Ca₂jenꞌ₂ gu₂ dsa₂ jë₄ juɨg₂ Caná juɨg₂ tén₅ Galilea
2
ꞌNɨ₅ jmɨg₄ cang₂ guë́₄ jaun₂, ca₂nio₃ jmɨg₄ ca₂jenꞌ₂ gu₂ dsa₂ jë₄ juɨg₂ Caná, a₂niog₅ ꞌuë₃ Galilea. Ja₁jaun₂ jme₁ꞌen₅₄ chog₅₄ Jesús në́₃;
2 ján₃ bá₄ ca₂të́ꞌ₃ dsa₂ Jesús quiainꞌ₅₄ dsa₂ i₂quiainꞌ₅₄, ja₁jenꞌ₂ gu₂ dsa₂ jaun₂.
3 Jme₁ca₂dsa₃ vino, jaun₂ ca₂juáꞌ₂ chog₅₄ Jesús ca₂tsɨ́ꞌ₃ ꞌéi₂:
―Tsá₃ ma₃cha₂ vino quióꞌ₅ dsa₂ tioinꞌ₅₄.
4 La₁ ca₂ŋag₃ Jesús:
―ꞌIo₅₄, ¿ꞌe₂ lë₃ juɨgꞌ₂ jniá₂ a₂në₅? Ia₁ tsá₃ ma₂të́₂ guë́₄ hora quió₃.
El milagro en Caná (Juan 2.1-12)
5 La₁ ca₂juáꞌ₂ chog₅₄ ca₂tsɨ́ꞌ₃ dsa₂ i₂tionꞌ₅₄ tiaꞌ₅:
―Jmo₄ ꞌniaꞌ₂ chi₂ꞌe₂ juáꞌ₂ i₂në₅.
6 Jme₁tióng₂ ja₁jaun₂ jŋéi₂ tɨꞌ₂ cang₄, juɨ₁liaꞌ₂ a₂jme₁jmóꞌ₂ dsa₂ judíos* ta₁ a₂jme₁qui₂jmo₂₃ le₁jɨ́in₃, conꞌ₂ lë́₅ tag₄ jme₁chíꞌ₄ quióꞌ₅. Liaꞌ₂ caun₂ nɨ₁tɨꞌ₂ cang₄ jaun₂ ꞌa₄ conꞌ₂ të₂láu₃-guiá₂, o₃ caun₂ ꞌŋiá₂-láu₂ litro jmɨg₂.
7 Jaun₂ ca₂juáꞌ₂ Jesús ca₂tsɨ́ꞌ₃ dsa₂ i₂tiaꞌ₅:
―Jme₁canꞌ₂ ꞌniaꞌ₂ nɨ₁tɨꞌ₂ tióng₂ la₂ quianꞌ₅₄ jmɨg₂.
―Në₃ në́₃, dsen₅₄ ca₂juɨg₄, o₂can₄ ne₄ dsa₂ i₂niog₅ ne₄ jmɨg₄.
Jaun₂ i₁can₅ dsa₂.
9 Dsa₂ i₂niog₅ ne₄ jmɨg₄ jaun₂, ca₂tí₂ ꞌo₅₄ jmɨg₂ a₂ca₂lë₃ vino jaun₂, të₃ tsá₃ ŋi₅ a₂jáꞌ₄ já₃; jŋiaꞌ₅₄ liaꞌ₂ dsa₂ i₂ca₂dsen₅ jmɨg₂ bá₄ jme₁ŋi₅. Jaun₂ në́₃ ca₂të₃ dsa₂ i₂niog₅ ne₄ jmɨg₄, ca₂të́ꞌ₃ dsa₂ ŋeꞌ₂ i₂jenꞌ₂ gu₂,
10 jaun₂ ca₂tsɨ́ꞌ₃ ꞌéi₂:
―Ca₂le₃jɨ́n₃ bá₄ dsa₂ tɨin₂₃ tiaꞌ₃ le₂ꞌuɨg₅₄ vino dse₃, jaun₂ jë₁ma₂le₁ꞌen₅ dsa₂, jaun₂ guë́₄ tiaꞌ₃ vino ga₂. La₁ ꞌne₂ në́₃ në₂ꞌmaꞌ₅₄ vino dse₃ ca₂të₂ jë₁ca₂tóꞌ₂.
