A₂ꞌio₅ Jesús ꞌéiꞌ₃
20
Co₂ráun₂ jme₁ma₂ꞌen₅₄ Jesús jme₂tɨin₂₃ dsa₂ jág₁ dse₃ i₁dsi₅ guáꞌ₅ templo*, jme₁ca₂dsi₃lén₂ juɨg₅₄ jme₂dsa₂, të₅juáꞌ₅, quianꞌ₅₄ guiꞌ₅₄ canꞌ₅₄ në́₃.
San Lucas 20:1-26
―Jmo₄ jág₁ ꞌe₂ ta₁ lɨ́ngꞌ₅. ¿ꞌEin₂ ca₂cuë₃ bí₂ ꞌéiꞌ₃ a₂jmoꞌ₂ le₂në₅?
3 Jaun₂ ca₂ŋag₃ Jesús, ca₂juáꞌ₂:
―Ján₃ bá₄ ŋag₄ jniá₂ caun₂ jág₁ ꞌniaꞌ₂:
4 ¿ꞌEin₂ ca₂chen₃ Juan₅₄ a₂o₃choin₃ dsa₂ jmɨg₂? ¿Ca₂chei₃ Diú₄, o₃ ca₂chei₃ dsa₂ mɨ₂güɨ́g₃ ꞌe₂? Ŋag₄ deꞌ₂ ꞌniaꞌ₂ a₂në₅.
5 Jaun₂ ca₂dsia₃ jág₁ guioin₅₄, ca₂juáꞌ₂:
―Në₁juaꞌ₂ ca₂chei₅₄ jniog₄ i₂chen₄ quián₅ Diú₄ bá₄ ꞌéi₂, në₃ cónꞌ₅ bá₄ juáꞌ₂: “¿ꞌE₂ guëꞌ₂ lë₃ tsá₃ ca₂rë₃ꞌénꞌ₂ ꞌniaꞌ₂ jág₁ quióꞌ₅?”
6 Në₁juaꞌ₂ ca₂ŋag₄ guëꞌ₂ jniog₄ dsa₂ bá₄ i₂ca₂chen₃ ꞌéi₂, në₃ cónꞌ₅ bá₄ ca₂le₃jɨ́n₃ dsa₂ juɨg₂ qui₃dsag₅ cang₄. Ia₁ ꞌén₂ dsónꞌ₂ bá₄ dsa₂ juɨg₂ a₂jme₁lɨ́n₄ Juan₅₄ jan₂ i₂ꞌë́₂ jág₁ quián₅ Diú₄.
7 Jaun₂ ca₂ŋag₃:
―Tsá₃ a₂jaun₂ ne₄ jniaꞌ₅₄.
8 Jaun₂ ca₂juáꞌ₂ Jesús:
―Ján₃ bá₄ le₂në₅ tsá₃ juáꞌ₄ jniá₂ ꞌein₂ cuë₅ bí₂ ꞌéiꞌ₃ a₂jmo₂₃ ca₂le₃jë́₃ ꞌe₂ a₂jmo₂₃.
Jág₁ jángꞌ₅ léi₄ juɨ₁liaꞌ₂ co₂nióꞌ₃ dsa₂ ꞌlɨnꞌ₅₄ i₂jmóꞌ₂ ta₁ ja₁nau₂
9 Jaun₂ ca₂jme₃lióg₃ táng₃ Jesús ca₂tsɨ́ꞌ₃ dsa₂ juɨg₂ caun₂ jág₁ jángꞌ₅ léi₄ la₂, ca₂juáꞌ₂:
―Jme₁chan₂ jan₂ dsa₂ i₂ca₂jmo₃ caun₂ ja₁nau₂ ca₂chéinꞌ₃ uɨng₂ mɨ́g₂ uvas. Cang₂ jaun₂ ca₂o₃ꞌɨ́in₃ bá₄ ca₂ŋó₃ uë́₂ ja₁siáꞌ₂. Gu₂ dsa₂ siánꞌ₂ bá₄ ca₂dsia₃ ja₁nau₂ quióꞌ₅.
