Chénꞌ₅ Jesús ne₄ Pilato
15
Dsɨ₂juɨ₅ jme₁jnia₃ táng₃ jaun₂, ca₂ŋɨꞌ₂ juɨg₅₄ jme₂dsa₂ quianꞌ₅₄ dsɨ₂guiꞌ₅₄ canꞌ₅₄, quianꞌ₅₄ ca₂le₃jɨ́n₃ të₅juáꞌ₅, ca₂le₃jɨ́n₃ guë́₄ i₂lɨ́n₅ dsɨ₂tan₅₄ quián₅ guáꞌ₅ në́₃. Qui₂ca₂ŋɨ́iꞌ₃ rɨinꞌ₅₄ ca₂jmo₃ caun₂ jág₁. Ca₂ꞌnéiꞌ₂ Jesús tioinꞌ₅₄, jaun₂ ca₂i₁jiog₃ ne₄ Pilato.
San Marcos 15:1-23
―¿Dsónꞌ₂ lɨ́ngꞌ₅ Rag₅₄ quián₅ dsa₂ judíos?
Jaun₂ ca₂ŋag₃ Jesús:
―Le₂në₅ bá₄, juɨ₁liaꞌ₂ juáꞌ₂ ꞌne₂ në₅.
3 Jaun₂ caun₂ qui₂ca₂ꞌnag₃ guë́₄ juɨg₅₄ jme₂dsa₂ ꞌlióng₂ ne₅₄ dso₄ ca₂bóinꞌ₂ Jesús.
4 Jaun₂ conꞌ₂ siáꞌ₂ táng₃ ca₂ŋag₃ Pilato ca₂ŋɨ́iꞌ₃ Jesús, ca₂juáꞌ₂:
―¿Tsa₁ a₂ŋagꞌ₅₄? Në₅ bá₄ nagꞌ₂ ꞌŋiagꞌ₂ ꞌlióng₂ dso₄ a₂bógꞌ₂ dsa₂.
5 La₁ tsá₃ ma₃ꞌe₂ ca₂ŋag₃ Jesús ꞌi₁caun₂. Jaun₂ jë́₃ ca₂i₃góꞌ₃ dsɨ́₅ Pilato.
Ca₂o₃ꞌág₃ ꞌéiꞌ₃ a₂jón₂ Jesús
6 Jmɨg₄ jaun₂ jme₁chíꞌ₄ tag₄ a₂lióin₂ ca₂le₃jë́₃ ŋi₂ jan₂ dsa₂ i₂ꞌen₅₄ néꞌ₃ ꞌmá₃, jme₁të₅ Jmɨg₄ Të₂ꞌɨn₅₄*, ꞌein₂ ca₂ꞌɨn₃ dsa₂ juɨg₂ i₂lión₂.
7 Jaun₂ jme₁ꞌen₅₄ néꞌ₃ ꞌmá₃ jan₂ dsa₂ i₂chen₂ Barrabás, quianꞌ₅₄ dsa₂ i₂ma₂ca₂jme₃dsian₅ dsa₂ jme₁ca₂nau₂ ꞌnei₂.
8 Jaun₂ ca₂mɨ₃ dsa₂ juɨg₂ ca₂tsɨ́ꞌ₃ Pilato a₂jmo₃ conꞌ₂ lë́₅ tag₄ chíꞌ₅.
9 Jaun₂ ca₂ŋag₃ Pilato ca₂tsɨ́ꞌ₃ dsa₂ juɨg₂:
―¿ꞌNiogꞌ₂ ꞌniaꞌ₂ lon₄ jniá₂ Rag₅₄ quián₅ dsa₂ judíos?
10 Ia₁ ca₂rë₃líꞌ₄ bá₄ Pilato ꞌŋiog₅ a₂ꞌiog₅₄ uɨg₅ dsɨ́₅ bá₄ juɨg₅₄ jme₂dsa₂ ca₂jɨ́inꞌ₂ Jesús ne₅₄.
11 La₁ juɨg₅₄ jme₂dsa₂ në́₃ ca₂toinꞌ₂ jág₁ dsa₂, jaun₂ tóinꞌ₃ co₂mɨꞌ₅₄ a₂mɨ₃ lión₂ Barrabás bá₄.
12 Jaun₂ ca₂ŋag₃ táng₃ Pilato ca₂tsɨ́ꞌ₃ dsa₂ juɨg₂:
―¿ꞌE₂ guëꞌ₂ ꞌniogꞌ₂ ꞌniaꞌ₂ jmo₅₄ jniá₂ quianꞌ₅₄ i₂tëꞌ₂ ꞌniaꞌ₂ rag₅₄ quiángꞌ₂?
