Ca₂jŋaꞌ₃ dsa₂ Jesús
18
Jme₁ma₂ca₂dsan₃ juáꞌ₂ Jesús le₂në₅, ca₂o₃ꞌɨ́in₃ quiainꞌ₅₄ chiꞌ₂ dsɨ₂guia₃-tɨ́n₂, qui₂ca₂ꞌain₃ Jɨꞌ₅₄ Jma₃ Cedrón. Le₂quióng₄ ja₁jaun₂, jme₁cha₂ caun₂ ja₁jme₁cha₂ nɨ₁ꞌma₂ ꞌag₅ mɨ́g₂, ja₁ca₂ꞌí₃ Jesús quiainꞌ₅₄ chiꞌ₂ dsɨ₂guia₃-tɨ́n₂ quiáin₅.
2 Ján₃ bá₄ le₂jaun₂ Judas i₂jme₁ma₂ꞌen₅₄ juɨ₅ jángꞌ₂ quióꞌ₅, jme₁ma₂cuɨ́ꞌ₅ bá₄ ja₁jaun₂, ia₁ ꞌlióng₂ ráun₂ ca₂ŋɨꞌ₂ Jesús ja₁jaun₂ quiainꞌ₅₄ chiꞌ₂ dsɨ₂guia₃-tɨ́n₂ quiáin₅.
Jesús traicionado y arrestado (Juan 18.1-14)
3 Jaun₂ lë₃ ca₂dsióg₃ Judas ja₁jaun₂ quiainꞌ₅₄ co₂nióꞌ₃ ꞌlióg₂, quiainꞌ₅₄ co₂nióꞌ₃ guëꞌ₂ chiꞌ₂ ꞌɨꞌ₅₄ quián₅ guáꞌ₅, i₂chen₄ quián₅ juɨg₅₄ jme₂dsa₂ quianꞌ₅₄ dsa₂ fariseos* në́₃. Ca₂dsi₃lén₂ dsa₂ ꞌéi₂ qui₂le₁quian₅ ŋi₁tág₂, nɨ₁ꞌma₂, quianꞌ₅₄ si₂ nɨ₁tsɨ́₅, nɨ₁quɨ₂ a₂le₁guíꞌ₃ si₂ në́₃.
4 La₁ia₁ Jesús në́₃, jme₁ma₂ŋi₅ bá₄ ca₂le₃jë́₃ ꞌe₂ a₂dsɨ₃ŋɨ́i₂, jaun₂ o₂ꞌɨ́in₃ ja₁jaun₂ ca₂i₁jme₁jeinꞌ₂ dsa₂, jaun₂ ca₂ŋɨ́iꞌ₃ dsa₂ ꞌéi₂:
―¿I₂ꞌein₂ ꞌnagꞌ₂ ꞌniaꞌ₂?
5 Jaun₂ ca₂ŋag₃ dsa₂ ꞌéi₂:
―Jesús i₂chan₂ Nazaret bá₄ ꞌniaꞌ₂ jniaꞌ₅₄.
Jaun₂ ca₂ŋag₃ Jesús:
―Jniá₂ bá₄ ꞌéi₂.a
Jaun₂ bá₄ jme₁chénꞌ₄ Judas i₂jángꞌ₂ quióꞌ₅, quiainꞌ₅₄ dsa₂ ꞌéi₂.
6 Jaun₂ jme₁ca₂juáꞌ₂ Jesús ca₂tsɨ́ꞌ₃ dsa₂: “Jniá₂ bá₄ ꞌéi₂”,a jaun₂ i₃léin₂ le₃caꞌ₃ i₃gainꞌ₅₄ ꞌuë₃.
7 Jaun₂ në́₃ ca₂ŋag₃ táng₃ Jesús ca₂ŋɨ́iꞌ₃ dsa₂ ꞌéi₂:
―¿I₂ꞌein₂ ꞌnagꞌ₂ ꞌniaꞌ₂?
Jaun₂ ca₂ŋag₃ táng₃ dsa₂:
―Jesús i₂chan₂ Nazaret bá₄.
8 Jaun₂ ca₂ŋag₃ táng₃ Jesús:
―Ma₂në₂juɨ́g₂ jniá₂ ꞌniaꞌ₂, jniá₂ bá₄ lɨ́ng₅ ꞌéi₂.a Chi₂juaꞌ₂ jniá₂ ꞌnauꞌ₂ ꞌniaꞌ₂, cuë₄ jmɨg₄ juɨ₁dsi₂len₅ bá₄ i₂la₂.
