Ca₂quɨnꞌ₃ dsa₂ jág₁ a₂tsáinꞌ₂ Jesús
14
Tɨn₃ jmɨg₄ néꞌ₃ a₂të₅₄ Jmɨg₄ Të₂ꞌɨn₅₄*, a₂guë́ꞌ₅ dsa₂ i₁ŋíꞌ₄ ꞌuaꞌ₂ a₂tsá₃ juɨ₁ levadura* quianꞌ₅₄, jaun₂ juɨg₅₄ jme₂dsa₂, të₅juáꞌ₅ në́₃ ca₂ꞌnáuꞌ₃ juɨ₅ ꞌa₂ liaꞌ₂ tsáinꞌ₂ Jesús quianꞌ₅₄ caun₂ mai₅₄, jaun₂ jŋagꞌ₃.
San Marcos 14:1-21
―La₁ tsá₃ ꞌnióꞌ₅ jmó₁ jniog₄ të₃ niog₅ jmɨg₄, jme₁né₄, ia₁ conꞌ₂ tsá₃ ŋó₅ në₁juaꞌ₂ ca₂tóꞌ₂ dsa₂ juɨg₂ mɨꞌ₅₄.
Jan₂ ꞌio₅₄ ca₂tsɨ́in₂ noꞌ₅₄ mɨ₂juɨg₂ Jesús
3 Liaꞌ₂ conꞌ₂ ꞌein₅₄ guë́₄ juɨg₂ Betania ja₁quióꞌ₄ i₂të́ꞌ₂ dsa₂ Si₂mu₅₄ ꞌMéꞌ₅ ꞌIog₅, jaun₂ ca₂dsióg₃ jan₂ ꞌio₅₄ quian₅ caun₂ tsɨ́₅ noꞌ₅₄ mɨ₂juɨg₂ a₂ꞌmuꞌ₅₄, a₂lë́₅ jmáꞌ₃ noꞌ₅₄ quióꞌ₅ mɨ₁ꞌau₂ nardo. Jaun₂ ca₂niá₃ nɨ₁tsɨ́₅, jaun₂ ca₂ꞌág₂ noꞌ₅₄ mɨ₂dsi₄ Jesús.
4 Jaun₂ i₂lɨn₅₄ dsa₂ i₂tionꞌ₅₄ ja₁jaun₂, dséin₂ ca₂tɨ́in₂, jaun₂ ca₂dsia₃:
―Tsá₃ ne₄ ꞌe₂ lë₃ në₂ꞌéin₂ noꞌ₅₄ mɨ₂juɨg₂ quióꞌ₅.
5 Juaꞌ₅₄ co₂ŋeiꞌ₅₄ bá₄ në₂ꞌnag₃ quianꞌ₅₄ ꞌnɨ₅ ꞌŋiá₂-láu₂ ꞌéiꞌ₃ cu₄ denario*, jaun₂ jme₁jme₂ꞌoin₅₄ dsa₂ te₂ŋé₂.
Jaun₂ ca₂dséin₃ quiainꞌ₅₄ ꞌio₅₄ ꞌéi₂.
6 Jaun₂ ca₂juáꞌ₂ Jesús:
―Tsá₃ lë₁leinꞌ₅₄. ¿ꞌE₂ lë₃ cuëꞌ₂ ꞌniaꞌ₂ o₂meꞌ₅₄ dsɨ₅? A₂në₂jmógꞌ₂ në₅, caun₂ a₂dse₃ bá₄ në₅.
7 Ca₂le₃jë́₃ jmɨg₄ bá₄ i₂nio₄ dsa₂ te₂ŋé₂ jɨnꞌ₄ ꞌniaꞌ₂; lé₂ bá₄ jme₁ꞌoinꞌ₁, chi₂juaꞌ₂ lɨ́gꞌ₂ ꞌniogꞌ₂ ꞌniaꞌ₂ jme₁ꞌoinꞌ₁. La₁ jniá₂ në́₃ tsá₃ ma₃uë́₂ ꞌen₅₄ jniá₂ quianꞌ₅₄ ꞌniaꞌ₂.
8 ꞌIo₅₄ në₅, në₂jmo₃ ꞌa₂ conꞌ₂ jŋiaꞌ₅₄ le₃quɨꞌ₅₄ jmɨg₄ jmo₃. Ma₂në₂tsáng₂ të₂jŋiá₅ noꞌ₅₄ mɨ₂juɨg₂ quió₃, ma₂në₂jmógꞌ₂ co₂jŋia₅₄ jë₁ma₂të́₂ rë₁ꞌong₃.
