Ca₂tóꞌ₂ ꞌio₅₄ ꞌnág₂ te₂ŋé₂ cu₄ quióꞌ₅
21
Jaun₂ ca₂chógꞌ₃ Jesús ne₅₄, ca₂jɨ́in₂ dsa₂ cha₂ cu₄ i₂dsɨ₂lén₂ dsɨ₂tioꞌ₂ cu₄ ꞌŋióꞌ₃ tsɨ₁gu₅ ja₁tioꞌ₅₄ ofrendas*.
San Lucas 21:1-28
―A₂dsɨ₂jóꞌ₃ juɨ́g₂ jniá₂ ꞌniaꞌ₂, ꞌlióng₂ guë́₄ në₂tióꞌ₂ ꞌio₅₄ ꞌnág₂ te₂ŋé₂ në₅ liaꞌ₂ conꞌ₂ guë́₄ ca₂le₃jɨ́n₃ i₂ma₂në₂tióꞌ₂.
4 Ia₁ ꞌéi₂ në́₃, cu₄ a₂ma₂qui₂rë₂tsón₂ bá₄ jaun₂ quióꞌ₅ cuë₂₃; dsa₂ mɨ́₂ në₅ në́₃, në₂cuë₃ ca₂le₃jë́₃ a₂jme₁ron₅ quióꞌ₅ bá₄, ꞌnióꞌ₄ a₂jme₁lá₃ a₂guë́ꞌ₃.
A₂dsɨ₃ꞌén₂ bá₄ guáꞌ₅, jág₁ ꞌë́₂ Jesús
5 I₂lɨn₅₄ dsa₂ jme₁tióin₂ dsia₂₃ jág₁ a₂ja₂né₂ guáꞌ₅ templo*, ia₁ a₂ŋɨ́₄ lë₃ jláꞌ₁ nɨ₁cang₁ a₂le₁juɨ́₄, ca₂le₃jë́₃ guë́₄ a₂jláꞌ₁ tioꞌ₅₄ a₂qui₂ma₂cuë₃ dsa₂ co₂ꞌnióꞌ₄ ofrendas. Jaun₂ ca₂juáꞌ₂ Jesús:
6 ―Ca₂le₃jë́₃ a₂jágꞌ₂ ꞌniaꞌ₂ tióngꞌ₂ në₅, já₅ caun₂ jmɨg₄ jë₁dsɨ₃ꞌén₂, tsá₃ ma₃ꞌe₂ nɨ₁cang₁ te₂ꞌŋiá₄ juaꞌ₅₄ a₂le₁juɨ́₄ guë́₄ lé₂.
Léi₄ a₂le₃cha₂ jmɨg₄ jë₁ca₂tóꞌ₂
7 Jaun₂ ca₂ŋag₃ dsa₂ në́₃:
―Të₅, ¿lɨ́gꞌ₂ jaun₂ lé₂ a₂në₅? ¿ꞌE₂ bá₄ léi₄ le₃cha₂ jë₁ma₂ja₂quián₃ lé₂ a₂jaun₂?
8 Jaun₂ ca₂ŋag₃:
―Jmo₄ ꞌniaꞌ₄ ꞌí₁ tsá₃ i₂cuɨ́n₅ ꞌniaꞌ₂ juaꞌ₅₄ a₂jme₃gau₅ dsa₂. Ia₁ i₂juɨn₅ lɨn₃ i₂të₁i₃nio₄ i₂juáꞌ₂ i₂nioi₅₄ o₄quió₃ jniá₂, a₂juáꞌ₂ në́₃: “Jniá₂ bá₄ ꞌéi₂”; juáꞌ₂ ján₃: “Ma₂ja₂quián₃ jmɨg₄ jaun₂”. La₁ tsá₃ i₂o₂nóꞌ₅ ꞌniaꞌ₂ chi₁coꞌ₅₄ quióꞌ₅.
9 Ia₁ jë₁ma₂ca₂neiꞌ₂ ꞌniaꞌ₂ ꞌei₅ jág₁ a₂nio₃ ꞌnei₂, tónꞌ₃ dsa₂ mɨꞌ₅₄ në́₃, tsá₃ tónꞌ₁ ꞌniaꞌ₂ go₂ꞌi₃, ia₁ le₂jaun₂ deꞌ₂ jŋiá₅ ca₂tɨ́n₂ lé₂ bá₄, la₁ on₃juaꞌ₅₄ a₂ma₂dsian₅ dsɨ₂juɨ₅ jaun₂.
