Ca₂jme₃ꞌlión₂ Jesús jan₂ dsa₂ i₂jme₁guion₂
14
Co₂ráun₂ guëꞌ₂ ca₂lë₃ táng₃ caun₂ jmɨg₄ sa₅₄ a₂ca₂ŋó₃ Jesús i₃guë́ꞌ₃ ja₁quióꞌ₄ jan₂ dsa₂ dsen₅₄ quián₅ dsa₂ fariseos*; i₂lɨn₅₄ guëꞌ₂ dsa₂ fariseos siánꞌ₂ a₂jŋiaꞌ₅₄ tiog₂₃ bá₄ tioinꞌ₅₄.
San Lucas 14:1-24
2 Ja₁jaun₂ jme₁ꞌen₅₄ jan₂ dsa₂ dsoꞌ₅₄ i₂guion₂.
3 Jaun₂ ca₂ŋag₃ Jesús ca₂tsɨ́ꞌ₃ të₅juáꞌ₅ quianꞌ₅₄ dsa₂ fariseos, ca₂juáꞌ₂:
―¿ꞌI₄ ꞌéiꞌ₃, o₃ tsá₃ ꞌi₄ ꞌéiꞌ₃ jme₃ꞌlión₂ dsa₂ dsa₂ dsoꞌ₅₄ jme₁jmɨg₄ sa₅₄?
4 La₁ tei₄ bá₄ i₃léin₂, tsá₃ ꞌe₂ ŋi₅ ŋag₃. Jaun₂ ca₂jŋaiꞌ₃ dsa₂ dsoꞌ₅₄, ca₂jme₃ꞌlió₂. Jaun₂ ca₂dsiógꞌ₂ quióꞌ₅.
5 Jaun₂ ca₂juáꞌ₂ ca₂tsɨ́ꞌ₃ ꞌéi₂:
―¿I₂ꞌein₂ ꞌniaꞌ₂, tsá₃ dsɨ₃dsen₅ dsɨ₂juɨ₅ chiꞌ₂ quián₅,a o₃ jan₂ ca₁juɨ₅ ꞌe₂ në₁juaꞌ₂ ca₂táinꞌ₂ néꞌ₃ táu₃ jŋiaꞌ₅₄ të₃ jmɨg₄ sa₅₄?
6 La₁ tsá₃ ca₂tióꞌ₃ ŋag₃ jág₁ në₅.
Tsá₃ dsióg₅ juaꞌ₅₄ quióꞌ₃ dsa₂ ꞌma₂sɨ₅₄ ja₁dsen₅₄ guë́₄
7 Jme₁ca₂të́₂ ne₄ Jesús ꞌa₂ liaꞌ₂ quióꞌ₅ dsa₂ i₂té₄ jmáꞌ₃ liaꞌ₂ ja₁dsen₅₄ guë́₄ ja₁tiainꞌ₂, jaun₂ ca₂cuë₃ jág₁ a₂jángꞌ₅ léi₄ la₂:
8 ―Në₁juaꞌ₂ ꞌein₂ të́₂ ja₁niog₅ jmɨg₄ jenꞌ₂ gu₂ dsa₂, tsá₃ neꞌ₅₄ juɨ₁liaꞌ₂ ja₁dsen₅₄, ia₁ conꞌ₂ tsá₃ ŋó₅ në₁juaꞌ₂ ca₂dsióg₃ jan₂ i₂dsen₅₄ guë́₄ liaꞌ₂ ꞌne₂.
9 Ia₁ ¿ꞌe₂ bá₄ lé₂ në₁juaꞌ₂ dsa₂ i₂në₂té₂ le₂onꞌ₃ ꞌniaꞌ₂ juáꞌ₂: “I₂la₂ cuëꞌ₅₄ ja₁ŋéiꞌ₂”? Jaun₂ të₃ ma₂guengꞌ₅₄ bá₄ gogꞌ₅₄ o₁néꞌ₂ të₂ jë₁ca₂tóꞌ₂.