9 A₂dsɨ₂jóꞌ₃ juɨ́g₂ jniá₂ ꞌniaꞌ₂, ca₂le₂con₂ mɨ₂güɨ́g₃ ja₁ꞌë́₂ dsa₂ jág₁ dse₃ quió₃, ján₃ bá₄ le₂jaun₂ dsiogꞌ₂ dsɨ́₅ dsa₂ ꞌɨin₃ ꞌio₅₄ në₅.
Jmo₅ Judas caun₂ jág₁ a₂ꞌnɨi₂₃ Jesús
10 Jaun₂ në́₃ Judas Iscariote i₂jme₁lɨ́n₄ jan₂ chiꞌ₂ dsɨ₂guia₃-tɨ́n₂ quián₅ Jesús, ŋei₅₄ i₁dsia₂ jág₁ quianꞌ₅₄ juɨg₅₄ jme₂dsa₂ a₂jángꞌ₂.
11 Jaun₂ ꞌioꞌ₂ jmo₅ dsa₂ canꞌ₅₄ jme₁ca₂nág₂, jaun₂ ca₂jénꞌ₃ cu₄. Jaun₂ guë́₄ në́₃ ca₂ꞌnáuꞌ₃ Judas dsɨ́₅ ꞌa₂ liaꞌ₂ cuɨn₅ jmɨg₄ a₂jɨ́inꞌ₂ Jesús, jaun₂ tsáunꞌ₂ dsa₂.
Má₃ jë₁ca₂tóꞌ₂ quióꞌ₅ Te₁guiꞌ₅₄
12 Jmɨg₄ le₂ꞌuɨg₅₄ a₂niog₅ Jmɨg₄ Të₂ꞌɨn₅₄ a₂guë́ꞌ₅ dsa₂ i₁ŋíꞌ₄ a₂tsá₃ quianꞌ₅₄ levadura, jmɨg₄ a₂jme₁jme₂dsian₅ dsa₂ jáꞌ₂ chaꞌ₂* quián₅ jmɨg₄, jaun₂ ca₂ŋag₃ chiꞌ₂ dsɨ₂guia₃-tɨ́n₂ ca₂ŋɨ́iꞌ₃ Jesús:
―¿A₂jáꞌ₄ ꞌniogꞌ₂ dsɨ₁jmó₁ jniaꞌ₅₄ co₂jŋia₅₄ má₃ Jmɨg₄ Të₂ꞌɨn₅₄ quiángꞌ₂?
13 Jaun₂ ca₂chein₃ on₃ chiꞌ₂ dsɨ₂guia₃-tɨ́n₂ quiáin₅, ca₂juáꞌ₂:
―O₂nóꞌ₅ ꞌniaꞌ₂ jë₄ juɨg₂. Ja₁jaun₂ jenꞌ₂ ꞌniaꞌ₂ jan₂ dsa₂ ŋeꞌ₂ i₂quion₂ jmɨg₂ quianꞌ₅₄ nɨ₁dsɨg₁. Jaun₂ o₁ꞌénꞌ₃ ꞌniaꞌ₂ dsa₂ ꞌéi₂.
14 Dsi₂néi₂ ja₁ꞌí₂ ꞌéi₂, juɨgꞌ₅₄ dsa₂ juɨg₅₄ dsi₂néi₂: “Le₂la₂ juáꞌ₂ të₅, ¿Na₂ dsi₂néi₂ ja₁guëꞌ₄ Jmɨg₄ Të₂ꞌɨn₅₄ co₂lë₅ quianꞌ₅₄ chiꞌ₂ dsɨ₂guia₃-tɨ́n₂ quiáng₃?”
15 Jaun₂ ꞌéi₂ në́₃, ꞌë₃ caun₂ dsi₂néi₂ juëꞌ₂ ja₁lë́₄ gueiꞌ₅₄ a₂ma₂lë́₅ co₂jŋia₅₄. Ja₁jaun₂ o₂jmo₄ ꞌniaꞌ₂ co₂jŋia₅₄ má₃ que₅₄ jniog₄.
16 Jaun₂ ca₂i₃lén₂ bá₄ dsa₂ on₃ ꞌéi₂. Jme₁ca₂dsi₃léin₂ jë₄ juɨg₂ në́₃, ca₂dsóꞌ₂ liaꞌ₂ conꞌ₂ lë́₅ jág₁ ca₂juáꞌ₂ Jesús. Jaun₂ ja₁jaun₂ ca₂jmo₃ co₂jŋia₅₄ má₃ a₂guë́ꞌ₃ Jmɨg₄ Të₂ꞌɨn₅₄.