10 Jme₁ca₂të́₂ jein₂ a₂ca₂rau₂ ja₁nau₂, ca₂chein₃ jan₂ dsa₂ i₂jme₂ti₃ quiáin₅, a₂i₁mag₂₃ conꞌ₂ a₂ca₂tɨ́in₂ ne₄ dsa₂ i₂jmo₅ ta₁ ja₁nau₂ ꞌéi₂. La₁ jë₂ bá₄ ca₂cuë₃ tioinꞌ₅₄, ca₂dsiógꞌ₂ lɨ́in₃.
11 Jaun₂ dsa₂ juɨg₅₄ ja₁nau₂, ca₂chein₃ táng₃ jan₂ i₂siánꞌ₂, la₁ le₂jaun₂ bá₄ ca₂jmógꞌ₂ táng₃: jŋiaꞌ₅₄ ca₂të₂ca₂ꞌoꞌ₂ bá₄ ca₂cuë₃ tioinꞌ₅₄, ca₂dsiógꞌ₂ lɨ́in₃ táng₃.
12 Jë₁ca₂të́₂ ꞌnagꞌ₂, ca₂chein₃ táng₃ jan₂ i₂siánꞌ₂. La₁ ján₃ bá₄ le₂jaun₂ qui₂ca₂jmógꞌ₂ uɨg₅, ca₂dsei₂₃ tioinꞌ₅₄.
13 ꞌJaun₂ ca₂juáꞌ₂ juɨg₅₄ ja₁nau₂: “¿ꞌE₂ jmo₅₄ jniá₂ në́₃? Chiꞌ₂ quiáng₃ i₂ꞌnióg₃ guë́₄ lɨn₃ tsɨng₅₄. ꞌAn₁ jme₃gain₃ bá₄ i₂në₅.”
14 La₁ jme₁ca₂jág₂ i₂tionꞌ₅₄ jmo₅ ta₁, ca₂quɨinꞌ₃ jág₁, ca₂juáꞌ₂: “I₂në₅ bá₄ tɨn₃ a₂la₂ cang₂. Në₃ o₁jŋɨ́iꞌ₄ jniog₄, ia₁jaun₂ jniog₄ bá₄ lé₂ quián₂.”
15 Jaun₂ ca₂dsei₂₃ ca₂i₁jŋagꞌ₂ ꞌnɨꞌ₂ ja₁nau₂. ¿ꞌE₂ bá₄ jmo₃ dsa₂ i₂quióꞌ₅ ja₁nau₂ në́₃, quianꞌ₅₄ dsa₂ ꞌéi₂?
16 Guainꞌ₂ jme₃dsiain₂₃ dsa₂ i₂tionꞌ₅₄ ja₁nau₂. O₄gú₃ i₂siánꞌ₂ bá₄ ŋág₃ ja₁nau₂ quióꞌ₅.
Jme₁ca₂nág₂ dsa₂ jág₁ në₅, ca₂juáꞌ₂:
―¡Tsá₃ juɨ₁le₅₄ le₂në₅!
17 Jaun₂ ca₂jág₂ Jesús, jaun₂ ca₂juáꞌ₂:
―¿ꞌE₂ guëꞌ₂ ꞌnióꞌ₄ jein₅ jág₁ ja₁juáꞌ₂ ne₄ Si₂?
Nɨ₁cang₁ a₂tsá₃ ca₂rë₃jiꞌ₅₄ të₅ꞌiaꞌ₂,
ca₂dsióg₃ ca₂lë₃ nɨ₁cang₁ a₂dsen₅₄ guë́₄
të₁ron₅₄ quiꞌ₅₄ ꞌiaꞌ₂.a
18 Ca₂le₃jɨ́n₃ i₂tsɨ₃sénꞌ₂ ne₄ nɨ₁cang₁ jaun₂ lé₂ le₁juɨg₁ le₁dsogꞌ₅₄ quióꞌ₅; në₁juaꞌ₂ nɨ₁cang₁ guëꞌ₂ në́₃ ca₂táꞌ₂ ne₄ quióꞌ₅, lé₂ ꞌliog₂.