9 A₂la₂ ca₂lë₃ ia₁jaun₂ le₃ti₃ liaꞌ₂ conꞌ₂ lë́₅ a₂jme₁ca₂juáꞌ₂ Jesús tsɨ́ꞌ₅ Jmei₂: “Juɨ₁liaꞌ₂ i₂ca₂cuagꞌ₅₄ ꞌne₂ jniá₂, tsá₃ ꞌein₂ ca₂i₃cónꞌ₅ ꞌi₁jan₂.”
10 Jaun₂ në́₃ jme₁quian₅ Si₂mu₅₄ Pe₄ ŋi₁tág₂, jaun₂ ca₂dsí₃ ca₂quíꞌ₃ rë₂gua₄ ne₁ quióꞌ₅ jan₂ dsa₂ i₂jme₁chen₂ Malco, i₂jme₂ti₃ ta₁ ne₄ jme₂dsa₂ dsen₅₄.
11 La₁ ca₂juáꞌ₂ Jesús ca₂tsɨ́ꞌ₃ Pe₄:
―Tioꞌ₂ táng₃ ŋi₁tág₂ ja₁jme₁ꞌi₄. ¿ꞌE₂ lɨ́nꞌ₂ ꞌne₂ a₂tsá₃ ca₂tɨ́n₂ jniá₂ dsɨ₃ŋɨ́g₂ a₂ma₂juáꞌ₂ Ŋeꞌ₃?b
Ŋó₃ Jesús ne₄ jme₂dsa₂ dsen₅₄
12 Jaun₂ në́₃ ca₂jŋauꞌ₃ co₂nióꞌ₃ ꞌlióg₂ liaꞌ₂ jma₃quiainꞌ₅₄ juɨg₅₄, quiainꞌ₅₄ chiꞌ₂ ꞌɨꞌ₅₄ quián₅ guáꞌ₅ në́₃, ca₂jŋaiꞌ₃ Jesús, jaun₂ qui₂ca₂ꞌneiꞌ₂ në́₃.
13 Jaun₂ ca₂i₁jiog₃ le₂ꞌuɨg₅₄ ja₁quióꞌ₄ Anás. Anás ꞌéi₂ në́₃ jme₁lɨ́n₄ dsɨ₂jmei₂ Caifás, i₂jme₁lɨ́n₄ ta₁ jme₂dsa₂ dsen₅₄ ŋi₂ jaun₂.
14 Caifás ꞌéi₂ në́₃ i₂jme₁ca₂juáꞌ₂ ca₂tsɨ́ꞌ₃ dsa₂ judíos, a₂jmo₅ jón₂ jan₂ dsa₂ o₄quióꞌ₄ dsa₂ juɨg₂.c
Tsá₃ ca₂tion₃ Pe₄ a₂cuɨin₂₃ Jesús
15 Jaun₂ ca₂ŋó₃ Si₂mu₅₄ Pe₄ quiainꞌ₅₄ guë́₄ jan₂ dsa₂ i₂guia₃-tɨ́n₂ siánꞌ₂ në́₃, chi₁coꞌ₅₄ quióꞌ₅ Jesús. Dsa₂ guia₃-tɨ́n₂ jan₂ ꞌéi₂ në́₃ jme₁cuɨg₅ bá₄ jme₂dsa₂ dsen₅₄ quióꞌ₅, jaun₂ bá₄ ca₂ꞌí₃ co₂lë₅ quiainꞌ₅₄ Jesús i₁dsi₅ quióꞌ₅ jme₂dsa₂ dsen₅₄.
Pedro niega conocer a Jesús y Anás pregunta a Jesús (Juan 18.15-27)
16 La₁ Pe₄ në́₃, jaun₂ bá₄ ca₂nau₂ o₄ꞌné₄ të₂le₃ ca₁ꞌné₄. ꞌUɨg₅₄ jaun₂ ca₂o₃ꞌɨ́n₃ dsa₂ guia₃-tɨ́n₂ i₂ma₂cuɨg₅ jme₂dsa₂ dsen₅₄ quióꞌ₅, jaun₂ ca₂juáꞌ₂ ca₂tsɨ́ꞌ₃ ꞌio₅₄ i₂niog₅ ne₄ o₄ꞌné₄, jaun₂ ca₂ŋɨ́i₂ Pe₄ të₂le₃ dsi₂néi₂.
