Jme₂tag₅ Jesús juɨ₁liaꞌ₂ ꞌa₂ liaꞌ₂ lë́₅ a₂tén₂ dsa₂ dsɨ₂i₂gu₂
10
Jaun₂ ca₂o₃ꞌɨ́n₃ Jesús juɨg₂ Capernaum ja₁jme₁ꞌein₅₄, ca₂ŋó₃ táng₃ ja₁tén₄ Judea quianꞌ₅₄ juɨ₅ ꞌuë₃ të₂le₃ ꞌŋoꞌ₅₄ Cuá₃ Jordán. Ja₁jaun₂ ca₂o₃lén₂ táng₃ dsa₂ juɨn₅ ja₁ꞌein₅₄. Conꞌ₂ siáꞌ₂ táng₃ ca₂jmo₃ juɨ₁liaꞌ₂ jmo₂₃ tián₂, ca₂jme₃tɨin₂₃ dsa₂.
San Marcos 10:1-16
2 Jaun₂ ca₂dsi₃lén₂ i₂lɨn₅₄ dsa₂ fariseos*, ca₂ŋɨ́iꞌ₃ Jesús a₂jŋiaꞌ₅₄ conꞌ₂ ꞌnio₃ cáun₂ táu₂ chi₂juaꞌ₂ ꞌi₄ ꞌéiꞌ₃ a₂tén₂ dsa₂ dsa₂ mɨ́₂ quiáin₅.
3 Jaun₂ ca₂ŋag₃ ꞌéi₂:
―¿ꞌE₂ ꞌéiꞌ₃ ca₂cuë₃ Moisés guëꞌ₂?
4 Jaun₂ ca₂ŋag₃ táng₃ dsa₂ ꞌéi₂:
―Ca₂cuë₃ Moisés jág₁ a₂lé₂ le₃jmo₃ dsa₂ ŋeꞌ₂ caun₂ si₂ të₃ron₅₄, jaun₂ guë́₄ ma₂lé₂ dsei₂₃.
5 Jaun₂ ca₂ŋag₃ Jesús:
―ꞌUɨg₅₄ ia₁ a₂ŋɨ́₄ tsá₃ nágꞌ₁ ꞌniaꞌ₂ guiongꞌ₅₄ bá₄ ca₂cuë₃ Moisés ꞌéiꞌ₃ jaun₂,
6 La₁ le₂ꞌuɨg₅₄ liaꞌ₂ conꞌ₂ jme₁ca₂dsia₃ Diú₄ mɨ₂güɨ́g₃, “ca₂jmóiꞌ₂ dsa₂ ŋeꞌ₂, dsa₂ mɨ́₂”.
7 “ꞌUɨg₅₄ jaun₂ në́₃ dsa₂ ŋeꞌ₂, ca₂tɨ́in₂ téin₂ chog₅₄-jmei₂, conꞌ₂ tiainꞌ₃ quiainꞌ₅₄ dsa₂ mɨ́₂ quiáin₅.
8 Jaun₂ jë₁le₃oin₃ léin₂ caun₂ bá₄ nɨ₁ŋɨ́₅.”a Jaun₂ dsióg₄ lé₂ co₂ꞌnióꞌ₄ jan₂ dsa₂ bá₄, tsá₃ ma₂lë́₂ oin₃.
9 Jaun₂ tsá₃ ꞌi₄ ꞌéiꞌ₃ juaꞌ₅₄ dsa₂ mɨ₂güɨ́g₃ a₂jmo₃ jma₃quén₅ a₂ma₂dsia₃ Diú₄ rë₂.
10 Jme₁ma₂tioinꞌ₅₄ táng₃ dsi₂néi₂, ca₂ŋag₃ chiꞌ₂ dsɨ₂guia₃-tɨ́n₂ ca₂ŋɨ́iꞌ₃ Jesús jág₁ në₅.
11 Jaun₂ ca₂juáꞌ₂ Jesús:
―Dsa₂ i₂tén₂ ꞌio₅₄ quián₅, a₂guá₃ táng₃ quiainꞌ₅₄ i₂siánꞌ₂, ꞌno₂₃ dso₄ ja₁con₂ ꞌio₅₄ quiáin₅ i₂le₂ꞌuɨg₅₄.
