Jág₁ jángꞌ₅ léi₄ juɨ₁liaꞌ₂ dsa₂ i₂jmo₅ ta₁ caun₂ ja₁nau₂
20
ꞌLë́₅ gueiꞌ₅₄ i₂juɨ́g₃ ja₁gon₂ Diú₄ juɨ₁liaꞌ₂ jan₂ dsa₂ juɨg₅₄ ja₁nau₂ i₂o₂ꞌɨn₅ të₃ o₃ꞌiog₂, ca₂i₁tioin₁₂ dsa₂ i₂jmo₃ ta₁ ja₁nau₂ quióꞌ₅ ja₁jnia₄ choꞌ₅₄ uɨng₂ uvas.
2 Ca₂lɨ́ꞌ₃ bá₄ jág₁ quianꞌ₅₄ dsa₂ i₂jmo₃ ta₁ a₂ꞌliainꞌ₅₄ jma₃ca₂ꞌéiꞌ₃ cu₄ denario* liaꞌ₂ co₂jmɨg₄, jaun₂ ca₂chein₃ dsa₂ ꞌéi₂ juɨ₅ ja₁nau₂ quióꞌ₅.
3 Jme₁co₂lág₂ jaun₂ o₂ꞌɨ́in₃ táng₃ conꞌ₂ hora ŋí₁ ŋi₃ të₂le₃ o₃ꞌiog₂,a jaun₂ ca₂jɨ́in₂ dsa₂ siánꞌ₂ i₂tión₂ jɨn₅₄ jë₄ ꞌmaꞌ₅₄.
4 Jaun₂ ca₂tsɨ́ꞌ₃ dsa₂ ꞌéi₂: “O₂nóꞌ₅ ꞌniaꞌ₂ ján₃ o₂jmo₄ ta₁ ja₁nau₂ quió₃, quɨ́₄ bá₄ jniá₂ ꞌliangꞌ₅₄ ꞌniaꞌ₂ conꞌ₂ dsi₂ten₅₄.” Jaun₂ i₃lén₂ bá₄ dsa₂ ꞌéi₂.
5 Jaun₂ o₂ꞌɨ́in₃ táng₃ conꞌ₂ dsi₂ŋíꞌ₃,b conꞌ₂ siáꞌ₂ hora ŋí₁ ꞌnɨ₅ të₂le₃ ca₂ꞌláu₂ në́₃;c le₂jaun₂ bá₄ ca₂jmo₃ ján₃.
6 Conꞌ₂ siáꞌ₂ o₂ꞌɨ́in₃ bá₄ guë́₄ conꞌ₂ hora ŋí₁ ꞌŋiá₂ të₂le₃ ca₂ꞌláu₂,d ŋó₃ juɨ₅ jë₄ ꞌmaꞌ₅₄, jaun₂ ca₂dsáinꞌ₂ táng₃ dsa₂ i₂jɨn₅₄ tión₂. Jaun₂ ca₂tsɨ́ꞌ₃ ꞌéi₂: “¿ꞌE₂ lë₃ tiónꞌ₂ ꞌniaꞌ₂ ja₁lá₃ ta₁ne₁jmɨg₄ tsá₃ ꞌe₂ ta₁ jmoꞌ₂?”
7 Jaun₂ ca₂ŋag₃ dsa₂ ꞌéi₂ ca₂juáꞌ₂: “Ia₁ ꞌi₁jan₂ tsá₃ ꞌein₂ tio₅.” Jaun₂ ca₂ŋag₃ dsa₂ juɨg₅₄ ja₁nau₂ ca₂juáꞌ₂: “O₂nóꞌ₅ ꞌniaꞌ₂ ján₃, o₂jmo₄ ta₁ ja₁nau₂ quió₃; quɨ́₄ bá₄ jniá₂ ꞌlianꞌ₅₄ ꞌniaꞌ₂ conꞌ₂ dsi₂ten₅₄.”
8 ꞌJme₁ca₂nei₂ jmɨg₄ jaun₂, ca₂juáꞌ₂ juɨg₅₄ ja₁nau₂ ca₂tsɨ́ꞌ₃ dsa₂ i₂niog₅ ne₄ i₂te₂néꞌ₂ dsa₂ ta₁: “Teꞌ₂ dsa₂ i₂ma₂në₂jmo₃ ta₁, jaun₂ quɨꞌ₅₄ ꞌliainꞌ₅₄. Jme₁lióg₄ deꞌ₂ jŋiá₅ quianꞌ₅₄ dsa₂ i₂në₂tiónꞌ₂ jë₁ca₂tóꞌ₂, jaun₂ dsian₅ quianꞌ₅₄ i₂në₂tiónꞌ₂ le₂ꞌuɨg₅₄.”
