Jesús quianꞌ₅₄ Zaqueo
19
Ca₂ꞌí₃ Jesús juɨg₂ Jericó. Jaun₂ jme₁ma₂ŋó₅ jë₄ juɨg₂,
San Lucas 19:1-27
2 ja₁jaun₂ jme₁chan₂ jan₂ dsa₂ cha₂ cu₄ i₂chen₂ Zaqueo, i₂lɨ́n₅ dsa₂ juɨnꞌ₂ quián₅ dsa₂ i₂cán₂ ꞌliaꞌ₅₄ quián₅ dsɨ₂tan₅₄.
3 ꞌÉi₂ në́₃, jme₁ꞌnoꞌ₂ juɨ₅ jɨ́in₂ ꞌein₂ ꞌéi₂ Jesús. La₁ tsá₃ lé₂, ia₁ a₂ŋɨ́₄ lë₃ juɨn₅ dsa₂ tionꞌ₅₄. Ia₁ jan₂ dsa₂ ꞌonꞌ₂ bá₄ ꞌéi₂.
4 Jaun₂ ca₂ŋó₃ co₂chiꞌ₅₄ le₃ne₄ juɨ₅, ca₂uɨ́g₂ gueiꞌ₅₄ caun₂ nɨ₁ꞌma₂ sicómoro,a ia₁ ꞌnio₃ jɨ́in₂ Jesús, ia₁ juɨ₅ jaun₂ jme₁ŋɨ́i₃.
5 Jme₁ca₂dsióg₃ Jesús, jaun₂ ca₂jág₃ gueiꞌ₅₄, jaun₂ ca₂juáꞌ₂:
―Zaqueo, ma₂në₃ sión₅, ia₁ ja₁quiángꞌ₂ ca₂tɨ́ng₂ i₁jŋia₁₂ në₃.
6 Jaun₂ ca₂sióin₃ co₂chiꞌ₅₄, ca₂guei₃ ꞌioꞌ₂ jénꞌ₅.
7 Jme₁ca₂jág₃ dsa₂, jaun₂ ca₂chi₂ca₂ꞌag₃ ca₂juáꞌ₂:
―Dsi₂néi₂ quióꞌ₅ jan₂ dsa₂ cha₂ dsáu₁ bá₄ ŋó₅ i₂jŋia₅₄.
8 Zaqueo në́₃, jme₁ca₂nau₂ ne₅₄ jaun₂ ca₂tsɨ́ꞌ₃ Te₁guiꞌ₅₄:
―Te₁guiꞌ₅₄, dsioꞌ₄ jniá₂ ca₂dsio₄ a₂cha₂ quió₃, cuë́₄ dsa₂ te₂ŋé₂. Ján₃ guëꞌ₂ le₂jaun₂ chi₂juaꞌ₂ ꞌein₂ quióꞌ₅ ma₂ꞌang₃ a₂juɨ₁gang₂, jɨinꞌ₅₄ táng₃ jniá₂ quén₂ ráun₂ lë́₅ guë́₄ co₂jaun₂.
9 Jaun₂ ca₂juáꞌ₂ Jesús:
―Jmɨg₄ në₃ ca₂lón₂ dsa₂ dsi₂néi₂ la₂. Ia₁ ján₃ bá₄ lɨ́in₅ tsɨ₁jon₂ quián₅ Abraham.
10 Ta₁ në₅ já₅ bá₄ Jaun₅* dsa₂ mɨ₂güɨ́g₃, a₂ja₂ꞌniaiꞌ₂ a₂ja₂lioin₅₄ dsa₂ i₂ma₂i₂cónꞌ₅.
Jág₁ jángꞌ₅ léi₄ juɨ₁liaꞌ₂ guia₃ ꞌéiꞌ₃ cu₄ ꞌuaꞌ₂
11 Të₃ tionꞌ₅₄ dsa₂ nag₂₃ jág₁ jaun₂, jaun₂ ca₂juáꞌ₂ táng₃ caun₂ jág₁ jángꞌ₅ léi₄, ia₁ ma₂quián₅ bá₄ dsióg₄ Jerusalén, tonꞌ₂ ia₁ lɨ́n₂ dsa₂ le₃jniá₂ dsɨ₂juɨ₅ jaun₂ ꞌéiꞌ₃ quióꞌ₅ Diú₄.