11 Jë₄ juɨg₂ Caná a₂tén₅ ꞌuë₃ Galilea jaun₂, ca₂jmo₃ Jesús léi₄ juëꞌ₂ le₂ꞌuɨg₅₄. Le₂në₅ ca₂jme₃jniai₂₃ ꞌein₂ lɨ́in₅ të₂le₃ quianꞌ₅₄ juɨ₅bí₂ quióꞌ₅, jaun₂ ca₂rë₃ꞌén₂ chiꞌ₂ dsɨ₂guia₃-tɨ́n₂ quiáin₅.
12 Cang₂ guë́₄ jaun₂ ca₂ŋó₃ jë₄ juɨg₂ Capernaum, liaꞌ₂ jma₃quiainꞌ₅₄ chog₅₄, rɨinꞌ₅₄, chiꞌ₂ dsɨ₂guia₃-tɨ́n₂ quiáin₅ në́₃; ja₁jaun₂ ca₂tóinꞌ₂ tɨn₃-ꞌnɨ₅ jmɨg₄.
Ca₂chí₃ Jesús i₁dsi₅ guáꞌ₅
13 Jme₁ma₂ja₂quián₃ Jmɨg₄ Të₂ꞌɨn₅₄* quióꞌ₅ dsa₂ judíos*, jaun₂ ca₂uɨ́g₂ Jesús juɨ₅ Jerusalén.
Jesús en el patio del templo (Juan 2.13-25)
14 Ja₁jaun₂ ca₂dsáinꞌ₂ i₁dsi₅ guáꞌ₅ templo* dsa₂ i₂ꞌnɨ₅ ca₁juɨ₅, i₂ꞌnɨ₅ jáꞌ₂ chaꞌ₂, i₂ꞌnɨ₅ i₁ju₂ në́₃, quianꞌ₅₄ dsa₂ i₂qui₂jme₂tsɨ́n₃ cu₄ quióꞌ₅ dsa₂.
15 Jme₁ca₂jág₃ Jesús a₂jaun₂, ca₂jmo₃ caun₂ látigo a₂lë́₅ quianꞌ₅₄ tsɨ₁ꞌnei₅₄, jaun₂ ca₂ꞌuɨ́inꞌ₂ ca₁ꞌné₄ ca₂le₃jɨ́n₃ i₂tionꞌ₅₄ i₁dsi₅ liaꞌ₂ jma₃quiainꞌ₅₄ jáꞌ₂ chaꞌ₂ quiáin₅, ca₁juɨ₅ në́₃. Ca₂jein₃ ꞌuë₃ cu₄ quióꞌ₅ dsa₂ i₂jme₂tsɨ́n₃ cu₄, qui₂ca₂jéinꞌ₃ nɨ₁mesa në́₃.
16 Jaun₂ ca₂tsɨ́ꞌ₃ i₂ꞌnɨ₅ i₁ju₂:
―¡ꞌUëꞌ₅₄ ꞌniaꞌ₂ ca₂le₃jë́₃ a₂në₅ ja₁lá₃! ¡Tsá₃ lë₁jmo₂ ꞌniaꞌ₂ ja₁ꞌmaꞌ₅₄ ja₁quióꞌ₄ Ŋeꞌ₃!