9 Jaun₂ dsi₃lén₂ dsa₂ i₂ca₂tónꞌ₂ ca₂jmo₃ ta₁ hora ŋí₁ ꞌŋiá₂ të₂le₃ ca₂ꞌláu₂, jaun₂ le₂jain₂ le₂jain₂ ca₂gue₃ ꞌliainꞌ₅₄ jma₃ca₂ꞌéiꞌ₃ cu₄ denario.
10 Jme₁co₂lág₂ jaun₂, ca₂tɨ́n₂ dsa₂ i₂ca₂i₃tonꞌ₅₄ le₂ꞌuɨg₅₄, i₃jiog₅ dsɨ́₅ a₂jme₁gue₃ guë́₄ ŋag₅₄ ꞌliainꞌ₅₄; la₁ co₂rë₂ bá₄ ꞌliainꞌ₅₄ ca₂gue₃ jma₃ca₂ꞌéiꞌ₃ cu₄ denario le₂jain₂ le₂jain₂.
11 La₁ jme₁ma₂në₂gue₃ ꞌliainꞌ₅₄, i₃léin₂ i₃chogꞌ₄ dso₄ ne₄ juɨg₅₄,
12 jaun₂ ca₂juáꞌ₂: “Dsa₂ i₂o₃lén₂ jë₁ca₂tóꞌ₂, caun₂ hora bá₄ në₂tióinꞌ₂ në₂jmo₃ ta₁; co₂jaun₂ bá₄ ꞌliainꞌ₅₄ në₂gue₃ ján₃ conꞌ₂ ꞌliogꞌ₅₄ jniaꞌ₅₄ i₂në₂tióꞌ₄ në₂jmó₁ ta₁ ta₁ne₁jmɨg₄ në₂ŋag₅₄ ꞌiog₂ dséi₂ ꞌŋio₅ lɨn₃.”
13 La₁ ca₂ŋag₃ juɨg₅₄ ca₂tsɨ́ꞌ₃ jan₂: “A₂mei₅₄ quiáng₃, tsá₃ ꞌe₂ juaꞌ₅₄ a₂tsá₃ dsi₂ten₅₄ jmo₅ jniá₂ ja₁congꞌ₂. ¿Tsa₁ ca₂lë₃ jág₁ a₂ꞌliangꞌ₅₄ ca₂ꞌéiꞌ₃ cu₄ denario guëꞌ₂?
14 Juɨ₁le₂ꞌŋio₂ ꞌauꞌ₂ conꞌ₂ ma₂ꞌliangꞌ₅₄ në₅, guanꞌ₂ quiángꞌ₂. Në₁juaꞌ₂ jniá₂ le₂në₅ ca₂lë₃ dsɨ₃ quɨ́₄ ꞌlianꞌ₅₄ dsa₂ i₂në₂tong₅₄ jë₁ca₂tóꞌ₂ conꞌ₂ ꞌlianꞌ₅₄ ꞌne₂,
15 ¿o₃ tsa₁ ca₂tɨ́n₂ jniá₂ jmo₅₄ quianꞌ₅₄ cu₄ quió₃ ꞌa₂ liaꞌ₂ jŋiaꞌ₅₄ ꞌnio₃ jmo₅₄? ¿O₃ ja₂ uɨg₅ ꞌauꞌ₂ ꞌe₂, ia₁ a₂ꞌua₁ dsɨ₃?”
16 ꞌJaun₂ në́₃ juɨ₁liaꞌ₂ dsa₂ i₂lɨ́n₅ të₂le₃ jë₁ca₂tóꞌ₂ rë₂në́₃, léin₂ i₂le₂ꞌuɨg₅₄ jmɨg₄ jaun₂; le₂në₅ bá₄ ján₃, juɨ₁liaꞌ₂ i₂lɨ́n₅ i₂le₂ꞌuɨg₅₄ rë₂në́₃, léin₂ dsa₂ të₂le₃ jë₁ca₂tóꞌ₂.