10 Jaun₂ ca₂tsɨ́ꞌ₃ táng₃ dsa₂:
―Qui₃nio₃ ꞌnei₂ juɨ₁liaꞌ₂ caun₂ juɨg₂, qui₂quɨ́inꞌ₂ quianꞌ₅₄ juɨg₂ siáꞌ₂; jme₃ꞌuánꞌ₃ dsa₂ ca₂taun₂ ca₂taun₂.
11 Qui₂dsɨ₃bi₅₄ ꞌuë₃ tiá₂, jiá₃ ꞌon₅₄ dsa₂ ca₂le₂con₂, ꞌí₂ jmɨ₁uɨg₅ në́₃; jnia₅₄ gau₂ dsɨ₁ gueiꞌ₅₄, ꞌlióng₂ léi₄ caꞌ₅₄ qui₂le₃jniá₂.
12 La₁ néꞌ₃ a₂lé₂ ca₂le₃jë́₃ a₂në₅, qui₃tsánꞌ₂ dsa₂ ꞌniaꞌ₂ qui₂co₃ꞌein₃ dsa₂. Dsi₁jangꞌ₂ dsa₂ o₄gú₃ dsɨ₂tan₅₄ quián₅ guáꞌ₅ sinagoga*, jaun₂ guë́₄ toꞌ₂ néꞌ₃ ꞌmá₃. Dsi₁jó₂ ne₄ rag₅₄ ne₄ dsi₄máꞌ₂ në́₃ ꞌuɨg₅₄ quió₃ jniá₂.
13 Ja₁jaun₂ cuɨn₃ jmɨg₄ a₂jangꞌ₅₄ ꞌniaꞌ₂ jág₁ dsau₅ a₂ꞌágꞌ₄ jniá₂.
14 ꞌÉi₂ ꞌniaꞌ₂ caun₂ ꞌauꞌ₂, tsá₃ ꞌnáuꞌ₂ ꞌniaꞌ₂ ꞌauꞌ₂ të₃jŋiá₅ ꞌa₂ liaꞌ₂ longꞌ₅₄,
15 ia₁ ꞌŋió₃ bá₄ jniá₂ cuë₅₄ jág₁ a₂tɨngꞌ₂ a₂ŋiꞌ₅₄ ꞌniaꞌ₂ ꞌa₂ liaꞌ₂ ŋagꞌ₅₄, ca₂liaꞌ₂ jŋiaꞌ₅₄ tsá₃ ma₃ꞌe₂ ŋi₅ ŋag₃ ca₂le₃jɨ́n₃ dsa₂ i₂ꞌiog₅₄ ꞌéi₂.
16 Ca₂të₂ chogꞌ₂-ŋéiꞌ₅ ꞌniaꞌ₂ qui₃jángꞌ₂, ca₂të₂ chiꞌ₂ rɨ́ngꞌ₂, o₁rɨ́ngꞌ₂, a₂mei₅₄ quiángꞌ₂ në́₃. I₂lɨn₅₄ ꞌniaꞌ₂ jme₃dsiog₅ dsa₂.
17 Ca₂le₂con₂ bá₄ jme₃ꞌŋia₅₄ dsa₂ ꞌniaꞌ₂ o₄quió₃ jniá₂.
18 La₁ tsá₃ can₂ ꞌniaꞌ₂ o₂i₁ dsɨ₅, ia₁ ca₂liaꞌ₂ jŋiaꞌ₅₄ ꞌi₁ca₂mɨꞌ₂ jŋi₂ dseiꞌ₂ ꞌniaꞌ₂ tsá₃ dsɨ₃ꞌén₂.
19 Në₁juaꞌ₂ ca₂nauꞌ₂ ꞌniaꞌ₂ tiá₂, dsi₁noꞌ₃ ꞌniaꞌ₂ tɨ́nꞌ₄ jme₂dsí₂ quiángꞌ₂.
20 ꞌJë₁ma₂ca₂jagꞌ₅₄ ꞌniaꞌ₂ ma₂le₁lio₃ ꞌlióg₂ le₃lágꞌ₃ juɨg₂ Jerusalén, jaun₂ guë́₄ le₃lenꞌ₅₄ ꞌniaꞌ₂ ma₂ja₂quián₃ ꞌén₂.
