Jme₂tag₅ Jesús juɨ₁liaꞌ₂ ꞌa₂ liaꞌ₂ lë́₅ a₂tén₂ dsa₂ dsɨ₂i₂gu₂
19
Jme₁ca₂dsan₃ juáꞌ₂ Jesús jág₁ në₅, jaun₂ ca₂o₃ꞌɨ́in₃ ꞌuë₃ Galilea, jaun₂ ca₂dsióg₃ të₂le₃ quióng₄ Cuá₃ Jordán.
2 Juɨn₅ lɨn₃ dsa₂ ca₂jme₃quiongꞌ₅₄, jaun₂ ca₂jme₃ꞌlióin₂ dsa₂ i₂qui₂le₁dsoꞌ₅₄.
3 Jaun₂ në́₃, i₂lɨn₅₄ dsa₂ fariseos* ca₂jme₃quiáin₃ con₂ Jesús a₂jŋiaꞌ₅₄ conꞌ₂ cáun₂ táu₂. Jaun₂ ca₂ŋag₃:
―¿ꞌI₄ ꞌéiꞌ₃ a₂tén₂ dsa₂ dsɨ₂i₂gu₂ ne₄ ꞌuɨg₅₄ në₁ꞌe₂ caun₂ a₂lë₃?
4 Jaun₂ ca₂ŋag₃ Jesús:
―¿Tsa₁ ma₂ca₂ꞌíꞌ₂ ꞌniaꞌ₂ ne₄ Si₂, ja₁juáꞌ₂ i₂ca₂jmóꞌ₂ dsa₂ mɨ₂güɨ́g₃ le₂ne₁: “Ca₂jmóiꞌ₂ dsa₂ ŋeꞌ₂ dsa₂ mɨ́₂ në́₃”?a
5 Ca₂juáꞌ₂ në́₃: “ꞌUɨg₅₄ jaun₂ ca₂tɨ́n₂ dsa₂ ŋeꞌ₂ téin₂ chog₅₄-jmei₂ jaun₂ conꞌ₂ tiainꞌ₃ quiainꞌ₅₄ dsɨ₂i₂gu₂, jaun₂ jë₁le₃oin₃ léin₂ caun₂ bá₄ nɨ₁ŋɨ́₅.”b
6 Jaun₂ dsióg₄ léin₂ jan₂ bá₄, tsá₃ ma₃lë́₂ oin₃. Jaun₂ tsá₃ ꞌi₄ ꞌéiꞌ₃ juaꞌ₅₄ jmo₃ dsa₂ mɨ₂güɨ́g₃ jma₃quén₅ a₂ma₂ca₂dsia₃ Diú₄ rë₂.
7 Jaun₂ ca₂ŋag₃ táng₃ dsa₂ fariseos:
―¿ꞌE₂ guëꞌ₂ lë₃ në́₃ ca₂jmo₃ Moisés ꞌéiꞌ₃ a₂lé₂ le₃jmo₃ dsa₂ ŋeꞌ₂ caun₂ si₂ të₃ron₅₄ cuë́ꞌ₃ ꞌio₅₄ ja₁juáꞌ₂ a₂téin₂ rɨinꞌ₅₄, jaun₂ guë́₄ ma₂lé₂ dsei₂₃?
8 Jaun₂ ca₂juáꞌ₂ Jesús:
―ꞌUɨg₅₄ ia₁ a₂ŋɨ́₄ tsá₃ nágꞌ₁ ꞌniaꞌ₂ guiongꞌ₅₄ bá₄ jaun₂ ca₂cuë₃ ꞌéi₂ jmɨg₄ a₂tén₂ dsa₂ dsɨ₂i₂gu₂; la₁ liaꞌ₂ conꞌ₂ le₂ꞌuɨg₅₄ tsá₃ le₂në₅ jme₁lë́₄.
