Ca₂quɨnꞌ₃ dsa₂ jág₁ a₂tsáinꞌ₂ Jesús
26
Jme₁ca₂dsan₃ juáꞌ₂ Jesús ca₂le₃jë́₃ jág₁ në₅, jaun₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂:
2 ―Ma₂ŋiꞌ₅₄ ꞌniaꞌ₂ jaun₂, a₂tɨn₃ jmɨg₄ në₃ te₅₄ Jmɨg₄ Të₂ꞌɨn₅₄, ja₁jángꞌ₂ dsa₂ jɨ́inꞌ₂ Jaun₅* dsa₂ mɨ₂güɨ́g₃ a₂tion₃ ne₄ cróg₄.
3 Jaun₂ në́₃, juɨg₅₄ jme₂dsa₂, quianꞌ₅₄ të₅juáꞌ₅, dsa₂ canꞌ₅₄ quián₅ dsa₂ judíos* në́₃, ca₂ŋɨiꞌ₂ i₁dsi₅ ne₄ta₁ quióꞌ₅ i₂lɨ́n₅ jme₂dsa₂ dsen₅₄, i₂chen₂ Caifás.
4 Ja₁jaun₂ ca₂quɨin₃ jág₁ quióꞌ₅ a₂jmo₃ të₂le₃ quianꞌ₅₄ caun₂ mai₅₄ ia₁jaun₂ cuɨn₃ jmɨg₄ tsáunꞌ₂, jaun₂ jŋangꞌ₃.
5 Jaun₂ tioinꞌ₅₄ ca₂dsia₃ jág₁ ca₂juáꞌ₂:
―La₁ tsá₃ ꞌnióꞌ₅ jmó₁ jniog₄ të₃ niog₅ jmɨg₄, jme₁né₄, ia₁ conꞌ₂ tsá₃ ŋó₅ në₁juaꞌ₂ ca₂tóꞌ₂ dsa₂ juɨg₂ mɨꞌ₅₄.
Jan₂ ꞌio₅₄ ca₂tsɨ́in₂ Jesús noꞌ₅₄ mɨ₂juɨg₂
6 Liaꞌ₂ conꞌ₂ ꞌen₅₄ guë́₄ Jesús juɨg₂ Betania ja₁quióꞌ₄ i₂të́ꞌ₂ dsa₂ Si₂mu₅₄ ꞌméꞌ₅ ꞌiog₅,
7 jaun₂ ca₂dsióg₃ jan₂ ꞌio₅₄ quian₅ caun₂ tsɨ́₅ noꞌ₅₄ mɨ₂juɨg₂ a₂ꞌmuꞌ₅₄. Jme₁ma₂guá₅ Jesús ne₄ mesa guë́ꞌ₅, jaun₂ ca₂ꞌág₂ ꞌio₅₄ ꞌéi₂ noꞌ₅₄ mɨ₂juɨg₂ mɨ₂dsi₄ Jesús.
8 Jme₁ca₂jág₃ chiꞌ₂ dsɨ₂guia₃-tɨ́n₂ a₂jaun₂, tsá₃ dse₃ ca₂tɨ́in₂, jaun₂ ca₂tsɨ́ꞌ₃ rɨinꞌ₅₄ tioinꞌ₅₄:
―Tsá₃ ne₄ ꞌe₂ lë₃ në₂ꞌéin₂ a₂në₅.
9 Juaꞌ₅₄ co₂ŋeiꞌ₅₄ bá₄ në₂ꞌnag₃ ia₁jaun₂ jme₁jme₂ꞌoin₅₄ dsa₂ te₂ŋé₂.
10 Jme₁ca₂nág₂ Jesús jág₁ a₂dsia₂₃ tioinꞌ₅₄, jaun₂ ca₂juáꞌ₂:
―¿ꞌE₂ lë₃ cuëꞌ₂ ꞌniaꞌ₂ o₂meꞌ₅₄ dsɨ₅ ꞌio₅₄ la₂? A₂në₂jmógꞌ₂ la₂ caun₂ a₂dse₃ bá₄.