17 Jaun₂ në́₃ ca₂ŋag₃ ꞌio₅₄ i₂jmo₅ ꞌí₁ o₄ꞌné₄ ca₂ŋɨ́iꞌ₃ Pe₄:
―On₃juaꞌ₅₄ ꞌne₂ lɨ́ngꞌ₅ jan₂ i₂ca₂rë₃tɨ́n₃ quián₅ dsa₂ në₅, ¿liaꞌ₅₄?
Jaun₂ ca₂juáꞌ₂:
―Jan₂ꞌón₄, on₃juaꞌ₅₄ jniá₂ ꞌéi₂.
18 Ja₁jaun₂ jme₁tión₂ dsa₂ i₂jme₂ti₃ ta₁, quiainꞌ₅₄ chiꞌ₂ ꞌɨꞌ₅₄ quián₅ guáꞌ₅. Jme₁ma₂ca₂dsia₃ ca₂joꞌ₅₄ si₂, ia₁ a₂jme₁güɨ́g₂, jaun₂ tióin₂ qui₂jme₂dsioinꞌ₂. Ján₃ bá₄ jë₄ jaun₂ jme₁chénꞌ₄ Pe₄ jme₂dsioinꞌ₂.
Chénꞌ₅ Jesús ne₄ jme₂dsa₂ dsen₅₄
19 Jaun₂ ca₂ŋag₃ jme₂dsa₂ dsen₅₄ ca₂ŋɨ́iꞌ₃ Jesús cuente quióꞌ₅ chiꞌ₂ dsɨ₂guia₃-tɨ́n₂ quiáin₅, cuente quióꞌ₅ juɨ₁liaꞌ₂ jág₁ a₂jme₂tag₂₃ në́₃.
20 Jaun₂ ca₂ŋag₃ Jesús:
―Ma₂qui₂ma₂juáꞌ₃ bá₄ jniá₂ liaꞌ₂ rë₂jiá₃ jág₁ të₃ne₄ ca₂le₃jɨ́n₃ dsa₂; jme₁qui₂jme₁tɨ́n₂ jniá₂ tián₂ dsa₂ dsi₂néi₂ guáꞌ₅ sinagoga* quianꞌ₅₄ i₁dsi₅ guáꞌ₅ templo* në́₃, ja₁qui₂ŋɨꞌ₂ ca₂le₃jɨ́n₃ dsa₂ judíos*. Tsá₃ ꞌe₂ jág₁ ma₂juáꞌ₃ jniá₂ ꞌi₁caun₂ të₃ chi₁ꞌma₁.
21 ¿ꞌE₂ ꞌuɨg₅₄ ŋagꞌ₅₄ ꞌne₂ jniá₂ jaun₂? Ŋɨꞌ₅₄ juɨ₁liaꞌ₂ dsa₂ i₂qui₂ma₂nág₂ jág₁ quió₃, ꞌe₂ ma₂juɨ́g₂ jniá₂. Jag₄ deꞌ₂, i₂ŋi₅ bá₄ ꞌéi₂ juɨ₁liaꞌ₂ i₂ꞌe₂ jág₁ a₂ma₂juáꞌ₃ jniá₂.
22 Jme₁ca₂juáꞌ₂ Jesús le₂në₅, jan₂ chiꞌ₂ ꞌɨꞌ₅₄ quián₅ guáꞌ₅ i₂jme₁chénꞌ₄ cau₅, ca₂quein₃ dsɨ₂ne₄ Jesús, jaun₂ ca₂juáꞌ₂:
―¿Le₁në₅ bá₄ ŋagꞌ₅₄ ꞌne₂ ne₄ jme₂dsa₂ dsen₅₄?
23 Jaun₂ ca₂ŋag₃ Jesús:
―Chi₂juaꞌ₂ ꞌlɨgꞌ₅₄ në₂juáꞌ₃ jniá₂, juaꞌ₅₄, jme₁jnia₅ chi₂juaꞌ₂ jáꞌ₄ ca₂ꞌlianꞌ₂ jniá₂ jaun₂. La₁ chi₂juaꞌ₂ dsau₅ bá₄ jág₁ a₂në₂juáꞌ₃, ¿ꞌe₂ guëꞌ₂ lë₃ queinꞌ₂ quió₃?
