Jág₁ jángꞌ₅ léi₄ juɨ₁liaꞌ₂ jan₂ ꞌio₅₄ ꞌnág₂ quianꞌ₅₄ jan₂ juë́₄
18
Ca₂juáꞌ₂ Jesús caun₂ jág₁ a₂jángꞌ₅ léi₄, a₂ca₂jme₃tɨin₂₃ dsa₂ a₂ca₂tɨ́in₂ chi₃léinꞌ₂ Diú₄ tián₂, tsá₃ o₁ꞌúꞌ₄ dsɨ́₅.
San Lucas 18:1-17
2 Ca₂juáꞌ₂ le₂la₂:
―Caun₂ juɨg₂ jme₁guá₄ jan₂ juë́₄ i₂tsá₃ Diú₄ gan₃, on₃ guëꞌ₂ dsan₂ dsɨ́₅ dsa₂ mɨ₂güɨ́g₃ në́₃.
3 Ján₃ bá₄ juɨg₂ jaun₂ jme₁chan₂ jan₂ ꞌio₅₄ ꞌnág₂ i₂jme₁ja₂ i₂gúꞌ₃ ja₃jɨin₅₄ juë́₄ ꞌéi₂, jme₁ja₂juaꞌ₅₄: “Jme₁rë₂ jág₁ quió₃, qui₂dsɨ₅ ꞌéiꞌ₃ quióꞌ₅ dsa₂ i₂jmógꞌ₂ jniá₂.”
4 Uë́₂ bá₄ tsá₃ juɨ₅ tónꞌ₂ ꞌéi₂ juaꞌ₅₄ jme₃rë́₃. La₁ cang₂ bá₄ ca₂i₃jŋia₅ dsɨ́₅: “O₁jŋiaꞌ₅₄ la₂ tsá₃ Diú₄ gáng₅, on₃ guëꞌ₂ dsa₂ mɨ₂güɨ́g₃ dsan₂ dsɨ₃ në́₃,
5 la₁ia₁ ꞌuɨg₅₄ a₂ŋɨ́₄ lë₃ cuë₅ o₂meꞌ₅₄ dsɨ₃ ꞌio₅₄ ꞌnág₂ në₅, qui₁dsɨ₅ jniá₂ co₂ŋeiꞌ₅₄ ꞌéiꞌ₃ o₄quióꞌ₄, conꞌ₂ tsá₃ ŋó₅ në₁juaꞌ₂ caun₂ le₂në₅ ŋɨ₃, jmo₃ dsɨ₃méꞌ₂ dsɨ₃.”
6 Jaun₂ ca₂juáꞌ₂ Te₁guiꞌ₅₄:
―Ŋí₂ rë₂ a₂juáꞌ₂ juë́₄ ꞌlɨnꞌ₅₄ ꞌéi₂.
7 ¿Tsa₁ lɨ́nꞌ₂ ꞌniaꞌ₂, jme₃rë́₃ bá₄ Diú₄ ꞌe₂ a₂mɨ₅ dsa₂ i₂rë₂quionꞌ₅₄ quiáin₅ i₂quɨꞌ₂-ꞌáuꞌ₂ ca₂nei₂ ca₂jnia₃? ¿Tsa₁ lɨ́nꞌ₂ ꞌniaꞌ₂ caun₂ juɨnꞌ₂ dsɨ́₅ bá₄ quiongꞌ₅₄?
8 Juɨ́g₂ jniá₂ ꞌniaꞌ₂, dsɨ₂juɨ₅ bá₄ qui₃dsɨ₅ Diú₄ ꞌéiꞌ₃ o₄quióꞌ₄ i₂mɨ₅. La₁, jë₁ma₂të́₂ rë₁guanꞌ₂ Jaun₅* dsa₂ mɨ₂güɨ́g₃, ¿dsiainꞌ₂ bá₄ guë́₄ dsa₂ ꞌén₂ ne₄ guaꞌ₅₄ ꞌuë₃?
