Ca₂jenꞌ₅₄ Jesús
16
Le₃ca₂gúꞌ₃ jmɨg₄ jŋió₅, jaun₂ María i₂chan₂ Magdala quianꞌ₅₄ María chog₅₄ Jacobo,a quianꞌ₅₄ guë́₄ jan₂ i₂chen₂ Salomé, ca₂i₁lia₅ noꞌ₅₄ mɨ₂juɨg₂ a₂jme₁dsɨ₃tsáng₃ nɨ₁ŋɨ₁ ꞌlag₄ Jesús.
San Marcos 16:1-20
2 Jaun₂ le₁né₃ guë́₄ jme₁jnia₃ jmɨg₄ le₂ꞌuɨg₅₄ semana, ca₂i₃léin₂ ja₁chi₁ꞌon₅ Jesús, ca₂dsi₃léin₂ conꞌ₂ ma₂ꞌen₅ ca₂la₂ ꞌiog₂.
3 Jaun₂ dsia₂₃ jág₁:
―¿ꞌEin₂ jme₃ꞌo₅₄ jniog₄ mói₂ cau₅ nɨ₁cang₁ a₂chi₁jnɨ₅ ꞌo₄ tau₂ ꞌŋio₅?
4 La₁ jme₁ca₂jág₃ në́₃, juaꞌ₂ ma₂rë₂mu₅, cau₅ bá₄ ma₂chíꞌ₅. Ia₁ a₂jme₁pa₁ lɨn₃ bá₄ nɨ₁cang₁.
5 Jaun₂ ca₂i₃toinꞌ₅₄ ꞌŋióꞌ₃, jaun₂ ca₂jɨ́in₂ jan₂ dsa₂ chiꞌ₂ i₂quiꞌ₂ ꞌmɨꞌ₂ chenꞌ₅₄ tiog₂, guá₅ të₂le₃ gu₂ ne₁ ja₁i₃léin₂ jaun₂. Jaun₂ ca₂i₃góꞌ₃ dsɨ́₅ ꞌio₅₄ në́₃.
6 La₁ ca₂juáꞌ₂ dsa₂ ꞌéi₂:
―Tsá₃ juɨ₁dsi₂góꞌ₃ ꞌauꞌ₂ ꞌniaꞌ₂. A₂ꞌnaꞌ₂ Jesús bá₄ ꞌniaꞌ₂ i₂niogꞌ₅₄ i₂ca₂jon₃ ca₂tion₃ dsa₂ cróg₄. La₁ ma₂ca₂jeinꞌ₅₄ bá₄. Tsá₃ ꞌéi₂ chan₂ ja₁lá₃. Në₅ jag₄ ꞌniaꞌ₂ ja₁ca₂quio₅ dsa₂.
7 Jaun₂ o₂nóꞌ₅ ꞌniaꞌ₂ o₂cheiꞌ₅₄ chiꞌ₂ dsɨ₂guia₃-tɨ́n₂ quiáin₅, Pe₄ në́₃, a₂ma₂ꞌein₅₄ juɨ₅ ŋó₅ jŋiái₅ liaꞌ₂ conꞌ₂ guë́₄ ꞌniaꞌ₂ juɨ₅ Galilea. Ja₁jaun₂ o₁jɨinꞌ₄ ꞌniaꞌ₂ conꞌ₂ lë́₅ jág₁ quióꞌ₅ ma₂ca₂juáꞌ₂.
8 Jaun₂ ca₂ꞌuɨin₂ tau₂ ꞌŋio₅ i₃lein₃ cuɨng₂₃, dsɨ₂góꞌ₃ dsɨ́₅ jlein₂₃. Tsá₃ ꞌein₂ ca₂tsɨ́ꞌ₃ le₂ꞌi₄ juɨ₅, ia₁ a₂góꞌ₅ bá₄ i₃lein₃.
Ca₂jme₃jnia₅ Jesús ne₄ dsa₂ quiáin₅.b
9 Jaun₂ të₂le₃ o₂ꞌiog₂ jmɨg₄ le₂ꞌuɨg₅₄ a₂ca₂rë₃lióg₃ semana a₂ca₂jeinꞌ₅₄ jaun₂, ca₂jme₃jniai₂₃ le₂ꞌuɨg₅₄ ne₄ María chan₂ Magdala, i₂ca₂ꞌuɨ́nꞌ₂ Jesús guion₃ je₂naꞌ₅₄ quióꞌ₅ le₂jŋiá₅.
