Ca₂dsiánꞌ₃ Jesús ne₄ Pilato
23
Jaun₂ qui₂ca₂nau₂ ca₂le₃jɨ́n₃ ca₂jŋiai₃ Jesús ne₄ Pilato.
San Lucas 23:1-25
2 Ja₁jaun₂ guë́₄ ca₂ꞌnáuꞌ₃ dsáu₁ Jesús, ca₂juáꞌ₂:
―Ca₂jon₃ jniaꞌ₅₄ dsa₂ la₂ jme₁ꞌein₅₄ dsia₂₃ mɨꞌ₅₄ jɨn₄ dsa₂ juɨg₂ quián₂ jniaꞌ₅₄. Ŋɨ₂₃ toinꞌ₂ dsa₂ jág₁ a₂tsá₃ ma₂ꞌein₂ quí₃ ꞌliaꞌ₅₄ a₂ca₂tɨ́n₂ César; a₂jme₂tɨin₂₃ dsa₂ juáꞌ₂ a₂lɨ́in₅ I₂rë₂ꞌɨ́n₁ quián₅ Diú₄, co₂ꞌnióꞌ₄ a₂lɨ́in₅ rag₅₄.
3 Jaun₂ ca₂ŋag₃ Pilato:
―¿Dsónꞌ₂ lɨ́ngꞌ₅ Rag₅₄ quián₅ dsa₂ judíos?
Jaun₂ ca₂ŋag₃ Jesús:
―Le₂në₅ bá₄, juɨ₁liaꞌ₂ juáꞌ₂ ꞌne₂ në₅.
4 Jaun₂ ca₂juáꞌ₂ táng₃ Pilato ca₂tsɨ́ꞌ₃ juɨg₅₄ jme₂dsa₂, quianꞌ₅₄ dsa₂ juɨg₂:
―Tsá₃ ꞌe₂ dsáu₁ dsa₂ në₅ dsoꞌ₂ jniá₂ ꞌi₁caun₂.
5 La₁ të₂le₃ lë́₅ guë́₄ co₂mɨꞌ₅₄ ca₂tóinꞌ₂, ca₂juáꞌ₂:
―La₁ ꞌŋio₅ lɨn₃ dsia₂₃ mɨꞌ₅₄ ŋɨ₂₃, jme₂tɨin₂₃ dsa₂ ta₁caun₂ ꞌuë₃ Judea. Ca₂jme₃lióg₃ Galilea, rë₂në́₃ guëꞌ₂ ma₂ŋɨ₂₃ ja₁lá₃ jmo₂₃ le₂jaun₂.
Ca₂dsiánꞌ₂ Pilato Jesús ne₄ Herodes
6 Jme₁ca₂nág₂ Pilato a₂në₅, jaun₂ ca₂ŋag₃ chi₂juaꞌ₂ ꞌuë₃ Galilea chan₂ dsa₂ ꞌéi₂.
7 Jme₁ca₂rë₃ŋi₅ në́₃, a₂lɨ́n₅ Jesús dsa₂ chan₂ të₂le₃ ꞌuë₃ ja₁niog₅ gu₂ Herodes, jaun₂ ca₂dsiógꞌ₂ ne₄ ꞌéi₂. Ia₁ jme₁ŋɨ₂₃ juɨg₂ Jerusalén jmɨg₄ jaun₂.
8 ꞌIoꞌ₂ jénꞌ₅ bá₄ Rag₅₄ Herodes jme₁ca₂jɨ́in₂ Jesús, ia₁ lɨ́gꞌ₂ bá₄ ꞌɨ́n₅ dsɨ́₅ jág₂, ia₁ jme₁ma₂nág₂ bá₄ ꞌei₅ jág₁ a₂ꞌɨn₅ dsa₂ ꞌéi₂. Ia₁ jme₁ꞌɨ́n₂ dsɨ́₅ jág₃ ꞌe₂ caun₂ o₂dsain₂ jmo₃.
9 ꞌLióng₂ a₂qui₂ca₂ŋɨ́iꞌ₃ Jesús, la₁ tsá₃ ma₃ꞌe₂ ca₂ŋag₃ ꞌéi₂ ꞌi₁caun₂.
10 Ja₁jaun₂ jme₁tión₂ juɨg₅₄ jme₂dsa₂ quianꞌ₅₄ të₅juáꞌ₅ në́₃, caun₂ qui₂ca₂ꞌnáuꞌ₃ tion₅₄ dsáu₁ ꞌéi₂.
11 Jaun₂ Herodes në́₃, quianꞌ₅₄ ꞌlióg₂ quiáin₅, lë₁qui₂ca₂jmógꞌ₂ tioinꞌ₅₄, ca₂queiꞌ₃ ꞌmɨꞌ₂ jláꞌ₁, jaun₂ ca₂dsiógꞌ₂ bá₄ táng₃ ne₄ Pilato.