11 Ca₂le₃jë́₃ jmɨg₄ bá₄ i₂nio₄ dsa₂ te₂ŋé₂ jɨnꞌ₄ ꞌniaꞌ₂, la₁ jniá₂ në́₃ tsá₃ ma₃uë́₂ ꞌen₅₄ jniá₂ quianꞌ₅₄ ꞌniaꞌ₂.
12 Juɨ₁liaꞌ₂ noꞌ₅₄ mɨ₂juɨg₂ a₂në₂tsáng₂ nɨ₁ŋɨ₃, juaꞌ₂ a₂ma₂në₂jmógꞌ₂ co₂jŋia₅₄ jë₁ma₂të́₂ rë₁ꞌong₃ bá₄.
13 A₂dsɨ₂jóꞌ₃ juɨ́g₂ jniá₂ ꞌniaꞌ₂, ca₂le₂con₂ mɨ₂güɨ́g₃ ja₁ꞌë́₂ dsa₂ jág₁ dse₃ quió₃, ján₃ bá₄ le₂jaun₂ dsiogꞌ₂ dsɨ́₅ dsa₂ ꞌɨin₃ ꞌio₅₄ në₅.
Jmo₅ Judas caun₂ jág₁ a₂ꞌnɨi₂₃ Jesús
14 Jaun₂ në́₃, jan₂ i₂lɨ́n₅ dsa₂ guia₃-tɨ́n₂, i₂chen₂ Judas Iscariote, ŋei₅₄ i₁dsia₂ jág₁ quianꞌ₅₄ juɨg₅₄ jme₂dsa₂,
15 jaun₂ ca₂i₁juaꞌ₄:
―¿Je₂liáꞌ₂ cuë́ꞌ₁ ꞌniaꞌ₂ në₁juaꞌ₂ jɨnꞌ₄ jniá₂ Jesús o₄gogꞌ₂?
Jaun₂ në́₃, ca₂quí₃ juɨg₅₄ jme₂dsa₂ guióg₂-guiá₂ ꞌéiꞌ₃ cu₄tiog₂.
16 Jaun₂ në́₃ të₃ne₄ juɨ₅ ja₁ŋó₄ jaun₂, ca₂ꞌnáuꞌ₃ Judas dsɨ́₅ ꞌa₂ liaꞌ₂ cuɨn₃ jmɨg₄ jɨ́inꞌ₂ Jesús.
Má₃ jë₁ca₂tóꞌ₂ quióꞌ₅ Te₁guiꞌ₅₄
17 Jmɨg₄ le₂ꞌuɨg₅₄ a₂niog₅ Jmɨg₄ Të₂ꞌɨn₅₄* a₂guë́ꞌ₅ dsa₂ i₁ŋíꞌ₄ a₂tsá₃ quianꞌ₅₄ levadura*, chiꞌ₂ dsɨ₂guia₃-tɨ́n₂ në́₃ ca₂jme₃quiáin₃ ja₁con₂ Jesús ca₂ŋag₃:
―¿A₂jáꞌ₄ ꞌniogꞌ₂ dsɨ₁jmó₁ jniaꞌ₅₄ co₂jŋia₅₄ má₃ Jmɨg₄ Të₂ꞌɨn₅₄ quiángꞌ₂?
18 Jaun₂ ca₂juáꞌ₂ Jesús:
―O₂nóꞌ₅ ꞌniaꞌ₂ jë₄ juɨg₂, ja₁quióꞌ₄ jan₂ dsa₂, jaun₂ juɨgꞌ₅₄ ꞌniaꞌ₂: “Le₂la₂ juáꞌ₂ të₅: Ma₂ja₂quián₃ hora quió₃, jaun₂ ja₁quiángꞌ₂ i₁guëꞌ₃ Jmɨg₄ Të₂ꞌɨn₅₄ co₂lë₅ quianꞌ₅₄ chiꞌ₂ dsɨ₂guia₃-tɨ́n₂ quiáng₃.”
19 Jaun₂ në́₃ i₃lén₂ bá₄ chiꞌ₂ dsɨ₂guia₃-tɨ́n₂, jaun₂ ca₂jmo₃ conꞌ₂ lë́₅ jág₁ ca₂juáꞌ₂ Jesús. Jaun₂ ca₂tóinꞌ₂ ca₂jmo₃ co₂jŋia₅₄ a₂guë́ꞌ₃ Jmɨg₄ Të₂ꞌɨn₅₄ ja₁jaun₂.
20 Jme₁ca₂nei₂ jaun₂, jme₁ma₂guá₅ Jesús ne₄ mesa co₂lë₅ quiainꞌ₅₄ ta₁guia₃-tɨ́n₂ chiꞌ₂ dsɨ₂guia₃-tɨ́n₂ quiáin₅.
21 Të₃jë₄ tiáinꞌ₄ guë́ꞌ₅ jaun₂, ca₂juáꞌ₂ Jesús:
―A₂dsɨ₂jóꞌ₃ juáꞌ₅ jniá₂, janꞌ₂ ꞌniaꞌ₂ i₂ꞌen₅₄ jë₄ la₂ bá₄ i₂jángꞌ₂ jniá₂.