12 Conꞌ₂ guëꞌ₂ siáꞌ₂ táng₃ në₁juaꞌ₂ tén₂ ꞌio₅₄ dsɨ₂i₂gu₂ a₂guá₃ táng₃ quiainꞌ₅₄ dsa₂ ŋeꞌ₂ siánꞌ₂, ján₃ bá₄ le₂jaun₂ ꞌno₂₃ dso₄ ja₁con₂ dsɨ₂i₂gu₂.
Ca₂jme₃gonꞌ₅₄ Jesús chiꞌ₂-guein₂
13 Jaun₂ ca₂dsi₃lén₂ dsa₂ le₁jŋiai₂₃ chiꞌ₂ quiáin₅ ja₁guá₄ Jesús, ia₁jaun₂ qui₃téi₂ Jesús gu₂. La₁ chiꞌ₂ dsɨ₂guia₃-tɨ́n₂ në́₃ ca₂jí₂.
14 Jme₁ca₂jág₃ Jesús, jaun₂ ca₂i₃méiꞌ₂ dsɨ́₅ quianꞌ₅₄ chiꞌ₂ dsɨ₂guia₃-tɨ́n₂, jaun₂ ca₂juáꞌ₂:
―Cuë₄ ꞌniaꞌ₂ jmɨg₄ juɨ₁ja₂lén₂ chiꞌ₂-guein₂ cong₂. Tsá₃ jmó₁ ꞌniaꞌ₂ le₂në₅ juaꞌ₅₄ a₂jnɨgꞌ₅₄, ia₁ juɨ₁liaꞌ₂ i₂le₂la₂ bá₄ guëꞌ₂ i₂dsɨ₂len₅ ja₁gon₂ Diú₄.
15 A₂dsɨ₂jóꞌ₃ juɨ́g₂ jniá₂ ꞌniaꞌ₂, ia₁ juɨ₁ꞌein₂ guë́₃ i₂tsá₃ gue₅ ꞌéiꞌ₃ quióꞌ₅ Diú₄, juɨ₁liaꞌ₂ gue₅ jan₂ i₂bëꞌ₅₄, o₁lɨ́gꞌ₂ tsá₃ dsi₁lein₅ ja₁gon₂ Diú₄.
16 Jaun₂ qui₂ca₂jŋaiꞌ₃ guein₂ ꞌein₅₄, ca₂quiog₂ gu₂ ne₄ quióꞌ₅, ca₂jme₃jŋió₃.
Jan₂ dsó₂ chiꞌ₂ cha₂ cu₄ ca₂dsia₃ jág₁ quiainꞌ₅₄ Jesús
17 Jme₁ma₂ꞌen₅₄ Jesús juɨ₅ ŋó₅ táng₃, jaun₂ já₃ jan₂ dsó₂ co₂chiꞌ₅₄ ca₂jme₃jeinꞌ₂ ca₂chi₃jné₃ ne₅₄. Jaun₂ ca₂ŋag₃:
―Të₅ dsen₃, ¿ꞌe₂ ꞌnióꞌ₅ jmo₅₄ jniá₂ ia₁jaun₂ tɨng₅₄ ja₁le₃chang₂ co₂tan₅₄?
San Marcos 10:17-40
18 Jaun₂ ca₂ŋag₃ Jesús:
―¿ꞌE₂ lë₃ quiongꞌ₅₄ jniá₂ a₂dseng₃? ꞌI₁jan₂ i₂dsen₃ tsá₃ chan₂, jŋiaꞌ₅₄ liaꞌ₂ jan₂ Diú₄ bá₄.
19 Cuɨngꞌ₂ bá₄ ꞌÉiꞌ₃ Juáꞌ₅ quióꞌ₅ Diú₄, ja₁juáꞌ₂ tsá₃ jme₁dsiangꞌ₂ dsa₂ mɨ₂güɨ́g₃ rɨ́ngꞌ₂; on₃ guëꞌ₂ niógꞌ₄ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gogꞌ₂; on₃ guëꞌ₂ ꞌángꞌ₁. Tsá₃ jmó₁ juaꞌ₅₄ jangꞌ₅₄ jág₁ të₂jág₁; tsá₃ jme₁gan₅ dsa₂ juaꞌ₅₄ a₂jŋiáꞌ₄ a₂cha₂ quióꞌ₅; a₂jme₁gangꞌ₃ chogꞌ₂-ŋéiꞌ₅ në́₃.b
20 Ca₂ŋag₃ táng₃ dsa₂ ꞌéi₂:
―Të₅, ca₂le₃jë́₃ a₂në₅, liaꞌ₂ conꞌ₂ bɨnꞌ₅₄ bá₄ jniá₂ jme₂tí₁.
