16
ꞌLe₂në₅ juɨ́g₂ jniá₂ ꞌniaꞌ₂ ia₁jaun₂ tsá₃ qui₃dsi₃uɨ́nꞌ₂ ꞌniaꞌ₂ a₂ꞌéngꞌ₂.
2 Qui₃ꞌuágꞌ₂ dsa₂ ꞌuɨ́inꞌ₂ ꞌniaꞌ₂ ja₁lë₁tongꞌ₂ ne₄ si₂ guáꞌ₅ sinagoga*, ca₂le₃jë́₃ já₅ caun₂ jmɨg₄, lɨ́n₂ juɨ₁liaꞌ₂ i₂jme₃dsiog₅ ꞌniaꞌ₂, a₂jénꞌ₃ ta₁ jaun₂ quióꞌ₅ ne₄ Diú₄.
3 Ca₂le₃jë́₃ a₂në₅ jmo₃a ia₁ tsá₃ ma₂ca₂rë₃cuɨin₂₃ Ŋeꞌ₃, on₃ guëꞌ₂ jniá₂ ma₂ca₂rë₃cuɨg₂₃.
4 Jaun₂ juɨ́g₂ jniá₂ ꞌniaꞌ₂ le₂në₅ ia₁jaun₂ jë₁ma₂të́₂ rë₁të₅₄ jmɨg₄ jaun₂, dsiogꞌ₂ ꞌauꞌ₂ ꞌniaꞌ₂ a₂ca₂juɨ́g₂ jniá₂ ꞌniaꞌ₂ jág₁ la₂.
Ta₁ a₂jmo₅ Jme₂dsí₂ Jŋió₅
ꞌTsá₃ ca₂juáꞌ₃ jniá₂ le₂në₅ liaꞌ₂ conꞌ₂ le₂ꞌuɨg₅₄, ia₁ jme₁ꞌen₅₄ bá₄ jniá₂ quianꞌ₅₄ ꞌniaꞌ₂.
5 La₁ia₁ në₃ në́₃, ma₂négꞌ₄ i₁ꞌú₃ quiangꞌ₅₄ i₂ca₂chei₃; jaun₂ liaꞌ₂ ꞌi₁janꞌ₂ ꞌniaꞌ₂ tsá₃ ꞌein₂ ŋag₅: “¿A₂jáꞌ₄ guangꞌ₅₄?”
Más enseñanza sobre el Espíritu Santo (Juan 16.5-33)
6 La₁ qui₂ca₂táꞌ₂ quɨꞌ₂ ꞌauꞌ₂ ꞌniaꞌ₂ ꞌuɨg₅₄ ia₁ a₂në₂juɨ́g₂ jniá₂ ꞌniaꞌ₂ a₂në₅.
7 La₁ jág₁ dsau₅ bá₄ juɨ́g₂ jniá₂ ꞌniaꞌ₂: të₂le₃ a₂dse₃ quiánꞌ₂ ꞌniaꞌ₂ bá₄ a₂néꞌ₄ jniá₂. Ia₁ në₁juaꞌ₂ tsá₃ ca₂ŋáꞌ₃ jniá₂, tsá₃ jiá₃ i₂cuë₃ bí₂ ꞌauꞌ₂ ꞌniaꞌ₂; la₁ia₁ chi₂juaꞌ₂ néꞌ₄ jniá₂ në́₃, tsɨn₅₄ jniá₂ ꞌéi₂ ja₁conꞌ₂ ꞌniaꞌ₂.
8 Jë₁ma₂të́₂ rë₁jiá₃ ꞌéi₂, jme₃jniai₂₃ a₂rë₂gan₂ dsa₂ mɨ₂güɨ́g₃ cuente quióꞌ₅ dsáu₁, quióꞌ₅ juɨ₅ dse₃, quióꞌ₅ a₂jáuꞌ₅ ꞌí₁ ja₁coin₂ në́₃.
9 Cuente quióꞌ₅ dsáu₁, ꞌuɨg₅₄ ia₁ a₂tsá₃ ꞌéin₂ le₃quió₃ jniá₂;
10 cuente quióꞌ₅ juɨ₅ dse₃, ia₁ a₂négꞌ₄ ja₁con₂ Ŋeꞌ₃, jaun₂ tsá₃ ma₃jniá₂ jagꞌ₅₄ ꞌniaꞌ₂;
11 ján₃ bá₄ cuente quióꞌ₅ a₂jáuꞌ₅ ꞌí₁, ia₁ ma₂jáuꞌ₅ ꞌí₁ ja₁con₂ i₂ꞌéi₂ i₂gon₂ mɨ₂güɨ́g₃ la₂.