Jág₁ jángꞌ₅ léi₄ juɨ₁liaꞌ₂ on₃ dsa₂: jan₂ dsa₂ fariseo, jan₂ guëꞌ₂ dsa₂ i₂mɨ₅ ꞌliaꞌ₅₄ a₂ca₂tɨ́n₂ dsɨ₂tan₅₄
9 Ca₂juáꞌ₂ Jesús caun₂ jág₁ jángꞌ₅ léi₄ a₂ca₂tɨ́n₂ conꞌ₂ i₂lɨ́n₂ lɨ́in₅ dsa₂ dsen₃, tsá₃ dsáu₅ dsɨ́₅ rɨinꞌ₅₄ siánꞌ₂. Ca₂juáꞌ₂:
10 ―On₃ dsa₂ ca₂i₃lén₂ guáꞌ₅ templo* i₁chi₂i₁leinꞌ₄ Diú₄. Jan₂ ꞌéi₂ jme₁lɨ́n₄ fariseo*, jan₂ guëꞌ₂ i₂jme₁lɨ́n₄ ta₁ i₂mɨ₅ ꞌliaꞌ₅₄ a₂ca₂tɨ́n₂ dsɨ₂tan₅₄.
11 Dsa₂ fariseo në́₃, të₃ chéinꞌ₅ bá₄ chi₂líꞌ₂ conꞌ₂ ꞌŋiog₅, ca₂juáꞌ₂ le₂la₂: “Cuë́₅ jniá₂ ti₁ꞌmagꞌ₄, ꞌne₂ Diú₄ quiáng₃, ia₁ tsá₃ lɨ́ng₅ juɨ₁liaꞌ₂ lɨ́n₅ i₂lɨn₅₄: i₂qui₂ꞌang₅, i₂tsá₃ dse₃ jmo₅ ja₁con₂ rɨnꞌ₅₄, i₂nióꞌ₅ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂, ca₂liaꞌ₂ jŋiaꞌ₅₄ liaꞌ₂ lɨ́n₅ dsa₂ i₂mɨ₅ ꞌliaꞌ₅₄ në₅, tsá₃ lɨ́ng₅.
12 Jme₂ꞌɨng₅₄ në́₃ tɨn₃ ráun₂ liaꞌ₂ caun₂ semana, tonꞌ₂ cuë₅ bá₄ jniá₂ caun₂ quiꞌ₅₄ a₂guia₃ quió₃, jë₂ conꞌ₂ a₂lág₂.”
13 La₁ dsa₂ i₂mɨ₅ ꞌliaꞌ₅₄ ꞌéi₂ guëꞌ₂ në́₃, uɨ́ng₂ bá₄ chéinꞌ₅, ca₂liaꞌ₂ jŋiaꞌ₅₄ ne₅₄ bá₄ tsá₃ tiá₂ dsɨ́₅ chógꞌ₃ gueiꞌ₅₄. Jŋiaꞌ₅₄ conꞌ₂ qui₂quein₂₃ le₁dsɨ́₅ bá₄ chéinꞌ₅, juáꞌ₂: “Diú₄ quiáng₃, dsia₄ ŋéi₂ ꞌauꞌ₂ jniá₂ ia₁ rë₂cángꞌ₄ dso₄.”
14 Jaun₂ juɨ́g₂ jniá₂ ꞌniaꞌ₂, dsa₂ i₂mɨ₅ ꞌliaꞌ₅₄, ꞌéi₂ bá₄ tiá₂ rë₂ të₁tsɨnꞌ₅₄ ne₄ Diú₄ ŋáiꞌ₅ quióꞌ₅, liaꞌ₂ conꞌ₂ guë́₄ i₂jan₂. Ia₁ ca₂le₃jɨ́n₃ i₂jme₂canꞌ₅₄ guion₅₄, sióin₃; la₁ i₂jmo₅ meꞌ₂ guëꞌ₂ në́₃, roinꞌ₂ gueiꞌ₅₄.