21 Jaun₂ ca₂jág₂ Jesús ŋéi₂ dsɨ́₅, ca₂juáꞌ₂:
―Caun₂ guë́₄ a₂ꞌnióꞌ₅ quiángꞌ₂. Guanꞌ₂ o₂ꞌnag₄ ca₂le₃jë́₃ a₂cha₂ quiángꞌ₂, o₂dsioꞌ₅₄ cu₄ jaun₂ o₂cuëꞌ₅₄ dsa₂ te₂ŋé₂. Jaun₂ guë́₄ le₃cha₂ a₂jláꞌ₁ quiángꞌ₂ gueiꞌ₅₄ i₂juɨ́g₃. Jaun₂ guë́₄ ŋia₅, ꞌéin₃.c
22 Jaun₂ ca₂táꞌ₂ jén₂ dsɨ́₅ dsa₂ ꞌéi₂ jme₁ca₂nág₂ le₂në₅; ŋáiꞌ₅ bá₄ jaun₂ ꞌliaꞌ₂ dsɨ́₅, ia₁ ꞌŋio₅ lɨn₃ jme₁cha₂ cu₄.
23 Jaun₂ ca₂jénꞌ₃ Jesús qui₂ca₂jɨ́in₂ chiꞌ₂ dsɨ₂guia₃-tɨ́n₂ quiáin₅. Jaun₂ ca₂juáꞌ₂:
―¡ꞌE₂ guë́₄ ꞌŋio₅ quian₅ ta₁ quióꞌ₅ dsa₂ cha₂ cu₄ a₂tɨ́inꞌ₄ ja₁gon₂ Diú₄!
24 Jaun₂ i₃góꞌ₃ dsɨ́₅ chiꞌ₂ dsɨ₂guia₃-tɨ́n₂ jág₁ jaun₂, la₁ ca₂juáꞌ₂ táng₃ Jesús:
―ꞌNiaꞌ₂ jón₃, ¡ꞌe₂ bá₄ ꞌŋio₅ quian₅ ta₁ a₂dsi₁len₅ dsa₂ ja₁gon₂ Diú₄!d
25 Tsá₃ guë́₄ ꞌe₂ ta₁ quian₅ a₂lé₂ le₃ŋɨ₅ jan₂ jáꞌ₂ camello* juɨ₅ tau₂ mɨ₂cu₄, conꞌ₂ guë́₄ dsa₂ cha₂ cu₄ a₂ꞌí₂ ja₁gon₂ Diú₄.
26 Jme₁ca₂nág₂ chiꞌ₂ dsɨ₂guia₃-tɨ́n₂ a₂në₅, i₃góꞌ₃ dsɨ́₅ ꞌŋio₅ lɨn₃. Qui₂ca₂ŋɨ́iꞌ₃ rɨinꞌ₅₄:
―¿I₂ꞌein₂ bá₄ guëꞌ₂ jaun₂ në́₃ i₂lé₂ le₃tɨ́nꞌ₄?
27 Jaun₂ ca₂jág₂ Jesús, jaun₂ ca₂juáꞌ₂:
―Dsónꞌ₂ bá₄ jaun₂, të₂le₃ quióꞌ₅ dsa₂ mɨ₂güɨ́g₃, o₁lɨ́gꞌ₂ tsá₃ lé₂ le₃lé₂. La₁ të₂le₃ quióꞌ₅ Diú₄, ca₂le₃jë́₃ bá₄ lé₂ le₃lé₂.
28 Pe₄ në́₃ ca₂jme₃lióg₃ ca₂juáꞌ₂:
―Te₁guiꞌ₅₄, ca₂le₃jë́₃ ꞌe₂ a₂jme₁cha₂ quián₂ jniaꞌ₅₄, ma₂ca₂ténꞌ₂ dsɨ₅ jniaꞌ₅₄ ma₂qui₂ma₂tí₄, ia₁ a₂ꞌén₅ jniaꞌ₅₄ ꞌne₂.
