Ca₂ꞌí₃ Jesús jë₄ juɨg₂ Jerusalén
21
Jme₁ma₂quián₅ dsi₁léin₂ Jerusalén, dsi₃léin₂ quián₅ juɨg₂ Betfagé a₂niog₅ cau₅ Máꞌ₂ Olivos, ja₁jaun₂ ca₂chen₃ Jesús on₃ chiꞌ₂ dsɨ₂guia₃-tɨ́n₂ quiáin₅,
2 ca₂juáꞌ₂:
―O₂nóꞌ₅ ꞌniaꞌ₂ juɨg₂ píꞌ₁ niog₅ të₂le₃ ne₄ juɨ₅ ja₁dsau₅₄ në₅. Ja₁jaun₂ dsianꞌ₂ ꞌniaꞌ₂ jan₂ i₂búꞌ₄ mɨ́₂ rë₂ꞌŋeꞌ₅₄, chéinꞌ₅ quianꞌ₅₄ guein₂ quiáin₅. O₂cheinꞌ₅₄ ꞌniaꞌ₂ jaun₂ tëꞌ₅₄ ja₁lá₃.
3 Në₁juaꞌ₂ ꞌein₂ ŋag₅ ꞌe₂ lë₃ tsɨinꞌ₅₄, jaun₂ juɨgꞌ₅₄ ꞌniaꞌ₂: “Te₁guiꞌ₅₄ bá₄ ꞌnio₃ ca₂tiá₂.” Jaun₂ në₃ cónꞌ₅ bá₄ cuag₃.
4 Ca₂lë₃ le₂në₅ ia₁jaun₂ le₃ti₃ jág₁ a₂ca₂tóꞌ₂ ne₄ si₂ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂, jme₁ca₂juáꞌ₂:
5 Cheiꞌ₅₄ dsa₂ juɨg₂ i₂tiánꞌ₅ Sión*:
“Jag₄, në₅ jónꞌ₅ Rag₅₄ quiánꞌ₂ ꞌniaꞌ₂ ja₁congꞌ₂,
a₂lɨ́in₅ jan₂ dsa₂ meꞌ₂, tsá₃ jláinꞌ₁,
jóinꞌ₅ co₂dsɨin₅₄ jan₂ búꞌ₄,
jóinꞌ₅ quianꞌ₅₄ jaun₅ jáꞌ₂ i₂cán₂ lio₅₄ bá₄”.a
6 Jaun₂ ca₂i₃lén₂ bá₄ i₂on₃ ꞌéi₂, ca₂jmo₃ bá₄ conꞌ₂ lë́₅ jág₁ a₂ca₂cuë₃ Jesús.
7 Jaun₂ ca₂i₁te₂ búꞌ₄ liaꞌ₂ jma₃quianꞌ₅₄ guein₂ quiáin₅, ca₂i₁jiog₃ ja₁ꞌen₅₄ Jesús. Jaun₂ ca₂jlág₂ nɨ₁tsɨnꞌ₅₄ mɨ₂caꞌ₄ jáꞌ₂, jaun₂ guë́₄ ca₂co₃dsag₅₄ Jesús.
8 Jaun₂ dsa₂ juɨn₅ i₂quiainꞌ₅₄ në́₃ i₂jŋiá₅ le₃ne₄ juɨ₅ qui₂ca₂néiꞌ₃ ꞌmɨꞌ₂ le₂ꞌi₄ juɨ₅ ja₁ŋɨ́₃ Jesús; i₂lɨn₅₄ guëꞌ₂ qui₂ca₂ꞌnia₃ mogꞌ₅₄ ꞌma₂tsɨ́n₅, qui₂ca₂jó₃ dsi₂juɨ₅.
9 Dsa₂ i₂i₃lén₂ le₃ne₄ juɨ₅, quianꞌ₅₄ i₂ja₂lén₂ le₃chi₁coꞌ₅₄ në́₃, qui₂ca₂tóinꞌ₂ co₂mɨꞌ₅₄ ca₂juáꞌ₂:
¡Juɨ₁le₂juɨnꞌ₂b bá₄ tsɨ₁jon₂ David!
