Jág₁ Dse₃ quióꞌ₅ Diú₄ a₂ca₂tóꞌ₂ San Juan₅₄ ne₄ Si₂
Jág₁ quióꞌ₅ Diú₄ a₂lɨ́n₅ dsa₂ mɨ₂güɨ́g₃
1
Liaꞌ₂ conꞌ₂ le₂ꞌuɨg₅₄ jme₁ca₂rë₃lióg₃, jme₁ma₂chan₂ i₂të́ꞌ₂ Jág₁; jaun₂ i₂ꞌéi₂ i₂lɨ́n₅ Jág₁ në́₃, jme₁ꞌein₅₄ quianꞌ₅₄ Diú₄; Diú₄ bá₄ jme₁lɨ́in₄ ján₃.
2 Jaun₂ liaꞌ₂ conꞌ₂ le₂ꞌuɨg₅₄, ꞌéi₂ në́₃, jme₁ꞌein₅₄ quianꞌ₅₄ Diú₄.
La Palabra (Juan 1.1-18)
3 Të₂le₃ quianꞌ₅₄ ꞌéi₂ bá₄, ca₂lë₃ ca₂le₃jë́₃ ꞌe₂ a₂cha₂; ca₂liaꞌ₂ ꞌi₁caun₂ tsá₃ ca₂rë₃chá₃ juaꞌ₅₄ tsá₃ ca₂jmo₃ ꞌéi₂.
4 Ja₁con₂ ꞌéi₂ bá₄ já₅ bí₂ a₂le₃chan₂ dsa₂; bí₂ jaun₂ në́₃, lë́₅ Si₂ a₂tág₅ ja₁con₂ dsa₂ mɨ₂güɨ́g₃.
5 Tág₅ Si₂ jaun₂ jë₄ qui₁néꞌ₃, la₁ qui₁néꞌ₃ në́₃, tsá₃ ma₂ca₂tióꞌ₃.
6 Ca₂rë₃chán₃ jan₂ dsa₂ i₂chen₄ quián₅ Diú₄, i₂chen₂ Juan₅₄.
7 Ca₂guain₃ ca₂jángꞌ₃ jág₁ dsau₅ të₂le₃ quióꞌ₅ ꞌéi₂ i₂lɨ́n₅ Si₂, ia₁jaun₂ të₂le₃ quianꞌ₅₄ jág₁ dsau₅ a₂jángꞌ₅ në₅, le₃ꞌén₂ ca₂le₃jɨ́n₃ dsa₂.
8 On₃juaꞌ₅₄ Juan₅₄ ꞌéi₂ i₂jme₁lɨ́n₄ Si₂; jŋiaꞌ₅₄ conꞌ₂ i₂jángꞌ₅ jág₁ dsau₅ bá₄ jme₁lɨ́in₄, juɨ₁liaꞌ₂ le₃quióꞌ₅ Si₂.
9 Jme₁ma₂guán₂ i₂lɨ́n₅ Si₂ të₃dsónꞌ₂, a₂tág₃ ja₁con₂ le₂jan₂ le₂jan₂ dsa₂ mɨ₂güɨ́g₃.
10 I₂ꞌéi₂ i₂lɨ́n₅ Jág₁ jme₁ꞌein₅₄ mɨ₂güɨ́g₃; jaun₂, o₁jŋiaꞌ₅₄ ca₂lë₃ mɨ₂güɨ́g₃ të₂le₃ quianꞌ₅₄ ꞌéi₂, tsá₃ ca₂rë₃cuɨg₅ dsa₂ mɨ₂güɨ́g₃.