9 La₁ jniá₂ juáꞌ₅, juɨ₁ꞌein₂ guë́₃ i₂lë₁tén₂ dsɨ₂i₂gu₂, on₃juaꞌ₅₄ a₂cha₂ lë₃, në₁juaꞌ₂ on₃ guëꞌ₂ juaꞌ₅₄ ia₁ a₂nióꞌ₅ jág₁ quianꞌ₅₄ i₂siánꞌ₂; në₁juaꞌ₂ jë₁ma₂ca₂lë₃ jaun₂, cáin₂ táng₃ ꞌio₅₄ siánꞌ₂, ꞌno₂₃ dso₄ ne₄ Diú₄; ján₃ bá₄ le₂në₅ quianꞌ₅₄ dsa₂ ŋeꞌ₂ i₂jénꞌ₂ gu₂ quianꞌ₅₄ jan₂ ꞌio₅₄ i₂ma₂téi₂ dsa₂ në́₃, ján₃ bá₄ le₂jaun₂ ꞌno₂₃ dso₄ ne₄ Diú₄.
10 Jaun₂ lë₃, ca₂juáꞌ₂ chiꞌ₂ dsɨ₂guia₃-tɨ́n₂ quiáin₅:
―Në₁juaꞌ₂ le₂në₅ cha₂ o₂meꞌ₅₄ dsɨ₅ quióꞌ₅ dsa₂ ŋeꞌ₂ dsa₂ mɨ́₂, ¿tsa₁ dse₃ juaꞌ₅₄ a₂tsá₃ jéinꞌ₂ co₂ŋeiꞌ₅₄ gu₂?
11 Jaun₂ ca₂juáꞌ₂ táng₃ Jesús:
―Tsá₃ ca₂le₃jɨ́n₃ lé₂ le₃ŋɨ́ꞌ₂ dsɨ́₅ juaꞌ₅₄ lé₂ le₃jmo₃ le₂në₅; jŋiaꞌ₅₄ liaꞌ₂ i₂ma₂cuë₃ Diú₄ bí₂ a₂le₃ŋɨ́iꞌ₂.
12 ꞌLióng₂ bá₄ ꞌuɨg₅₄ cha₂ a₂tsá₃ le₃jénꞌ₂ dsa₂ ŋeꞌ₂ i₂lɨn₅₄ gu₂; ia₁ i₂lɨn₅₄ le₂jaun₂ ma₂lɨ́in₅ liaꞌ₂ conꞌ₂ jme₁ca₂rë₃cháin₃ a₂tsá₃ lé₂ le₃jéinꞌ₂ gu₂; i₂lɨn₅₄ guëꞌ₂ në́₃, ia₁ a₂ma₂ca₂jmógꞌ₂ dsa₂ mɨ₂güɨ́g₃ rɨinꞌ₅₄ téꞌ₃; i₂lɨn₅₄ guëꞌ₂ në́₃, ia₁ a₂co₂ŋeiꞌ₅₄ ma₂quíꞌ₃ dsɨ́₅ a₂tsá₃ jéinꞌ₂ gu₂ ne₄ o₄quióꞌ₄ ja₁gon₂ Diú₄. Juɨ₁liaꞌ₂ i₂tióꞌ₅ jme₃ti₃ jág₁ la₂, juɨ₁jmo₁₂.
Ca₂jme₃gonꞌ₅₄ Jesús chiꞌ₂-guein₂
13 Jaun₂ ca₂o₃jŋia₃ i₂lɨn₅₄ dsa₂ ca₂o₃jŋiai₃ guein₂ quiáin₅ ne₄ Jesús ia₁jaun₂ qui₃nɨ́iꞌ₂ gu₂, tsɨ́ꞌ₃ Diú₄ o₄quióꞌ₄ në́₃. La₁ chiꞌ₂ dsɨ₂guia₃-tɨ́n₂ në́₃ ca₂jéin₂ dsa₂.
14 La₁ Jesús në́₃, ca₂juáꞌ₂:
―Cuë₄ ꞌniaꞌ₂ jmɨg₄ juɨ₁ja₂lén₂ chiꞌ₂-guein₂ cong₂; tsá₃ lë₁jmo₂ ꞌniaꞌ₂ le₂në₅ juaꞌ₅₄ jnɨgꞌ₅₄, ia₁ juɨ₁liaꞌ₂ i₂le₂në₅ bá₄ guëꞌ₂ i₂ca₂tɨ́n₂ ja₁gon₂ Diú₄.