12 Jmɨg₄ jaun₂ bá₄ ca₂jmo₃ Pilato a₂mei₅₄ quianꞌ₅₄ Herodes, ia₁ jme₁le₁ꞌŋiai₁₂ rɨinꞌ₅₄ le₂jŋiá₅.
Ca₂o₃ꞌág₃ ꞌéiꞌ₃ a₂jón₂ Jesús
13 Jaun₂ ca₂ŋɨ́ꞌ₂ Pilato juɨg₅₄ jme₂dsa₂, quianꞌ₅₄ i₂lɨ́n₅ ta₁, quianꞌ₅₄ dsa₂ juɨg₂ në́₃.
14 Jaun₂ ca₂tsɨ́ꞌ₃ dsa₂:
―O₂jonꞌ₅₄ ꞌniaꞌ₂ ne₃ dsa₂ la₂, ia₁ juáꞌ₂ ꞌniaꞌ₂ a₂dsia₂₃ mɨꞌ₅₄ jɨn₄ dsa₂. Të₃ neꞌ₅₄ ꞌniaꞌ₂ ma₂qui₂në₂ŋag₄ jniá₂, tsá₃ ꞌe₂ dsáu₁ dsoꞌ₂ jniá₂ ꞌi₁caun₂, liaꞌ₂ conꞌ₂ lë́₅ dso₄ a₂jme₂cainꞌ₅₄ ꞌniaꞌ₂.
15 On₃ guëꞌ₂ Herodes ca₂dsóꞌ₂, jaun₂ la₂ bá₄ ca₂dsiógꞌ₂ táng₃. Jaun₂ ꞌi₁caun₂ tsá₃ ꞌe₂ cha₂ juaꞌ₅₄ ca₂tɨ́in₂ gue₃ ꞌmú₃.
16 La₁ jmo₅₄ ꞌéiꞌ₃ a₂bóg₂ dsa₂, jaun₂ guë́₄ loin₅₄.
17 Jme₁jmɨg₄ të₂ꞌɨn₅₄, jme₁chíꞌ₄ tag₄ quióꞌ₅ Pilato jme₁lióin₂ jan₂ dsa₂ ꞌné₅ ꞌmá₃, jme₁cheiꞌ₂ le₃jɨn₄ dsa₂.a
18 La₁ dsa₂ juɨg₂ në́₃ co₂ŋeiꞌ₅₄ ca₂le₃jɨ́in₃ ca₂tóinꞌ₂ co₂mɨꞌ₅₄ ca₂juáꞌ₂:
―¡Cau₅ jŋiáꞌ₃ i₂në₅! ¡Barrabás bá₄ lion₄ quián₂ jniaꞌ₅₄!
19 Barrabás ꞌéi₂ ca₂toꞌ₂ dsa₂ néꞌ₃ ꞌmá₃ ꞌuɨg₅₄ ia₁ ca₂dsia₃ caun₂ mɨꞌ₅₄ jë₄ juɨg₂, tonꞌ₂ ia₁ jme₁ma₂jŋɨiꞌ₃ dsa₂ në́₃.
20 Jme₁ꞌnio₃ bá₄ Pilato jme₁lióin₂ Jesús, jaun₂ jme₁ca₂tsɨ́ꞌ₃ bá₄ guë́₄ dsa₂.
21 La₁ të₂le₃ lë́₅ guë́₄ co₂mɨꞌ₅₄ ca₂tónꞌ₂ bá₄ dsa₂, guióꞌ₅ juáꞌ₂:
―¡Tióin₃ cróg₄! ¡Tióin₃ cróg₄!
22 Jë₁ŋó₄ ꞌnɨ₅ ráun₂ ca₂juáꞌ₂ táng₃ Pilato tsɨ́ꞌ₅ dsa₂:
―¿ꞌE₂ guëꞌ₂ ꞌlɨgꞌ₅₄ ma₂jmo₃? Tsá₃ ꞌe₂ dsáu₁ i₂në₅ dsoꞌ₂ jniá₂ juaꞌ₅₄ a₂ca₂tɨ́in₂ jóin₂. Jmo₅₄ jniá₂ ꞌéiꞌ₃ a₂bóg₂ dsa₂ jaun₂ guë́₄ loin₅₄.