12 ꞌꞌLióng₂ bá₄ jág₁ cha₂ guë́₄ a₂juɨg₅₄ jniá₂ ꞌniaꞌ₂, la₁ia₁ tsá₃ quɨꞌ₅₄ ꞌniaꞌ₂ jmɨg₄ le₃ŋɨ́gꞌ₂ jë₂ në₃.
13 La₁ jë₁ma₂të́₂ rë₁jiá₃ Jme₂dsí₂ tí₅ dsónꞌ₂, i₂ꞌéi₂ bá₄ jiog₃ ꞌniaꞌ₂ juɨ₅ a₂tí₅ jág₁; ia₁ tsá₃ a₂jaun₂ juáꞌ₂ ꞌéi₂ o₄quióꞌ₄ ꞌŋiog₅; a₂jaun₂ bá₄ juáꞌ₂ ca₂le₃jë́₃ a₂nag₃, tonꞌ₂ ꞌë́₂ jág₁ juɨ₁liaꞌ₂ ꞌe₂ niog₅ lé₂.
14 Jme₃juagꞌ₂ ꞌéi₂ jniá₂, ia₁ ŋei₂ juɨ₁liaꞌ₂ a₂lë́₅ quió₃ jniá₂, jaun₂ ꞌéi₂ në́₃, jmo₃ jág₁ ja₁conꞌ₂ ꞌniaꞌ₂.
15 Ca₂le₃jë́₃ a₂cha₂ quióꞌ₅ Ŋeꞌ₃, ján₃ bá₄ lë́₅ quió₃ jniá₂; jaun₂ bá₄ lë₃ në₂juáꞌ₃ jniá₂ a₂ŋe₂ ꞌéi₂ juɨ₁liaꞌ₂ a₂lë́₅ quió₃ jniá₂, jaun₂ jmo₃ jág₁ ja₁conꞌ₂ ꞌniaꞌ₂.
Juɨ₁liaꞌ₂ a₂ꞌliaꞌ₂ dsɨ́₅ dsa₂ le₃tsɨ́n₃ a₂lé₂ a₂qui₃jmo₃ ꞌioꞌ₂
16 ꞌŊiꞌ₅₄ ta₁, tsá₃ ma₃jagꞌ₅₄ guë́₄ ꞌniaꞌ₂ jniá₂; la₁ ŋiꞌ₅₄ ta₁ bá₄, jagꞌ₅₄ táng₃ jniá₂, ia₁ néꞌ₄ jniá₂ ja₁con₂ Ŋeꞌ₃.b
17 Jaun₂ në́₃, qui₂ca₂ŋag₃ i₂lɨn₅₄ chiꞌ₂ dsɨ₂guia₃-tɨ́n₂ quiáin₅ ca₂ŋɨ́iꞌ₃ rɨinꞌ₅₄ le₂jain₂ le₂jain₂:
―¿I₂ꞌe₂ ꞌnio₃ juáꞌ₂ a₂juáꞌ₂ tság₅ jniog₄ le₂në₅: “Ŋiꞌ₅₄ ta₁, tsá₃ ma₃jagꞌ₅₄ guë́₄ ꞌniaꞌ₂ jniá₂; la₁ ŋiꞌ₅₄ ta₁ bá₄, jagꞌ₅₄ táng₃ jniá₂, ia₁ néꞌ₄ jniá₂ ja₁con₂ Ŋeꞌ₃”?
18 ¿I₂ꞌe₂ ꞌnio₃ juáꞌ₂: “Ŋiꞌ₅₄ ta₁”? Tsá₃ ne₄ i₂ꞌe₂ jaun₂ ꞌë₂₃.
19 Jaun₂ ca₂rë₃líꞌ₄ Jesús i₂ꞌe₂ ꞌnio₃ ŋag₃ tioinꞌ₅₄, jaun₂ ca₂juáꞌ₂:
―¿A₁qui₂ŋɨꞌ₄ ꞌniaꞌ₂ rɨ́ngꞌ₂ ꞌuɨg₅₄ ia₁ a₂në₂juáꞌ₃ jniá₂: “Ŋiꞌ₅₄ ta₁, tsá₃ ma₃jagꞌ₅₄ guë́₄ ꞌniaꞌ₂ jniá₂; la₁ ŋiꞌ₅₄ ta₁ bá₄, jagꞌ₅₄ táng₃ jniá₂”?
