Jág₁ jángꞌ₅ léi₄ juɨ₁liaꞌ₂ co₂nióꞌ₃ dsa₂ ꞌlɨnꞌ₅₄ i₂jmóꞌ₂ ta₁ ja₁nau₂
12
Jaun₂ ca₂jme₃lióg₃ Jesús ca₂juáꞌ₂ quianꞌ₅₄ jág₁ a₂jángꞌ₅ léi₄. Ca₂juáꞌ₂:
―Jme₁chan₂ jan₂ dsa₂ ca₂chéinꞌ₃ uɨng₂ a₂ꞌag₅ mɨ́g₂ uvas ja₁nau₂ quióꞌ₅. Jaun₂ ca₂jmo₃ jnɨ́₁ le₃lágꞌ₃. Jaun₂ ca₂jmo₃ co₂jŋia₅₄ ja₁jleinꞌ₃ mɨ́g₂. Jaun₂ ca₂chiꞌ₃ caun₂ tsɨ₁ꞌné₅ ŋei₅ ja₁guá₃ jmo₃ ꞌí₁.
Jaun₂ ca₂lɨ́ꞌ₃ jág₁ quianꞌ₅₄ dsa₂ siánꞌ₂ i₂nio₃ ne₄ ja₁nau₂, Jaun₂ ca₂ŋó₃ bá₄ ꞌŋiog₅ i₂ŋɨ́₃ juɨg₂ siáꞌ₂.
San Marcos 12:1-17
2 Jme₁ca₂të́₂ jein₂ a₂ca₂rau₂ mɨ́g₂, jaun₂ ca₂chen₃ dsa₂ juɨg₅₄ ja₁nau₂ jan₂ dsa₂ mozo quiáin₅ a₂jme₁i₂mɨ́₃ a₂jángꞌ₃ dsa₂ ca₂dsio₄ mɨ́g₂ conꞌ₂ a₂ca₂tɨ́n₂ dsa₂ juɨg₅₄.
3 Dsa₂ jmóꞌ₂ ta₁ ja₁nau₂ në́₃, ꞌnióꞌ₄ a₂jme₁cuë₃ a₂mɨ₅ dsa₂ ꞌéi₂, ca₂jŋauꞌ₃, ca₂cuë́ꞌ₃ dsa₂ ꞌéi₂ tioinꞌ₅₄, ca₂dsiógꞌ₂ bá₄, tsá₃ ꞌe₂ ca₂jángꞌ₃ a₂jme₁mɨ₅ ꞌéi₂.
4 Dsa₂ juɨg₅₄ ja₁nau₂ në́₃ ca₂chein₃ táng₃ jan₂ dsa₂ mozo siánꞌ₂. I₂ꞌéi₂ në́₃, ca₂cuɨ́ꞌ₂ mɨ₂dsi₅₄, ca₂jmógꞌ₂ dsa₂ ꞌéi₂, jë₂ bá₄ ca₂të₂ca₂ꞌoꞌ₂.
5 Jaun₂ dsa₂ juɨg₅₄ ja₁nau₂ në́₃ ca₂chein₃ bá₄ guë́₄ jan₂ dsa₂ siánꞌ₂ táng₃, la₁ i₂ꞌéi₂ guë́₄ në́₃ ca₂jŋɨiꞌ₃. Juɨn₅ guë́₄ i₂siánꞌ₂ ca₂i₁len₅₄ ján₃. I₂lɨn₅₄ ꞌéi₂ qui₂ca₂cuë́ꞌ₃, i₂lɨn₅₄ guëꞌ₂ ca₂jme₃dsiain₂₃ tioinꞌ₅₄.
6 ꞌDsa₂ juɨg₅₄ ja₁nau₂ në́₃ jme₁chan₂ guë́₄ jan₂ ja₁ŋiꞌ₅₄ i₂jme₁ꞌnioi₃ guë́₄ lɨn₃. Jaun₂ ca₂chein₃ ꞌéi₂, ia₁ lɨ́in₂: “Jme₃gan₃ dsa₂ chiꞌ₂ quiáng₃.”
7 La₁ dsa₂ tionꞌ₅₄ ja₁nau₂ në́₃, ca₂dsia₃: “I₂në₅ bá₄ tɨn₃ ja₁nau₂ la₂ cang₂; në₃ o₁jŋɨ́iꞌ₄ jniog₄, ia₁jaun₂ jniog₄ bá₄ lé₂ quián₂”.