11 Guain₃ jɨn₄ dsa₂ go₅₄, la₁ dsa₂ go₅₄ në́₃, tsá₃ ca₂guei₃.
12 La₁ia₁ i₂conꞌ₂ ca₂guei₃, i₂ca₂rë₃ꞌén₂ të₂le₃ quióꞌ₅, dsa₂ ꞌéi₂ në́₃ ca₂cuë́ꞌ₃ bí₂ a₂léin₂ chiꞌ₂-guein₂ quián₅ Diú₄.
13 Juɨ₁liaꞌ₂ chiꞌ₂-guein₂ ꞌéi₂, on₃juaꞌ₅₄ ca₂rë₃cháin₃ liaꞌ₂ conꞌ₂ lë́₅ jmɨ₄ dsa₂ mɨ₂güɨ́g₃, on₃ guëꞌ₂ liaꞌ₂ conꞌ₂ lë́₅ dsɨ́₅ dsa₂ mɨ₂güɨ́g₃, on₃ guëꞌ₂ liaꞌ₂ conꞌ₂ lë́₅ dsɨ́₅ jan₂ dsa₂ ŋeꞌ₂, tonꞌ₂ ca₂rë₃cháin₃ le₃quióꞌ₅ Diú₄ bá₄.
14 I₂ꞌéi₂ në́₃ i₂lɨ́n₅ Jág₁, ca₂can₃ ŋɨ₄ dsa₂ mɨ₂güɨ́g₃, ca₂guá₂ jë₄ quián₂ jniog₄. Jniaꞌ₅₄ në́₃ ma₂ca₂jag₅₄ a₂co₂ꞌnéꞌ₅ quióꞌ₅, co₂ꞌnióꞌ₄ a₂co₂ꞌnéꞌ₅ quióꞌ₅ jan₂ tan₅₄ Ja₁ŋiꞌ₅₄ Diú₄, i₂já₅ ja₁con₂ Jmei₂, rë₂rɨn₅ a₂dse₃ dsɨ́₅, a₂rë₂tiꞌ₅₄ në́₃.
15 Ca₂jángꞌ₃ Juan₅₄ jág₁ dsau₅ të₂le₃ quióꞌ₅ ꞌéi₂, ca₂juáꞌ₂ tiá₂:
―I₂la₂ bá₄ ꞌéi₂ i₂ꞌɨ́n₅ jniá₂, liaꞌ₂ conꞌ₂ jme₁ca₂juáꞌ₃: “I₂já₅ cang₂ guë́₄ conꞌ₂ guë́₄ jniá₂, dsein₅₄ guë́₄ conꞌ₂ guë́₄ jniá₂, ia₁ jme₁ma₂chain₂ jŋiá₅ guë́₄ conꞌ₂ guë́₄ jniá₂.”
16 Ca₂le₃jág₃ bá₄ jniog₄ ma₂qui₂ma₂guéi₂ a₂tson₂ a₂dse₃ dsɨ́₅ ꞌéi₂, caun₂ qui₂jme₂guꞌ₅₄ bá₄ Diú₄ jniog₄ liaꞌ₂ i₂gúꞌ₃.
17 Ca₂ŋag₂ jniog₄ Si₂ ꞌÉiꞌ₃ të₂le₃ quianꞌ₅₄ Moisés, la₁ia₁ të₂le₃ quianꞌ₅₄ Jesucristo bá₄ ca₂já₃ a₂dse₃ dsɨ́₅ Diú₄, ca₂rë₃ti₃ jág₁ dsau₅ në́₃.
18 Liaꞌ₂ ꞌi₁jan₂ tsá₃ ꞌein₂ ma₂jɨ́n₂ Diú₄ liaꞌ₂ ꞌi₁cónꞌ₂; la₁ia₁ Ja₁ŋiꞌ₅₄ i₂jan₂ tan₅₄ ꞌéi₂ quiáin₅, i₂ꞌen₅₄ ja₁con₂ Jmei₂, i₂ꞌéi₂ bá₄ ma₂jmo₃ jág₁ dsau₅ ꞌa₂ liaꞌ₂ lɨ́n₅ Diú₄.
Jángꞌ₅ jág₁ dsau₅ Juan₅₄ i₂chon₅ dsa₂ jmɨg₂, juɨ₁liaꞌ₂ i₂ꞌein₂ ꞌéi₂ Jesucristo
19 Jaun₂ le₂la₂ jág₁ a₂ca₂jángꞌ₃ Juan₅₄ jme₁ca₂chen₃ dsa₂ canꞌ₅₄ quián₅ dsa₂ judíos* i₂tionꞌ₅₄ Jerusalén ca₂chein₃ jme₂dsa₂ quiainꞌ₅₄ levitas* ne₄ Juan₅₄, a₂i₁ŋag₁₂ i₂ꞌein₂ ꞌéi₂.