12 Jaun₂ në́₃ ca₂juáꞌ₂:
―Jme₁chan₂ jan₂ dsa₂ i₂lɨ́n₅ tsɨ₁jon₂ dsa₂ jlánꞌ₁. Ca₂ŋó₃ caun₂ juɨg₂ uɨ́ng₂ ja₁ꞌag₃ dsa₂ a₂léin₂ rag₅₄, jaun₂ guë́₄ jŋióiꞌ₂ táng₃.
13 La₁ néꞌ₃ a₂o₃ꞌɨin₅, ca₂të́ꞌ₃ guian₃ dsa₂ i₂jme₂ti₃ ta₁ ne₅₄. Jaun₂ le₂jan₂ le₂jan₂ ꞌéi₂ ca₂cuë́ꞌ₃ jma₃cáun₃ cu₄ ꞌuaꞌ₂ a₂chei₂ mina.b Jaun₂ ca₂juáꞌ₂: “Jmo₄ ꞌniaꞌ₂ ta₁ cu₄ në₅ qui₁dsagꞌ₂ ꞌniaꞌ₂ ca₂liaꞌ₂ ca₂të́₂ jmɨg₄ i₁guangꞌ₂ táng₃.”
14 La₁ dsa₂ go₅₄ në́₃ ca₂rë₃ꞌiog₅₄, ca₂chein₃ co₂nióꞌ₃ dsa₂ ca₂i₁chiꞌ₄ dsa₂ ja₁jaun₂: “Tsá₃ ꞌniog₂ jniaꞌ₅₄ jme₃gón₃ i₂në₅ jë₄ quián₂.”
15 La₁ tion₅₄ bá₄ ca₂lɨn₃ ꞌéi₂ rag₅₄. Jme₁ca₂guáinꞌ₃ táng₃ go₅₄, jaun₂ ca₂të́ꞌ₃ dsa₂ i₂jme₂ti₃ quiáin₅ i₂ca₂cuë́ꞌ₃ cu₄ ꞌéi₂, ia₁ ꞌnio₃ con₂ ꞌí₁ jma₃je₂liáꞌ₂ tí₅ a₂ma₂të₁dsɨ₅₄ quióꞌ₅ le₂jain₂ le₂jain₂.
16 Jaun₂ ca₂dsióg₃ i₂le₂ꞌuɨg₅₄, ca₂juáꞌ₂: “Guiꞌ₅₄, conꞌ₂ guë́₄ guia₃ co₂jaun₂ ma₂të₁dsɨ₅₄ cu₄ mina quiángꞌ₂.”
17 Jaun₂ ca₂tsɨ́ꞌ₃ ꞌéi₂: “ꞌE₂ guë́₄ dse₃, téngꞌ₅ bá₄ ta₁; ca₂jme₁tiꞌ₄ bá₄ dse₃ quianꞌ₅₄ a₂ca₂juɨg₄ a₂ca₂dsia₃ jniá₂ gogꞌ₂. Në₃ në́₃ dsia₄ jniá₂ gogꞌ₂ a₂jmóꞌ₂ ꞌéiꞌ₃ ne₄ guia₃ juɨg₂.”