21 Dsa₂ i₂tiánꞌ₅ ꞌuë₃ Judea jmɨg₄ jaun₂, juɨ₁cuɨng₁₂ le₃máꞌ₂; i₂tiánꞌ₅ jë₄ juɨg₂ guëꞌ₂ në́₃, juɨ₁ꞌuɨin₂; juɨ₁liaꞌ₂ i₂tionꞌ₅₄ ja₁nau₂ guëꞌ₂, tsá₃ ma₃juɨ₁ja₂lein₅.
22 Ia₁ lé₂ jmɨg₄ a₂le₃chan₂ dsa₂ gue₃ jmɨ₁uɨg₅ ꞌŋio₅ lɨn₃, a₂le₃ti₃ ca₂le₃jë́₃ liaꞌ₂ conꞌ₂ lë́₅ juáꞌ₂ ne₄ Si₂.
23 ¡Juɨ́g₂ juɨ₁liaꞌ₂ dsa₂ mɨ́₂ i₂le₁quian₅ guein₂, juɨ₁liaꞌ₂ i₂chan₂ guein₂ bëꞌ₅₄ i₂ꞌɨ́nꞌ₂ dsiꞌ₅₄ quióꞌ₅ në́₃, jmɨg₄ jaun₂! Ia₁ go₂ꞌi₃ ꞌŋio₅ lɨn₃ të₃tsɨꞌ₅₄ guaꞌ₅₄ ꞌuë₃, a₂le₃jniá₂ a₂ꞌne₂ Diú₄ ne₄ quióꞌ₅ dsa₂ juɨg₂ la₂;
24 ia₁ dsɨ₃ganꞌ₅₄ i₂dsián₃ quianꞌ₅₄ ŋi₁tág₂; i₂lɨn₅₄ guëꞌ₂ qui₃të₂ dsa₂ le₁ꞌŋeiꞌ₅₄ ca₂le₂con₂ go₄ dsɨ₂nau₂. Co₂dsia₅ qui₃tsóꞌ₃ dsɨ₂nau₂ juɨg₂ Jerusalén, ca₂liaꞌ₂ ca₂dsɨn₃ jmɨg₄ quióꞌ₅ dsɨ₂nau₂ a₂ꞌi₄ ꞌéiꞌ₃ tóinꞌ₃ goin₂.
ꞌA₂ liaꞌ₂ lé₂ i₁jŋióꞌ₂ Jaun₅ dsa₂ mɨ₂güɨ́g₃
25 ꞌJmɨg₄ jaun₂ lé₂ léi₄ të₂le₃ quianꞌ₅₄ ꞌiog₂, tsɨꞌ₂, nei₅ në́₃. Ta₁caun₂ guaꞌ₅₄ ꞌuë₃ tónꞌ₃ dsa₂ tiáꞌ₃ quɨꞌ₂ dsɨ́₅, tsá₃ a₂ŋi₅ jmo₃, jmɨ₁ŋíꞌ₄ guëꞌ₂ në́₃ lé₂ gau₂ qui₃jnáꞌ₃.
26 Tónꞌ₃ dsa₂ qui₃neiꞌ₂ a₂le₃góꞌ₃, ꞌɨ₅ dsɨ́₅ ne₄ ca₂le₃jë́₃ ꞌe₂ niog₅ lé₂ mɨ₂güɨ́g₃. Ia₁ ca₂të₂ juɨ₅bí₂ a₂cha₂ gueiꞌ₅₄ mɨ₂güɨ́g₃ qui₃guianꞌ₃.