8 Jaun₂ le₂jaun₂ bá₄ ca₂jmo₃. Ca₂jŋɨiꞌ₃ bá₄ ꞌéi₂ tioinꞌ₅₄. Jaun₂ ca₂dsei₂₃ le₃coꞌ₅₄ jnɨ́₁.
9 ꞌJaun₂, ¿ꞌe₂ jmo₃ dsa₂ juɨg₅₄ ja₁nau₂? Jŋióiꞌ₂ jme₃dsiain₂₃ ca₂le₃jɨ́n₃ dsa₂ i₂tionꞌ₅₄ jmóꞌ₂ ta₁ ja₁nau₂ quióꞌ₅, jaun₂ dsia₃ gu₂ dsa₂ siánꞌ₂ táng₃.
10 ꞌ¿Tsa₁ ma₂ꞌíꞌ₂ ꞌniaꞌ₂ Si₂ ja₁juáꞌ₂:
Nɨ₁cang₁ a₂tsá₃ ca₂rë₃jiꞌ₅₄ të₅ꞌiaꞌ₂,
ca₂dsióg₃ ca₂lë₃ nɨ₁cang₁ a₂dsen₅₄ guë́₄
a₂të₁ron₅₄ quiꞌ₅₄ ꞌiaꞌ₂;
11 conꞌ₂ në₅ lë́₅ ca₂jmo₃ Te₁guiꞌ₅₄,
jaun₂ ꞌŋio₅ lɨn₃ bá₄ jláꞌ₁, lág₂ jniog₄?a
12 Jaun₂ jme₁ꞌnoꞌ₂ dsa₂ juɨ₅ a₂jme₁tsáunꞌ₂, ia₁ ca₂rë₃líꞌ₄ bá₄ guioin₅₄ a₂juáꞌ₂ Jesús jág₁ jángꞌ₅ léi₄ në₅ a₂ꞌɨin₂₃ ꞌéi₂ bá₄. La₁ ca₂rë₃gain₃ bá₄ dsa₂ juɨn₅ i₂quianꞌ₅₄ Jesús. Jaun₂ i₂lein₃ bá₄, tsá₃ ma₃ca₂jŋauꞌ₃.
Jág₁ juɨ₁liaꞌ₂ ꞌliaꞌ₅₄ a₂ca₂tɨ́n₂ dsɨ₂tan₅₄
13 Jaun₂ ca₂chen₃ dsa₂ canꞌ₅₄ i₂lɨn₅₄ dsa₂ fariseos*, quianꞌ₅₄ i₂lɨn₅₄ dsa₂ quián₅ Rag₅₄ Herodes a₂dsɨ₃chiꞌ₅₄ ꞌe₂ dsɨ₃chiꞌ₅₄ Jesús, ia₁jaun₂ cuɨn₅ jmɨg₄ jo₅₄ juɨ₁liaꞌ₂ bá₄ ꞌŋiái₃ ca₂jon₄ jág₁ ꞌliaꞌ₂.
14 Jaun₂ ca₂o₃léin₂ ca₂juáꞌ₂:
―Të₅, ne₄ bá₄ jniaꞌ₅₄ a₂dsónꞌ₂ bá₄ juáꞌ₂ ꞌne₂ liaꞌ₂ tí₅ jág₁. Jaun₂ tsá₃ canꞌ₂ ꞌne₂ jág₁ juaꞌ₅₄ a₂quianꞌ₅₄ o₂i₁ dsɨ₅ ꞌe₂ ꞌag₅ dsa₂, ia₁ tsá₃ gangꞌ₃ jmagꞌ₅₄ juɨ₁liaꞌ₂ dsa₂ dsen₅₄ në́₃. Caun₂ qui₂jme₂tɨ́ngꞌ₁ bá₄ dsa₂ juɨ₅ quióꞌ₅ Diú₄. ¿ꞌI₄ ꞌéiꞌ₃ qui₅₄ ꞌliaꞌ₅₄ a₂ca₂tɨ́n₂ dsɨ₂tan₅₄ César? ¿ꞌNióꞌ₅ qui₅₄ o₃ tsá₃ qui₅₄ ꞌe₂?