¡Juɨ₁le₂jŋió₃ bá₄ i₂në₅ i₂já₅ o₄quióꞌ₄ Te₁guiꞌ₅₄!c
¡Juɨ₁le₂juɨnꞌ₂ bá₄ i₂guá₅ gueiꞌ₅₄ i₂juɨ́g₃!
10 Jme₁ca₂ꞌí₃ Jesús jë₄ juɨg₂ Jerusalén, jaun₂ qui₂ca₂tónꞌ₂ go₂ꞌi₃ dsa₂ juɨg₂, juɨn₅ i₂qui₂ca₂ŋag₃:
―¿ꞌEin₂ bá₄ në₅?
11 Jaun₂ qui₂ca₂ŋag₃ dsa₂ juɨn₅ i₂quianꞌ₅₄ Jesús, ca₂juáꞌ₂:
―Jesús bá₄ la₂, dsa₂ i₂ꞌë́₂ jág₁ quián₅ Diú₄, i₂chan₂ juɨg₂ Nazaret ja₁tén₄ Galilea.
Ca₂ꞌuɨ́nꞌ₂ Jesús dsa₂ i₂jme₁tionꞌ₅₄ dsia₅ ꞌmaꞌ₅₄ i₁dsi₅ guáꞌ₅
12 Ca₂dsióg₃ Jesús jme₁ca₂dsióg₃ i₁dsi₅ guáꞌ₅ templo*, jaun₂ qui₂ca₂ꞌuɨ́inꞌ₂ ca₂le₃jɨ́n₃ dsa₂ i₂jme₁ma₂tionꞌ₅₄ dsia₅ ꞌmaꞌ₅₄ i₁dsi₅ guáꞌ₅, dsa₂ i₂ꞌnag₅, i₂qui₂lá₅ në́₃, qui₂ca₂jéinꞌ₃ nɨ₁mesa ja₁jme₁jmóꞌ₂ dsa₂ ta₁ jme₂tsɨ́in₃ cu₄, qui₂ca₂quɨ́ꞌ₂ ꞌma₂sɨ₅₄ ja₁jme₁tiánꞌ₄ dsa₂ i₂ꞌnɨ₅ i₁ju₂;
13 jaun₂ ca₂juáꞌ₂:
―Ne₄ Si₂ juáꞌ₂: “ꞌNé₅ quió₃ lë́₅ ca₂ne₅₄ ꞌné₅ ja₁të₁ja₂lén₂ dsa₂ ja₂chiꞌ₅₄ Diú₄”;d la₁ ꞌniaꞌ₂ në́₃ ma₂jmoꞌ₅₄ në₂jag₄ bá₄ të₂ꞌlau₂ quióꞌ₅ dsa₂ ꞌang₂.e
14 Jaun₂ ca₂jme₃quián₃ i₂lɨn₅₄ dsa₂ ten₄ quianꞌ₅₄ dsa₂ guianꞌ₅₄ në́₃ con₂ Jesús i₁dsi₅ guáꞌ₅, jaun₂ ca₂jme₃ꞌlióin₂ bá₄ dsa₂ ꞌéi₂.
15 La₁ jme₁ca₂jág₃ juɨg₅₄ jme₂dsa₂ quianꞌ₅₄ të₅juáꞌ₅ léi₄ jláꞌ₁ a₂ca₂jmo₃ Jesús jaun₂, tonꞌ₂ ia₁ ca₂nág₂ në́₃ tionꞌ₅₄ chiꞌ₂ co₂mɨꞌ₅₄ qui₂guióꞌ₅ i₁dsi₅ guáꞌ₅, a₂juáꞌ₂: “¡Juɨ₁le₂juɨnꞌ₂ tsɨ₁jon₂ David!”, jaun₂ ca₂rë₃ꞌnéi₃.
16 Jaun₂ ca₂juáꞌ₂ ca₂tsɨ́ꞌ₃ Jesús:
―¿Tsa₁ nagꞌ₂ ꞌe₂ juáꞌ₂ chiꞌ₂?