23 La₁ tion₅₄ ca₂mɨ₃ dsa₂ tioinꞌ₅₄ co₂mɨꞌ₅₄ a₂tion₃ cróg₄. Ca₂lë₃ rëꞌ₂ conꞌ₂ lë́₅ ꞌɨ́n₅ dsɨ́₅ dsa₂ juɨg₂ lé₂.
24 Jaun₂ co₂ŋeiꞌ₅₄ meꞌ₂ ca₂jmo₃ Pilato ꞌéiꞌ₃ a₂lé₂ conꞌ₂ lë́₅ mɨ₅ dsa₂.
25 Jaun₂ ca₂lióin₂ bá₄ dsa₂ i₂jme₁ꞌen₅₄ néꞌ₃ ꞌmá₃, i₂jme₁ma₂dsia₃ mɨꞌ₅₄, i₂ma₂jŋɨꞌ₃ dsa₂ në́₃. Jaun₂ ca₂jángꞌ₂ ca₂jɨ́inꞌ₂ Jesús o₄gú₃ dsa₂ juɨg₂ o₁jmo₁₂ quiongꞌ₅₄ conꞌ₂ ꞌɨ́n₅ dsɨ́₅ jmo₃.
Ca₂tion₃ dsa₂ cróg₄ Jesús
26 Conꞌ₂ ma₂tioinꞌ₅₄ juɨ₅ jŋiai₂₃ Jesús ja₁dsɨ₃tion₃ cróg₄, ca₂chi₃quiáin₂ tion₅₄ jan₂ dsa₂ chan₂ ꞌuë₃ Cirene, i₂chen₂ Si₂mu₅₄, i₂ꞌen₅₄ juɨ₅ jónꞌ₅ ja₁nau₂, a₂cán₂ cróg₄ dsó₃ le₃chi₁coꞌ₅₄ quióꞌ₅ Jesús.
San Lucas 23:26-43
27 Juɨn₅ lɨn₃ bá₄ dsa₂ juɨg₂ i₃lén₂ ꞌein₂₃, dsa₂ mɨ́₂ në́₃ i₃lén₂ quɨꞌ₂-ꞌo₂₃ ꞌliaꞌ₂ dsɨ́₅ quɨꞌ₂-ꞌóinꞌ₂ Jesús.
28 Jaun₂ ca₂jénꞌ₃ Jesús, ca₂juáꞌ₂:
―ꞌNiaꞌ₂ dsa₂ mɨ́₂ chan₂ Jerusalén, ꞌa₃ ma₃ꞌau₂ ꞌniaꞌ₂ o₄quió₃ jniá₂. ꞌO₄ bá₄ ꞌniaꞌ₂ o₄quiángꞌ₂ guiongꞌ₅₄, o₄quióꞌ₄ chiꞌ₂-guein₂ quiángꞌ₂ në́₃.
29 Ia₁ já₅ jmɨg₄ jë₁juáꞌ₂ dsa₂: “ꞌE₂ guë́₄ dsen₃ juɨ₁liaꞌ₂ dsa₂ mɨ́₂ i₂tsá₃ lé₂ cán₂ guein₂; ꞌe₂ guë́₄ dsen₃ juɨ₁liaꞌ₂ dsa₂ i₂tsá₃ guein₂ ca₂ꞌí₃ të₂dsɨ́₅, on₃ guëꞌ₂ dsiꞌ₅₄ quióꞌ₅ ca₂guénꞌ₃ guein₂ në́₃.”
30 Jmɨg₄ jaun₂ jme₃lióg₃ dsa₂ tsɨ́ꞌ₃ nɨ₁máꞌ₂: “Láꞌ₃ ne₄ quián₂ jniaꞌ₅₄”, juáꞌ₂ në́₃ tsɨ́ꞌ₃ dsɨ₂conꞌ₂: “ꞌMog₅₄ jniaꞌ₅₄.”
31 Ia₁ chi₂juaꞌ₂ le₂la₂ jmo₅ dsa₂ jmáiꞌ₂ i₂tsá₃ ca₂tɨ́n₂ gue₃ uɨg₅, ¿ꞌë₂ guë́₄ bá₄ dsɨ₃nɨ́₂ i₂ca₂tɨ́n₂ dsónꞌ₂?b
32 Ján₃ bá₄ jme₁le₁jŋiai₂₃ guë́₄ on₃ dsa₂ i₂le₂cánꞌ₄ dso₄, a₂jme₂dsiog₂₃ co₂lë₅ quianꞌ₅₄ Jesús.
33 Jme₁ca₂dsi₃léin₂ ja₁të́ꞌ₂ dsa₂ Dsɨ₂conꞌ₂ Nɨ₁mu₅ Mɨ₂dsi₄ ꞌLag₄,c ja₁jaun₂ ca₂tion₃ cróg₄ quianꞌ₅₄ le₃on₃ dsa₂ ꞌlɨnꞌ₅₄ ꞌéi₂, jan₂ të₂le₃ gu₂ ne₁, jan₂ guëꞌ₂ të₂le₃ gu₂ jen₅.