29 Jaun₂ ca₂ŋag₃ Jesús:
―A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, ca₂le₃jɨ́n₃ i₂táun₂ ꞌne₄, i₂tén₂ rɨnꞌ₅₄, chog₅₄-jmei₂, chiꞌ₂ quiáin₅, i₂tí₂ ja₁nau₂ quióꞌ₅, ꞌuɨg₅₄ quió₃ jniá₂, quianꞌ₅₄ ꞌuɨg₅₄ quióꞌ₄ jág₁ dse₃ në́₃,
30 gue₃ mɨ₂güɨ́g₃ la₂ ꞌlióng₂ guë́₄ ꞌné₅, juɨn₅ guë́₄ rɨinꞌ₅₄, juɨn₅ guë́₄ chog₅₄, juɨn₅ guë́₄ chiꞌ₂-guein₂ quiáin₅ në́₃ le₃chan₂; tonꞌ₂ ꞌlióng₂ guë́₄ ja₁nau₂ quióꞌ₅ le₃cha₂, o₁jŋiaꞌ₅₄ la₂ chain₂ mɨꞌ₅₄ co₂ꞌein₅ dsa₂. La₁ia₁ gue₃ ja₁le₃chain₂ co₂tan₅₄ mɨ₂güɨ́g₃ caun₂.
31 La₁ rë₂në́₃, juɨn₅ i₂lɨ́n₅ i₂quen₅, la₁ jmɨg₄ jaun₂ léin₂ dsa₂ të₂le₃ jë₁ca₂tóꞌ₂; le₂jaun₂ bá₄ ján₃, juɨ₁liaꞌ₂ i₂tsá₃ ꞌe₂ quen₅ rë₂në́₃ liaꞌ₂ conꞌ₂ niog₅ lɨ́n₂ dsa₂ mɨ₂güɨ́g₃, léin₂ i₂le₂ꞌuɨg₅₄.
Conꞌ₂ siáꞌ₂ táng₃ ca₂ꞌë́₂ Jesús jág₁ a₂jóin₂
32 Tioinꞌ₅₄ juɨ₅ uɨ́g₂ tso₄ a₂dsi₁léin₂ Jerusalén. Jesús në́₃ ŋó₃ dsɨ₂jŋiái₄ ne₄ juɨ₅. Chiꞌ₂ dsɨ₂guia₃-tɨ́n₂ guëꞌ₂ i₂léin₂ dsɨ₂góꞌ₃ dsɨ́₅. Ca₂le₃jɨ́n₃ guë́₄ dsa₂ i₂jme₁quiainꞌ₅₄ në́₃ i₂léin₂ góꞌ₅. Jaun₂ në́₃ ca₂të́ꞌ₃ Jesús le₃cau₅ juɨ₅ jmáꞌ₃ dsɨ₂guia₃-tɨ́n₂, jaun₂ ja₁jaun₂ ca₂juáꞌ₂ ꞌe₂ niog₅ dsɨ₃ŋɨ́i₂,
33 ca₂juáꞌ₂:
―Ŋí₂ ꞌniaꞌ₂ jaun₂, tioꞌ₅₄ jniog₄ juɨ₅ uɨg₂ tso₄ a₂dsi₁náu₅ Jerusalén. Ja₁jaun₂ jɨ́nꞌ₂ dsa₂ Jaun₅* dsa₂ mɨ₂güɨ́g₃ o₄gú₃ juɨg₅₄ jme₂dsa₂, ne₄ të₅juáꞌ₅ në́₃. I₂ꞌéi₂ dsí₃ ꞌéiꞌ₃ a₂jŋagꞌ₃ dsa₂, jaun₂ jángꞌ₂ dsa₂ o₄gú₃ dsɨ₂nau₂ në́₃.
34 ꞌÉi₂ në́₃ a₂lë₁qui₃jmógꞌ₂, qui₃cuë₃, qui₃ꞌŋéi₂ dsa₂ në́₃. Jaun₂ guë́₄ jŋagꞌ₃. La₁ a₂ꞌnɨ₅ jmɨg₄, jeinꞌ₅₄ bá₄ táng₃.
A₂ca₂mɨ₃ Jacobo quianꞌ₅₄ Juan₅₄
35 Jaun₂ në́₃, Jacobo quianꞌ₅₄ Juan₅₄, le₃on₃ ja₁ŋiꞌ₅₄ Zebedeo, ca₂jme₃quiáin₃ ja₁chénꞌ₄ Jesús, jaun₂ ca₂juáꞌ₂:
―Të₅, ꞌniog₂ jniaꞌ₅₄ jmóꞌ₂ ꞌne₂ dse₃ ꞌauꞌ₂ a₂jmóꞌ₂ juɨ₁ꞌe₂ caun₂ a₂mɨ́₁ jniaꞌ₅₄.
