Jesús bá₄ lɨ́n₅ juɨ₅ a₂dsi₁len₃ dsa₂ ja₁con₂ Jmei₂
14
ꞌTsá₃ lë₁can₂ ꞌniaꞌ₂ o₂i₁ ꞌauꞌ₂. Juɨ₁liaꞌ₂ ꞌénꞌ₂ ꞌniaꞌ₂ të₂le₃ quióꞌ₅ Diú₄, ján₃ bá₄ le₂jaun₂ juɨ₁le₂ꞌénꞌ₂ ꞌniaꞌ₂ të₂le₃ quió₃ jniá₂.
2 Ja₁quióꞌ₄ Ŋeꞌ₃, ꞌlióng₂ dsi₂néi₂ cha₂ a₂jo₂; juaꞌ₅₄ meiꞌ₂ guë́₃ tsá₃ le₂jaun₂ në́₃, ¿lɨ́nꞌ₂ ꞌniaꞌ₂ a₂jme₁juɨg₅₄ jniá₂ ꞌniaꞌ₂ a₂négꞌ₄ i₁jmo₃ co₂jŋia₅₄ dsi₂néi₂ quiánꞌ₂ ꞌniaꞌ₂?a
El único camino a Dios (Juan 14.1-14)
3 Cang₂ jë₁ma₂dsiánꞌ₃ jniá₂, jë₁ma₂ca₂lë₃ jmo₂₃ co₂jŋia₅₄ ja₁o₁tiónꞌ₂ ꞌniaꞌ₂, jaun₂ bá₄ guio₅₄ táng₃ a₂i₁te₁₂ ꞌniaꞌ₂ ja₁cong₂, ia₁jaun₂ ja₁i₁ꞌú₃ jniá₂, ján₃ bá₄ lé₂ o₁tiónꞌ₂ ꞌniaꞌ₂.
4 Ŋiꞌ₅₄ bá₄ ꞌniaꞌ₂ a₂jáꞌ₄ néꞌ₄ jniá₂; cuɨnꞌ₂ bá₄ ꞌniaꞌ₂ juɨ₅ në́₃.
5 Jaun₂ ca₂juáꞌ₂ To₁má₄:
―Te₁guiꞌ₅₄, tsá₃ ne₄ jniaꞌ₅₄ a₂jáꞌ₄ guangꞌ₅₄; ¿ꞌa₂ guëꞌ₂ liaꞌ₂ le₃cuag₅ jniaꞌ₅₄ juɨ₅?
6 Jaun₂ ca₂ŋag₃ Jesús:
―Jniá₂ bá₄ lɨ́ng₅ juɨ₅, ján₃ bá₄ lɨ́ng₅ jág₁ dsau₅, ján₃ bá₄ lɨ́ng₅ i₂jmo₅ a₂le₃chan₂ dsa₂. ꞌI₁jan₂ tsá₃ dsióg₄ ja₁con₂ Ŋeꞌ₃ juaꞌ₅₄ tsá₃ të₂le₃ quianꞌ₅₄ jniá₂.
7 Juaꞌ₅₄ meiꞌ₂ guë́₃ dsónꞌ₂ ŋiꞌ₅₄ ꞌniaꞌ₂ ꞌein₂ lɨ́n₅ jniá₂, ján₃ bá₄ jme₁le₃cuɨnꞌ₂ ꞌniaꞌ₂ Ŋeꞌ₃ ján₃;b jaun₂ në₃ në́₃, të₂le₃ ne₄ juɨ₅, le₃cuɨinꞌ₂ ꞌniaꞌ₂, tonꞌ₂ ma₂jɨinꞌ₅₄ ꞌniaꞌ₂.
8 Jaun₂ në́₃ ca₂juáꞌ₂ Fe₂li₄ ca₂tsɨ́ꞌ₃ Jesús:
―Te₁guiꞌ₅₄, cuë₄ jmɨg₄ a₂jɨn₄ jniaꞌ₅₄ Ŋéiꞌ₅, jaun₂ co₂jaun₂ guë́₄ dsáu₅ dsɨ₅ jniaꞌ₅₄.