Juan el Bautista identifica al Mesías (Juan 1.19-34)
20 ꞌÉi₂ në́₃ ca₂jmo₃ jág₁ liaꞌ₂ rë₂jiá₃, ca₂juáꞌ₂:
―On₃juaꞌ₅₄ jniá₂ lɨ́ng₅ I₂rë₂ꞌɨ́n₁* quián₅ Diú₄.
21 Jaun₂ ca₂ŋag₃ táng₃ dsa₂:
―¿ꞌEin₂ ꞌne₂ jaun₂? ¿ꞌNe₂ lɨ́ngꞌ₅ Elías i₂jme₁ꞌë́₂ jág₁ o₄quióꞌ₄ Diú₄?
Jaun₂ ca₂juáꞌ₂ Juan₅₄:
―On₃juaꞌ₅₄ ꞌéi₂ jniá₂.
Dsɨ₂juɨ₅ le₂jaun₂ bá₄ ca₂ŋag₃ táng₃ dsa₂:
―¿On₃ bá₄ ꞌne₂ lɨ́ngꞌ₅ i₂ꞌë́₂ jág₁ ꞌéi₂, i₂lë́₅ jág₁ jiá₃?
Jaun₂ ca₂ŋag₃ Juan₅₄:
―Jan₂ꞌón₄.
22 Jaun₂ bá₄ ca₂juáꞌ₂ dsa₂ ca₂tsɨ́ꞌ₃ Juan₅₄:
―¿ꞌEin₂ lɨ́nꞌ₅ ꞌne₂, jaun₂ në́₃? Juaꞌ₅₄, ia₁jaun₂ dsɨ₁con₁ jniaꞌ₅₄ jág₁ dsau₅ ne₄ dsa₂ i₂ca₂chei₃. ¿ꞌEin₂ juáꞌ₂ ꞌne₂ lɨ́ngꞌ₅?
23 Jaun₂ ca₂ŋag₃ Juan₅₄:
―Jniá₂ bá₄ lɨ́ng₅ i₂ꞌéi₂ i₂juáꞌ₂ jág₁ tiá₂ caun₂ ꞌuë₃ quein₂ co₂ꞌŋiog₅ i₁juáꞌ₄: “Nia₄ ꞌniaꞌ₂ caun₂ juɨ₅ co₂dsau₅ quióꞌ₅ Te₁guiꞌ₅₄.”a
24 Dsa₂ i₂i₁len₅₄ i₁dsia₂ jág₁ quianꞌ₅₄ Juan₅₄, dsa₂ i₂chen₄ quián₅ dsa₂ fariseos* bá₄ ꞌéi₂,
25 jaun₂ ca₂ŋag₃ ca₂ŋɨ́iꞌ₃ táng₃ Juan₅₄:
―Chi₂juaꞌ₂ on₃juaꞌ₅₄ ꞌne₂ lɨ́ngꞌ₅ I₂rë₂ꞌɨ́n₁ quián₅ Diú₄, on₃ guëꞌ₂ Elías, on₃ guëꞌ₂ jan₂ i₂ꞌë́₂ jág₁ o₄quióꞌ₄ Diú₄ në́₃, ¿ꞌe₂ ta₁ ꞌengꞌ₅₄ tsóngꞌ₅ dsa₂ jmɨg₂?b
26 Jaun₂ ca₂juáꞌ₂ Juan₅₄:
―Jniá₂ tiáng₅ dsa₂ jmɨg₂; la₁ia₁ jɨn₄ ꞌniaꞌ₂ chan₂ jan₂ i₂tsá₃ cuɨnꞌ₂ ꞌniaꞌ₂.