22 Jaun₂ në́₃ ca₂táꞌ₂ ꞌliaꞌ₂ dsɨ́₅ ꞌŋio₅ lɨn₃ bá₄ tiáinꞌ₅, jaun₂ ca₂jme₃lióg₃ ca₂ŋɨ́iꞌ₃ Jesús le₂jain₂ le₂jain₂ ca₂juáꞌ₂:
―Te₁guiꞌ₅₄, ¿On₁juaꞌ₅₄ jniá₂ ꞌágꞌ₅?
23 Jaun₂ ca₂ŋag₃ Jesús:
―I₂tiá₂ gu₂ co₂lë₅ ꞌŋióꞌ₃ uɨng₅ quianꞌ₅₄ jniá₂, i₂ꞌéi₂ bá₄ i₂jángꞌ₂.
24 Dsónꞌ₂ bá₄ dsau₅ Jaun₅* dsa₂ mɨ₂güɨ́g₃ ꞌein₅₄ juɨ₅ liaꞌ₂ conꞌ₂ lë́₅ juáꞌ₂ ne₄ Si₂; la₁ ¡ꞌe₂ guë́₄ juɨ́g₂ dsa₂ i₂jángꞌ₂! Dse₃ quióꞌ₅ juaꞌ₅₄ co₂ŋeiꞌ₅₄ bá₄ tsá₃ ca₂rë₃cháin₃.
25 Jaun₂ në́₃ Judas, dsa₂ i₂ma₂lë́₂ dsɨ́₅ jángꞌ₂, ca₂juáꞌ₂:
―Të₅, ¿On₁ jniá₂ bá₄ ꞌágꞌ₅ ꞌne₂?
Jaun₂ ca₂ŋag₃ Jesús:
―ꞌŊiagꞌ₂ bá₄ ma₂në₂juaꞌ₅₄.
26 Të₁liaꞌ₂ tiáinꞌ₅ guë́ꞌ₅, ca₂jŋaꞌ₃ Jesús i₁ŋíꞌ₄, ca₂cuë́ꞌ₃ ti₁ꞌmagꞌ₄ Diú₄, jaun₂ guë́₄ ca₂dsioin₃, ca₂cuë́ꞌ₃ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―Quéꞌ₂ ꞌniaꞌ₂, ia₁ ŋɨ₃ bá₄ jniá₂ i₁ŋíꞌ₄ la₂.
27 Jaun₂ ca₂can₃ táng₃ copa ꞌa₄ vino, ján₃ bá₄ le₂jaun₂ ca₂cuë́ꞌ₃ ti₁ꞌmagꞌ₄ Diú₄, jaun₂ guë́₄ ca₂cuë́ꞌ₃ chiꞌ₂ dsɨ₂guia₃-tɨ́n₂, jaun₂ ca₂juáꞌ₂:
―ꞌÉnꞌ₂ ꞌniaꞌ₂ ca₂le₃jɨ́ngꞌ₃ a₂la₂,
28 ia₁ jmɨ₃ bá₄ jniá₂ la₂, a₂lɨꞌ₅₄ jág₁ ꞌmɨ́₂ a₂të₃ron₅₄,a a₂niog₅ dsɨ₃ꞌo₅₄ o₄quióꞌ₄ juɨn₅ dsa₂, ia₁jaun₂ ꞌén₂ dsáu₁.
29 Dsónꞌ₂ juáꞌ₅ jniá₂, tsá₃ ma₃lɨ́gꞌ₂ jmɨg₄ juaꞌ₅₄ a₂guɨꞌ₅₄ guë́₄ táng₃ vino ca₂liaꞌ₂ ca₂të́₂ jmɨg₄ i₁guɨꞌ₄ táng₃ caun₂ vino ꞌmɨ́₂ co₂lë₅ quianꞌ₅₄ ꞌniaꞌ₂ ja₁gon₂ Ŋeꞌ₃.
