léin₂ juɨ₅ juɨg₂ ja₁të́ꞌ₂ dsa₂ Emaús, a₂niog₅ conꞌ₂ guia₃-cáun₃ kilómetros ja₁niog₅ Jerusalén.
14 Jaun₂ dé₄ tsɨ́ꞌ₅ rɨinꞌ₅₄ i₃léin₂ ca₂le₃jë́₃ ꞌe₂ niog₅ ca₂lë₃.
15 Të₃ dsia₂₃ i₃léin₂ jaun₂, ca₂jme₃quián₃ Jesús ŋó₃ quiongꞌ₅₄.
16 La₁ juɨ₁ꞌa₂ guë́₃ la₂ jág₂ i₃léin₂, cha₂ a₂jmo₅ a₂tsá₃ rë₂cuɨg₂₃ ꞌein₂ ꞌéi₂.
17 Jaun₂ ca₂ŋag₃ Jesús:
―¿ꞌE₂ bá₄ jág₁ dsiaꞌ₂ ꞌniaꞌ₂ ja₂nógꞌ₅?
―¿On₁ bá₄ janꞌ₂ ꞌne₂ lɨ́ngꞌ₅ dsa₂ i₂liaꞌ₂ të₁tsɨnꞌ₅₄ guan₅ Jerusalén, jaun₂ tsá₃ ŋiꞌ₅₄ ꞌe₂ niog₅ ca₂lë₃ dsióg₂-jo₃ në₅?
19 Jaun₂ ca₂ŋag₃:
―¿ꞌE₂ ca₂lë₃ guëꞌ₂?
Jaun₂ ca₂ŋag₃ táng₃:
―A₂ca₂lë₃ quianꞌ₅₄ Jesús i₂chan₂ Nazaret, i₂jme₁lɨ́n₄ jan₂ i₂jme₁ꞌë́₂ jág₁ quián₅ Diú₄, i₂ꞌuanꞌ₂ të₂le₃ quianꞌ₅₄ ca₂le₃jë́₃ a₂niog₅ ca₂jmo₃, i₂ꞌuanꞌ₂ të₂le₃ quianꞌ₅₄ jág₁ a₂ca₂jme₃tag₂₃, liaꞌ₂ le₃ne₄ Diú₄ liaꞌ₂ le₃ne₄ dsa₂ mɨ₂güɨ́g₃ në́₃;
20 ꞌa₂ liaꞌ₂ ca₂jángꞌ₂ juɨg₅₄ jme₂dsa₂ quianꞌ₅₄ dsɨ₂tan₅₄ quián₂ jniaꞌ₅₄, ca₂dsi₂ ꞌéiꞌ₃ ca₂jŋagꞌ₃ tioinꞌ₅₄, ca₂tion₃ cróg₄.
21 Jniaꞌ₅₄ jme₁ꞌɨ́n₂ dsɨ₅ chong₂, a₂lág₂ jniaꞌ₅₄ ꞌéi₂ bá₄ lɨ́n₅ i₂jme₁lión₂ juɨg₂ Israel. La₁ në₃ në́₃, ma₂ꞌnɨ₅ jmɨg₄ ca₂lë₃ le₂në₅.
22 I₂lɨn₅₄ dsa₂ mɨ́₂ i₂tionꞌ₅₄ jë₄ quián₂ jniaꞌ₅₄ ma₂në₂quiong₃ jniaꞌ₅₄ juë́ꞌ₅, ia₁ ma₃i₁jag₅₄ të₂ o₃ꞌiog₂ ma₂ꞌmɨ́g₂ tau₂ ꞌŋio₅, juáꞌ₂.