36 Jaun₂ ca₂juáꞌ₂ Jesús:
―¿ꞌE₂ ꞌniogꞌ₂ ꞌniaꞌ₂ jmo₅₄ jniá₂ guëꞌ₂?
37 Jaun₂ ca₂juáꞌ₂ táng₃ ꞌéi₂:
―Jmóꞌ₂ ꞌio₄ jniaꞌ₅₄ jma₃jáu₃ liaꞌ₂ ca₂ton₂ cau₅ quiángꞌ₂ jë₁ma₂të́₂ rë₁neꞌ₅₄ jlángꞌ₁ ne₄ta₁ quiángꞌ₂.
38 Jaun₂ ca₂ŋag₃ Jesús:
―Tsá₃ a₂jaun₂ ŋiꞌ₅₄ ꞌniaꞌ₂ a₂mɨꞌ₂. ¿Tiánꞌ₃ ꞌniaꞌ₂ dsɨ₃ŋɨ́gꞌ₂ ca₂le₃jë́₃ juɨ₁liaꞌ₂ a₂dsɨ₃ŋɨ́₂ jniá₂ guëꞌ₂? ¿Tiánꞌ₃ ꞌniaꞌ₂ cánꞌ₁ o₂i₁ dsɨ₅ juɨ₁liaꞌ₂ o₂i₁ dsɨ₅ can₅₄ jniá₂?
39 Jaun₂ ca₂ŋag₃ táng₃ ꞌéi₂:
―Tián₂ bá₄ jniaꞌ₅₄.
Ca₂juáꞌ₂ táng₃ Jesús:
―Dsónꞌ₂ bá₄ jaun₂ dsɨ₃ŋɨ́ꞌ₂ ꞌniaꞌ₂ ꞌe₂ niog₅ dsɨ₃ŋɨ́₂ jniá₂. Ján₃ bá₄ cánꞌ₁ ꞌniaꞌ₂ o₂i₁ dsɨ₅ juɨ₁liaꞌ₂ o₂i₁ dsɨ₅ can₅₄ jniá₂.
40 La₁ juɨ₁liaꞌ₂ a₂juáꞌ₂ ꞌniaꞌ₂ a₂tiángꞌ₄ jma₃ca₂ton₂ cau₅ quió₃, on₃juaꞌ₅₄ jniá₂ ca₂tɨ́ng₂ cuë₅₄ a₂jaun₂. Ja₁jaun₂ lë́₅ co₂jŋia₅₄ a₂tianꞌ₃ conꞌ₂ i₂ca₂tɨ́n₂ bá₄.
41 Rɨinꞌ₅₄ i₂guian₃ guë́₄ ꞌéi₂ në́₃, ca₂rë₃ꞌnéi₃ quianꞌ₅₄ Jacobo quianꞌ₅₄ Juan₅₄, jme₁ca₂nág₂ juáꞌ₂ ꞌéi₂ le₂në₅.
San Marcos 10:41-52
―Ŋiꞌ₅₄ bá₄ ꞌniaꞌ₂ juɨ₁liaꞌ₂ dsa₂ canꞌ₅₄ i₂tiánꞌ₅ gon₂ juɨg₂ go₄ dsɨ₂nau₂, i₂jɨ́n₂ dsa₂ co₂ꞌnióꞌ₄ dsɨ₂tan₅₄ quiáin₅, qui₂toinꞌ₂ dsa₂ ꞌéiꞌ₃ bén₂. Le₂jaun₂ bá₄, juɨ₁liaꞌ₂ dsɨ₂tan₅₄ i₂sion₅ guë́₄ quiáin₅ në́₃, tiáinꞌ₅ goin₂ jmo₂₃ ꞌéiꞌ₃.
43 La₁ jɨnꞌ₄ ꞌniaꞌ₂, tsá₃ le₂jaun₂ lé₂. Chi₂juaꞌ₂ ꞌein₂ ꞌnio₃ jmo₃ juɨnꞌ₂, ca₂tɨ́in₂ jme₃ti₃ ta₁ ne₄ rɨinꞌ₅₄;
44 chi₂juaꞌ₂ ꞌein₂ ꞌniaꞌ₂ ꞌnio₃ cán₂ ne₄ juɨ₅, ꞌnióꞌ₅ jme₃ti₃ ne₄ ca₂le₃jɨ́n₃ dsa₂.