Ca₂juáꞌ₂ Jesús a₂tsá₃ tion₃ Pe₄ a₂cuɨg₂₃
30 Jme₁ca₂lë₃ ꞌë₂₃ jme₂juɨinꞌ₂ Diú₄, jaun₂ guë́₄ i₃léin₂ juɨ₅ Máꞌ₂ Olivos*.
31 Jaun₂ ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―Ca₂le₃jɨ́nꞌ₃ bá₄ ꞌniaꞌ₂ tiáꞌ₃ jén₂ ꞌauꞌ₂ o₄quió₃ jniá₂ a₂ꞌuë₂ në₃, ꞌágꞌ₁ ꞌniaꞌ₂ caun₂-tɨn₃ ꞌauꞌ₂; ia₁ rë₂ton₅ ne₄ Si₂, juáꞌ₂: “Jŋɨ́ꞌ₄ jniá₂ dsa₂ i₂jŋia₅ jáꞌ₂ chaꞌ₂, jaun₂ jáꞌ₂ chaꞌ₂ në́₃ dsɨ₃léin₂ tsɨ₁rë₂jain₅₄.”b
32 La₁ cang₂ jë₁ma₂ca₂jengꞌ₅₄ táng₃, nei₅₄ jniá₂ jŋiág₅ juɨ₅ Galilea liaꞌ₂ conꞌ₂ guë́₄ ꞌniaꞌ₂.
33 Jaun₂ në́₃ ca₂ŋag₃ Pe₄:
―O₁jŋiaꞌ₅₄ la₂ ca₂ꞌág₂ caun₂-tɨn₃ dsɨ́₅ ca₂le₃jɨ́n₃ rɨ́ngꞌ₃, la₁ jniá₂, o₁lɨ́gꞌ₂ jmɨg₄ tsá₃ ꞌag₅₄ caun₂-tɨn₃ dsɨ₃.
34 Jaun₂ ca₂juáꞌ₂ Jesús:
―A₂dsɨ₂jóꞌ₃ juáꞌ₅ jniá₂, a₂ꞌuë₂ në₃, néꞌ₃ a₂ꞌo₃ të₁guí₄ dsó₂, hora jaun₂ dé₄ dsónꞌ₂ chéngꞌ₅ tsá₃ tóngꞌ₄ ta₁ꞌnɨ₅ ráun₂ a₂cuɨgꞌ₂ jniá₂.
35 Jaun₂ ca₂ŋag₃ táng₃ Pe₄:
―O₁jŋiaꞌ₅₄ la₂ ca₂dsau₃ jniog₄ co₂lë₅, o₁lɨ́gꞌ₂ jmɨg₄ juaꞌ₅₄ a₂tsá₃ ꞌɨ́n₄ jniá₂ ꞌne₂.
Le₂jaun₂ bá₄ ca₂juáꞌ₂ ca₂le₃jɨ́n₃ rɨinꞌ₅₄ ján₃.
Ca₂chi₃lénꞌ₂ Jesús Diú₄ caun₂ ja₁chei₂ Getsemaní
36 Jaun₂ ca₂dsióg₃ Jesús jme₁ca₂dsióg₃ quiainꞌ₅₄ chiꞌ₂ dsɨ₂guia₃-tɨ́n₂ quiáin₅ caun₂ ja₁chei₂ Getsemaní, jaun₂ ca₂juáꞌ₂:
―Ja₁lá₃ tiánꞌ₂ ꞌniaꞌ₂ të₁liaꞌ₂ nei₅₄ jó₄ i₁chi₁lengꞌ₄ Diú₄.
37 Jaun₂ ca₂jŋiai₃ Pe₄, quianꞌ₅₄ le₃on₃ ja₁ŋiꞌ₅₄ Zebedeo, jaun₂ Jesús në́₃ ca₂táꞌ₂ quian₅ o₂i₁ dsɨ₅ ꞌŋio₅ lɨn₃.
38 Jaun₂ ca₂juáꞌ₂ ca₂tsɨ́ꞌ₃ i₂ún₂ i₂quiainꞌ₅₄:
―ꞌŊio₅ lɨn₃ quian₅₄ o₂i₁ dsɨ₅, ca₂liaꞌ₂ jmáꞌ₃ le₃jóng₂ të₂në₃. Ja₁lá₃ tiánꞌ₂ ꞌniaꞌ₂, jme₁jnio₂ ꞌniaꞌ₂ neꞌ₅₄, jme₁quiongꞌ₅₄ jniá₂.
