ꞌË́₂ Juan₅₄ jág₁ caun₂ ꞌuë₃ quein₂ ja₁co₂ꞌŋiog₅
3
Jmɨg₄ jaun₂ guan₃ Juan₅₄ i₂chon₅ dsa₂ jmɨg₂, caun₂ ꞌuë₃ quein₂ co₂ꞌŋiog₅ ja₁tén₄ ꞌuë₃ Judea, a₂ꞌë́₂ jág₁,
2 a₂juáꞌ₂:
―Jeinꞌ₅₄ ꞌniaꞌ₂ ꞌauꞌ₂, ia₁ ma₂ja₂quián₃ jmɨg₄ jë₁gon₃ Diú₄.
3 Juan₅₄ la₂ bá₄ ꞌéi₂ i₂ca₂ꞌɨn₃ Isaías i₂jme₁juáꞌ₂ o₄quióꞌ₄ Diú₄ jme₁ca₂tóꞌ₂ ne₄ si₂ a₂juáꞌ₂ le₂la₂:
Néꞌ₂ a₂táun₂ dsa₂ tiá₂ jág₁
caun₂ ꞌuë₃ quein₂ ja₁co₂ꞌŋiog₅, a₂juáꞌ₂:
“Jmo₄ ꞌniaꞌ₂ co₂jŋia₅₄ juɨ₅ quióꞌ₅ Te₁guiꞌ₅₄;
nia₄ ꞌniaꞌ₂ caun₂ juɨ₅ co₂dsau₅.”a
4 Nɨ₁tsɨnꞌ₅₄ Juan₅₄ ꞌéi₂ jme₁lë́₄ ꞌmɨꞌ₂ a₂rë₂ta₄ quianꞌ₅₄ jŋi₄ jáꞌ₂ camello*; a₂jme₁jénꞌ₅ túꞌ₅ guëꞌ₂ quianꞌ₅₄ lo₄ jáꞌ₂; má₃ a₂jme₁guë́ꞌ₅ guëꞌ₂, jmáꞌ₃ i₁nɨꞌ₂ tia₄ quianꞌ₅₄ jmɨ₁táꞌ₄ cha₂ ja₁nau₂.
5 Jme₁ja₂lén₂ dsa₂ chan₂ Jerusalén, quianꞌ₅₄ dsa₂ i₂tiánꞌ₅ ꞌuë₃ Judea quianꞌ₅₄ dsa₂ i₂tiánꞌ₅ cau₅ Cuá₃ Jordán në́₃, jme₁qui₂ja₂néi₃ jág₁ a₂cuë₅ ꞌéi₂.
6 Jme₁ma₂ca₂lë₃ jmo₂₃ qui₂ŋí₃ quióꞌ₅ ne₄ Diú₄ ca₂le₃jë́₃ dso₄ a₂qui₂rë₂cáinꞌ₄, jaun₂ guë́₄ ca₂cho₃ Juan₅₄ jmɨg₂b Cuá₃ Jordán.
7 La₁ jme₁ca₂jág₃ Juan₅₄ juɨn₅ lɨn₃ dsa₂ fariseos* ja₂lén₂ quianꞌ₅₄ dsa₂ saduceos* në́₃, a₂mɨ₂₃ cho₃ Juan₅₄ jmɨg₂,c jaun₂ ca₂juáꞌ₂ Juan₅₄:
―¡ꞌNiaꞌ₂ tsɨ₁jon₂ dsɨ₂mɨꞌ₂! ¿ꞌEin₂ bá₄ në₂chíꞌ₃ ꞌniaꞌ₂ a₂cuɨngꞌ₂ longꞌ₅₄ a₂ꞌi₄ ꞌnei₂ dsɨ́₅ Diú₄ a₂ja₂quián₃?
8 Jmo₄ ꞌniaꞌ₂ jaun₂ juɨ₁le₂jniá₂ a₂léi₄ të₃dsónꞌ₂ a₂ma₂ca₂jeinꞌ₅₄ ꞌniaꞌ₂ ꞌauꞌ₂.
9 Tsá₃ o₁lenꞌ₂ ꞌniaꞌ₂ juaꞌ₅₄ lé₂ le₃juaꞌ₅₄ ꞌniaꞌ₂: “Lág₅ jniaꞌ₅₄ tsɨ₁jon₂ Abraham”; ia₁ jniá₂ juáꞌ₅, ca₂të₂ nɨ₁cang₁ tioꞌ₅₄ la₂, lé₂ le₃jmo₃ Diú₄ jmóiꞌ₂ tsɨ₁jon₂ Abraham.
