Ca₂rɨ́nꞌ₃ Jesús mɨ₂tag₄ chiꞌ₂ dsɨ₂guia₃-tɨ́n₂ quiáin₅
13
Ca₂juɨg₄ jme₁ꞌnióꞌ₅ guë́₄ a₂të₅₄ Jmɨg₄ Të₂ꞌɨn₅₄*. Jme₁ma₂ŋi₅ bá₄ Jesús a₂ma₂ca₂të́₂ hora a₂o₃ꞌɨin₅ mɨ₂güɨ́g₃ la₂ a₂dsáinꞌ₃ táng₃ ja₁con₂ Jmei₂. Liaꞌ₂ co₂tan₅₄ bá₄ ca₂jme₃ꞌnio₃ ꞌéi₂ dsa₂ quiáin₅ i₂jme₁tionꞌ₅₄ mɨ₂güɨ́g₃; la₁ në₃ në́₃, ca₂jme₃jniai₂₃ ꞌa₂ conꞌ₂ ca₂dsióg₃ ca₂rë₃ꞌnioi₃ ꞌéi₂.a
2 Jme₁ma₂lë₅ má₃ të₂le₃ ca₂nei₂, jaun₂ jme₁ma₂jmo₃ i₂së₃dsen₃ a₂i₂jiog₅ dsɨ́₅ Judas Iscariote, ja₁ŋiꞌ₅₄ Si₂mu₅₄, a₂jɨ́inꞌ₂ Jesús.
Jesús lava los pies de los discipulos (Juan 13.1-17)
3 Jme₁ma₂ŋi₅ bá₄ Jesús a₂ma₂ca₂dsia₃ Jmei₂ ca₂le₃jë́₃ o₄gú₃; jme₁ma₂ŋi₅ bá₄ ján₃ a₂já₅ ja₁con₂ Diú₄, jaun₂ ja₁con₂ Diú₄ bá₄ dsáinꞌ₃ táng₃.
4 Jaun₂ lë₃, liaꞌ₂ conꞌ₂ jme₁tiáinꞌ₄ guë́ꞌ₅, ca₂nau₂ ja₁jme₁guá₄, jaun₂ ca₂dsia₃ cau₅ tsɨnꞌ₅₄ a₂jme₁quiꞌ₂ të₂le₃ coꞌ₅₄, jaun₂ ca₂jénꞌ₃ caun₂ ꞌmɨꞌ₂ toalla o₄ꞌŋeiꞌ₂.
5 Jaun₂ në́₃ ca₂tiaꞌ₃ jmɨg₂ ꞌŋióꞌ₃ caun₂ nɨ₁ꞌɨ́₅, jaun₂ ca₂jme₃lióg₃ ca₂rang₃ mɨ₂tag₄ chiꞌ₂ dsɨ₂guia₃-tɨ́n₂. Jaun₂ ca₂jme₃quéinꞌ₂ quianꞌ₅₄ tsɨ₁ꞌmɨꞌ₂ toalla a₂jme₁chi₁jénꞌ₅ o₄ꞌŋeiꞌ₂.
6 Jaun₂ jme₁ca₂dsióg₃ ja₁con₂ Si₂mu₅₄ Pe₄, ca₂juáꞌ₂ ꞌéi₂ ca₂tsɨ́ꞌ₃ Jesús:
―Te₁guiꞌ₅₄, ¿ꞌne₂ rángꞌ₂ tag₃ jniá₂?
7 Jaun₂ ca₂ŋag₃ Jesús:
―Tsá₃ ŋɨ́ꞌ₂ guë́₄ ꞌauꞌ₂ ꞌne₂ ꞌe₂ a₂jmo₅ jniá₂ në₃, la₁ cang₂ guë́₄ le₃ŋɨ́gꞌ₂.
8 La₁ ca₂juáꞌ₂ Pe₄:
―Liaꞌ₂ o₁lɨ́gꞌ₂ co₂ŋɨ́₂ tsá₃ rángꞌ₂ ꞌne₂ tag₃ jniá₂.
Jaun₂ ca₂juáꞌ₂ Jesús:
―Në₁juaꞌ₂ tsá₃ ca₂rang₃ jniá₂ quiángꞌ₂, tsá₃ quenꞌ₅₄ ꞌne₂ ja₁con₂ jniá₂.
9 Jaun₂ në́₃ ca₂juáꞌ₂ Si₂mu₅₄ Pe₄:
―Chi₂juaꞌ₂ le₂jaun₂, Te₁guiꞌ₅₄, on₃juaꞌ₅₄ jmáꞌ₃ mɨ₂tag₃ rángꞌ₂; ján₃ bá₄ rang₄ mɨ₂gu₃ quianꞌ₅₄ mɨ₂dsi₃.