13 Jaun₂ ca₂ŋag₃ dsa₂ juɨg₂ co₂mɨꞌ₅₄ tioinꞌ₅₄, ca₂juáꞌ₂:
―¡Tióin₃ cróg₄!
14 Jaun₂ ca₂juáꞌ₂ táng₃ Pilato:
―¿ꞌE₂ ꞌuɨg₅₄? ¿ꞌE₂ guëꞌ₂ dso₄ ma₂ꞌnáu₂?
La₁ të₂le₃ i₂juɨꞌ₂ guë́₄ co₂mɨꞌ₅₄ ca₂tóinꞌ₂, ca₂juáꞌ₂:
―¡Tióin₃ cróg₄!
15 La₁ Pilato në́₃, ia₁jaun₂ dsɨ₃lén₂ dsa₂ tei₄, ca₂lióin₂ bá₄ Barrabás i₂mɨ₅ dsa₂ lión₂. Jme₁ma₂në₂dsí₃ Pilato ꞌéiꞌ₃ a₂bán₂ dsa₂ Jesús, jaun₂ ca₂jángꞌ₂ o₄gú₃ dsa₂ juɨg₂ jaun₂ tion₃ cróg₄.
16 Jaun₂ ca₂tág₃ ꞌlióg₂ Jesús të₂le₃ i₁dsi₅ ne₄ta₁, (co₂ꞌnióꞌ₄ caun₂ ja₁chei₂ Praetorio), jaun₂ ca₂ŋɨ́ꞌ₂ ꞌlióg₂ ca₂le₃jɨ́n₃ rɨinꞌ₅₄.
17 Jaun₂ ca₂queiꞌ₃ dsa₂ caun₂ capa ꞌuɨꞌ₃,a jaun₂ ca₂jmo₃ caun₂ corona quianꞌ₅₄ chi₁uɨ́ng₃ taun₅, ca₂tóꞌ₂ mɨ₂dsi₄ Jesús.
18 Jaun₂ ca₂jme₃lióg₃ qui₂ca₂cuag₃ Diú₄ tioinꞌ₅₄, ca₂juáꞌ₂:
―¡Sianꞌ₃ ꞌne₂ Rag₅₄ quián₅ dsa₂ judíos!
19 Jaun₂ qui₂ca₂bá₂ mɨ₂dsi₄ Jesús quianꞌ₅₄ nɨ₁ꞌma₂ ta₅, qui₂ca₂ꞌŋéi₂ në́₃ tioinꞌ₅₄, qui₂ca₂chi₃jné₃ në́₃, a₂jme₂juagꞌ₂.
20 Jme₁ca₂lë₃ a₂lë₁co₂jmógꞌ₂ jaun₂, ca₂dsein₂₃ táng₃ Jesús tsɨ₁ꞌmɨꞌ₂ ꞌuɨꞌ₃ a₂jme₁ca₂queiꞌ₃. Jaun₂ ca₂queiꞌ₃ táng₃ nɨ₁tsɨnꞌ₅₄ a₂jme₁quiꞌ₂. Jaun₂ guë́₄ ca₂jŋiai₃ Jesús a₂dsɨ₃tion₃ cróg₄.
Ca₂tion₃ dsa₂ cróg₄ Jesús
21 Jaun₂ ca₂chi₃quiáin₂ jmɨg₄ jan₂ dsa₂ i₂ꞌen₅₄ juɨ₅ jónꞌ₅ ja₁nau₂, i₂chen₂ Si₂mu₅₄ i₂chan₂ juɨg₂ Cirene, i₂lɨ́n₅ jmei₂ Alejandro quianꞌ₅₄ Rufo, a₂cán₂ ꞌéi₂ cróg₄ quióꞌ₅ Jesús.