27 Já₅ jan₂ cang₂ guë́₄ conꞌ₂ guë́₄ jniá₂, on₃juaꞌ₅₄ ꞌein₂ lɨ́n₅ jniá₂ juaꞌ₅₄ ca₂tɨ́ng₂ tsɨꞌ₅₄ lau₂ ton₅ tag₅₄.
28 Ca₂le₃jë́₃ a₂la₂ ca₂lë₃ caun₂ ja₁chei₂ Betania,c a₂niog₅ të₂le₃ ja₁ꞌia₂ ꞌiog₂ të₂le₃ quióng₄ Cuá₃ Jordán, ja₁jme₁ꞌen₅₄ Juan₅₄ choin₂₃ dsa₂ jmɨg₂.d
Jesús i₂lɨ́n₅ Guein₂ Jáꞌ₂ Chaꞌ₂ quián₅ Diú₄
29 Jme₁jnia₃ jaun₂, ca₂jɨ́n₂ Juan₅₄ Jesús a₂já₅ ja₂quiáin₃ ja₁chéinꞌ₄, jaun₂ ca₂juáꞌ₂:
―Jag₄ ꞌniaꞌ₂, i₂në₅ bá₄ Guein₂ Jáꞌ₂ Chaꞌ₂ quián₅ Diú₄, i₂jŋiáꞌ₂ dsáu₁ dsa₂ mɨ₂güɨ́g₃.
30 I₂në₅ bá₄ ꞌéi₂ i₂ꞌɨ́n₅ jniá₂, liaꞌ₂ conꞌ₂ jme₁ca₂juáꞌ₃: “I₂já₅ cang₂ guë́₄ conꞌ₂ guë́₄ jniá₂, dsein₅₄ guë́₄ conꞌ₂ guë́₄ jniá₂, ia₁ jme₁ma₂chain₂ jŋiá₅ guë́₄ conꞌ₂ guë́₄ jniá₂.”
31 Liaꞌ₂ jŋiaꞌ₅₄ ꞌŋió₃, tsá₃ jme₁guion₅₄ ꞌein₂ ꞌéi₂; la₁ia₁ chóng₅ dsa₂ jmɨg₂ ma₂guio₃,e ia₁jaun₂ le₃cuɨg₅ dsa₂ juɨg₂ Israel* ꞌein₂ ꞌéi₂.
32 Ján₃ bá₄ ca₂jángꞌ₃ Juan₅₄ jág₁ dsau₅ la₂, ca₂juáꞌ₂:
―Ca₂jɨn₄ jniá₂ Jme₂dsí₂ Jŋió₅ ca₂sióin₃ gueiꞌ₅₄ i₂juɨ́g₃ i₂jniá₂ liaꞌ₂ jniá₂ jan₂ i₁ju₂, ca₂të₁gua₁ ne₄ quióꞌ₅ ꞌéi₂.
33 Tsá₃ jme₁ma₂guion₄ bá₄ guë́₄ jniá₂ i₂ꞌein₂ ꞌéi₂; la₁ia₁ i₂ca₂chei₃ jniá₂ a₂chóng₄ dsa₂ jmɨg₂,f ca₂tság₃ jniá₂: “Jë₁ma₂ca₂jɨngꞌ₅₄ Jme₂dsí₂ sióin₅ ne₄ quióꞌ₅ jan₂ dsa₂ ŋeꞌ₂, i₂ꞌéi₂ bá₄ qui₃tián₂ dsa₂ Jme₂dsí₂ Jŋió₅.”
34 Ma₂ca₂jɨin₅₄ bá₄ jniá₂, jaun₂ jángꞌ₅ jniá₂ jág₁ dsau₅, a₂lɨ́n₅ ꞌéi₂ Ja₁ŋiꞌ₅₄ Diú₄.
I₂le₂ꞌuɨg₅₄ dsa₂ guia₃-tɨ́n₂ quián₅ Jesús
35 Jme₁jnia₃ jaun₂, jme₁ꞌen₅₄ táng₃ Juan₅₄ ja₁jaun₂ quianꞌ₅₄ guë́₄ on₃ dsa₂ i₂i₂nio₄ quiainꞌ₅₄.
Los seguidores siguen a Jesús (Juan 1.35-51)
36 Jaun₂ jme₁ca₂jág₃ Juan₅₄ ca₂ŋɨ₅ Jesús, jaun₂ ca₂juáꞌ₂:
―Jag₄ ꞌniaꞌ₂, i₂në₅ bá₄ Guein₂ Jáꞌ₂ Chaꞌ₂ quián₅ Diú₄.