10 La₁ ca₂juáꞌ₂ Jesús:
―Juɨ₁liaꞌ₂ i₂liaꞌ₂ ca₂lë₃ lóꞌ₅, jmáꞌ₃ mɨ₂tag₅₄ bá₄ ꞌnióꞌ₅ rɨnꞌ₂, ia₁ ma₂le₁jɨ́in₃ bá₄ ta₁jain₂. Ma₂le₁jɨ́nꞌ₃ bá₄ ꞌniaꞌ₂, la₁ia₁ on₃juaꞌ₅₄ ca₂le₃jɨ́ngꞌ₃.
11 Ca₂juáꞌ₂: “Tsá₃ le₁jɨ́nꞌ₃ ꞌniaꞌ₂ le₃jɨ́ngꞌ₃”, ia₁ ma₂ŋi₅ bá₄ i₂ꞌein₂ i₂jángꞌ₂ quióꞌ₅.
12 Jme₁ca₂lë₃ rang₅ Jesús mɨ₂tag₄ chiꞌ₂ dsɨ₂guia₃-tɨ́n₂, jaun₂ ca₂quɨ́ꞌ₂ táng₃ nɨ₁tsɨnꞌ₅₄ le₃coꞌ₅₄, jaun₂ ca₂guá₂ táng₃ ne₄ mesa. Jaun₂ ca₂juáꞌ₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―¿Ŋɨ́ꞌ₂ ꞌniaꞌ₂ ꞌe₂ a₂në₂jmo₃ jniá₂ quiánꞌ₂ ꞌniaꞌ₂?
13 ꞌÁgꞌ₅ ꞌniaꞌ₂ jniá₂ Të₅, quianꞌ₅₄ Te₁guiꞌ₅₄. Tí₅ bá₄ jág₁ quiánꞌ₂ ꞌniaꞌ₂, ia₁ dsónꞌ₂ bá₄ le₂jaun₂ lɨ́ng₅.
14 Jaun₂ në́₃, chi₂juaꞌ₂ le₂në₅ jniá₂ i₂lɨ́ng₅ Të₅ quianꞌ₅₄ Juɨgꞌ₂ ꞌniaꞌ₂, në₂rang₃ mɨ₂tagꞌ₅₄ ꞌniaꞌ₂, ján₃ bá₄ le₂jaun₂ ꞌnióꞌ₅ jmóꞌ₂ ꞌniaꞌ₂: a₂qui₁rángꞌ₂ mɨ₂tag₄ rɨ́ngꞌ₂ le₂jangꞌ₂ le₂jangꞌ₂.
15 Ia₁ ma₂në₂can₃ jniá₂ caun₂ juɨ₅, ia₁jaun₂ jmóꞌ₂ ꞌniaꞌ₂ le₂jaun₂, juɨ₁liaꞌ₂ ma₂në₂jmo₃ jniá₂ ja₁conꞌ₂ ꞌniaꞌ₂.
16 A₂dsɨ₂jóꞌ₃ juɨ́g₂ jniá₂ ꞌniaꞌ₂, liaꞌ₂ ꞌi₁jan₂ dsa₂ i₂jme₂ti₃ ta₁, tsá₃ juɨinꞌ₂ guë́₄ conꞌ₂ guë́₄ juɨg₅₄; ján₃ bá₄ liaꞌ₂ ꞌi₁jan₂ dsa₂ i₂chen₄, tsá₃ juɨinꞌ₅₄ guë́₄ liaꞌ₂ conꞌ₂ guë́₄ dsa₂ i₂chei₅.
17 Chi₂juaꞌ₂ ŋɨ́ꞌ₂ ꞌauꞌ₂ ꞌniaꞌ₂ a₂në₅, ꞌe₂ bá₄ dsenꞌ₃ ꞌniaꞌ₂ chi₂juaꞌ₂ le₂jaun₂ qui₂jmoꞌ₂.
18 ꞌOn₃juaꞌ₅₄ ca₂le₃jɨ́nꞌ₃ ꞌniaꞌ₂ ꞌɨ́n₅ jniá₂; guion₄ bá₄ jniá₂ i₂ꞌein₂ ꞌéi₂ i₂ma₂ca₂quiongꞌ₅₄. La₁ia₁, ꞌnióꞌ₅ le₃ti₃ liaꞌ₂ conꞌ₂ juáꞌ₂ ne₄ Si₂: “Juɨ₁liaꞌ₂ i₂guë́ꞌ₅ co₂lë₅ quianꞌ₅₄ jniá₂, ca₂nau₂ quen₅ të₂le₃ ja₁con₂ jniá₂.”b
Jesús predice la traición (Juan 13.18-38)
19 Jaun₂ juɨ́g₂ jniá₂ ꞌniaꞌ₂ në₃, të₃jŋiá₅, ia₁jaun₂ jë₁ma₂të́₂ rë₁lé₂, le₃ꞌénꞌ₂ ꞌniaꞌ₂, jniá₂ bá₄ lɨ́ng₅ ꞌéi₂.c
20 A₂dsɨ₂jóꞌ₃ juɨ́g₂ jniá₂ ꞌniaꞌ₂, juɨ₁liaꞌ₂ i₂guen₅ dsa₂ i₂chen₄ quián₃ jniá₂, guei₂₃ jniá₂; jaun₂ juɨ₁liaꞌ₂ i₂guei₅ jniá₂ guein₂₃ i₂ca₂chei₃ jniá₂.
