Ca₂chi₃lénꞌ₂ Jesús Diú₄ Jmei₂ o₄quióꞌ₄ chiꞌ₂ dsɨ₂guia₃-tɨ́n₂ quiáin₅
17
Jme₁ma₂ca₂juáꞌ₂ Jesús le₂në₅, ca₂chógꞌ₃ ne₅₄ gueiꞌ₅₄ i₂juɨ́g₃, jaun₂ ca₂juáꞌ₂:
―Tia₅₄, ma₂të́₂ hora quió₃. Jme₁jnia₅ ꞌa₂ liaꞌ₂ jlánꞌ₁ ja₂ŋíꞌ₂, ia₁jaun₂ jme₃jnia₅ ja₂ŋíꞌ₂ ꞌa₂ liaꞌ₂ jlánꞌ₁ ꞌne₂.
2 Ia₁ ma₂ca₂cuëꞌ₅₄ ꞌéi₂ ꞌéiꞌ₃ ne₄ quióꞌ₅ ca₂le₃jɨ́n₃ dsa₂, ia₁jaun₂ jmo₃ a₂le₃chan₂ co₂tan₅₄ ca₂le₃jɨ́n₃ i₂ma₂cuɨinꞌ₅₄.
Jesús ora por sus seguidores (Juan 17.1-26)
3 A₂la₂ lë́₅ a₂chan₂ dsa₂ co₂tan₅₄: a₂le₃cuɨn₅ dsa₂ ꞌne₂ i₂lɨ́ngꞌ₅ i₂jan₂ tan₅₄ Diú₄ të₃dsónꞌ₂, a₂le₃cuɨin₂₃ Jesucristo në́₃ i₂ca₂chenꞌ₂ ꞌne₂.
4 ꞌMa₂ca₂jme₁jnia₅ jniá₂ ne₄ guaꞌ₅₄ ꞌuë₃ la₂ ꞌa₂ liaꞌ₂ jlánꞌ₁ ꞌne₂, ia₁ ma₂ca₂jme₁ꞌŋia₅ jniá₂ ta₁ a₂ca₂cuëꞌ₅₄ jmo₅₄.
5 Në₃ në́₃, jaun₂, Tia₅₄, jmo₄ jlánꞌ₁ jniá₂ ja₁congꞌ₂, juɨ₁liaꞌ₂ jme₁lɨ́n₄ jniá₂ ja₁congꞌ₂ liaꞌ₂ conꞌ₂ néꞌ₃ guë́₄ a₂nio₃ mɨ₂güɨ́g₃.
6 ꞌMa₂ca₂jme₁jnia₅ jniá₂ ne₄ dsa₂ i₂ca₂cuagꞌ₅₄ jniá₂ jɨn₄ dsa₂ mɨ₂güɨ́g₃, i₂ꞌein₂ lɨ́nꞌ₅ ꞌne₂. I₂quiángꞌ₂ bá₄ jme₁lɨ́in₄, jaun₂ ma₂ca₂cuagꞌ₅₄ jniá₂; ma₂qui₂ca₂ꞌí₃ të₂dsɨ́₅ ꞌéi₂ jág₁ quiángꞌ₂.
7 Ma₂ca₂rë₃ŋi₅ ꞌéi₂, ca₂le₃jë́₃ a₂ca₂cuëꞌ₅₄ jniá₂ já₅ ja₁conꞌ₂ ꞌne₂;
8 ia₁ ma₂ca₂cuë́₃ bá₄ jniá₂ jág₁ jaun₂ a₂ca₂cuëꞌ₅₄ ꞌne₂ jniá₂, jaun₂ ca₂gue₃ bá₄ ꞌéi₂ në́₃. Ma₂ca₂rë₃ŋi₅ liaꞌ₂ conꞌ₂ tí₅ jág₁, ja₁conꞌ₂ ꞌne₂ bá₄ o₂ꞌɨ́n₃ jniá₂, tonꞌ₂ ca₂rë₃ꞌéin₂ a₂ca₂cheiꞌ₂ ꞌne₂ jniá₂.
9 ꞌO₄quióꞌ₄ ꞌéi₂ bá₄ mɨ₅ jniá₂, on₃juaꞌ₅₄ o₄quióꞌ₄ dsa₂ mɨ₂güɨ́g₃. O₄quióꞌ₄ dsa₂ i₂ca₂cuagꞌ₅₄ bá₄ mɨ₅ jniá₂, ia₁ i₂quiángꞌ₂ ꞌne₂ bá₄ ꞌéi₂.
