Jág₁ jángꞌ₅ léi₄ juɨ₁liaꞌ₂ ja₁niog₅ jmɨg₄ a₂ca₂jenꞌ₂ gu₂ dsa₂
22
Ca₂jme₃lióg₃ táng₃ Jesús ca₂tsɨ́ꞌ₃ dsa₂ të₂le₃ quianꞌ₅₄ jág₁ a₂jángꞌ₅ léi₄, le₂la₂:
2 ―Lë́₅ gueiꞌ₅₄ i₂juɨ́g₃ ja₁gon₂ Diú₄ juɨ₁liaꞌ₂ jan₂ rag₅₄ i₂ca₂jmo₃ co₂jŋia₅₄ caun₂ má₃ a₂ca₂jmo₃ jmɨg₄ ja₁jenꞌ₂ gu₂ chiꞌ₂ ja₁ŋiꞌ₅₄.
3 Jaun₂ ca₂chein₃ dsa₂ i₂jme₂ti₃ ta₁ ne₅₄ a₂dsɨ₃quiáin₂ dsa₂ i₂ma₂lë́₅ jág₁ ja₃lén₂ ja₃guë́ꞌ₃. La₁ dsa₂ ꞌéi₂ në́₃ tsá₃ ma₃ca₂gue₃ ja₃léin₂.
4 Jaun₂ ca₂chein₃ táng₃ i₂siánꞌ₂, jaun₂ ca₂tsɨ́ꞌ₃ ꞌéi₂: “Cheiꞌ₅₄ ꞌniaꞌ₂ dsa₂ i₂ma₂lë́₅ jág₁ ja₃lén₂ jmɨg₄, ma₂lë́₅ bá₄ co₂jŋia₅₄ má₃. Ca₂jme₁dsiang₂₃ bá₄ ca₁juɨ₅ ꞌonꞌ₅₄ quiáng₃; ma₂lë₅ bá₄ co₂jŋia₅₄ ca₂le₃jë́₃. Jaun₂ juɨ₁ja₂léin₂ bá₄ jmɨg₄ quióꞌ₅ chiꞌ₂ quiáng₃.”
5 La₁ tsá₃ juɨ₅ ca₂tónꞌ₃ dsa₂ i₂jme₁ma₂lë́₅ jág₁ rë₂té₄ ꞌéi₂. Juɨ₅ siáꞌ₂ bá₄ i₃léin₂: jan₂ ŋó₃ juɨ₅ ja₁nau₂ quióꞌ₅ bá₄; jan₂ guëꞌ₂ ŋó₃ i₃dsiá₃ ꞌmaꞌ₅₄.
6 Rɨnꞌ₅₄ dsa₂ ꞌéi₂ në́₃, ca₂jŋaiꞌ₃ bá₄ dsa₂ i₂jme₂ti₃ ta₁ ne₄ rag₅₄ ꞌéi₂, ca₂cuë₃, ca₂jme₃dsiog₂₃ bá₄.
7 Jaun₂ në́₃, ca₂rë₃ꞌné₃ rag₅₄ ꞌŋio₅ lɨn₃, jaun₂ ca₂chein₃ ꞌlióg₂ quiáin₅ ca₂i₁jme₁dsiain₂₃ dsa₂ ꞌéi₂ qui₂ca₂i₁dsɨ́ꞌ₄ ꞌlióg₂ ꞌné₅, co₂dsia₅ ca₂ꞌéin₂ go₄ dsa₂ ꞌéi₂.
8 Jaun₂ ca₂juáꞌ₂ rag₅₄ ca₂tsɨ́ꞌ₃ dsa₂ i₂jme₂ti₃ ne₅₄: “Ca₂le₃jë́₃ ma₂lë́₅ co₂jŋia₅₄ a₂jenꞌ₂ gu₂ chiꞌ₂ quiáng₃ a₂nio₃ jmɨg₄, la₁ dsa₂ i₂jme₁lë́₄ jág₁ rë₂té₄ ꞌéi₂, tsá₃ ma₃ca₂tɨ́in₂ ja₃léin₂.
9 O₂nóꞌ₅ ꞌniaꞌ₂ në́₃, o₂nau₂ jë₄ calle juëꞌ₂ ja₁i₂nio₄ guë́₄ dsa₂ juɨn₅, o₂cheiꞌ₅₄ ca₂le₃jɨ́n₃ dsa₂ i₂jengꞌ₂ juɨ₁ja₂léin₂ jmɨg₄ jë₁jenꞌ₂ gu₂ chiꞌ₂ quiáng₃.”