17 Jme₁ca₂nei₂ jaun₂, ca₂dsióg₃ Jesús quiainꞌ₅₄ ta₁guia₃-tɨ́n₂ chiꞌ₂ dsɨ₂guia₃-tɨ́n₂.
18 Jme₁ma₂tiáinꞌ₅ guë́ꞌ₅, jaun₂ ca₂juáꞌ₂ Jesús:
―A₂dsɨ₂jóꞌ₃ juáꞌ₅ jniá₂ la₂, janꞌ₂ ꞌniaꞌ₂ i₂guëꞌ₅ jniá₂ co₂lë₅ quiangꞌ₅₄ bá₄ i₂jangꞌ₂ jniá₂.
19 Jaun₂ në́₃ ca₂táꞌ₂ ꞌliaꞌ₂ dsɨ́₅ ꞌŋio₅ lɨn₃ tiáinꞌ₅, jaun₂ ca₂jme₃lióg₃ ca₂ŋɨ́iꞌ₃ Jesús le₂jain₂ le₂jain₂, ca₂juáꞌ₂:
―¿On₁juaꞌ₅₄ jniá₂ ꞌágꞌ₅?
20 Jaun₂ ca₂ŋag₃ Jesús:
―Janꞌ₂ ꞌniaꞌ₂ i₂lë́₂ guia₃-tɨ́ngꞌ₂ i₂tiá₂ mɨ₂gu₂ co₂lë₅ ꞌŋióꞌ₃ uɨng₅ quianꞌ₅₄ jniá₂.
21 Dsónꞌ₂ bá₄ dsau₅ Jaun₅* dsa₂ mɨ₂güɨ́g₃ ꞌein₅₄ juɨ₅ dsó₃ liaꞌ₂ conꞌ₂ lë́₅ juáꞌ₂ ne₄ Si₂; la₁ ¡ꞌe₂ guë́₄ juɨ́g₂ dsa₂ i₂jángꞌ₂! Jme₁dse₃ quióꞌ₅ juaꞌ₅₄ co₂ŋeiꞌ₅₄ bá₄ tsá₃ ca₂rë₃cháin₃.
22 Të₁liaꞌ₂ tiáinꞌ₅ guë́ꞌ₅, ca₂jŋaꞌ₃ Jesús i₁ŋíꞌ₄, ca₂cuë́ꞌ₃ ti₁ꞌmagꞌ₄ Diú₄, jaun₂ guë́₄ në́₃ ca₂dsioin₃, ca₂cuë́ꞌ₃ chiꞌ₂ dsɨ₂guia₃-tɨ́n₂ quiáin₅. Jaun₂ ca₂juáꞌ₂:
―Quéꞌ₂ ꞌniaꞌ₂, ia₁ ŋɨ₃ bá₄ jniá₂ i₁ŋíꞌ₄ la₂.
San Marcos 14:22-31
23 Jaun₂ ca₂can₃ táng₃ copa ꞌa₄ vino, ján₃ bá₄ le₂jaun₂ ca₂cuë́ꞌ₃ ti₁ꞌmagꞌ₄ Diú₄, jaun₂ guë́₄ ca₂cuë́ꞌ₃ chiꞌ₂ dsɨ₂guia₃-tɨ́n₂. Jaun₂ ca₂le₃jɨ́in₃ bá₄ ca₂ꞌɨnꞌ₃.
24 Ca₂juáꞌ₂ Jesús:
―Jmɨ₃ bá₄ jniá₂ la₂, a₂lɨꞌ₅₄ jág₁ ꞌmɨ́₂ a₂të₃ron₅₄,a a₂niog₅ dsɨ₃ꞌo₅₄ o₄quióꞌ₄ juɨn₅ dsa₂.
25 Dsónꞌ₂ juáꞌ₅ jniá₂, tsá₃ ma₃lɨ́gꞌ₂ jmɨg₄ juaꞌ₅₄ a₂guɨꞌ₅₄ guë́₄ táng₃ vino ca₂liaꞌ₂ ca₂të́₂ jmɨg₄ i₁guɨꞌ₄ táng₃ caun₂ vino ꞌmɨ́₂ co₂lë₅ quiangꞌ₅₄ ꞌniaꞌ₂ ja₁gon₂ Diú₄.