10 Ia₁ ca₂le₃jɨ́n₃ dsa₂ quiáng₃, ján₃ bá₄ quiángꞌ₂ ꞌéi₂; tonꞌ₂ ca₂le₃jɨ́n₃ dsa₂ quiángꞌ₂ në́₃, i₂quiáng₃ bá₄ ꞌéi₂ ján₃, jaun₂ rë₂jniá₂ a₂jlánꞌ₁ jniá₂ të₂le₃ quianꞌ₅₄ ꞌéi₂.
11 ꞌTsá₃ ma₃jan₄ jniá₂ mɨ₂güɨ́g₃ la₂; la₁ia₁ ꞌéi₂ në́₃ të₂ꞌŋiái₄ mɨ₂güɨ́g₃, jaun₂ négꞌ₄ ja₁conꞌ₂ ꞌne₂. Tia₅₄ Jŋió₅, jmo₄ ꞌí₁ ꞌéi₂ i₂ma₂cuagꞌ₅₄ quianꞌ₅₄ juɨ₅bí₂ a₂lɨ́ngꞌ₅,a ia₁jaun₂ ca₂ne₅₄ bá₄ léin₂ co₂tan₅₄, juɨ₁liaꞌ₂ lág₅ jniog₄.
12 Liaꞌ₂ conꞌ₂ jme₁ꞌen₅₄ jniá₂ quiangꞌ₅₄ ꞌéi₂ mɨ₂güɨ́g₃ la₂,b ma₂qui₂ma₂jmo₃ jniá₂ ꞌí₁ i₂ma₂cuagꞌ₅₄ quianꞌ₅₄ juɨ₅bí₂ a₂lɨ́ngꞌ₅.c Ma₂qui₂ma₂jmo₃ jniá₂ ꞌí₁, jaun₂ liaꞌ₂ ꞌi₁jan₂ ꞌéi₂ tsá₃ ca₂i₃cónꞌ₅, jŋiaꞌ₅₄ liaꞌ₂ jan₂ bá₄ i₂ꞌi₄ ꞌéiꞌ₃ dsɨ₃ꞌén₂, ia₁jaun₂ le₃ti₃ Si₂.
13 ꞌNë₃ në́₃, négꞌ₄ ja₁congꞌ₂; la₁ia₁ të₁liaꞌ₂ ꞌeng₅₄ guë́₄ mɨ₂güɨ́g₃, juáꞌ₅ jniá₂ jág₁ la₂ ia₁jaun₂ le₃ꞌŋia₅ ja₁con₂ ꞌéi₂ a₂ꞌioꞌ₂ jéin₅ jniá₂.
14 Ma₂ca₂cuë́₃ bá₄ jniá₂ jág₁ quiángꞌ₂, la₁ia₁ dsa₂ mɨ₂güɨ́g₃ në́₃, ꞌiog₅₄ quióꞌ₅, ia₁ tsá₃ tén₅ ꞌéi₂ mɨ₂güɨ́g₃, juɨ₁liaꞌ₂ jniá₂ në́₃, tsá₃ téng₅ mɨ₂güɨ́g₃.