39 Ca₂juɨg₄ bá₄ ca₂ŋó₃ guë́₄ ne₄ juɨ₅. Ja₁jaun₂ ca₂liaꞌ₂ ca₂i₃ꞌɨ́in₃ chi₁ꞌɨn₅ ne₅₄ ca₂të₂ ꞌuë₃, ca₂mɨ₃ ca₂tsɨ́ꞌ₃ Diú₄, ca₂juáꞌ₂:
―Tia₅₄ quiáng₃, juaꞌ₅₄ meiꞌ₂ bá₄ lé₂ le₃lé₂, lio₄ jniá₂ jmɨ₁uɨg₅ la₂. La₁ tsá₃ juɨ₁le₅₄ conꞌ₂ ꞌnio₃ jniá₂, juɨ₁le₅₄ bá₄ a₂ꞌŋio₂ ꞌauꞌ₂ ꞌne₂.
40 Jaun₂ në́₃, ca₂nau₂ Jesús, jaun₂ ca₂ŋáiꞌ₃ ja₁tiánꞌ₄ i₂ún₂ i₂quiainꞌ₅₄, la₁ ma₂le₁güɨ́n₃ bá₄ guëꞌ₂ ꞌéi₂ tiáinꞌ₅; jaun₂ ca₂të́ꞌ₃ Pe₄, ca₂juáꞌ₂:
―¿Tsa₁ ma₃tianꞌ₃ guë́₄ ꞌniaꞌ₂ juaꞌ₅₄ caun₂ hora bá₄ jme₁jnioꞌ₂ guë́₄ ꞌniaꞌ₂ neꞌ₅₄ quianꞌ₅₄ jniá₂?
41 Jme₁jnio₂ ꞌniaꞌ₂ neꞌ₅₄, chi₁lenꞌ₄ ꞌniaꞌ₂ Diú₄, ia₁jaun₂ tsá₃ tsɨ₃sénꞌ₂ ꞌniaꞌ₂. Dsónꞌ₂ bá₄ jaun₂ ꞌŋio₂ bá₄ dsɨ́₅ jme₂dsí₂ quiánꞌ₂ ꞌniaꞌ₂, la₁ nɨ₁ŋɨꞌ₁ guionꞌ₅₄ bá₄ ꞌniaꞌ₂ ꞌuan₅₄.
42 A₂ca₂të́₂ tɨn₃ ráun₂ ŋó₃ táng₃ i₁chiꞌ₄ Diú₄ le₂la₂:
―Tia₅₄ quiáng₃, chi₂juaꞌ₂ tsá₃ lé₂ juaꞌ₅₄ a₂tsá₃ jme₁ŋag₅₄ jniá₂ uɨg₅ la₂, juɨ₁le₅₄ bá₄ a₂ꞌŋio₂ ꞌauꞌ₂ ꞌne₂.
43 Jaun₂ ca₂guáinꞌ₃ táng₃ ja₁tiánꞌ₄ chiꞌ₂ dsɨ₂guia₃-tɨ́n₂, la₁ le₁güɨ́n₃ bá₄ táng₃ ꞌéi₂ tiáinꞌ₅, ia₁ a₂ŋɨ́₄ lë₃ ma₂i₁güɨ́in₃.
44 Jaun₂ ŋó₃ bá₄ táng₃ jë₁ca₂të́₂ ꞌnɨ₅ ráun₂, a₂chi₂i₁leinꞌ₄ Diú₄; ján₃ bá₄ le₂jaun₂ ca₂juáꞌ₂ tsɨ́ꞌ₅ Diú₄.
45 Jaun₂ guáinꞌ₃ në́₃ ja₁tiánꞌ₄ chiꞌ₂ dsɨ₂guia₃-tɨ́n₂, jaun₂ ca₂juáꞌ₂:
―¿ꞌE₂? ¿Liaꞌ₂ ma₂tiánꞌ₅ jaun₂ bá₄ ꞌniaꞌ₂ le₁güɨ́ngꞌ₃? Ŋí₂ ꞌniaꞌ₂, ca₂të́₂ bá₄ hora në́₃. Ma₂rë₂jɨnꞌ₅₄ bá₄ Jaun₅* dsa₂ mɨ₂güɨ́g₃ o₄gú₃ dsa₂ i₂le₁cánꞌ₄ dso₄.
46 Nau₂ ꞌniaꞌ₂ në́₃, ma₃; ia₁ në₅ ma₂já₅ i₂jángꞌ₂.
Ma₂le₁te₂ dsa₂ Jesús
47 Të₃jë₄ dsia₂₃ jág₁ jaun₂, jme₁ca₂dsióg₃ Judas, i₂lɨ́n₅ jan₂ dsa₂ i₂guia₃-tɨ́n₂. Juɨn₅ lɨn₃ dsa₂ i₂ja₂lén₂ quiongꞌ₅₄ qui₂le₁quian₅ ŋi₁tág₂, i₂le₁quian₅ nɨ₁ꞌma₂ në́₃, i₂chen₄ quián₅ juɨg₅₄ jme₂dsa₂ quianꞌ₅₄ dsɨ₂guiꞌ₅₄ canꞌ₅₄ quián₅ dsa₂ juɨg₂.