15 La₁ ŋi₅ rë₂ bá₄ Jesús a₂lë₁i₂nio₄ juáꞌ₂ o₁ne₁ bá₄ dsa₂ ꞌéi₂. Jaun₂ ca₂juáꞌ₂:
―¿ꞌE₂ lë₃ cáunꞌ₂ ꞌniaꞌ₂ táu₂ jniá₂? O₂quian₂ deꞌ₂ ꞌniaꞌ₂ caun₂ cu₄ denario* jaun₂ jág₄ jniá₂.
16 Jaun₂ ca₂i₁quian₅₄ dsa₂. Jaun₂ jme₁ca₂jág₃ Jesús, jaun₂ ca₂ŋag₃:
―¿ꞌEin₂ dsɨ₂ne₄ chi₁ton₅ ja₁lá₃? ¿ꞌEin₂ quióꞌ₅ letra në́₃?
Jaun₂ ca₂ŋag₃:
―Quióꞌ₅ guiꞌ₅₄ emperador* César bá₄.
17 Jaun₂ ca₂juáꞌ₂ táng₃ Jesús:
―Jangꞌ₅₄ ꞌniaꞌ₂ ne₄ César conꞌ₂ a₂ca₂tɨ́n₂ César; ne₄ Diú₄ në́₃ jangꞌ₅₄ ꞌniaꞌ₂ conꞌ₂ a₂ca₂tɨ́n₂ Diú₄.
Jaun₂ ca₂i₃góꞌ₃ dsɨ́₅ jɨ́in₂ ꞌéi₂.
Ca₂ŋag₃ dsa₂ saduceos* juɨ₁liaꞌ₂ a₂jenꞌ₅₄ ꞌlag₄
18 Jaun₂ ca₂o₃lén₂ i₂lɨn₅₄ dsa₂ saduceos* ca₂o₃jɨin₅₄ Jesús. Ia₁ tsá₃ ꞌén₂ dsa₂ ꞌéi₂ a₂jenꞌ₅₄ táng₃ dsa₂ jë₁ma₂dsain₃. Jaun₂ ca₂tsɨ́ꞌ₃ Jesús:
San Marcos 12:18-34
19 ―Të₅, ca₂quiog₂ Moisés si₂ a₂juáꞌ₂, në₁juaꞌ₂ ca₂jon₃ jan₂ dsa₂ ŋeꞌ₂ të₃ tsá₃ ca₂can₃ ꞌio₅₄ quiáin₅ guein₂, tionꞌ₅₄ ꞌnióꞌ₅ jénꞌ₂ gu₂ dsó₂ rɨnꞌ₅₄ dsa₂ ŋeꞌ₂ i₂ca₂jon₃ quiainꞌ₅₄ ꞌio₅₄ ꞌnág₂ ꞌéi₂, ia₁jaun₂ guein₂ i₂le₃chan₂ quiáin₅, lé₂ co₂ꞌnióꞌ₄ tsɨ₁jon₂ ꞌlag₄ rɨinꞌ₅₄.b
20 ꞌIa₁ jme₁chan₂ guion₃ dsa₂ ŋeꞌ₂ i₂lɨ́n₅ jmáꞌ₃ liaꞌ₂ rɨnꞌ₅₄. Ca₂jenꞌ₂ gu₂ i₂le₂ꞌuɨg₅₄, la₁ ca₂join₃ bá₄ të₃ tsá₃ guein₂ ca₂can₃ ꞌio₅₄ quiáin₅.
21 Jaun₂ ca₂jenꞌ₂ táng₃ gu₂ ꞌio₅₄ ꞌnág₂ ꞌéi₂ quiainꞌ₅₄ jë₁ca₂të́₂ on₃. Ján₃ bá₄ le₂jaun₂ ca₂jon₃ táng₃ dsó₂ ꞌéi₂, tsá₃ guein₂ ca₂can₃ ꞌio₅₄. Ján₃ bá₄ le₂jaun₂ ca₂lë₃ quianꞌ₅₄ jë₁ca₂të́₂ ún₂.
22 Le₂jaun₂ bá₄ ca₂lë₃ quianꞌ₅₄ ta₁guion₃ dsa₂ ŋeꞌ₂ conꞌ₂ i₂jme₁lë́₄ rɨnꞌ₅₄: ca₂dsain₃ bá₄ të₃ tsá₃ guein₂ ca₂can₃ ꞌio₅₄ ꞌi₁jan₂ quiainꞌ₅₄ ꞌi₁jan₂ dsó₂ ꞌéi₂. Jaun₂ ca₂jon₃ ꞌio₅₄ jme₁ca₂join₃ në́₃.