Jaun₂ ca₂ŋag₃ Jesús:
―Ján₅, nag₅ bá₄ jniá₂. Ia₁, ¿tsa₁ ma₂ꞌíꞌ₂ ꞌniaꞌ₂ ne₄ Si₂ ja₁juáꞌ₂:
Te₁guiꞌ₅₄, ꞌne₂ bá₄ ma₂ca₂jmoꞌ₅₄
ꞌe₂ a₂ꞌuë₂ mɨ₂ꞌo₄ chiꞌ₂ bëꞌ₅₄
quianꞌ₅₄ mɨ₂ꞌo₄ guein₂ tei₄ i₂guénꞌ₅ dsiꞌ₅₄,
ꞌuë₂ jág₁ a₂jme₂juɨinꞌ₂ ꞌne₂?f
17 Jaun₂ ca₂o₃ꞌɨ́in₃ bá₄ ja₁tionꞌ₅₄ ꞌéi₂, jaun₂ ca₂ŋáiꞌ₃ táng₃ juɨg₂ Betania. Ja₁jaun₂ ca₂jŋia₂ caun₂ nei₅.
Ca₂juáꞌ₂ Jesús caun₂ jág₁ a₂ca₂cuë́ꞌ₃ uɨg₅ caun₂ nɨ₁ꞌma₂ higuera a₂tsá₃ mɨ́g₂ cha₂
18 Jme₁jnia₃ jaun₂, jme₁ma₂tioinꞌ₅₄ juɨ₅ a₂i₂lein₃ táng₃ juɨ₅ jë₄ juɨg₂ Jerusalén. Jesús në́₃ ca₂táꞌ₂ i₁cónꞌ₅.
19 Jaun₂ ca₂jág₃ caun₂ nɨ₁ꞌma₂ higuera* a₂dsi₅₄ cau₅ juɨ₅, jaun₂ ca₂jme₃quiáin₃ ꞌuɨg₅₄, la₁ tsá₃ ꞌe₂ mɨ́g₂ ca₂dsóꞌ₂ guëꞌ₂ gueiꞌ₅₄ nɨ₁ꞌma₂; jŋiaꞌ₅₄ liaꞌ₂ jmáꞌ₃ mogꞌ₅₄ bá₄ cha₂. Jaun₂ në́₃ ca₂juáꞌ₂ Jesús ca₂tsɨ́ꞌ₃ nɨ₁ꞌma₂:
―¡Liaꞌ₂ o₁lɨ́gꞌ₂ jmɨg₄, tsá₃ ma₃juɨ₁ꞌag₅₄ mɨ́g₂ quiángꞌ₂!
Dsɨ₂juɨ₅ jaun₂ bá₄ ca₂rë₃quéin₃ nɨ₁ꞌma₂ jaun₂.
20 Jme₁ca₂të́₂ ne₄ chiꞌ₂ dsɨ₂guia₃-tɨ́n₂ a₂ca₂lë₃ jaun₂, ca₂i₃góꞌ₃ dsɨ́₅, jaun₂ ca₂ŋɨ́iꞌ₃ Jesús:
―¿ꞌA₂ bá₄ liaꞌ₂ conꞌ₂ tan₅₄ liaꞌ₂ dsɨ₂juɨ₅ ca₂rë₃quéin₃ nɨ₁ꞌma₂ në₅?
21 Jaun₂ ca₂ŋag₃ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, në₁juaꞌ₂ tsá₃ ca₂ꞌéiꞌ₂ ꞌniaꞌ₂ caun₂-tɨn₃ ꞌauꞌ₂ liaꞌ₂ ꞌéngꞌ₂, on₃juaꞌ₅₄ jmáꞌ₃ juɨ₁liaꞌ₂ a₂në₂jmo₃ jniá₂ quianꞌ₅₄ nɨ₁ꞌma₂ higuera në₅, lé₂ le₃jmóꞌ₂ ꞌniaꞌ₂, ia₁ lé₂ le₃juaꞌ₅₄ ꞌniaꞌ₂ ján₃ juɨgꞌ₅₄ nɨ₁máꞌ₂ ó₃: “Jŋiagꞌ₃ ja₁në₅, o₃ o₂ꞌú₅ jmɨ₁ŋíꞌ₄”, le₂jaun₂ dsónꞌ₂ lé₂ bá₄.