9 Jaun₂ ca₂ŋag₃ Jesús:
―¿Tsa₁ cuɨgꞌ₂ ꞌne₂ jniá₂ Fe₂li₄, o₁jŋiaꞌ₅₄ ma₂ŋó₅ jmɨg₄ ꞌen₅₄ jniá₂ quianꞌ₅₄ ꞌniaꞌ₂? Chi₂juaꞌ₂ ꞌein₂ dsa₂ ma₂jág₂ jniá₂, ján₃ bá₄ ma₂jɨ́in₂ Ŋeꞌ₃. ¿ꞌA₂ bá₄ liaꞌ₂ juáꞌ₂ ꞌne₂: “Cuë₄ jmɨg₄ a₂jɨn₄ jniaꞌ₅₄ Ŋéiꞌ₅”?
10 ¿Tsa₁ ꞌénꞌ₂ ꞌne₂ a₂ꞌen₅₄ jniá₂ ja₁con₂ Ŋeꞌ₃, tonꞌ₂ ꞌen₅₄ guëꞌ₂ Ŋeꞌ₃ táng₃ ja₁con₂ jniá₂? Juɨ₁liaꞌ₂ jág₁ a₂juɨ́g₂ jniá₂ ꞌniaꞌ₂, tsá₃ juáꞌ₅ jniá₂ o₄quió₃ ꞌŋió₃. Të₂le₃, Ŋeꞌ₃ jniá₂ i₂të₁ꞌŋiá₄ ja₁con₂ jniá₂, i₂ꞌéi₂ bá₄ jmo₅ ta₁ quióꞌ₅.
11 Juɨ₁le₂ꞌénꞌ₂ bá₄ ꞌniaꞌ₂ a₂juáꞌ₅ jniá₂, a₂ꞌeng₅₄ ja₁con₂ Ŋeꞌ₃, a₂ꞌen₅₄ guëꞌ₂ Ŋeꞌ₃ ja₁con₂ jniá₂; o₃ në₁juaꞌ₂ tsá₃ le₂jaun₂, jmáꞌ₃ liaꞌ₂ të₂le₃ quianꞌ₅₄ léi₄ a₂jmo₂₃, juɨ₁le₂ꞌénꞌ₂ ꞌniaꞌ₂.
12 A₂dsɨ₂jóꞌ₃ juɨ́g₂ jniá₂ ꞌniaꞌ₂, juɨ₁liaꞌ₂ i₂ꞌén₂ le₃quió₃ jniá₂, ján₃ bá₄ jmo₃ juɨ₁liaꞌ₂ a₂jmo₅ jniá₂; jaun₂ të₂le₃ ꞌŋio₅ guë́₄ juëꞌ₂ a₂jmo₃, ia₁ négꞌ₄ ja₁con₂ Ŋeꞌ₃.
13 Jaun₂ chi₂juaꞌ₂ ꞌe₂ a₂mɨꞌ₂ ꞌniaꞌ₂ liaꞌ₂ conꞌ₂ lë́₅ ꞌéiꞌ₃ quió₃ jniá₂, jmo₅₄ bá₄ jniá₂, ia₁jaun₂ le₃juɨnꞌ₂ Jmei₂ o₄quióꞌ₄ Ja₁ŋiꞌ₅₄.
14 Lé₂ bá₄ mɨ́ꞌ₁ ꞌniaꞌ₂ liaꞌ₂ conꞌ₂ lë́₅ ꞌéiꞌ₃ quió₃ jniá₂, chi₂juaꞌ₂ ꞌe₂ caun₂ a₂ꞌniogꞌ₂ ꞌniaꞌ₂, jaun₂ jmo₅₄ bá₄ jniá₂.
Ca₂cuë₃ Jesús jág₁ quióꞌ₅ a₂chein₃ Jme₂dsí₂ Jŋió₅
15 ꞌChi₂juaꞌ₂ ꞌniógꞌ₃ ꞌniaꞌ₂ jniá₂, nei₂ gau₂ ꞌéiꞌ₃ quió₃.