Ca₂juáꞌ₂ Jesús a₂tsá₃ tion₃ Pe₄ a₂cuɨg₂₃
26 Jme₁ca₂lë₃ ꞌë₂₃ jme₂juɨinꞌ₂ Diú₄, jaun₂ guë́₄ i₃léin₂ juɨ₅ Máꞌ₂ Olivos*.
27 Jaun₂ ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―Ca₂le₃jɨ́nꞌ₃ bá₄ ꞌniaꞌ₂ tiáꞌ₃ jén₂ ꞌauꞌ₂, ꞌágꞌ₁ ꞌniaꞌ₂ caun₂-tɨn₃ ꞌauꞌ₂; ia₁ rë₂ton₅ ne₄ Si₂ ja₁juáꞌ₂: “Jŋɨ́ꞌ₄ jniá₂ dsa₂ i₂jŋia₅ jáꞌ₂ chaꞌ₂, jaun₂ jáꞌ₂ chaꞌ₂ në́₃ dsɨ₃léin₂ tsɨ₁rë₂jain₅₄.”b
28 La₁ cang₂ jë₁ma₂ca₂jengꞌ₅₄ táng₃, nei₅₄ jniá₂ jŋiág₅ juɨ₅ Galilea liaꞌ₂ conꞌ₂ guë́₄ ꞌniaꞌ₂.
29 Jaun₂ në́₃ ca₂ŋag₃ Pe₄:
―O₁jŋiaꞌ₅₄ la₂ ca₂ꞌág₂ caun₂-tɨn₃ dsɨ́₅ ca₂le₃jɨ́n₃ rɨ́ngꞌ₃, la₁ jniá₂, o₁lɨ́gꞌ₂ jmɨg₄ tsá₃ ꞌag₅₄ caun₂-tɨn₃ dsɨ₃.
30 Jaun₂ ca₂juáꞌ₂ Jesús:
―A₂dsɨ₂jóꞌ₃ juáꞌ₅ jniá₂, a₂ꞌuë₂ në₃, néꞌ₃ a₂ꞌó₃ jë₁ca₂të́₂ tɨn₃ ráun₂c të₁guí₄ dsó₂, hora jaun₂ dé₄ dsónꞌ₂ chéngꞌ₅ tsá₃ tóngꞌ₄ ta₁ꞌnɨ₅ ráun₂ a₂cuɨgꞌ₂ jniá₂.
31 Jaun₂ ca₂ŋag₃ táng₃ Pe₄:
―O₁jŋiaꞌ₅₄ la₂ ca₂dsau₃ jniog₄ co₂lë₅, o₁lɨ́gꞌ₂ jmɨg₄ juaꞌ₅₄ a₂tsá₃ ꞌɨ́n₄ jniá₂ ꞌne₂.
Le₂jaun₂ bá₄ ca₂juáꞌ₂ ca₂le₃jɨ́n₃ rɨinꞌ₅₄ ján₃.
Ca₂chi₃lénꞌ₂ Jesús Diú₄ caun₂ ja₁chei₂ Getsemaní
32 Jaun₂ ca₂dsi₃léin₂ caun₂ ja₁chei₂ Getsemaní. Jaun₂ ca₂juáꞌ₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―Ja₁lá₃ tiánꞌ₂ ꞌniaꞌ₂, të₁liaꞌ₂ i₁chi₁lengꞌ₄ Diú₄.
San Marcos 14:32-52
33 Jaun₂ ca₂jŋiai₃ Pe₄, Jacobo, Juan₅₄ në́₃. Jaun₂ ca₂rë₃lióg₃ ca₂táꞌ₂ quian₅ o₂i₁ dsɨ₅ ꞌŋio₅ lɨn₃.
34 Jaun₂ ca₂juáꞌ₂ ca₂tsɨ́ꞌ₃ i₂ún₂ i₂quiainꞌ₅₄:
―ꞌŊio₅ lɨn₃ quian₅₄ o₂i₁ dsɨ₅, ca₂liaꞌ₂ jmáꞌ₃ le₃jóng₂ të₂në₃. Ja₁lá₃ tiánꞌ₂ ꞌniaꞌ₂ jme₁jnio₂ ꞌniaꞌ₂ neꞌ₅₄.
35 Ca₂juɨg₄ bá₄ ca₂ŋó₃ guë́₄ ne₄ juɨ₅. Ja₁jaun₂ ca₂tóin₂ të₂ ꞌuë₃, ca₂mɨ₃ ca₂tsɨ́ꞌ₃ Diú₄, juaꞌ₅₄ lé₂ bá₄ le₃lé₂ a₂tsá₃ dsɨ₃ŋɨ́i₂ uɨg₅ ꞌe₂ niog₅ dsɨ₃ŋɨ́i₂ hora jaun₂.
