Ca₂o₃lén₂ dsa₂ canꞌ₅₄ i₂dsi₂ jág₁
2
Ca₂rë₃chán₃ Jesús jë₄ juɨg₂ Belén, ja₁tén₄ ꞌuë₃ Judea, jmɨg₄ liaꞌ₂ conꞌ₂ jme₁lɨ́n₄ Herodes rag₅₄ ꞌuë₃ jaun₂. Jaun₂ ca₂o₃lén₂ co₂nióꞌ₃ dsa₂ i₂chan₂ uɨ́ng₂ të₂le₃ ja₁ꞌia₂a ꞌiog₂, jaun₂ ca₂dsi₃léin₂ juɨg₂ Jerusalén.
2 Jaun₂ ca₂ŋag₃:
―¿Na₅ Rag₅₄ quián₅ dsa₂ judíos* i₂ca₂rë₃chán₃? Ia₁ ꞌuë₃ të₂le₃ ja₁ꞌŋia₂ ꞌiog₂, ma₂në₂jɨn₄ jniaꞌ₅₄ nei₅ quiáin₅, jaun₂ ja₂náu₅ jniaꞌ₅₄ a₂jme₁juɨinꞌ₂.
3 Jme₁ca₂rë₃ŋi₅ Rag₅₄ Herodes jág₁ në₅, ꞌŋio₅ lɨn₃ tsá₃ ma₃tei₄ ca₂ꞌág₂ dsɨ́₅, ján₃ bá₄ le₂jaun₂ ca₂le₃jɨ́n₃ dsa₂ juɨg₂ Jerusalén.
4 Jaun₂ në́₃ ca₂të́ꞌ₃ rag₅₄ ca₂le₃jɨ́n₃ juɨg₅₄ jme₂dsa₂ quianꞌ₅₄ ca₂le₃jɨ́n₃ të₅juáꞌ₅ quián₅ dsa₂, jaun₂ ca₂ŋag₃ a₂jáꞌ₄ dsónꞌ₂ lë́₅ jág₁ le₃chan₂ dsa₂ I₂rë₂ꞌɨ́n₁* quián₅ Diú₄.
5 Jaun₂ ca₂juáꞌ₂ dsa₂ ꞌéi₂:
―Juɨg₂ Belén, ja₁tén₄ ꞌuë₃ Judea. Ia₁ le₂la₂ ca₂tóꞌ₂ ne₄ si₂ dsa₂ i₂jme₁ꞌë́₂ jág₁ o₄quióꞌ₄ Diú₄:
6 Jaun₂ ꞌne₂, Belén, juɨg₂ tén₅ ꞌuë₃ Judá,
on₃juaꞌ₅₄ ꞌne₂ lɨ́ngꞌ₅ juɨg₂ i₂meꞌ₂ guë́₄
të₂le₃ ne₄ juɨ₁liaꞌ₂ dsa₂ i₂qui₂dsɨ₅ ꞌéiꞌ₃ ꞌuë₃ në₅;
ia₁ ja₁conꞌ₂ ꞌne₂ bá₄ o₃ꞌɨn₅ jan₂
i₂gon₂, cán₂ ne₄ juɨ₅,
jmo₃ ꞌí₁ dsa₂ juɨg₂ Israel* quiáng₃.b
7 Jaun₂ Herodes në́₃ ca₂të́ꞌ₃ dsa₂ canꞌ₅₄ ꞌéi₂ conꞌ₂ jë₄ të₃coꞌ₅₄, jaun₂ ca₂ŋag₃ lɨ́gꞌ₂ ꞌe₂ jmɨg₄ të₃dsónꞌ₂ ca₂rë₃jniá₂ nei₅ jaun₂.a
8 Jme₁ma₂në₂ŋag₃ dsa₂ ꞌéi₂ jaun₂ guë́₄ ca₂chei₃ juɨ₅ juɨg₂ Belén, jaun₂ ca₂tsɨ́ꞌ₃ dsa₂:
―O₂nóꞌ₅ ꞌniaꞌ₂ ja₁jaun₂, o₂quion₂ deꞌ₂ ꞌniaꞌ₂ ꞌí₁ rë₂ të₂le₃ quióꞌ₅ chiꞌ₂ bëꞌ₅₄ i₂ꞌɨ́nꞌ₅ ꞌniaꞌ₂ në₅; jaun₂ jë₁ma₂ca₂dsáinꞌ₂ ꞌniaꞌ₂, i₂conꞌ₄ ꞌniaꞌ₂ jág₁ ia₁jaun₂ nei₅₄ jniá₂ ján₃ i₂jme₁juɨinꞌ₂.