10 Jaun₂ ca₂ꞌuɨn₂ bá₄ dsa₂ ꞌéi₂ në́₃ ca₂i₁lein₅₄ jë₄ calle, jaun₂ chi₂ca₂liainꞌ₃ ca₂le₃jɨ́n₃ dsa₂ i₂ca₂jeinꞌ₂ liaꞌ₂ dsa₂ dsen₃ liaꞌ₂ dsa₂ ꞌlɨnꞌ₅₄ në́₃; jaun₂ ca₂canꞌ₂ bá₄ dsi₂néi₂ ca₂lë₃, quianꞌ₅₄ dsa₂ ꞌéi₂.
11 ꞌJaun₂ guë́₄ ca₂ꞌí₃ rag₅₄ dsi₂néi₂ ca₂i₁jɨin₁₂ dsa₂ i₂tionꞌ₅₄ ꞌéi₂, jaun₂ ca₂jɨ́in₂ jan₂ i₂ꞌen₅₄ jë₄ jaun₂, tsá₃ jme₁rë₂lɨin₅₄ juaꞌ₅₄ a₂quiꞌ₂ ꞌmɨꞌ₂ a₂quɨ́ꞌ₅ dsa₂ dsɨ₂léin₂ ja₁niog₅ jmɨg₄ jenꞌ₂ gu₂ dsa₂.
12 Jaun₂ ca₂tsɨ́ꞌ₃ dsa₂ ꞌéi₂, ca₂juáꞌ₂: “A₂mei₅₄, ¿ꞌa₂ bá₄ liaꞌ₂ në₂ꞌúꞌ₃ ꞌne₂ ja₁lá₃ të₃ tsá₃ rë₂lɨngꞌ₅₄ conꞌ₂ dsi₂ten₅₄ a₂gogꞌ₅₄ ja₁niog₅ jmɨg₄ jenꞌ₂ gu₂ dsa₂?” Jaun₂ tei₄ bá₄ ca₂nau₂ dsa₂ ꞌéi₂, tsá₃ ꞌe₂ ŋi₅ ŋag₃.
13 Jaun₂ bá₄ ca₂juáꞌ₂ rag₅₄ ca₂tsɨ́ꞌ₃ dsa₂ i₂tionꞌ₅₄ jme₂ti₃ ne₄ mesa: “Quéin₂ ꞌniaꞌ₂ gu₂-tag₄ i₂në₅, dsein₅₄ ca₁ꞌné₄, qui₂dsɨin₅ ꞌniaꞌ₂ güɨg₂, ꞌliainꞌ₅₄ jë₄ qui₁néꞌ₃ ja₁quɨꞌ₂-ꞌo₃, qui₃quɨ́gꞌ₃ jan₅₄.”
14 Ia₁ juɨn₅ lɨn₃ dsa₂ i₂rë₂té₄, la₁ meꞌ₂ bá₄ i₂rë₂quionꞌ₅₄.
Jág₁ juɨ₁liaꞌ₂ ꞌliaꞌ₅₄ a₂ca₂tɨ́n₂ dsɨ₂tan₅₄
15 Jme₁co₂lág₂ jaun₂ ca₂i₃len₃ dsa₂ fariseos* ca₂i₁jmo₅₄ jág₁ ꞌa₂ liaꞌ₂ join₅₄ Jesús juɨ₁liaꞌ₂ bá₄ ꞌŋiái₃ ca₂jon₄ jág₁ ꞌliaꞌ₂, ia₁jaun₂ cuɨn₃ jmɨg₄ a₂bógꞌ₂ dso₄.
16 Jaun₂ ca₂chein₃ táng₃ i₂lɨn₅₄ dsa₂ quiáin₅ quianꞌ₅₄ i₂lɨn₅₄ dsa₂ i₂quianꞌ₅₄ Herodes, a₂ca₂i₁chiꞌ₄ Jesús:
―Të₅, ne₄ bá₄ jniaꞌ₅₄, a₂dsónꞌ₂ bá₄ juáꞌ₂ ꞌne₂ liaꞌ₂ tí₅ jág₁, qui₂jme₂tɨ́ngꞌ₁ dsa₂ juɨ₅ dse₃ quióꞌ₅ Diú₄, jaun₂ tsá₃ canꞌ₂ ꞌne₂ jág₁ juaꞌ₅₄ a₂quianꞌ₅₄ o₂i₁ dsɨ₅ ꞌe₂ a₂ꞌag₅ dsa₂, ia₁ tsá₃ gangꞌ₃ jmagꞌ₅₄ juɨ₁liaꞌ₂ dsa₂ dsen₅₄ në́₃.
