Jág₁ jángꞌ₅ léi₄ juɨ₁liaꞌ₂ jan₂ dsa₂ i₂tsá₃ ca₂rë₃tiꞌ₅₄
16
Ca₂juáꞌ₂ Jesús ján₃ ca₂tsɨ́ꞌ₃ dsa₂ i₂quiainꞌ₅₄:
―Jme₁chan₂ jan₂ dsa₂ cha₂ cu₄ jme₁ꞌŋioi₂₃ jan₂ dsa₂ i₂niog₅ gu₂ dsi₂néi₂ quióꞌ₅; la₁ ca₂i₁dsia₂ jan₂ dso₄, ia₁ juáꞌ₂ a₂lë₁jme₁qui₂ꞌén₂ ꞌéi₂ a₂cha₂ quióꞌ₅ juɨg₅₄.
San Lucas 16:1-18
2 Jaun₂ ca₂të₃ juɨg₅₄ ca₂juáꞌ₂: “¿I₂ꞌe₂ bá₄ jág₁ në₅ nag₂₃ quiánꞌ₂ ꞌne₂? Jangꞌ₅₄ cuentas quiángꞌ₂, ta₁ a₂lɨ́ngꞌ₅, ia₁ ja₁lá₃ jŋiaꞌ₃ ta₁ a₂niog₅ gogꞌ₂.”
3 Jaun₂ dsa₂ ꞌéi₂ në́₃ ca₂ꞌnáuꞌ₃ dsɨ́₅: “¿ꞌE₂ bá₄ jmo₅₄ jniá₂? Jŋiáꞌ₂ juɨg₃ ta₁ quió₃. Tsá₃ béng₂ juaꞌ₅₄ jmo₅₄ ta₁ ja₁nau₂, ján₃ guëꞌ₂ guiꞌ₄ jniá₂ juaꞌ₅₄ a₂lë₁mɨ₁₂ jme₃ꞌo₅₄ dsa₂.
4 Ma₂guion₄ ꞌa₂ liaꞌ₂ jmo₅₄ ia₁jaun₂ guei₃ dsa₂ siánꞌ₂ dsi₂néi₂ quióꞌ₅ jë₁ma₂të₁tsɨngꞌ₅₄ tsá₃ ta₁ cha₂ jmo₅₄.”
5 Jaun₂ ca₂të́ꞌ₃ të₃ qui₂ján₃ dsa₂ i₂jme₁le₁rɨ́n₃ quióꞌ₅ juɨg₅₄. I₂le₂ꞌuɨg₅₄ ca₂tsɨ́ꞌ₃: “¿Je₂liáꞌ₂ rɨngꞌ₂ quióꞌ₅ guiꞌ₅₄?”
6 Jaun₂ ca₂juáꞌ₂ ꞌéi₂: “Caun₂ ꞌŋiá₂-láu₂ ba₂rɨg₅₄a noꞌ₅₄.” Jaun₂ juáꞌ₂: “La₂ ron₅ si₂ ja₁ton₅ conꞌ₂ a₂rɨngꞌ₂. Né₂, ma₂në₃ jmo₄ táng₃ caun₂ a₂siáꞌ₂, tióꞌ₃ jŋiaꞌ₅₄ të₂láu₃-guiá₂ bá₄ taunꞌ₅₄ a₂le₃rɨngꞌ₂.”
7 Jaun₂ ca₂tsɨ́ꞌ₃ táng₃ jan₂ i₂siánꞌ₂: “ꞌNe₂ guëꞌ₂, ¿je₂liáꞌ₂ rɨngꞌ₂?” Jaun₂ juáꞌ₂: “Caun₂ mei₅ ꞌma₂ cuɨg₂.”b Jaun₂ ca₂ŋag₃: “Jónꞌ₅ si₂ ja₁ton₅ a₂rɨngꞌ₂; jmo₄ táng₃ caun₂ a₂siáꞌ₂ tióꞌ₃ quéinꞌ₂ co₂ne₂guióg₂ bá₄ taunꞌ₅₄.”
8 Juɨg₅₄ në́₃, rë₂ bá₄ ca₂ꞌɨin₃ dsa₂ i₂tsá₃ ca₂rë₃tiꞌ₅₄ ꞌéi₂, ia₁ ꞌŋioi₅₄ ca₂jmo₃. Ia₁ ja₂lɨn₃ guë́₄ bá₄ ꞌŋio₅₄ juɨ₁liaꞌ₂ dsa₂ mɨ₂güɨ́g₃ jmɨg₄ në₃, liaꞌ₂ conꞌ₂ guë́₄ chiꞌ₂-guein₂ i₂i₂nio₄ ja₁jniá₂ si₂.