9 Jme₁ma₂në₂néi₂ dsa₂ ꞌéi₂ jág₁ quióꞌ₅ rag₅₄, jaun₂ ca₂i₃léin₂. Jaun₂ në́₃, nei₅ a₂ma₂ca₂jág₃a të₂le₃ ꞌuë₃ ja₁ꞌia₂a ꞌiog₂, ca₂ŋó₃ ne₄ juɨ₅ quióꞌ₅, ca₂liaꞌ₂ ca₂ꞌág₂ tei₄ ne₄ ja₁jme₁ꞌen₅₄ guein₂.
10 Jme₁ca₂jág₃ jaun₂,c ca₂jmo₃ ꞌioꞌ₂ ꞌŋio₅ lɨn₃;
11 jaun₂ jme₁ca₂i₃toinꞌ₅₄ dsi₂néi₂, ca₂jɨ́in₂ guein₂ bëꞌ₅₄ quiainꞌ₅₄ chog₅₄ i₂chen₂ María. Jaun₂ në́₃, ca₂chi₃jné₃ ca₂jme₃juɨinꞌ₂ guein₂. Jaun₂ dsɨ₂juɨ₅ le₂jaun₂ qui₂ca₂niá₃ tsɨ₁gu₅ quióꞌ₅, ca₂cuë₃ cu₄nióg₄, chen₂, noꞌ₅₄ mirra* në́₃.
12 Cang₂ guë́₄ jaun₂ ca₂quɨ₃ dsa₂ ꞌéi₂ a₂ca₂jmo₃ Diú₄ jág₁ a₂tsá₃ ma₃dsɨ₃lein₃ juɨ₅ ja₁con₂ Rag₅₄ Herodes, jaun₂ juɨ₅ siáꞌ₂ bá₄ ca₂i₃lein₃ juɨ₅ go₅₄.
Ca₂cuɨng₃ Së́₄ quiainꞌ₅₄ María juɨ₅ ꞌuë₃ Egipto
13 Cang₂ guë́₄ jaun₂, jme₁ma₂i₂len₃ dsa₂ canꞌ₅₄ ꞌéi₂, ca₂quɨ₃ Së́₄ a₂ca₂jme₃jnia₅ jan₂ ángel quián₅ Te₁guiꞌ₅₄ ja₁coin₂, a₂ca₂juáꞌ₂:
―Nau₂, jŋia₅ i₂bëꞌ₅₄ quiángꞌ₂, chog₅₄ në́₃, cuɨng₅ ꞌniaꞌ₂ juɨ₅ ꞌuë₃ Egipto. Ja₁jaun₂ o₂ꞌú₅ ca₂liaꞌ₂ ca₂juáꞌ₃ jniá₂. Ia₁ ꞌnauꞌ₂ Herodes ꞌnaiꞌ₂ guein₂ a₂jŋagꞌ₃.