23 Jaun₂ në́₃, jmɨg₄ jë₁ma₂të́₂ rë₁jenꞌ₅₄ ꞌlag₄, ¿ꞌein₂ bá₄ quián₅ lé₂ ꞌio₅₄ ꞌéi₂? Ia₁ ta₁guion₃ bá₄ guëꞌ₂ dsa₂ ŋeꞌ₂ ca₂guá₂ quiainꞌ₅₄.
24 Jaun₂ ca₂ŋag₃ Jesús:
―ꞌE₂ guë́₄ tsá₃ rë₂ ŋɨ́ꞌ₂ ꞌauꞌ₂ ꞌniaꞌ₂, ia₁ a₂tsá₃ cuɨnꞌ₂ ꞌniaꞌ₂ ꞌa₂ liaꞌ₂ juáꞌ₂ Si₂, on₃ guëꞌ₂ cuɨnꞌ₂ ꞌniaꞌ₂ ꞌa₂ liaꞌ₂ lë́₅ juɨ₅bí₂ quióꞌ₅ Diú₄.
25 Jë₁ma₂të́₂ jmɨg₄ a₂jenꞌ₅₄ ꞌlag₄, on₃juaꞌ₅₄ a₂le₃chain₂ juaꞌ₅₄ a₂qui₃jéinꞌ₂ guë́₄ gu₂, on₃ guëꞌ₂ në₅ tóinꞌ₃ guë́₄ juaꞌ₅₄ a₂qui₃cuɨin₃ chiꞌ₂ quiáin₅ a₂jéinꞌ₂ gu₂, ia₁ i₂lén₂ juɨ₁liaꞌ₂ lɨ́n₅ ángeles i₂tionꞌ₅₄ gueiꞌ₅₄ i₂juɨ́g₃ bá₄ ꞌéi₂ jmɨg₄ jaun₂.
26 La₁ juɨ₁liaꞌ₂ a₂jenꞌ₅₄ táng₃ ꞌlag₄, ¿tsa₁ ma₂ꞌíꞌ₂ ꞌniaꞌ₂ Si₂ quióꞌ₅ Moisés juɨ₁liaꞌ₂ ja₁juáꞌ₂ ꞌë₂₃ nɨ₁ꞌma₂ taun₅, ja₁ca₂juáꞌ₂ Diú₄ ca₂tsɨ́ꞌ₃ Moisés: “Jniá₂ bá₄ lɨ́ng₅ Diú₄ quián₅ Abraham, quián₅ Isaac, quián₅ Jacob në́₃?”c
27 A₂lɨ́in₅ Diú₄ quian₅ dsa₂ jénꞌ₃ bá₄, on₃juaꞌ₅₄ rëꞌ₂ Diú₄ quián₅ ꞌlag₄. Jaun₂ ꞌŋio₅ lɨn₃ tsá₃ rë₂ ŋɨ́ꞌ₂ ꞌauꞌ₂ ꞌniaꞌ₂.
ꞌÉiꞌ₃ Juáꞌ₅ a₂dsen₅₄ guë́₄ quióꞌ₅ Diú₄
28 Jaun₂ ca₂guan₃ jan₂ të₅juáꞌ₅, ca₂nág₂ jág₁ a₂tsɨn₅ Jesús quianꞌ₅₄ dsa₂, ca₂rë₃líꞌ₄ bá₄ a₂ca₂ŋag₃ Jesús liaꞌ₂ tí₅ jág₁. Jaun₂ ca₂ŋag₃:
―¿ꞌE₂ ꞌÉiꞌ₃ Juáꞌ₅ a₂le₂ꞌuɨg₅₄ a₂lë́₅ a₂dsen₅₄ guë́₄ conꞌ₂ guë́₄ ca₂le₃jë́₃ juáꞌ₅?
29 Jaun₂ ca₂ŋag₃ Jesús:
―ꞌÉiꞌ₃ Juáꞌ₅ le₂ꞌuɨg₅₄ conꞌ₂ guë́₄ ca₂le₃jë́₃, juáꞌ₂: “Nei₂ ꞌniaꞌ₂ dsa₂ chan₂ juɨg₂ Israel*. Jan₂ Te₁guiꞌ₅₄ bá₄ lɨ́n₅ Diú₄ quián₂ jniog₄.