34 [Jaun₂ ca₂juáꞌ₂ Jesús:
―Tia₅₄, ꞌén₃ dsáu₁, ia₁ tsá₃ ŋi₅ a₂jmo₂₃.]d
Jaun₂ ca₂co₃ dsɨ₂ꞌlióg₂ ca₂tóinꞌ₂ ca₂jmo₃ le₁dsoꞌ₅₄ nɨ₁tsɨnꞌ₅₄ Jesús.e
35 Jaun₂ jme₁tión₂ dsa₂ juɨg₂ cau₅, jág₅. Dsɨ₂tan₅₄ në́₃ jme₁tión₂, qui₂co₂jmógꞌ₂ burlas, ca₂juáꞌ₂:
―Qui₂ma₂lióin₂ i₂siánꞌ₂; në₃ në́₃, juɨ₁lioin₅₄ ꞌŋiog₅ chi₂juaꞌ₂ dsɨ₂jóꞌ₃ lɨ́in₅ I₂rë₂ꞌɨ́n₁ rë₂quionꞌ₅₄ quián₅ Diú₄.
―Chi₂juaꞌ₂ lɨ́ngꞌ₅ Rag₅₄ quián₅ dsa₂ judíos, lion₄ ꞌŋiagꞌ₂.
38 Jaun₂ ca₂tióng₃ dsa₂ letras dsi₄ cróg₄ tioꞌ₅₄ ꞌnɨ₅ né₃ jág₁ jmei₅: griego, latín, hebreo në́₃, co₂ꞌnióꞌ₄ a₂juáꞌ₂: “RAG₅₄ QUIÁN₅ DSA₂ JUDÍOS BÁ₄ LA₂.”
39 Jan₂ i₂rë₂cánꞌ₄ dso₄ i₂jme₁rë₂ton₅ cau₅ quióꞌ₅ ca₂të₂ca₂ꞌoꞌ₂, ca₂juáꞌ₂:
―¿On₁ ꞌne₂ lɨ́ngꞌ₅ I₂rë₂ꞌɨ́n₁ quián₅ Diú₄? Ma₂në₃ lion₄ ꞌŋiagꞌ₂, jaun₂ loꞌ₅₄ jniaꞌ₅₄ në́₃.
40 La₁ ca₂jí₂ bá₄ rɨinꞌ₅₄ ca₂juáꞌ₂:
―¿ꞌEn₁ jmáꞌ₃ tsá₃ ganꞌ₃ ꞌne₂ Diú₄? Juaꞌ₂ uɨg₅ le₂në₅ bá₄ gueiꞌ₂ ján₃.
41 La₁ jniog₄ a₂ca₂tág₂ dsónꞌ₂ guei₂ uɨg₅ la₂, liaꞌ₂ conꞌ₂ lë́₅ a₂ma₂jmó₁; la₁ dsa₂ la₂ në́₃, ꞌi₁caun₂ tsá₃ ꞌe₂ rɨin₂.
42 Jaun₂ ca₂juáꞌ₂:
―Jesús, juɨ₁dsiogꞌ₂ bá₄ ꞌauꞌ₂ jniá₂, jë₁ma₂dsiángꞌ₃ ja₁gongꞌ₂.
43 Jaun₂ ca₂ŋag₃ Jesús:
―A₂dsɨ₂jóꞌ₃ juɨ́g₂ jniá₂ ꞌne₂, jmɨg₄ në₃ të₃tsɨngꞌ₅₄ quianꞌ₅₄ jniá₂ Ja₁jláꞌ₁.f
Ca₂jon₃ Jesús
44 Conꞌ₂ dsi₃níꞌ₃,g të₁tsɨꞌ₅₄ qui₁néꞌ₃ ta₁caun₂ guaꞌ₅₄ ꞌuë₃, ca₂liaꞌ₂ ca₂të́₂ hora ŋí₁ ꞌnɨ₅h le₃ca₂ꞌláu₂.
San Lucas 23:44-56
45 ꞌIog₂ co₂dsia₅ ca₂rë₃liáꞌ₃; tsɨ₁ꞌmɨꞌ₂ cortina a₂jme₁ꞌei₅ dsi₂néi₂ guáꞌ₅ templo*, co₂dsia₅ ca₂chen₃ ca₂lë₃ tɨn₃ dsoꞌ₅₄ jo₂.