17 Jaun₂ ꞌniog₂ jniaꞌ₅₄ juaꞌ₅₄ ꞌne₂ ꞌa₂ liaꞌ₂ dsɨ₂jiog₅ ꞌauꞌ₂: ¿Dsióg₅ guëꞌ₂ juaꞌ₅₄ a₂caun₂ qui₅₄ ꞌliaꞌ₅₄ a₂ca₂tɨ́n₂ dsɨ₂tan₅₄ César? ¿ꞌNióꞌ₅ qui₅₄, o₃ tsá₃ qui₅₄ ꞌe₂?
18 La₁ ca₂rë₃líꞌ₄ bá₄ Jesús a₂dsɨ₂jiog₅ dsɨ́₅ dsa₂ ꞌéi₂ ꞌlɨgꞌ₅₄, jaun₂ ca₂juáꞌ₂:
―¡ꞌNiaꞌ₂ dsa₂ i₂lë₁co₂jmo₅ o₁ne₁! ¿ꞌE₂ lë₃ ꞌniogꞌ₂ ꞌniaꞌ₂ joꞌ₅₄ jniá₂ juɨ₁liaꞌ₂ tsánꞌ₂ dsa₂ jan₂ jáꞌ₂ quianꞌ₅₄ liá₂?
19 ꞌË₄ deꞌ₂ ꞌniaꞌ₂ caun₂ cu₄ ꞌuaꞌ₂ juɨ₁liaꞌ₂ a₂quí₅ dsa₂ ꞌliaꞌ₅₄ a₂ca₂tɨ́n₂ dsɨ₂tan₅₄.
―¿ꞌEin₂ dsɨ₂ne₄ chi₁ton₅ ja₁lá₃? ¿ꞌEin₂ guëꞌ₂ quióꞌ₅ letra në́₃?
21 Jaun₂ ca₂ŋag₃:
―Quióꞌ₅ guiꞌ₅₄ emperador César.
Jaun₂ ca₂juáꞌ₂ táng₃ Jesús:
―Jangꞌ₅₄ guëꞌ₂ ꞌniaꞌ₂ jaun₂ ne₄ César conꞌ₂ a₂ca₂tɨ́n₂ César; ne₄ Diú₄ në́₃ jangꞌ₅₄ ꞌniaꞌ₂ conꞌ₂ a₂ca₂tɨ́n₂ Diú₄.
22 Dsa₂ ꞌéi₂ në́₃, jme₁ca₂nág₂ jág₁ në₅, ca₂i₃góꞌ₃ dsɨ́₅. Ca₂téin₂ bá₄ ca₂juëꞌ₂ Jesús, ca₂i₃lein₃ bá₄.
Ca₂ŋag₃ dsa₂ saduceos* juɨ₁liaꞌ₂ a₂jenꞌ₅₄ ꞌlag₄
23 Jmɨg₄ jaun₂ ca₂o₃lén₂ i₂lɨn₅₄ dsa₂ saduceos* ca₂o₃jɨin₅₄ Jesús. Ia₁ tsá₃ ꞌén₂ dsa₂ ꞌéi₂ a₂jenꞌ₅₄ táng₃ dsa₂ jë₁ma₂dsain₃. Jaun₂ jág₁ në₅ ca₂ŋɨ́iꞌ₃ Jesús ca₂juáꞌ₂:
24 ―Të₅, le₂la₂ ca₂juáꞌ₂ Moisés: në₁juaꞌ₂ ca₂jon₃ jan₂ dsa₂ ŋeꞌ₂ të₃ tsá₃ ca₂can₃ ꞌio₅₄ quiáin₅ guein₂, tion₅₄ ꞌnióꞌ₅ jénꞌ₂ gu₂ dsó₂ rɨnꞌ₅₄ dsa₂ ŋeꞌ₂ i₂ca₂jon₃ quianꞌ₅₄ ꞌio₅₄ ꞌnág₂ ꞌéi₂, ia₁jaun₂ guein₂ i₂le₃chan₂ quiáin₅, lé₂ co₂ꞌnióꞌ₄ tsɨ₁jon₂ ꞌlag₄ rɨinꞌ₅₄.
25 Dse₃ jaun₂. Jë₄ quián₂ jniaꞌ₅₄ la₂, jme₁chan₂ guion₃ dsa₂ ŋeꞌ₂ i₂lɨ́n₅ rɨnꞌ₅₄. Ca₂jenꞌ₂ gu₂ i₂le₂ꞌuɨg₅₄, la₁ ca₂join₃ bá₄, të₃ tsá₃ guein₂ ca₂can₃ ꞌio₅₄ quiáin₅. Jaun₂ ca₂të₁ꞌŋiá₄ bá₄ ꞌio₅₄ ꞌnág₂ ꞌéi₂ o₄gú₃ dsó₂ rɨinꞌ₅₄ i₂jë₁ca₂të́₂ on₃.