48 Jaun₂ Judas në́₃, ia₁ ma₂ca₂jmo₃ bá₄ jág₁ le₂jŋiá₅ ꞌe₂ léi₄ jmo₃ jë₁ma₂të́₂ rë₁jángꞌ₂, jme₁ma₂juáꞌ₂:
―I₂chenꞌ₄ jniá₂ quióꞌ₅, i₂ꞌéi₂ bá₄ jmaꞌ₅₄ ꞌniaꞌ₂.
49 Jaun₂ dsɨ₂juɨ₅ jme₁dsióg₃ Judas, ca₂jme₃quiáin₃ con₂ Jesús, jaun₂ ca₂juáꞌ₂:
―¡Siangꞌ₃, të₅!
Jaun₂ ca₂chenꞌ₃ rë₂júꞌ₅ Jesús.
50 Jaun₂ ca₂jéinꞌ₃ Jesús jág₁ quióꞌ₅, ca₂juáꞌ₂:
―A₂mei₅₄, ¿ꞌE₂ ta₁ ŋɨꞌ₂?
Jaun₂ guë́₄ ca₂jme₃quián₃ ca₂le₃jɨ́n₃ dsa₂ ca₂jŋaiꞌ₃ Jesús, jaun₂ ca₂tág₃.
51 Të₃jë₄ jaun₂, jan₂ dsa₂ i₂jme₁quianꞌ₅₄ Jesús ca₂dsi₂ ŋi₁tág₂, ca₂ti₃ caun₂ rë₂gua₄ dsa₂ i₂jme₂ti₃ quián₅ jme₂dsa₂ dsen₅₄.
52 Jaun₂ ca₂juáꞌ₂ Jesús:
―Tiá₃ táng₃ ŋi₁tág₂ quiángꞌ₂ ja₁jme₁ꞌi₄. Ia₁ ca₂le₃jɨ́n₃ i₂quɨ́nꞌ₂ quianꞌ₅₄ ŋi₁tág₂, ján₃ bá₄ quianꞌ₅₄ ŋi₁tág₂ dsiáin₃.
53 ¿ꞌE₂ lɨ́ngꞌ₂? ¿A₁tsá₃ lé₂ le₃jme₁mɨ₁₂ ne₄ Ŋeꞌ₃, a₂chein₃ ja₁cong₂ guia₃-tɨ́n₂ mei₅ ángeles quiáin₅?
54 La₁ juaꞌ₅₄ meiꞌ₂ guë́₃ le₂jaun₂, ¿ꞌA₂ bá₄ liaꞌ₂ le₃ti₃ jág₁ a₂tioꞌ₅₄ ne₄ Si₂ ja₁juáꞌ₂ a₂dsɨ₃ŋɨ́g₂ le₂la₂?
55 Jaun₂ juáꞌ₂ Jesús tsɨ́ꞌ₅ dsa₂:
―¿ꞌE₂? ¿Ja₁nóꞌ₅ ꞌniaꞌ₂ le₁quianꞌ₅₄ ŋi₁tág₂, nɨ₁ꞌma₂, ja₂chongꞌ₂ jniá₂, në₂jag₄ bá₄ lɨ́ng₅ dsa₂ ꞌang₂? Juaꞌ₂ ca₂le₃jë́₃ jmɨg₄ bá₄ ꞌeng₅₄ jme₁tɨ́ng₂ dsa₂ jɨnꞌ₄ ꞌniaꞌ₂ i₁dsi₅ guáꞌ₅ templo*, tsá₃ ma₂chongꞌ₂ guëꞌ₂ ꞌniaꞌ₂ ja₁jaun₂.
56 La₁ ca₂le₃jë́₃ a₂lë́₂ la₂ rë₂ti₃ jág₁ quióꞌ₅ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂.
Jaun₂ guë́₄ qui₂ca₂cuɨng₃ ca₂le₃jɨ́n₃ chiꞌ₂ dsɨ₂guia₃-tɨ́n₂, ca₂téin₂ bá₄ Jesús.