23 Tsá₃ nɨ₁ŋɨ₁ ꞌlag₄ dsóꞌ₅. A₂jaun₂ bá₄ dsia₂₃ o₃lein₃ a₂në₂jme₃jnia₅ ángeles ne₅₄, a₂në₂juáꞌ₂ i₂chan₂ bá₄ ꞌéi₂.
24 Jaun₂ në́₃, ma₂i₁len₅₄ i₂lɨn₅₄ rɨnꞌ₅₄ jniaꞌ₅₄ ma₂i₁jag₅₄ tau₂ ꞌŋio₅. Juaꞌ₂ dsónꞌ₂ bá₄ dsau₅ conꞌ₂ lë́₅ jág₁ jmógꞌ₅ dsa₂ mɨ́₂ ꞌéi₂, la₁ ꞌéi₂ guëꞌ₂ në́₃ tsá₃ në₂jɨ́in₂, juáꞌ₂.
25 Jaun₂ ca₂ŋag₃ Jesús ca₂tsɨ́ꞌ₃ ꞌéi₂:
―¡ꞌEn₁ jmáꞌ₃ tsá₃ ꞌe₂ ca₂ŋɨ́ꞌ₂ ꞌauꞌ₂ ꞌniaꞌ₂! ¿Lɨ́gꞌ₂ bá₄ le₃ꞌénꞌ₂ ꞌniaꞌ₂ ca₂le₃jë́₃ a₂niog₅ ca₂juáꞌ₂ dsa₂ i₂jme₁ꞌë́₂ jág₁ quián₅ Diú₄?
26 Ia₁ ¿on₁ le₂jaun₂ ꞌi₄ ꞌéiꞌ₃ ca₂tɨ́n₂ I₂rë₂ꞌɨ́n₁* quián₅ Diú₄, dsɨ₃ŋɨ́i₂ ca₂le₃jë́₃ a₂në₅ deꞌ₂ jŋiá₅, jaun₂ guë́₄ dsiáinꞌ₄ ja₁le₃juɨinꞌ₂ táng₃?
27 Jaun₂ qui₂ca₂juáꞌ₂ ꞌa₂ liaꞌ₂ niog₅ juáꞌ₂ ne₄ Si₂ quióꞌ₅ Diú₄; ca₂jme₃lióg₃ deꞌ₂ jŋiá₅ ja₁juáꞌ₂ ne₄ si₂ quióꞌ₅ Moisés, ŋó₃ ca₂ꞌë₃ le₂tan₅₄ si₂ quióꞌ₅ dsa₂ i₂jme₁ꞌë́₂ jág₁ quián₅ Diú₄, ja₁juáꞌ₂ ꞌɨin₂₃ ꞌéi₂ ꞌŋiog₅.
28 Jaun₂ ja₂quián₃ dsi₁léin₂ juɨg₂ píꞌ₁ ja₁tioinꞌ₅₄ juɨ₅ dsi₁léin₂. La₁ dsa₂ ꞌéi₂ conꞌ₂ jme₁ma₂ŋó₅ co₂dsau₅ bá₄ ca₂jmo₃.
29 La₁ i₂on₃ ꞌéi₂ në́₃ ca₂chi₃quióng₂ jmɨg₄ a₂jŋia₃, ca₂juáꞌ₂:
―Në₃ o₁jŋia₁ quianꞌ₅₄ jniaꞌ₅₄, ia₁ ca₂rɨn₂ bá₄ ꞌiog₂, ca₂ꞌláu₂ ca₂nei₂ bá₄ la₂.
Jaun₂ ca₂ꞌí₃ dsi₂néi₂ ja₁jŋia₃ quianꞌ₅₄ ꞌéi₂.
30 Jaun₂ ca₂lë₃, jme₁ma₂guá₅ ne₄ mesa quianꞌ₅₄ ꞌéi₂, ca₂can₃ i₁ŋíꞌ₄, ca₂jme₃jŋiói₃, jaun₂ guë́₄ ca₂ꞌniai₃ ca₂cuë́ꞌ₃ le₃on₃ i₂quiainꞌ₅₄.
31 Të₃jë₄ jaun₂ në₂jag₄ a₂jaun₂ guë́₄ ca₂niá₃ jme₁ne₁₂ lɨ́in₂, jaun₂ guë́₄ ca₂rë₃cuɨg₂₃. La₁ dsɨ₂juɨ₅ jaun₂ ca₂i₃cóinꞌ₅ të₃ ne₅₄.