10 Ia₁ ma₂lë́₅ co₂jŋia₅₄ ŋi₁dsi₁ a₂qui₂uɨ́nꞌ₂ ꞌma₂. Ca₂le₃jë́₃ ꞌma₂ a₂tsá₃ dse₃ mɨ́g₂ ꞌag₅, uɨ́nꞌ₂ bá₄, dsɨ₂toꞌ₅₄ si₂.
11 Jniá₂ në́₃, dsau₅ bá₄ në₂tiáng₃ ꞌniaꞌ₂ jmɨg₂ co₂ꞌnióꞌ₄ a₂jángꞌ₅ léi₄ a₂jeinꞌ₅₄ ꞌniaꞌ₂ ꞌauꞌ₂; la₁ i₂já₅ chi₁coꞌ₅₄ quió₃ në́₃, ꞌéi₂ bá₄ i₂ꞌuanꞌ₂ guë́₄ liaꞌ₂ conꞌ₂ guë́₄ jniá₂, ca₂liaꞌ₂ jŋiaꞌ₅₄ lau₂ ton₅ tag₅₄ bá₄ tsá₃ ca₂tɨ́ng₂ i₁quian₃. ꞌÉi₂ guë́₄ në́₃, tióg₂ Jme₂dsí₂ Jŋió₅, dsi₂si₂ në́₃.
12 Në₂jag₄ bá₄ a₂ma₂chi₁chanꞌ₂ ŋí₁ a₂quióꞌ₅ mɨ́g₂ trigo, dsia₃ jma₃quén₅ quianꞌ₅₄ jme₁qui₅. Jmáꞌ₃ mɨ́g₂ bá₄ cágꞌ₃, ꞌma₃ dsi₂néi₂, la₁ qui₂dsɨ́ꞌ₂ bá₄ jme₁qui₅ dsi₂si₂ ja₁tsá₃ ma₃o₁lɨ́gꞌ₂ jmɨg₄ éi₃.d
Ca₂jŋó₂ Jesús jmɨg₂
13 Jaun₂ në́₃, Jesús, o₂ꞌɨ́in₃ ꞌuë₃ Galilea, ca₂dsióg₃ të₂ Cuá₃ Jordán ia₁jaun₂ cho₃ Juan₅₄ jmɨg₂.e
14 Tsá₃ jme₁gue₅ Juan₅₄ le₂ꞌuɨg₅₄, jaun₂ ca₂juáꞌ₂ tsɨ́ꞌ₅ Jesús:
―Jniá₂ bá₄ i₂ꞌnióꞌ₅ quió₃ tsónꞌ₄ ꞌne₂ jmɨg₂.f ¿ꞌA₂ bá₄ liaꞌ₂ ꞌne₂ ŋeꞌ₃ ja₁con₂ jniá₂?
15 La₁ ca₂juáꞌ₂ Jesús:
―Juɨ₁le₅₄ bá₄ le₂në₅ të₂në₃, ia₁ dsi₂ten₅₄ deꞌ₂ jmó₁ jniog₄ le₂në₅ ia₁jaun₂ jme₁ti₁ ca₂le₃jë́₃ a₂dse₃.
Jaun₂ bá₄ ca₂gue₃ Juan₅₄.
16 Jme₁ma₂lë₅ cho₅ Juan₅₄ jmɨg₂,g jaun₂ ca₂o₃ꞌɨ́n₃ Jesús dsi₂jmɨg₂. Jaun₂ dsɨ₂juɨ₅ le₂jaun₂ ca₂niá₃ dsɨ₄ mɨ₂güɨ́g₃ ca₂lë₃, jaun₂ ca₂jɨ́n₂ Jesús Jme₂dsí₂ quián₅ Diú₄ ca₂sión₃ ne₄ quióꞌ₅, i₂lɨ́n₅ liaꞌ₂ lɨ́n₅ jan₂ i₁ju₂.
17 Jaun₂ ca₂néꞌ₂ jág₁ gueiꞌ₅₄ a₂ca₂juáꞌ₂:
―I₂la₂ bá₄ jón₃ quiáng₃ i₂ŋɨ́₄ lë₃ ꞌnióg₃ guë́₄ lɨn₃. ꞌE₂ bá₄ ꞌŋio₂ dsɨ₃ quiainꞌ₅₄.