Choꞌ₅₄ chi₁uɨ́ng₃ uvas, quianꞌ₅₄ guꞌ₂ neiꞌ₅₄ quióꞌ₅
15
ꞌJniá₂ lɨ́ng₅ choꞌ₅₄ nɨ₁uɨng₂ uvas, ja₁já₅ bí₂ dsónꞌ₂. Ŋeꞌ₃ guëꞌ₂ lɨ́n₅ i₂jmo₅ ꞌí₁ ja₁nau₂.
2 Jŋiáꞌ₂ ꞌéi₂ ca₂le₃jë́₃ nɨ₁guꞌ₂ quió₃ a₂tsá₃ mɨ́g₂ ꞌag₅; la₁ia₁ qui₂jɨ́ꞌ₅ qui₂ꞌuɨin₂₃ nɨ₁guꞌ₂ a₂ꞌag₅ mɨ́g₂, ia₁jaun₂ ráu₃ guë́₄ ꞌlióng₂.
La vid y las ramas (Juan 15.1-17)
3 Ma₂le₁jɨ́nꞌ₃ bá₄ ꞌniaꞌ₂ të₂le₃ quianꞌ₅₄ jág₁ a₂qui₂ma₂juɨ́g₂ jniá₂ ꞌniaꞌ₂.
4 Caun₂ juɨ₁të₂ꞌŋiáꞌ₄ bá₄ ꞌniaꞌ₂ ja₁con₂ jniá₂, juɨ₁liaꞌ₂ të₂ꞌŋiá₄ jniá₂ ja₁conꞌ₂ ꞌniaꞌ₂. ꞌI₁caun₂ nɨ₁guꞌ₂ tsá₃ lé₂ le₃ꞌag₃ mɨ́g₂ conꞌ₂ ꞌŋiog₅ le₂jaun₂, në₁juaꞌ₂ tsá₃ rë₂tsánꞌ₂ quianꞌ₅₄ choꞌ₅₄; ján₃ bá₄ le₂jaun₂ juɨ₁liaꞌ₂ ꞌniaꞌ₂ në́₃, tsá₃ ꞌe₂ lé₂ le₃ráu₃ quiánꞌ₂ ꞌniaꞌ₂ në₁juaꞌ₂ tsá₃ të₂ꞌŋiágꞌ₄ ja₁con₂ jniá₂.
5 ꞌJniá₂ lɨ́ng₅ choꞌ₅₄; ꞌniaꞌ₂ guëꞌ₂ lɨ́ngꞌ₅ guꞌ₂ neiꞌ₅₄. Juɨ₁liaꞌ₂ dsa₂ i₂të₂ꞌŋiá₄ rë₂tsánꞌ₂ quianꞌ₅₄ jniá₂, juɨ₁liaꞌ₂ të₂ꞌŋiá₄ jniá₂ ja₁con₂ ꞌéi₂, ꞌlióng₂ ráu₃ quióꞌ₅. Ia₁ ꞌi₁caun₂ tsá₃ ꞌe₂ lé₂ le₃jmóꞌ₂ ꞌniaꞌ₂ juaꞌ₅₄ tsá₃ quiongꞌ₅₄ jniá₂.
6 Juɨ₁liaꞌ₂ i₂tsá₃ të₂ꞌŋiá₄ ja₁con₂ jniá₂, lɨ́in₅ në₂jag₄ bá₄ caun₂ nɨ₁guꞌ₂ a₂dsɨ₂guiaꞌ₂ dsa₂ cau₅, jaun₂ rë₂quein₂. Nɨ₁guꞌ₂ le₂në₅ qui₂cágꞌ₅ dsa₂, qui₂tóꞌ₅ dsa₂ dsi₂si₂, jaun₂ cau₂.
7 ꞌChi₂juaꞌ₂ të₂ꞌŋiáꞌ₄ ꞌniaꞌ₂ ja₁con₂ jniá₂, tonꞌ₂ të₂ꞌŋiá₄ jág₁ quió₃ ja₁conꞌ₂ ꞌniaꞌ₂, jaun₂ mɨ₄ ꞌniaꞌ₂ chi₂juaꞌ₂ ꞌe₂ caun₂ ꞌniogꞌ₂, jaun₂ guéiꞌ₁ bá₄ ꞌniaꞌ₂.
8 Le₂la₂ bá₄ rë₂juɨnꞌ₂ Ŋeꞌ₃: a₂qui₂ráu₂ ꞌlióng₂ ꞌe₂ a₂jmoꞌ₂ ꞌniaꞌ₂.a Le₂në₅ jme₂jniáꞌ₂ ꞌniaꞌ₂ a₂lɨ́ngꞌ₅ dsa₂ i₂ca₂rë₃tɨ́n₃ quián₃ jniá₂.
9 Juɨ₁liaꞌ₂ ꞌnio₃ Ŋeꞌ₃ jniá₂, ján₃ bá₄ le₂jaun₂ ꞌnió₃ jniá₂ ꞌniaꞌ₂; caun₂ juɨ₁i₂nio₄ bá₄ ꞌniaꞌ₂ juɨ₅ a₂ꞌnió₃ jniá₂ ꞌniaꞌ₂.