27 Jaun₂ guë́₄ jɨ́n₂ dsa₂ Jaun₅* dsa₂ mɨ₂güɨ́g₃ jiá₃ jë₄ jnei₅ a₂ꞌuainꞌ₂ a₂jláinꞌ₁ ꞌŋio₅ lɨn₃.
28 Jë₁ma₂ca₂rë₃lióg₃ lë́₂ a₂në₅, quenꞌ₂ ꞌniaꞌ₂ bí₂, ꞌa₃ jlian₅₄ ꞌniaꞌ₂,b ia₁ ja₃quián₂ jmɨg₄ a₂liónꞌ₂ ꞌniaꞌ₂ co₂ŋeiꞌ₅₄.
29 Jaun₂ ca₂juáꞌ₂ táng₃ caun₂ jág₁ jángꞌ₅ léi₄ la₂:
―Ŋí₂ ꞌniaꞌ₂ juɨ₁liaꞌ₂ lë́₂ quianꞌ₅₄ nɨ₁ꞌma₂ higuera, juɨ₁ꞌe₂ guë́₃ nɨ₁ꞌma₂ siáꞌ₂ në́₃;
San Lucas 21:29-38
30 jë₁ma₂ca₂neꞌ₅₄ mogꞌ₅₄, cáunꞌ₂ ꞌniaꞌ₂ ꞌí₂ guiongꞌ₅₄ a₂ja₂quián₃ jein₂ ꞌiog₂ bá₄ jaun₂.
31 Ján₃ bá₄ le₂në₅, jë₁ma₂të́₂ neꞌ₅₄ ꞌniaꞌ₂ lë́₂ ca₂le₃jë́₃ a₂në₅, le₃ŋiꞌ₅₄ ꞌniaꞌ₂ a₂ma₂ja₂quián₃ le₃gon₂ Diú₄.
32 A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, tsá₃ dsɨ₃ŋɨ́₂ tsɨ₁jon₂ jmɨg₄ në₃,c ca₂liaꞌ₂ ca₂lë₃ ca₂le₃jë́₃ a₂në₅.
33 Dsɨ₃ŋɨ́₂ gueiꞌ₅₄ mɨ₂güɨ́g₃ quianꞌ₅₄ guaꞌ₅₄ ꞌuë₃, la₁ jág₁ quió₃ në́₃, o₁lɨ́gꞌ₂ tsá₃ dsɨ₃ŋɨ́₂ juaꞌ₅₄ tsá₃ le₃ti₃.
34 ꞌTë₃ŋiꞌ₅₄ ꞌniaꞌ₂, tsá₃ i₂jme₂cánꞌ₁ táng₃ ꞌniaꞌ₂ ꞌauꞌ₂ a₂i₂niogꞌ₅₄ dsɨngꞌ₅₄ le₁ꞌengꞌ₅, tsá₃ caun₂ a₂ꞌɨ₅ ꞌauꞌ₂ a₂changꞌ₂ mɨ₂güɨ́g₃ la₂, conꞌ₂ tsá₃ ŋó₅ në₁juaꞌ₂ ca₂jo₃ jmɨg₄ jaun₂ ꞌniaꞌ₂ co₂tiá₂.
35 Juɨ₁liaꞌ₂ ja₁taꞌ₂ caun₂ tsɨ₁liá₂ bá₄ lé₂ jmɨg₄ jaun₂ ne₄ quióꞌ₅ ca₂le₃jɨ́n₃ dsa₂ i₂tiánꞌ₅ ne₄ guaꞌ₅₄ ꞌuë₃.
36 Jaun₂ chanꞌ₂ ꞌniaꞌ₂ rë₂jángꞌ₁, chi₁lengꞌ₄ Diú₄ ca₂le₃jë́₃ jmɨg₄, ia₁jaun₂ bá₄ quɨnꞌ₅₄ ꞌniaꞌ₂ jmɨg₄ lióngꞌ₂ ne₄ ca₂le₃jë́₃ a₂niog₅ lé₂ në₅, ia₁jaun₂ dsi₁nógꞌ₅ të₃tsɨngꞌ₅₄ ne₄ Jaun₅ dsa₂ mɨ₂güɨ́g₃.
37 Ca₂le₃jë́₃ jmɨg₄ bá₄ jme₁jme₂tag₂₃ i₁dsi₅ guáꞌ₅ templo, jë₁ma₂ca₂nei₂ dsó₅ dsɨ₂jŋia₅₄ máꞌ₂ ja₁chei₂ Olivos.
38 Ca₂le₃jɨ́n₃ bá₄ dsa₂ jme₁ja₂léin₂ të₂ o₃ꞌiog₂ i₁dsi₅ guáꞌ₅ a₂ja₂néi₃ jág₁ a₂cuë₂₃.