17 Jaun₂ ca₂dsáuꞌ₃ dsɨ́₅ dsa₂ i₂jme₁quiainꞌ₅₄, a₂chi₁ton₅ ne₄ Si₂ le₂la₂:
Në₂jag₄ bá₄ a₂ca₂cóng₂ ꞌuɨg₅₄ ia₁ a₂ŋɨ́₄ lë₃ dsíꞌ₅ dsɨ₃
o₄quióꞌ₄ dsi₂néi₂ quiángꞌ₂.a
18 Jaun₂ në́₃ ca₂ŋag₃ dsa₂ judíos ca₂ŋɨ́iꞌ₃ Jesús:
―¿ꞌE₂ léi₄ le₃ꞌë́ꞌ₂ jniaꞌ₅₄ a₂jángꞌ₅ jág₁ dsau₅ a₂ca₂tɨ́nꞌ₂ ꞌne₂ jmóꞌ₂ le₂në₅?
19 Jaun₂ ca₂ŋag₃ Jesús:
―ꞌÉn₂ ꞌniaꞌ₂ guáꞌ₅ la₂, jaun₂ tsɨꞌ₅₄ táng₃ jniá₂ quianꞌ₅₄ ꞌnɨ₅ jmɨg₄.
20 Jaun₂ në́₃ ca₂juáꞌ₂ dsa₂ judíos ca₂tsɨ́ꞌ₃ Jesús:
―Të₂láu₃-jŋéi₂ ŋi₂ ca₂rë₃ꞌɨ́n₅ dsa₂ jme₁ca₂chiꞌ₃ guáꞌ₅ la₂. ¿ꞌEn₁ jmáꞌ₃ jaun₂, lé₂ le₃jmogꞌ₅₄ tsɨꞌ₅₄ quianꞌ₅₄ ꞌnɨ₅ jmɨg₄?
21 La₁ia₁ guáꞌ₅ a₂ꞌë₅ Jesús jaun₂, nɨ₁ŋɨ₄ ꞌŋiog₅ bá₄ Jesús ꞌë₂₃.
22 Jaun₂ lë₃, liaꞌ₂ conꞌ₂ jme₁ca₂jenꞌ₅₄ Jesús a₂jme₁rë₂ꞌlɨin₅₄, ca₂dsáuꞌ₃ dsɨ́₅ chiꞌ₂ dsɨ₂guia₃-tɨ́n₂ quiáin₅ jág₁ jaun₂. Jaun₂ ca₂rë₃ꞌéin₂ jág₁ a₂juáꞌ₂ ne₄ Si₂ quióꞌ₅ Diú₄, quianꞌ₅₄ jág₁ a₂jme₁ca₂juáꞌ₂ Jesús jaun₂.
I₂cuɨn₅ bá₄ Jesús ca₂le₃jɨ́n₃ dsa₂
23 Liaꞌ₂ conꞌ₂ jme₁ꞌen₅₄ Jesús Jerusalén Jmɨg₄ Të₂ꞌɨn₅₄, ca₂rë₃ꞌén₂ juɨn₅ lɨn₃ dsa₂ të₂le₃ quióꞌ₅ Jesús, jme₁ca₂jág₃ léi₄ a₂ma₂qui₂ma₂jmo₃.
24 La₁ tsá₃ jme₁ꞌén₂ Jesús quióꞌ₅ dsa₂ ꞌéi₂, ia₁ i₂cuɨin₂₃ bá₄ ca₂le₃jɨ́n₃ dsa₂, ꞌa₂ liaꞌ₂ lë́₅ të₂dsɨ́₅.
25 Tsá₃ ꞌe₂ ca₂rë₃ꞌnióꞌ₅ quióꞌ₅, juaꞌ₅₄ a₂jángꞌ₃ dsa₂ jág₁ dsau₅ juɨ₁liaꞌ₂ quióꞌ₅ ꞌi₁jan₂, ia₁ ma₂ŋi₅ rë₂ bá₄ Jesús ꞌe₂ a₂qui₂dsɨ₂jŋia₅ dsɨ́₅ dsa₂ mɨ₂güɨ́g₃.