2 ꞌUɨg₅₄ jaun₂, dsa₂ fariseos* quianꞌ₅₄ të₅juáꞌ₅ ca₂chi₂ca₂ꞌɨin₃ Jesús. Ca₂juáꞌ₂:

3 Jaun₂ lë₃ ca₂juáꞌ₂ Jesús jág₁ jángꞌ₅ léi₄ la₂:

4 ―¿I₂ꞌein₂ ꞌniaꞌ₂, juɨ₁liaꞌ₂ i₂ꞌŋio₅ caun₂ ꞌŋiá₂-lón₂ jáꞌ₂ chaꞌ₂, në₁juaꞌ₂ ca₂i₃cónꞌ₅ jan₂, tsa₁ ja₁co₂ꞌŋiog₅ jaun₂ toinꞌ₂ i₂quéinꞌ₂ ne₂guión₂ rë₂dsɨ́₂ guia₃-né₂ (99) conꞌ₂ i₂te₂, dsó₃ táng₃ dsɨ₂juɨ₅, dsɨ₂ꞌniaiꞌ₂ i₂jan₂ i₂i₃cónꞌ₅ ꞌéi₂, ꞌnauꞌ₂ ca₂liaꞌ₂ ca₂dsáuꞌ₂?

5 Jë₁ma₂ca₂dsáuꞌ₂ në́₃, të₂ juɨ₅ co₁dsi₁₂, jóinꞌ₅ táng₃ ꞌioꞌ₂ jénꞌ₅.

6 Jë₁ma₂dsiáinꞌ₃ dsi₂néi₂ në́₃, ŋɨ́iꞌ₂ ca₂le₃jɨ́n₃ a₂mei₅₄ quiáin₅, quianꞌ₅₄ guë́₄ dsa₂ i₂tiánꞌ₅ cau₅ quióꞌ₅. Jaun₂ juáꞌ₂: “Në₃ o₁tióꞌ₄, jmó₁ ꞌioꞌ₂ quianꞌ₅₄ jniá₂, ia₁ dsánꞌ₅ bá₄ jáꞌ₂ chaꞌ₂ i₂jme₁ma₂i₂cónꞌ₅ quiáng₃.”

7 Juáꞌ₅ jniá₂, ꞌŋio₅ lɨn₃ guë́₄ bá₄ cha₂ o₂ꞌŋió₃ dsɨ₅ gueiꞌ₅₄ i₂juɨ́g₃ o₄quióꞌ₄ jan₂ dsa₂ i₂rë₂cánꞌ₄ dso₄, i₂dsɨ₂quénꞌ₅ dsɨ́₅, liaꞌ₂ conꞌ₂ guë́₄ o₄quióꞌ₄ i₂quéinꞌ₂ ne₂guión₂ rë₂dsɨ́₂ guia₃-né₂ (99) dsa₂ “dsen₃” i₂tsá₃ ꞌe₂ ꞌnióꞌ₅ jme₃tsɨ́n₃ dsɨ́₅.

8 ꞌO₃ juɨ₁liaꞌ₂ jan₂ dsa₂ mɨ́₂ i₂ꞌio₅ guia₃ cu₄ ꞌuaꞌ₂,^a në₁juaꞌ₂ ca₂i₃cóꞌ₅ caun₂, ¿tsa₁ téi₂ si₂, ꞌiáꞌ₂ dse₃ lɨn₃ dsi₂néi₂, ꞌnoꞌ₂ ca₂liaꞌ₂ ca₂dsóꞌ₂?

9 Jë₁ma₂ca₂dsóꞌ₂ në́₃, jmo₂₃ ꞌioꞌ₂, ŋɨ́iꞌ₂ ꞌio₅₄ a₂mei₅₄ quiáin₅, i₂tiánꞌ₅ cau₅ quióꞌ₅ në́₃, jaun₂ juáꞌ₂: “Në₃ o₁jmó₁ ꞌioꞌ₂ quianꞌ₅₄ jniá₂, ia₁ dsóꞌ₅ bá₄ cu₄ a₂jme₁ma₂i₂ꞌág₃ quió₃.”

10 Jaun₂ le₂në₅ bá₄ juɨ́g₂ jniá₂ ꞌniaꞌ₂, chan₂ o₂ꞌŋió₃ o₂jŋia₃ dsɨ₅ ángeles quián₅ Diú₄ o₄quióꞌ₄ jan₂ dsa₂ i₂rë₂cánꞌ₄ dso₄, i₂ma₂ca₂dsi₃quénꞌ₅ dsɨ́₅.

11 Ca₂juáꞌ₂ Jesús ján₃:

12 I₂lɨ́n₅ i₂meꞌ₂ guë́₄ ca₂tsɨ́ꞌ₃ jmei₂: “Tia₅₄, cuë₄ ca₂dsio₄ cu₄ quiángꞌ₂ conꞌ₂ ca₂tɨ́ng₂.” Jaun₂ jmei₂ në́₃ ca₂dsióꞌ₃ ꞌe₂ a₂cha₂ quióꞌ₅, jma₃quén₅ ca₂cuë́ꞌ₃ chiꞌ₂ quiáin₅ conꞌ₂ ca₂tɨ́in₂.