Ca₂jme₃gonꞌ₅₄ Jesús chiꞌ₂-guein₂
15 Co₂ráun₂ guëꞌ₂, qui₂ca₂o₃jŋia₃ dsa₂ guein₂ quiáin₅ ne₄ Jesús, ia₁jaun₂ qui₃téi₂ gu₂. La₁ ca₂jí₂ bá₄ chiꞌ₂ dsɨ₂guia₃-tɨ́n₂ jme₁ca₂jág₂.
16 Jaun₂ ca₂të́ꞌ₃ Jesús guein₂, jaun₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂:
―Cuë₄ ꞌniaꞌ₂ jmɨg₄ ja₃lén₂ chiꞌ₂-guein₂ ja₁cong₂; tsá₃ lë₁jnɨiꞌ₅₄ juɨ₅. Ia₁ juɨ₁liaꞌ₂ i₂le₂në₅ bá₄ guëꞌ₂ i₂tɨn₃ ja₁gon₂ Diú₄.
17 A₂dsɨ₂jóꞌ₃ juɨ́g₂ jniá₂ ꞌniaꞌ₂, dsa₂ i₂tsá₃ gue₅ ja₁gon₂ Diú₄ juɨ₁liaꞌ₂ gue₅ jan₂ i₂bëꞌ₅₄, o₁lɨ́gꞌ₂ jmɨg₄ tsá₃ ꞌí₂ ja₁jaun₂.
Jan₂ dsó₂ chiꞌ₂ i₂cha₂ cu₄ ca₂dsia₃ jág₁ quianꞌ₅₄ Jesús
18 Jan₂ i₂lɨ́n₅ dsa₂ dsen₅₄ ca₂ŋɨ́iꞌ₃ Jesús:
―Të₅ dsen₃, ¿ꞌe₂ bá₄ ꞌnióꞌ₅ jmo₅₄ jniá₂ ia₁jaun₂ tɨng₅₄ ja₁le₃chang₂ co₂tan₅₄?
San Lucas 18:18-43
19 Jaun₂ ca₂ŋag₃ Jesús:
―¿ꞌE₂ lë₃ quiongꞌ₅₄ jniá₂ a₂dseng₃? ꞌI₁jan₂ i₂dsen₃ tsá₃ chan₂, jŋiaꞌ₅₄ liaꞌ₂ jan₂ Diú₄ bá₄.
20 Tɨngꞌ₂ bá₄ ꞌÉiꞌ₃ Juáꞌ₅: “Tsá₃ niógꞌ₄ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gogꞌ₂; tsá₃ jŋɨ́gꞌ₄ dsa₂ mɨ₂güɨ́g₃ rɨ́ngꞌ₂; tsá₃ ꞌángꞌ₁; tsá₃ jmóꞌ₂ dsáu₁ rɨ́ngꞌ₂ quianꞌ₅₄ jág₁ të₂jág₁; jme₁gangꞌ₃ chogꞌ₂-ŋéiꞌ₅.”
21 Ca₂ŋag₃ ꞌéi₂:
―Liaꞌ₂ conꞌ₂ bɨnꞌ₅₄ bá₄ jniá₂ ma₂guio₃ jme₂tí₁ ca₂le₃jë́₃ ꞌéiꞌ₃ në₅.
22 Jme₁ca₂nág₂ Jesús a₂në₅, jaun₂ ca₂juáꞌ₂:
―ꞌNióꞌ₅ bá₄ guë́₄ caun₂ quiángꞌ₂: ꞌnag₄ ca₂le₃jë́₃ a₂cha₂ quiángꞌ₂. Jaun₂ dsioꞌ₅₄ quióꞌ₅ dsa₂ te₂ŋé₂. Jaun₂ guë́₄ le₃cha₂ ꞌlióng₂ quiángꞌ₂ gueiꞌ₅₄ i₂juɨ́g₃. Jaun₂ ŋia₅ chi₁coꞌ₅₄ quió₃ o₁ló₄.