32 Jaun₂ guë́₄ ca₂dsia₃ jág₁ guioin₅₄:
―Dsónꞌ₂ bá₄ liaꞌ₂ tioꞌ₅₄ juɨ₅ ja₂náu₅, ca₂lë₃ dsɨ₅ néi₁ ca₂le₃jë́₃ ꞌe₂ niog₅ në₂juáꞌ₂ në₂jme₃ŋɨ́iꞌ₂ dsɨ₅ jniog₄ a₂juáꞌ₂ Si₂.
33 Dsɨ₂juɨ₅ le₂jaun₂ bá₄ ca₂tóinꞌ₂ táng₃ juɨ₅ ja₂lein₃ Jerusalén. Jme₁o₃lein₃ jaun₂, tionꞌ₅₄ ta₁guia₃-ján₃ chiꞌ₂ dsɨ₂guia₃-tɨ́n₂ i₂lë́₂ guë́₄, le₁ŋɨiꞌ₂ quianꞌ₅₄ guë́₄ dsa₂ siánꞌ₂.
34 Jaun₂ juáꞌ₂ ꞌéi₂ tioinꞌ₅₄:
―Të₃dsónꞌ₂ bá₄ ma₂ca₂jenꞌ₅₄ Te₁guiꞌ₅₄. Ia₁ ma₂në₂jme₃jniai₂₃ ne₄ Si₂mu₅₄.
35 Jaun₂ guë́₄ ca₂jmógꞌ₃ táng₃ i₂on₃ ꞌéi₂ jág₁ ꞌa₂ liaꞌ₂ ca₂lë₃ le₂ꞌi₄ juɨ₅, ꞌa₂ liaꞌ₂ ca₂rë₃cuɨg₂₃ conꞌ₂ jme₁ca₂ꞌniai₃ i₁ŋíꞌ₄.
Ca₂jme₃jnia₅ Jesús jë₄ quióꞌ₅ chiꞌ₂ dsɨ₂guia₃-tɨ́n₂
36 Të₃ tioinꞌ₅₄ dsia₂₃ jág₁ jaun₂, jme₁ca₂jme₃jnia₅ Jesús ca₂nau₂ jë₄ quióꞌ₅.b
San Lucas 24:36-53
37 Ca₂i₃góꞌ₃ dsɨ́₅ tioinꞌ₅₄, lɨ́in₂ jan₂ jme₂dsí₂ bá₄ ꞌéi₂ ŋɨ₅.
38 Jaun₂ ca₂juáꞌ₂:
―¿ꞌE₂ lë₃ ŋɨ́₄ lë₃ tionꞌ₅₄ ꞌniaꞌ₂ chíꞌ₅ go₂ꞌi₃? ¿ꞌE₂ lë₃ ŋɨ́₄ ꞌlióng₂ a₂ꞌnáuꞌ₂ ꞌniaꞌ₂ ꞌauꞌ₂?
39 La₂ jag₄ ꞌniaꞌ₂ o₄gu₃ o₄tag₃. Jniá₂ bá₄ la₂. I₂nóꞌ₅ ꞌniaꞌ₂ i₂nɨ́gꞌ₃ quió₃ i₂jag₄ ꞌniaꞌ₂. Jan₂ jme₂dsí₂, on₃juaꞌ₅₄ i₂ton₅ ŋɨ́₅ on₃ i₂ꞌen₅₄ mu₅, juɨ₁liaꞌ₂ jágꞌ₂ ꞌniaꞌ₂ lɨ́n₅ jniá₂.
40 Të₃ juáꞌ₂ le₂në₅, qui₂ca₂ꞌë₃ o₄gú₃ o₄tag₁₂ në́₃.
41 Të₃ tioinꞌ₅₄ jaun₂ dsɨ₂góꞌ₃ dsɨ́₅ tsá₃ ꞌéin₂ o₄quióꞌ₄ a₂ŋɨ́₄ lë₃ ꞌioꞌ₂ jénꞌ₅, jme₁ca₂juáꞌ₂ Jesús:
―¿Cha₁ a₂le₃que₅₄ ca₂la₂ ja₁lá₃?