37 Jaun₂ ca₂nág₂ le₃on₃ dsa₂ ꞌéi₂ a₂ca₂juáꞌ₂, jaun₂ i₃léin₂ chi₁coꞌ₅₄ quióꞌ₅ Jesús.
38 Jaun₂ në́₃ ca₂jénꞌ₃ Jesús të₂le₃ caꞌ₃, ca₂jɨ́in₂ dsa₂ i₂i₃lén₂ chi₁coꞌ₅₄ quióꞌ₅, jaun₂ ca₂juáꞌ₂ ca₂tsɨ́ꞌ₃ ꞌéi₂:
―¿ꞌE₂ ꞌnáuꞌ₂ ꞌniaꞌ₂?
Jaun₂ ca₂juáꞌ₂ dsa₂ ꞌéi₂ ca₂tsɨ́ꞌ₃ Jesús:
―Rabbí ―co₂ꞌnióꞌ₄ le₃juaꞌ₅₄: Të₅―, ¿Jáꞌ₄ ŋéiꞌ₂ ꞌne₂?
39 Jaun₂ ca₂ŋag₃ Jesús:
―I₂nóꞌ₅ ꞌniaꞌ₂ i₂jag₄.
Jaun₂ i₃léin₂ i₁jag₅₄ jáꞌ₄ guá₅ Jesús, jaun₂ quianꞌ₅₄ ꞌéi₂ bá₄ ca₂tóinꞌ₂ të₁liaꞌ₂ ca₂ꞌláu₂ jmɨg₄ jaun₂; ia₁ jme₁ma₂ca₂të́₂ conꞌ₂ hora ŋí₁ quén₂ të₂le₃ ca₂ꞌláu₂.g
40 Jan₂ i₂on₃ ꞌéi₂ i₂ca₂nág₂ a₂ca₂juáꞌ₂ Juan₅₄, i₂i₃lén₂ chi₁coꞌ₅₄ quióꞌ₅ Jesús, jme₁chen₂ Drë́₄ i₂lɨ́n₅ rɨnꞌ₅₄ Si₂mu₅₄ i₂të́ꞌ₂ dsa₂ Pe₄.
41 Dsɨ₂juɨ₅ néꞌ₃ guë́₄ jaun₂ bá₄ ŋe₄ Drë́₄, i₁ꞌnaiꞌ₂ Si₂mu₅₄ rɨinꞌ₅₄, jaun₂ ca₂juáꞌ₂ ca₂tsɨ́ꞌ₃ ꞌéi₂:
―Ma₂dsánꞌ₅ jniaꞌ₅₄ Mesías, (co₂ꞌnióꞌ₄ le₃juaꞌ₅₄, dsa₂ I₂rë₂ꞌɨ́n₁ quián₅ Diú₄).
42 Jaun₂ i₁jŋia₃ Drë́₄, Si₂mu₅₄ rɨinꞌ₅₄ ja₁ꞌen₅₄ Jesús, jaun₂ jme₁ca₂jág₂ Jesús në́₃, ca₂juáꞌ₂:
―ꞌNe₂ lɨ́ngꞌ₅ Si₂mu₅₄, ja₁ŋiꞌ₅₄ Jonás. La₁ia₁ le₃chengꞌ₂ Cefas.
Liaꞌ₂ chen₂ Cefas në₅, co₂ꞌnióꞌ₄ le₃juaꞌ₅₄ Pe₄.h
Të́ꞌ₂ Jesús Felipe quianꞌ₅₄ Natanael
43 Jme₁jnia₃ jaun₂, ca₂lë₃ dsɨ́₅ Jesús dsó₃ ꞌuë₃ Galilea, jaun₂ ca₂dsáinꞌ₂ Felipe, jaun₂ ca₂juáꞌ₂ ca₂tsɨ́ꞌ₃ ꞌéi₂:
―Jme₁quiongꞌ₅₄ jniá₂.