36 Të₃jë₄ chi₂léinꞌ₂ Diú₄, ca₂juáꞌ₂:
―Abba,d Tia₅₄ quiáng₃, ca₂le₃jë́₃ bá₄ lé₂ le₃jmóꞌ₂ ꞌne₂. Lio₄ jniá₂ ꞌe₂ a₂dsɨ₃ŋɨ́g₂ në₃. La₁ tsá₃ juɨ₁le₅₄ conꞌ₂ ꞌnio₃ jniá₂; juɨ₁le₅₄ bá₄ a₂ꞌŋio₂ ꞌauꞌ₂ ꞌne₂.
37 Jaun₂ ca₂dsiáinꞌ₃ táng₃ ja₁tiánꞌ₄ ꞌéi₂, la₁ le₁güɨ́n₃ bá₄ ꞌéi₂ tiáinꞌ₅ në́₃. Jaun₂ ca₂të́ꞌ₃ Pe₄, ca₂juáꞌ₂:
―¿Rë₁güɨ́nꞌ₃ bá₄ ꞌne₂, Si₂mu₅₄? ¿Tsa₁ tiangꞌ₃ juaꞌ₅₄ caun₂ hora bá₄ jme₁jniogꞌ₂ guë́₄ neꞌ₅₄?
38 Jme₁jnio₂ ꞌniaꞌ₂ neꞌ₅₄, chi₁lenꞌ₄ ꞌniaꞌ₂ Diú₄, ia₁jaun₂ tsá₃ tsɨ₃sénꞌ₂ ꞌniaꞌ₂ dso₄. Dsónꞌ₂ bá₄ ꞌŋio₂ dsɨ́₅ jme₂dsí₂ quiánꞌ₂ ꞌniaꞌ₂, la₁ nɨ₁ŋɨꞌ₁ guionꞌ₅₄ bá₄ ꞌniaꞌ₂ ꞌuan₅₄.
39 Jaun₂ ŋó₃ bá₄ táng₃ i₁chi₂i₁leinꞌ₄ Diú₄. Ján₃ bá₄ jág₁ le₂jaun₂ ca₂juáꞌ₂ táng₃.
40 Jaun₂ guáinꞌ₃ táng₃ ja₁tiánꞌ₄ chiꞌ₂ dsɨ₂guia₃-tɨ́n₂, la₁ le₁güɨ́n₃ bá₄ táng₃ ꞌéi₂ tiáinꞌ₅, ia₁ a₂ŋɨ́₄ lë₃ ꞌŋio₅ lɨn₃ ma₂i₁güɨ́in₃. Jaun₂ tsá₃ ꞌe₂ ŋi₅ ŋag₃.
41 Jaun₂ jme₁dsiáinꞌ₃ táng₃ ja₁tiánꞌ₄ ꞌéi₂ jë₁ca₂të́₂ ꞌnagꞌ₂ ráun₂, jaun₂ ca₂juáꞌ₂:
―¿ꞌE₂? ¿Liaꞌ₂ ma₂tiánꞌ₅ jaun₂ bá₄ ꞌniaꞌ₂ le₁güɨ́ngꞌ₃? Co₂në₅ bá₄ në́₃. Ca₂të́₂ bá₄ hora në́₃. Ŋí₂ ꞌniaꞌ₂. Ma₂rë₂jɨnꞌ₅₄ bá₄ Jaun₅* dsa₂ mɨ₂güɨ́g₃ o₄gú₃ dsa₂ i₂le₁cánꞌ₄ dso₄.
42 Nau₂ ꞌniaꞌ₂ në́₃, ma₃, ia₁ në₅ ma₂já₅ i₂jángꞌ₂.
Ma₂le₁te₂ dsa₂ Jesús
43 Dsɨ₂juɨ₅ të₃jë₄ dsia₂₃ jág₁ jaun₂, ca₂dsióg₃ Judas, i₂lɨ́n₅ jan₂ dsa₂ i₂guia₃-tɨ́n₂. Juɨn₅ lɨn₃ dsa₂ i₂ja₂lén₂ quiongꞌ₅₄ qui₂le₁quian₅ ŋi₁tág₂, i₂le₁quian₅ nɨ₁ꞌma₂ në́₃, i₂chen₄ quián₅ juɨg₅₄ jme₂dsa₂, quianꞌ₅₄ të₅juáꞌ₅, ca₂le₃jɨ́n₃ guë́₄ dsɨ₂guiꞌ₅₄ canꞌ₅₄ në́₃.