30 Jme₁ꞌnió₄ ꞌniaꞌ₂ Te₁guiꞌ₅₄ Diú₄ quiángꞌ₂ ca₂le₃jë́₃ ꞌauꞌ₂, ca₂le₃jë́₃ jme₂dsí₂ quiángꞌ₂, ca₂le₃jë́₃ ꞌa₂ liaꞌ₂ ŋɨ́ꞌ₂ dseiꞌ₂, ca₂le₃jë́₃ bí₂ quiángꞌ₂.”d
31 Jë₁ca₂të́₂ tɨn₃ juáꞌ₅ në́₃ juáꞌ₂: “A₂jme₁ꞌniógꞌ₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniogꞌ₂ ꞌŋiagꞌ₂.”e Jŋiaꞌ₅₄ liaꞌ₂ a₂tɨn₃ në₅ bá₄ juáꞌ₅ a₂lë́₅ a₂dsen₅₄ guë́₄ conꞌ₂ guë́₄ ca₂le₃jë́₃ ꞌÉiꞌ₃ Juáꞌ₅ quióꞌ₅ Diú₄.
32 Jaun₂ ca₂ŋag₃ të₅juáꞌ₅ ꞌéi₂:
―Të₅, ꞌŋio₅ dse₃ liaꞌ₂ në₂ŋagꞌ₅₄; a₂dsónꞌ₂ bá₄ dsau₅ jan₂ bá₄ Diú₄ i₂chan₂, tsá₃ ma₃ꞌein₂ diú₄ siánꞌ₂ chan₂.
33 A₂jaun₂ bá₄ a₂dsen₅₄ guë́₄ a₂jme₃ꞌnio₃ dsa₂ Diú₄ ca₂le₃jë́₃ dsɨ́₅, ca₂le₃jë́₃ jme₂dsí₂, ca₂le₃jë́₃ bí₂ quióꞌ₅; a₂jme₃ꞌnio₃ dsa₂ rɨinꞌ₅₄ juɨ₁liaꞌ₂ ꞌnioi₃ ꞌŋiog₅. A₂jaun₂ bá₄ a₂quen₅ guë́₄ conꞌ₂ guë́₄ ca₂le₃jë́₃ ꞌe₂ niog₅ jénꞌ₅ dsa₂ ne₄ Diú₄, o₃ ꞌe₂ a₂qui₂dsɨ́ꞌ₂ dsa₂ ne₄chei₂ në́₃.
34 Jaun₂ jme₁ca₂nág₂ Jesús ca₂ŋag₃ bá₄ dsa₂ ꞌéi₂ a₂ŋɨ́ꞌ₂ dse₃ dsɨ́₅, jaun₂ ca₂juáꞌ₂:
―Tsá₃ uɨ́ng₂ ŋɨꞌ₂ ja₁gon₂ Diú₄.
Jaun₂ të₂le₃ ne₄ juɨ₅ guë́₄ jaun₂, tsá₃ ma₃ꞌein₂ ca₂tiá₂ dsɨ́₅ juaꞌ₅₄ a₂ŋág₃ guë́₄ ꞌe₂ ŋag₃.
¿ꞌEin₂ tsɨ₁jon₂ quián₅ lɨ́n₅ I₂rë₂ꞌɨ́n₁ quián₅ Diú₄?
35 Jaun₂ ca₂jéinꞌ₃ Jesús jág₁ jë₄ jme₂tɨin₂₃ dsa₂ i₁dsi₅ guáꞌ₅ templo*, jaun₂ ca₂juáꞌ₂:
―¿ꞌA₂ liaꞌ₂ lë́₅ juáꞌ₂ të₅juáꞌ₅ a₂lɨ́n₅ tsɨ₁jon₂ David I₂rë₂ꞌɨ́n₁* quián₅ Diú₄,
San Marcos 12:35-44
Ca₂juáꞌ₂ Diú₄ ca₂tsɨ́ꞌ₃ Te₁guiꞌ₅₄ quiáng₃:
“Né₂ con₂ jniá₂ të₂le₃ gu₃ ne₁,
ca₂liaꞌ₂ ca₂të́₂ jmɨg₄
a₂tónꞌ₁ jniá₂ dsa₂ i₂ꞌiog₅₄ o₄tagꞌ₄”?f
37 ¿ꞌA₂ bá₄ liaꞌ₂ lë́₅ jaun₂ a₂lɨ́in₅ tsɨ₁jon₂ David, tonꞌ₂ ꞌŋiog₅ bá₄ guëꞌ₂ David ca₂të₃ “Te₁guiꞌ₅₄ quiáng₃?”