Dsiánꞌ₃ Jesús ne₄ dsɨ₂tan₅₄ quián₅ guáꞌ₅
57 Jaun₂ dsa₂ i₂ca₂i₁chanꞌ₅₄ Jesús ca₂i₁jo₅₄ ne₄ Caifás, i₂lɨ́n₅ jme₂dsa₂ dsen₅₄. Ja₁jaun₂ ma₂le₁ŋɨꞌ₂ të₅juáꞌ₅ quianꞌ₅₄ guë́₄ dsa₂ canꞌ₅₄.
58 Pe₄ në́₃ ca₂ŋó₃ uɨ́ng₂ të₂quɨ́in₃ ꞌein₂₃ Jesús ca₂të₂ i₁dsi₅ quióꞌ₅ jme₂dsa₂ dsen₅₄. Ja₁jaun₂ ca₂ꞌí₃ ca₂guá₂ quiainꞌ₅₄ ꞌlióg₂, ia₁ ꞌnio₃ të₅ ne₅₄ ꞌa₂ liaꞌ₂ jŋiaꞌ₅₄ dsióg₄ quianꞌ₅₄ Jesús.
59 Jaun₂ juɨg₅₄ jme₂dsa₂, quianꞌ₅₄ ca₂le₃jɨ́n₃ dsɨ₂tan₅₄ quián₅ guáꞌ₅ në́₃, qui₂ca₂ꞌnáuꞌ₃ juɨ₅ ꞌa₂ liaꞌ₂ jme₃cáinꞌ₂ Jesús dso₄ quianꞌ₅₄ jág₁ të₂jág₁ ia₁jaun₂ jŋagꞌ₃.
60 La₁ tsá₃ dsoꞌ₂ guëꞌ₂ ꞌa₂ liaꞌ₂ jme₃cáuꞌ₂, o₁jŋiaꞌ₅₄ juɨn₅ i₂qui₂ca₂nau₂ jmo₂₃ jág₁ të₂jág₁. Dsi₃lén₂ jme₁dsi₃lén₂ on₃ dsa₂,
61 jaun₂ ca₂juáꞌ₂:
―I₂në₅ ma₂ca₂juáꞌ₂, “Quɨꞌ₅₄ jniá₂ jmɨg₄ lé₂ le₃ꞌéng₄ guáꞌ₅ templo* quióꞌ₅ Diú₄, quianꞌ₅₄ ꞌnɨ₅ jmɨg₄ bá₄ lé₂ le₃jmógꞌ₄ táng₃.”
62 Jaun₂ ca₂nau₂ jme₂dsa₂ dsen₅₄, jaun₂ ca₂tsɨ́ꞌ₃ Jesús:
―¿Tsa₁ ꞌe₂ ŋagꞌ₅₄ ꞌi₁caun₂? ¿I₂ꞌe₂ bá₄ jág₁ në₅ a₂jángꞌ₅ dsa₂ a₂rë₂cángꞌ₄?
63 La₁ tei₄ bá₄ ca₂nau₂ Jesús. Jaun₂ ca₂ŋag₃ táng₃ jme₂dsa₂ dsen₅₄, ca₂juáꞌ₂:
―Dsi₅₄ jniá₂ ꞌéiꞌ₃ a₂juaꞌ₅₄ ꞌɨ́ngꞌ₅ Diú₄ jénꞌ₃ ne₄ jniaꞌ₅₄, chi₂juaꞌ₂ të₃dsónꞌ₂ lɨ́ngꞌ₅ Ja₁ŋiꞌ₅₄ Diú₄, I₂rë₂ꞌɨ́n₁* quiáin₅.
64 Jaun₂ ca₂ŋag₃ Jesús:
―Ján₅, jniá₂ bá₄ ꞌéi₂, juɨ₁liaꞌ₂ i₁juáꞌ₂ ꞌne₂ në₅. La₁ juáꞌ₅ jniá₂ juɨ́g₂ ꞌniaꞌ₂ ján₃, ca₂le₃jɨ́ngꞌ₃, a₂já₅ jmɨg₄ a₂jagꞌ₅₄ ꞌniaꞌ₂ jɨngꞌ₅₄ Jaun₅* dsa₂ mɨ₂güɨ́g₃ guá₃ të₂le₃ gu₂ ne₁ Diú₄ i₂ꞌuanꞌ₂ guë́₄ lɨn₃, a₂jŋióiꞌ₂ jë₄ jnei₅ gueiꞌ₅₄ dsi₂güɨg₂ në́₃.