44 Jaun₂ Judas në́₃, ia₁ ma₂ca₂jmo₃ bá₄ jág₁ le₂jŋiá₅ ꞌe₂ léi₄ jmo₃ jë₁ma₂të́₂ rë₁jángꞌ₂, jme₁ma₂juáꞌ₂: “I₂chenꞌ₄ jniá₂ quióꞌ₅, i₂ꞌéi₂ bá₄ jmaꞌ₅₄ ꞌniaꞌ₂, jaun₂ tëꞌ₅₄ ꞌniaꞌ₂, lë́₅ ꞌí₁.”
45 Jaun₂ dsɨ₂juɨ₅ jme₁dsióg₃ Judas, ca₂jme₃quiáin₃ con₂ Jesús, jaun₂ ca₂juáꞌ₂:
47 La₁ jan₂ i₂jme₁chénꞌ₄ cau₅ në́₃, ca₂dsi₂ ŋi₁tág₂, ca₂ti₃ caun₂ rë₂gua₄ dsa₂ i₂jme₂ti₃ quián₅ jme₂dsa₂ dsen₅₄.
48 Jaun₂ ca₂juáꞌ₂ Jesús ca₂tsɨ́ꞌ₃ dsa₂:
―¿Dsa₂ ꞌang₂ lɨ́ng₅, ꞌe₂ ja₂nóꞌ₅ ꞌniaꞌ₂ le₁quianꞌ₄ ŋi₁tág₂, ꞌma₂ në́₃, a₂tëꞌ₅₄ jniá₂?
49 Juaꞌ₂ ca₂le₃jë́₃ jmɨg₄ bá₄ ꞌeng₅₄ jɨnꞌ₄ ꞌniaꞌ₂, jme₂tɨ́ng₁ dsa₂ i₁dsi₅ guáꞌ₅, tsá₃ ma₂ca₂chongꞌ₂ guëꞌ₂ ꞌniaꞌ₂ ja₁jaun₂. La₁ lë́₂ le₂në₅, ia₁jaun₂ le₃ti₃ conꞌ₂ lë́₅ juáꞌ₂ ne₄ Si₂.
50 Jaun₂ qui₂ca₂cuɨng₃ bá₄ ca₂le₃jɨ́n₃ chiꞌ₂ dsɨ₂guia₃-tɨ́n₂, ca₂téin₂ bá₄ Jesús.
Dsó₂ i₂ca₂cuɨng₃ të₃rë₂ŋɨ́₅
51 Të₃jë₄ jaun₂, ŋó₃ jan₂ dsó₂ rë₂bóinꞌ₅ caun₂ tsɨ₁ꞌmɨꞌ₂ tióg₃, ꞌein₂₃ Jesús.
52 Jaun₂ jme₁ca₂jŋauꞌ₃ dsa₂, la₁ ca₂lóin₂ bá₄, jmáꞌ₃ tsɨ₁ꞌmɨꞌ₂ bá₄ ca₂lɨ́ꞌ₃ dsa₂. Jaun₂ ŋáiꞌ₃ bá₄ të₃ rë₂ŋɨ́i₅.
Ma₂chénꞌ₅ Jesús ne₄ dsɨ₂tan₅₄ quián₅ guáꞌ₅
53 Jaun₂ ca₂tág₃ dsa₂ Jesús i₁jo₅₄ ne₄ jme₂dsa₂ dsen₅₄, jaun₂ ca₂ŋɨꞌ₂ ca₂le₃jɨ́n₃ juɨg₅₄ jme₂dsa₂, quianꞌ₅₄ dsɨ₂guiꞌ₅₄ canꞌ₅₄, të₅juáꞌ₅ në́₃.
San Marcos 14:53-72
54 Pe₄ në́₃ ca₂ŋó₃ uɨ́ng₂ të₂quɨ́in₃ ꞌein₂₃ Jesús ca₂të₂ i₁dsi₅ quióꞌ₅ jme₂dsa₂ dsen₅₄. Ja₁jaun₂ ca₂guá₂ cau₅ si₂ quiainꞌ₅₄ ꞌlióg₂, ca₂jme₃dsioinꞌ₂.