9 Jaun₂ juɨ́g₂ jniá₂ ꞌniaꞌ₂, ꞌnioꞌ₂ ꞌniaꞌ₂ juɨ₅ ꞌa₂ liaꞌ₂ léngꞌ₂ a₂mei₅₄ quianꞌ₅₄ cu₄ cha₂ mɨ₂güɨ́g₃ ꞌlɨgꞌ₅₄ la₂, ia₁jaun₂ jë₁ma₂ca₂dsa₃ cu₄, chan₂ bá₄ i₂le₃guéiꞌ₂ ꞌniaꞌ₂ ja₁o₁tiángꞌ₂ dse₃ co₂tan₅₄.
10 Juɨ₁liaꞌ₂ i₂rë₂tiꞌ₅₄ rë₂ quianꞌ₅₄ ca₂juɨg₄ a₂të₂no₄ gu₂, ján₃ bá₄ le₂jaun₂ rë₂tiꞌ₅₄ quianꞌ₅₄ ꞌlióng₂. Le₂jaun₂ guëꞌ₂ juɨ₁liaꞌ₂ dsa₂ i₂tsá₃ rë₂tiꞌ₅₄ quianꞌ₅₄ ca₂juɨg₄, ján₃ bá₄ le₂jaun₂ tsá₃ rë₂tiꞌ₅₄ quianꞌ₅₄ ꞌlióng₂.
11 Jaun₂ në́₃, në₁juaꞌ₂ tsá₃ rë₂tenꞌ₅₄ ꞌniaꞌ₂ quianꞌ₅₄ cu₄ cha₂ mɨ₂güɨ́g₃ ꞌlɨgꞌ₅₄ la₂, ¿ꞌein₂ bá₄ i₂lé₂ le₃ꞌág₃ caun₂ dsɨ́₅ ja₁conꞌ₂ ꞌniaꞌ₂ quianꞌ₅₄ a₂lë́₅ a₂quen₅ të₃dsónꞌ₂?
12 Në₁juaꞌ₂ tsá₃ rë₂tenꞌ₅₄ ꞌniaꞌ₂ quianꞌ₅₄ a₂lë́₅ quióꞌ₅ dsa₂ siánꞌ₂, ¿ꞌein₂ bá₄ dsia₃ gogꞌ₂ ꞌniaꞌ₂ juɨ₁liaꞌ₂ a₂ca₂tɨ́nꞌ₂ ꞌniaꞌ₂ guiongꞌ₅₄?
13 ꞌI₁jan₂ dsa₂ i₂ma₂ꞌlianꞌ₅₄ tsá₃ lé₂ le₃jme₃ti₃ ta₁ ne₄ on₃ juɨg₅₄. Ia₁ jme₃ꞌŋiai₅₄ jan₂, jan₂ guëꞌ₂ jme₃ꞌnioi₃; o₃ jme₂gain₃ jan₂, jan₂ guëꞌ₂ tsá₃ juɨ₅ toinꞌ₂. Tsá₃ ꞌein₂ ꞌniaꞌ₂ lé₂ le₃jme₃ti₃ liaꞌ₂ ne₄ Diú₄, liaꞌ₂ ne₄ Cu₄ në́₃.
14 Dsa₂ fariseos* në́₃, jme₁tioinꞌ₅₄ ꞌnag₂₃ jë₂ jág₁ në₅. Jaun₂ jŋiaꞌ₅₄ ca₂ŋág₂ ꞌnei₂ bá₄ jme₁ca₂nág₂, ia₁ lɨ́in₅ dsa₂ i₂ŋɨ́₄ dsɨ₅₄ cu₄.
15 Jaun₂ ca₂juáꞌ₂ Jesús:
―ꞌNiaꞌ₂ jmoꞌ₂ a₂dsengꞌ₃ të₃ne₄ dsa₂, la₁ cuɨ́ꞌ₅ bá₄ Diú₄ dse₃ ꞌa₂ liaꞌ₂ lë́₅ ꞌauꞌ₂ ꞌniaꞌ₂. Ia₁ juɨ₁liaꞌ₂ i₂jmo₅ dsɨ́₅ a₂ŋɨ́₄ lë₃ dsein₅₄ ꞌŋio₅ quein₅, a₂jaun₂ ꞌioꞌ₅₄ Diú₄.