15 On₃juaꞌ₅₄ rëꞌ₂ mɨ₅ jniá₂ juaꞌ₅₄ a₂ꞌuɨinꞌ₅₄ mɨ₂güɨ́g₃, a₂jaun₂ bá₄ mɨ₅ jniá₂ a₂jmóꞌ₂ ꞌí₁ ia₁jaun₂ tsá₃ jo₃ i₂së₃dsen₃.
16 Tsá₃ mɨ₂güɨ́g₃ téin₅, juɨ₁liaꞌ₂ jniá₂ në́₃, tsá₃ téng₅ mɨ₂güɨ́g₃.
17 Chon₄ dsa₂ ꞌéi₂ të₂le₃ quianꞌ₅₄ jág₁ tí₅; ia₁ jág₁ quiángꞌ₂ bá₄ lë́₅ jág₁ tí₅.
18 Juɨ₁liaꞌ₂ ca₂cheiꞌ₂ ꞌne₂ jniá₂ jɨn₄ dsa₂ mɨ₂güɨ́g₃, ján₃ bá₄ le₂jaun₂ tsɨn₅₄ jniá₂ ꞌéi₂ jɨn₄ dsa₂ mɨ₂güɨ́g₃.d
19 O₄quióꞌ₄ ꞌéi₂ bá₄ tsón₄ jniá₂ ꞌŋio₃, ia₁jaun₂ ján₃ bá₄ le₂jaun₂ ꞌéi₂ në₃, lé₂ rë₂tsoin₅₄ le₃quióꞌ₅ jág₁ tí₅.
20 ꞌLa₁ia₁ on₃juaꞌ₅₄ jmáꞌ₃ o₄quióꞌ₄ ꞌéi₂ mɨ₅ jniá₂; ján₃ bá₄ le₂jiog₅ o₄quióꞌ₄ i₂le₃ꞌén₂ le₃quió₃, të₂le₃ quianꞌ₅₄ jág₁ quióꞌ₅,
21 ia₁jaun₂ léin₂ ca₂ne₅₄ ca₂le₃jɨ́in₃, juɨ₁liaꞌ₂ ꞌne₂, Tia₅₄, ꞌengꞌ₅₄ ja₁con₂ jniá₂, tonꞌ₂ ꞌen₅₄ guëꞌ₂ jniá₂ ja₁conꞌ₂ ꞌne₂, ia₁jaun₂ ꞌéi₂ në́₃, dsɨ₃toinꞌ₅₄ ja₁con₂ jniog₄, ia₁jaun₂ qui₃le₃ꞌén₂ dsa₂ mɨ₂güɨ́g₃ a₂ca₂cheiꞌ₂ jniá₂.
22 Ma₂ca₂cuë́₃ jniá₂ ꞌéi₂ a₂jláꞌ₁ quió₃ a₂ca₂cuëꞌ₅₄ ꞌne₂ jniá₂, ia₁jaun₂ lén₂ ꞌéi₂ ca₂ne₅₄, juɨ₁liaꞌ₂ lág₅ jniog₄ ca₂ne₅₄ ján₃.
23 Jniá₂ le₃quióꞌ₅ ꞌéi₂, ꞌne₂ guëꞌ₂ le₃quió₃ jniá₂, ia₁jaun₂ le₃ꞌŋia₅ ꞌéi₂ a₂léin₂ ca₂ne₅₄, ia₁jaun₂ le₃ŋi₅ dsa₂ mɨ₂güɨ́g₃ a₂ca₂cheiꞌ₂ jniá₂, tonꞌ₂ ca₂jme₁ꞌniógꞌ₄ ꞌéi₂ juɨ₁liaꞌ₂ ca₂jme₁ꞌniógꞌ₄ jniá₂.
24 ꞌTia₅₄, ꞌnio₃ jniá₂ a₂dsɨ₃tonꞌ₅₄ ꞌéi₂ i₂ca₂cuagꞌ₅₄ ja₁cong₂, ia₁jaun₂ të₃ ne₅₄ a₂jláꞌ₁ quió₃ a₂ca₂cuëꞌ₅₄ ꞌne₂, ia₁ ca₂jme₁ꞌnióꞌ₄ ꞌne₂ jniá₂, néꞌ₃ guë́₄ a₂nio₃ mɨ₂güɨ́g₃.
25 Tia₅₄ i₂dsen₃ guë́₄ lɨn₃, tsá₃ cuɨn₅ dsa₂ mɨ₂güɨ́g₃ ꞌne₂, la₁ia₁ jniá₂ cuɨ́ng₅ ꞌne₂, jaun₂ ma₂ŋi₅ bá₄ dsa₂ la₂ quiángꞌ₂ a₂ca₂cheiꞌ₂ ꞌne₂ jniá₂.
26 Ma₂ca₂jme₁jnia₅ jniá₂ ja₁con₂ ꞌéi₂ ꞌein₂ lɨ́nꞌ₅ ꞌne₂, jaun₂ caun₂ jme₁jnia₅ bá₄ jniá₂ ꞌne₂, ia₁jaun₂ juɨ₁liaꞌ₂ a₂ꞌniógꞌ₃ ꞌne₂ jniá₂ të₃ꞌŋiá₄ ja₁con₂ ꞌéi₂, tonꞌ₂ ꞌú₄ jniá₂ ja₁coin₂.