55 Jaun₂ juɨg₅₄ jme₂dsa₂, quianꞌ₅₄ ca₂le₃jɨ́n₃ dsɨ₂tan₅₄ quián₅ guáꞌ₅ në́₃, qui₂ca₂ꞌnáuꞌ₃ juɨ₅ ꞌa₂ liaꞌ₂ bóinꞌ₂ dso₄ Jesús ia₁jaun₂ jŋagꞌ₃. La₁ tsá₃ dsoꞌ₂ guëꞌ₂ juɨ₅ ꞌe₂ dso₄ jme₃cáuꞌ₂,
56 ia₁ juɨn₅ i₂qui₂ca₂jmo₃ jág₁ të₂jág₁ a₂bóinꞌ₂ dso₄ Jesús, la₁ tsá₃ të₃tsɨꞌ₅₄ guëꞌ₂ jág₁ quióꞌ₅ tioinꞌ₅₄.
57 Jaun₂ i₂lɨn₅₄ në́₃ qui₂ca₂nau₂ ca₂jmo₃ jág₁ të₂jág₁ a₂ꞌnɨi₂₃ Jesús, ca₂juáꞌ₂:
58 ―Ma₂néi₁ jniaꞌ₅₄ juáꞌ₂ i₂në₅: “A₂ꞌéng₄ guáꞌ₅ templo* a₂ca₂jmo₃ dsa₂ mɨ₂güɨ́g₃, jaun₂ quianꞌ₅₄ ꞌnɨ₅ jmɨg₄ jmógꞌ₄ táng₃ ꞌŋió₃ caun₂ guáꞌ₅ siáꞌ₂, on₃juaꞌ₅₄ liaꞌ₂ lë́₅ guáꞌ₅ në₅ a₂ca₂jmo₃ dsa₂ mɨ₂güɨ́g₃.”
59 On₃ guëꞌ₂ quianꞌ₅₄ jág₁ jaun₂ ca₂lɨ́ꞌ₃ jág₁ rë₂.
60 Jaun₂ ca₂nau₂ jme₂dsa₂ dsen₅₄ të₃jë₄ tioinꞌ₅₄ jaun₂, jaun₂ ca₂ŋɨ́iꞌ₃ Jesús ca₂juáꞌ₂:
―¿Tsa₁ ꞌe₂ ŋagꞌ₅₄ ꞌi₁caun₂? ¿I₂ꞌe₂ bá₄ jág₁ në₅ jme₂cáuꞌ₂ dsa₂ quiangꞌ₂?
61 La₁ tei₄ bá₄ ca₂nau₂ Jesús, tsá₃ ma₃ꞌe₂ ca₂ŋag₃. Conꞌ₂ siáꞌ₂ ca₂ŋag₃ táng₃ jme₂dsa₂ dsen₅₄, ca₂juáꞌ₂:
―¿Dsónꞌ₂ ꞌne₂ lɨ́ngꞌ₅ dsa₂ I₂rë₂ꞌɨ́n₁, Ja₁ŋiꞌ₅₄ I₂jŋió₅?
62 Jaun₂ guë́₄ ca₂ŋag₃ Jesús:
―Ján₅, jniá₂ bá₄ lɨ́ng₅. Ján₃ bá₄ të₃ neꞌ₅₄ ꞌniaꞌ₂ jë₁ma₂të́₂ rë₁guá₃ Jaun₅* dsa₂ mɨ₂güɨ́g₃ të₂le₃ gu₂ ne₁ quióꞌ₅ i₂ꞌuanꞌ₂, jaun₂ ján₃ bá₄ jagꞌ₅₄ ꞌniaꞌ₂ jë₁ma₂të́₂ rë₁jŋióiꞌ₂ táng₃ jë₄ jnei₅ gueiꞌ₅₄.
63 Jaun₂ jme₂dsa₂ dsen₅₄ në́₃, jme₁ca₂nág₂ jág₁ jaun₂, ca₂chein₃ nɨ₁tsɨnꞌ₅₄ ꞌŋiog₅,e jaun₂ ca₂juáꞌ₂:
―¿ꞌE₂ guë́₄ jmáꞌ₃ jág₁ ꞌlióng₂ ꞌniog₂ jniog₄ juaꞌ₅₄ a₂jángꞌ₃ guë́₄ dsa₂ siánꞌ₂ jág₁ dsau₅?
64 Ma₂në₂neiꞌ₂ bá₄ ꞌniaꞌ₂ guiongꞌ₅₄ a₂ma₂në₂juáꞌ₂ i₂në₅ ꞌɨin₂₃ Diú₄. ¿ꞌA₂ liaꞌ₂ juáꞌ₂ ꞌniaꞌ₂?
Jaun₂ ca₂le₃jɨ́n₃ dsa₂ ca₂juáꞌ₂ tioinꞌ₅₄, ca₂tɨ́in₂ jóin₂ bá₄.