Ca₂juáꞌ₂ Jesús a₂jángꞌ₂ Judas quióꞌ₅
21 Jme₁ca₂lë₃ juáꞌ₂ jág₁ në₅, ca₂can₃ o₂i₁ dsɨ₅ ca₂të₂ jme₂dsí₂, jaun₂ ca₂jángꞌ₃ jág₁ dsau₅ liaꞌ₂ rë₂jiá₃ jág₁, ca₂juáꞌ₂:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, jan₂ ꞌniaꞌ₂ jángꞌ₂ jniá₂.
22 Jaun₂ në́₃ qui₂ca₂jɨ́n₂ chiꞌ₂ dsɨ₂guia₃-tɨ́n₂ rɨinꞌ₅₄ le₂jain₂ le₂jain₂, i₂góꞌ₃ dsɨ́₅ ꞌnio₃ le₃ŋi₅ ꞌein₂ bá₄ ꞌɨn₅ Jesús.
23 Jan₂ chiꞌ₂ dsɨ₂guia₃-tɨ́n₂ i₂ŋɨ́₄ lë₃ jme₁ꞌnio₃ Jesús, jme₁guá₄ le₃jénꞌ₃ quióꞌ₅.
24 Jaun₂ ca₂jmo₃ Si₂mu₅₄ Pe₄ caun₂ léi₄ ne₄ ꞌéi₂, ca₂juáꞌ₂:
―Cheiꞌ₅₄ ꞌein₂ bá₄ ꞌɨin₂₃.
25 Jaun₂ në́₃ ca₂jme₃quián₃ ꞌéi₂ të₂cau₅ guë́₄ quióꞌ₅ Jesús, jaun₂ ca₂ŋag₃:
―Te₁guiꞌ₅₄, ¿ꞌein₂ ꞌéi₂?
26 Jaun₂ ca₂ŋag₃ Jesús:
―I₂ꞌéi₂ bá₄ i₂cuë́₄ jniá₂ ca₂jne₄ i₁ŋíꞌ₄ la₂, jë₁ma₂ca₂tiá₃ nɨ₁uɨng₅.
Jaun₂ në́₃, jme₁ma₂në₂tiá₂ i₁ŋíꞌ₄, jaun₂ ca₂cuë́ꞌ₃ Judas Iscariote, ja₁ŋiꞌ₅₄ Si₂mu₅₄.
27 Jaun₂ dsɨ₂juɨ₅ le₂jaun₂ jme₁ca₂gue₃ Judas i₁ŋíꞌ₄ jaun₂, ca₂ꞌí₃ i₂së₃dsen₃ të₂dsɨ́₅. Jaun₂ në́₃ ca₂juáꞌ₂ Jesús:
―A₂jaun₂ a₂niog₅ ꞌauꞌ₂ jmóꞌ₂, jmo₄ në₃ cónꞌ₅.
28 La₁ liaꞌ₂ ꞌi₁jan₂ i₂tiánꞌ₅ guë́ꞌ₅ ne₄ mesa tsá₃ ca₂rë₃ŋɨ́ꞌ₂ ꞌe₂ ꞌuɨg₅₄ ca₂juáꞌ₂ Jesús ca₂tsɨ́ꞌ₃ Judas le₂jaun₂.
29 Ia₁ jme₁niog₅ gu₂ Judas ꞌéi₂ nɨ₁lau₂ tioꞌ₅₄ cu₄; jaun₂ ca₂lɨn₃ i₂lɨn₅₄, a₂ca₂juáꞌ₂ Jesús tsɨ́ꞌ₅ ꞌéi₂ a₂cha₂ jme₁lá₃ quióꞌ₅ jmɨg₄, o₃ jme₃ꞌoin₅₄ ca₂la₂ cu₄ dsa₂ te₂ŋé₂ ꞌe₂.