19 Dsɨ₂juɨ₅ jaun₂ jme₁ꞌnio₃ juɨg₅₄ jme₂dsa₂, të₅juáꞌ₅ në́₃, jme₁tsáunꞌ₂, ia₁ ca₂rë₃líꞌ₄ a₂ꞌɨn₅ ꞌéi₂ bá₄ Jesús, a₂ca₂juáꞌ₂ jág₁ jángꞌ₅ léi₄ jaun₂.b La₁ dsa₂ juɨg₂ bá₄ ca₂rë₃gain₃.
Jág₁ juɨ₁liaꞌ₂ ꞌliaꞌ₅₄ a₂ca₂tɨ́n₂ dsɨ₂tan₅₄
20 Cónꞌ₂ ca₂chein₃ dsa₂ i₂jŋiaꞌ₅₄ conꞌ₂ tiog₅, tsá₃ jme₂li₅₄, jmo₂₃ a₂lɨ́in₅ dsa₂ dsen₃, jme₁ꞌnoꞌ₂ juɨ₅ ꞌa₂ liaꞌ₂ jme₁jo₁₂ juaꞌ₅₄ ca₂jon₄ bá₄ jág₁ ꞌliaꞌ₂ jme₁ꞌŋiá₃ Jesús. Jaun₂ jme₁dsi₁jángꞌ₂ ne₄ bí₂ ꞌéiꞌ₃ a₂ꞌio₅ dsi₄máꞌ₂.
21 Jaun₂ ca₂ŋɨ́iꞌ₃ Jesús jág₁ la₂:
―Të₅, ne₄ jniaꞌ₅₄ dsónꞌ₂ bá₄ liaꞌ₂ tí₅ jág₁ jme₂tɨ́ngꞌ₁ dsa₂, tsá₃ juaꞌ₅₄ jma₃quén₅ jɨngꞌ₅₄ dsa₂; jme₂tɨ́ngꞌ₁ dsa₂ conꞌ₂ lë́₅ juɨ₅ tí₅ quióꞌ₅ Diú₄.
22 Juaꞌ₅₄: ¿ꞌI₄ ꞌéiꞌ₃ qui₅₄ ꞌliaꞌ₅₄ quióꞌ₅ dsɨ₂tan₅₄ César, o₃ tsá₃ qui₅₄ ꞌe₂?
23 La₁ ca₂rë₃líꞌ₄ bá₄ Jesús mai₅₄ quióꞌ₅ dsa₂ ꞌéi₂. Jaun₂ ca₂ŋag₃:c
24 ―ꞌË₄ deꞌ₂ ꞌniaꞌ₂ caun₂ cu₄ ꞌuaꞌ₂.d ¿ꞌEin₂ quióꞌ₅ nióꞌ₄ chi₁ton₅? ¿ꞌA₂ liaꞌ₂ chein₂ juáꞌ₂ letras tioꞌ₅₄ në₅?
25 ―Quióꞌ₅ guiꞌ₅₄ emperador César bá₄ ―juáꞌ₂ jaun₂ në́₃.
Jaun₂ guë́₄ ca₂juáꞌ₂ Jesús:
―Jangꞌ₅₄ guëꞌ₂ ꞌniaꞌ₂ jaun₂ në́₃, ne₄ César conꞌ₂ a₂ca₂tɨ́n₂ César; ne₄ Diú₄ në́₃ jangꞌ₅₄ ꞌniaꞌ₂ conꞌ₂ a₂ca₂tɨ́n₂ Diú₄.
26 Jaun₂ tsá₃ ca₂tióꞌ₃ juaꞌ₅₄ a₂jo₅₄ quianꞌ₅₄ jág₁ të₃jë₄ jág₅ dsa₂ jaun₂. Të₂le₃ ca₂i₃góꞌ₃ dsɨ́₅ bá₄ jág₁ a₂ca₂jéinꞌ₃ Jesús; tei₄ bá₄ co₂ŋeiꞌ₅₄ ca₂i₃léin₂.