10 La₁ juáꞌ₅ jniá₂, chi₂juaꞌ₂ lɨ́gꞌ₂ në₁ꞌein₂ ca₂të₃, të₂le₃ jë₁ca₂tóꞌ₂ bá₄ neꞌ₅₄, ia₁jaun₂ dsa₂ i₂në₂té₂ lé₂ le₃juáꞌ₂: “A₂mei₅₄ quiáng₃, ja₁dsen₅₄ guë́₄ la₂ i₂né₂.” Jaun₂ le₂në₅ bá₄ jme₃juagꞌ₂ dsa₂ i₂quë́ꞌ₂ quiangꞌ₅₄.
11 Ia₁ juɨ₁liaꞌ₂ dsa₂ i₂jme₂canꞌ₅₄ guion₅₄, sióin₃ të₂le₃ jë₁ca₂tóꞌ₂; dsa₂ i₂jmo₅ meꞌ₂ guëꞌ₂ në́₃, roinꞌ₂ gueiꞌ₅₄.
12 Jaun₂ ca₂tsɨ́ꞌ₃ ján₃, dsa₂ i₂ca₂të₃ ꞌéi₂:
―Jë₁ma₂të́₂ rë₁ꞌniogꞌ₂ jmóꞌ₂ caun₂ má₃ a₂ŋɨgꞌ₅₄ dsa₂, tsá₃ tëꞌ₅₄ juɨ₁liaꞌ₂ dsa₂ a₂mei₅₄ quiángꞌ₂, on₃ guëꞌ₂ juɨ₁liaꞌ₂ i₂lɨ́n₅ o₁rɨ́ngꞌ₂, on₃ guëꞌ₂ juɨ₁liaꞌ₂ i₂cha₂ cu₄ tiánꞌ₅ cau₅ quiángꞌ₂ në́₃. Ia₁ conꞌ₂ tsá₃ ŋó₅, dsa₂ le₂ꞌéi₂, lé₂ le₃të́₂, a₂jéinꞌ₃ táng₃ quiángꞌ₂.
13 Jaun₂ në́₃, në₁juaꞌ₂ ꞌniogꞌ₂ jmóꞌ₂ caun₂ jmɨg₄, teꞌ₂ jmáꞌ₃ liaꞌ₂ dsa₂ te₂ŋé₂, dsa₂ ꞌlianꞌ₂, dsa₂ ten₄, dsa₂ guianꞌ₅₄ në́₃.
14 Jaun₂ le₂në₅ bá₄ le₃changꞌ₂ dse₃. Ia₁ dsa₂ ꞌéi₂ në́₃, tsá₃ quɨꞌ₅₄ jmɨg₄ le₃jéinꞌ₃ quiángꞌ₂, la₁ i₁jáun₃ bá₄ tɨ́ngꞌ₄ quiángꞌ₂, i₁jenꞌ₅₄ ca₂le₃jɨ́n₃ dsa₂ dsen₃.
Jág₁ jángꞌ₅ léi₄ juɨ₁liaꞌ₂ dsa₂ i₂té₄ ja₁niog₅ jmɨg₄
15 Jan₂ dsa₂ i₂jme₁guá₄ cau₅ i₂ca₂nág₂ jág₁ në₅, ca₂tsɨ́ꞌ₃ Jesús:
―ꞌE₂ guë́₄ dsen₃ i₂tianꞌ₃ guë́ꞌ₃b ja₁gon₂ Diú₄.
16 Jaun₂ ca₂juáꞌ₂ Jesús:
―Jme₁chan₂ jan₂ dsa₂ i₂ca₂cuë₃ caun₂ má₃ pa₁, jaun₂ ca₂të́ꞌ₃ juɨn₅ dsa₂.
17 Jme₁ca₂të́₂ hora a₂nio₃ jmɨg₄ në́₃, ca₂chein₃ dsa₂ i₂jme₂ti₃ ta₁ ne₅₄, i₁chiꞌ₄ dsa₂ i₂ma₂lë́₅ jág₁ dsi₁lén₂: “I₂nóꞌ₅ ꞌniaꞌ₂, ia₁ ma₂lë́₅ co₂jŋia₅₄ ca₂le₃jë́₃.”
18 La₁ ca₂le₃jɨ́n₃ bá₄ ca₂juáꞌ₂ tsá₃ jɨin₅₄. I₂le₂ꞌuɨg₅₄ ca₂ŋag₃: “Caun₂ ꞌuë₃ liaꞌ₂ në₂lá₂; ja₁jaun₂ nei₅₄ i₁jág₃. ꞌÉn₃ dso₄ quió₃ tsá₃ lé₂ nei₅₄.”