46 Hora jaun₂, ca₂guióꞌ₃ Jesús, ca₂juáꞌ₂:
―¡Tia₅₄ quiáng₃, o₄gogꞌ₂ ꞌne₂ dsia₅₄ jme₂dsí₂ quió₃!
Caun₂ jaun₂ bá₄ a₂ca₂juáꞌ₂ guë́₄, co₂tan₅₄ ca₂join₃.
47 Jme₁ca₂jág₃ juɨg₅₄ ꞌlióg₂ a₂ca₂lë₃ jaun₂, ca₂jme₃juɨinꞌ₂ Diú₄, ca₂juáꞌ₂:
―Dsónꞌ₂ bá₄ tsá₃ ꞌe₂ jme₁rɨn₂ dsa₂ la₂.
48 Ca₂le₃jɨ́n₃ bá₄ dsa₂ i₂jme₁tionꞌ₅₄ i₂ca₂jág₃ a₂ca₂lë₃ jaun₂, ca₂i₃lein₃ quein₂₃ dsɨ́₅.i
49 Ca₂le₃jɨ́n₃ dsa₂ i₂jme₁cuɨn₅ Jesús quianꞌ₅₄ dsa₂ mɨ́₂ i₂jme₁ma₂quiongꞌ₅₄ të₂ Galilea, jme₁tióin₂ uɨ́ng₂ jág₅ ca₂le₃jë́₃ a₂në₅.
Ca₂ꞌon₃ Jesús
50 La₁ ca₂lë₃ në́₃, jan₂ dsa₂ i₂chen₂ José, i₂jme₁quenꞌ₅₄ lɨ́in₅ ta₁ jɨn₄ dsɨ₂tan₅₄ quián₅ guáꞌ₅, jme₁lɨ́in₄ dsa₂ dsen₃ i₂ꞌua₁ dsɨ́₅.
51 Së́₄ ꞌéi₂ në́₃, i₂chan₂ juɨg₂ Arimatea ja₁tén₄ Judea, tsá₃ ca₂rë₃ꞌŋió₃ dsɨ́₅ liaꞌ₂ niog₅ ca₂jmo₃ dsɨ₂tan₅₄ rɨinꞌ₅₄, ia₁ jme₁chi₁jŋia₂₃ le₃gon₂ Diú₄.
52 Jaun₂ ca₂ŋei₅₄ në́₃ i₁mɨ₂ jág₁ ne₄ Pilato a₂dsɨ₃sioin₅₄ ꞌlag₄ Jesús cróg₄ a₂dsɨ₃ꞌó₃.
53 Jme₁ca₂sió₂, ca₂lio₃ caun₂ ꞌmɨꞌ₂ tióg₃. Jaun₂ ca₂i₁quio₂₃ ꞌŋióꞌ₃ tau₂ ꞌŋio₅ a₂jme₁ma₂lë́₅ ca₂jmo₃ dsa₂ dsɨ́₅ nɨ₁ꞌlau₂, ja₁tsá₃ ꞌein₂ ꞌlag₄ ma₂ꞌí₅.
54 Ia₁ jmɨg₄ jaun₂ tionꞌ₅₄ dsa₂ jmo₂₃ co₂jŋia₅₄ a₂ꞌnióꞌ₅ quióꞌ₅ jmɨg₄ sa₅₄ a₂jë₁ca₂jnia₃ jaun₂.
55 La₁ dsa₂ mɨ́₂ i₂ma₂ja₂lén₂ quianꞌ₅₄ Jesús të₂ Galilea, ca₂o₃léin₂ ca₂jág₃ ꞌa₂ liaꞌ₂ ca₂quion₅ dsa₂ ꞌlag₄ néꞌ₃ táu₂.
56 Jme₁ca₂dsi₃lein₃ quióꞌ₅, ca₂jmo₃ co₂jŋia₅₄ noꞌ₅₄ mɨ₂juɨg₂ quianꞌ₅₄ guë́₄ ma₁ꞌau₂ në́₃, a₂dsɨ₃tsɨin₅₄ Jesús.
Jme₁ca₂jnia₃ sa₅₄ jaun₂, ca₂tiáinꞌ₂ ca₂jŋia₃ liaꞌ₂ conꞌ₂ lë́₅ ꞌÉiꞌ₃.