42 Jaun₂ ca₂o₃can₅ ca₂ꞌnau₅₄ quióꞌ₅ i₁ju₁ cuɨ₂ ne₄ si₂, [quianꞌ₅₄ guëꞌ₂ ca₂jne₄ nɨ₁táꞌ₅ cuɨng₅].c
43 Jaun₂ ca₂gue₃ ca₂guë́ꞌ₃ guá₅ të₃ne₄ ca₂le₃jɨ́n₃.
44 Jaun₂ ca₂juáꞌ₂ në́₃:
―Ma₁ ca₂juáꞌ₃ jniá₂ le₂jŋiá₅ liaꞌ₂ conꞌ₂ jme₁ŋɨ₂₃ jɨnꞌ₄ ꞌniaꞌ₂, a₂tion₅₄ le₃ti₃ ca₂le₃jë́₃ liaꞌ₂ conꞌ₂ lë́₅ tioꞌ₅₄ ne₄ Si₂ ꞌÉiꞌ₃ quióꞌ₅ Moisés, ne₄ Si₂ quióꞌ₅ dsa₂ i₂jme₁ꞌë́₂ jág₁ quián₅ Diú₄, ne₄ Salmos në́₃, ja₁ꞌag₂₃ jniá₂.
―Le₂në₅ bá₄ tioꞌ₅₄ ne₄ Si₂: a₂tion₅₄ bá₄ dsɨ₃ŋɨ́₂ uɨg₅ I₂rë₂ꞌɨ́n₁ quián₅ Diú₄, la₁ jeinꞌ₅₄ bá₄ táng₃ a₂ꞌnɨ₅ jmɨg₄;
47 a₂tion₅₄ dsɨ₃ꞌag₅ jág₁ në́₃, a₂ꞌnióꞌ₅ qui₂dsɨ₃quénꞌ₅ dsɨ́₅ dsa₂ ia₁jaun₂ bá₄ lé₂ le₃ꞌén₂ dsáu₁. Jág₁ në₅ dsó₃ qui₂rë₂ꞌë́₂ o₄quió₃, ne₄ ca₂le₃jɨ́n₃ i₂chan₂ guaꞌ₅₄ ꞌuë₃, la₁ Jerusalén deꞌ₂ jŋiá₅ ja₁le₃lióg₃.
48 ꞌNiaꞌ₂ në́₃ i₂qui₂ca₂të́₂ neꞌ₅₄ ca₂le₃jë́₃ a₂niog₅ ca₂lë₃, qui₂o₁jangꞌ₄ ꞌniaꞌ₂ jág₁ dsau₅.
49 Jaun₂ në́₃, tsɨn₅₄ jniá₂ i₂ma₂lë́₅ jág₁ chen₃ Ŋeꞌ₃. La₁ jŋia₄ guë́₄ ꞌniaꞌ₂ juɨg₂ la₂, ca₂liaꞌ₂ ca₂lë₃ le₁lɨnꞌ₄ ꞌniaꞌ₂ quianꞌ₅₄ juɨ₅bí₂ a₂sió₃ gueiꞌ₅₄.
Ca₂uɨ́g₂ Jesús gueiꞌ₅₄ i₂juɨ́g₃
50 Jaun₂ ca₂jŋiai₃ chiꞌ₂ dsɨ₂guia₃-tɨ́n₂ të₂ juɨg₂ Betania, jaun₂ ca₂cho₃ gu₂ ne₄ quióꞌ₅ ca₂le₃jɨ́n₃, ca₂jme₃guꞌ₅₄.
51 Ca₂lë₃ në́₃, të₃jë₄ jme₂guꞌ₅₄ jaun₂, ca₂i₃uɨ́in₂.d
52 ꞌÉi₂ në́₃, ja₂lein₃ bá₄ táng₃ Jerusalén, jmo₂₃ ꞌioꞌ₂ ꞌŋio₅ lɨn₃,
53 le₃ó₃ jmɨg₄ bá₄ jme₁ŋɨiꞌ₂ i₁dsi₅ guáꞌ₅ jme₂juɨinꞌ₂ Diú₄.
Co₂në₅.