45 Ia₁ le₂në₅ bá₄ Jaun₅* dsa₂ mɨ₂güɨ́g₃, tsá₃ ta₁ jaun₂ já₅ juaꞌ₅₄ a₂jme₃ti₃ dsa₂ ne₅₄; a₂jme₃ti₃ ta₁ ne₄ dsa₂ bá₄ já₅, a₂quí₃ quianꞌ₅₄ ꞌmú₃ ꞌliaꞌ₅₄ ia₁jaun₂ tɨ́nꞌ₄ juɨn₅.
Ca₂jme₃ꞌlión₂ Jesús jan₂ dsa₂ ten₄ i₂chen₂ Bartimeo
46 Dsi₃léin₂ juɨg₂ Jericó. Jme₁o₂ꞌɨ́in₃ juɨg₂ jaun₂ quiainꞌ₅₄ chiꞌ₂ dsɨ₂guia₃-tɨ́n₂ quiáin₅, juɨn₅ guë́₄ dsa₂ siánꞌ₂ në́₃ quiongꞌ₅₄, jaun₂ jan₂ dsa₂ ten₄ i₂chen₂ Bartimeo, (co₂ꞌnióꞌ₄ le₃juaꞌ₅₄ ja₁ŋiꞌ₅₄ Timeo), guá₅ ꞌéi₂ cau₅ juɨ₅ mɨ₂₃ a₂jme₃ꞌo₅₄ dsa₂ cu₄.
47 Jme₁ca₂nág₂ juáꞌ₂ dsa₂ ŋó₅ Jesús i₂chan₂ Nazaret cau₅ jaun₂, jaun₂ ca₂ꞌí₃ co₂mɨꞌ₅₄ të́ꞌ₂ Jesús:
―¡Jesús, tsɨ₁jon₂ David, dsia₄ ŋéi₂ ꞌauꞌ₂ jniá₂!
48 Jaun₂ ca₂jí₂ bá₄ dsa₂ ia₁jaun₂ dsó₃ tei₄. La₁ të₂le₃ i₂juɨꞌ₂ guë́₄ co₂mɨꞌ₅₄ ca₂ꞌí₃ bá₄, ca₂juáꞌ₂:
―¡Tsɨ₁jon₂ David, dsia₄ ŋéi₂ ꞌauꞌ₂ jniá₂!
49 Jaun₂ ca₂nau₂ Jesús jme₁ca₂nág₂, jaun₂ ca₂tsɨ́ꞌ₃ dsa₂ i₂quiainꞌ₅₄:
―Teꞌ₂ ꞌniaꞌ₂ o₁jia₂ ja₁lá₃.
Jaun₂ ca₂të₃ dsa₂, ca₂juáꞌ₂:
―Jmo₄ ꞌioꞌ₂. Nau₂, ia₁ ó₃ të́₂.
50 Jaun₂ ca₂ton₃ cau₅ ꞌmɨꞌ₂ dsióg₂ jme₁chi₁bóinꞌ₅, jaun₂ conꞌ₂ ca₂nau₂ jaun₂ bá₄ co₂chiꞌ₅₄, ca₂ŋó₃ ja₁chénꞌ₄ Jesús.
51 Jaun₂ ca₂ŋag₃ ꞌéi₂:
―¿ꞌE₂ ꞌniogꞌ₂ jmo₅₄ jniá₂ o₄quiángꞌ₂?
Jaun₂ ca₂ŋag₃ táng₃ dsa₂ ten₄:
―Të₅, a₂jnia₅₄ jme₁ne₃ bá₄ jniá₂ ꞌnio₃.
52 Jaun₂ ca₂juáꞌ₂ Jesús:
―Ma₂lé₂ guangꞌ₅₄. Ma₂ꞌlóngꞌ₂ ia₁ ꞌéngꞌ₂ bá₄.
Dsɨ₂juɨ₅ jaun₂ bá₄ ca₂jnia₃ mɨ₂ne₄ dsa₂ ꞌéi₂. Jaun₂ ca₂ŋó₃ quiainꞌ₅₄ Jesús.