10 Në₁juaꞌ₂ caun₂ néꞌ₂ ꞌniaꞌ₂ gau₂ ꞌéiꞌ₃ quió₃, le₂në₅ të₃ꞌŋiáꞌ₄ ꞌniaꞌ₂ juɨ₅ a₂ꞌnió₃ jniá₂ ꞌniaꞌ₂, juɨ₁liaꞌ₂ caun₂ nag₅ jniá₂ gau₂ ꞌéiꞌ₃ quióꞌ₅ Ŋeꞌ₃, tonꞌ₂ të₂ꞌŋiá₄ jniá₂ juɨ₅ a₂ꞌnio₃ ꞌéi₂ jniá₂.
11 ꞌJág₁ në₅ ma₂në₂juɨ́g₂ jniá₂ ꞌniaꞌ₂ ia₁jaun₂ a₂ŋɨ́₄ lë₃ jéin₅ jniá₂ ꞌioꞌ₂, cuë́₄ jniá₂ ꞌniaꞌ₂, ia₁jaun₂ le₃ꞌŋia₅ bá₄ a₂jénꞌ₂ ꞌniaꞌ₂ ꞌioꞌ₂.
12 A₂la₂ bá₄ ꞌéiꞌ₃ quió₃: a₂jme₁ꞌnióꞌ₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂, juɨ₁liaꞌ₂ ma₂ca₂jme₁ꞌnió₄ jniá₂ ꞌniaꞌ₂.
13 ꞌI₁jan₂ tsá₃ lé₂ le₃ꞌnio₃ guë́₄ lɨn₃ rɨinꞌ₅₄, liaꞌ₂ conꞌ₂ guë́₄ i₂guein₅ ꞌmú₃ o₄quióꞌ₄ a₂mei₅₄ quiáin₅.
14 ꞌNiaꞌ₂ bá₄ lɨ́ngꞌ₅ dsa₂ a₂mei₅₄ quiáng₃ chi₂juaꞌ₂ jmoꞌ₂ ꞌniaꞌ₂ ꞌe₂ te₂neiꞌ₄ jniá₂.
15 Tsá₃ ma₃të́₅ jniá₂ ꞌniaꞌ₂ dsa₂ i₂jme₂ti₃ ne₃, ia₁ tsá₃ ŋi₅ juɨ₁liaꞌ₂ jan₂ dsa₂ i₂jme₂ti₃ ta₁, ꞌe₂ a₂jmo₅ juɨg₅₄. Të́₅ jniá₂ a₂mei₅₄ quiáng₃ bá₄ ꞌniaꞌ₂, ia₁ ma₂ca₂jme₁jnia₅ bá₄ jniá₂ ja₁conꞌ₂ ꞌniaꞌ₂, ca₂le₃jë́₃ ꞌe₂ a₂ma₂ca₂juáꞌ₂ Ŋeꞌ₃.
16 On₃juaꞌ₅₄ ꞌniaꞌ₂ ca₂quioꞌ₅₄ jniá₂; jniá₂ bá₄ ma₂quionꞌ₄ ꞌniaꞌ₂, jaun₂ ma₂ca₂dsia₃ jniá₂ gogꞌ₂ ꞌniaꞌ₂ a₂o₁nóꞌ₅ ꞌniaꞌ₂ a₂qui₂rau₂ ꞌlióng₂ quiánꞌ₂ ꞌniaꞌ₂ a₂jiog₃ uë́₂. Jaun₂ le₂në₅ cuë₃ Ŋeꞌ₃ jniá₂ cuë́ꞌ₃ ꞌniaꞌ₂ chi₂ꞌe₂ caun₂ a₂mɨ́ꞌ₁ ꞌniaꞌ₂ liaꞌ₂ conꞌ₂ lë́₅ ꞌéiꞌ₃ quió₃ jniá₂.
17 A₂la₂ bá₄ ꞌéiꞌ₃ quió₃ jaun₂ në́₃: a₂jme₁ꞌnióꞌ₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂.
ꞌIog₅₄ dsa₂ mɨ₂güɨ́g₃ ꞌŋiai₅₄ Jesús quianꞌ₅₄ dsa₂ quiáin₅
18 ꞌChi₂juaꞌ₂ ꞌiog₅₄ dsa₂ mɨ₂güɨ́g₃ quiánꞌ₂ ꞌniaꞌ₂, juɨ₁le₂ŋiꞌ₅₄ ꞌniaꞌ₂, jniá₂ bá₄ ca₂rë₃ꞌiog₅₄ dsa₂ le₂ꞌuɨg₅₄.