65 Jme₂dsa₂ dsen₅₄ në́₃, jme₁ca₂nág₂ jág₁ jaun₂, ca₂chein₃ nɨ₁tsɨnꞌ₅₄ ꞌŋiog₅,c jaun₂ ca₂juáꞌ₂:
―¡ꞌE₂ guë́₄ ꞌŋio₅ ꞌlɨgꞌ₅₄ juáꞌ₂ i₂në₅ ꞌɨin₂₃ Diú₄ quianꞌ₅₄ jág₁ në₅ quióꞌ₅! ¿ꞌE₂ guë́₄ jmáꞌ₃ jág₁ ꞌlióng₂ ꞌniog₂ jniog₄ juaꞌ₅₄ a₂jángꞌ₅ guë́₄ dsa₂ siánꞌ₂ jág₁ dsau₅? Ma₂në₂neiꞌ₂ bá₄ ꞌniaꞌ₂ guiongꞌ₅₄ jág₁ ꞌlɨgꞌ₅₄ a₂ma₂në₂juáꞌ₂ i₂në₅ ꞌɨin₂₃ Diú₄.
66 ¿ꞌA₂ liaꞌ₂ lɨ́nꞌ₂ ꞌniaꞌ₂?
Jaun₂ ca₂juáꞌ₂ ca₂le₃jɨ́in₃ tioinꞌ₅₄:
―I₂ca₂tɨ́n₂ jón₂ bá₄ në₅.
67 Jaun₂ qui₂ca₂ꞌŋéi₃ dsa₂ dsɨ₂ne₄ Jesús tioinꞌ₅₄, tsá₃ caun₂ a₂qui₂ca₂jmógꞌ₂. I₂lɨn₅₄ guëꞌ₂ qui₂ca₂quein₃ tioinꞌ₅₄,
68 jaun₂ ca₂juáꞌ₂:
―ꞌNe₂ guëꞌ₂ i₂juáꞌ₂ lɨ́ngꞌ₅ I₂rë₂ꞌɨ́n₁ quián₅ Diú₄: ¡Dsi₄ jág₁ juaꞌ₅₄ ꞌein₂ në₂quein₃ quiángꞌ₂!
Tsá₃ ca₂tion₃ Pe₄ a₂cuɨin₂₃ Jesús
69 Të₃jë₄ jaun₂ jme₁guá₄ Pe₄ i₁dsi₅; jaun₂ ca₂dsióg₃ jan₂ ꞌio₅₄ i₂jme₂ti₃ ta₁ ja₁jaun₂, jaun₂ ca₂tsɨ́ꞌ₃ Pe₄:
―¿Ján₃ guëꞌ₂ jme₁quianꞌ₄ ꞌne₂ Jesús i₂chan₂ Galilea?
70 La₁ jɨn₄ dsa₂ ja₁guá₄ jaun₂ tsá₃ ca₂tioin₃, jaun₂ ca₂juáꞌ₂:
―Tsá₃ guion₅₄ ꞌe₂ a₂juáꞌ₂ ꞌne₂ në₅.
71 Ca₂nau₂ Pe₄ ŋó₅ të₂le₃ o₄ꞌné₄, jaun₂ ca₂jág₂ táng₃ jan₂ ꞌio₅₄ siánꞌ₂. ꞌÉi₂ në́₃ ca₂tsɨ́ꞌ₃ dsa₂ i₂tionꞌ₅₄:
―I₂jme₁quianꞌ₅₄ Jesús Nazareno bá₄ në₅.
72 La₁ jme₁ca₂nág₂ Pe₄, tsá₃ ca₂tioin₃ táng₃ jë́₃ ꞌɨin₂₃ Diú₄, ca₂juáꞌ₂:
―¡Tsá₃ dsa₂ ꞌéi₂ cuɨ́n₅ jniá₂!
73 Jme₁co₂lág₂ jaun₂, ca₂jme₃quián₃ dsa₂ i₂tionꞌ₅₄ con₂ Pe₄, jaun₂ ca₂juáꞌ₂:
―Të₃dsónꞌ₂ bá₄ lɨ́ngꞌ₅ jan₂ rɨnꞌ₅₄ ꞌéi₂, ia₁ në₅ rë₂jniágꞌ₂ ꞌa₂ liaꞌ₂ néꞌ₂ jagꞌ₅₄.
74 Jaun₂ në́₃, Pe₄ ca₂ꞌɨin₃ Diú₄ ca₂mɨ₃ a₂dsɨ₃ŋɨ́i₂ ꞌe₂ dsɨ₃ŋɨ́i₂, ca₂juáꞌ₂:
―¡Tsá₃ dsa₂ ꞌéi₂ cuɨ́n₅ jniá₂!