18 Jaun₂ ca₂guan₃ táng₃ i₂ca₂të́₂ on₃, ca₂juáꞌ₂: “Guiꞌ₅₄, ꞌŋiá₂ guë́₄ co₂jaun₂ ma₂të₁dsɨ₅₄ cu₄ mina jaun₂ quiángꞌ₂.”
19 Le₂jaun₂ bá₄ ca₂tsɨ́ꞌ₃ i₂ꞌéi₂ ján₃: “ꞌNe₂ guëꞌ₂ jmóꞌ₂ ꞌéiꞌ₃ ne₄ ꞌŋiá₂ juɨg₂.”
20 Jaun₂ ca₂já₃ táng₃ jan₂ ca₂juáꞌ₂: “La₂ bá₄ ron₅ cu₄ quiángꞌ₂, guiꞌ₅₄. Ca₂ꞌma₃ bá₄ jniá₂ dsɨ́₅ pe₁guí₄.
21 A₂gán₅ ꞌne₂ bá₄ jniá₂, ia₁ guion₅₄ lɨ́ngꞌ₅ dsa₂ tsau₂ dsɨ́₅, të₂le₃ dséi₂ mágꞌ₂ quiángꞌ₂. Ia₁ cáunꞌ₂ ja₁tsá₃ ꞌe₂ ca₂qui₁dsagꞌ₂ ꞌŋiagꞌ₂, tonꞌ₂ cagꞌ₅₄ ja₁tsá₃ ꞌe₂ ca₂jŋíꞌ₂.”
22 Jaun₂ ca₂ŋag₃ táng₃ ꞌéi₂: “¡ꞌE₂ bá₄ tsá₃ ta₁ téngꞌ₄! Liaꞌ₂ conꞌ₂ lë́₅ jág₁ quiángꞌ₂ qui₁dsɨ₅ jniá₂ ꞌéiꞌ₃. Chi₂juaꞌ₂ ma₂ŋiꞌ₅₄ lɨ́ng₅ dsa₂ i₂tsau₂ dsɨ́₅, cáun₄ a₂tsá₃ ꞌe₂ ca₂qui₁dsagꞌ₂ ꞌŋió₃, tonꞌ₂ cagꞌ₅₄ ja₁tsá₃ ꞌe₂ ca₂jan₃,
23 ¿ꞌE₂ ꞌuɨg₅₄ tsá₃ ca₂i₁tioꞌ₂ banco cu₄ quió₃ jaun₂ në́₃, ia₁jaun₂ jë₁ma₂guángꞌ₅ la₂, jme₁guéiꞌ₄ liaꞌ₂ jma₃quianꞌ₅₄ a₂të₁dsɨ₅₄?”
24 Jaun₂ ca₂tsɨ́ꞌ₃ i₂jme₁tión₂ cau₅: “Jŋiáꞌ₃ ꞌniaꞌ₂ cu₄ mina a₂chanꞌ₂ i₂në₅. Cuëꞌ₅₄ i₂ꞌio₅ guia₃.”
25 Jaun₂ ca₂juáꞌ₂ ꞌéi₂: “Guiꞌ₅₄, ma₁ ma₂ꞌio₅ bá₄ i₂në₅ guia₃ minas.”
26 Jaun₂ ca₂ŋag₃ rag₅₄: “A₂dsɨ₂jóꞌ₃ juɨ́g₂ jniá₂ ꞌniaꞌ₂, ca₂le₃jɨ́n₃ juɨ₁liaꞌ₂ i₂ma₂le₁ꞌio₅, ŋei₂ guë́₄; la₁ i₂tsá₃ ꞌe₂ qui₁dsagꞌ₂, ca₂të₂ a₂jme₁ma₂niog₅ gu₂, co₂ŋeiꞌ₅₄ jŋiaꞌ₃.
27 La₁, juɨ₁liaꞌ₂ dsa₂ i₂ꞌiog₅₄ i₂tsá₃ ꞌŋio₂ dsɨ́₅ gua₅₄ jmo₅₄ ꞌéiꞌ₃ ja₁coin₂, o₂quiain₅ ꞌniaꞌ₂ ja₁lá₃, jaun₂ jme₁dsiainꞌ₂ ꞌniaꞌ₂ ne₃.”
Ca₂dsióg₃ Jesús juɨg₂ Jerusalén
28 Jme₁ca₂dsan₃ tsɨ́ꞌ₅ dsa₂ le₂në₅, ca₂ꞌág₂ táng₃ ne₅₄ juɨ₅, ca₂uɨ́g₂ tso₄ a₂dsióg₄ Jerusalén.
San Lucas 19:28-48
29 Jme₁ma₂ja₂quián₃ dsióg₄ juɨg₂ Betfagé quianꞌ₅₄ Betania, a₂te₁ꞌi₁ cau₅ máꞌ₂ chei₂ Olivos, ja₁jaun₂ ca₂chein₃ on₃ chiꞌ₂ dsɨ₂guia₃-tɨ́n₂ quiain₅.
