Ca₂ꞌí₃ Jesús jë₄ juɨg₂ Jerusalén
11
Jme₁ma₂quián₅ dsi₁léin₂ Jerusalén, dsi₃léin₂ quián₅ juɨg₂ Betfagé quianꞌ₅₄ juɨg₂ Betania në́₃, a₂niog₅ cau₅ Máꞌ₂ Olivos*. Ja₁jaun₂ ca₂chen₃ Jesús on₃ dsa₂ i₂guia₃-tɨ́n₂ quiáin₅,
San Marcos 11:1-15
―O₂nóꞌ₅ ꞌniaꞌ₂ juɨg₂ píꞌ₁ niog₅ të₂le₃ ne₄ juɨ₅ ja₁dsau₅₄ në₅. Jë₁ma₂ca₂dsi₃nóꞌ₅ ꞌniaꞌ₂ ja₁jaun₂, dsianꞌ₂ ꞌniaꞌ₂ jan₂ búꞌ₄ ꞌmɨ́₂ i₂rë₂ꞌŋeꞌ₅₄ i₂tsá₃ ꞌein₂ ma₂co₁dsag₅₄. O₂cheinꞌ₅₄ ꞌniaꞌ₂ jaun₂ tëꞌ₅₄ ja₁lá₃.
3 Në₁juaꞌ₂ ꞌein₂ ca₂juáꞌ₂: “¿ꞌE₂ lë₃ jmoꞌ₂ ꞌniaꞌ₂ le₂në₅?” jaun₂ juɨgꞌ₅₄ ꞌniaꞌ₂: “Te₁guiꞌ₅₄ bá₄ ꞌnio₃ ca₂tiá₂, la₁ në₃ cónꞌ₅ bá₄ jángꞌ₂ táng₃.”
4 Jaun₂ i₃lén₂ dsa₂ ꞌéi₂. Jme₁ca₂dsi₃léin₂ ja₁chénꞌ₄ búꞌ₄ rë₂ꞌŋeꞌ₅₄ jë₄ calle cau₅ o₄ꞌné₄ quióꞌ₅ dsa₂, jaun₂ ca₂chéiꞌ₂ jaun₂ në́₃.
5 Jaun₂ ca₂juáꞌ₂ i₂lɨn₅₄ dsa₂ i₂ca₂jág₃, i₂tión₂ cau₅ jaun₂:
―¿ꞌE₂ jmoꞌ₂ ꞌniaꞌ₂ ja₁në₅? ¿ꞌE₂ lë₃ tsɨngꞌ₅₄ búꞌ₄?
6 Jaun₂ ca₂jéinꞌ₃ bá₄ guëꞌ₂ ꞌéi₂ jág₁ liaꞌ₂ lë́₅ jág₁ ca₂cuë₃ Jesús. Jaun₂ ca₂cuë₃ bá₄ dsa₂ jmɨg₄ të₂ jáꞌ₂.
7 Jaun₂ jme₁o₃lein₃ te₂ búꞌ₄, ca₂i₁jiog₃ ja₁ꞌen₅₄ Jesús, jaun₂ ca₂jmo₃ dse₃ qui₂ca₂jlág₂ ꞌmɨꞌ₂ mɨ₂caꞌ₄ jáꞌ₂. Jaun₂ guë́₄ ca₂co₃dsag₅₄ Jesús.
8 Juɨn₅ dsa₂ qui₂ca₂néiꞌ₃ ꞌmɨꞌ₂ le₂ꞌi₄ juɨ₅ ja₁ŋɨ́₃ Jesús. I₂lɨn₅₄ guëꞌ₂ ca₂dsia₃ guꞌ₂-neiꞌ₅₄ ꞌma₂ a₂ca₂i₁ꞌniai₁₂ ja₁nau₂.