20 A₂dsɨ₂jóꞌ₃ juɨ́g₂ jniá₂ ꞌniaꞌ₂, a₂tóngꞌ₂ ꞌniaꞌ₂ qui₁ꞌáuꞌ₂, a₂ꞌliaꞌ₂ ꞌauꞌ₂ në́₃, të₁liaꞌ₂ jmo₃ dsa₂ mɨ₂güɨ́g₃ ꞌioꞌ₂. La₁ia₁ le₃tsɨ́n₃ bá₄ a₂ꞌliaꞌ₂ ꞌauꞌ₂ ꞌniaꞌ₂ jaun₂ a₂qui₃jmóꞌ₂ táng₃ ꞌioꞌ₂.
21 Juɨ₁liaꞌ₂ lɨ́n₅ jan₂ ꞌio₅₄ jë₁rë₂chan₂ guein₂ quiain₅, ꞌliaꞌ₂ dsɨ́₅ ia₁ ma₂ca₂të́₂ hora quióꞌ₅; la₁ cang₂ jë₁ma₂ca₂rë₃chán₃ guein₂ quiáin₅, tsá₃ ma₃dsauꞌ₂ dsɨ́₅ a₂ca₂rë₃quɨ́ꞌ₃ quióꞌ₅, ia₁ a₂ŋɨ́₄ lë₃ ꞌioꞌ₂ jénꞌ₅, ia₁ a₂ca₂rë₃chán₃ jan₂ guein₂ mɨ₂güɨ́g₃ la₂.
22 Ján₃ bá₄ le₂jaun₂ ꞌniaꞌ₂ në́₃; ꞌliaꞌ₂ ꞌauꞌ₂ ꞌniaꞌ₂ rë₂në́₃, la₁ jɨng₅₄ bá₄ táng₃ ꞌniaꞌ₂, jaun₂ guë́₄ në́₃ jmóꞌ₂ ꞌniaꞌ₂ ꞌioꞌ₂ të₂ꞌauꞌ₂, a₂ꞌlioꞌ₂ jénꞌ₂ ꞌniaꞌ₂ jaun₂ ca₂liaꞌ₂ ꞌi₁jan₂ tsá₃ ꞌein₂ lé₂ le₃jŋiáꞌ₂.
23 ꞌJmɨg₄ jaun₂ tsá₃ ma₃ꞌe₂ qui₁ŋagꞌ₁ ꞌniaꞌ₂ jniá₂ ꞌi₁caun₂. A₂dsɨ₂jóꞌ₃ juɨ́g₂ jniá₂ ꞌniaꞌ₂, chi₂juaꞌ₂ ꞌe₂ a₂mɨꞌ₂ ꞌniaꞌ₂ liaꞌ₂ conꞌ₂ lë́₅ ꞌéiꞌ₃ quió₃ jniá₂, cuë₃ bá₄ Ŋeꞌ₃.
24 Ca₂liaꞌ₂ jŋió₄ jmɨg₄ në₃, tsá₃ ꞌe₂ ma₂mɨꞌ₅₄ ꞌniaꞌ₂ ꞌi₁caun₂ liaꞌ₂ conꞌ₂ lë́₅ ꞌéiꞌ₃ quió₃. Mɨ₄ ꞌniaꞌ₂, jaun₂ guéiꞌ₁ ꞌniaꞌ₂, ia₁jaun₂ le₃ꞌŋia₅ a₂o₂ꞌŋió₃ o₂jŋia₃ ꞌauꞌ₂.
Jesucristo bá₄ ca₂tióꞌ₃ mɨ₂güɨ́g₃ la₂
25 ꞌJág₁ la₂ ma₂në₂juɨ́g₂ jniá₂ ꞌniaꞌ₂ quianꞌ₅₄ jág₁ a₂jángꞌ₅ léi₄. La₁ jiá₃ hora a₂tsá₃ ma₃juɨg₅₄ jniá₂ ꞌniaꞌ₂ quianꞌ₅₄ jág₁ a₂jángꞌ₅ léi₄; liaꞌ₂ rë₂jiá₃ jág₁ bá₄ juáꞌ₄ jniá₂ juɨg₅₄ ꞌniaꞌ₂ a₂ꞌɨ́ng₄ Ŋeꞌ₃.