Jesús habla del Espíritu Santo (Juan 14.15-31)
16 Jaun₂ mɨ₅₄ jniá₂ ne₄ Ŋeꞌ₃ a₂cuiɨn₃ jan₂ i₂siánꞌ₂ i₂cuë́ꞌ₃ bí₂ ꞌauꞌ₂ ꞌniaꞌ₂, ia₁jaun₂ ꞌí₂ ꞌéi₂ co₂tan₅₄ quianꞌ₅₄ ꞌniaꞌ₂.
17 Jme₂dsí₂ quióꞌ₅ jág₁ tí₅ bá₄ ꞌéi₂. Tsá₃ lé₂ le₃guei₃ dsa₂ mɨ₂güɨ́g₃, ia₁ tsá₃ jág₂, on₃ guëꞌ₂ cuɨg₂₃ cuɨin₂₃ ꞌéi₂. La₁ ꞌniaꞌ₂ në́₃, ma₂cuɨinꞌ₂ bá₄ ꞌniaꞌ₂, ia₁ guá₅ ja₁conꞌ₂ ꞌniaꞌ₂, tonꞌ₂ të₃ꞌŋiái₄ le₃quiánꞌ₂ ꞌniaꞌ₂.
18 On₃juaꞌ₅₄ a₂tén₄ jniá₂ ꞌniaꞌ₂ co₂ŋeiꞌ₅₄ në₂jag₄ bá₄ chiꞌ₂ ꞌnág₂. Guio₅₄ bá₄ táng₃ ja₁conꞌ₂ ꞌniaꞌ₂.
19 Tsá₃ ma₃uë́₂ jág₂ dsa₂ mɨ₂güɨ́g₃ jniá₂, la₁ia₁ jagꞌ₅₄ bá₄ ꞌniaꞌ₂. ꞌUɨg₅₄ ia₁ a₂chan₂ jniá₂, le₃changꞌ₂ bá₄ ꞌniaꞌ₂.
20 Jmɨg₄ jaun₂ le₃lenꞌ₅₄ ꞌniaꞌ₂ a₂ꞌen₅₄ jniá₂ ja₁con₂ Ŋeꞌ₃, ꞌniaꞌ₂ guëꞌ₂ tiongꞌ₅₄ ja₁con₂ jniá₂, jaun₂ jniá₂ guëꞌ₂ në́₃ ꞌeng₅₄ ja₁conꞌ₂ ꞌniaꞌ₂.
21 Juɨ₁liaꞌ₂ i₂gue₅, i₂néꞌ₂ ꞌéiꞌ₃ quió₃, ꞌéi₂ bá₄ i₂të₃dsónꞌ₂ ꞌnio₃ jniá₂. Juɨ₁liaꞌ₂ i₂ꞌnio₃ jniá₂ në́₃, jme₃ꞌnio₃ Ŋeꞌ₃. Ján₃ bá₄ le₂jaun₂ jniá₂ jme₁ꞌniói₄, jaun₂ jme₁jnia₅ jniá₂ ja₁coin₂.
22 Jaun₂ ca₂juáꞌ₂ Judas, (on₃juaꞌ₅₄ Iscariote):
―Te₁guiꞌ₅₄, ¿ꞌe₂ lë₃ ja₁con₂ jniaꞌ₅₄ jme₁jnagꞌ₅, on₃juaꞌ₅₄ rëꞌ₂ ja₁con₂ dsa₂ mɨ₂güɨ́g₃?
23 Jaun₂ ca₂ŋag₃ Jesús:
―Juɨ₁liaꞌ₂ i₂ꞌnio₃ jniá₂, tónꞌ₂ bá₄ juɨ₅ jág₁ quió₃; jaun₂ jme₃ꞌnio₃ Ŋeꞌ₃ jme₃ꞌnioi₃ ꞌéi₂, jaun₂ qui₂ja₁náu₄ jniaꞌ₅₄ ja₁coin₂ ja₁ꞌio₁ quianꞌ₅₄ ꞌéi₂.
24 Juɨ₁liaꞌ₂ i₂tsá₃ ꞌnio₃ jniá₂, tsá₃ tónꞌ₂ juɨ₅ jág₁ quió₃. Jág₁ a₂nagꞌ₂ ꞌniaꞌ₂ la₂, on₃juaꞌ₅₄ a₂quió₃, a₂quióꞌ₅ Ŋeꞌ₃ i₂ca₂chei₃ bá₄.