22 Jaun₂ ca₂jŋia₃ dsa₂ Jesús caun₂ ja₁chei₂ Gólgota, (co₂ꞌnióꞌ₄ jein₅ jág₁ chei₂ Dsɨ₂conꞌ₂ Nɨ₁mu₅ Mɨ₂dsi₄ ꞌLag₄.)
23 Jaun₂ ca₂jénꞌ₃ ne₄ Jesús vino a₂rë₂cónꞌ₅ quianꞌ₅₄ mirra*, la₁ tsá₃ ca₂gue₃ ꞌéi₂.
24 Jaun₂ guë́₄ ca₂tion₃ cróg₄. Dsɨ₂ꞌlióg₂ guëꞌ₂ në́₃ ca₂jmo₃ dsióg₁ tsɨnꞌ₅₄ Jesús, ca₂co₃ o₁ne₄ ꞌein₂ líꞌ₂.
San Marcos 15:24-47
25 Conꞌ₂ hora ŋí₁ ŋi₃ të₂ o₃ꞌiog₂,b ca₂tion₃ dsa₂ cróg₄.
26 Jaun₂ ca₂tióng₃ letra dsi₄ cróg₄ co₂ꞌnióꞌ₄ a₂juáꞌ₂ ꞌe₂ dso₄ a₂bóinꞌ₂ Jesús, a₂juáꞌ₂: “RAG₅₄ QUIÁN₅ DSA₂ JUDÍOS.”
27 Ján₃ bá₄ ca₂tioin₃ guë́₄ on₃ dsa₂ ꞌang₂ co₂lë₅ quiongꞌ₅₄, jan₂ të₂le₃ gu₂ ne₁, jan₂ guëꞌ₂ të₂le₃ gu₂ jen₅.c
29 Jaun₂ ca₂le₃jɨ́n₃ dsa₂ i₂qui₂ca₂ŋɨ́₃ juɨ₅ jaun₂ qui₂ca₂jnáuꞌ₂ jág₁ uɨg₅, qui₂bí₂ dsi₅₄, ca₂juáꞌ₂:
―Ia₁, ¿on₁ ꞌne₂ i₂juáꞌ₂ a₂ꞌéngꞌ₄ guáꞌ₅ conꞌ₂ siáꞌ₂ tɨngꞌ₂ jmogꞌ₅₄ táng₃ quianꞌ₅₄ ꞌnɨ₅ jmɨg₄?
30 Në₃ në́₃, lion₄ ꞌŋiagꞌ₂, ja₁tongꞌ₂ në₅.
31 Ján₃ bá₄ le₂jaun₂ a₂lë₁qui₂co₂jmógꞌ₂ juɨg₅₄ jme₂dsa₂, quianꞌ₅₄ të₅juáꞌ₅, dsia₂₃ jág₁ qui₂tsɨ́ꞌ₅ rɨinꞌ₅₄, juáꞌ₂:
―Ca₂lióin₂ bá₄ i₂siánꞌ₂, la₁ ꞌŋiog₅ bá₄ tsá₃ lé₂ le₃lióin₃.
32 Juɨ₁sión₄ cróg₄ I₂rë₂ꞌɨ́n₁* quián₅ Diú₄ në₅, i₂juáꞌ₂ lɨ́n₅ Rag₅₄ quián₅ dsa₂ juɨg₂ Israel*, ia₁jaun₂ të₅₄ ne₄ jniog₄, ia₁jaun₂ le₃ꞌéin₂.
Le₂jiog₅ dsa₂ i₂le₁ton₅ quianꞌ₅₄ Jesús qui₂ca₂juáꞌ₂ uɨg₅.
Ca₂jon₃ Jesús
33 Jme₁ca₂të́₂ dsi₃ŋíꞌ₃,d ca₂ꞌág₂ nei₂ le₂con₂ ꞌuë₃ jaun₂, ca₂liaꞌ₂ ca₂të́₂ hora ŋí₁ ꞌnɨ₅ të₂le₃ ca₂ꞌláu₂.e
34 Hora jaun₂, ca₂ꞌŋia₂ guë́₄ Jesús jág₁, ca₂juáꞌ₂ tiá₂:
―Eloi, Eloi, ¿lama sabactani? ―co₂ꞌnióꞌ₄ a₂juáꞌ₂: Diú₄ quiáng₃, Diú₄ quiáng₃, ¿ꞌe₂ lë₃ ma₂në₂téiꞌ₃ jniá₂?.f
35 I₂lɨn₅₄ dsa₂ i₂jme₁tión₂ cau₅ jaun₂ ca₂nág₂, jaun₂ ca₂dsia₃ jág₁ tsɨ́ꞌ₅ rɨinꞌ₅₄:
―¡Nei₂! Elías i₂jme₁ꞌë́₂ jág₁ quián₅ Diú₄ ma₂lɨ́gꞌ₂ të́ꞌ₂.
36 Jaun₂ në́₃ ŋó₃ jan₂ co₂chiꞌ₅₄ i₁quian₅₄ caun₂ nɨ₁jau₂ guion₅ jmɨg₂. Jaun₂ ca₂guioin₃ vino dsiꞌ₃. Jaun₂ ca₂chi₃dsí₂ neiꞌ₅₄ caun₂ nɨ₁ꞌma₂ ta₅, jaun₂ ca₂jénꞌ₃ ne₄ Jesús ia₁jaun₂ jme₁ꞌɨ́nꞌ₂. Jaun₂ juáꞌ₂:
―O₁ne₄ chi₂juaꞌ₂ jiá₃ Elías jaun₂ sió₂ quióꞌ₅.