Ca₂le₃jɨ́n₃ dsa₂ juɨn₅ ꞌéi₂ jme₁nag₂₃ ꞌŋio₂ dsɨ́₅ jág₁ quióꞌ₅.
Chógꞌ₅ Jesús dso₄ juáꞌ₂ ꞌa₂ liaꞌ₂ niog₅ lɨ́n₅ të₅juáꞌ₅
38 Të₃jë₄ jme₂tɨin₂₃ dsa₂, ca₂juáꞌ₂:
―Ŋí₂ ꞌniaꞌ₂, jmo₄ ꞌniaꞌ₂ ꞌí₁ tsá₃ i₂can₂ ꞌniaꞌ₂ juɨ₅ juɨ₁liaꞌ₂ niog₅ lɨ́n₅ të₅juáꞌ₅. Ia₁ të₅ dsɨ́₅ i₂nioi₅₄ le₁quiꞌ₂ ꞌmɨꞌ₂ chenꞌ₅₄ jang₄, tonꞌ₂ të₅ dsɨ́₅ qui₂cuag₃ dsa₂ Diú₄ jë₄ ꞌmaꞌ₅₄,
39 tonꞌ₂ jmáꞌ₃ liaꞌ₂ ja₁dsen₅₄ bá₄ qui₂dsɨ₂tiainꞌ₂ juɨ₁liaꞌ₂ dsi₂néi₂ guáꞌ₅ sinagoga*, tonꞌ₂ jmáꞌ₃ liaꞌ₂ ja₁dsen₅₄ bá₄ dsɨ₂toinꞌ₅₄ ja₁dsɨ₂guë́ꞌ₃ juɨ₁liaꞌ₂ ja₁niog₅ jmɨg₄.
40 Qui₂jŋiáꞌ₂ ꞌne₄ ꞌio₅₄ ꞌnág₂ në́₃, jaun₂ a₂jŋiaꞌ₅₄ conꞌ₂ ꞌma₂₃ jlë₅ a₂jmo₂₃ jaun₂, chi₂léinꞌ₂ Diú₄ uë́₂ lɨn₃ të₃jɨn₄ dsa₂. La₁ ꞌe₂ guë́₄ uɨg₅ cuë₃ Diú₄ quióꞌ₅ i₂le₂ꞌéi₂.
Ca₂tóꞌ₂ ꞌio₅₄ ꞌnág₂ te₂ŋé₂ cu₄ quióꞌ₅
41 Co₂ráun₂ guá₅ Jesús i₁dsi₅ guáꞌ₅ cau₅ tsɨ₁gu₅ ja₁tóꞌ₅ dsa₂ cu₄ ofrenda. Jaun₂ guá₅ jɨ́in₂ dsa₂ i₂dsɨ₂lén₂ dsɨ₂tioꞌ₂ cu₄ ꞌŋióꞌ₃ tsɨ₁gu₅. Jaun₂ në́₃, juɨn₅ dsa₂ cha₂ cu₄ dsɨ₂lén₂ dsɨ₂tioꞌ₂ ꞌlióng₂ cu₄.
42 La₁ të₃jë₄ jaun₂ ca₂dsióg₃ jan₂ ꞌio₅₄ ꞌnág₂ te₂ŋé₂. Jaun₂ ca₂tóꞌ₂ tɨn₃ ŋí₁ guéin₂.g
43 Jaun₂ ca₂të́ꞌ₃ Jesús chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, ꞌlióng₂ guë́₄ në₂tióꞌ₂ ꞌio₅₄ ꞌnág₂ te₂ŋé₂ në₅, liaꞌ₂ conꞌ₂ guë́₄ ca₂le₃jɨ́n₃ i₂ma₂në₂tióꞌ₂ ꞌŋióꞌ₃ tsɨ₁gu₅.
44 Ia₁ ꞌéi₂ në́₃ cu₄ a₂ma₂qui₂rë₂tsón₂ bá₄ jaun₂ quióꞌ₅ cuë₂₃. ꞌIo₅₄ ꞌnág₂ në₅ në́₃, ca₂le₃jë́₃ bá₄ në₂cuë₃, conꞌ₂ a₂jme₁ron₅ quióꞌ₅, ꞌnióꞌ₄ a₂jme₁lá₃ a₂guë́ꞌ₃.