26 La₁ ján₃ bá₄ le₂jaun₂ ca₂i₃ŋɨ́i₂, ca₂join₃ bá₄ ján₃. Jaun₂ ca₂guá₂ táng₃ ꞌio₅₄ ꞌéi₂ quianꞌ₅₄ i₂jë₁ca₂të́₂ ún₂ dsó₂; ján₃ bá₄ le₂jaun₂ ca₂lë₃ quianꞌ₅₄ ꞌéi₂. Jaun₂ le₂në₅ bá₄ ca₂lë₃ quianꞌ₅₄ ta₁guion₃ dsó₂ ꞌéi₂ conꞌ₂ i₂jme₁lë́₄ rɨnꞌ₅₄, ca₂dsain₃ bá₄ të₃ tsá₃ guein₂ ca₂can₃ ꞌio₅₄.
27 Jaun₂ ca₂jon₃ bá₄ ꞌio₅₄ jme₁ca₂jon₃ në́₃.
28 Jaun₂ në́₃, jmɨg₄ jë₁ma₂të́₂ rë₁jenꞌ₅₄ ꞌlag₄, ¿ꞌein₂ bá₄ quián₅ lé₂ ꞌio₅₄ ꞌéi₂? Ia₁ ta₁guion₃ bá₄ guëꞌ₂ dsa₂ ŋeꞌ₂ ca₂guá₂ quiainꞌ₅₄.
29 Jaun₂ ca₂ŋag₃ Jesús:
―Tsá₃ le₂jaun₂ liaꞌ₂ ŋɨ́ꞌ₂ ꞌauꞌ₂ ꞌniaꞌ₂, ia₁ tsá₃ cuɨnꞌ₂ ꞌniaꞌ₂ ꞌa₂ liaꞌ₂ juáꞌ₂ Si₂, on₃ guëꞌ₂ cuɨnꞌ₂ ꞌniaꞌ₂ ꞌa₂ liaꞌ₂ lë́₅ juɨ₅bí₂ quióꞌ₅ Diú₄ në́₃.
30 Jë₁ma₂të́₂ jmɨg₄ a₂jenꞌ₅₄ ꞌlag₄, on₃juaꞌ₅₄ a₂le₃chain₂ juaꞌ₅₄ a₂qui₃jéinꞌ₂ guë́₄ gu₂, on₃ guëꞌ₂ në₅ tóinꞌ₃ guë́₄ juaꞌ₅₄ a₂qui₃cuɨin₃ chiꞌ₂ quiáin₅ a₂jéinꞌ₂ gu₂, ia₁ i₂lén₂ juɨ₁liaꞌ₂ lɨ́n₅ ángeles i₂tionꞌ₅₄ gueiꞌ₅₄ i₂juɨ́g₃ bá₄ ꞌéi₂ jmɨg₄ jaun₂.
31 La₁ juɨ₁liaꞌ₂ a₂jenꞌ₅₄ táng₃ ꞌlag₄, ¿tsa₁ ma₂ꞌíꞌ₂ ꞌniaꞌ₂ ne₄ Si₂ juɨ₁liaꞌ₂ a₂ca₂juáꞌ₂ ꞌŋiog₅ Diú₄ jme₁ca₂juáꞌ₂:
32 “Jniá₂ bá₄ lɨ́ng₅ Diú₄ quián₅ Abraham, quián₅ Isaac, quián₅ Jacob në́₃?”a A₂lɨ́in₅ Diú₄ quián₅ dsa₂ jénꞌ₃ bá₄, on₃juaꞌ₅₄ rëꞌ₂ Diú₄ quián₅ ꞌlag₄.
33 Jme₁ca₂nág₂ dsa₂ jág₁ në₅, ca₂i₃góꞌ₃ dsɨ́₅ ꞌa₂ liaꞌ₂ jme₂tag₅ Jesús.
ꞌÉiꞌ₃ Juáꞌ₅ a₂dsen₅₄ guë́₄ quióꞌ₅ Diú₄
34 Jme₁ca₂rë₃ŋi₅ dsa₂ fariseos* ca₂lɨ́ꞌ₃ bá₄ táng₃ Jesús jág₁ a₂ca₂tsɨ́in₂ quianꞌ₅₄ dsa₂ saduceos*, jaun₂ ca₂ŋɨiꞌ₂ ca₂jmo₃ jág₁.