14 A₂ca₂nau₂ jaun₂ Së́₄, ca₂tág₃ guein₂ quianꞌ₅₄ chog₅₄ a₂ꞌuë₂ jaun₂, ca₂i₃léin₂ juɨ₅ Egipto.
15 Ja₁jaun₂ ca₂tóinꞌ₂ ca₂liaꞌ₂ ca₂jon₃ Herodes. Ca₂lë₃ le₂në₅ ia₁jaun₂ le₃ti₃ jág₁ a₂ca₂juáꞌ₂ Te₁guiꞌ₅₄ të₂le₃ quianꞌ₅₄ dsa₂ i₂jme₁ꞌë́₂ jág₁ o₄quióꞌ₄, jme₁ca₂juáꞌ₂: “Të₂ Egipto bá₄ ca₂të₃ jniá₂ jón₃ quiáng₃.”d
Jmo₅ Herodes ꞌéiꞌ₃ a₂jme₃dsiain₂₃ guein₂
16 Jme₁ca₂rë₃líꞌ₄ Herodes ca₂jme₃gau₅ dsa₂ canꞌ₅₄ ꞌéi₂ quióꞌ₅, ca₂rë₃ꞌnéi₃ ꞌŋio₅ lɨn₃. Jaun₂ ca₂chein₃ dsa₂ a₂jme₃dsiain₂₃ ca₂le₃jɨ́n₃ guein₂ i₂conꞌ₂ ma₂tionꞌ₅₄ tɨn₃ ŋi₂, guein₂ i₂píꞌ₁ guë́₄ në́₃ i₂chan₂ ma₂quián₅ Belén, liaꞌ₂ conꞌ₂ tí₅ ma₂ne₁ŋó₄ jmɨg₄ a₂ca₂juáꞌ₂ dsa₂ canꞌ₅₄ ꞌéi₂.
17 Jaun₂ le₂në₅ ca₂rë₃ti₃ jág₁ a₂ca₂tóꞌ₂ ne₄ si₂ Jeremías i₂jme₁ꞌë́₂ jág₁ o₄quióꞌ₄ Diú₄:
18 Ca₂néꞌ₂ të₁tsɨꞌ₅₄ co₂mɨꞌ₅₄ jë₄ juɨg₂ Ramá,
a₂ꞌo₅ dsa₂ a₂quɨꞌ₂ dsɨ́₅ guë́₄ lɨn₃;
Raquel bá₄ ꞌéi₂ ca₂ꞌo₃e
o₄quióꞌ₄ chiꞌ₂-guein₂ quiáin₅,
jaun₂ tsá₃ ca₂gue₃ juaꞌ₅₄ ꞌein₂ guë́₃ jmo₃ liánꞌ₂ dsɨ́₅,
ia₁ ma₂ca₂dsan₃ bá₄ guein₂.f
19 La₁ cang₂ guë́₄ jaun₂, jme₁ma₂ca₂jon₃ Herodes, ca₂quɨ₃ Së́₄ a₂ca₂jme₃jnia₅ táng₃ jan₂ ángel quián₅ Te₁guiꞌ₅₄ ja₁coin₂ ꞌein₅₄ Egipto,
20 Ca₂juáꞌ₂ ángel:
―Nau₂, jŋia₅ táng₃ i₂bëꞌ₅₄ quiángꞌ₂, chog₅₄ në́₃, jaun₂ o₂nóꞌ₅ táng₃ ꞌniaꞌ₂ juɨ₅ ꞌuë₃ Israel*, ia₁ ma₂ca₂dsan₃ bá₄ i₂jme₁ꞌnio₃ jme₁jŋɨꞌ₃ guein₂.
21 A₂ca₂nau₂ jaun₂ táng₃ Së́₄, ca₂tág₃ chiꞌ₂ quiáin₅, quianꞌ₅₄ chog₅₄, juɨ₅ ꞌuë₃ Israel.
22 La₁ jme₁ca₂rë₃ŋi₅ Së́₄ a₂ma₂lɨ́n₅ ta₁ Arquelao ꞌuë₃ Judea, ta₁ a₂jme₁lɨ́n₄ Herodes jmei₂, jaun₂ ca₂rë₃góꞌ₅ dsó₃ ja₁jaun₂. Ia₁ ca₂ꞌë́₂ táng₃ Diú₄ jág₁ jë₄ quɨ₂₃, jaun₂ juɨ₅ ꞌuë₃ Galilea bá₄ ca₂ŋó₃.
23 Jme₁ca₂dsióg₃ ja₁jaun₂, ca₂ŋó₃ ca₂i₁gua₂ juɨg₂ ja₁chei₂ Nazaret. Le₂në₅ bá₄ ca₂rë₃ti₃ jág₁ quióꞌ₅ dsa₂ i₂ca₂ꞌë́₂ jág₁ quián₅ Diú₄ ma₂lɨ́gꞌ₂: “A₂quiong₃ dsa₂ nazareno.”