Ca₂ŋag₃ dsa₂ saduceos* juɨ₁liaꞌ₂ a₂jenꞌ₅₄ ꞌlag₄
27 Jaun₂ ca₂jme₃quián₃ i₂lɨn₅₄ dsa₂ saduceos*, i₂jme₂tag₅ a₂tsá₃ jenꞌ₅₄ ꞌlag₄, ca₂o₃ŋag₅₄:
San Lucas 20:27-47
28 ―Të₅, ca₂quiog₂ Moisés si₂ a₂juáꞌ₂, në₁juaꞌ₂ ca₂jon₃ jan₂ dsa₂ ŋeꞌ₂ të₃ tsá₃ ca₂can₃ ꞌio₅₄ quiáin₅ guein₂, tion₅₄ ꞌnióꞌ₅ jénꞌ₂ gu₂ dsó₂ rɨnꞌ₅₄ dsa₂ ŋeꞌ₂ i₂ca₂jon₃ quianꞌ₅₄ ꞌio₅₄ ꞌnág₂ ꞌéi₂, ia₁jaun₂ guein₂ i₂le₃chan₂ quiáin₅, lé₂ co₂ꞌnióꞌ₄ tsɨ₁jon₂ ꞌlag₄ rɨinꞌ₅₄.
29 Jaun₂ në́₃, jme₁chan₂ guion₃ dsa₂ ŋeꞌ₂ i₂jme₁lë́₄ rɨnꞌ₅₄. Ca₂jenꞌ₂ gu₂ i₂le₂ꞌuɨg₅₄, la₁ ca₂join₃ bá₄ të₃ tsá₃ guein₂ ca₂can₃ ꞌio₅₄ quiáin₅.
30 Jaun₂ ca₂caun₃ táng₃ i₂ca₂të́₂ on₃,e
31 le₂jaun₂ bá₄ i₂ca₂të́₂ ún₂ në́₃, ca₂cain₃ ꞌio₅₄ ꞌéi₂. Le₂jaun₂ bá₄ ca₂lë₃ quianꞌ₅₄ ta₁guion₃. Ca₂dsain₃ bá₄; ꞌi₁jan₂ guein₂ tsá₃ ca₂can₃ ꞌio₅₄.
32 Jë₁ca₂tóꞌ₂, ca₂jon₃ bá₄ ꞌio₅₄ ján₃.
33 Jaun₂ në́₃, jmɨg₄ jë₁ma₂të́₂ rë₁jenꞌ₅₄ ꞌlag₄, ¿ꞌein₂ bá₄ quián₅ lé₂ ꞌio₅₄ ꞌéi₂? Ia₁ ta₁guion₃ bá₄ guëꞌ₂ dsa₂ ŋeꞌ₂ i₂ca₂guá₂ quiainꞌ₅₄.
34 Jaun₂ ca₂ŋag₃ Jesús:
―Dsa₂ i₂chan₂ ne₄ guaꞌ₅₄ ꞌuë₃ jmɨg₄ në₃, tioinꞌ₅₄ qui₂jéinꞌ₂ gu₂, qui₂jéinꞌ₂ gu₂ chiꞌ₂ quiáin₅ në́₃.
35 La₁ i₂ca₂tɨ́n₂ tɨ́nꞌ₄ ja₁tiainꞌ₃ mɨ₂güɨ́g₃ caun₂, i₂tɨn₅₄ jenꞌ₅₄ ja₁jme₁rë₂ꞌlɨin₅₄, ja₁jaun₂ guë́₄ tsá₃ ma₃ꞌein₂ jénꞌ₂ gu₂, on₃ guë́₄ qui₃jéinꞌ₂ guë́₄ gu₂ chiꞌ₂ quiáin₅.
36 Ia₁ tsá₃ ma₂ꞌein₂ lé₂ dsián₃. Ja₁jaun₂ ma₂léin₂ juɨ₁liaꞌ₂ lɨ́n₅ ángeles, léin₂ jaun₅ Diú₄, ia₁ ma₂ca₂rë₃cháin₃ táng₃.
37 La₁ juɨ₁liaꞌ₂ a₂jenꞌ₅₄ ꞌlag₄, ca₂të₂ Moisés ca₂cuë₃ léi₄ jme₁ca₂tóꞌ₂ ne₄ Si₂ a₂ca₂lë₃ quianꞌ₅₄ nɨ₁ꞌma₂ taun₅, ja₁juáꞌ₂ ꞌɨin₂₃ Te₁guiꞌ₅₄: “Diú₄ quián₅ Abraham, Diú₄ quián₅ Isaac, Diú₄ quián₅ Jacob.”