23 La₁ jme₁ca₂nág₂ dsa₂ ꞌéi₂ jág₁ në₅, ca₂táꞌ₂ ꞌliaꞌ₂ dsɨ́₅ ꞌŋio₅ lɨn₃, ia₁ ꞌŋio₅ lɨn₃ jme₁cha₂ cu₄.
24 Jme₁ca₂jág₂ Jesús, ca₂juáꞌ₂:a
―¡ꞌE₂ guë́₄ quian₅ ta₁ a₂tónꞌ₃ dsa₂ cha₂ cu₄ ja₁gon₂ Diú₄!
25 Ja₂lɨn₃ guë́₄ tsá₃ ta₁ quian₅ a₂lé₂ le₃ŋɨ₅ jan₂ camello* juɨ₅ tau₂ mɨ₂cu₄, liaꞌ₂ conꞌ₂ guë́₄ jan₂ dsa₂ cha₂ cu₄ ŋɨi₅ ꞌí₂ ja₁gon₂ Diú₄.
26 Jme₁ca₂nág₂ dsa₂ i₂tión₂ jë₄ jaun₂, ca₂juáꞌ₂:
―¿I₂ꞌein₂ bá₄ guëꞌ₂ i₂tɨ́nꞌ₄ jaun₂?
27 Jaun₂ ca₂juáꞌ₂ táng₃:
―Ca₂le₃jë́₃ a₂tsá₃ quɨꞌ₅₄ jmɨg₄ dsa₂ mɨ₂güɨ́g₃ jmo₃, Diú₄ lé₂ le₃jmo₃.
28 Jaun₂ ca₂juáꞌ₂ Pe₄:
―Te₁guiꞌ₅₄, ma₁ jniaꞌ₅₄ ma₂ca₂tí₄ ca₂le₃jë́₃ a₂jme₁cha₂ quián₂, a₂ma₂ja₂náu₅ ꞌén₅ ꞌne₂.
29 Jaun₂ ca₂ŋag₃ táng₃:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, ꞌi₁jan₂ tsá₃ juaꞌ₅₄ a₂lë₁táun₂ ꞌne₄, téin₂ chog₅₄-jmei₂, o₁rɨinꞌ₅₄, dsa₂ mɨ́₂, chiꞌ₂-guein₂ quiáin₅ në́₃, o₄quióꞌ₄ ja₁gon₂ Diú₄,
30 juaꞌ₅₄ tsá₃ gue₃ tson₂ guë́₄ ne₄ guaꞌ₅₄ ꞌuë₃ la₂, tonꞌ₂ le₃chain₂ dse₃ co₂tan₅₄ mɨ₂güɨ́g₃ caun₂.
Conꞌ₂ siáꞌ₂ táng₃ ca₂ꞌë́₂ Jesús jág₁ a₂jóin₂
31 Jaun₂ ca₂të́ꞌ₃ Jesús cau₅ jmáꞌ₃ liaꞌ₂ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―Në₃ guë́₄ në́₃ ca₂të́₂ jmɨg₄ a₂dsau₅₄ juɨg₂ Jerusalén, ja₁niog₅ le₃ti₃ ca₂le₃jë́₃ conꞌ₂ lë́₅ ca₂tóꞌ₂ dsa₂ i₂ꞌë́₂ jág₁ quián₅ Diú₄ ne₄ si₂, a₂ꞌɨin₂₃ Jaun₅ dsa₂ mɨ₂güɨ́g₃.