Jesús advierte sobre la persecución (Juan 15.18-16.4)
19 Juaꞌ₅₄ meiꞌ₂ guë́₃ lɨ́nꞌ₅ ꞌniaꞌ₂ dsa₂ i₂tén₅ mɨ₂güɨ́g₃, jme₁jme₃ꞌnio₃ bá₄ dsa₂ mɨ₂güɨ́g₃ juɨ₁liaꞌ₂ ꞌnioi₃ dsa₂ quiáin₅. La₁ ꞌuɨg₅₄ ia₁ a₂tsá₃ ténꞌ₅ ꞌniaꞌ₂ mɨ₂güɨ́g₃, tonꞌ₂ ma₂quionꞌ₄ jniá₂ ꞌniaꞌ₂ jɨn₄ dsa₂ mɨ₂güɨ́g₃; ꞌuɨg₅₄ jaun₂ në́₃, ꞌŋiai₅₄ ꞌniaꞌ₂.
20 Dsá₂ ꞌauꞌ₂ ꞌniaꞌ₂ jmo₄, jág₁ a₂ma₂juɨ́g₂ jniá₂ ꞌniaꞌ₂: “Liaꞌ₂ ꞌi₁jan₂ dsa₂ i₂jme₂ti₃ ta₁, tsá₃ juɨinꞌ₂ guë́₄ conꞌ₂ guë́₄ juɨg₅₄”. Chi₂juaꞌ₂ ma₂qui₂ca₂co₃ꞌein₃ dsa₂ jniá₂, ján₃ bá₄ le₂jaun₂ qui₃co₃ꞌen₃ dsa₂ ꞌniaꞌ₂; chi₂juaꞌ₂ ma₂tónꞌ₂ dsa₂ juɨ₅ jág₁ a₂ma₂ca₂jme₁tɨin₅ jniá₂, ján₃ bá₄ le₂jaun₂ qui₃tónꞌ₂ dsa₂ juɨ₅ jág₁ quiánꞌ₂ ꞌniaꞌ₂.
21 La₁ ca₂le₃jë́₃ a₂në₅ dsɨ₃ŋɨ́ꞌ₂ ꞌniaꞌ₂ qui₃co₃jmógꞌ₂ dsa₂ ꞌuɨg₅₄ quió₃ jniá₂, ia₁ tsá₃ cuɨin₂₃ i₂ca₂chei₃ jniá₂.
22 ꞌTsá₃ jme₁le₃cáinꞌ₄ juaꞌ₅₄ meiꞌ₂ guë́₃ tsá₃ guan₃ jniá₂ a₂o₂juáꞌ₃ ja₁con₂ ꞌéi₂; la₁ në₃ në́₃, tsá₃ ma₃ꞌe₂ lé₂ le₃juáꞌ₂ juaꞌ₅₄ tsá₃ ŋi₅.
23 Ia₁ juɨ₁liaꞌ₂ i₂ꞌiog₅₄ jniá₂, ján₃ bá₄ ꞌŋiai₅₄ Ŋeꞌ₃ jniá₂.
24 Tsá₃ jme₁le₃cáinꞌ₄ juaꞌ₅₄ meiꞌ₂ tsá₃ léi₄ jaun₂ ca₂jmo₃ jniá₂ jɨn₄ dsa₂ ꞌéi₂ a₂tsá₃ ꞌein₂ siánꞌ₂ ma₂jmo₃; la₁ia₁ o₁jŋiaꞌ₅₄ la₂ ma₂ca₂jág₃ bá₄ léi₄ jaun₂, tion₅₄ bá₄ ꞌiog₅₄ dsa₂ jniá₂, liaꞌ₂ Ŋeꞌ₃ në́₃, ꞌŋiai₅₄.
25 La₁ia₁ qui₂lë́₂ ia₁jaun₂ le₃ti₃ jág₁ a₂tioꞌ₅₄ ne₄ Si₂ ꞌÉiꞌ₃ quióꞌ₅ a₂juáꞌ₂: “Ca₂rë₃ꞌiog₅₄ dsa₂ të₃ tsá₃ ꞌe₂ cha₂ lë₃.”b
26 ꞌLa₁ia₁ jë₁ma₂të́₂ rë₁jiá₃ i₂cuë₃ bí₂ ꞌauꞌ₂ ꞌniaꞌ₂, i₂tsɨn₅₄ jniá₂ ja₁conꞌ₂ ꞌniaꞌ₂ i₂jiá₃ të₂le₃ ja₁guá₄ Ŋeꞌ₃: Jme₂dsí₂ tí₅ dsónꞌ₂ i₂o₂ꞌɨn₅ ja₁con₂ Ŋeꞌ₃, i₂ꞌéi₂ bá₄ jángꞌ₃ jág₁ dsau₅ të₂le₃ quió₃ jniá₂.
27 Ján₃ bá₄ le₂jaun₂ ꞌnióꞌ₅ jangꞌ₅₄ ꞌniaꞌ₂ jág₁ dsau₅, ia₁ ca₂le₃ꞌuɨg₅₄ bá₄ ma₂qui₂ma₂tiónꞌ₂ ꞌniaꞌ₂ quianꞌ₅₄ jniá₂.