15 Jme₁ca₂lë₃ chi₂láinꞌ₂ le₂jan₂ le₂jan₂ guein₂ a₂jme₂guꞌ₅₄, ca₂ŋáiꞌ₃ bá₄ jaun₂.
Jan₂ dsó₂ chiꞌ₂ cha₂ cu₄ ca₂dsia₃ jág₁ quiainꞌ₅₄ Jesús
16 Jan₂ dsó₂ chiꞌ₂ ca₂jme₃quián₃ con₂ Jesús, jaun₂ ca₂ŋag₃:
―Të₅ dsen₃, ¿ꞌe₂ jmo₅₄ jniá₂c ia₁jaun₂ léi₂ ja₁le₃chang₂ co₂tan₅₄?
17 Jaun₂ ca₂juáꞌ₂ Jesús:
―¿ꞌE₂ lë₃ të́ꞌ₅ jniá₂ dsen₃?d Jŋiaꞌ₅₄ liaꞌ₂ jan₂ bá₄ i₂chan₂ i₂lɨ́n₅ i₂dsen₃, i₂ꞌéi₂ lɨ́n₅ Diú₄. La₁ në₁juaꞌ₂ ꞌniogꞌ₂ ꞌúꞌ₄ ja₁le₃changꞌ₂ co₂tan₅₄, jme₁ti₁ ꞌéiꞌ₃ quióꞌ₅ Diú₄.
18 Jaun₂ ca₂ŋag₃ táng₃ dsó₂ ꞌéi₂:
―¿ꞌE₂ ꞌéiꞌ₃?
Jaun₂ ca₂ŋag₃ táng₃ Jesús:
―Tsá₃ jŋɨ́gꞌ₄ dsa₂ mɨ₂güɨ́g₃ rɨ́ngꞌ₂; tsá₃ niógꞌ₄ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gogꞌ₂; tsá₃ ꞌángꞌ₁ a₂cha₂ quióꞌ₅ rɨ́ngꞌ₂; tsá₃ jmóꞌ₂ juaꞌ₅₄ jangꞌ₅₄ jág₁ të₂jág₁ a₂jmagꞌ₅₄ rɨ́ngꞌ₂;
19 a₂jme₁gangꞌ₃ chogꞌ₂-ŋéiꞌ₅;e a₂jme₁ꞌniógꞌ₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂ në́₃.f
20 Jaun₂ ca₂ŋag₃ táng₃ dsó₂ ꞌéi₂ ca₂tsɨ́ꞌ₃ Jesús:
―Ca₂le₃jë́₃ a₂në₅ ma₂guio₃ jme₂tí₂. ¿ꞌE₂ guë́₄ a₂siáꞌ₂ ꞌnióꞌ₅ jmo₅₄?
21 Jaun₂ ca₂ŋag₃ táng₃ Jesús:
―Në₁juaꞌ₂ ꞌniogꞌ₂ léngꞌ₂ jan₂ dsa₂ i₂rë₂ꞌŋia₅ të₂le₃ quióꞌ₅ jme₂dsí₂, guanꞌ₂ o₂ꞌnag₄ ca₂le₃jë́₃ a₂cha₂ quiángꞌ₂, jaun₂ o₂dsioꞌ₅₄ ja₁con₂ dsa₂ te₂ŋé₂, jaun₂ le₂në₅ le₃cha₂ a₂jláꞌ₁ quiángꞌ₂ gueiꞌ₅₄ i₂juɨ́g₃; jaun₂ guë́₄ ŋeꞌ₅₄ quianꞌ₅₄ jniá₂.
22 La₁ jme₁ca₂nág₂ dsó₂ jág₁ në₅, ca₂ŋáiꞌ₃ ꞌliaꞌ₂ dsɨ́₅, ia₁ ꞌŋio₅ lɨn₃ jme₁cha₂ cu₄.
23 Jaun₂ ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, ꞌe₂ guë́₄ quian₅ ta₁ quióꞌ₅ jan₂ dsa₂ cha₂ cu₄ a₂ꞌí₂ gueiꞌ₅₄ i₂juɨ́g₃ ja₁gon₂ Diú₄.
24 Juáꞌ₅ jniá₂, tsá₃ guë́₄ ꞌe₂ ta₁ quian₅ a₂lé₂ le₃ŋɨ́₃ jan₂ jáꞌ₂ camello* juɨ₅ tau₂ mɨ₂cu₄, liaꞌ₂ conꞌ₂ guë́₄ jan₂ dsa₂ cha₂ cu₄ a₂ꞌí₂ ja₁gon₂ Diú₄.