32 Jángꞌ₂ dsa₂ o₄gú₃ dsɨ₂nau₂, ja₁lë₁co₃jmógꞌ₂ dsa₂, qui₃të₃ꞌoꞌ₂ dsa₂, a₂qui₃ꞌŋéi₂ dsa₂ në́₃.
33 Jaun₂ jë₁ma₂ca₂lë₃ bóg₂, jaun₂ guë́₄ jŋagꞌ₃. La₁ jë₁ma₂ca₂të́₂ ꞌnɨ₅ jmɨg₄, jeinꞌ₅₄ bá₄ táng₃.
34 La₁ ꞌéi₂ në́₃, tsá₃ ꞌe₂ ca₂ŋɨ́iꞌ₂ ꞌi₁caun₂ jág₁ në₅, ia₁ lë́₅ jág₁ a₂rë₂ꞌma₄ bá₄ guë́₄ ja₁coin₂, tsá₃ jein₅ dsɨ́₅ ꞌe₂ jaun₂.
Ca₂jme₃ꞌlión₂ Jesús jan₂ dsa₂ ten₄ juɨg₂ Jericó
35 Conꞌ₂ jme₁ma₂ja₂quián₃ dsióg₄ Jesús juɨg₂ Jericó, jme₁guá₄ jan₂ dsa₂ ten₄ cau₅ juɨ₅, mɨ₂₃ a₂jme₃ꞌo₅₄ dsa₂ cu₄.
36 Jme₁ca₂nág₂ a₂qui₂ca₂ŋɨ₅ juɨn₅ dsa₂, jaun₂ ca₂ŋag₃ ꞌe₂ niog₅ lë́₂.
37 Jaun₂ ca₂juáꞌ₂ dsa₂:
―Jesús chan₂ Nazaret bá₄ në₅ já₅.
38 Jaun₂ ꞌéi₂ në́₃ ca₂juáꞌ₂ tiá₂ ca₂tsɨ́ꞌ₃ Jesús:
―¡Jesús, tsɨ₁jon₂ David, dsia₄ ŋéi₂ ꞌauꞌ₂ jniá₂!
39 Ca₂jí₂ bá₄ dsa₂ i₂ja₂lén₂ ne₄ juɨ₅ ia₁jaun₂ jmo₃ tei₄, la₁ të₂le₃ lë́₅ guë́₄ qui₂ca₂ꞌáuꞌ₂ bá₄ ꞌein₅₄, ca₂juáꞌ₂:
―¡ꞌNe₂ tsɨ₁jon₂ David, dsia₄ ŋéi₂ ꞌauꞌ₂ jniá₂!
40 Ca₂nau₂ Jesús, jaun₂ ca₂jmo₃ ꞌéiꞌ₃ a₂dsɨ₃quión₂ dsa₂. Jme₁ca₂dsióg₃ cau₅ quióꞌ₅, jaun₂ ca₂ŋag₃ Jesús:
41 ―¿ꞌE₂ ꞌniogꞌ₂ jmo₅₄ jniá₂ quiángꞌ₂?
Jaun₂ ca₂juáꞌ₂:
―Te₁guiꞌ₅₄, a₂jnia₅₄ jme₁ne₃ bá₄ jniá₂ ꞌnio₃.
42 Jaun₂ ca₂juáꞌ₂ Jesús:
―¡Gue₄, juɨ₁jnia₅₄ quiángꞌ₂! Ma₂ca₂ꞌlóngꞌ₂ bá₄, ia₁ ꞌéngꞌ₂.
43 Dsɨ₂juɨ₅ jaun₂ bá₄ ca₂jnia₃ mɨ₂ne₅₄. Jaun₂ ca₂ŋó₃ chi₁coꞌ₅₄ quióꞌ₅, jme₂juɨinꞌ₂ Diú₄. Ca₂le₃jɨ́n₃ bá₄ dsa₂ i₂ca₂të́₂ ne₄ a₂ca₂lë₃ jaun₂ ca₂jme₃juɨinꞌ₂ Diú₄ ján₃.