65 Jaun₂ ca₂jme₃lióg₃ i₂lɨn₅₄ qui₂ca₂ꞌŋéi₃ quióꞌ₅ Jesús, qui₂ca₂lio₃ dsa₂ dsɨ₂ne₅₄, jaun₂ qui₂ca₂jnó₂ në́₃ tioinꞌ₅₄, jaun₂ juáꞌ₂:
―¡Dsi₄ jág₁ juaꞌ₅₄ ꞌein₂ në₂quein₃ quiángꞌ₂!
Chiꞌ₂ ꞌɨꞌ₅₄ quián₅ guáꞌ₅ në́₃, ján₃ bá₄ qui₂ca₂cuë₃ jaꞌ₂ tioinꞌ₅₄.
Tsá₃ ca₂tion₃ Pe₄ a₂cuɨin₂₃ Jesús
66 I₁dsi₅ ca₁ꞌné₄ ꞌuë₃ bá₄ jme₁guá₄ Pe₄. Jaun₂ ca₂dsióg₃ jan₂ ꞌio₅₄ i₂jme₂ti₃ ta₁ ne₄ jme₂dsa₂ dsen₅₄,
67 jaun₂ ca₂jɨ́in₂ Pe₄ guá₅ jme₂dsioinꞌ₂, jaun₂ ca₂jág₂ ꞌio₅₄ tiá₂, ca₂juáꞌ₂:
―¿Ján₃ guëꞌ₂ jme₁quianꞌ₄ ꞌne₂ Jesús Nazareno ó₃?
68 La₁ tsá₃ ca₂tion₃ Pe₄.
―Tsá₃ guion₅₄, on₃ guë́₄ ŋɨ́gꞌ₂ ꞌe₂ a₂juáꞌ₂ ꞌne₂.
Jaun₂ ca₂nau₂ Pe₄ ca₂o₃ꞌɨ́in₃ ca₂i₁nau₂ të₂le₃ ca₁ꞌné₄ ja₁lë́₄ corredor. Të₃jë₄ jaun₂ ca₂ꞌo₃ të₁guí₄ dsó₂.
69 Conꞌ₂ siáꞌ₂ ca₂jág₃ táng₃ ꞌio₅₄ ca₂jɨ́in₂ Pe₄, jaun₂ ca₂juáꞌ₂ ca₂tsɨ́ꞌ₃ dsa₂:
―Jan₂ rɨnꞌ₅₄ ꞌéi₂ bá₄ në₅.
70 La₁ ján₃ bá₄ le₂jaun₂ tsá₃ ca₂tion₃ Pe₄. Jme₁co₂lág₂ jaun₂, dsa₂ i₂tiánꞌ₅ quianꞌ₅₄ Pe₄ ca₂juáꞌ₂:
―Dsónꞌ₂ rɨnꞌ₅₄ ꞌéi₂ bá₄ lɨ́ngꞌ₅, ia₁ ján₃ bá₄ Galilea changꞌ₂.
71 Jaun₂ në́₃, Pe₄ ca₂ꞌɨin₃ Diú₄ ca₂mɨ₃ a₂dsɨ₃ŋɨ́i₂ ꞌe₂ dsɨ₃ŋɨ́i₂, ca₂juáꞌ₂:
―¡Tsá₃ cuɨ́ng₅ dsa₂ i₂ꞌɨ́nꞌ₅ ꞌniaꞌ₂!
72 Dsɨ₂juɨ₅ jaun₂ ca₂ꞌo₃ táng₃ të₁guí₄ dsó₂ a₂ca₂të́₂ tɨn₃ ráun₂. Jaun₂ guë́₄ në́₃ ca₂dsáuꞌ₃ dsɨ́₅ Pe₄ a₂ca₂juáꞌ₂ Jesús le₂jŋiá₅: “Néꞌ₃ a₂ꞌo₃ jë₁ca₂të́₂ tɨn₃ ráun₂ të₁guí₄ dsó₂, hora jaun₂ dé₄ dsónꞌ₂ chéngꞌ₅ tsá₃ tóngꞌ₄ ta₁ꞌnɨ₅ ráun₂ a₂cuɨgꞌ₂ jniá₂.” Jme₁ca₂dsáuꞌ₃ dsɨ́₅ jág₁ në₅, jaun₂ guë́₄ ca₂ꞌo₃ ꞌŋio₅ lɨn₃.