Conꞌ₂ siáꞌ₂ táng₃ ca₂ꞌë́₂ Jesús jág₁ a₂jóin₂
17 Jme₁ma₂ꞌen₅₄ Jesús juɨ₅ uɨ́g₂ tso₄ a₂dsióg₄ Jerusalén, jaun₂ ca₂të́ꞌ₃ cau₅ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
18 ―Juɨ₁liaꞌ₂ jágꞌ₂ ꞌniaꞌ₂, tioꞌ₅₄ jniog₄ juɨ₅ tso₄ la₂ a₂dsi₁náu₅ Jerusalén. Ja₁jaun₂ jángꞌ₂ dsa₂ jɨ́inꞌ₂ Jaun₅* dsa₂ mɨ₂güɨ́g₃ o₄gú₃ juɨg₅₄ jme₂dsa₂, ne₄ të₅juáꞌ₅ në́₃; ꞌéi₂ guë́₄ në́₃ cuë₃ ꞌéiꞌ₃ a₂jŋagꞌ₃ dsa₂.
19 Jángꞌ₂ dsa₂ në́₃ o₄gú₃ dsɨ₂nau₂ ia₁jaun₂ jmógꞌ₂ burlas, qui₃bóg₂ dsa₂, jaun₂ guë́₄ tioin₃ cróg₄ jŋagꞌ₃; la₁ a₂ꞌnɨ₅ jmɨg₄ jaun₂, jeinꞌ₅₄ le₃chain₂ bá₄ táng₃.
Juɨ₁liaꞌ₂ a₂ca₂mɨ₃ chog₅₄ Jacobo quianꞌ₅₄ Juan₅₄
20 Jaun₂ ca₂jme₃quián₃ chog₅₄ Jacobo quianꞌ₅₄ Juan₅₄, ja₁ŋiꞌ₅₄ Zebedeo, ja₁ꞌen₅₄ Jesús. Jaun₂ ca₂chi₃jné₃ ca₂mɨ₃ a₂jmo₃ ꞌéi₂ dse₃ dsɨ́₅.
21 Jaun₂ ca₂ŋag₃ Jesús:
―¿ꞌE₂ ꞌniogꞌ₂ ꞌne₂?
Jaun₂ ca₂ŋag₃ chog₅₄ chiꞌ₂ ꞌéi₂:
―¿Tsa₁ cuë́ꞌ₁ jmɨg₄ a₂tianꞌ₃ jma₃jan₂ chiꞌ₂ quiáng₃ congꞌ₂, jë₁ma₂të́₂ rë₁neꞌ₅₄ gongꞌ₂ ne₄ta₁ quiángꞌ₂, jan₂ të₂le₃ gogꞌ₂ ne₁, jan₂ guëꞌ₂ të₂le₃ gogꞌ₂ jen₅?
22 La₁ Jesús në́₃ ca₂ŋag₃:
―Tsá₃ ŋiꞌ₅₄ ꞌniaꞌ₂ ꞌe₂ a₂mɨꞌ₂. ¿Tianꞌ₃ ꞌniaꞌ₂ dsɨ₃ŋɨ́gꞌ₂ ca₂le₃jë́₃ juɨ₁liaꞌ₂ a₂dsɨ₃ŋɨ́₂ jniá₂ guëꞌ₂?e
Jaun₂ ca₂ŋag₃ ꞌéi₂:
―Tián₂ bá₄ jniaꞌ₅₄.
23 Jaun₂ ca₂juáꞌ₂ táng₃ Jesús:
―Dsónꞌ₂ bá₄ jaun₂ dsɨ₃ŋɨ́ꞌ₂ ꞌniaꞌ₂ juɨ₁liaꞌ₂ ꞌa₂ liaꞌ₂ niog₅ dsɨ₃ŋɨ́₂ jniá₂,f la₁ juɨ₁liaꞌ₂ a₂juáꞌ₂ ꞌniaꞌ₂ në₅ a₂tiángꞌ₄ jma₃ca₂ton₂ cau₅ quió₃, on₃juaꞌ₅₄ jniá₂ ca₂tɨ́ng₂ cuë₅₄ a₂jaun₂. Ja₁jaun₂ ma₂jmo₃ Ŋeꞌ₃ jniá₂ co₂jŋia₅₄ a₂tianꞌ₃ conꞌ₂ i₂ca₂tɨ́n₂ bá₄.