22 Le₂jaun₂ bá₄ ján₃ ca₂le₃jë́₃ ꞌe₂ a₂mɨꞌ₂ ꞌniaꞌ₂ jme₁mɨꞌ₂ ne₄ Diú₄, në₁juaꞌ₂ ꞌénꞌ₂ të₃dsónꞌ₂ ꞌniaꞌ₂, guéiꞌ₁ bá₄ ꞌniaꞌ₂.
Jesús bá₄ i₂ꞌio₅ ꞌéiꞌ₃
23 Jaun₂ ca₂ꞌí₃ táng₃ Jesús i₁dsi₅ guáꞌ₅ templo*, jaun₂ të₁liaꞌ₂ ꞌein₅₄ jme₂tɨin₂₃ dsa₂, jaun₂ ca₂jme₃quián₃ juɨg₅₄ jme₂dsa₂ quianꞌ₅₄ i₂lɨ́n₅ dsa₂ canꞌ₅₄ quián₅ dsa₂ juɨg₂, con₂ Jesús, jaun₂ ca₂ŋag₃:
―¿ꞌE₂ ta₁ lɨ́nꞌ₅ ꞌne₂, ꞌe₂ lë₃ jmoꞌ₂ ca₂le₃jë́₃ ꞌe₂ a₂jmoꞌ₂ ŋɨꞌ₂? ¿ꞌEin₂ ca₂cuë₃ bí₂ ꞌéiꞌ₃ në₅?
24 Jaun₂ ca₂ŋag₃ Jesús:
―Ján₃ bá₄ ŋag₄ jniá₂ caun₂ ꞌniaꞌ₂: në₁juaꞌ₂ ca₂ŋagꞌ₅₄ ꞌniaꞌ₂ liaꞌ₂ tí₅, jaun₂ guë́₄ juáꞌ₄ jniá₂ ꞌein₂ cuë₅ bí₂ ꞌéiꞌ₃ a₂jmo₂₃ ca₂le₃jë́₃ a₂jmo₂₃.
25 Juɨ₁liaꞌ₂ a₂ca₂chon₃ Juan₅₄ jmɨg₂ dsa₂, ¿ꞌein₂ quióꞌ₅ ꞌéiꞌ₃ jaun₂? ¿Quióꞌ₅ Diú₄, o₃ quióꞌ₅ dsa₂ mɨ₂güɨ́g₃ ꞌe₂?
Jaun₂ ca₂dsia₃ dsa₂ canꞌ₅₄ jág₁ conꞌ₂ guioin₅₄, ca₂juáꞌ₂:
―Në₁juaꞌ₂ ca₂chei₅₄ jniog₄ ꞌéiꞌ₃ quióꞌ₅ Diú₄ bá₄ jaun₂, në₃ cónꞌ₅ bá₄ ŋag₃: “¿ꞌE₂ lë₃ tsá₃ ca₂rë₃ꞌénꞌ₂ ꞌniaꞌ₂ jág₁ quióꞌ₅ ꞌéi₂?”
26 La₁ në₁juaꞌ₂ ca₂ŋag₄ guëꞌ₂ jniog₄ ꞌéiꞌ₃ quióꞌ₅ dsa₂ mɨ₂güɨ́g₃ në́₃, le₃ꞌne₂ dsa₂ juɨg₂ quianꞌ₅₄ jniog₄, ia₁ ca₂le₃jɨ́n₃ bá₄ dsa₂ jmo₂₃ dsɨ́₅ a₂jme₁lɨ́n₄ Juan₅₄ jan₂ dsa₂ i₂ca₂ꞌë́₂ jág₁ quián₅ Diú₄.