ꞌÉiꞌ₃ Juáꞌ₅, quianꞌ₅₄ ja₁gon₂ Diú₄
16 ꞌJme₁ron₅ ꞌÉiꞌ₃ Juáꞌ₅, quianꞌ₅₄ Si₂ quióꞌ₅ dsa₂ i₂jme₁ꞌë́₂ jág₁ quián₅ Diú₄, ca₂liaꞌ₂ ca₂të́₂ jmɨg₄ a₂jme₁chan₂ Juan₅₄. Ca₂le₃jaun₂ qui₂dsɨ₂ꞌag₅ jág₁ juɨ₁liaꞌ₂ ja₁gon₂ Diú₄; ma₂ja₂lén₂ ca₂le₃jɨ́n₃ dsa₂ qui₂quɨ́nꞌ₅ bí₂ a₂tóinꞌ₃.
17 Tsá₃ guë́₄ ꞌe₂ ta₁ quian₅ a₂dsɨ₃ŋɨ́₂ dsɨ₁ gueiꞌ₅₄ quianꞌ₅₄ guaꞌ₅₄ ꞌuë₃, liaꞌ₂ conꞌ₂ guë́₄ dsɨ₃ꞌén₂ caun₂ léi₄ píꞌ₁ a₂le₁ton₅ ꞌÉiꞌ₃, juaꞌ₅₄ a₂tsá₃ le₃ti₃.
Jme₂tag₅ Jesús ꞌa₂ liaꞌ₂ lë́₅ juɨ₁liaꞌ₂ a₂tén₂ dsa₂ dsɨ₂i₂gu₂
18 ꞌNë₁juaꞌ₂ jan₂ dsa₂ ŋeꞌ₂ ca₂téin₂ dsa₂ mɨ́₂ quiáin₅, a₂jéinꞌ₂ táng₃ gu₂ quianꞌ₅₄ i₂siánꞌ₂, ꞌno₂₃ dso₄. Ján₃ guëꞌ₂ le₂jaun₂ në₁juaꞌ₂ dsa₂ ŋeꞌ₂ ca₂cain₃ dsa₂ mɨ́₂ i₂ma₂téi₂ dsɨ₂i₂gu₂, ján₃ bá₄ co₂jaun₂ ꞌno₂₃ dso₄ ján₃.
Jan₂ dsa₂ cha₂ cu₄, quianꞌ₅₄ Lázaro
19 ꞌJme₁chan₂ jan₂ dsa₂ cha₂ cu₄ i₂jme₁quɨ́ꞌ₅ jmáꞌ₃ tsɨnꞌ₅₄ jláꞌ₁, quianꞌ₅₄ ꞌmɨꞌ₂ ꞌuɨꞌ₃ a₂cheinꞌ₅₄ ta₁jain₂, në́₃. Le₂ꞌo₃ jmɨg₄ bá₄ jme₁cuë́ꞌ₅ o₂ꞌŋió₃ o₂jŋia₃ dsɨ₅, jme₁jmo₂₃ jmɨg₄ jláꞌ₁.
San Lucas 16:19-31
20 Jme₁chan₂ táng₃ jan₂ dsa₂ te₂ŋé₂ i₂jme₁chen₂ Lázaro,c i₂dsoꞌ₅₄ jme₁qui₂rë₂canꞌ₂ ꞌméꞌ₅ nɨ₁ŋɨ₁₂. Jme₁dsɨ₂dsiog₃ dsa₂ o₄ꞌné₄ quióꞌ₅ dsa₂ cha₂ cu₄.
21 Dsa₂ te₂ŋé₂ ꞌéi₂ në́₃ jme₁ꞌnio₃ jme₃tainꞌ₅₄ quianꞌ₅₄ a₂tsɨ₂séiꞌ₂ ne₄ mesa. Ca₂të₂ dsɨ₂jɨꞌ₅₄ jme₁ja₂lén₂ ja₂ꞌlíꞌ₃ ne₄ ꞌméꞌ₅ quióꞌ₅.