24 Jaun₂ në́₃ ca₂chei₃ Anás ca₂chein₃ Jesús chi₁ꞌŋeiꞌ₅₄ ne₄ Caifás, i₂lɨ́n₅ jme₂dsa₂ dsen₅₄.
Conꞌ₂ siáꞌ₂ táng₃ tsá₃ ca₂tion₃ Pe₄ a₂cuɨin₂₃ Jesús
25 Të₁liaꞌ₂ jaun₂ në́₃, jaun₂ bá₄ chénꞌ₅ Pe₄ jme₂dsioinꞌ₂ cau₅ si₂, jaun₂ ca₂ŋag₃ dsa₂ ca₂ŋɨ́iꞌ₃ Pe₄:
―¿On₁juaꞌ₅₄ ꞌne₂ lɨ́ngꞌ₅ jan₂ i₂ca₂rë₃tɨ́n₃ quián₅ dsa₂ në₅?
Tsá₃ ca₂tion₃ Pe₄ jaun₂, ca₂juáꞌ₂:
―Jan₂ꞌón₄. On₃juaꞌ₅₄ jniá₂ ꞌéi₂.
26 Jaun₂ në́₃ ca₂ŋag₃ jan₂ i₂jme₂ti₃ ta₁ ne₄ jme₂dsa₂ dsen₅₄, i₂lɨ́n₅ jan₂ o₁rɨnꞌ₅₄ dsa₂ i₂ca₂quíꞌ₃ Pe₄ rë₂gua₄, ca₂juáꞌ₂:
―¿Tsa₁ në₂jɨn₄ jniá₂ ꞌne₂ ja₁cha₂ nɨ₁ꞌma₂ jaun₂, co₂lë₅ quianꞌ₅₄ ꞌéi₂?
27 Jaun₂ conꞌ₂ siáꞌ₂ táng₃ tsá₃ ca₂tion₃ Pe₄ a₂cuɨin₂₃ Jesús. Jaun₂ liaꞌ₂ ma₂të₂dsi₅₄ jaun₂, ca₂ꞌo₃ të₁guí₄ dsó₂.
Chénꞌ₅ Jesús ne₄ Dsi₄máꞌ₂ Pilato
28 Jaun₂ në́₃ ca₂dsen₅ dsa₂ Jesús ja₁quióꞌ₄ Caifás ca₂i₁jiog₃ të₂ ne₄ta₁ quióꞌ₅ dsi₄máꞌ₂. Jme₁ma₂jnia₃ mɨ₂güɨ́g₃, jaun₂ tsá₃ ca₂tónꞌ₂ dsa₂ judíos dsi₂néi₂ ne₄ta₁ quióꞌ₅ dsi₄máꞌ₂, ia₁jaun₂ tsá₃ le₃ꞌiog₅ quióꞌ₅, ia₁ ꞌnio₃ jme₁guë́ꞌ₃ má₃ quióꞌ₅ Jmɨg₄ Të₂ꞌɨn₅₄*.
Pilato le pregunta a Jesús (Juan 18.28-40)
29 ꞌUɨg₅₄ jaun₂ në́₃ ca₂o₃ꞌɨ́n₃ Pilato ꞌŋiog₅ ja₁tionꞌ₅₄ ꞌéi₂, jaun₂ ca₂juáꞌ₂:
―¿ꞌE₂ dso₄ bonꞌ₄ ꞌniaꞌ₂ dsa₂ la₂?
30 Jaun₂ ca₂ŋag₃ dsa₂:
―Juaꞌ₅₄ meiꞌ₂ guë́₃ tsá₃ rɨn₅ dsa₂ në₅ dso₄, tsá₃ o₄gogꞌ₂ ꞌne₂ jme₁jɨinꞌ₅₄ jniaꞌ₅₄.
31 Jaun₂ në́₃ ca₂juáꞌ₂ Pilato ca₂tsɨ́ꞌ₃ dsa₂:
―Te₅₄ ꞌniaꞌ₂ jaun₂, qui₂dsɨ₅ ꞌniaꞌ₂ ꞌéiꞌ₃ quióꞌ₅ liaꞌ₂ conꞌ₂ lë́₅ ꞌÉiꞌ₃ quiánꞌ₂ ꞌniaꞌ₂ guiongꞌ₅₄.
Jaun₂ ca₂ŋag₃ dsa₂ judíos:
―La₁ia₁ tsá₃ ꞌi₄ ꞌéiꞌ₃ a₂jŋɨ́ꞌ₄ jniaꞌ₅₄ jan₂ dsa₂.
32 Le₂në₅ ca₂rë₃ti₃ jág₁ a₂ca₂juáꞌ₂ Jesús ꞌe₂ ne₅₄ ꞌmú₃ a₂dsɨ₃ŋɨ́i₂.
33 Jaun₂ ca₂ꞌí₃ táng₃ Pilato të₂le₃ dsi₂néi₂ ne₄ta₁ quióꞌ₅, jaun₂ ca₂të́ꞌ₃ Jesús jaun₂ ca₂ŋɨ́iꞌ₃ ꞌéi₂:
―¿Lɨ́nꞌ₅ ꞌne₂ Rag₅₄ quián₅ dsa₂ judíos?