27 Jaun₂ në́₃, ca₂ŋag₃ dsa₂ canꞌ₅₄ ꞌéi₂ ca₂tsɨ́ꞌ₃ Jesús:
―Tsá₃ a₂jaun₂ ne₄ jniaꞌ₅₄ ꞌein₂ ca₂chen₃ ꞌéi₂.
Jaun₂ në́₃, ca₂ŋag₃ Jesús:
―Ján₃ bá₄ le₂në₅ tsá₃ juáꞌ₄ jniá₂ ꞌein₂ cuë₅ bí₂ a₂jmo₂₃ ca₂le₃jë́₃ a₂jmo₂₃ ŋɨ₂₃.
Jág₁ jángꞌ₅ léi₄ juɨ₁liaꞌ₂ on₃ ja₁ŋiꞌ₅₄ jan₂ dsa₂
28 Jaun₂ ca₂juáꞌ₂ Jesús ca₂tsɨ́ꞌ₃ dsa₂ ꞌéi₂:
―¿ꞌA₂ liaꞌ₂ lɨ́nꞌ₂ ꞌniaꞌ₂ juɨ₁liaꞌ₂ jág₁ la₂? Jan₂ dsa₂ jme₁chan₂ on₃ ja₁ŋiꞌ₅₄. Jaun₂ ca₂tsɨ́ꞌ₃ chiꞌ₂ quiáin₅ i₂lɨ́n₅ i₂juɨnꞌ₂ guë́₄: “Jón₃, gua₂ o₂jmo₄ ta₁ ja₁nau₂ quián₂ jmɨg₄ në₃.”
29 Jaun₂ ca₂ŋag₃ chiꞌ₂ quiáin₅: “¡Tsá₃ nei₅₄!” La₁ jme₁co₂lág₂ jaun₂ ca₂jme₃tsɨ́in₃ ꞌa₂ liaꞌ₂ dsɨ₂jiog₅ dsɨ́₅, jaun₂ ŋó₃ bá₄ i₁jmo₅₄ ta₁.
30 Jaun₂ ca₂ŋe₄ táng₃ jmei₂ i₁chiꞌ₄ chiꞌ₂ jan₂ quiáin₅. Ján₃ bá₄ le₂jaun₂ ca₂tsɨ́ꞌ₃ ꞌéi₂. I₂ꞌéi₂ në́₃ ca₂ŋag₃: “Nei₅₄ bá₄ jniá₂, tia₅₄, i₁jmo₃ ta₁.” La₁ tsá₃ ŋei₅₄ guëꞌ₂ jaun₂ në́₃.
31 Jë₄ le₃oin₃ le₂jaun₂, ¿ꞌein₂ ca₂jmo₃ a₂ꞌŋio₂ dsɨ́₅ jmei₂?
Jaun₂ ca₂ŋag₃:
―Chiꞌ₂ i₂le₂ꞌuɨg₅₄ bá₄.
Jaun₂ ca₂juáꞌ₂ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, dsa₂ i₂cán₂ ꞌliaꞌ₅₄ quián₅ dsɨ₂tan₅₄, o₃ juɨ₁liaꞌ₂ ꞌio₅₄ i₂ꞌnag₅ quióꞌ₅ në́₃, i₂le₂ꞌéi₂ bá₄ tiá₂ le₂ꞌuɨg₅₄ dsɨ₃tonꞌ₅₄ ja₁gon₂ Diú₄ liaꞌ₂ conꞌ₂ guë́₄ ꞌniaꞌ₂.