22 Cang₂ jaun₂ ca₂jon₃ bá₄ dsa₂ dsɨ₂ŋé₂ ꞌéi₂, ca₂tág₃ ángeles ja₁con₂ Abraham. Cang₂, ca₂jon₃ bá₄ dsa₂ cha₂ cu₄ ꞌéi₂ ján₃. Ca₂ꞌó₂ bá₄ dsa₂ në́₃.
23 Jme₁ma₂ꞌein₅₄ ŋág₅ uɨg₅ ja₁dsɨ₂len₅ ꞌlag₄,d ca₂chógꞌ₃ ne₅₄ ca₂jɨ́in₂ uɨ́ng₂ Abraham quianꞌ₅₄ Lázaro cau₅ quióꞌ₅.
24 Jaun₂ ca₂guióꞌ₃ co₂mɨꞌ₅₄ ca₂juáꞌ₂: “Tia₅₄ Abraham, dsia₄ ŋéi₂ ꞌauꞌ₂ jniá₂, chen₅ Lázaro në₅ juɨ₁tia₅₄ chi₁gú₃ néꞌ₃ jmɨ́g₃, juɨ₁jia₂ jme₃güɨgꞌ₂ le₁tsɨꞌ₃. Ia₁ ꞌŋio₅ lɨn₃ uɨg₅ ŋag₅₄ ꞌeng₅₄ jë₄ si₂ la₂.”
25 Jaun₂ ca₂ŋag₃ Abraham: “Jón₃, dsá₂ ꞌauꞌ₂ jmo₄, ca₂gueꞌ₅₄ bá₄ ꞌne₂ a₂dse₃ të₁liaꞌ₂ ca₂rë₃chángꞌ₃. Lázaro la₂ në́₃, tsá₃ ꞌe₂ dse₃ ca₂rë₃cháin₃. Jaun₂ rë₂në́₃ në́₃ gue₂₃ liánꞌ₂ chain₂ dse₃ ja₁lá₃. ꞌNe₂ guëꞌ₂ ma₂ŋagꞌ₅₄ uɨg₅ ja₁në₅.
26 Tonꞌ₂ jɨꞌ₅₄ ŋei₅ lɨn₃ lë́₅ jë₄ quián₂ jniog₄, jaun₂ tsá₃ ꞌein₂ lé₂ le₃ŋɨ́₃ të₂le₃ në₅, on₃ guëꞌ₂ i₂tionꞌ₅₄ ja₁në₅ lé₂ ŋɨ́i₃ le₃la₂.”
27 Jaun₂ ca₂ŋag₃ táng₃: “Mɨ₅ jniá₂ neꞌ₅₄ jaun₂, tia₅₄, a₂dsiangꞌ₅₄ i₂në₅ dsɨ₃con₅₄ jág₁ dsau₅ dsi₂néi₂ quióꞌ₅ ŋeꞌ₃,
28 ia₁ ꞌŋiá₂ chiꞌ₂ rɨ́ngꞌ₃ i₂chan₂ guë́₄, ia₁jaun₂ tsá₃ ja₃ŋag₅₄ uɨg₅ ja₁lá₃.”
29 Jaun₂ ca₂ŋag₃ táng₃ Abraham: “I₂ma₂rónꞌ₅ si₂ bá₄ ó₃ ca₂quiog₂ Moisés quianꞌ₅₄ dsa₂ i₂jme₁ꞌë́₂ jág₁. ¡Juɨ₁tionꞌ₅₄ juɨ₅ a₂juáꞌ₂ ꞌéi₂!”
30 Jaun₂ ca₂ŋag₃ táng₃: “Jan₂ꞌón₄, tia₅₄ Abraham, ia₁ në₁ca₂dsiánꞌ₂ jan₂ ꞌlag₄ dsi₁con₃ jág₁, dsɨ₃quénꞌ₅ bá₄ dsɨ́₅.”
31 La₁ ca₂ŋag₃ táng₃ ꞌéi₂: “Chi₂juaꞌ₂ tsá₃ nag₅ gau₂ a₂juáꞌ₂ Moisés, quianꞌ₅₄ dsa₂ i₂jme₁ꞌë́₂ jág₁ quián₅ Diú₄ në́₃, ján₃ bá₄ le₂jaun₂ tsá₃ ꞌe₂ gau₂ nag₃ o₁jŋiaꞌ₅₄ la₂ ca₂jenꞌ₅₄ jan₂ ꞌlag₄ dsi₁con₃ jág₁.”