34 Jaun₂ ca₂ŋag₃ Jesús:
―¿A₂ŋagꞌ₅₄ ꞌa₂ conꞌ₂ dsɨ₂jiog₅ ꞌauꞌ₂ ꞌŋiagꞌ₂ a₂juáꞌ₂ në₅, o₃ chan₂ i₂siánꞌ₂ a₂ma₂juáꞌ₂ ꞌag₂₃ jniá₂?
35 Jaun₂ ca₂ŋag₃ Pilato:
―¿O₃ bá₄ dsa₂ judío lɨ́n₅ jniá₂? Dsa₂ juɨg₂ quiángꞌ₂, quianꞌ₅₄ juɨg₅₄ jme₂dsa₂ bá₄ në₂jángꞌ₂ quiángꞌ₂ o₄gu₃ jniá₂. ¿ꞌE₂ ma₂jmoꞌ₅₄?
36 Jaun₂ në́₃ ca₂ŋag₃ Jesús:
―On₃juaꞌ₅₄ mɨ₂güɨ́g₃ la₂ ja₁gon₂ jniá₂. Juaꞌ₅₄ meiꞌ₂ guë́₃ mɨ₂güɨ́g₃ la₂ ja₁gon₂ jniá₂, jme₁náu₃ ꞌnei₂ bá₄ dsa₂ i₂quiongꞌ₅₄ jniá₂ ia₁jaun₂ tsá₃ jme₁jángꞌ₂ dsa₂ ne₄ dsa₂ judíos. La₁ on₃juaꞌ₅₄ ja₁lá₃ ja₁gon₂ jniá₂.
37 Jaun₂ në́₃ ca₂juáꞌ₂ Pilato ca₂tsɨ́ꞌ₃ Jesús:
―¿Dsónꞌ₂ bá₄ lɨ́nꞌ₅ ꞌne₂ rag₅₄ jaun₂ në́₃?
Jaun₂ ca₂ŋag₃ Jesús:
―Dsau₅ bá₄ juáꞌ₂ ꞌne₂, a₂lɨ́n₅ jniá₂ rag₅₄. Ta₁ jaun₂ ca₂rë₃cháng₃, ta₁ jaun₂ guang₃ mɨ₂güɨ́g₃, ia₁jaun₂ jángꞌ₄ jág₁ dsau₅ o₄quióꞌ₄ jág₁ tí₅. Ca₂le₃jɨ́n₃ i₂tión₂ le₃quióꞌ₅ jág₁ tí₅, nag₂₃ jág₁ quió₃.
38 Jaun₂ ca₂juáꞌ₂ Pilato ca₂tsɨ́ꞌ₃ Jesús:
―¿I₂ꞌe₂ jaun₂ jág₁ tí₅?
Ca₂o₃ꞌág₃ ꞌéiꞌ₃ a₂jón₂ Jesús
Jme₁ca₂dsan₃ juáꞌ₂ Pilato le₂në₅, ca₂o₃ꞌɨ́in₃ táng₃, ca₂dsia₃ táng₃ jág₁ quianꞌ₅₄ dsa₂ judíos. Jaun₂ ca₂juáꞌ₂:
―Tsá₃ dso₄ dsoꞌ₂ jniá₂ ja₁con₂ dsa₂ la₂.
39 La₁ chíꞌ₅ caun₂ tag₄ quiánꞌ₂ ꞌniaꞌ₂ a₂tén₅ jniá₂ jan₂ dsa₂ ja₁conꞌ₂ ꞌniaꞌ₂ jme₁të₅ Jmɨg₄ Të₂ꞌɨn₅₄. ¿ꞌNiogꞌ₂ ꞌniaꞌ₂ jaun₂ a₂tén₄ jniá₂ Rag₅₄ quián₅ dsa₂ judíos?
40 Jaun₂ në́₃, ca₂tóinꞌ₂ co₂mɨꞌ₅₄ ca₂juáꞌ₂:
―¡On₃juaꞌ₅₄ i₂në₅! ¡Barrabás bá₄ tén₃!
Barrabás ꞌéi₂ në́₃, jme₁lɨ́in₄ jan₂ dsa₂ ꞌang₂ i₂ca₂nau₂ ꞌnei₂.d