30 Ca₂juáꞌ₂:
―O₂nóꞌ₅ ꞌniaꞌ₂ juɨg₂ niog₅ ꞌŋoꞌ₅₄ ó₃. Jë₁ma₂ca₂dsi₃nógꞌ₅, dsianꞌ₂ ꞌniaꞌ₂ jan₂ búꞌ₄ chéinꞌ₅ rë₂ꞌŋeꞌ₅₄, i₂tsá₃ ꞌein₂ ma₂co₁dsag₅₄. Cheinꞌ₅₄ ꞌniaꞌ₂ jaun₂ tëꞌ₅₄ ja₁lá₃.
31 Në₁juaꞌ₂ ꞌein₂ ca₂ŋag₃ ꞌe₂ lë₃ tsɨinꞌ₅₄, jaun₂ juɨgꞌ₅₄: “Ia₁ ꞌnióiꞌ₅ quióꞌ₅ Te₁guiꞌ₅₄.”
32 Ca₂i₃lén₂ bá₄ guëꞌ₂ i₂chen₄ ꞌéi₂ në́₃. Ca₂lë₃ rëꞌ₂ liaꞌ₂ conꞌ₂ lë́₅ jág₁ jaun₂.
33 Jme₁ma₂tioinꞌ₅₄ chéinꞌ₂ búꞌ₄, ca₂juáꞌ₂ juɨg₅₄ jáꞌ₂:
―¿ꞌE₂ ꞌuɨg₅₄ tsɨnꞌ₅₄ ꞌniaꞌ₂ búꞌ₄?
34 Jaun₂ ca₂ŋag₃:
―Ia₁ ꞌnióiꞌ₅ quióꞌ₅ Te₁guiꞌ₅₄.
35 Jaun₂ ja₂lein₃ bá₄ te₂ ja₁ꞌen₅₄ Jesús. Qui₂ca₂dsia₃ tsɨ₁ꞌmɨꞌ₂ mɨ₂caꞌ₄ dsɨ₂búꞌ₄, jaun₂ guë́₄ ca₂dsiain₃ Jesús gueiꞌ₅₄.
36 Le₃ne₄ juɨ₅ ja₁ŋó₄ Jesús, qui₂ca₂já₃ dsa₂ ꞌmɨꞌ₂ le₂ꞌi₄ juɨ₅.
37 Conꞌ₂ jme₁ma₂ja₂quián₃ jein₅₄ Máꞌ₂ Olivos, ca₂jme₃lióg₃ ca₂le₃jɨ́n₃ dsa₂ i₂quiainꞌ₅₄ ca₂tóinꞌ₂ co₂mɨꞌ₅₄ jmo₂₃ ꞌioꞌ₂ jme₂juɨinꞌ₂ Diú₄ në́₃, o₄quióꞌ₄ ca₂le₃jë́₃ juɨ₅bí₂ a₂ma₂jmo₃ Jesús, a₂qui₂ma₂të́₂ ne₅₄.
38 Ca₂juáꞌ₂:
―¡Juɨ₁le₂juɨnꞌ₂ bá₄ Rag₅₄ në₅ i₂já₅ o₄quióꞌ₄ Te₁guiꞌ₅₄! ¡Juɨ₁ꞌei₅ bá₄ tei₄ gueiꞌ₅₄ i₂juɨ́g₃! ¡Juɨ₁le₂juɨnꞌ₂ bá₄ Diú₄ le₂tan₅₄ ja₁ŋei₅ në́₃!
39 I₂lɨn₅₄ dsa₂ fariseos* i₂tionꞌ₅₄ jë₄ jaun₂ ca₂juáꞌ₂:
―Të₅, jén₃ dsa₂ i₂quiangꞌ₅₄.