32 Ia₁ liaꞌ₂ conꞌ₂ jme₁guan₃ Juan₅₄ i₂chon₅ dsa₂ jmɨg₂, ca₂jme₃jniai₂₃ ja₁conꞌ₂ ꞌniaꞌ₂ ꞌa₂ liaꞌ₂ dsónꞌ₂ ca₂tɨ́ngꞌ₂ ꞌniaꞌ₂ tiángꞌ₄. La₁ tsá₃ a₂jaun₂ ca₂rë₃ꞌénꞌ₂ ꞌniaꞌ₂. Ia₁ a₂dsau₅ bá₄ juɨ₁liaꞌ₂ dsa₂ i₂cán₂ ꞌliaꞌ₅₄ quián₅ dsɨ₂tan₅₄, quianꞌ₅₄ ꞌio₅₄ i₂ꞌnag₅ quióꞌ₅ në́₃, ca₂rë₃ꞌéin₂ jág₁ quióꞌ₅ Juan₅₄. La₁ a₂dsau₅ bá₄ o₁jŋiaꞌ₅₄ a₂ca₂të́₂ neꞌ₅₄ ꞌniaꞌ₂ jaun₂, tsá₃ ca₂táꞌ₂ jén₂ ꞌauꞌ₂ ꞌniaꞌ₂, on₃ guëꞌ₂ ca₂rë₃ꞌéngꞌ₂.
Jág₁ jángꞌ₅ léi₄ juɨ₁liaꞌ₂ co₂nióꞌ₃ dsa₂ ꞌlɨnꞌ₅₄ i₂jmóꞌ₂ ta₁ ja₁nau₂
33 ꞌNei₂ ꞌniaꞌ₂ jág₁ a₂jángꞌ₅ léi₄ siáꞌ₂ la₂: Jan₂ dsa₂ ca₂chéinꞌ₃ choꞌ₅₄ uɨng₂ uvas ja₁nau₂ quióꞌ₅. Jaun₂ ca₂jmo₃ jnɨ́₁ le₃lágꞌ₃; ca₂jmo₃ co₂jŋia₅₄ ja₁jleinꞌ₃ mɨ́g₂ në́₃; caun₂ guëꞌ₂ tsɨ₁ꞌné₅ ŋei₅ ca₂chiꞌ₃ ja₁guá₃ jmo₃ ꞌí₁. Jaun₂ ca₂lɨ́ꞌ₃ jág₁ quianꞌ₅₄ dsa₂ siánꞌ₂ i₂nio₃ ne₄ ja₁nau₂, jaun₂ ca₂ŋó₃ bá₄ ꞌŋiog₅ i₁ŋɨ₂ juɨg₂ siáꞌ₂.
34 Jme₁ca₂të́₂ jein₂ a₂ca₂rau₂ mɨ́g₂, jaun₂ dsa₂ juɨg₅₄ ja₁nau₂ ca₂chein₃ co₂nióꞌ₃ dsa₂ mozo quiáin₅, a₂jme₁i₂mɨ́₃ a₂jángꞌ₃ dsa₂ i₂niog₅ gu₂ ja₁nau₂ ca₂dsio₄ mɨ́g₂ conꞌ₂ a₂ca₂tɨ́n₂ juɨg₅₄.
35 La₁ dsa₂ i₂tionꞌ₅₄ jmóꞌ₂ ta₁ ja₁nau₂ në́₃, ca₂jŋaiꞌ₃ bá₄ dsa₂ mozo i₂chen₄ quián₅ juɨg₅₄. Ca₂cuë́ꞌ₃ bá₄ jan₂ tioinꞌ₅₄; jan₂ guëꞌ₂ ca₂jŋɨiꞌ₃; jan₂ guëꞌ₂ ca₂cuë́ꞌ₃ quianꞌ₅₄ nɨ₁cang₁.
36 La₁ juɨg₅₄ ja₁nau₂ në́₃, juɨn₅ guë́₄ i₂ca₂chein₃ cang₂ jaun₂ conꞌ₂ guë́₄ le₂ꞌuɨg₅₄; la₁ dsa₂ ꞌlɨnꞌ₅₄ i₂tionꞌ₅₄ jmo₅ ta₁ ja₁nau₂ në́₃, le₂jaun₂ bá₄ qui₂ca₂jmáiꞌ₂ ca₂le₃jɨ́n₃ dsa₂ mozo i₂chen₄ ꞌéi₂.