9 Jaun₂ dsa₂ i₂i₂lén₂ le₃ne₄ juɨ₅ quianꞌ₅₄ i₂ja₂lén₂ le₃chi₁coꞌ₅₄ në́₃, qui₂ca₂tóinꞌ₂ co₂mɨꞌ₅₄, ca₂juáꞌ₂:
―¡Juɨ₁le₂juɨnꞌ₂ bá₄ i₂në₅!a ¡Juɨ₁le₂jŋió₃ bá₄ i₂në₅ i₂já₅ o₄quióꞌ₄ Te₁guiꞌ₅₄!b
10 ¡Juɨ₁le₂jŋió₃ bá₄ ꞌéiꞌ₃ a₂já₅ quióꞌ₅ jmei₂ jniog₄ David në́₃! ¡Juɨ₁le₂juɨnꞌ₂ bá₄ i₂guá₅ gueiꞌ₅₄ i₂juɨ́g₃!
11 Jme₁ca₂ꞌí₃ Jesús juɨg₂ Jerusalén, jaun₂ ca₂ꞌí₃ i₁dsi₅ guáꞌ₅ templo*. Jme₁ma₂në₂jág₃ ꞌa₂ liaꞌ₂ lë́₅ ja₁jaun₂, ca₂o₃ꞌɨ́in₃, ca₂ŋáiꞌ₃ táng₃ juɨ₅ Betania quiainꞌ₅₄ ca₂le₃jɨ́n₃ chiꞌ₂ dsɨ₂guia₃-tɨ́n₂ quiáin₅, ia₁ ma₂ca₂ꞌláu₂.
Ca₂juáꞌ₂ Jesús jág₁ uɨg₅ ca₂tsɨ́ꞌ₃ nɨ₁ꞌma₂ higuera a₂tsá₃ mɨ́g₂ cha₂
12 Jme₁jnia₃ jaun₂, conꞌ₂ ma₂ꞌuɨin₂ táng₃ juɨg₂ Betania, ca₂táꞌ₂ i₁cónꞌ₅ Jesús.
13 Jaun₂ ca₂jág₃ të₂ uɨ́ng₂ caun₂ nɨ₁ꞌma₂ higuera, liaꞌ₂ rë₂canꞌ₂ mogꞌ₅₄ jniá₂ chíꞌ₅. Jaun₂ ŋó₃ ꞌuɨg₅₄ ja₁dsi₅₄, ia₁ lɨ́in₂ jme₁dsioꞌ₂ mɨ́g₂. La₁ jme₁dsióg₃ në́₃, jmáꞌ₃ mogꞌ₅₄ bá₄ cha₂, ia₁ on₃juaꞌ₅₄ jein₂ a₂ꞌag₅ mɨ́g₂ higos jaun₂.
14 Jaun₂ në́₃ ca₂juáꞌ₂ Jesús ca₂tsɨ́ꞌ₃ nɨ₁ꞌma₂:
―Juɨ₁le₅₄ ca₂liaꞌ₂ o₁lɨ́gꞌ₂ jmɨg₄ tsá₃ ma₃ꞌein₂ guë́ꞌ₃ co₂ŋeiꞌ₅₄ mɨ́g₂ quiángꞌ₂.
Ca₂nág₂ bá₄ chiꞌ₂ dsɨ₂guia₃-tɨ́n₂ jme₁ca₂juáꞌ₂ le₂në₅.
Ca₂ꞌuɨ́nꞌ₂ Jesús dsa₂ i₂jme₁tionꞌ₅₄ dsia₅ ꞌmaꞌ₅₄ i₁dsi₅ guáꞌ₅
15 Jme₁ca₂dsi₃léin₂ táng₃ juɨg₂ Jerusalén, ca₂ꞌí₃ Jesús i₁dsi₅ guáꞌ₅ templo*, ca₂jme₃lióg₃ ca₂ꞌuɨ́inꞌ₂ ca₂le₃jɨ́n₃ dsa₂ i₂jme₁tionꞌ₅₄ ꞌnag₅, i₂lá₅ në́₃. Jaun₂ qui₂ca₂jéinꞌ₃ nɨ₁mesa jme₁jmóꞌ₂ dsa₂ ta₁ ja₁jme₂tsɨ́in₃ cu₄, qui₂ca₂quɨ́ꞌ₂ ꞌma₂sɨ₅₄ ja₁jme₁tiánꞌ₄ dsa₂ i₂ꞌnɨ₅ i₁ju₂;
16 tsá₃ ma₃ca₂cuë₃ jmɨg₄ juaꞌ₅₄ a₂dsɨ₃can₅ guë́₄ dsa₂ lio₄ quióꞌ₅ i₁dsi₅ guáꞌ₅.