37 Cónꞌ₂ bá₄ ca₂ꞌŋióg₂ guë́₄ Jesús tiá₂ lɨn₃, co₂tan₅₄ ca₂join₃.
38 Hora jaun₂ dé₄ dsónꞌ₂ co₂dsia₅ ca₂chen₃ ca₂të₂ gueiꞌ₅₄ ca₂të₂ ꞌuë₃ ca₂lë₃ tɨn₃ tsɨ́nꞌ₅ tsɨ₁ꞌmɨꞌ₂* pa₁ a₂jme₁ꞌei₅ dsi₂néi₂ guáꞌ₅ templo*.
39 Jaun₂ juɨg₅₄ ꞌlióg₂ i₂jme₁chénꞌ₄ cau₅ cróg₄, jme₁ca₂jág₃ ꞌa₂ liaꞌ₂ ca₂jon₃ Jesús, jaun₂ ca₂juáꞌ₂:
―Të₃dsónꞌ₂ bá₄ jme₁lɨ́n₄ dsa₂ në₅ Ja₁ŋiꞌ₅₄ Diú₄.
40 Jaun₂ bá₄ jme₁tión₂ i₂lɨn₅₄ ꞌio₅₄, jág₅ uɨ́ng₂ ján₃. Jë₄ jaun₂ jme₁chénꞌ₄ María chan₂ Magdala, quianꞌ₅₄ María chog₅₄ i₂chen₂ José, quianꞌ₅₄ i₂chen₂ Jacobog i₂lɨ́n₅ i₂meꞌ₂ guë́₄, quianꞌ₅₄ guë́₄ jan₂ i₂chen₂ Salomé.
41 ꞌIo₅₄ ꞌéi₂ ma₂ja₂léin₂ le₂tan₅₄ ꞌuë₃ Galilea jme₂ti₃ ne₄ Jesús. Juɨn₅ bá₄ guë́₄ ꞌio₅₄ siánꞌ₂ i₂ma₂ja₂lén₂ ꞌein₂₃ Jesús të₂ Jerusalén.
Ca₂ꞌon₃ Jesús
42 Jme₁ca₂tóꞌ₂ nei₂ jmɨg₄ jaun₂, tionꞌ₅₄ dsa₂ jmo₂₃ co₂jŋia₅₄ juɨ₁liaꞌ₂ ꞌióg₃ jmɨg₄ jŋió₅.
43 Jaun₂ ca₂dsióg₃ José i₂chan₂ Arimatea, i₂lɨ́n₅ jan₂ dsa₂ dsen₅₄ i₂quianꞌ₅₄ dsɨ₂tan₅₄ quián₅ guáꞌ₅. Ia₁ ꞌéi₂ ján₃ jme₁chi₁jŋia₂₃ a₂ꞌɨ́n₂ dsɨ́₅ a₂guá₂ ꞌéiꞌ₃ quióꞌ₅ Diú₄. Jaun₂ ca₂dsia₃ tiá₂ dsɨ́₅ në́₃, ŋó₃ ja₁con₂ Pilato, ca₂i₁mɨi₁₂ ꞌlag₄ Jesús.
44 Jaun₂ ca₂i₃góꞌ₃ dsɨ́₅ Pilato jme₁ca₂nág₂ a₂ma₂jon₅ Jesús, jaun₂ ca₂të́ꞌ₃ juɨg₅₄ ꞌlióg₂ ca₂ŋag₃ chi₂juaꞌ₂ dsónꞌ₂ ma₂join₂₃.
45 Jme₁ca₂rë₃ŋi₅ ca₂juáꞌ₂ ꞌlióg₂, “Dsónꞌ₂ bá₄ le₂jaun₂ ma₂ca₂lë₃”, jaun₂ ca₂jɨ́inꞌ₂ ꞌlag₄ o₄gú₃ Së́₄ ꞌéi₂.
46 Jaun₂ Së́₄ në́₃ ca₂i₁lia₅ ꞌmɨꞌ₂ tióg₃; quianꞌ₅₄ a₂jaun₂ ca₂lioin₃ ꞌlag₄ Jesús jme₁ca₂sió₂ cróg₄. Jaun₂ ca₂toꞌ₂ ꞌŋióꞌ₃ tau₂ ꞌŋio₅ a₂jme₁ma₂lë́₅ dsoꞌ₂ nɨ₁ꞌlau₂. Jaun₂ ca₂mói₂ ca₂mɨ́g₂ nɨ₁cang₁ ꞌɨ́₂ pa₁, ca₂jne₃ ꞌo₄ tau₂ ꞌŋio₅.
47 Jaun₂ María i₂chan₂ Magdala quianꞌ₅₄ María chog₅₄ José, ca₂të́₂ ne₅₄ ja₁ca₂ꞌon₃ Jesús.