40 Jaun₂ ca₂ŋag₃ Jesús:
―Juɨ́g₂ jniá₂ ꞌniaꞌ₂, juaꞌ₅₄ meiꞌ₂ guë́₃ dsɨ₂lén₂ i₂në₅ tei₄, nɨ₁cang₁ guëꞌ₂ tóꞌ₃ mɨꞌ₅₄.
―¡Juɨ₁liaꞌ₂ bá₄ ŋɨ́ꞌ₂ ꞌauꞌ₂ ꞌniaꞌ₂ jmɨg₄ në₃ a₂dse₃ já₅ jɨnꞌ₄ ꞌniaꞌ₂ a₂jme₁le₃changꞌ₂ ꞌag₃ tei₄! La₁ rë₂ꞌma₄ jlë₅ le₃ja₁congꞌ₂.
43 Ia₁ jiá₃ jmɨg₄ ja₁tsá₃ ma₃ꞌe₂ ŋiꞌ₅₄ ꞌniaꞌ₂ jmóꞌ₂. Ia₁ cho₃ dsa₂ i₂ꞌiog₅₄ caun₂ nɨ₁ꞌiaꞌ₂ le₃lágꞌ₃ quiánꞌ₂ ꞌniaꞌ₂, a₂jë₃lɨꞌ₅₄, qui₃tiog₃ dsa₂ në́₃ le₂tan₅₄ ja₁lë́₄ o₄juɨ₅.
44 Jnáuꞌ₂ dsa₂ ꞌuë₃ ꞌniaꞌ₂, jme₃dsiog₂₃ liaꞌ₂ jma₃quianꞌ₅₄ chiꞌ₂-guein₂ quiángꞌ₂. ꞌI₁ca₂mɨ́g₂ cang₄ tsá₃ ma₃ꞌe₂ le₁juɨ́₄ lé₂ ja₁lá₃. Ia₁ tsá₃ ca₂rë₃lenꞌ₄ ꞌniaꞌ₂ liaꞌ₂ conꞌ₂ jmɨg₄ jme₁ꞌnio₃ Diú₄ jme₃guꞌ₅₄.
Ca₂ꞌuɨ́nꞌ₂ Jesús dsa₂ i₂jme₁tionꞌ₅₄ dsia₅ ꞌmaꞌ₅₄ i₁dsi₅ guáꞌ₅
45 Jaun₂ ca₂ꞌí₃ Jesús i₁dsi₅ guáꞌ₅ templo*, ca₂jme₃lióg₃ qui₂ca₂ꞌuɨ́inꞌ₂ dsa₂ i₂jme₁ma₂tionꞌ₅₄ ꞌnag₅c ja₁jaun₂.
46 Ca₂juáꞌ₂:
―Ne₄ Si₂ juáꞌ₂: “ꞌNé₅ quió₃ lé₂ ca₂ne₅₄ ꞌné₅ ja₁chi₂lénꞌ₂ dsa₂ Diú₄.”d La₁ ꞌniaꞌ₂ në́₃ ma₂jmoꞌ₅₄ në₂jag₄ bá₄ të₂ꞌlau₂ quióꞌ₅ dsa₂ ꞌang₂.e
47 Ca₂le₃jë́₃ jmɨg₄ bá₄ jme₁jme₂tɨn₅ Jesús dsa₂ i₁dsi₅ guáꞌ₅. La₁ juɨg₅₄ jme₂dsa₂ quianꞌ₅₄ të₅juáꞌ₅, dsa₂ canꞌ₅₄ quián₅ juɨg₂ në́₃, caun₂ ꞌnoꞌ₂ juɨ₅ ꞌa₂ liaꞌ₂ jŋagꞌ₃.
48 La₁ tsá₃ dsoꞌ₂ guëꞌ₂ juɨ₅ ꞌa₂ liaꞌ₂ jmo₃, ia₁ ca₂le₃jɨ́n₃ bá₄ dsa₂ i₂tionꞌ₅₄, nag₂₃ tei₄ lɨn₃.