San Marcos 11:16-33
17 Jaun₂ ca₂jme₃tɨin₂₃ dsa₂ ꞌéi₂, ca₂juáꞌ₂:
―Ne₄ Si₂ juáꞌ₂: “ꞌNé₅ quió₃ lë́₅ ca₂ne₅₄ ꞌné₅ ja₁chi₂lénꞌ₂ dsa₂ Diú₄, dsa₂ chan₂ ca₂le₃jë́₃ juɨg₂.”c La₁ ꞌniaꞌ₂ në́₃ ma₂jmoꞌ₅₄ në₂jag₄ bá₄ të₂ꞌlau₂ quióꞌ₅ dsa₂ ꞌang₂.d
18 Jaun₂ juɨg₅₄ jme₂dsa₂ quianꞌ₅₄ të₅juáꞌ₅ në́₃ ca₂nág₂ jág₁ në₅. Jaun₂ ca₂jme₃lióg₃ ca₂ꞌnáuꞌ₃ juɨ₅ ꞌa₂ liaꞌ₂ jŋagꞌ₃, ia₁ góꞌ₅ conꞌ₂ tsá₃ ŋó₅ në₁juaꞌ₂ ꞌéi₂ bá₄ jme₃gón₃ lé₂, ia₁ juɨn₅ lɨn₃ dsa₂ nag₅ dsɨ₂góꞌ₃ dsɨ́₅ jág₁ a₂jme₂tag₅ Jesús.
19 Të₂le₃ ca₂nei₂ jmɨg₄ jaun₂, ca₂ꞌuɨin₂e juɨg₂ jaun₂.
Ca₂rë₃quéin₃ nɨ₁ꞌma₂ higuera
20 Jme₁jnia₃ jaun₂, ca₂ŋɨi₅ táng₃ juɨ₅ ja₁dsi₅₄ nɨ₁ꞌma₂ higuera. Jaun₂ ca₂jág₃ co₂dsia₅ ma₂quein₂ ca₂të₂ choꞌ₅₄.
21 Jaun₂ ca₂dsáuꞌ₃ dsɨ́₅ Pe₄, jaun₂ ca₂tsɨ́ꞌ₃ Jesús:
―Të₅, jag₄ nɨ₁ꞌma₂ a₂ca₂cheiꞌ₅₄ uɨg₅. Co₂dsia₅ ma₂ca₂rë₃quéin₃.
22 Jaun₂ ca₂ŋag₃ Jesús ca₂tsɨ́ꞌ₃ dsa₂:
―ꞌÉn₃ ꞌniaꞌ₂ të₂le₃ quióꞌ₅ Diú₄.
23 A₂dsɨ₂jóꞌ₃ juɨ́g₂ jniá₂ ꞌniaꞌ₂, juɨ₁ꞌein₂ guë́₃ juáꞌ₂ tsɨ́ꞌ₃ nɨ₁máꞌ₂ në₅: “Jŋiagꞌ₃ ja₁në₅, o₂ꞌú₅ jmɨ₁ŋíꞌ₄”, le₂jaun₂ dsónꞌ₂ le₃ti₃ bá₄, në₁juaꞌ₂ tsá₃ ca₂ꞌág₂ caun₂-tɨn₃ dsɨ́₅.
24 Jaun₂ lë₃, juáꞌ₅ jniá₂, juɨ₁ꞌe₂ guë́₃ a₂mɨꞌ₂ ꞌniaꞌ₂ jme₁chi₂lengꞌ₅₄ Diú₄, në₁juaꞌ₂ jmoꞌ₂ ꞌniaꞌ₂ ꞌauꞌ₂ në₂jag₄ bá₄ a₂ma₂në₂gueꞌ₅₄ ꞌe₂ a₂mɨꞌ₂, le₂jaun₂ dsónꞌ₂ le₃ti₃ bá₄ ja₁conꞌ₂ ꞌniaꞌ₂.