19 I₂siánꞌ₂ guëꞌ₂ táng₃ ca₂juáꞌ₂: “ꞌŊiá₂ dsánꞌ₃ ca₁juɨ₅ i₂quiaꞌ₂ ꞌuë₃ i₂të₂ca₂láng₂, i₂ꞌéi₂ nei₅₄ i₁quión₃ ꞌí₁ chi₂juaꞌ₂ ma₂téin₅ jmo₃ ta₁. ꞌÉn₃ dso₄ quió₃ tsá₃ lé₂ nei₅₄.”
20 I₂siánꞌ₂ guëꞌ₂ ca₂juáꞌ₂ táng₃: “Gu₃ liaꞌ₂ në₂jengꞌ₅₄; jaun₂ lë́₃, tsá₃ lé₂ nei₅₄.”
21 Jaun₂ jme₁dsiánꞌ₃ mozo ꞌéi₂ ca₂jmógꞌ₃ jág₁ ne₄ juɨg₅₄, jaun₂ ca₂rë₃ꞌné₃ bá₄ juɨg₅₄. Jaun₂ ca₂juáꞌ₂ tsɨ́ꞌ₅ táng₃ mozo ꞌéi₂: “Co₂chiꞌ₅₄ o₂ŋɨ₄ jë₄ calles, le₂tan₅₄ ja₁le₁ŋɨꞌ₂ dsa₂ juɨn₅ jë₄ juɨg₂, qui₂o₂quian₅ dsa₂ te₂ŋé₂, dsa₂ ꞌlianꞌ₂, i₂guianꞌ₅₄, i₂ten₄ në́₃.”
22 Jme₁co₂lág₂ jaun₂, ca₂juáꞌ₂ dsa₂ mozo ꞌéi₂: “Guiꞌ₅₄, ma₂në₂jmo₃ conꞌ₂ lë́₅ në₂juaꞌ₅₄. Jo₂ bá₄ guë́₄ dsi₂néi₂.”
23 Jaun₂ ca₂juáꞌ₂ táng₃ juɨg₅₄: “Gua₂ táng₃ jë₄ calles le₂tan₅₄ ja₁lë́₄ o₄juɨ₅, o₂quian₅ tion₅₄ dsa₂ i₂jengꞌ₂, jaun₂ canꞌ₂ dsi₂néi₂ quió₃.
24 Ia₁ le₂në₅ bá₄ juáꞌ₅ jniá₂, ꞌi₁jan₂ i₂jme₁lë́₄ jág₁ ca₂të́₃ le₂ꞌuɨg₅₄ ꞌéi₂, tsá₃ queinꞌ₃ jë₄ jmɨg₄ quió₃.”
ꞌŊio₅ bá₄ ꞌuaꞌ₂ ta₁ a₂jme₃quianꞌ₅₄ dsa₂ Te₁guiꞌ₅₄
25 Juɨn₅ lɨn₃ dsa₂ i₂jme₁ma₂quianꞌ₅₄ Jesús. Jaun₂ ca₂jéinꞌ₃ ca₂juáꞌ₂:
San Lucas 14:25-35
26 ―Chi₂juaꞌ₂ ꞌein₂ ꞌei₅ dsɨ́₅ jme₃quiongꞌ₅₄ jniá₂, në₁juaꞌ₂ tsá₃ ca₂ténꞌ₃ dsɨ́₅ téin₂ jmei₂, chog₅₄, dsa₂ mɨ́₂ quiáin₅, chiꞌ₂-guein₂ quiáin₅, ca₂le₃jɨ́n₃ guë́₄ o₁rɨinꞌ₅₄ në́₃; në₁juaꞌ₂ tsá₃ ca₂ténꞌ₃ dsɨ́₅ le₂jiog₅ jme₂dsí₂ quióꞌ₅ në́₃, tsá₃ lé₂ le₃léin₂ dsa₂ quiáng₃.