10 Jaun₂ ꞌéi₂ në́₃ ca₂i₁chiꞌ₄ dsa₂ i₂jme₁quianꞌ₅₄ Jesús. ꞌÉi₂ në́₃, tioinꞌ₅₄ ꞌliaꞌ₂ dsɨ́₅, quɨꞌ₂-ꞌo₂₃ bá₄.
11 Jme₁ca₂nág₂ juáꞌ₂ ꞌio₅₄ a₂ma₂chan₂ táng₃ Jesús, ia₁ ma₂në₂jág₂ ꞌio₅₄, la₁ tsá₃ ꞌein₂ ca₂rë₃ꞌén₂ guëꞌ₂ jág₁ jaun₂.
Ca₂jme₃jnia₅ Jesús ne₄ on₃ dsa₂ quiáin₅
12 Cang₂ jaun₂ táng₃ ca₂jme₃jnia₅ Jesús le₂siáꞌ₂ ne₄ on₃ dsa₂ ꞌéi₂ quiáin₅, ja₁jme₁i₂nioi₅₄ ja₁nau₂.
13 Jaun₂ ca₂i₃lein₃ táng₃ ca₂i₁chiꞌ₄ rɨinꞌ₅₄. Ján₃ bá₄ le₂jaun₂ tsá₃ ꞌein₂ rɨinꞌ₅₄ ca₂rë₃ꞌén₂ jág₁ a₂dsia₅ ꞌéi₂.
Ca₂chen₃ Jesús chiꞌ₂ dsɨ₂guia₃-tɨ́n₂ i₂lë́₂ guë́₄
14 Cang₂ guë́₄ jaun₂ ca₂jme₃jnia₅ Jesús jɨn₄ ta₁guia₃-ján₃ conꞌ₂ i₂jme₁tén₄ guë́ꞌ₅. Jaun₂ ca₂jí₂ ia₁ ꞌe₂ lë₃ ŋɨ́₄ lë₃ cang₄ dsi₅₄, tsá₃ ꞌéin₂ a₂juáꞌ₂ rɨinꞌ₅₄ i₂ma₂ca₂të́₂ ne₄ a₂ma₂ca₂jeinꞌ₅₄ táng₃.
15 Jaun₂ ca₂juáꞌ₂ ca₂tsɨ́ꞌ₃ dsa₂ ꞌéi₂:
―O₂nóꞌ₅ ꞌniaꞌ₂ le₂con₂ mɨ₂güɨ́g₃, o₂ꞌë́₃ jɨn₄ ca₂le₃jɨ́n₃ dsa₂ jág₁ dse₃.
16 I₂ꞌén₂, i₂jŋó₂ jmɨg₂ në́₃, lióin₂, tɨ́inꞌ₄ bá₄. I₂tsá₃ ꞌén₂ në́₃, le₃chain₂ tioinꞌ₅₄ ꞌéiꞌ₃ a₂dsɨ₃ꞌéin₂.
17 Jaun₂ léi₄ la₂ jme₃quianꞌ₅₄ dsa₂ ꞌén₂. Të₂le₃ quianꞌ₅₄ bí₂ ꞌéiꞌ₃ quió₃ jniá₂, ꞌuɨ́inꞌ₂ je₂naꞌ₅₄, tonꞌ₂ dsia₃ dsa₂ jág₁ jmei₅ ꞌmɨ́₂ në́₃.
18 Në₁juaꞌ₂ ꞌein₂ ca₂jŋaꞌ₃ dsɨ₂mɨꞌ₂, o₃ ꞌein₂ ca₂ꞌɨnꞌ₃ mɨ́₅ ꞌlɨgꞌ₅₄, la₁ tsá₃ ꞌe₂ jénꞌ₄. Qui₂quiog₃ gu₂ ne₄ quióꞌ₅ dsa₂ dsoꞌ₅₄, jaun₂ ꞌlión₂ bá₄ dsa₂.
Ca₂uɨ́g₂ Jesús gueiꞌ₅₄ i₂juɨg₃
19 Jme₁ma₂lë₅ juá₂ Te₁guiꞌ₅₄ Jesús le₂në₅, jaun₂ guë́₄ ca₂roinꞌ₂ ŋáiꞌ₃ gueiꞌ₅₄ i₂juɨ́g₃, jaun₂ ca₂guá₂ të₂le₃ gu₂ ne₁ quióꞌ₅ Diú₄.
20 Cang₂ jaun₂, dsa₂ i₂jme₁quiainꞌ₅₄ në́₃, ca₂ꞌuɨin₂ i₁lein₅₄ ca₂le₂con₂ juɨg₂ i₁ꞌë́₄ jág₁. Jaun₂ ꞌŋiog₅ bá₄ Te₁guiꞌ₅₄ Jesús ca₂cuë₃ bí₂, ca₂jmo₃ léi₄ a₂dsónꞌ₂ dsau₅ jág₁ quióꞌ₅, të₂le₃ quianꞌ₅₄ ca₂le₃jë́₃ léi₄ juëꞌ₂ a₂qui₂ca₂jmo₃ dsa₂ quiáin₅.
Co₂në₅.