25 Jë₁ma₂të́₂ rë₁náuꞌ₁ ꞌniaꞌ₂ chi₁léngꞌ₄ Diú₄, në₁juaꞌ₂ cha₂ ꞌnei₂ ꞌauꞌ₂ ꞌniaꞌ₂ ja₁con₂ rɨ́ngꞌ₂, ꞌén₃ ꞌniaꞌ₂ dsáu₁ rɨ́ngꞌ₂, ia₁jaun₂ bá₄ Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃ ꞌéin₂ dsáuꞌ₂ ꞌniaꞌ₂ guiongꞌ₅₄.f
26 (-)
Jesús bá₄ i₂ꞌio₅ ꞌéiꞌ₃
27 Ca₂dsi₃léin₂ táng₃ juɨg₂ Jerusalén. Jaun₂ jme₁ma₂ŋɨ₅ Jesús i₁dsi₅ guáꞌ₅ templo*, jaun₂ ca₂jme₃quián₃ juɨg₅₄ jme₂dsa₂, të₅juáꞌ₅, dsɨ₂guiꞌ₅₄ canꞌ₅₄ në́₃.
28 Jaun₂ ca₂ŋag₃ dsa₂ ꞌéi₂ ca₂ŋɨ́iꞌ₃ Jesús:
―¿ꞌE₂ ta₁ lɨ́nꞌ₅ ꞌne₂ a₂jmoꞌ₂ ca₂le₃jë́₃ ꞌe₂ a₂jmoꞌ₂ ŋɨꞌ₂? ¿ꞌEin₂ cuë₅ bí₂ ꞌéiꞌ₃ a₂jmoꞌ₂ le₂në₅?
29 Jaun₂ ca₂ŋag₃ Jesús:
―Ján₃ bá₄ ŋag₄ jniá₂ caun₂ ꞌniaꞌ₂. Në₁juaꞌ₂ ca₂ŋagꞌ₅₄ ꞌniaꞌ₂ liaꞌ₂ tí₅, jaun₂ guë́₄ juáꞌ₄ jniá₂ ꞌein₂ cuë₅ bí₂ a₂jmo₂₃ ca₂le₃jë́₃ a₂jmo₂₃.
30 Juɨ₁liaꞌ₂ a₂ca₂chon₃ Juan₅₄ jmɨg₂ dsa₂, ¿ꞌein₂ quióꞌ₅ ꞌéiꞌ₃ jaun₂? ¿Quióꞌ₅ Diú₄, o₃ quióꞌ₅ dsa₂ mɨ₂güɨ́g₃ ꞌe₂? Ŋag₄ ꞌniaꞌ₂.
31 Jaun₂ ca₂dsia₃ dsa₂ canꞌ₅₄ jág₁ conꞌ₂ guioin₅₄, ca₂juáꞌ₂:
―Në₁juaꞌ₂ ca₂chei₅₄ jniog₄ ꞌéiꞌ₃ quióꞌ₅ Diú₄ bá₄, në₃ cónꞌ₅ bá₄ ŋag₃: “¿ꞌE₂ lë₃ tsá₃ ca₂rë₃ꞌénꞌ₂ ꞌniaꞌ₂ jág₁ quióꞌ₅ ꞌéi₂?”
32 ¿La₁ në₁juaꞌ₂ ca₂chei₅₄ jniog₄ ꞌéiꞌ₃ quióꞌ₅ dsa₂ mɨ₂güɨ́g₃ bá₄...?
La₁ ca₂rë₃gain₃ ca₂le₃jɨ́n₃ dsa₂ i₂quianꞌ₅₄ Jesús. Ia₁ ca₂le₃jɨ́n₃ dsa₂ jme₁ꞌéin₂ a₂jme₁lɨ́n₄ Juan₅₄ të₃dsónꞌ₂ jan₂ dsa₂ i₂ꞌë́₂ jág₁ quián₅ Diú₄.
33 Jaun₂ ca₂ŋag₃ dsa₂ canꞌ₅₄ ca₂tsɨ́ꞌ₃ Jesús:
―Tsá₃ a₂jaun₂ ne₄ jniaꞌ₅₄.
Jaun₂ ca₂ŋag₃ táng₃ Jesús:
―Ján₃ bá₄ tsá₃ juáꞌ₄ jniá₂ ꞌein₂ cuë₅ bí₂ ꞌéiꞌ₃ a₂jmo₂₃ ca₂le₃jë́₃ ꞌe₂ a₂jmo₂₃ ŋɨ₂₃.