27 Juaꞌ₅₄ ꞌein₂ tsá₃ ca₂ténꞌ₃ dsɨ́₅ gue₃ ꞌmú₃,c jiá₃ chi₁coꞌ₅₄ quióꞌ₅, tsá₃ lé₂ le₃léin₂ dsa₂ quiáng₃.
28 Juaꞌ₅₄ meiꞌ₂ guë́₃ chan₂ janꞌ₂ ꞌniaꞌ₂ i₂ꞌnio₃ chiꞌ₃ caun₂ nɨ₁ꞌiaꞌ₂ ŋei₅, ¿on₁ jŋiá₅ deꞌ₂ con₂ ꞌí₁ chi₂juaꞌ₂ ma₂len₅ cu₄ quióꞌ₅ ca₂liaꞌ₂ a₂ꞌióꞌ₄ a₂jaun₂?
29 Ia₁ në₁juaꞌ₂ tsá₃ le₂jaun₂, jme₃lióg₃ ꞌuɨg₅₄ ꞌiaꞌ₂, tsá₃ tióꞌ₅ guëꞌ₂ jme₃ꞌióꞌ₃, ca₂le₃jɨ́n₃ dsa₂ i₂jág₃ a₂jaun₂, a₂lë₁co₂jmógꞌ₂ co₃ŋág₂ bá₄.
30 Dsia₃: “Dsa₂ në₅ conꞌ₂ jŋiaꞌ₅₄ ca₂jme₃lióg₃ ꞌuɨg₅₄, la₁ tsá₃ guëꞌ₂ quɨꞌ₅₄ jmɨg₄ jme₃ꞌióꞌ₃.”
31 O₃ juɨ₁liaꞌ₂ jan₂ rag₅₄ guëꞌ₂, i₂jmo₃ ꞌnei₂ quianꞌ₅₄ jan₂ rag₅₄ siánꞌ₂, ¿tsa₁ jŋiá₅ deꞌ₂ guá₃ con₂ ꞌí₁ chi₂juaꞌ₂ tióꞌ₅ quianꞌ₅₄ guian₃ mei₅ ꞌlióg₂ quiáin₅, dsɨ₃quɨ́inꞌ₂ quianꞌ₅₄ guión₂ mei₅?
32 Chi₂juaꞌ₂ ma₂líꞌ₄, tsá₃ tióꞌ₅ në́₃, të₁liaꞌ₂ uɨ́ng₂ guë́₄ já₅ rag₅₄ jan₂, chein₃ dsa₂ i₂quian₅ jág₁ a₂mɨ₂₃ dsian₅ co₂ŋeiꞌ₅₄ mɨꞌ₅₄.
33 Le₂në₅ bá₄ chi₂ꞌein₂ ꞌniaꞌ₂ i₂tsá₃ ca₂ténꞌ₃ dsɨ́₅ tí₂ ca₂le₃jë́₃ a₂cha₂ quióꞌ₅, tsá₃ lé₂ le₃léin₂ dsa₂ quiáng₃.
Jág₁ jángꞌ₅ léi₄ juɨ₁liaꞌ₂ ꞌa₂ liaꞌ₂ lë́₅ tsɨ₁ŋi₁
34 ꞌ(Juɨ₁liaꞌ₂ dsa₂ i₂quianꞌ₅₄ jniá₂ lɨ́in₅ juɨ₁liaꞌ₂ lë́₅ tsɨ₁ŋi₁.) A₂dse₃ bá₄ tsɨ₁ŋi₁ të₁liaꞌ₂ ŋiꞌ₅₄. La₁ në₁juaꞌ₂ ca₂ꞌen₃ ŋiꞌ₅₄ në́₃, ¿ꞌa₂ bá₄ liaꞌ₂ lé₂ le₃lei₂ táng₃?
35 Tsá₃ ma₃ꞌe₂ ta₁ tí₄, on₃ guëꞌ₂ lé₂ le₃lé₂ guaꞌ₅₄, on₃ guëꞌ₂ ma₂tí₅ ta₁ juaꞌ₅₄ a₂le₃lé₂ ca₂bëꞌ₅₄ ꞌoꞌ₅₄. Jŋiaꞌ₅₄ liaꞌ₂ a₂dsɨ₃gaꞌ₅₄ uɨ́ng₂ bá₄. I₂dsi₅₄ gua₄, rë₂ juɨ₁nei₅₄.