25 ꞌCa₂le₃jë́₃ a₂la₂ juáꞌ₅ jniá₂ juɨ́g₂ ꞌniaꞌ₂ të₁liaꞌ₂ ꞌeng₅₄ guë́₄ quianꞌ₅₄ ꞌniaꞌ₂;
26 la₁ia₁ i₂cuë₃ bí₂ ꞌauꞌ₂ ꞌniaꞌ₂ ꞌéi₂, i₂lɨ́n₅ Jme₂dsí₂ Jŋió₅, i₂chen₃ Ŋeꞌ₃ o₄quió₃ jniá₂, ꞌéi₂ bá₄ jme₃tag₅ jme₃tɨin₂₃ ꞌniaꞌ₂, jaun₂ jmo₃ a₂qui₃dsiogꞌ₂ ꞌauꞌ₂ ꞌniaꞌ₂ ca₂le₃jë́₃ ꞌe₂ a₂ma₂qui₂ma₂juɨ́g₂ jniá₂ ꞌniaꞌ₂.
27 ꞌꞌÁgꞌ₅ jniá₂ jág₁ a₂jmo₃ ꞌag₃ tei₄ ja₁conꞌ₂ ꞌniaꞌ₃. A₂tei₄ a₂ꞌei₅ ja₁con₂ jniá₂, a₂jaun₂ bá₄ cuë́₅ jniá₂ ꞌniaꞌ₂. La₁ on₃juaꞌ₅₄ liaꞌ₂ cuë₅ dsa₂ mɨ₂güɨ́g₃, cuë́₅ jniá₂ ꞌniaꞌ₂. Tsá₃ lë₁can₂ ꞌniaꞌ₂ o₂i₁ dsɨ₅, on₃ guëꞌ₂ jmóꞌ₂ ꞌniaꞌ₂ gangꞌ₃.
28 Ma₂qui₂ma₂neiꞌ₂ ꞌniaꞌ₂ a₂juáꞌ₅ jniá₂: a₂négꞌ₄, jaun₂ guio₅₄ táng₃ ja₁conꞌ₂ ꞌniaꞌ₂. Në₁juaꞌ₂ të₃dsónꞌ₂ ꞌniógꞌ₃ ꞌniaꞌ₂ jniá₂, jme₁jmóꞌ₂ ꞌniaꞌ₂ ꞌioꞌ₂ jme₁ca₂rë₃ŋiꞌ₅₄ ꞌniaꞌ₂ a₂néꞌ₄ jniá₂ ja₁con₂ Ŋeꞌ₃, ia₁ i₂juɨnꞌ₂ guë́₄ ꞌéi₂ liaꞌ₂ conꞌ₂ guë́₄ jniá₂.
29 Jaun₂ ma₂juɨ́g₂ jniá₂ ꞌniaꞌ₂ a₂la₂ të₃jŋiá₅, ia₁jaun₂ le₃ꞌénꞌ₂ ꞌniaꞌ₂ jë₁ma₂të́₂ rë₁lé₂ a₂jaun₂.
30 ꞌTsá₃ ma₂ꞌlióng₂ jág₁ dsia₅₄ jniá₂ quianꞌ₅₄ ꞌniaꞌ₂; ia₁ ma₂já₅ i₂gon₂ mɨ₂güɨ́g₃ la₂, o₁jŋiaꞌ₅₄ tsá₃ ꞌe₂ juɨ₅bí₂ ꞌio₅ ꞌéi₂ ja₁con₂ jniá₂.
31 La₁ia₁ ꞌnióꞌ₅ le₃ŋi₅ dsa₂ mɨ₂güɨ́g₃, a₂ꞌnió₃ jniá₂ Ŋeꞌ₃, jaun₂ liaꞌ₂ conꞌ₂ lë́₅ ꞌéiꞌ₃ a₂ma₂cuë₃ Ŋeꞌ₃ jniá₂, a₂jaun₂ bá₄ jmo₅ jniá₂.
ꞌNau₂ ꞌniaꞌ₂. Ma₃dsauꞌ₅₄ jniog₄ ja₁lá₃.