13 Meiꞌ₂ bá₄ cang₂ jaun₂, dsó₂ i₂meꞌ₂ guë́₄ qui₂ca₂ꞌnag₃ a₂jme₁ma₂lë́₅ quióꞌ₅. Quianꞌ₅₄ cu₄ jaun₂ ca₂ꞌí₃ juɨ₅ i₁ŋɨ₂ uɨ́ng₂ caun₂ ꞌuë₃ siáꞌ₂. Ja₁jaun₂ ca₂i₁ꞌéin₄ jë₂ cu₄ quióꞌ₅, tsá₃ ꞌen₅₄ dsɨ́₅ ca₂rë₃cháin₃.

14 Jme₁ma₂dsóꞌ₃ jë₂ cu₄ në́₃, ꞌŋio₅ lɨn₃ ca₂rë₃ꞌɨ́n₃ a₂guë́ꞌ₃ dsa₂ juɨg₂ jaun₂. ꞌEí₂ në́₃ ma₂ŋɨ₂₃ ꞌoin₅₄.

15 Jaun₂ ŋó₃ i₃ꞌnióg₂ ta₁ a₂jmo₃ quióꞌ₅ dsa₂ juɨg₂ jaun₂. Jaun₂ dsa₂ ꞌéi₂ në́₃ ca₂chei₃ ja₁nau₂ quióꞌ₅ a₂ŋɨiꞌ₃ i₁ŋí₅.

16 Jë₁ma₂të́₂ rë₁guë́ꞌ₃ i₁ŋí₅, ca₂liaꞌ₂ ma₂le₃guë́ꞌ₃ ꞌŋiog₅ cuáꞌ₁ tsɨ₁rë₂jnei₂ a₂guë́ꞌ₅ jáꞌ₂, la₁ ꞌi₁jan₂ tsá₃ ꞌein₂ ca₂cuë₃ a₂guë́ꞌ₅.

17 Jaun₂ ca₂i₃jŋia₅ dsɨ́₅: “¡Të₁liaꞌ₂ juɨn₅ mozos i₂ꞌŋio₅ ŋeꞌ₃, cha₂ qui₂rë₂tsón₂ a₂guë́ꞌ₅, jniá₂ në́₃ ja₁lá₃ jŋɨ́gꞌ₅ dsɨ₃ ꞌong₅₄!

18 ꞌAg₅₄ caun₂ dsɨ₃, négꞌ₄ táng₃ dsi₂néi₂ quióꞌ₅ ŋeꞌ₃. Juɨg₅₄ le₂la₂: Tia₅₄ quiáng₃, ꞌe₂ guë́₄ juëꞌ₂ dso₄ ca₂ꞌno₃ ne₄ Diú₄ quianꞌ₅₄ ja₁congꞌ₂;

19 jŋiaꞌ₅₄ tsá₃ ma₃ca₂tɨ́ng₂ a₂të́ꞌ₄ jniá₂ jón₃. La₁ jag₄ jniá₂ liaꞌ₂ ja₁jɨngꞌ₅₄ jan₂ dsa₂ i₂tion₄ quiángꞌ₂ bá₄.

20 Jaun₂ ca₂nau₂ ca₂ꞌí₃ juɨ₅ jóinꞌ₃ táng₃ quióꞌ₅ jmei₂. La₁ uɨ́ng₂ bá₄ guë́₄ jóinꞌ₅, jme₁ca₂jág₂ jmei₂. Ca₂táꞌ₂ ŋéi₂ dsɨ́₅, ca₂ŋó₃ co₂chiꞌ₅₄, ca₂cágꞌ₃ cu₅ ca₂chenꞌ₃ quióꞌ₅ ꞌioꞌ₂ jénꞌ₅.

21 Jaun₂ guë́₄ ca₂juáꞌ₂ ja₁ŋiꞌ₅₄: “Tia₅₄ quiáng₃, ꞌe₂ guë́₄ juëꞌ₂ dso₄ ca₂ꞌno₃ ne₄ Diú₄ quianꞌ₅₄ ja₁congꞌ₂; jŋiaꞌ₅₄ tsá₃ ma₃ca₂tɨ́ng₂ a₂të́ꞌ₄ jniá₂ jón₃.”^b

22 La₁ jmei₂ në́₃, ca₂tsɨ́ꞌ₃ dsa₂ i₂jme₂ti₃ ta₁ tionꞌ₅₄ quiáin₅: “¡Ma₂në₃ co₂chiꞌ₅₄! O₂dsi₄ ꞌmɨꞌ₂ a₂lë́₅ a₂dse₃ guë́₄, quengꞌ₅₄ chiꞌ₂ quiáng₃; caun₂ guëꞌ₂ anillo tioꞌ₂ chi₁gú₃. Co₂dsánꞌ₃ guëꞌ₂ nɨ₁lau₂ toꞌ₅₄ ꞌniaꞌ₂ tag₅₄;