26 Jmɨg₄ jaun₂ mɨ́ꞌ₁ ꞌniaꞌ₂ ne₄ Ŋeꞌ₃ liaꞌ₂ conꞌ₂ lë́₅ ꞌéiꞌ₃ quió₃ jniá₂. Tsá₃ ma₃tion₅₄ juáꞌ₄ jniá₂ a₂mɨ₅₄ jniá₂ ne₄ Ŋeꞌ₃ o₄quiánꞌ₂ ꞌniaꞌ₂,
27 ia₁ ŋiog₅ bá₄ Ŋeꞌ₃ ꞌnioi₃ ꞌniaꞌ₂, ia₁ ꞌniógꞌ₃ ꞌniaꞌ₂ jniá₂, ia₁ ma₂ca₂rë₃ꞌénꞌ₂ ꞌniaꞌ₂ a₂guio₃ jniá₂ ja₁con₂ Diú₄.
28 Ca₂o₃ꞌɨ́n₃ jniá₂ ja₁con₂ Ŋeꞌ₃ a₂ca₂guang₃ mɨ₂güɨ́g₃ la₂; la₁ia₁ në₃ në́₃ o₃ꞌɨng₅ mɨ₂güɨ́g₃ la₂, jaun₂ négꞌ₄ táng₃ ja₁con₂ Ŋeꞌ₃.
29 Jaun₂ ca₂juáꞌ₂ chiꞌ₂ dsɨ₂guia₃-tɨ́n₂ quiáin₅:
―Në₃ guë́₄ në́₃ juáꞌ₂ ꞌne₂ liaꞌ₂ rë₂jiá₃ jág₁; on₃juaꞌ₅₄ quianꞌ₅₄ jág₁ a₂jángꞌ₅ léi₄.
30 Në₃ guë́₄ në́₃ ma₂ne₄ jniaꞌ₅₄ a₂ŋiꞌ₅₄ bá₄ ꞌne₂ ca₂le₃jë́₃, jaun₂ tsá₃ ꞌe₂ ꞌnióꞌ₅ quiángꞌ₂ juaꞌ₅₄ tsá₃ ŋiꞌ₅₄ ꞌe₂ qui₃ŋag₃ dsa₂ qui₃ŋɨ́iꞌ₃ ꞌne₂. ꞌUɨg₅₄ jaun₂ ꞌéin₂ jniaꞌ₅₄ a₂ŋeꞌ₃ ꞌne₂ ja₁con₂ Diú₄.
31 Jaun₂ ca₂ŋag₃ Jesús:
―¿Dsónꞌ₂ juaꞌ₅₄, në₃ guë́₄ ꞌénꞌ₂ ꞌniaꞌ₂?
32 ¡Jag₄ ꞌniaꞌ₂! Ma₂ja₂quián₃ hora, tonꞌ₂ të₂në₃ dsónꞌ₂ bá₄, a₂cuɨ́ngꞌ₂ ꞌniaꞌ₂ lé₂, a₂o₁nogꞌ₄ tsɨ₁rë₂jangꞌ₅₄ le₂jangꞌ₂ le₂jangꞌ₂ o₁nogꞌ₄ jma₃quén₅ quiángꞌ₂; jaun₂ téiꞌ₄ ꞌniaꞌ₂ jniá₂ të₃tsɨngꞌ₅₄ ꞌŋió₃ lé₂. La₁ia₁ tsá₃ ꞌŋió₃ jniá₂ të₃tsɨngꞌ₅₄, ia₁ quiongꞌ₅₄ bá₄ Ŋeꞌ₃ jniá₂.
33 Juɨ́g₂ jniá₂ ꞌniaꞌ₂ le₃jë́₃ a₂la₂, ia₁jaun₂ ꞌag₃ tei₄ ꞌauꞌ₂ ꞌniaꞌ₂ le₃quió₃ jniá₂. Mɨ₂güɨ́g₃ la₂ tion₅₄ rëꞌ₂ qui₁cánꞌ₂ ꞌniaꞌ₂ quɨꞌ₂ ꞌauꞌ₂; la₁ia₁ tiá₂ dsia₄ ꞌniaꞌ₂ ꞌauꞌ₂, ia₁ ma₂ca₂tió₃ bá₄ jniá₂ ja₁con₂ mɨ₂güɨ́g₃ la₂.