38 Jaun₂ në́₃ tsá₃ lɨ́in₅ Diú₄ quián₅ ꞌlag₄; Diú₄ quián₅ dsa₂ i₂jénꞌ₃ bá₄ lɨ́in₅, ia₁ o₄quióꞌ₄ ꞌéi₂ bá₄ chan₂ le₃jɨ́n₃.
39 Jaun₂ ca₂ŋag₃ i₂lɨn₅₄ të₅juáꞌ₅:
―Të₅, ꞌŋio₅ jláꞌ₁ jág₁ quiángꞌ₂.
40 Tsá₃ ma₃ca₂tiá₃ dsɨ́₅ juaꞌ₅₄ a₂ŋag₃ guë́₄ ꞌe₂ ŋag₃.
¿ꞌEin₂ tsɨ₁jon₂ quián₅ lɨ́n₅ I₂rë₂ꞌɨ́n₁ quián₅ Diú₄?
41 Ca₂juáꞌ₂ Jesús ca₂tsɨ́ꞌ₃ dsa₂:
―¿ꞌA₂ liaꞌ₂ lë́₅ në́₃ a₂juáꞌ₂ dsa₂ a₂lɨ́n₅ tsɨ₁jon₂ David I₂rë₂ꞌɨ́n₁* quián₅ Diú₄?
42 Juaꞌ₂ ꞌŋiog₅ bá₄ guëꞌ₂ David ca₂tióng₃ ne₄ si₂ Salmos, ca₂juáꞌ₂:
Ca₂juáꞌ₂ Diú₄ ca₂tsɨ́ꞌ₃ Te₁guiꞌ₅₄ quiáng₃:
“Né₂ con₂ jniá₂ të₂le₃ gu₃ ne₁,
43 ca₂liaꞌ₂ ca₂të́₂ jmɨg₄
a₂tónꞌ₄ jniá₂ dsa₂ i₂ꞌiog₅₄ o₄tagꞌ₄.”f
44 Chi₂juaꞌ₂ le₂në₅ juáꞌ₂ David të́₂ Te₁guiꞌ₅₄, ¿ꞌa₂ bá₄ liaꞌ₂ lë́₅ jaun₂ a₂juáꞌ₂ lɨ́in₅ jaun₅ ꞌéi₂?
Jme₂cáunꞌ₂ Jesús quióꞌ₅ të₅juáꞌ₅
45 Të₃ nag₅ ca₂le₃jɨ́n₃ dsa₂ i₂tionꞌ₅₄, ca₂tsɨ́ꞌ₃ dsa₂ i₂quiainꞌ₅₄ le₂la₂:
46 ―Te₃ŋiꞌ₅₄ ꞌniaꞌ₂ quianꞌ₅₄ të₅juáꞌ₅, ia₁ ꞌŋio₅ ꞌŋio₂ dsɨ́₅ i₂nioi₅₄ jláinꞌ₁ le₁quiꞌ₂ tsɨ₁ꞌmɨꞌ₂ chenꞌ₅₄ jang₄; të₅ dsɨ́₅ qui₂cuag₃ dsa₂ Diú₄ juɨ₁liaꞌ₂ jë₄ ꞌmaꞌ₅₄, jmáꞌ₃ liaꞌ₂ ne₄ ꞌma₂sɨ₅₄ dsen₅₄ bá₄ ꞌnoꞌ₂ tiainꞌ₃ juɨ₁liaꞌ₂ dsi₂néi₂ guáꞌ₅ sinagogas*; le₂jaun₂ bá₄ ꞌnoꞌ₂ ja₁jme₂juagꞌ₂ dsa₂ juɨ₁liaꞌ₂ ja₁niog₅ jmɨg₄ në́₃.
47 Qui₂jŋiáꞌ₂ ꞌne₄ ꞌio₅₄ ꞌnág₂; a₂tsá₃ jme₂li₅₄ jmo₂₃ chi₂léinꞌ₂ Diú₄ uë́₂. Tson₂ guë́₄ uɨg₅ ꞌë́₂ Diú₄ quióꞌ₅ i₂le₂në₅.