23 Jaun₂ o₁teꞌ₄ ꞌniaꞌ₂ ca₁juɨ₅ i₂ma₂ꞌonꞌ₅₄ chénꞌ₅, jaun₂ jŋɨ́iꞌ₄ ꞌniaꞌ₂. ¡Jaun₂ que₅₄, tióꞌ₄ jmó₁ ꞌioꞌ₂!

24 Ia₁ chiꞌ₂ në₅ quiáng₃, në₂jag₄ i₂jme₁ma₂jon₅ bá₄ në₅, la₁ chain₂ bá₄; jme₁ca₂i₃cóinꞌ₅, la₁ ma₂dsáinꞌ₅ bá₄.” Jaun₂ ca₂jme₃lióg₃ jmɨg₄ tioinꞌ₅₄.

25 ꞌTë₁liaꞌ₂ jaun₂, chiꞌ₂ ja₁ŋiꞌ₅₄ i₂lɨ́n₅ i₂juɨnꞌ₂ guë́₄, jme₁ꞌein₅₄ ja₁nau₂. Jme₁ma₂ja₂quián₃ guainꞌ₂ dsi₂néi₂, ca₂nág₂ i₁niog₅ son₅₄ i₁dsan₅ dsa₂.

26 Jaun₂ ca₂të́ꞌ₃ jan₂ dsó₂ ca₂ŋag₃ ꞌe₂ niog₅ lë́₂.

27 Jaun₂ juáꞌ₂ ꞌéi₂: “Dsó₂ rɨ́ngꞌ₂ bá₄ guánꞌ₅, jaun₂ ŋéiꞌ₅ në́₃ në₂jmo₃ ꞌéiꞌ₃ në₂jŋɨꞌ₃ dsa₂ ca₁juɨ₅ i₂jme₁chénꞌ₄ ꞌonꞌ₅₄, ia₁ guáinꞌ₅, dsein₃ bá₄, tsá₃ ꞌe₂ lɨ́in₅.”

28 La₁ ca₂rë₃ꞌné₃ bá₄ rɨinꞌ₅₄ i₂juɨnꞌ₂ ꞌéi₂. Tsá₃ ꞌnio₃ ꞌí₂ dsi₂néi₂; jaun₂ ca₂o₃ꞌɨ́n₃ jmei₂, ca₂juáꞌ₂ jág₁ ꞌua₁.

29 La₁ ꞌéi₂ në́₃ ca₂ŋag₃ ca₂tsɨ́ꞌ₃ jmei₂: “Ca₂le₃jë́₃ ŋi₂ ma₂guio₃ gua₅₄ jme₃tí₂ ta₁ neꞌ₅₄, tsá₃ lɨ́gꞌ₂ juaꞌ₅₄ ma₂jmo₃ tsá₃ nag₅₄ ja₁congꞌ₂. Ca₂liaꞌ₂ jŋiaꞌ₅₄ jan₂ chein₂ lau₂ bá₄ tsá₃ ma₂cuagꞌ₅₄ jniá₂ juaꞌ₅₄ jmo₅₄ jmɨg₄ quianꞌ₅₄ a₂mei₅₄ quiáng₃.

30 Në₃ guë́₄ tɨngꞌ₂ jmóꞌ₂ jmɨg₄ ia₁ guánꞌ₅ ja₁ŋíꞌ₄ në₅, i₂lë₁qui₂i₁ꞌén₄ cu₄ quiángꞌ₂, qui₂i₁ŋɨ₂ liaꞌ₂ lë́₂ dsɨ́₅ quianꞌ₅₄ ꞌio₅₄ ga₂. Në₃ në́₃, jmɨg₄ jmoꞌ₂ o₄quióꞌ₄, jŋɨ́gꞌ₅ ca₁juɨ₅ i₂ꞌonꞌ₅₄ guë́₄ jme₁chénꞌ₄.”

31 Jaun₂ ca₂ŋag₃ jmei₂: “Jón₃, ma₁ co₂tan₅₄ bá₄ ŋéiꞌ₂ ꞌne₂ quianꞌ₅₄ jniá₂; a₂quiánꞌ₂ ꞌne₂ bá₄ ca₂le₃jë́₃ a₂cha₂ quió₃.

32 La₁ në₃ në́₃ co₂në₅ ca₂tág₂ jmó₁ jmɨg₄, quián₁ o₂ꞌŋió₃ dsɨ₅, ia₁ guánꞌ₅ rɨ́ngꞌ₂, në₂jag₄ i₂jme₁ma₂jon₅, la₁ në₃ ma₂chain₂ bá₄ táng₃; jme₁ca₂i₃cóinꞌ₅, la₁ ma₂dsáinꞌ₅ bá₄.”