25 Jme₁ca₂nág₂ chiꞌ₂ dsɨ₂guia₃-tɨ́n₂ quiáin₅ jág₁ në₅, ꞌŋio₅ lɨn₃ ca₂i₃góꞌ₃ dsɨ́₅, jaun₂ qui₂ca₂ŋɨ́iꞌ₃ rɨinꞌ₅₄ conꞌ₂ guioin₅₄:
―¿I₂ꞌein₂ bá₄ guëꞌ₂ jaun₂ në́₃ i₂lé₂ le₃tɨ́nꞌ₄?
26 Jaun₂ ca₂jág₃ Jesús ca₂jɨ́in₂ ꞌéi₂, jaun₂ ca₂juáꞌ₂:
―Dsónꞌ₂ bá₄ jaun₂, të₂le₃ quióꞌ₅ dsa₂ mɨ₂güɨ́g₃ o₁lɨ́gꞌ₂ tsá₃ lé₂ le₃lé₂. La₁ të₂le₃ quióꞌ₅ Diú₄, ca₂le₃jë́₃ bá₄ lé₂ le₃lé₂.
27 Jaun₂ ca₂juáꞌ₂ Pe₄ në́₃:
―Te₁guiꞌ₅₄, ca₂le₃jë́₃ ꞌe₂ a₂jme₁cha₂ quián₂ jniaꞌ₅₄ ma₂ca₂ténꞌ₃ dsɨ₅ jniaꞌ₅₄ ma₂qui₂ca₂tí₄ ia₁ a₂ꞌén₅ jniaꞌ₅₄ ꞌne₂. ¿ꞌE₂ a₂tag₃ jniaꞌ₅₄ në́₃?
28 Jaun₂ ca₂ŋag₃ Jesús ca₂juáꞌ₂:
―A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, jë₁ma₂ca₂të́₂ jmɨg₄ i₁le₃ꞌmagꞌ₂ ca₂le₃jë́₃ ꞌa₂ liaꞌ₂ niog₅ lë́₅ mɨ₂güɨ́g₃, jë₁ma₂ca₂të́₂ rë₁guá₃ Jaun₅* dsa₂ mɨ₂güɨ́g₃ ne₄ta₁ jláꞌ₁ quióꞌ₅, jaun₂ ꞌniaꞌ₂ në́₃ i₂ma₂ja₂nógꞌ₅ quiongꞌ₅₄ jniá₂, nio₃ gogꞌ₂ ꞌniaꞌ₂ jma₃cáun₃ ta₁ a₂tiángꞌ₄ jmóꞌ₂ gongꞌ₂ qui₁dsɨ́ꞌ₂ ꞌéiꞌ₃ ta₁guia₃-tɨ́n₂ nióꞌ₃ dsa₂ juɨg₂ tsɨ₁jon₂ Israel*.
29 Ján₃ bá₄ le₂jaun₂ ján₃, ca₂le₃jɨ́n₃ i₂ma₂ca₂ténꞌ₃ dsɨ́₅ dsi₂néi₂ quióꞌ₅, i₂ma₂ca₂ténꞌ₃ dsɨ́₅ chiꞌ₂ rɨnꞌ₅₄, o₃ chog₅₄-jmei₂, o₃ dsa₂ mɨ́₂ quiáin₅, o₃ chiꞌ₂ quiáin₅, i₂ca₂ténꞌ₃ dsɨ́₅ ca₂tí₂ ja₁nau₂ quióꞌ₅ në́₃, ꞌuɨg₅₄ quió₃ jniá₂, ia₁ gue₃ caun₂ ꞌŋiá₂-láu₂ ŋag₅₄ guë́₄ liaꞌ₂ conꞌ₂ guë́₄ a₂ma₂ca₂tí₂, tonꞌ₂ gue₃ ján₃ a₂le₃chain₂ co₂tan₅₄.
30 La₁ rë₂në́₃ juɨn₅ lɨn₃ i₂lɨ́n₅ i₂quen₅, la₁ jmɨg₄ jaun₂ léin₂ dsa₂ të₂le₃ jë₁ca₂tóꞌ₂; le₂jaun₂ bá₄ ján₃ juɨ₁liaꞌ₂ i₂tsá₃ ꞌe₂ quen₅ rë₂në́₃ liaꞌ₂ conꞌ₂ niog₅ lɨ́n₂ dsa₂ mɨ₂güɨ́g₃, léin₂ i₂le₂ꞌuɨg₅₄.