37 ꞌLa₁ jë₁ca₂tóꞌ₂ në́₃, dsa₂ juɨg₅₄ ja₁nau₂ ca₂chein₃ ja₁ŋiꞌ₅₄, ia₁ lɨ́in₂: “Jme₃go₃ dsa₂ jme₃gain₃ chiꞌ₂ quiáng₃.”
38 La₁ jme₁ca₂jág₃ dsa₂ i₂jmo₅ ta₁ ja₁nau₂ ca₂jɨ́in₂ ja₁ŋiꞌ₅₄ dsa₂ juɨg₅₄ ca₂dsióg₃, jaun₂ ca₂dsia₃ jág₁ tioinꞌ₅₄: “I₂në₅ bá₄ tɨn₃ ja₁nau₂ la₂ cang₂; në₃ o₁jŋɨ́iꞌ₄ jniog₄ ia₁jaun₂ jniog₄ bá₄ lé₂ quián₂.”
39 Le₂jaun₂ bá₄ ca₂jmo₃. Ca₂jŋaiꞌ₃ bá₄ ꞌéi₂ tioinꞌ₅₄, jaun₂ ca₂dsei₂₃ le₃coꞌ₅₄ jnɨ́₁; ja₁jaun₂ ca₂jŋagꞌ₃.
40 ꞌJaun₂ në́₃, jë₁ma₂të́₂ jmɨg₄ rë₁jŋióꞌ₂ dsa₂ juɨg₅₄ ja₁nau₂, ¿ꞌe₂ lɨ́nꞌ₂ ꞌniaꞌ₂ jmo₃ quianꞌ₅₄ dsa₂ i₂jmóꞌ₂ ta₁ ja₁nau₂ ꞌéi₂?
41 Jaun₂ ca₂ŋag₃ dsa₂ ꞌéi₂:
―A₂jme₃dsiain₂₃ dsa₂ ꞌlɨnꞌ₅₄ ꞌéi₂ ca₂liaꞌ₂ tsá₃ ŋéi₂ dsɨ́₅, jaun₂ cuë́ꞌ₃ dsa₂ siánꞌ₂ ja₁nau₂ conꞌ₂ i₂léi₄ jángꞌ₃ ca₂dsio₄ conꞌ₂ ca₂tɨ́in₂ jë₁ma₂të́₂ jein₂ a₂ráu₃.
42 Jaun₂ në́₃, ca₂juáꞌ₂ Jesús ca₂tsɨ́ꞌ₃ dsa₂:
―¿Tsa₁ ma₂ꞌíꞌ₂ ꞌniaꞌ₂ ne₄ Si₂ ja₁juáꞌ₂:
Nɨ₁cang₁ a₂tsá₃ ca₂rë₃jiꞌ₅₄ të₅ꞌiaꞌ₂,
ca₂dsióg₃ ca₂lë₃ nɨ₁cang₁ a₂dsen₅₄ guë́₄
të₁ron₅₄ quiꞌ₅₄ ꞌiaꞌ₂;
a₂ca₂jmo₃ Te₁guiꞌ₅₄ bá₄ jaun₂,
jaun₂ ꞌŋio₅ lɨn₃ bá₄ jláꞌ₁, lág₂ jniog₄?g
43 ꞌꞌUɨg₅₄ jaun₂ juɨ́g₂ jniá₂ ꞌniaꞌ₂, co₂dsia₅ jŋiáꞌ₂ Diú₄ o₄gogꞌ₂ ꞌniaꞌ₂ ꞌéiꞌ₃ quióꞌ₅, o₄gú₃ i₂siánꞌ₂ bá₄ dsia₃ conꞌ₂ i₂léi₄ jángꞌ₃ a₂ráu₃.
44 La₁ juɨ₁liaꞌ₂ nɨ₁cang₁ la₂ në́₃, juɨ₁ꞌein₂ guë́₃ i₂ca₂tánꞌ₂ ne₄, lé₂ le₁juɨg₁ le₁dsogꞌ₅₄ quióꞌ₅; o₃ në₁juaꞌ₂ ca₂jlɨ́in₃, lé₂ ti₁ꞌliog₂ quióꞌ₅.h