35 Jaun₂ jan₂ rɨinꞌ₅₄ i₂lɨ́n₅ të₅juáꞌ₅, jme₁ꞌnio₃ jme₁jo₅₄ quianꞌ₅₄ jág₁, jaun₂ ca₂ŋɨ́iꞌ₃ Jesús:
36 ―Të₅, ¿ꞌe₂ ꞌÉiꞌ₃ Juáꞌ₅ a₂dsen₅₄ guë́₄ conꞌ₂ guë́₄ ca₂le₃jë́₃ Si₂ ꞌÉiꞌ₃ quióꞌ₅ Diú₄?
37 Jaun₂ ca₂ŋag₃ Jesús:
―“Jme₁ꞌnió₄ Te₁guiꞌ₅₄ Diú₄ quiángꞌ₂, ca₂le₃jë́₃ ꞌauꞌ₂, ca₂le₃jë́₃ jme₂dsí₂ quiángꞌ₂, ca₂le₃jë́₃ ꞌa₂ liaꞌ₂ niog₅ ŋɨ́ꞌ₂ dseiꞌ₂.”b
38 A₂në₅ bá₄ ꞌÉiꞌ₃ Juáꞌ₅ a₂le₂ꞌuɨg₅₄ a₂dsen₅₄ guë́₄ conꞌ₂ guë́₄ ca₂le₃jë́₃.
39 Jë₁ca₂të́₂ tɨn₃ ꞌÉiꞌ₃ në́₃, meiꞌ₂ tsá₃ co₂rë₂ quianꞌ₅₄ a₂le₂ꞌuɨg₅₄: “Jme₁ꞌnió₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂.”c
40 Tɨn₃ ꞌéiꞌ₃ në₅ bá₄ lë́₅ ꞌuɨg₅₄ choꞌ₅₄ ca₂le₃jë́₃ ꞌÉiꞌ₃ quióꞌ₅ Moisés quianꞌ₅₄ ca₂le₃jë́₃ jág₁ a₂ca₂ꞌë́₂ dsa₂ i₂chen₄ quián₅ Diú₄ ma₂lɨ́gꞌ₂.
¿ꞌEin₂ tsɨ₁jon₂ quián₅ lɨ́n₅ I₂rë₂ꞌɨ́n₁ quián₅ Diú₄?
―¿ꞌA₂ liaꞌ₂ lɨ́nꞌ₂ ꞌniaꞌ₂? ¿ꞌEin₂ tsɨ₁jon₂ quián₅ lɨ́n₅ I₂rë₂ꞌɨ́n₁* quián₅ Diú₄?
―Tsɨ₁jon₂ David ―ca₂ŋag₃ dsa₂ ꞌéi₂.
43 Jaun₂ ca₂juáꞌ₂ táng₃ Jesús:
―¿ꞌA₂ liaꞌ₂ jaun₂? Ia₁ ꞌŋiog₅ bá₄ guëꞌ₂ David ca₂juáꞌ₂ liaꞌ₂ conꞌ₂ jme₁ca₂ꞌí₃ Jme₂dsí₂ Jŋió₅ të₂dsɨ́₅, ca₂të₃ “Te₁guiꞌ₅₄.” ¿ꞌA₂ liaꞌ₂ lë́₅ jaun₂? Ia₁ ꞌŋiog₅ bá₄ guëꞌ₂ David ca₂juáꞌ₂:
44 Ca₂juáꞌ₂ Diú₄ ca₂tsɨ́ꞌ₃ Te₁guiꞌ₅₄ quiáng₃:
“Né₂ con₂ jniá₂ të₂le₃ gu₃ ne₁,
ca₂liaꞌ₂ ca₂të́₂ jmɨg₄
a₂tónꞌ₁ jniá₂ dsa₂ i₂ꞌiog₅₄ o₄tagꞌ₄.”d
45 ¿ꞌA₂ bá₄ liaꞌ₂ lë́₅ a₂lɨ́in₅ tsɨ₁jon₂ David, tonꞌ₂ ꞌŋiog₅ bá₄ guëꞌ₂ David ca₂të₃ “Te₁guiꞌ₅₄ quiáng₃?”
46 Jaun₂ të₂le₃ ne₄ juɨ₅ guë́₄ jaun₂, tsá₃ ma₃ꞌein₂ ca₂tiá₂ dsɨ́₅ juaꞌ₅₄ a₂ŋag₃ guë́₄ ꞌe₂ ŋag₃.