24 Rɨinꞌ₅₄ i₂guian₃ guë́₄ ꞌéi₂ në́₃ ca₂rë₃ꞌnéi₃ quianꞌ₅₄ i₂on₃ ꞌéi₂ jme₁ca₂nág₂ jág₁ jaun₂.
25 La₁ ca₂të₃ Jesús, jaun₂ ca₂juáꞌ₂:
―Ŋiꞌ₅₄ bá₄ ꞌniaꞌ₂, juɨ₁liaꞌ₂ dsɨ₂tan₅₄ dsa₂ canꞌ₅₄ i₂tiánꞌ₅ gon₂ ca₂le₃jë́₃ juɨg₂,g qui₂toinꞌ₂ dsa₂ ꞌéiꞌ₃ bén₂. Le₂jaun₂ bá₄ jmo₅ juɨ₁liaꞌ₂ dsɨ₂tan₅₄ i₂sion₅ guë́₄, tiáinꞌ₅ goin₂ jmo₂₃ ꞌéiꞌ₃.
26 La₁ jɨnꞌ₄ ꞌniaꞌ₂, tsá₃ le₂jaun₂ lé₂. Chi₂juaꞌ₂ ꞌein₂ ꞌnio₃ jmo₃ juɨnꞌ₂, ca₂tɨ́in₂ jme₃ti₃ ta₁ ne₄ rɨinꞌ₅₄;
27 chi₂juaꞌ₂ ꞌein₂ ꞌniaꞌ₂ ꞌnio₃ cán₂ ne₄ juɨ₅, ꞌnióꞌ₅ jme₃ti₃ ne₄ ca₂le₃jɨ́n₃ dsa₂.
28 Ia₁ le₂në₅ bá₄ Jaun₅* dsa₂ mɨ₂güɨ́g₃, tsá₃ ta₁ jaun₂ já₅ juaꞌ₅₄ a₂jme₃ti₃ dsa₂ ne₅₄; a₂jme₃ti₃ ta₁ ne₄ dsa₂ bá₄ já₅, a₂quí₃ quianꞌ₅₄ ꞌmú₃ co₂ꞌnióꞌ₄ ꞌliaꞌ₅₄ ia₁jaun₂ tɨ́nꞌ₄ juɨn₅.
Ca₂jme₃ꞌlión₂ Jesús on₃ dsa₂ ten₄
29 Jme₁ma₂tioinꞌ₅₄ juɨ₅ ꞌuɨin₂ juɨg₂ Jericó, juɨn₅ dsa₂ ja₁jaun₂ ca₂jme₃quiainꞌ₅₄ Jesús.
30 Juɨ₅ ja₁ŋó₄ jaun₂, jme₁tiánꞌ₄ on₃ dsa₂ ten₄ cau₅ juɨ₅. Dsa₂ ꞌéi₂ në́₃ jme₁ca₂nág₂ a₂ŋó₅ Jesús cau₅ jaun₂, ca₂juáꞌ₂ tiá₂:
―¡Te₁guiꞌ₅₄, tsɨ₁jon₂ David, dsia₄ ŋéi₂ ꞌauꞌ₂ jniaꞌ₅₄!
31 Jaun₂ ca₂jí₂ bá₄ dsa₂ ia₁jaun₂ dsɨ₃léin₂ tei₄. La₁ të₂le₃ i₂juɨꞌ₂ guë́₄ co₂mɨꞌ₅₄ ca₂tóinꞌ₂ bá₄, ca₂juáꞌ₂:
―¡Te₁guiꞌ₅₄, tsɨ₁jon₂ David, dsia₄ ŋéi₂ ꞌauꞌ₂ jniaꞌ₅₄!
32 Jme₁ca₂nág₂ Jesús, jaun₂ ca₂nau₂, jaun₂ ca₂të́ꞌ₃ le₃on₃ dsa₂ ꞌéi₂, jaun₂ ca₂ŋag₃:
―¿ꞌE₂ ꞌniogꞌ₂ ꞌniaꞌ₂ jmo₅₄ jniá₂ o₄quiánꞌ₂ ꞌniaꞌ₂?
33 Jaun₂ ca₂ŋag₃ dsa₂ ꞌéi₂:
―Te₁guiꞌ₅₄, a₂jnia₅₄ mɨ₂ne₄ bá₄ jniaꞌ₅₄ ꞌniog₂.
34 Jaun₂ ca₂dsia₃ bá₄ Jesús ŋéi₂ dsɨ́₅, jaun₂ ca₂tí₂ gu₂ jme₁ne₁ dsa₂ ꞌéi₂. Jaun₂ dsɨ₂juɨ₅ le₂jaun₂ ca₂jnia₃ jme₁ne₁ dsa₂, jaun₂ i₃léin₂ bá₄ jaun₂ ca₂jme₃quiainꞌ₅₄ Jesús.