30 Jaun₂ dsɨ₂juɨ₅ jme₁ma₂në₂gue₃ ꞌéi₂ i₁ŋíꞌ₄, o₂ꞌɨ́in₃. Jme₁ma₂ca₂nei₂ bá₄ le₂jaun₂.
Caun₂ ꞌéiꞌ₃ ꞌmɨ́₂
31 Jme₁ma₂o₂ꞌɨ́n₃ Judas jaun₂, ca₂juáꞌ₂ Jesús:
―Në₃ në́₃, jë₁ma₂le₃jniá₂ juɨ₅bí₂ jláꞌ₁ quióꞌ₅ Jaun₅* dsa₂ mɨ₂güɨ́g₃; ján₃ bá₄ le₃jniá₂ juɨ₅bí₂ quióꞌ₅ Diú₄, ja₁con₂ ꞌéi₂.
32 Chi₂juaꞌ₂ le₃jnia₅ juɨ₅bí₂ quióꞌ₅ Diú₄ ja₁con₂ ꞌéi₂,d Diú₄ në́₃, jme₃jnia₅ juɨ₅bí₂ jláꞌ₁ quióꞌ₅ Ja₁ŋiꞌ₅₄ ja₁con₂ ꞌŋiog₅, tonꞌ₂ jme₃jniai₂₃ ŋiꞌ₅₄ ta₁.
33 ꞌNiaꞌ₂ chiꞌ₂-guein₂ quiáng₃, tsá₃ ma₂uë́₂ ꞌen₅₄ jniá₂ jɨnꞌ₄ ꞌniaꞌ₂. Qui₁ꞌnauꞌ₅₄ ꞌniaꞌ₂ jniá₂; la₁ juɨ₁liaꞌ₂ ma₂ca₂juɨ́g₂ jniá₂ dsa₂ judíos*, ján₃ bá₄ le₂jaun₂ juɨ́g₂ jniá₂ ꞌniaꞌ₂ në́₃: tsá₃ lé₂ o₁nóꞌ₅ ꞌniaꞌ₂ ja₁néꞌ₄ jniá₂.
34 Caun₂ ꞌéiꞌ₃ ꞌmɨ́₂ la₂ cuë́₄ jniá₂ ꞌniaꞌ₂: a₂jme₁ꞌnióꞌ₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂. Juɨ₁liaꞌ₂ ca₂jme₁ꞌnió₄ jniá₂ ꞌniaꞌ₂, ꞌniaꞌ₂ në́₃ ꞌnióꞌ₅ jme₁ꞌnióꞌ₄ ꞌniaꞌ₂ rɨ́ngꞌ₂.
35 Le₂në₅ bá₄ le₃ŋi₅ ca₂le₃jɨ́n₃ dsa₂ a₂lɨ́nꞌ₅ ꞌniaꞌ₂ dsa₂ i₂ma₂ca₂rë₃tɨ́n₃ quiáng₃: në₁juaꞌ₂ caun₂ qui₂ca₂jme₁ꞌnióꞌ₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂.
Ca₂juáꞌ₂ Jesús a₂tsá₃ tion₃ Pe₄ a₂cuɨg₂₃
36 Jaun₂ ca₂ŋag₃ Si₂mu₅₄ Pe₄ ca₂ŋɨ́iꞌ₃ Jesús:
―Te₁guiꞌ₅₄, ¿a₂jáꞌ₄ guangꞌ₅₄?
Jaun₂ ca₂ŋag₃ Jesús:
―Ja₁néꞌ₄ jniá₂, tsá₃ lé₂ le₃ꞌéinꞌ₄. La₁ ꞌéinꞌ₄ bá₄ ꞌniaꞌ₂ cang₂.
37 Jaun₂ në́₃ ca₂juáꞌ₂ Pe₄ ca₂tsɨ́ꞌ₃ Jesús:
―Te₁guiꞌ₅₄, ¿ꞌe₂ lë₃ tsá₃ lé₂ le₃ꞌéin₄ jniá₂ të₂në₃? Ma₂chan₂ co₂jŋia₅₄ bá₄ jniá₂ a₂gue₅₄ ꞌmú₃ o₄quiánꞌ₂ ꞌne₂.
38 Jaun₂ ca₂ŋag₃ Jesús:
―¿Dsónꞌ₂ ma₂ꞌei₅ caun₂ ꞌauꞌ₂ a₂gueꞌ₂ ꞌmú₃ o₄quió₃ jniá₂? A₂dsɨ₂jóꞌ₃ juɨ́g₂ jniá₂ ꞌne₂, néꞌ₃ guë́₄ a₂ꞌo₃ të₁guí₄ dsó₂, hora jaun₂ dé₄ tsá₃ tónꞌ₄ ꞌne₂ a₂cuɨgꞌ₂ jniá₂, ta₁ꞌnɨ₅ ráun₂.