44 Felipe ꞌéi₂ në́₃, jme₁chain₂ juɨg₂ Betsaida, ján₃ bá₄ ja₁jme₁chan₂ Drë́₄ quianꞌ₅₄ Pe₄ në́₃.
45 Fe₂li₄ ꞌéi₂ në́₃, ŋei₅₄ i₁ꞌniaiꞌ₂ Natanael, jaun₂ ca₂juáꞌ₂ ca₂tsɨ́ꞌ₃ ꞌéi₂:
―Ma₂dsánꞌ₅ jniaꞌ₅₄ dsa₂ ꞌéi₂ i₂ꞌɨn₅ Moisés ne₄ Si₂ ꞌÉiꞌ₃, i₂ꞌɨn₅ dsa₂ i₂ꞌë́₂ jág₁ quián₅ Diú₄ në́₃. Jesús bá₄ ꞌéi₂, ja₁ŋiꞌ₅₄ José, i₂chan₂ juɨg₂ Nazaret.
46 Jaun₂ ca₂juáꞌ₂ Natanael:
―¿Lé₂ le₃o₃ꞌag₅ caun₂ a₂dse₃ juɨg₂ Nazaret?
Jaun₂ ca₂ŋag₃ Fe₂li₄:
―Ŋia₅ deꞌ₂ i₂jag₄.
47 Jaun₂ jme₁ca₂jág₃ Jesús a₂ma₂ja₂quián₃ Natanael, ca₂juáꞌ₂:
―La₂ dé₄ dsónꞌ₂ já₅ jan₂ dsa₂ israelita të₃dsónꞌ₂, i₂tsá₃ cha₂ mai₅₄ ja₁con₂.
48 Jaun₂ ca₂ŋag₃ Natanael ca₂ŋɨ́iꞌ₃ Jesús:
―¿ꞌA₂ liaꞌ₂ cuɨgꞌ₂ jniá₂?
Jaun₂ ca₂juáꞌ₂ Jesús:
―Jniá₂ në₂jɨng₅₄ ꞌne₂ jŋiá₅, néꞌ₃ guë́₄ a₂dsɨ₃té₂ Fe₂li₄, liaꞌ₂ conꞌ₂ jme₁ŋéiꞌ₂ néꞌ₃ nɨ₁ꞌma₂ higuera.
49 Jaun₂ në́₃ ca₂juáꞌ₂ Natanael ca₂tsɨ́ꞌ₃ Jesús:
―Të₅, ꞌne₂ bá₄ lɨ́ngꞌ₅ Ja₁ŋiꞌ₅₄ Diú₄; ꞌne₂ bá₄ lɨ́ngꞌ₅ Rag₅₄ quián₅ dsa₂ juɨg₂ Israel*.
50 Jaun₂ ca₂ŋag₃ Jesús ca₂tsɨ́ꞌ₃ ꞌéi₂:
―¿A₁jaun₂ ꞌéngꞌ₂ ia₁ në₂juáꞌ₃ a₂në₂jɨn₄ jniá₂ ꞌne₂, ŋéiꞌ₂ néꞌ₃ nɨ₁ꞌma₂ higuera? La₁ia₁ në₃ guë́₄ të₃ neꞌ₅₄ ꞌlióng₂ léi₄ juëꞌ₂ guë́₄ conꞌ₂ guë́₄ a₂la₂.
51 Ján₃ bá₄ ca₂juáꞌ₂ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, jagꞌ₅₄ ꞌniaꞌ₂ rë₂na₄ gueiꞌ₅₄ i₂juɨ́g₃, jɨnꞌ₅₄ ꞌniaꞌ₂ ángeles* quián₅ Diú₄ në́₃, qui₂tsau₂ qui₂tsɨ₂sioin₂ ne₄ Jaun₅* dsa₂ mɨ₂güɨ́g₃.